د لاسرسۍ وړ لېنکونه

تازه خبر
دوشنبه ۱۰ لیندۍ ۱۳۹۹ کابل ۰۳:۴۱

نړۍ

امریکا کې تېرو ۲۴ ساعتونو کې ۹,۱۰۰۰ کسان په کرونا اخته شوي

په کرونا اخته شوی کس

د امریکا په متحده ایالتونو کې د ۲۴ ساعتونو په لړ کې په کرونا ویروس د یو نوي زره (۹۱۰۰۰) کسانو د اخته کېدو بې‌ساری شمېر ثبت شو.

د جانز هاپکنز پوهنتون د شمېرو له مخې په امریکا کې پرون په کرونا ویروس د اخته کسانو شمېر ۸ میلیونو او ۹ لکو ته ورسېد او په دې ویروس د مړو شمېر تر ۲ لکو او ۲۸زرو اوښتی دی.

د امریکا د براون پوهنتون د عامې روغتیا مشر ډاکټر اشیش جها رویټرز اژانس ته وویل: "اوس په امریکا کې وضعیت ډېر ناوړه دی."

د اروپا په ګڼو هېوادونو کې د کرونا ویروس بیا خپرېدو د دې لویې وچې ګڼ هېوادونه د محدودیتونو سختولو ته اړ کړي دي.

په وروستیو کې فرانسې رستورانتونه او ځینې نور غیرحیاتي کار و بارونه بند کړي، هاخوا په جرمني کې هم د نوامبر له دوېیمې دېته وَرته محدودیتونه لګول کېږي.

د ورځې تازه خبرونه دلته ولولئ

بېلاروس کې د اعتراضونو دوام؛ لسګونه لاریون کوونکي نیول شوي

ښايي د ورځې په اوږدو کې د نیولو شویو لاریون کوونکو شمېر زیات شي. 

د بېلاروس امنیتي ځواکونو نن لسګونه لاریون کوونکي ونیول.

خلکو په بېلاروس کې د اګست له ۹ د الکساندر لوکاشینکا پر ضد لاریونونه پیل کړل او هر وار د پولیسو له خوا نیول شوي.

د یکشنبې په ورځ په پلازمېنه مېنسک کې لږ تر لږه ۴۵ تنه نیول شوي.

ښايي د ورځې په اوږدو کې د نیولو شویو لاریون کوونکو شمېر زیات شي.

الکساندر لوکاشینکا د اګست نهمې ولسمشرۍ ټاکنو کې بریالی اعلان شوی خو خلک او اپوزیسیون یې نه منی او وايي، چې لوکاشینکا په درغلیو ځان ولسمشر کړی.

اروپايي ټولنې په الکساندر لوکاشینکا بندیزونه هم لګولي او د هغه بیا ځلي ټاکنه یې په رسمیت نه ده پېژندلې.

لوکاشینکا نږدې درې لسیزې په بېلاروس واک چلوي.

پېژندل شويو دوو متقاعدو سوک وهونکو تېره شپه لوبه کړې

دوی دواړه په ځوانۍ کې څو دورې د اتلولۍ کمربندونه ګټلي دي.

په نړیواله کچه پېژندل شویو متقاعدو سوک وهونکو مایک ټایسن او روی جونز بېګا له خیریه ټولنو سره د مرستې په هدف سره ولوبېدل.

لوبه د داورانوله خوا مساوي اعلان شوه.

ټایسن څلور پنځوس کلن اورویجونز ۵۱ کلن دی.

دوی دواړه په ځوانۍ کې څو دورې د اتلولۍ کمربندونه ګټلي دي.

لوبه د لاس انجلس ښار په سټاپلس مرکز کې وشوه.

خلک ځکه لیدو ته نه و ورپرېښودل شوي چې امریکا د کرونا ویروس د محدودیتونو په خاطر داسې لوبې یواځې په ټلویزیون ښکاروي.

سبا په خيبر پښتونخوا کې پولیو ضد واکسین کمپاين پيلېږي

آرشیف

د پاکستان د خیبرپښتونخوا ایالت د پوليو د کنټرول اداره سر له سبا د پولیو د واکسین یو اوونیز کمپاین پيلوي.

د خیبرپښتونخوا د پولیو ضد د کمپاین مسوولینو د ازادي راډیو مشال څانګې ته ویلي چې ټول ټال ۶۴ لکه ماشومان به په دې اوه ورځنۍ دوره کې واکسین شي.

د خیبرپښتونخوا په لرو پرتو سیمو کې ځینې خلک اجازه نه ورکوي چې ماشومان یې د پولیو پر ضد واکسین واخلي.

د یوه فلج شوي ماشوم حمزه خان پلار سخت پښېمانه دی چې زوی یې نه دی واکسین کړی.

هغه زياتوي: "خلک دې سرغړونه نه کوي، د خدای په خاطر دا ډېره خطرناکه ناروغي ده، ما یې زور وليد، ما د دغه هلک ګرمي ولیدله، که الله بچ کړ خو ښه کار به وي خو که نه شو د ده به څه ژوند وي؟."

سږ ۲۰۲۰ کال په پاکستان کې ۶۵ ماشومان په ګوزڼ اخته شوي چې ۲۲ یې په خیبرپښتونخواه کې دي.

روسیه کې د بندیزونو نه‌رعایتولو په خاطر تر یو میلیون ډېر کسان جریمه شوي

روسیه کې روغتیايي کارکوونکی

د روسیې پولیسو تر یو میلیون ډېر خلک په دې خاطر جریمه کړي چې د کرونا ویروس د نه‌خپرېدو لپاره بندیزونه‌یې نه‌دي رعایت کړي.

د روسیې د کورنیو چارو وزارت پرون (شنبه) تاس خبري اژانس ته وویل، قانون نافذوونکو د قرنطین د مقرراتو د نه‌رعایتولو په خاطر یو میلیون او ۱۰۰ زره کسان جریمه کړي دي.

د کرونا ویروس د بندیزونو د نه‌رعایتولو په خاطر په روسیه کې لږترلږه جریمه زر روبله ده چې ۱۳ ډالره کېږي.

روسیه په نړۍ کې د کرونا د مثبتو پېښو د ډېروالي له نظره څلورم هېواد دی.

تر اوسه په دغه هېواد کې ۲ میلیونه او ۲ لکه تنه په کرونا ویروس اخته شوي او ۳۹ تنه ورڅخه مړه شوي دي.

په اروپا کې په کرونا ویروس د مړینو شمېر تر ۴ لکو واوښت

اسپانیا کې د کرونا ویروس له امله د مړه شويو کسانو د خښولو لړۍ

د اروپا د ناروغیو د مخنیوي او کنټرول د مرکز د شمېرو پر اساس، په تېرو ۸ میاشتو کې چې کرونا وبا خپره شوې ده، په اروپا کې ۴ لکه ۹۵۰ تنه مړه شوي دي.

تر ټولو ډېر کسان په پنځو هېوادونو؛ لکه بریتانیا، ایټالیا، فرانسې، اسپانیا او روسیه کې مړه شوي دي.

د امریکا په متحده ایالاتو کې بیا یوازې په نومبر میاشت کې ۴ میلیونه مثبتې پېښې ثبت شوي چې د ورتېرې میاشتې دوه برابره دي.

په دې هېواد کې د ورځې په متوسط ډول نږدې یو نیم زر تنه مري او د دې ویروس د خپرېدو له پیله تر اوسه څه باندې ۲ لکه ۶۶ زره تنه مړه شوي دي.

له روسیې څخه جرمني ته د 'نارد ستریم ۲' نل‌لیکې د جوړولو کار بیا پیلېږي

دا نل‌لیکه د بالتیک سمندرګي په تل کې تېرېږي.

له روسیې څخه جرمني ته د 'نارد ستریم ۲' په نوم د نل‌لیکې د جوړولو کار به د امریکا د بندیزونو له کبله له یو کال ځنډه وروسته د ډسمبر په لومړیو کې پیل شي.

دا نل‌لیکه د بالتیک سمندرګي په تل کې تېرېږي.

'نارد ستریم ۲' کمپنۍ پرون (شنبه) وویل، تر سمندر لاندې د نل‌لیکې د اېښودلو کار به ژر پیل کړي.

د جرمني 'اېن ډي ار ۱' راډیو وویل چې د دې پایپ لاین د جوړولو کار به د ډسمبر په پنځمه پیل شي.

د دې نل‌لیکې د جوړولو کار د ۲۰۱۹ په ډسمبر کې وروسته له دې وځنډول شو چې امریکا پر دې پروژې بندیزونه ولګول.

د دې پروژې د بشپړېدو په صورت کې به جرمني ته د روسیې د ګازو صادرات دوه برابره شي.

سبا د شانګهای د همکارۍ تړون د دایمي او څارونکو غړو سرمشریزه دایرېږي

ارشیف، بیجنګ کې د شانګهای د همکارۍ تړون سرمشریزه

د شانګهای د همکارۍ تړون د دایمي او څارونکو غړو سرمشریزه سبا (دوشنبه) د هند په کوربه‌توب په انلاین یا مجازي ډول دایرېږي.

په دې غونډه کې به د افغانستان ولسمشر اشرف غني هم وینا وکړي.

ټاکل شوې ده چې په دې سرمشریزه کې چې د کرونا ویروس د خپرېدو له کبله په انلاین ډول جوړېږي، د ۸ غړو او ۴ څارونکو هېوادونو مشران ګډون وکړي.

چین، روسیه، قرغزستان، قزاقستان، ازبکستان، تاجکستان، هند او پاکستان د دې تړون دایمي غړي دي.

افغانستان، ایران، بلاروس او منګولیا یې څارونکي غړي دي.

دا ځل به د هند په بلنه ترکمنستان هم د ځانګړي مېلمه هېواد په توګه په دې کنفرانس کې ګډون ولري.

پاپ فرانسېس ۱۳ نوي کاردینالونه وټاکل

د نړۍ د کاتولیک عیسویانو مشر پاپ فرانسېس

د نړۍ د کاتولیک عیسویانو مشر ۱۳ نوي کاردینالونه وټاکل.

پاپ فرانسېس دوی ته پرون شنبه په واتیکان ښار کې د کرونا ویروس له کبله په محدودو مراسمو کې ګوتمۍ او ځانګړې خولۍ ورکړې.

کاردینال تر پاپ وروسته دوهم مقام لري چې د پاپ د ټاکلو صلاحیت هم لري.

پخوا به په سنټ پیټر کلیسا کې په زرګونه کسانو په دغسې مراسمو کې برخه اخیسته، خو پرون د هر کاردینال ۱۰ مېلمنو ګډون کړی و.

په دغو مراسمو کې له پاپ فرانسېس پرته نورو ماسکونه کارولي وو او له یو بله‌یې فاصله درلوده.

پاپ فرانسېس تر اوسه د ۱۲۸ کاردینالونو له ډلې ۵۷ فیصده‌یې ټاکلي دي.

زلنسکي: د ستالین د دورې کاختي د اوکراین د وګړو نسل وژنه وه

د اوکراین ولسمشر ولادیمیر زلنسکي

د اوکراین ولسمشر د ستالین د دورې کاختي یا (هولو دومور) د اوکراین د وګړو نسل وژنه وبلله.

ولادیمیر زلنسکي پرون (د نومبر ۲۸مه) د «هولو دومور» د قربانیانو په یاد په یوه وېډیويي پیغام کې وویل: "هولو دومور چې د ستالین د استبدادي رژیم له‌خوا زموږ د خلکو د نسل وژنې لپاره پیل شو، د اوکراین د ملیونونو وګړو د مړینې سبب شو. دا د اوکراین له هغه شمېر وګړو سره چې په دوهمه نړیواله جګړه کې وژل شوي وو، برابر دي. موږ هغه پېښه نه‌هېروو او نه‌یې بخښلی شو."

اټکل کېږي چې له ۱۹۳۲ څخه تر ۱۹۳۳م کلونو پورې له دوه‌نیم میلیونو تر اووه‌نیم میلیونو پورې اوکراینیان د ستالین تر رهبرۍ لاندې د پخواني شوروي اتحاد پر مهال مړه شوي وو.

نګورنو قره‌باع کې ماین چاودنې څلور ملکیان ووژل

نګورنو قره‌باغ کې اذربایجاني ځواکونه د ماین پاکۍ پر مهال

د اذربایجان لویه څارنوالي وايي څلور ملکیان‌یې هغه وخت ووژل شول چې موټر یې پر یوه ټانک ضد ماین وربرابر شو.

د څارنوالۍ په وینا، دغه چاودنه پرون د لانجمنې سیمې نګورنو قره باغ په فیزولي سیمه کې وشوه.

د اذربایجان لویې څارنوالۍ په یوه اعلامیه کې ویلي، د پېښې په اړه څېړنې پیل شوې دي.

د ارمنستان او نګورنو قره‌باغ چارواکو تر اوسه د دې پېښې په اړه څه نه‌دي ویلي.

په هغه جګړه کې چې د ارمنستان او اذربایجان د ځواکونو ترمنځ د سپټمبر میاشتې په وروستیو کې پیل شوه او شپږ اوونۍ یې دوام وکړ، اذربایجان پر فیزولي سیمه ولکه ټینګه کړه.

د روسیې په منځګړیتوب هغه اوربند چې د روانې میلادي میاشتې په لومړیو کې ورباندې موافقه وشوه، دا جګړه ختمه کړه.

خامنه يي د "محسن فخري زاده" د وژل کېدو غچ اخیستل وغوښتل

د فخري زاده د وژنې سيمه

د ایران مذهبي مشر آیت الله علي خامنه يي د دې هېواد د یوه وتلي اټومي ساینسپوه محسن فخري زاده د وژل کېدو د غچ اخیستو غوښتنه کړې ده.

خامنه يي نن پر خپله رسمي ویب پاڼه د دې قتل د تعقیب او عاملینو ته یې د سزا ورکولو غوښتنه کړې.

په همدې ورځ د ایران ولسمشر حسن روحاني هم د دې پېښې په تړاو اسراییل تورن کړ چې د امریکا د مزدور په توګه عمل کوي.

روحاني پر خپله رسمي ویب پاڼه لیکلي: "يو ځل بیا د نړیوالو اشرارو لاسونه د مزدور صهیونستي رژیم د دسیسې له کبله د دې هېواد د یوه بچي په وینو ولړل شول."

حسن روحاني نن د ایران د کابینې په غونډه کې وویل: "هم صهیونیستي رژیم او هم هغه کسان چې د ایران پر ضد دي، په دې باید پوه شي چې زموږ د ملګري فخري زاده په تلو سره به نور ډېر فخري زاده ګان ملا وتړي."

محسن فخري زاده د نومبر پر ۲۷ / پرون تهران ته نږدې په یوه وسله وال کمین کې ووژل شو.

د ایران د اټومي ادارې مشر علي اکبر صالحې نن ویلي، چې د فخري زاده وژنه به د ایران د اټومي پروګرام چاري اغېزمنې نه کړي.

د هند تر ولکې لاندې کشمیر کې د پرمختيايي شوراګانو ټاکنې ترسره کېږي

آرشیف، د کشمیر يوه سيمه

د هند تر ولکې لاندې کشمیر کې زرګونه کسان د سختو امنیتي تدابیرو او سړې هوا سره د سیمه ييزو پرمختیایې شوراګانو ټاکنو کې رایې ورکوي.

وروسته تر دې چې د هند صدراعظم نریندرا مودي تېر کال د دې سیمې نیمه خپلواکي او د دې سیمې بیل اساسي قانون یې لغوه کړ او دا سیمه یې په دوو فدرالي سیمو وویشله، دا لومړي انتخابات دي چې په کې ترسره کېږي.

بیلتون غوښتونکو وار له مخه له دې انتخاباتو سره مخالفت څرګند کړی دی.

دا انتخابات د سیمه ییزو پرمختیایي شوراګانو د ۲۸۰ څوکیو لپاره دي چې په اتو پړاوونو کې به ترسره شي او د ډسمبر په ۱۹مه به پای ته ورسېږي.

خامنه يي: د ساینس پوه 'فخري‌زاده' د وژلو د غچ دې واخیستل شي

د ایران ولسمشر وايي یو ځل بیا د نړیوالو اشرارو لاسونه د ایران د یوه بچي په وینو ولړل شول.

د ایران مذهبي مشر ایت الله علي خامنه يي د دې هېواد دیوه وتلي اټمي ساینس پوه محسن فخري زاده د وژل کېدو د غچ غوښتنه کړې ده.

خامنه یې نن شنبه (د لیندۍ ۸مه) پر خپله رسمي ویب پاڼه د دې قتل د تعقیب او عاملینو ته یې د سزا ورکولو غوښتنه کړې.

په همدې ورځ د ایران ولسمشر حسن روحاني هم د دې پېښې په تړاو اسرائیل تورن کړ چې د امریکا د مزدور په توګه عمل کوي.

روحاني پر خپله رسمي ویب پاڼه لیکلي: "یو ځل بیا د نړیوالو اشرارو لاسونه د مزدور صهیونستي رژیم د دسیسې له کبله د دې هېواد د یوه بچي په وینو ولړل شول."

محسن فخري زاده د نومبر پر ۲۷ مه پرون جمعه(د لیندۍ ۷مه) تهران ته نژدې په یوه وسله وال کمین کې ووژل شو.

د ایران د اټمي ادارې مشر علي اکبر صالحې نن ویلي چې د فخري زاده وژنه به د ایران د اټمي پروګرام چارې اغیزمنې نه کړي.

هندي کشمیر کې د سیمه ییزو پرمختیایي شوراګانو ټاکنې پیلېږي

ارشیف، کشمیر ، دا عکس تئزیني بڼه لري

د هند تر واک لاندې کشمیر کې نن د سیمه ییزو پرمختیایي شوراګانو ټاکنې پیلېږي.

وروسته تر دې چې د هند صدراعظم ناریندرا مودي د دې سیمې نیمه خپلواک واک تېر کال وګرځاوه، د دې سیمې بیل اساسي قانون یې لغوه کړ او دا سیمه یې په دوو فدرالي سیمو وویشله، دا لومړي انتخابات دي چې په کې ترسره کیږي.

د رای ورکوونکو د ساتنې لپاره په لسګونو زره اضافي سرتیرې سیمې ته استول شوي دي.

بیلتون غوښتونکو وار له مخه له دې انتخاباتو سره مخالفت څرګند کړی دی.

دا انتخابات د سیمه ییزو پرمختیایي شوراګانو د ۲۸۰ څوکیو لپاره دي چې په اتو پړاوونو کې به ترسره شي او د ډسمبر په ۱۹مه به پای ته ورسېږي.

عراق کې د الصدر پلویانو د حکومت د مخالفینو درې تنه وژلي

ارشیف، عکس تئزیني بڼه لري

په عراق کې د شیعه ګانو د رهبر مقتدا الصدر پلویانو د حکومت د مخالفینو په یوه کمپ باندې په برید سره درې تنه ووژل او لسګونه نور یې ټپيان کړل.

د حکومت مخالفینو په جنوبي ښار ناصریه کې کمپ جوړ کړی و.

د دې پېښې عیني شاهدانو او روغتیاپالانو د خلکو د وژنې او ټپي کېدو معلومات رسنیو ته ورکړي.

د تُندلاري شیعه رهبر مقتدا الصدر پلویانو د جمعې ترلمانځه وروسته د الحبوبي مرکزي میدان په لور ورغلل چېرته چې د حکومت مخالفین مظاهره چیان له اکتوبر راهیسې پرلت او لاریون کوي.

د پېښې شاهدانو ویلي چې د الصدر پلویانو د مظاهره چیانو په خیمو باندې ډزې وکړې او پترولي بمونه یې ور وغورځول او مظاهره چیان هم اړ شول چې غبرګون وښيي.

اخ او ډب تر شپې روان و او روغتیاپالانو ویلي چې ټپیان په مرمیو لګېدلي و.

مقتدا الصدر چې د عراق په پارلمان کې تر ټولو لویه ډله رهبري کوي تمه لري چې د دغه هېواد له وخت مخکې پارلماني ټاکنو کې مطلق اکثریت خپل کړي.

دی په دې سربېره چې له امریکا سره له ډېره وخت مخالفت پالي په عراق کې د ایران له نفوذ سره هم جوړ نه دی.

نور راوښيه

XS
SM
MD
LG