د لاسرسۍ وړ لېنکونه

تازه خبر
پنجشنبه ۱۳ لیندۍ ۱۳۹۹ کابل ۱۱:۵۵

افغانستان

په کندهار کې د زعفرانو نمایشي قطعې جوړېږي

آرشیف

په کندهار کې د زعفرانو نمایشي قطعې جوړېږي.

د کرنې او مالدارۍ وزارت ویاند اکبر رستمي نن ازادي راډيو ته وویل، چې د زعفرانو دغه لس نمایشي قطعې به په لس جریبه کرنیزه ځمکه کې جوړېږي چې په هر جریب ځمکه کې ۵۰۰ کیلو ګرامه د زعفرانو پیاز کرل کېږي.

نوموړی وايي، که په کندهار کې د زعفرانو کښت ښه پایله ورکړي نو دا به د دې سیمې د بزګرانو په اقتصادي پیاوړتیا کې مثبت رول ولري.

د کرنې وزارت د معلوماتو په اساس، سږکال په افغانستان کې د زعفرانو په کښت کې ۷ سلنه زیاتوالی راغلی.

دغه وزارت وړاندوینه کوي چې سږ کال به د زعفرانو حاصلات به نږدې ۲۴ مټریک ټنه ته لوړ شي.

تېر کال بیا د زعفرانو د حاصلاتو کچه ۲۰ متریک ټنه وه.

د افغانستان د زعفرانو ۹۰ سلنه په لویدیځ هرات کې تولیدېږي.

د ورځې تازه خبرونه دلته ولولئ

امریکا افغانستان کې دوه لویې پوځي اډې ساتي

په افغانستان کې یو شمېر امریکايي سرتیري

د امریکا متحده ایالات په افغانستان کې دونیم زرو ته د خپلو سرتېرو د شمېر له راکمولو وروسته په دې هېواد کې دوه لویې پوځي اډې ساتي.

دا خبره د امریکا د پوځ لوی درستیز جنرال مارک میلې پرون د بروکینګس تحقیقاتي انسټیټیوټ له خوا په یوه جوړه شوې غونډه کې وکړه.

هغه ونه ویل چې دا دوه کومې لویې اډې دي چې امریکایي په افغانستان کې ساتي او نه یې هم په دې اړه چې له دې هېواده د دوه زره امریکایي سرتېرو په وتلو سره به کومي پوځي وړتیاوې کمې شي څه وویل، خو زیاته یې کړه چې دا چې وروسته به څه پېښېږي دا به د امریکا د نوي منتخب ولسمشر جو بایډن په ادارې پورې تړلې وي.

میلي دغه راز وویل چې متحده ایالات به د سپوژمکیو یا سټلایټونو یو شمېر اډې هم په دې هېواد کې وساتي.

د ولسمشر ډونالډ ټرمپ د پریکړې له مخې د را روان ۲۰۲۱ میلادي کال د جنوري تر نیمایي به په افغانستان کې د څلور نیم زرو امریکایي سرتېرو شمېر دوه نیم زرو ته راکم شي.

خو جنرال میلي وویل چې د امریکا پوځ به په افغانستان کې دوو اساسي ماموریتونو ته چې یو یې د افغان ځواکونو پر ملاتړ او بل د اسلامي دولت ډلې یا داعش او القاعده په وړاندې د ترهګرۍ ضد عملیات دي، دوام ورکړي.

پاکستان د افغان دولت او طالبانو ترمنځ د وروستۍ هوکړې هرکلی کړی

قطر کې د سولې غونډه

پاکستان د افغانستان د دولت او طالبانو ترمنځ د وروستۍ هوکړې هرکلی کړی او هغه یې د سولې د خبرو د وړاندې تګ لپاره یو مهم پرمختګ یاد کړی دی.

د پاکستان د بهرنیو چارو وزارت ویاند تېره شپه په څو ټویټونو کې ویلي چې د خبرو لپاره د کړنلارې پرسر دغه هوکړه د مذاکرتو له لارې یوه جوړجاړي ته د رسېدو لپاره د دواړو لورو ګډه اراده څرګندوي.

دغه راز ویل شوي چې پاکستان به د بین الافغاني خبرو ملاتړ ته دوام ورکړي، څو د یوه هر اړخېز او پراخ سیاسي جوړ جاړي له لارې یوه باثباته، سوله ییز او سوکاله افغانستان ته لاره هواره شي.

د امریکا، ملګرو ملتونو او ناټو په ګډون د افغانستان په مسئله کې ښکېلو یو شمېر نورو لورو هم د دغه پرمختګ چې په ۱۹ کلو کې د لومړي ځل لپاره د افغانستان دولت او طالبان یو سند لاسلیک کوي چې په کې د سولې د خبرو کړنلاره روښانه شوې، هرکلی کړی دی.

له ایرانه د هرات-خواف رېل پټلۍ له لارې د لومړي ځل لپاره واردات پيل شول

ارشیف

له ایرانه د هرات-خواف رېل پټلۍ له لارې د لومړي ځل لپاره په ازمایښتي ډول افغانستان ته واردات پيل شول.

د هرات د والي ویاند جیلاني فرهاد ازادي راډيو ته وویل، په دې اورګاډي کې ۵۰۰ ټنه سمنټ انتقال شول.

ښاغلی فرهاد زیاتوي: "هیله‌من یوو چې د دې پټلۍ له رسمي پرانیستو سره به د اقتصادي، ترانزیټي او د سیمې د هېوادونو ترمنځ د حمل‌ونقل نوی باب پرانیستل شي."

د ایران مهر اژانس خبر ورکړ چې تمه ده په راتلونکو ۱۰ ورځو کې به په رسمي ډول د اورګاډي دا لار د افغانستان او ایران ولسمشران پرانیزي.

د اسعداباد د مرکزي روغتون ډاکترانو او کارکوونکو کاري اعتصاب کړی

ارشیف، د کونړ مرکز اسعداباد ښار

د اسعداباد د مرکزي روغتون ډاکترانو او کارکوونکو د معاشونو د کموالي له امله کاري اعتصاب کړی دی.

دغه روغتیایي کارکوونکي وایي چې کاربندي به‌یې تر هغو دوام وکړي چې غوښتنې یې نه‌وي منل شوې.

د کونړ والي محمد اقبال سعید وایي چې د دې ستونزې د حل لپاره‌یې هڅې پیل کړې دي: "ان‌شاءالله موږ ځو د روغتیا له وزارت سره خبرې کوو. یا به قناعت ورکړو چې دا معاشات چې دوی یې ادعا کوي، دې ته د حل یوه منطقي لاره پیدا کړي یا دې ډاکترانو ته قناعت ورکړي او یا دې هم معاش ورکړي."

تر دې مخکې د کونړ ترڅنګ د نورستان روغتیایي کارکوونکو د معاشونو او نورو امتیازاتو د ترلاسه کولو لپاره اعتصاب کړی وو چې دوه میاشتې یې دوام وکړ او تېره اوونۍ یې د معاشونو تر اخیستو وروسته خپل اعتصاب پای ته ورساوه.

اترا: د ارزګان ۶۵ فیصده سیمه کې مخابراتي شبکې فعالې نه‌دي

د مخابراتي شبکې یو انتن

د افغانستان د مخابراتي خدمتونو د تنظیم اداره یا اترا وایي، د ارزګان په ۶۵ فیصده سیمه کې مخابراتي شبکې فعالې نه‌دي.

په دغه ولایت کې د اترا مسؤل جاوېد خپلواک ازادي راډیو ته وویل: "په ارزګان کې تقریباً ۳۵ فیصده ساحه تر مخابراتي پوښښ لاندې ده او نورې ساحې د طالبانو د تهدید له امله ۲۴ ساعته له مخابراتي خدماتو بې‌برخې دي."

ښاغلي خپلواک زیاته کړه چې په وروستیو کې یې له څلور نیم کاله وروسته په خاص ارزګان، چوره او دهراوود ولسوالیو کې مخابراتي خدمات پيل کړل چې په چوره کې یې بېرته طالبانو مخه ونیوله.

طالبانو په ځینو نورو ولایتونو کې بیا مخابراتي شبکې یوازې د شپې په مخه بندې کړې دي.

کرکټ بورډ: د اېمرجېنګ لوبغاړو لپاره تمرینات لا هم روان دي

آرشیف، عکس تئزیني بڼه لري

د افغانستان کرکټ بورډ وايي، د اېمرجېنګ لوبغاړو لپاره پیل شوي تمرینات لا هم روان دي.

د کرکټ بورډ ویاند فرید هوتک د چهارشنبې(د لېندۍ ۱۲مه) په ورځ ازادي راډیو ته وویل، افغان لوبغاړي د توپ وهنې، توپ اچونې او ډګر ساتنې په برخو کې د کورني روزونکو تر څارنې لاندې تمرینات کوي.


ښاغلي هوتک زیاته کړه: "خورا مهم تمریناتي کمپ دی، لوبغاړیو ته په کې هر ډول تمرینات ورکول کېږي او هیله مو دا ده چې د دوی لپاره ارزښمتند تمام شي."

د کرکټ بورډ د معلوماتو پر بنسټ، یاد تمریناتي کمپ چې د ننګرهار ولایت په غازي امان الله خان کرکټ لوبغالي کې پیل شوی، ۵۰ لوبغاړي په‌کې ونډه لري چې د کمپ له پای ته رسېدو سره به ۱۵ پیاوړي لوبغاړي د افغانستان اېمرجېنګ لوبډلې ته ترې غوره شي.

پاکستان د ټاپي پروژې د مالي او سوداګریزې ارزونې لپاره شرکت ګماري

آرشیف

پاکستان غواړي د ټاپي پروژې د مالي او سوداګریزې ارزونې لپاره یو مشورتي شرکت وګماري.

پاکستاني رسنيو لیکي، د دې هېواد د ګازو دولتي سیسټم یا 'ISGS' دا پرېکړه کړې، څو دا شرکت د ګازو د بیو لپاره د مېکانېزم جوړولو او په دې برخه کې د بحثونو او سټراټېژیو اړوند مشورې ورکړي.

ټاپي هغه پروژه ده چې له ترکمنستانه ګاز د یوه پایپ لاین له لارې لومړی افغانستان او بیا پاکستان او هند ته لېږدوي.

د ټاپي تړون په ۲۰۱۰ میلادي کال کې لاس‌لیک شو، خو لومړنۍ عملي چارې یې په ۲۰۱۹ میلادي کال کې پیل شوې.

تمه ده چې د دې پایپ لاین له لارې پاکستان او هند ته ګاز تر ۲۰۲۳ کال پورې ولېږدول شي.

د افغان حکومت د معلوماتو پر بنسټ، د دې پایپ لاین له ټرانزيټه به هر کال افغانستان له ۳۰۰ څخه تر ۴۰۰ میلیون ډالر د فېس په توګه اخلي، افغانستان به هر کال د صفر اعشاريه ۶ میلیارډه متر مکعب غازو څخه برخمن کېږي او تر خوا به یې نږدې ۱۲ زرو تنو ته د کار زمینه برابره شي.

د لوړ تناژ موټرو د بار وړلو او تنظیم مقرره له سره اروزل کېږي

آرشیف، جوزجان کې باربري موټرونه

د افغانستان د صنعت او سوداګرۍ وزارت پرېکړه کړې چې د لوړ تناژ موټرو د بار وړلو او تنظیم مقرره له سره و اروزوي.

دې وزارت په یوه خپره کړې خبرپاڼه کې لیکلي، د ټولګټو چارو او ټرانسپورټ وزارتونه، د رېل پټلۍ خپلواکې اداره، د پانګونې او سوداګرۍ خونه او د بار چلولو ټولنه په دې اړه د یوې تخنیکې کمېټې په جوړولو سره سلا شوي دي.

سرچینه زیاتوي، دا کار د دې لپاره کېږي چې د لویو لارو د ویجاړېدو مخه ونیول شي او تر خوا یې د بار وړلو په برخه کې معیاري خدمات وړاندې شي.

دا په د اسې حال کې ده چې له دې وړاندې په ځلونو نیوکه شوې چې بار وړونکې موټر له ټاکل شوي معیار زیات وزن وړي چې له کبله یې لویې لارې ویجاړې او له امله يې د ټرافیکې پېښو شمېر زیات شوی دی.

اطلاعاتو او فرهنګ وزارت: د 'لاجورد' هدف د خصوصي فلمونو تولیدوونکو هڅول و

د لاجورد په نوم د فلمونو فستیوال

د افغانستان د اطلاعاتو او فرهنګ وزارت وايي د لاجورد په نوم د فلمونو د فستیوال عمده هدف د خصوصي فلمونو د تولیدوونکو هڅول و.

په کابل کې دغه فستیوال ۱۰ ورځې مخکې پیل شوی و چې په لسګونه هنري، مستند او نور فلمونه په‌کې نندارې ته وړاندې شول.

د اطلاعاتو او فرهنګ وزارت ویاند صابر مومند پرون سې شنبه دغه فستیوال د خصوصي فلم جوړوونکو لپاره مهم وباله: "موږ دغه جشنواره د همدې لپاره پیل کړه چې په خصوصي برخه کې سینماګران او د فلم مخکښان خپلو دندو ته متوجې او وهڅول شي. زیات فلمونه او مستند وو چې خصوصي پروډکشنونو جوړ کړي وو. د هیئت تر ارزونې وروسته هغوی ته په بېلابېلو برخو کې جایزې ورکړل شوې."

په دغه فستیوال کې د ۲۱۰ فلمونو له ډلې ۵۵ غوره فلمونه د اصلي سیالۍ لپاره غوره شوي وو چې د کابل په ۹ سالونونو کې نندارې ته وړاندې شول.

افغان فلم پرون په یوه اعلامیه کې وویل، نږدې ۵،۰۰۰ کسانو دغه فلمونه وکتل.

"فاریاب کې په وسله‌واله نښته کې ۲ وسله‌وال ووژل شول او ۸ نور ټپیان دي"

ارشیف، فاریاب کې امنیتي ځواکونه

د ملي اردو چارواکي وايي د فاریاب ولایت په پښتونکوټ ولسوالۍ کې په وسله‌واله نښته کې ۲ وسله‌وال ووژل شول او ۸ نور ټپیان شول.

د ۲۰۹ شاهین قول اردو ویاند محمد حنیف رضايي پرون ناوخته ازادي راډیو ته وویل، دا نښته نږدې نیم ساعت روانه وه.

ښاغلی رضايي زیاتوي: "په دې نښته کې ۲ ترورېست طالبان وژل شوي، ۸ تنه نور یې ټپیان شوي دي. د دوی وسلې او مهمات له‌منځه وړل شوي او دوه موټرسایکلونه چې له دوی سره وو، هم تخریب کړای شوي دي."

وسله‌والو طالبانو د دې پېښې په اړه تبصره نه‌ده کړې.

ښاغلی رضايي وايي په دې نښته کې افغان امنیتي ځواکونو ته زیان نه‌دی اوښتی.

چارواکي: د ګېزاب او دهراوود زرګونه بې‌ځایه شویو ته عاجلې مرستې پیل شوي

د ارزګان د ګېزاب ولسوالۍ یوه بې‌ځایه شوې کورنۍ

د ارزګان د والي ویاند وايي په ګېزاب او دهراوود ولسوالیو کې له جګړو زرګونو بې‌ځایه شویو ته د عاجلو مرستو لړۍ پیل شوې ده.

په ګېزاب او دهراوود ولسوالیو کې له تېرو دوو میاشتو د سختو جګړو له کبله د اټکل له مخې ۵،۰۰۰ کورنۍ بېلابېلو سیمو ته بې‌ځایه شوې دي.

د والي ویاند احمدشاه ساحل پرون ناوخته ازادي راډیو ته وویل: "تېره اوونۍ په ګېزاب ولسوالۍ کې څه کم ۹۰۰ کورنیو ته د خوراکي او غیر خوراکي توکو مرسته ووېشل شوه. سبا (چهارشنبه) او بل سبا په دهراوود ولسوالۍ کې ۱،۰۵۷ کورنیو ته د خوراکي او غیر خوراکي توکو وېش پیلېږي."

د والي ویاند وايي مرکز ترینکوټ ته د بې‌ځایه شویو لپاره هم له یوې میاشتې د همکارو مرستندویو ادارو په مرسته د بشري مرستو لړۍ روانه ده.

ناټو: راتلونکی کال به افغانستان کې د خپلو پوځیانو په اړه پرېکړه وکړو

د ناټو سرمنشي ینس سټولټنبرګ

د ناټو سرمنشي وايي د ناټو غړي هېوادونه او شریکان به راتلونکی کال وضعیت ته په کتو له افغانستانه د وتلو، یا هم هلته د خپلو پوځیانو د کمولو پرېکړه کوي.

ینس سټولټنبرګ دا خبره تېره شپه د ناټو د بهرنیو چارو وزیرانو له پرونۍ غونډې وروسته یوه انلاین خبري کنفرانس ته وکړه: "دا چې په افغانستان کې خپل پوځیان نور کم کړو، یا په تدریجي ډول له افغانستانه ووځو که پاتې شو؟ دا پرېکړه به راتلونکی کال وضعیت ته په کتو کېږي. دا پرېکړه به د ناټو د ټولو شریکانو تر سلا مشورې وروسته کېږي. په راروانه فبرورۍ میاشت کې به د ناټو د دفاع وزیرانو غونډه مهمه وي."

په دې وروستیو کې د امریکا متحده ایالاتو اعلان کړی چې د جنورۍ تر نیمايي پورې به په افغانستان کې د خپلو پوځیانو شمېر له ۴،۵۰۰ څخه ۲،۵۰۰ ته راکم کړي.

ارزګان چارواکي: نږدې ۲۰ طالبان وژل شوي

ارشیف، وسله وال طالبان

په ارزګان کې افغان چارواکي د نژدې شل تنه طالبانو د وژلو ادعا کوي.

د ارزګان د والي ویاند احمد شاه ساحل نن سې شنبه (د لېندۍ ۱۱مه) ازادي راډیو ته وویل چې د هوایي او پلیو ځواکونو د عملیاتو پر مهال په تېرو ۲۴ ساعتونو کې دا طالبان په دهراود ولسوالۍ کې وژل شوي او ۱۱ تنه یې ټپیان شوې هم دي.

طالبانو تر اوسه په دې اړه څه نه دې ویلي.

جوزجان کې ٧ لوبغالي جوړ او ګټې اخیستنې ته وسپارل شول

په جوزجان ولایت کې ٧ لوبغالي جوړ او ګټې اخیستنې ته وسپارل شول.

په دغه ولایت کې د اکټیډ دفتر مسول امان الله امین ازادي راډیو ته وویل چې دغه میدانونه د منډې وهلو، باسکټبال، والیبال او فوتسال دي.

ښاغلی امین زیاتوي چې څلور میدانونه په مرکز شبرغان، دوه په اقچې او یو یو په خانقاه او خواجه دوکوه ولسوالیو کې جوړ شوي چې درې میلیونه افغانۍ لګښت پرې راغلی دی.

کابل کې د سنوکر اووم پړاو سیالۍ پیل شوې 

آرشیف، عکس تئزیني بڼه لري

په کابل کې نن سې شنبه (د لېندۍ ۱۱مه) د سنوکر اووم پړاو سیالۍ پیل شوې.

د ملي المپیک کېمټې له لوري په خپره شوې اعلامیه کې ویل شوي چې په دغو سیالیو کې له ١٢ ولایتونو ١٣٢ لوبغاړو ګډون کړی وو او هدف یې د سنوکر ملي ټیم لپاره د غوره څېرو معرفي کول دي.

په اعلامیه کې راغلي چې په سټنډرډ او معیاري ډول دغه سیالۍ به ٧ ورځې دوام وکړي.

نور راوښيه

XS
SM
MD
LG