د لاسرسۍ وړ لېنکونه

تازه خبر
شنبه ۱۵ لیندۍ ۱۳۹۹ کابل ۱۱:۵۷

افغانستان

د ولسي جرګې رئیس او یو شمېر غړي پاکستان ته ځي

د افغانستان ولسي جرګې رئیس

د افغانستان د ولسي جرګې رئيس سبا (جمعه) د یوه پلاوي په مشرۍ پاکستان ته ځي.

پاکستاني رسنۍ وايي چې میر رحمان رحماني او د ولسي جرګې ۱۷ غړي به چې د پاکستان د ملي اسامبلۍ د ريیس اسد قیصر په رسمي بلنه دغه هېواد ته شپږ ورځنی سفر کوي، د پاکستان د ولسمشر عارف علوي او صدراعظم عمران خان په ګډون له نورو چارواکو سره هم ویني.

افغان پلاوی به راتلونکې اوونۍ په اسلام‌اباد کې د افغانستان-پاکستان د سوداګرۍ په غونډه کې هم ګډون وکړي.

د ورځې تازه خبرونه دلته ولولئ

د اطلاعات او فرهنګ وزارت د 'داعي' د ویر مراسم ترسره کوي

د ازاډي راډیو وژل شوی خبریال الیاس داعي

د افغانستان د اطلاعات او فرهنګ وزارت نن د شنبې (د لېندۍ ۱۵مه) په ورځ د ازادي راډیو د وژل شوي خبریال الیاس داعي د ویر مراسم ترسره کوي.

په دې غونډه کې چې ټاکل شوې ده تر غرمې وروسته، دوه بجې د دې وزارت د رسنیو په نړیوال تالار کې جوړه شي، حکومتي چارواکو او د هلمند مخورو ته د ګډون بلنه ورکړل شوې ده.

الیاس داعي څه باندې درې اوونۍ مخکې د هلمند په مرکز لښکرګاه کې هغه وخت ووژل شو چې د ده پر موټر د مقناطیسي ماین چاودنه وشوه.

ایران د افغانانو د ځپنې په اړه د یوې ويډیو منځپانګه رد کړه

ارشیف، د افغانستان او د ایران ګډ بیرغ

د ایران د بهرنیو چارو وزارت په دې هېواد کې د افغانانو د ځپنې په اړه د یوې ويډیو محتوا رد کړه.

تردې مخکې د افغانستان د بهرنیو چارو وزارت د پنجشنبې په ورځ اعلان وکړ چې د هغې ویډيو په اړه یې څېړنه پیل کړې چې په ایران کې د افغان کډوالو ځورونه ښکاري.

د افغانستان د بهرنیو چارو وزارت په همدې حال کې زیاته کړه چې د نړۍ په هېڅ هېواد کې له افغانانو سره "ناسم" چلند نه مني.

د ایران د بهرنیو چارو وزارت ویاند سعید خطیب زاده د دې اعلامیې په غبرګون کې وویل چې پر ټولنیزو رسنیو په خپره شوې ویډيو کې د افغانانو سپکاوی یو ناسم کار دی او دا پېښه په ایران کې نه ده شوې.

په دې وروستیو کې پر ټولنیزو رسنیو یوه ويډیو خپره شوه چې په کې داسي ښکاري چې ګواکي ځیني ایرانیان یو شمېر افغانان شکنجه کوي.

تر اوسه په ایران کې له افغان کډوالو سره د بد چلند ګڼې ويډیوګانې خپرې شوي چې د افغانانو او افغان حکومت له انتقاد سره مخامخ شوي.

ایران وايي، د افغانستان جګړه د دې لامل شوې چې شااوخوا دوه میلیونه افغانان په قانوني او غیرقانوني توګه ایران ته کډه شي.

نن د مصالحې شورا د مشرتابه کمېټه خپله لومړۍ غونډه جوړوي

ولسمشر محمد اشرف غني او د ملي مصالحې عالي شورا رئیس عبدالله عبدالله، عکس تئزیني بڼه لري

ټاکل شوې ده نن شنبه (د لېندۍ ۱۵مه) د افغانستان د مصالحې عالي شورا د مشرتابه کمېټه خپله لومړۍ غونډه جوړه کړي.

د دې غونډې مشري به ولسمشر محمد اشرف غني او د ملي مصالحې عالي شورا رئیس عبدالله عبدالله کوي.

د افغانستان د ملي مصالحې عالي شورا د رسنیو چارو سلاکار مجیب الرحمان رحیمي د جمعې په ماښام (د ډسمبر په څلورمه نېټه) ازادي راډیو ته وویل چې د شنبې په ورځ د دغې شورا د مشرتابه کمېټه د مصالحې د عالي شورا یوه مهمه برخه ده او له وظایفو یوه یې د افغان دولت د مذاکراچي پلاوي مشري او لارښود دی.

د مصالحې عالي شورا د مشرتابه کمېټې د کار پیل د کورنۍ اجماع او افغانستان د اسلامي جمهوري مذاکراچي پلاوي د ملاتړ لپاره پراخ مشروعیت ګڼل کیږي.

تردې مخکې په افغانستان کې د اروپايي ټولنې سفیرانو په یوه اعلامیه کې له افغان حکومته غوښتي وو چې د ملي مصالحې د عالي شورا غړي دې د عملي کار د پیل او سولې په روان بهیر کې د ګډون لپاره په چټکۍ سره مشخص کړي.

په همدې حال کې په کابل کې امریکا او بریتانیې سفارتونو د اروپايي ټولنې له اعلامیې ملاتړ کړی.

بلخ چارواکي: د ترکمن هلک د تښتوونکو موټر چلوونکی نیول شوی

ارشیف، د افغانستان په نقشه کې د بلخ ولایت

د بلخ د والي مرستیال غلام فاروق خپلواک وايي، د یوه ۶ کلن ترکمن هلک د تښتوونکو موټر چلوونکی یې نیولی دی.

ښاغلي خپلواک دا خبره پرون (د جمعې په ورځ د ډسمبر په څلورمه) ازادي راډیو ته وکړه.

ده زیاته کړه چې د عبدالروف د راخوشې کولو لپاره دوی خپلې هڅې زیاتې کړي دي.

ناپېژانده وسله والو په لړم میاشت کې عبدالروف په مزارشریف کې د یوه خصوصي ښوونځي له مخې وتښتاوه.

ویل کېږي تښتوونکو نظامي جامې اغوستې وې.

د عبدالروف پلار وايي چې د زوی په بدل کې يې تښتوونکو له ده یو نیم میلیونه ډالر غوښتي دي.

مخکې د بلخ ولایت سلګونو اوسېدونکو چې ډېری یې ترکمن نژاده دي، د دې هلک د تښتول کېدو په اعتراض کې د والي د دفتر مخې ته لاریونونه وکړل او د تحصن خېمه یې ووهله.

د کرکټ ملي لوبډلې لوبغاړي "مجيب الرحمن ځدارڼ" په کرونا ویروس اخته شوى

مجيب الرحمن ځدارڼ

د افغانستان د کرکټ ملي لوبډلې لوبغاړی مجیب الرحمن په کرونا اخته شوی.

د اسټرالیا د بېګ باش لیګ د بریسبن هيټ لوبډلې چې مجیب الرحمن په کې لوبېږي په یوه اعلامیه کې نن دا خبره کړې ده.

مجیب الرحمن د اسټرالیا د کرکټ په غوره لیګ یا بېګ باش کې د لوبېدو لپاره تېره اوونۍ د ځینو نورو افغان لوبغاړو په ملتیا اسټرالیا ته تللی.

د کوینسلنډ ایالت د کرکټ اجرایوي مشر تیري سوینسون ویلي، چې د دغه ایالت روغتیاپالان او په خپله بریسبن لوبډله به د مجیب الرحمن د ژر ښه کېدو لپاره پوره هلې ځلې وکړي.

مجیب الرحمن د افغانستان یو ځوان ورو توپ اچوونکی دی چې په ملي ټيم سربېره یې د ای پي ایل یا د هند د کرکټ غوره لیګ او بېګ باش یا د اسټرالیا کرکټ غوره لیګ کې په ښو لوبو د نړیوالو پام ور اړولی دی.

ولسمشر غني: د "ناکامورا" نيمګړې پروژې بشپړېږي

آرشیف

د افغانستان جمهور رییس وايي، حکومت ژمن دی چې د ډاکتر تیتڅو ناکامورا نیمګړې پروژې بشپړې کړي.

محمد اشرف غني دا خبرې نن د جاپاني بشرپاله ډاکتر تیتڅو ناکامورا د وژنې د لومړي تلین په مناسبت په یوه ویډیويي پيغام کې کړي.

هغه زياتوي: "ترهګرو له موږ یو ښکلی انسان واخیست خو د هغه ځلانده میراث او کاري روحیه به د افغانانو د راتلونکو نسلونو په زړونو کې وي"،د افغانستان حکومت په لویه پکتیا او کابل کې د ځنګلونو، کرنیزې پراختیا او د اوبو د مدیریت په برخه کې د هغه (ډاکتر ناکامورا ) د پروژو عملي کولو ته ژمن دی څو د افغانستان د سمسورتیا لپاره د هغه( ډاکتر ناکامورا) هیلې پوره شي."

ډاکتر تیتڅو ناکامورا چې کلونه یې د روغتیا، کرنې او اوبو لګولو په برخه کې خدمت کړی و د ۲۰۱۹ کال د ډسمبر په څلورمه په ننګرهار کې د یوه وسله وال برید هدف وګرځېد او د سختو ټپونو له امله یې ساه ورکړه.

د افغان طبابت پېژندل شوې څېره "سهیلا صدیقي" مړه شوه

سهيلا صديقي

په افغانستان کې د طبابت د برخې یوه پېژندل شوې څېره او لومړنۍ ښځینه جنراله ډاکتر سهیلا صدیقي نن د ۷۲ کلونو په عمر ساه ورکړه.

هغه د الزایمر یا د حافظې د کمزورۍ له ناروغي کړې ده.

ولسمشر اشرف غني د ډاکتر سهیلا مړینه د افغانستان لپاره یوه لویه ضایعه بللې ده.

ډاکتر سهیلا صدیقي له ۲۰۰۱ تر ۲۰۰۴ کاله پورې د پخواني ولسمشر حامدکرزي په کابینه کې د روغتیا وزیره وه.

هغې کلونه د افغانستان په پوځي روغتونو له هغې ډلې سردار داوود خان روغتون کې دندې ترسره کړې.

ناټو: افغانستان ته د درملو او روغتیايي وسایلو د لېږد بهیر بشپړو

د ناټو د طبي مرستو یوه اندازه- ارشیف

د ناټو د ملاتړ او تداراکاتو اداره وايي، افغانستان ته د څه باندې زر ټنه درملو او روغتیايي وسایلو د لېږد بهیر همدا میاشت بشپړوي.

دا خبره یادې ادارې په یوه اعلامیه کې کړې ده.

د اعلامیې له مخې د درملو لومۍ محموله د نومبر په دیارلسمه کابل ته رسېدلې او تمه ده پاتې درمل د همدې میاشتې تر پایه ورسېږي.

تمه ده دا اندازه درمل او طبي وسایل په افغانستان کې د ناټو د غوڅ ملاتړ د ماموریت له لارې د افغانستان په امنیتي او دفاعي ځواکونو او اړوندو وزارتخانو وویشل شي.

ناټو وايي درمل او طبي وسایل یې له کاناډا، پرتګال، کوریا او ترکیې ترلاسه کړي. ​

امرخېل: د ننګرهار لپاره د داعش نومول شوی والي "هدایت الله" ووژل شو

د جلال اباد ښار یوه څنډه

په ننګرهار کې چارواکي ادعا کوي چې دغلته یې د داعش وسله والې ډلې نومول شوی والي وژلی او د دې ډلې یو بل مشر یې ژوندی نیولی دی.

د ننګرهار والي ضیاالحق امرخیل ادعا کوي چې د ملي امنیت ځانګړو ځواکونو تېره شپه د ننګرهار ولایت لپاره د داعش نومول شوی سرپرست والي هدایت الله وواژه.

هغه دا خبره نن په خپلې فېسبوک پاڼې کې لیکلې ده.

د ننګرهار د والي ویاند عطاالله خوږیاڼي هم رسنیو ته ویلي چې د داعش دا سیمه ییز مشر په چپلیار کې د ملي امنیت د ځواکونو په عملیاتو کې وژل شوی دی.

هغه زياتوي: "د ملي امنیت ځانګړو ځواکونو تېره شپه د چپلیار ولسوالۍ په للمې سیمه کې د ننګرهار لپاره د داعش وسله والو تش په نوم والي او د ځانمرګو واسکټونو جوړونکی د مقاومت پر مهال وژلی دی."

د هغه په وینا، له نوموړي سره وسلې او چاودېدونکي مواد هم نیول شوي چې سیمه کې له منځه وړل شوي دي.

ښاغلي خوږیاڼي ادعا وکړه چې د داعش دې سیمه ییز مشر د ځانمرګو واسکټونو او ماینونو د جوړولو تر څنګ نورو ته هم په دې برخه کې روزنه ورکوله.

د ننګرهار د والي ویاند همداراز ادعا وکړه چې د جلال اباد ښار د اکمالاتي بېز سیمه کې یې د قاري عبدالرحمن په نوم چې په قاري تمیم مشهور و، د داعش ډلې یو بل مهم مشر هم دده له یوه ملګري سره نیولی دی.

تېرکال افغان چارواکو اعلان وکړ چې د ننګرهار په هغو ولسوالیو کې یې د داعش وسله وال ځپلي چې دې ډلې په کې حضور درلود، خو له هغې وروسته هم په ننګرهار کې پرله پسې د داعش وسله والې ډلې فعالیتونو دوام درلود.

بغلان پولیس: اندراب کې ۴ وسله‌وال طالبان وژل شوي

آرشیف

د بغلان پولیس وايي، په اندراب ولسوالۍ کې ۴ وسله وال طالبان وژل شوي او درې تنه نور ټپیان شوي دي.

د بغلان د پولیسو ویاند احمد جاوید بشارت نن جمعه رسنیو ته په یوه لېږلي ویډیويي پیغام کې وویل، دا نښته پرون مازیګر وشوه.

هغه زياتوي: "په پلحصار ساحه کې یې غوښتل فعالیت وکړي، چې د ملي امنیت له پولیسو سره په وسله والو نښته واوښتل، چې په نتیجه کې د طالبانو ۴ کسان ووژل شول او ۳ تنه یې ټپیان شول، چې ۲ مړي یې د جګړې په میدان کې پاتې وو."

احمد جاوید بشارت وايي پولیسو ته یو راکټ انداز، یو کلاشنکوف او نور مهمات په لاس ورغلي دي.

د وسله والو طالبانو له خوا د دې پېښې په تړاو کومه تبصره نه ده شوې.

پکتيا چارواکي: موټربم چاودنې ٣ کسه وژلي او ١٩ ټپيان دي

آرشیف

د پکتیا ولایت په مرکز ګردېز کې تېر ماښام په یوه موټربم چاودنه کې لږترلږه ۳ تنه وژل شوي او ۱۹ نور ژوبل دي.

د پکتیا د والي ویندوی عبدالرحمان منګل وویل چې دا برید د ګردېز – خوست لاین په ساحه کې وشو، ده د پېښې د نورو جزییاتو په اړه وویل: "نن ماښام د هیواد او سولې دښمنانو له لوري د پکتیا مرکز ګرديز خوست په لین پر امنیتي ګزمې موټر بم چاودنه شوې چې په پایله کې یې بدبختانه ۳ تنه د ملي امنیت سرتېري شهیدان شوي، ۱۴ تنه عام ملکي وګړي ټپیان شوي او په یاده سیمه کې عامه شتمنیو، مارکیټونو او دوکانونو ته هم مالي زیان اوښتی دی."

تراوسه د دولت وسله والو مخالفو ډلو د دې برید مسوولیت په غاړه نه دی اخیستی.

خليلزاد د ترکیې چارواکو سره پر افغان سوله غږېدلى

خليلزاد

د افغانستان د سولې لپاره د امریکا ځانګړي استازي زلمي خلیلزاد دوحې ته د تګ په لاره کې د ترکیې له چارواکو سره د افغانستان د سولې پر بهیر خبرې وکړې.

خلیلزاد پر خپله ټویټرپاڼه لیکلي چې دوحې ته روان دی او هلته به وګوري چې د افغانستان د دولت او طالبانو له پلاوو سره د اصولو او کړنلارې په برخه کې د هغوی د وروستي پرمختګ پر اساس څنګه مرسته کولی شي څو د یوې سیاسي طرحې او تلپاتې او هراړخیز اوربند لپاره چټک پرمختګ وشي.

روانه اوونۍ په دوحه کې د افغانستان د دولت او طالبانو پلاوو له نژدې دوو میاشتو وروسته د رسمي خبرو لپاره پر کړنلارې او د هغې پر مقدمې موافقه وکړه.

د دوی ترمنځ دا موافقه د ګڼو هېوادونو له هرکلی سره مخامخ شوه او د سولې لور ته یو مهم ګام وګڼل شوه.

ولسمشر غني د بشري حقونو د مدافعانو د ساتنې ګډ کمېسیون جوړېدو فرمان ورکړ

ولسمشر غني

د بخښنې نړیوال سازمان د بشري حقونو د مدافعانو د ساتنې لپاره د حکومت له لوري د نوي کمېسیون جوړېدا د بشري حقونو د مدافعانو د ساتنې لپاره مهم اقدام وباله.

دې سازمان ویلي، د افغانستان د حکومت له لوري د دې کمېسیون جوړېدا په دغه هېواد کې د بشري حقونو لپاره یو بری دی.

د بخښنې نړیوال سازمان دا اعلان وروسته له دې وکړ چې د افغانستان ولسمشر اشرف غني د یوه فرمان په صادرولو د بشري حقونو د مدافعانو د ساتنې ګډ کمېسیون تاسیس کړ.

دا کمېسیون به، چې د بشري حقونو د دفاع او په افغانستان کې د بشري حقونو د اړوندو مسلو په اړه ملي او نړیوالو اندېښنو ته د ځواب ویلو په هدف جوړ شوی، په پیل کې خپل لومړیتوبونه په ګوته کړي او د بشري حقونو د مدافعانو د خوندیتابه لپاره به له غیرحکومتي موسسو سره ګډ پلان جوړ کړي.

چارواکي: کندز کې سلګونه بې ځایه شويو کورنیو سره مرسته وشوه

بې ځایه شويو کورنیو سره د مرسته شوو توکو انځور

په کندز ولایت کې له سلګونو کورنیو سره، چې جګړې بې ځایه کړي، مرستې وشوې.

په کندز کې د ماشومانو د ملاتړ د نړیوالې موسسې استازی سیدمحمود قریشي وايي، تراوسه پورې یې ۶۶۶ کورنیو ته مرستې ورکړي او دا لړۍ دوام لري.

د دې ولایت په بېلابېلو ولسوالیو کې د وروستیو سختو جګړو له کبله زرګونه تنه د خپلو مېنو پرېښودو ته اړ شوي او دا په داسې حال کې ده چې هوا هم سړه شوې ده.

د چارواکو په وینا، په تېرو دريو میاشتو کې د دې ولایت پر مرکز برسېره له خان اباد، امام صاحب او دشت ارچي ولسوالیو څخه څه باندې 11 زره کورنۍ د جکړو له کبله بې ځایه شوي دي.

د امریکا پوځ د افغانستان هوايي ځواک سره مرسته کوي

آرشیف

ایم ډي هیليکوپتر کمپنۍ وايي، د امریکا له پوځ سره یې د ۳۴ ميلیون ډالرو په ارزښت یو قرارداد لاسلیک کړ چې پر اساس به یې دا شرکت د افغانستان د هوايي ځواک د سپکو جنګي الوتکو (MD 530F) او هیليکوپترو لوژستیک ملاتړ کوي.

د دې قرارداد پر اساس، ایم ډي هیليکوپتر کمپنۍ به د اریزونا په میسا او د افغانستان په کابل کې د افغان هوايي ځواک د الوتکو ترمیم، ساتنه او ارتقا په غاړه اخلي.

دا کمپنۍ به خپل کار د ۲۰۲۱ د مې تر ۳۱ پورې بشپړوي.

دې کمپنۍ د افغانستان هوايي ځواک ته تراوسه ۶۰ سپکې جنګي الوتکې ورکړي دي.

نور راوښيه

XS
SM
MD
LG