د لاسرسۍ وړ لېنکونه

تازه خبر
سه شنبه ۴ لیندۍ ۱۳۹۹ کابل ۰۸:۰۴

افغانستان

خوست کې د کرونا ویروس مخنیوي لپاره د عامه پوهاوي کمپاین پیل شو

د کرونا د مخنیوي لپاره دوا پاشي

د خوست روغتیایي کارکوونکو د کرونا ویروس د نوې څپې د مخنیوي لپاره د عامه پوهاوي یو کمپاین پیل کړی او له خلکو غواړي چې روغتیایي سپارښتنې جدي په پام کې ونیسي.

د دغه کمپاین یوه مسؤل ډاکټر عبدالواحد نیازي ازادي راډیو ته وویل، د هوا په سړېدو سره د کرونا ویروس د خپرېدو خطر زیات دی او د مخنیوي تر ټولو غوره لاره‌یې دا ده چې خلک باید د نورو سپارښتونو ترڅنګ لازم واټن په پام کې ونیسي، لاسونه تل ومینځي او له ماسک څخه استفاده وکړي.

هغه زیاته کړه: "که چېرته‌یې د مخنیوي تدابیر په سمه توګه عملي نه‌شي، امکان لري دا څپه به شدیده وي او امکان لري چې تلفات به‌یې هم زیات وي."

د روغتیایي چارواکو په وینا په خوست کې تر اوسه د کرونا ۴۳۲ مثبتې پېښې ثبت شوې او له امله‌یې هم ۳۸ تنه مړه شوي دي.

د رسمي شمېرو له مخې تر اوسه په ټول افغانستان کې پر کرونا له ۴۰ زرو ډېر کسان اخته شوي او له امله‌یې هم یو نیم زر کسان مړه شوي دي.

د ورځې تازه خبرونه دلته ولولئ

پکتیاوالې ښځې د سولې خبرو کې د تصمیم نیونې رول غواړي

د پکتیا یو شمېر ښځې- ارشیف

پکتیاوالې ښځې له افغان حکومته غواړي چې د سولې په بین الافغاني خبرو کې د سمبولیک ګډون پر ځای د تصمیم نیونې رول ورکړل شي.

دوی له طالبانو هم وغوښتل چې د نړۍ د نورو اسلامي هېوادونو په شان چې هلته ښځو ته د زده کړو او کار حقونه ورکړل شوي، د افغان ښځو حقوقو ته احترام وکړي.

پکتیاوالو ښځو دا څرګندونې پرون (دوشنبه) په ګردیز کې د سولې د بین الافغاني خبرو د ملاتړ او دایمي اوربند د غوښتنې په پار د جوړې شوې غونډې په څنډه کې ازادۍ راډیو ته وکړې.

په دې غونډه کې مدني فعالې نازدانې پکتیاوال وویل، سوله باید د ښځو د فکري او جسمي امنیت سبب شي، نه دا چې ښځو ته له دې زیاته بې امنیتي جوړه کړي.

"د ۲۰۰۵ او ۲۰۱۹ کلونو ترمنځ تر ۲۶ زرو زیاتو ماشومانو ته مرګ ژوبله اوښتې"

ارشيف

د ملګروملتونو د ماشومانو د ملاتړ اداره یونیسف وایي، له ۲۶ زرو زیات ماشومان په افغانستان کې د ۲۰۰۵ او ۲۰۱۹ کلونو ترمنځ جګړو کې مړه یا ټپیان شوي دي.

یونیسف دا خبره په هغه راپور کې چې نن دوشنبې یې خپور کړی کړې او ویلي یې دي چې یوازې تیر۲۰۱۹ کال ۸۷۴ ماشومان په افغانستان کې وژل شوي او ۲۲۷۵ ټپیان شوي دي.

یونیسف وایي، دا په نړۍ کې د جګړو په سیمو کې د ټولو وژل شویو او معلول شویو ماشومانو په سلو کې دیرش دی.

د راپورپه اسناد دغه ماشومان د حکومتي ځواکونو او د وسله والو مخالفانو ترمنځ مخامخ جګړو په نتیجه مړه یا ټپیان شوي دي.

د افغانستان لپاره د ملګروملتونو مرستندویه ماموریت یوناما په وروستي راپور کې ویلي چې د روان کال په لومړیو شپږو میاشتو کې ټول ټال ۵۹۳۹ کسان وژل شوي یا ټپیان شوي چې په سلو کې څه باندې ۳۰ یې ماشومان دي.

فیلیپو ګراندې: نړیواله ټولنه دې له افغانستان سره مرستو ته دوام ورکړي

د کډوالو په چارو کې د ملګروملتونو د عالي کمېشنرۍ مشر فیلیپو ګراندې

د کډوالو په چارو کې د ملګروملتونو د عالي کمېشنرۍ مشر فیلیپو ګراندې له نړیوالې ټولنې غوښتي چې له افغانستان سره دې مرستو ته دوام ورکړي کنه نه د ورانونکو عواقبو له خطر سره به مخ شي.

ګراندې په یوه خپره کړې خبرپاڼه کې وویل، د میلیونونو افغانانو راتلونکې په دې هېواد کې د سولې د خبرو په نتیجې او د دې هېواد د پرمختیا لپاره د جنیوا د دوه ورځني کنفرانس په ګډون د نړیوالې ټولنې د ملاتړ پر ژمنو پورې تړلې ده.

ګراندې دغه راز خبرداری ورکړ چې که په هره برخه کې هڅې ناکامه شي نوپه لویه پیمانه به د خلکو د بې ځایه کېدو په ګډون د دې هېواد لپاره ورانونکې نتیجې ولري.

هغه وویل چې روان کال په افغانستان کې د ننه د شخړو له امله نږدې درې لکه کسان بې ځایه شوي چې عاجلو بشري مرستو ته اړتیا لري.

اتمر: د سولې ټینګښت د افغانستان د دولت لپاره ستر لومړیتوب دی

محمد حنیف اتمر

د افغانستان د بهرنیو چارو وزیر محمد حنیف اتمر د جنیوا کنفرانس ته په پرانستونکې وینا وویل چې د سولې ټینګښت د افغانستان د دولت لپاره ستر لومړیتوب دی.

هغه زیاته کړه: "په جنیوا کې د افغانستان د کنفرانس پر مهال چې له نړیوالې ټولنې سره د افغانستان د دوامداره مشارکت یوه مهمه غونډه ده، تر پایداره سولې جوړونې پرته په کومې بلې مهمې فکر نه شم کولای، سوله اوس وخت په اساسي توګه له سیمه ییزو او نړیوالو متحدینو سره د مشارکت په برخه کې د افغانستان په یوه مهمه تګلاره بدله شوې ده."

ښاغلي اتمر د سولې د لومړیتوب خبره داسې مهال کوي چې د طالبانو او افغان دولت د مرکچي پلاوو ترمنځ له شاوخوا دونیمو میاشتو راهیسې پیل شویو خبرو تراوسه د پام وړنتیجه نه ده ورکړې او هغه په ټپه درېدلي ښکاري.

له افغانستان سره د جنیوا په دغه لوی مرستندویه کنفرانس کې به چې سبا به هم دوام کوي او د نړۍ د شاوخوا اویا هېوادونو او نړیوالو سازمانونو استازیو حضوري یا په انلاین بڼه ګډون کړې، تر۲۰۲۴ کال پورې له دې هېواد سره د ملیارډونو ډالرو نویو مرستو ژمنې وکړي.

ټاکل شوې چې افغان ولسمشر اشرف غني هم سبا دې کنفرانس ته مجازي وینا وکړي.

ګاسمن: نړیوال مرستندویان دې د افغانانو لومړیتوب ته پام وکړي

پاتریشیا ګاسمن

د بشر د حقونو د څار سازمان هیومان رایټس واچ د افغانستان په نړیوالو مرستندویانو غږ کړی چې له دې هېواد سره د کېدونکو مرستو په ژمنو کې باید دې ته لومړیتوب ورکړي چې بسپنې یې د ښوونې او روغتیا په تېره بیا د نجونو او ښځو لپاره په خدمتونو او خپلواکو رسنیو ولګېږي.

د بشر د حقونو دغه نیویارک میشتي سازمان دا غوښتنه د افغانستان په اړه د جنیوا له کنفرانس سره چې ټاکل شوې نن پیل شي، په یوه وخت کړې ده.

پاتریشیا ګاسمن چې د دې سازمان د آسیا د چارو مشره ده، ویلي چې د جنیوا کنفرانس یو مهم فرصت دی چې په افغانستان کې د بشري حقونو په برخه کې شوي پرمختګونه خوندي او عامو افغانانو په تېره بیا ښځو او نجونو ته د دې زمینه برابره شي چې پراخې آزادي ولري اوله ښې ښوونې او روغتیایي خدمتونو برخمنې شي.

ګاسمن ټینګار کړی چې په دې هېواد کې د جګړې د پای ته رسېدو لپاره د سولې روانې خبرې باید د دې لامل نه شي چې نړیوال د افغانستان له ترټولو ډېرو زیانمنونکو ټولنو سره مرستې کمې کړي.

د هغې په وینا د افغانستان راتلونکې، د یوه سوله ییزاو حقونو ته په درناوي ولاړهېواد په توګه په دې پورې تړلې چې دا هېواد لوستی او سالم نفوس ولري.

د افغانستان حکومت هیله من دی چې د جنیوا په دغه دوه ورځني کنفرانس به نړیوال بسپنه ورکونکي له دې هېواد سره د راتلونکو څلورو کلونو په مخه د میلیارډونو ډالرو نویوو مرستو ژمنې وکړي.

دغه کنفرانس چې د افغانستان، فنلنډ او ملګروملتونو په ګډ مشرتابه ترسره کېږي په کې له څه باندې د اویاوو هېوادونو او نړیوالو سازمانونو استازي حضوري او په انلاین بڼه ګډون کوي.

د کوچنیو متشبثاتو او ځوانو کارموندونکو د ملاتړ هڅې ګړندۍ شوي

ارشيف
د افغانستان د صنعت او سوداګرۍ وزارت د کوچنیو متشبثاتو او ځوانو کارموندونکو د ملاتړ په موخه پنځه کلن پروګرام اعلان کړ.

د دغه وزارت ویاند جواد دبیر ازادي راډیو ته وویل چې دغه پلان پنځه ستراتیژیکې برخې رانغاړي چې په کې بنسټیزې برخې، بازارونو ته لاسرسی، مالي ملاتړ، نوې ټکنالوجۍ ته لاسرسی او ظرفیت لوړونه شاملې دي.

نوموړي وویل، چې دوی به ځوانان وهڅوي څو په لږه پانګونه بریالی کسب او کار جوړ کړي.

د صنعت او سوداګرۍ وزارت وایي، دوی د وړو متشبثاتو او ځوانو کارموندونکو لپاره د ملاتړ یو کلن او دوه کلن پروګرامونه په پام کې نیولي دي چې له مخې به یې لازمې اسانتیاوې ورته برابرې شي.

د راپورنو له مخې نن سبا په افغانستان کې ۵۲ سلنه خلک چې ډېری یې ځوانان دي د بې روزګارۍ له ستونزې سره مخ دي.

د کابل ځینې سینماګانې او تالارونه د 'لاجورد' ملي جشنوارې فلمونه خپروي

ارشیف

افغان فلم وايي چې د کابل ځینې سینماګانې او تالارونه دا ورځې د لاجورد ملي جشنوارې د فلمونو په خپرولو بوختې دي.

دې ادارې په خپل فېس‌بوک باندې د فلمونو د نندارې وختونه او ځایونه اعلان کړي.

د لاجورد په نوم د افغاني فلمونو جشنواره د اطلاعات او فرهنګ وزارت، افغان فلم او ځینو خصوصي بنسټونو په نوښت د لیندۍ له لومړۍ پیل شوې.

په دې جشنواره کې چې ۱۰ ورځې دوام کوي ۵۵ فلمونه نندارې ته وړاندې کېږي او په پای کې به‌یې د جایزو ګټونکي فلمونه انتخاب شي.

د جشنوارې په پیل کې د افغان فلم مشرې صحرا کریمي د خصوصي سکټور همکاري مهمه بللې او د فلمونو په جوړولو او اړوندو چارو کې يې په لا زیاتې پانګونې ټینګار کړی دی.

د هرات پښتون زرغون ولسوالۍ کې چاودنې دوه تنه وژلي

ارشیف، هرات کې چاودنه

د هرات په پښتون زرغون ولسوالۍ کې ماین چاودنې دوه تنه وژلي او شپږ نور یې ټپیان کړي دي.

د والي ویاند جیلاني فرهاد ازادي راډيو ته وویل چې چاودنه پرون د ولسوالۍ په بازار کې وشوه.

ښاغلی فرهاد زیاتوي: "پښتون زرغون ولسوالۍ کې په موټرسایکل کې د چاودېدونکو توکو چاودنې دوه تنه شهیدان او شپږ تنه ټپیان کړل، په ټپیانو کې امنیتي منسوبین هم شته، دغه پېښه په جدي او هر اړخیز ډول څېړل کېږي."

یوې بلې سرچینې چې نه‌یې غوښتل نوم واخلي په هرات کې د ازادي راډیو خبریال ته ویلي، وژل شویو کې یو ملکي کس او بل د ولسي پاڅون کوونکو غړی و.

د چاودنې مسؤلیت تر اوسه کومې ډلې نه‌دی منلی.

خلیلزاد: د افغانستان-پاکستان نوې هوکړې عملي کېدل به د سولې زمینه برابره کړي

د افغان سولې لپاره د امریکا ځانګړی استازی زلمی خلیلزاد

زلمی خلیلزاد وايي که د افغانستان او پاکستان ترمنځ هوکړه‌لیک عملي شي په سیمه کې به د سولې او پرمختګ زمینه برابره کړي.

د افغان سولې لپاره د امریکا خاص استازي ښاغلي خلیلزاد دا خبره بېګاه په خپل ټویټر لیکلې ده.

هغه ویلي چې د افغانستان او پاکستان په اړیکو کې له مثبت پرمختګ او هم د پاکستان له هغې ژمنې هرکلی کوي چې په افغانستان کې به د تاوتریخوالي د کمولو او د اوربند د تأمین لپاره کار کوي.

د افغانستان او پاکستان ترمنځ ګډ هوکړه‌لیک کابل ته د پاکستان د صدراعظم عمران خان د سفر پر مهال لاسلیک شو.

د دغه هوکړه‌لیک په اساس د افغانستان او پاکستان حکومتونو ژمنه کړې چې د سولې او امنیت، اقتصادي پراختیا، هېواد ته د افغان کډوالو د ستنېدو او ګډو همکاریو ته به دوام ورکړي.

سبا په جینوا کې د افغانستان په اړه دوه ورځنی مرستندویه کنفرانس جوړېږي

محمد حنیف اتمر

ټاکل شوې چې سبا د سویس په جینوا کې د افغانستان په اړه دوه ورځنۍ ستر مرستندویه کنفرانس جوړ شي.

په دغه کنفرانس کې به د نړی د شاوخوا اویا هېوادونو او نړیوالو مرستندویه سازمانونو شاوخوا اویا وزیران او استازي د کرونا د خپرې شوې وبا له امله تر ډېره په انلاین بڼه ګډون وکړي.

د افغانستان د بهرنیو چارو او ماليې وزیرانو حنیف اتمر او عبدالهادي ارغندیوال په دې کنفرانس کې د ګډون لپاره پرون له کابله حرکت کړی.

د رویترز آژانس د راپورله مخې تمه کېږي، چې نړیوال به د افغانستان له حکومت سره د راتلونکو څلورو کلونو په مخه د میلیارډونو ډالرو نوې مرستې ژمنې وکړي.

له افغانستان سره دغه نړیوال مرستندونه کنفرانس داسې مهال جوړېږي، چې د طالبانو او افغان دولت ترمنځ د سولې خبرې په ټپه درېدلې ښکاري او د امریکا ولسمشر ډونالډ ټرمپ هم غواړي خپل زیات سرتېري د را روان کال د جنوري تر نیمایي له دې هېواده وباسي.

تر دې مخکې په ۲۰۱۶ کال کې نړیوالو د بروکسل په کنفرانس کې له افغانستان سره تر۲۰۲۰ کال پورې د ۱۵،۲ ميلیارډ ډالرو مرستې ژمنې کړې وې.

د کاپیسا چارواکي: وسله والو پر ښځينه پوليسو بريد کړى

ارشيف

د کاپیسا چارواکي وایي، دوه ښځینه پولیسې نن د ناپېژاندو وسله والو په ډزو ټپیانې شوې.

د کاپیسا د امنیې قومندانۍ ویاند شایق شورش ازادي راډیو ته وویل، د دوی د امنیې قومندانۍ دغه پولیسې چې په یوه ریکشاکې کې سپرې وې، نن سهار د کوهستان د دومې حصې په ولسوالۍ کې پرې ناپېژاندو وسله والو ډزې وکړې.

چارواکو د دواړو پولیسوروغتیایي روغتیایي وضعیت د ډاډ وړ بللی دی.

تراوسه چا یا کومې ډلې د دغې پېښې مسولیت نه دی اخیستی.

ارګ: له اداري فساد سره د مبارزې کمېسیون غړیو د لوړې مراسم ترسره شول

ارګ کې د اداري فساد سره د مبارزې د کمېسیون غړیو د تحليف مراسمو انځور

له اداري فساد سره د مبارزې د نوي ټاکل شوي کمېسیون غړیو نن په ارګ کې د ولسمشر اشرف غني په وړاندې د لوړې مراسم ترسره کړل.

د ارګ له خوا د خپرې شوې خبرپاڼې له مخې د دې کمېسیون پنځو غړیو، همایون حامد، مریم زرمتي او عبدالقیوم نظامي د شپږو کلونو او سید محمد هاشمي او فرخ لقا د دریو کلونو لپاره د وفادارۍ لوړه وکړه.

ولسمشر اشرف غني د کمېسیون غړیو ته د اداري فساد پر وړاندې د مبارزې لپاره پر ځینو ټکو د ټینګار ترڅنګ وویل، چې د قانون تطبیق کلیدي دی او هیڅوک تر قانون پورته نه دي او زیاته یې کړه چې تاسو له ځوانې ټولنې سره چې له فساده ځورېږي سروکار لرئ او په دې برخه کې ستاستو اقدامات کولای شي چې د ملت او دولت ترمنځ واټن کم کړي.

له ادراي فساد سره د مبارزې دغه نوی کمېسیون داسې مهال په کار پیل کوي چې ټاکل شوې سبا او بل سبا د نومبر په ۲۳ او۲۴ په جنیوا کې د افغانستان په اړه یو مرستندویه نړیوال کنفرانس پرانستل شي.

د دغه کنفرانس په درشل کې نړیوالې ټولنې افغانستان ته د لسو وړاندې کړیو شرطونو په ترڅ کې چې له دې هېواد سره یې د خپلو مرستو دوام ورپورې تړلی، له فساد سره کلکه مبارزه هم شامله ده.

"تخار کې د اینجې حاصلات ١٢٥ ټنو ته رسېږي"

د تخار اینجه

روان کال په تخار ولایت کې د 'اینجې' حاصلات ١٢٥ ټنو ته رسېږي.

د افغانستان د کرنې اوبو لکولو او مالدارۍ وزارت ویاند اکبر رستمي نن یکشنبه (د لیندۍ ۲مه) ازادي راډیو ته وویل: "روان کال په دغه ولایت کې په ١٢٢٠هکتار ځمکه کې اينجه کرل شوې چې له هر جریب ځمکې له درې لکو تر پنځه لکو افغانۍ عواید ترلاسه کېږي."

د نوموړي په وينا په دغه ولایت کې د اينجې ٤٠٠ هکتاره تخریب ځمکه اباده او بیا رغول شوې ده.

اينجه یو طبي بوټی دی چې کم پيدا کېږي خو ځانګړی اقتصادي او محیطي اهمیت لري.

چارواکي: سالنګ لویه لاره د باروړونکو موټرو پرمخ تړل شوې

ارشيف

سالنګ لویه لاره د باروړونکو موټرو پرمخ تړل شوې ده.

د سالنګونو د حفظ او مراقبت د ادارې اجراییوي مسول سمیع الله ولیزاده ازادي راډیو ته وویل، چې دغه لویه لاره د درنو واورو او سختو طوفانونو له امله له نن سهار څخه د باروړونکو موټرو پرمخ تړل شوي خو د نورو مسافروړونکو موټرو چې پر چاینونو او نورو ژمنیو تجهیزاتو سمبال وي، پرمخه خلاصه ده.

د ولیزاده په وینا، د هواپېژندنې ادارې د اټکل له مخې ترراتلونکو ۴۸ پورې به په سیمه کې واوره اورېږي.

پکتیا چارواکي:د جلغوزيو حاصلات ۱۰ سلنه زیات شوي

ارشیف، عکس تئزیني بڼه لري

په پکتیا کې د جلغوزيو په حاصلاتو کې د تېرکال پرتله لس سلنه زیاتوالی راغلی.

د دغه ولایت د کرنې رئیس محمد دین مومند نن یکشنبه (د لیندۍ ۲مه) ازادي راډیو ته وویل چې روان کال ١٣٥٠٠ تڼه جلغوزي تر لاسه شوي دي.

د نوموړي په خبره تېر کال د جلغوزيو حاصلات ۱۲۱۵ ټڼه وو.

ښاغلی مومند زیاتوي چې د حاصلاتو د زیاتوالي لاملونه د طبي افاتو کموالی، د عامه پوهای لوړېدل، لازمې لارښونې عملي کېدل او په نوي ټکنالوژۍ د حاصلاتو راټولو دي.

نور راوښيه

XS
SM
MD
LG