د لاسرسۍ وړ لېنکونه

تازه خبر
یکشنبه ۹ لیندۍ ۱۳۹۹ کابل ۰۲:۵۸

افغانستان

د خوست د ځاځي میدان ولسوال یوه برید کې ووژل شو

د خوست د ځاځي میدان وژل شوی ولسوال عبدالحی ځاځی

د خوست د ځاځي میدان ولسوال نن په یوه وسله‌وال برید کې ووژل شو.

د پکتیا د والي ویاند عبدالرحمن منګل رسنیو ته په استولي پیغام کې ویلي چې عبدالحی ځاځی له خپل یوه ساتونکي سره هغه مهال ووژل شو چې له خوست څخه کابل ته روان وو.

ښاغلی منګل زیاتوي: "د خوست د ځاځي میدان ولسوال عبدالحی ځاځی چې له خوست څخه کابل ته روان وو، د لوګر ولایت په التمور سیمه کې برید ورباندې شوی. ولسوال او یو ساتونکی یې وژل شوي، یو بل قومي مشر حاجي حسن جان ټپي شوی او موټر چلوونکي ته زیان نه‌دی رسېدلی."

ښاغلي منګل ونه‌ویل چې دا برید چا کړی، خو په دې وروستیو کې د ځینو نورو چارواکو د هدفي وژنو تور پر وسله‌والو طالبانو پورې شوی دی.

طالبانو تر اوسه د وروستۍ پېښې په اړه څه نه‌دي ویلي.

د ورځې تازه خبرونه دلته ولولئ

د برښنا شرکت بيا د برښنا پوروړو ته خبردارى ورکړ

آرشیف

د افغانستان برښنا شرکت یو ځل بیا پر هغو کسانو، چې د برښنا د لګښت پیسې یې نه دي ورکړي غږ وکړ چې که د خپلو لګښتونو پیسې دغه شرکت ته ورنه کړي نو برښنا به یې پرې شي.

د افغانستان د برښنا شرکت سلاکار مصطفی اریا له ازادي راډیو سره په خبرو کې وویل، دمګړی یو شمېر داسې دولتي ادارې، افراد او اشخاص شته چې کلونه کلونه کېږي د برښنا د لګښت پیسې یې نه دي ورکړي.

هغه زياتوي: "نه یوازې په مرکز، بلکې په ولایتونو کې زورواکي شته چې برښنا یې اخیستې خو د لګښت پیسې یې نه دي ورکړي، موږد برښنا د لګښت ټول پوروړي پیدا اولستونه مو جوړ کړل، پلاوي مو ورولېږل، يو څه پیسې راټولې شوي، قسطونه مو ورسره وکړل او وروستی ګام دا دی چې که دوی پر وخت پیسې ورنه کړي، برښنا پرې قطع کوو."

ښاغلي اريا وویل، دمګړی دولتی ادارې، افراد او اشخاص څه باندې څلور میلیارده افغانۍ پوروړي دي، چې دغو پورونو د برښنا شرکت پر مالي سیستم ناوړه اغېزه کړې.

ده داهم وویل، دولتي ادارو تراوسه ۵۰ او افرادو او اشخاصو ۲۰ سلنه پورونه ورکړي دي.

چارواکي: په میدان وردګ کې د مڼو ۷۱ سړې خونې جوړېږي

آرشیف

په میدان وردګ ولایت کې د مڼو ۷۱ سړې خونې جوړېږي.

د میدان وردګو ولایت د کرنې اوبو لګونې او مالدارۍ مسوولین وايي، د مڼو د سارک موډل صفر انرژۍ ۷۱ سړې خونو کارونه ۷۰ سلنه بشپړ شوي.

د دوی په وینا دا خونې د کرنیزو محصولاتو مدیریتي طرحې په چوکاټ کې جوړېږي.

د میدان وردګ ولایت د کرنې او مالدارۍ ریيس ولید احمد تسل وايي، د دې سړو خونو د جوړېدو لګښت ۱۷۴ میلیون او ۶۰۰ زره افغانۍ دی، چې ۹۰ سلنه بودیجه یې د کرنې وزارت او پاتې نوره د ګټه اخیستونکو بڼوالو له لورې ورکول کېږي.

نوموړی زیاتوي، چې یادې سړې خونې د کرنیزو محصولاتو د ساتنې او د بڼوالو د اقتصادي پیاوړتیا په موخه جوړېږي.

دا په داسې حال کې ده چې له دې وړاندې دوه سړې خونې د ۵۰۰ ټنو ظرفیت درلودونکي د میدان وردګو ولایت په میدان ښار او سیداباد کې جوړې شوې وي.

"امریکا او اروپا ته د انارو جوس او د انارو د صابون صادرات ډېر شوي"

د کندهار انار

د افغانستان د سوداګرۍ او صنعت وزارت وایي، کندهار کې د انارو د حاصلاتو له زیاتېدو سره امریکایي او اروپایي هېوادونو ته د انارو د جوس او د انارو د صابون صادرات ډېر شوي دي.

د دې وزارت ویاند جواد دبیر وایي، روان لمریز کال کې په کندهار ولایت کې د انارو د جوس محصولات څه د پاڅه ۱۰ ټن او همدا شان د انارو صابون تولیدات نږدې ۸ ټنو ته رسېږي.

د ښاغلي دبیر په وینا، په همدې موده کې کې د انارو جوس، صابون ترڅنګ د یادې میوې ۶۰۰ټن دانې هم چې روغتیايي او د سینګار محصولاتو کې کارول کېږي بهرنیو هېوادونو ته لېږدول شوي.

نوموړی زیاتوي، اوسمهال کندهار کې د انارو جوس او د صابون تولیداتو کارخانو ډېرېدو سره دغلته لسګونه کسانو ته د کار زمینه برابره شوې ده.

د سوداګرۍ او صنعت وزارت د معلوماتو له مخې د تېر په پرتله په نړیوال بازار کې د کندهار انار و ښه بازار موندلی او د وزارت رهبرۍ کار کوي څو دا پروسه لا وغځوي.

غور کې د ښځو لپاره د یوه ځانګړي کتابتون ودانۍ پرانیستل شوه

غور کې د ښځو لپاره د یوه ځانګړي کتابتون ودانۍ

په غور ولایت کې د ښځو لپاره د یوه ځانګړي کتابتون ودانۍ پرانیستل شوه.

د غور د ښځو چارو رئیسې حلیمې پرستش پرون ازادي راډیو ته وویل، پر دغې ودانۍ څه باندې ۵ میلیونه افغانۍ لګول شوي چې د ریاست له بودجې ورکړل شوي دي.

د غور د والي مرستیال حبیب‌الله رادمنش ویلي، هیله‌من دی د دغه کتابتون له پرانیستل کېدو سره په دې ولایت کې ښځو او نجونو ته د مطالعې ښه زمینه برابره شي.

محب: طالبانو او نورو ترورېستي ډلو خپل بریدونه پر ملکي اهدافو متمرکز کړي

د افغانستان د ملي امنیت سلاکار حمدالله محب

د افغانستان د ملي امنیت شورا وايي، وسله‌والو طالبانو او نورو «ترورېستي» ډلو خپل بریدونه پر ملکي اهدافو متمرکز کړي دي.

د ملي امنیت سلاکار حمدالله محب، پرون د امنیتي ادارو له مشرانو سره په یوه غونډه کې پر دې موضوع خبرې وکړې.

د ملي امنیت شورا ویاند رحمت‌الله اندړ ازادي راډیو ته وویل، په دې غونډه کې امنیتي مسؤلانو د دولت د وسله‌والو مخالفانو پر حملو هم بحث وکړ.

ښاغلی اندړ زیاتوي: "د طالبانو او نورو ترورېستي ډلو اوسنۍ تګلاره داسې ټاکل شوې چې خپل بريدونه پر ملکي ځايونو متمرکز کړي، ځکه د مخامخ جګړې توان‌يې بایللی دی."

په دې امنیتي غونډه کې له ولس سره د امنیتي پېښو په اړه د پلټنو د پایلو د شریکولو غوښتنه هم وشوه.

په وروستیو کې د ګڼو لویو امنیتي پېښو په اړه د تحقیقاتو د پیل ژمنه شوې، خو بیا د هغو پلټنو پایلې له ولس سره شریکې شوې نه‌دي.

د هلمند خبریالانو ټولنه: د الیاس داعي د وژنې څېړنو کې کوم پرمختګ نه‌شته

محمد الیاس داعي

په هلمند کې د خبریالانو یوه ټولنه وايي، د ازادي راډیو د خبریال محمد الیاس داعي د وژنې په اړه په څېړنو کې تر اوسه د کوم پرمختګ نښه نه‌لیدل کېږي.

په مرکز لښکرګاه کې د ازادو خبریالانو د ټولنې مشر زین‌الله ستانکزي ازادي راډیو ته وویل: "له بده مرغه تر دې مهاله، کشفي ارګانونو، مسؤلو ادارو په قضیه کې هېڅ پرمختګ نه‌دی کړی. موږ او د ده کورنۍ ته‌یې راپور نه‌دی ورکړی، په داسې حال کې چې دوی په لومړیو ورځو کې ویلي وو چې په دې قضیه کې یې پرمختګ کړی او هغه مجرمان چې په قضیه کې لاس لري وبه نیول شي او د قانون منګولو ته به وسپارل شي."

د ازادي راډیو خبریال محمد الیاس داعي د لړم/عقرب میاشتې پر ۲۹مه، په مرکز لښکرګاه کې ظاهراً د ده په موټر پورې د نښلول شوي مقناطیسي ماین په چاودنه کې ووژل شو.

محلي چارواکو او وسله‌والو طالبانو د دې قضیې د څېړنې ژمنه کړې وه، خو تر اوسه د قاتلانو په پېژندلو او مجازاتو کې د پرمختګ راپور نه‌دی ورکړل شوی.

د زابل د ولایتي شورا پر ريیس موټربم حمله شوې

د زابل د ولایتي شورا رئیس عطا جان حقبیان

د زابل د ولایتي شورا د رییس عطاجان حقبیان په موټريز کاروان باندې بمي برید شوی چې په کې یو کس مړ او ۲۲ نور ټپیان دي.

دا خبره د زابل د والي ویاند ګل اسلام سیال ازادي راډیو ته وکړه.

ښاغلي سیال وویل عطاجان حقبیان او دوه ساتونکي يې ټپيان دي.

د زابل د والي ویاند وايي، د عطاجان حقبیان په موټرو د یوه بل ټونس ډوله موټر په وسیله چې په کې چاوديدونکي توکي ځای و د سهار په لسو بجو برید شوی.

د زابل د ولایتي روغتون مشر محمد داود مجیدي ازادي رادیو ته وویل چې د پیښې له ځایه روغتون ته یو مړ او ۲۲ ټپیان وروړل شوي چې ډېره برخه یې ملیکان دي.

د زابل د ولایتي شورا پر رییس ښاغلي حقبیان پخوا هم داسې بریدونه شوي او وروستۍ یوه د نومبر په اوومه وه چې یوه ځانمرګي برید د ده دفتر ته څېرمه برید وکړ او تر لسو زیات کسان ټپيان شول.

تر اوسه د ننني برید مسوولیت چا نه دی منلی.

طالبان: د مذاکراتي ټيمونو ترمنځ د مذاکراتو طرز العمل بشپړ شوى

ارشیف

په دوحه کې د طالبانو د سیاسي دفتر ویاند وايي، د بين الافغاني مذاکراتي ټيمونو ترمنځ د بين الافغاني مذاکراتو طرز العمل په 21 مادو کې بشپړ او وروستى شوی دی.

د طالبانو د سیاسي دفتر ویاند محمد نعیم پر خپل ټویټر ویلي، دا کړنلاره د روان کال د نومبر په ۱۵ مه تکمیل شوې.

هغه د بین الافغاني خبرو د دې تکمیل شوې کړنلارې جزییات نه دي په ډاګه کړي، خو زیاته کړې یې ده چې د کړنلارې یوه نسخه د دواړو مذاکراتي خواوو له تاييد وروسته د نومبر په اولسمه نېټه اسان چاري هېواد ( قطر) ته هم سپارل شوې ده.

تر اوسه د افغان دولت مرکچي په ټیم په دې اړه چې دا کړنلاره دې بشپړه شوي وي تبصره نه ده کړې.

د بین الافغاني خبرو دواړو لورو د سیپټمبر د ۱۲ مې نېټې راهېسې په دوحه کې پر دې کړنلارې بحثونه او غونډې پیل کړې وې.

اتمر د اسلامي همکاريو له سازمانه نوې غوښتنه وکړه

محمد حنیف اتمر وزیر

د افغانستان د بهرنیو چارو وزیر حنیف اتمر د اسلامي هېوادونو د همکارۍ له سازمان او په کې شاملو اسلامي هېوادونو وغوښتل چې د افغانستان په سوله کې دې مرسته وکړي او پر طالبانو دې فشار راوړي چې تاوتریخوالی پای ته ورسوي.

حنیف اتمر چې د نایجیر په پلازمېنه نیامي کې یې د اسلامي همکارۍ د سازمان د بهرنیو چارو وزیرانو په ۴۷مه ناسته کې خبرې کولې افغانستان کې پر ولسي اهدافو د بریدونو زیاتېدل بې ساري وبلل.

هغه په دې لړ کې په کابل کې پر یو زېږنتون، یو ښوونیزو مرکز او کابل پوهنتون وروستي بریدونه د بېلګو په ډول یاد کړل او زیاته یې کړه چې پر معتدلو دینې عالمانو، د بشري حقونو پر فعالانو او ژورنالیستانو هم هدفي بریدونو زور اخیستی.

ښاغلي اتمر د تاوتریخوالي سره په یو وخت افغانستان کې د سولې لپاره رامنځته شوی فرصت هم بې ساري وباله او د اسلامي همکارۍ د سازمان له غړیو هېوادونو یې وغوښتل چې د افغانستان په سوله کې دې مرسته وکړي.

نوموړي د اسلامي همکارۍ د سازمان په ملاتړ په 2018 م کال کې په مکه مکرمه د دیني عالمانو هغه نړیواله غونډه مهم پرمختګ وباله چې افغانستان د سولې او په دې هېواد کې د جګړې د پای ته رسولو ملاتړ په کې شوی و او د اسلامي هېوادونو له دیني عالمانو یې وغوښتل چې د افغانستان د سولې لپاره دې خپلو هڅو ته دوام ورکړي.

د افغانستان د بهرنیو چارو وزیر د اسلامي همکاریو د سازمان له هغو غړیو هېوادونو، چې د افغانستان سوله کې رول لري وغوښتل چې طالبان دې سولې ته وهڅوي.

ښاغلي اتمر ترهګري د اسلامي هېوادونو په شمول د ټولې نړۍ شریک دښمن وباله او ویې ویل: "له دې سره د مقابلې لپاره تر ټولو ښه لاره دا ده چې افغانستان ته سوله راولو او د هغو بهرنیو وسلوالو پر ضد مبارزه وکړو چې په دې سیمه کې خوندي ځالې لري."

د اتمر په وینا په دې کې د اسلامي همکاریو سازمان مهم رول لوبولی شي او پر هغوی یې ټینګار وکړ چې لاسونه سره ورکړي او د افغانستان د سولې د پروسې ننګه وکړي او په اسلامي هېوادونو کې اسلامي دیني عالمانو وهڅوي چې افغانستان کې تاوتریخوالی وغندي او د سولې د بهیر ملاتړ وکړي.

افغانستان: د کډوالو په اړه ایران سره ډیپلوماټیک مخته ځو

ارشیف، افغان کډوال

د افغانستان د بهرنیو چارو وزارت وایي، هڅه کوي له ډیپلوماتیکو لارو په ایران کې د غیر قانوني افغان کډوالو پر وړاندې د ایران د نویو ګواښونو لپاره حل لاره ومومي.

د دغه وزارت مرستیال ویاند حامد تهذیب رسنیو ته په یوه استولي پیغام کې نن د شنبې(د لیندۍ ۸مه) ویلي چې په تهران کې د افغانستان سفیر د ایران د پارلمان له مشر سره د غیر مجاز کډوالو پر وړانډې د ایران د نوي طرحې په اړه اندیښنې شریکې کړي دي.

دی وايي: "په دې لیدنه کې په تهران کې د افغانستان سفیر د دې طرحې د تصویب او عملي کېدو په اړه د افغانستان اندیښنې له ایراني لوري سره شریکې کړي او د دې اندیښنو د مخنیوي په برخه کې یې د لازمې همکارۍ غوښتنه کړې ده."

د ایران د پارلمان د یو شمېر استازو په نوې طرحه کې چې د دې هېواد د اسلامي شورا مجلس ته يې د تصویب لپاره وړاندې کړې، د غیرقانوني کډوالو پر وړاندې سخت قیودات وضع شوي دي.

د رپوټونو له مخې په دې طرحه کې ویل شوي، هر هغه بهرنی اوسیدونکی چې له اجازې پرته ایران ته داخل شي، یا په دې هېواد کې مېشت او یا تګ راتګ ولري، ښایي له ۲۵ کالو زیات بندي شي او هم باید سل میلیون تومان نغدي جرېمه ادا کړي. د شک په صورت کې د غیر قانوني اتباعو پر موټر باندې ډزې کول هم مجاز بلل شوي دي.

دغې طرحې هغه شااوخوا اته لکه افغانان چې له رسمي اسنادو پرته په ایران کې اوسیږي اندیښمن کړي دي.

ښاغلي تهذیب په دې اړه د ایراني لوري د ځواب په اړه څه نه دي ویلي.

دفاع وزارت: په بېلابېلو عملیاتو کې ۵۳ تنه طالبان وژل شوي

ارشیف، افغان امنیتي ځواکونو د عملیاتو پر مهال

د افغانستان دفاع وزارت وایي، د امنیتي ځواکونو په بېلابېلو عملیاتو کې ۵۳ تنه وسله وال طالبان وژل شوي او ۲۱ نور ټپیان شوي دي.

د دفاع وزارت په یوې اعلامیې کې راغلي چې په دې عملیاتو کې د هوایي ځواکونو ملاتړ هم وو .

د اعلامیې له مخې دا عملیات تېره شپه د هرات په کوهستان، د ارزګان په ګیزاب، د هلمند په ناوې، نهر سراج او نادعلي، د کندز په امام صاحب او د ننګرهار په خوګیاڼو ولسوالۍ کې شوي دي.

دفاع وزارت زیاتوي چې په دې عملیاتو کې یوه اندازې وسلې او مهمات د افغان ځواکونو لاسته ورغلي دي.

وسله والو طالبانو تر اوسه په دې اړه څه نه دي ویلي.

چارواکي: په پکتیا کې سږ کال د جلغوزو حاصلات لس سلنه زیات شوي

ارشيف


په پکتیا کې د جلغوزو د پروسس او بسته بندۍ د شرکت کارونه بشپړ شول.

د دغه ولایت د سوداګرۍ خونې مشر ناصر عالمیار وایي، چې په دغه شرکت کې زرو کسانو ته د کار زمینه برابره شوې او په کلني ډول به ۶۰۰۰۰ ټنه جلغوزې بسته بندي شي.

سږ کال په دغه ولايت کې جلغوزو څه باندې ١٣زره مټريک ټنه حاصل ورکړی چې د تېر کال په پرتله لس سلنه زياتوالى ښيي.

چارواکي وايي، که څه هم اوسمهال ګاونډي هېواد پاکستان ته د جلغوزو د قاچاق مخه تر ډېره نيول شوې، خو بيا هم يوه اندازه جلغوزي دغه هېواد ته په قاچاقي ډول وړل کېږي او پاکستان يې بيا په خپل نوم نورو هېوادونو ته صادروي.

چارواکی وايي، په کور دننه د جلغوزو د پروسس د ورته مزکزونو په جوړېدو سره به دا ستونزه هواره شي.

"بهر ته د افغاني غاليو صادرات دوه برابره کم شوي"

ارشيف

د افغانستان د غالیو د صادرونکو ټولنه وايي، سږکال یې بهر ته صادرات د تېر کال په پرتله دوه برابره کم شوي دي.

د غالیو تولیدونکو او صادرونکو ټولنې مشر محمد عظیم اسلم زاده ازادي راډیو ته وویل چې سږکال شاوخوا ۲۵۰ زره مټر مربع غالۍ بهر ته صادرې شوې دي.

په داسې حال کې چې تېر کال تر همدې مودې دا کچه شاوخوا ۱۰۰ زره مټر مربع غالیو ته رسېده.

نوموړي وویل چې د کرونا ويروس له حده زیاته اغېزه د غالیو پر تولیدونکو ده او ډېری غالۍ اوبدونکي دم ګړۍ نه شي کولای خپل تولیدات په مناسبه بیه وپېري.

غالۍ اوبدنه او د غالیو پروسس هغه صنعت دی چې ډېرو کسانو ته د کار زمینه برابروي.

که څه هم ویل کېږي چې اوسمهال په هېواد کې یو میلیون تنه په غالۍ اوبدلو او غالۍ پلورلو بوخت دي خو ځينې غالۍ اوبدونکي وایي چې د هرې ورځې په تېرېدو سره په هېواد کې د غالۍ اوبدونکو شمېر کمېږي.

د افغانستان د بهرنیو چارو وزیر له خپل پاکستاني سیال سره پر ۴ موضوعاتو غږېدلی

د افغانستان د بهرنیو چارو وزیر له خپل پاکستاني سیال سره

د افغانستان او پاکستان د بهرنیو چارو وزیرانو د اسلامي هېوادونو د همکارۍ سازمان د غونډې په درشل کې سره ولیدل.

محمد حنیف اتمر په خپل ټوېټر لیکلي چې له خپل پاکستاني سیال شاه محمود قریشي سره یې د سولې د راتلونکي پړاو، امنیت، د کډوالو په بېرته ستنېدو او اقتصادي همکاریو خبرې کړي دي.

د پاکستان د بهرنیو چارو وزیر هم له ښاغلي اتمر سره تر لیدنې وروسته په خپل ټوېټر لیکلي چې پاکستان د ټولو لپاره د یوه سوکاله راتلونکي په هدف له افغانستان سره د اړیکو غښتلتیا ته ژمن دی.

د افغانستان د بهرنیو چارو وزارت وايي چې د اسلامي هېوادونو د همکارۍ سازمان د بهرنیو چارو وزیرانو په غونډه کې به افغان پلاوی له ګډونوالو هېوادونو د افغان سولې او ثبات لپاره د همکارۍ غوښتنه وکړي.

فوزیه کوفي: د ښځو د حقونو له خوندیتوب پرته سوله له ناکامۍ سره مخ کیږي

د افغانستان د دولت د مرکچي پلاوې غړې فوزیه کوفي

د افغانستان د دولت د مرکچي پلاوې غړې فوزیه کوفي وایي چې د ښځو د حقونو او شته لاسته راوړنو له خوندیتوب او درناوي پرته د سولې له ناکامۍ سره مخ کېږي.

مېرمن کوفي دا خبره پرون جمعه(د لیندۍ ۷) د اسلام اباد د څېړنو د انسټیټوټ په یوه وېبينار یا انلاین غونډه کې وکړه.

نوموړې وويل: "د پروسې پر مهال که وګورو چې د خبرو د ښکېلو لورو له خوا د ښځو د حقونو خوندیتوب نه یقیني کېږي او د افغانستان لاسته راوړنو، بشري حقونو، تنوع او ټول شمولیت ته درناوی نه کېږي هغه به داسې یو وخت وي چې دا پروسه به نه کامیابیږي."

په دې غونډه کې د ولسي جرګې غړې شینکۍ کړوخېل هم ټینګار وکړ چې د سولې په خبرو کې باید د ښځو ونډه زیاته شي.

هغې زیاته کړه چې ښځې د ټولنیزې پخلاینې په برخه کې تر ټولو مهم رول ادا کوي.

نور راوښيه

XS
SM
MD
LG