د لاسرسۍ وړ لېنکونه

تازه خبر
سه شنبه ۲۹ تله ۱۳۹۹ کابل ۱۰:۳۵

افغانستان

د قطر امیر: افغانستان سره ګډې هڅې به د تلپاتې سولې او ثبات سبب شي

د قطر امیر او افغان ولسمشر لیدنه

د قطر امیر هیله ښوولې چې د افغانستان او قطر ګډې هڅې به په افغانستان کې د تلپاتې سولې او ثبات سبب شي.

جمهوري ریاست وايي د قطر امیر شېخ تمیم حمد بن ال ثاني دا خبره نن په دوحه کې له ولسمشر محمد اشرف غني سره په کتنه کې وکړه.

د جمهوري ریاست په اعلامیه کې راغلي چې د قطر امیر ویلي: "د دې وخت راغلی چې دواړه هېوادونه د دوه اړخیزه اړیکو، اقتصادي همکاریو، سوداګرۍ او فرصتونو په اړه بحث او خبرې وکړي."

په قطر کې د سپټمبر له ۱۲مې د دولت او طالبانو مذاکره کوونکي په خبرو بوخت دي، خو لا هم د اصلي مذاکرو پر کړنلار اختلافي ټکي حل شوي نه‌دي.

ولسمشر محمد اشرف غني پرون له کوېټ څخه قطر ته لاړ او ټاکل شوې د قطر له نورو چارواکو سره هم د افغانستان د سولې او اقتصادي مسایلو په اړه خبرې وکړي.

د ورځې تازه خبرونه دلته ولولئ

میدان وردګ چارواکي: جلریز کې چاودنو ۵ تنه وژلي 

ارشیف

د میدان وردګو په جلریز ولسوالۍ کې نن سهار دوو چاودنو لږ تر لږه ۵ تنه وژلي دي.

د میدان وردک د والي ویاند محب اله شریفزوی ازادي راډیو ته وویل: "د جلریز ولسوالي په کوټه عشرو سیمه کې پر یوه تونس او یوه سراچه موتر چاودنې شوې دي چې ۵ تنه شهیدان شوي، ۹ ټپيان چې پنځه یې ښځې څلور یې ماشومان دي."

ټپیان رووغتونونو ته انتقال شوې دي.

د دې چاودنو مسوولیت چا په غاړه نه دی اخیستی.

د غزني چارواکي: قره باغ کې د موټر بم برید مخه نیول شوې

ارشیف

د غزني د امنیتي چارواکو په وینا د دې ولایت په قره باغ ولسوالي کې نن د یوه موټر بم برید مخه ونیول شوه.

د غزني د امنیه قومانداني ویاند احمد خان سیرت وایي، د سهار لسو بجو خواته ترهګرو د یو سراچه موټر په واسطه چې له چاودیدونکو موادو ډک و د قره باغ په ولسوالي کې د برید نیت درلود.

هغه زیاته کړه: "مخکې تر دې چې خپل هدف ته ورسېږي د قره باغ ولسوالي اتلو پولیسو برید پرې وکړ او په موټر کې چاودنه وشوه، د دې چادونې له امله د قره باع ولسوالي درې پولیس برسېرن ټپیان شوي دي."

ښاغلي سیرت برید کوونکو ته د اوښتي زیان په اړه څه نه دې ویلي.

د ملي امنیت ځواکونو لغمان کې د طالبانو ۷ کسیزه ډله نیولې

لغمان کې د طالبانو د اوه کسیزې نیول شوې ډلې انځور

د افغانستان د ملي امنیت عمومي ریاست وايي، چې په لغمان کې يې د طالبانو اوه کسیزه ډله نیولې ده.

د ملي امنیت عمومي ریاست په یوه اعلامیه کې ویلي دي چې یاده اوه کسیزه ډله د ځانګړو ځواکونو په عملیاتو کې نیول شوي دي.

په اعلامیه کې ویل شوي چې نیول شوې ډلې د لغمان د ولایتي شورا په یوه غړي او دغه راز د امنیې قومندانۍ په یو رنجیر په چاودونو کې لاس درلود.

په دواړو پېښو کې څلور تنه ولسي وګړي وژل شوي او ۱۶ تنه نور ټپیان شوي وو.

ملي امنیت عمومي ریاست ویلي، یادې ډلې په مرکز مهترلام ښار کې د ولسي وګړو په یوه غونډه کې د یو ماین د ځای پر ځای کولو هوډ هم درلود خو دې هدف ته تر رسېدو وړاندې ونیول شول.

د یوه بل خبر له مخې تېره ورځ په مرکز مهترلام کې هم یو لړ عملیات ترسره شوي چې په پایله کې يې د طالبانو یو تن مالي تمویلونکی قاري ذکرالله مشهور په کشمیر له یوه کس څخه د ۵۰ زره افغانیو د باج اخیستلو پرمهال لاس په لاس نیولی شوی دی.

د لغمان د مسئولینو په خبره، نیول شوي کس په باج اخیستنه، د ترورېستي پېښو په طرحه کولو او د ماینونو ځای پرځای کولو کې لاس درلود.

وسله والو طالبانو په دې اړه څه نه دي ویلي.

د ازبکستان مرستیال صدراعظم او د بهرنۍ سوداګرۍ وزیر کابل ته راځي

د افغانستان او ازبکستان نقشې او بیرغونه

د افغانستان د بهرنیو چارو وزارت کابل ته د ازبکستان د صدراعظم مرستیال او د پانګونې او بهرنۍ سوداګرۍ د وزیر سردار اوکتامویچ امورزاکوف سفر د دواړو هېوادونو د سوداګریزو اړیکو پراختیا لپاره ګټور ګڼي.

د دغه وزارت ویاند ګران هېواد نن ازادي راډيو ته وویل چې دوی به د هېواد له چارواکو سره د همکاریو د پراختیا او کابل او تاشکند ترمنځ د دوه اړخیزو اړیکو د پياوړتیا په هکله خبرې اترې وکړي.

هغه زیاته کړه: "د دوه اړخیزو سیمه‌ییزو او سوداګریزو اړیکو پراختیا په موخه د ازبکستان د لومړي وزیر مرستیال د یو لوړپوړي پلاوي په مشرۍ نن کابل ته راځي."

د دې سفر په ترڅ کې به د دواړو هېوادونو چارواکي د دوه اړخیزو سیاسي، اقتصادي، امنیتي او فرهنګي اړیکو د پياوړتیا او د سوداګرۍ او ترانزیټ، سیمه‌ییز پیوستون او ګډو زېربنايي پروژو په برخه کې د همکاریو په پراختیا خبرې اترې وکړي.

همداراز، تمه ده چې د همدې سفر په ترڅ کې د افغانستان د کار او ټولنیزو چارو او د کرنې، مالدارۍ او اوبو لګولو وزارتونه له خپلو ازبکستاني پلاويو سره د همکارۍ تړونونه هم لاسلیک کړي.

د افغانستان او ازبکستان ترمنځ په کلني ډول د ۴۰۰ میلیونه ډالرو په اندازه سوداګریزه راکړه ورکړه کېږي.

ناټو د افغان امنیتي ځواکونو د مالي ملاتړ ژمنه بیا تکرار کړه

د ناټو د عمومي منشي ینس سټولټنبرګ

ناټو متحدانو د دوشنبې په ورځ د افغان امنیتي ځواکونو د مالي ملاتړ ژمنه تکرار کړه.

د دې ائتلاف د اعلامیې له مخې چې د دوشنبې په ورځ خپره شوه، د ائتلاف متحدانو او شریکانو په یوه غونډه کې وویل چې تر ۲۰۲۴م کال پورې به د افغان امنیتي ځواکونو مالي ملاتړ کوي.

په اعلامیه کې د ناټو د عمومي منشي ینس سټولټنبرګ له قوله راغلي چې له افغان امنیتي ځواکونو سره به د ناټو متحدانو او شریکانو مالي ملاتړ تر ۲۰۲۰م کال ورهاخوا هم دوام وکړي.

ده زیاته کړه: "له افغان ځواکونو سره نړیوال مالي ملاتړ د افغانستان د امنیت په برخه کې زموږ د ژمنتیا یوه مهمه برخه ده. متحدانو د افغان ملي پوځ وجهي صندوق ته د دې صندوق له جوړېدو راهیسې د ۲۰۲۰م کال د اکټوبر تر پنځمې پورې ۳.۲ میلیارده ډالره ورکړي دي."

ناټو ائتلاف په ۲۰۰۷م کال کې د افغان ملي پوځ په نوم وجهي صندوق رامنځته کړ چې د نړیوالو په مالي مرسته پر مخ ځي.

د ناټو د معلوماتو له مخې د دې وجهي صندوق له لارې افغان ځواکونو ته روزنه او مسلکي نظامي زده‌کړې ورکول کېږي.

دا درېیم لوی وجهي صندوق دی چې له لارې یې نړیوال د افغان پوځ ملاتړ کوي.

دوه نور د نظم او قانون وجهي صندوق یا «LOTFA» او د افغان امنیتي ځواکونو لپاره د امریکا وجهي صندوق یا «ASFF» نومېږي.

خلیلزاد: د امتیاز ګټلو لپاره د تاوتریخوالي زیاتوالی خطرناک دی

زلمی خلیلزاد

د افغانستان د سولې لپاره د امریکا ځانګړی استازی وايي، د سولې د خبرو پر مهال دا باور چې د امتیاز د ګټلو لپاره باید تاوتریخوالی زیات شي، خطرناک دی.

زلمي خلیلزاد پرون دوشنبه پر ټویټر د پیغامونو په یوه لړۍ کې لیکلي د ده تمه دا وه چې تاوتریخوالی به کمېږي او کم به پاتې کېږي. دی زیاتوي چې ښکېل اړخونه باید هغو مسایلو ته چې خبرې او تفاهم پرې شوي، ژمن پاتې شي.

خلیلزاد وايي، د سرغړونو بې‌بنسټه تورونه او پاروونکې څرګندونې د سولې د خبرو له پرمختګ سره مرسته نه‌کوي او ټینګار کوي چې باید د امریکا او طالبانو د سولې موافقه او د افغانستان او امریکا ګډه اعلامیه په جدي ډول په پام کې ونیول شي.

ښاغلی خلیلزاد دا څرګندونې داسې مهال کوي چې د افغان دولت او طالبانو ترمنځ په دوحه کې روانو خبرو تر اوسه نتیجه نه‌ده ورکړې او ورسره د هېواد په بېلابېلو ولایتونو کې جګړو زور اخیستی.

هلمند کې ایمرجنسي روغتون د نورو ټپيانو او ناروغانو د منلو وړتیا نه‌لري

د هلمند ایمرجنسي روغتون

یوې روغتیايي ادارې خبرداری ورکړی چې د هلمند ولایت په مرکز لښکرګاه کې د ایمرجنسي روغتون د نورو ټپيانو او ناروغانو د منلو وړتیا نه‌لري.

په هلمند کې د ایمرجنسي پروګرام هماهنګ کوونکي مارکو پونتین اسوشیټډ پرس خبري اژانس ته ویلي چې په هلمند ولایت کې وضعیت تر اوسه ډېر خراب دی.

هغه زیاته کړه: "په وضعیت کې هېڅ ډول پرمختګ نه‌وینو. جګړه دوام لري او لارې بندې دي. ماینونه ځای پر ځای شوي دي. د خپلو همکارانو د ملاتړ لپاره راغلی یم."

له هلمنده وېډیوګانې او عکسونه ښکاروي چې ټپيان او ناروغان د هلمند د ایمرجنسي روغتون انګړ ته ایستل شوي ځکه د ودانۍ دننه کافي ځای نه‌شته.

طالبانو ۱۰ ورځې مخکې د لښکرګاه ښار پر څو ولسوالیو بریدونه پيل کړل. د دغو حملو په نتيجه کې زرګونه کسان بې‌ځایه شول او د ښار مرکز ته‌یې پناه یووړه.

طالبان وايي، یوازې يې پر هغو سیمو حمله کړې چې مخکې افغان ځواکونو له دوی نیولې وې.

اوچا: افغانستان کې په ۲۰۲۰ کال کې تر ۲ لکه زیات کسان بې‌ځایه شوي

بي‌ځایه شوې کورنۍ

د ملګرو ملتونو د بشري چارو د هماهنګۍ یا اوچا اداره وايي، په افغانستان کې په ۲۰۲۰م کال کې تر دوه لکه زیات نور کسان په کور دننه بې‌ځایه شوي دي.

د دې ادارې د راپور له مخې دغه کسان د جګړې او سېلابونو په نتيجه کې بې‌ځایه شوي.

د اوچا راپور د دوشنبې په ورځ خپور شو. په دې راپور کې راغلي چې بې‌ځایه شوي کسان د بې‌وزلۍ او جګړو له کبله نه‌شي کولای بېرته خپلو کورو ته ستانه شي.

د همدې راپور له مخې پنځه لکه او ۷۳ زره افغانان د روان کال پر مهال له ګاونډي ایران او پاکستانه بېرته افغانستان ته ستانه شوي. همداراز په ۲۰۲۰م کال کې شااوخوا شپږ زره افغانان له ترکیې ایستل شوي او بېرته افغانستان ته لېږل شوي دي.

له دې سره د راپور په وینا شااوخوا یو میلیون بې‌ځایه شوي افغانان د روان کال تر پایه بشري مرستو ته اړتیا لري.

انتونیو ګوترش: افغانستان کې له داعش ډلې سره مذاکرات امکان نه‌لري

د ملګرو ملتونو عمومي منشي انتونیو ګوترش

د ملګرو ملتونو عمومي منشي وايي، په افغانستان کې یوه ترورېستي ډله ده چې ورسره خبرې امکان نه‌لري او هغه اسلامي دولت یا داعش سخت دریځه ډله ده.

انتونیو ګوترش د دوشنبې په ورځ (د اکټوبر په ۱۹ نېټه) له فرانسوي ورځپاڼې لي موند سره په مرکه کې وویل، له ځینو جهادي ډلو سره مذاکرات ممکن دي، خو له سخت دريځو لکه داعش ډلې سره خبرې امکان نه‌لري.

ګوترش په افریقايي هېوادونو کې سخت دريځو ته په اشاره وویل، داسې ډلې شته چې غواړي په راتلونکي کې سیاسي فعالیت ولري، خو یو شمېر نورې بیا داسې دي چې سخت دريځ‌يې غوره کړی او مذاکرات نه‌شي ورسره کېدای.

ده په خپلو خبرو کې افغانستان ته هم اشاره وکړه، چېرته چې امریکا له طالبانو سره د خبرو په نتیجه کې د روان کال په فبرورۍ میاشت کې یوه موافقه لاسلیک کړه.

ګوترش زیاته کړه، د داعش ډلې دریځ دومره سخت دی چې له دې ډلې سره مذاکراتو ته هېڅ ځای نه‌پاتې کېږي.

د خوست د ځاځي میدان ولسوال یوه برید کې ووژل شو

د خوست د ځاځي میدان وژل شوی ولسوال عبدالحی ځاځی

د خوست د ځاځي میدان ولسوال نن په یوه وسله‌وال برید کې ووژل شو.

د پکتیا د والي ویاند عبدالرحمن منګل رسنیو ته په استولي پیغام کې ویلي چې عبدالحی ځاځی له خپل یوه ساتونکي سره هغه مهال ووژل شو چې له خوست څخه کابل ته روان وو.

ښاغلی منګل زیاتوي: "د خوست د ځاځي میدان ولسوال عبدالحی ځاځی چې له خوست څخه کابل ته روان وو، د لوګر ولایت په التمور سیمه کې برید ورباندې شوی. ولسوال او یو ساتونکی یې وژل شوي، یو بل قومي مشر حاجي حسن جان ټپي شوی او موټر چلوونکي ته زیان نه‌دی رسېدلی."

ښاغلي منګل ونه‌ویل چې دا برید چا کړی، خو په دې وروستیو کې د ځینو نورو چارواکو د هدفي وژنو تور پر وسله‌والو طالبانو پورې شوی دی.

طالبانو تر اوسه د وروستۍ پېښې په اړه څه نه‌دي ویلي.

د بهرنیو چارو وزارت: پر کونړ د پاکستان راکټي بریدونه اړیکې زیانمنوي

ارشیف، یو شمېر پاکستاني سرتېري

د افغانستان د بهرنیو چارو وزارت د کونړ پر مرورې ولسوالۍ د پاکستان د پوځ راکټي بریدونه غندلي.

د بهرنیو چارو وزارت په یوې اعلامیه کې راغلي چې د افغانستان پر خاوره د دې ډول بریدونو دوام د دواړو هېوادونو اړیکو ته زیان رسوي.

اعلامیه زیاتوي د پاکستان دا اقدام له افغانستان سره د دې هېواد د هغو ژمنو خلاف دی چې د دوه اړخیزو اړیکو د پیاوړتیا او پاللو په برخه کې یې کړې دي.

د افغانستان د بهرنیو چارو وزارت اعلامیه وایي د میزان/تلې په ۲۷مه شپه پاکستاني پوځیانو د کونړ په مرورې ولسوالۍ کې پر استوګنځایونو ۲۵ راکټونه ویشتلي دي چې یو ملکي وګړی په‌کې وژل شوی او درې ماشومان ټپیان شوي دي.

پاکستاني پوځیانو تر دې وړاندې هم په کونړ ولایت کې پر بېلابېلو سرحدي ولسوالیو ورته بریدونه کړي دي. د سیمې خلک حکومت تورنوي چې دغو بریدونو ته‌یې قاطع ځواب نه‌دی ویلی.

افغانستان کې تېرو ۲۴ ساعتونو کې لسګونه کسان په کرونا ویروس اخته شوي

ارشیف، افغان-جاپان روغتون کې روغتیايي کارکوونکي د کرونا ویروس له امله د یوه مړ شوي کس د مړي د لېږدولو پر مهال.

د افغانستان عامې روغتیا وزارت وایي په تېرو ۲۴ ساعتونو کې په دې هېواد کې لسګونه کسان تازه په کرونا ویروس اخته شوي دي.

د دغه وزارت ویاند اکمل سمسور نن ازادي راډیو ته وویل: "په تېرو ۲۴ ساعتونو کې د ۵۲۳ کسانو ازموینه اخیستل شوې چې له دې ډلې د ۸۷ کسانو نتیجې مثبتې وې او په همدې موده کې ۵ کسان مړه شوي دي."

د عامې روغتیا وزارت د رسمي شمېرو له مخې په افغانستان کې په کرونا ویروس د اخته کسانو شمېر څه باندې ۴۰ زره او ۲۰۰ ته رسېدلی او له 'کووېډ-۱۹' ناروغۍ څخه په دې هېواد کې نږدې ۱،۵۰۰ کسان مړه شوي دي.

ډاکتران وایي خلک باید د ورځې څو ځلې لاسونه په اوبو او صابون ومینځي او په عمومي ځایونو کې د ماسک کارولو سربېره یو بل څخه معین واټن مراعات کړي او تر ممکن حده په کور پاته شي، څو د کرونا ویروس د خورېدو مخه ونیول شي.

د ننګرهار چارواکي: د داعش ډلې نومول شوی قاضي ووژل شو

د داعش ډلې بیرغ

د ننګرهار چارواکي په جلال‌اباد ښار کې د داعش ډلې د نومول شوي قاضي د وژلو خبر ورکوي.

د ننګرهار ولایت د رسنیو مرکز ازادي راډيو ته په استولې خبرپاڼه کې ویلي چې تېره شپه د جلال‌اباد ښار د نهمې ناحیې اړوند خوشګمبد سیمه کې د ملي امنیت ځانګړو ځواکونو عملیات کړي چې په ترڅ کې یې د داعش ډلې نومول شوی قاضي چې په معاویه مشهور و، وژل شوی دی.

په خبرپاڼه کې راغلي چې وژل شوي کس وړاندې د داعش ډلې یوه مشر ابو عمر ته کار کاوه.

خبرپاڼه زیاتوي چې د جلال‌اباد ښار د ۷مې ناحیې په مربوطاتو کې هم عملیات ترسره شوي چې په‌کې د داعش ډلې د ځانمرګو بریدونو مسؤل محمد نبي مشهور په ایوبي نیول شوی دی.

د خبرپاڼې له مخې، په عملیاتو کې امنیتي ځواکونو او ولسي خلکو ته کوم زیان نه‌دی اوښتی.

راپورونه وایي د افغان حکومت د ځپونکو عملیاتو سره سره لا هم د ننګرهار ولایت په یو شمېر غرنیو سیمو کې داعش وسله‌وال حضور لري.

ارګ: یو شمېر خوشې شوي طالبان بېرته جګړو ته ورغلي

د طالبانو یو شمېر زندانیان چې د افغان حکومت له لوري خوشې شوي دي. August 13, 2020

ولسمشرۍ ماڼۍ په هېواد کې د جګړو د ډېرېدو په تړاو په قطر کې د طالبانو پر مشرانو انتقاد کوي.

د ولسمشر ویاند صدیق صدیقي نن ازادي راډیو ته وویل چې راپورونه ښیي یو شمیر هغه طالبان چې د حکومت له زندانونو خوشې شوي، بېرته جګړو ته ورغلي دي.

صدیقي زیاته کړه: "د تاوتریخوالي او ترورېستي بریدونو د دوام مسؤلیت د طالبانو دی، په تېره بیا په قطر کې د دې ډلې مشران‌یې مسؤل دي، ځکه دوی په هغه ژمنه چې په لومړي سر کې یې کړې وه، عمل نه‌دی کړی."

وسله‌والو طالبانو تر دې وړاندې د جګړو ډګر ته د خوشې شویو طالبانو د بېرته ورتګ ادعا رد کړې وه.

د ارزګان په دهراوود ولسوالۍ کې ۲ پولیس وژل شوي

د ارزګان نقشه

دوه پولیس د ارزګان په دهراوود ولسوالۍ کې د طالبانو په برید کې وژل شوي دي.

دا خبر د یادې ولسوالۍ امنیه قوماندان جان محمد ازادي راډیو ته تأیید کړ.

نوموړي زیاته کړه چې وسله‌والو طالبانو تېره شپه پر یو شمېر امنیتي پوستو بریدونه کړي، خو دی د یادو پوستو وضعیت د اندېښنې وړ بولي.

هغه زیاته کړه: "تلفات شته. دوه تنه پولیس وژل شوي او څو تنه ټپیان دي. پوستې سقوط شوې نه‌دي، خو داسې څه په‌کې پاتې نه‌دي چې شپه او ورځ په‌کې تېره شي."

د دهراوود امنیه قوماندان وویل چې په متقابلو نښتو کې طالبانو ته هم مرګ‌ژوبله اوښتې، خو دقیق شمېر یې معلوم نه‌دی.

له تېرو شااوخوا ۲۸ ورځو راهیسې پر دهراوود ولسوالۍ د طالبانو بریدونه پیل شوي او د چارواکو په خبره طالبانو د یادې ولسوالۍ د بازار په ۱۰۰ مترۍ کې فعال دي.

نور راوښيه

XS
SM
MD
LG