د لاسرسۍ وړ لېنکونه

تازه خبر
شنبه ۳ لړم ۱۳۹۹ کابل ۱۰:۰۸

نړۍ

د قرغزستان د وروستیو پارلماني ټاکنو باطلېدو لپاره بشکېک کې لاریون وشو

قرغزستان کې لاریون کوونکي

ګڼو سیاسي ګوندونو د قرغزستان د وروستیو پارلماني ټاکنو د پایلو د باطلېدو لپاره په پلازمېنه بشکېک کې لاریون وکړ.

په پرونیو ټاکنو کې هغو ګوندونو زیاتې څوکۍ ګټلي چې د قرغزستان له روس‌پلوه ولسمشر سورونبای جین بیکوف سره نږدې اړیکې لري.

د مخالفو ګوندونو سوسیال ډیموکرات، وطني اتحاد، متحد واوسئ او اصلاحاتو تر ۱،۰۰۰ زیاتو فعالانو او ملاتړو نن دوشنبه د بشکېک په مرکزي میدان کې لاریون وکړ.

دوی ادعا لري چې په پرونیو ټاکنو کې درغلۍ او سرغړونې شوې دي.

تر دې مخکې د اپوزېسیون دوو نورو ګوندونو پلار وطن او جمهوریت ویلي وو چې دوی او ملاتړي به‌یې نن ناوخته ډله‌ییز اعتراضونه وکړي.

دغه ټاکنې د پارلمان د ۱۲۰ څوکیو لپاره شوي چې لومړنۍ نتیجې ښيي څلورو ګوندونو د پارلمان ۷ فیصده سیټونه ګټلي دي.

د ورځې تازه خبرونه دلته ولولئ

د لیبیا د جګړې ښکېلو خواوو پر دایمي اوربند هوکړه وکړه

د ملګرو ملتونو له ملاتړ برخه‌من د لیبیا صدراعظم فایض السراج او خلیفه حفتر

د لیبیا د جګړې ښکېلو خواوو سمدستي د یوه دایمي اوربند د ټينګښت په سر تړون لاسلیک کړ.

د ملګرو ملتونو له‌خوا په رسمیت پېژندل شوي حکومت او د خلیفه حفتر ډله د سویس په جنوا کې تر پنځو ورځو خبرو وروسته د جمعې په ورځ موافقې ته ورسېدل.

په دې تړون سره هیلې ژوندۍ شوي چې د لیبیا د یوې لسیزې جګړې او وینې تویېدو ته د پای ټکی کېښودل شي.

د ملګرو ملتونو سرمنشي انتونیو ګوترش دغه تړون ته رسېدل ستایلي.

اخوا د ناټو سرمنشي هم د دغه تړون هرکلی، خو په تطبیق‌یې ټینګار کړی.

ینس سټولټنبرګ وايي: "موږ د دغه اوربند له اعلانه هرکلی کوو او د ملګرو ملتونو د هغو ټولو هڅو ملاتړ کوو چې د لیبیا د شخړې د سوله‌ییز حل لپاره‌یې کړي. دایمي سوله‌ییز حل‌لارې ته اوربند مهمه دی، خو باید ټولې خواوې د اوربند درناوی وکړي او تطبیق‌یې کړي."

د لیبیا د جګړې خواوې به په تونس کې سیاسي خبرې پیلوي څو په راتلونکي حکومت او د انتخاباتو په ترسراوي سره جوړ شي.

د خلیفه حفتر وسله‌واله ډله د لیبیا د ختیځ پراخې سیمې او د ملګرو ملتونو له‌خوا په رسمیت پېژندل شوی حکومت طرابلس او شاوخوا سیمې په لاس کې لري.

پاکستان د نړیوالې ترهګرۍ د تمویل خړ لېست کې پاتې شو

د پاکستان صدارت ماڼۍ

پاکستان بیا هم د نړیوالې ترهګرۍ د تمویل په خړ لېست کې پاتې شو.

د تورو پیسو د مينځنې او د ترهګرو د مالي سرچينو د وچولو پر چارو د څار ادارې (اېف ای ټي اېف) پرون په یوه اعلامیه کې دا خبر ورکړ.

(اېف ای ټي اېف) له ۳۵ غړو هېوادونو او دوو سیمه‌ییزو سازمانونو جوړه اداره ده چې د نړیوالې ترهګرۍ د تمویل د سرچینو د وچولو او د تورو پیسو له مینځلو سره د مبارزې په هدف کار کوي.

د دې ادارې د اعلامیې له مخې د پاکستان نوم یو ځل بیا په خړ لېست کې وساتل شو او پاکستان چې د دوی د ۲۷ شرطونو له ډلې په ۲۱ عمل کړی په کار ده چې پاتې نور هم د ۲۰۲۱ کال تر فبرورۍ عملي کړي.

پاکستان د ترهګرو ډلو په تمویل تورن دی هغه تور چې پاکستاني چارواکو هېڅکله نه‌دی منلی، بلکې ټینګار یې دی چې دوی تر ټولو زیات د ترهګریزو بریدونو له امله زیانمن شوي.

پاکستان د ۲۰۱۸ کال له جون راهیسې د (ایف ای ټي اېف) په خړ لېست کې دی او هڅو یې تر اوسه کار نه‌دی ورکړی چې ځان له دې لېست وباسي.

دغه لېست ته هغه هېوادونه وراچول کېږي چې د ناقانونه پیسو د انتقال او د ترهګرو د تمویل د سرچینو په وچولو کې کمزوري بلل کېږي.

حبیب نورمحمدوف او جستین ګیجي نن شپه یو بل سره مخامخ کېږي

حبیب نورمحمدوف

د رزمي لوبو دوه پېژندل شوي لوبغاړي حبیب نورمحمدوف او جستین ګیجي نن شپه له یو بل سره مخامخ کېږي.

دوی د رزمي لوبو د معتبره سازمان (یو اېف سي) په ۲۵۴ دور سیالیو کې لوبیږي چې دا وار یې کوربه د متحده عربي اماراتو پلازمېنه ابوظبي ده.

حبیب نورمحمدوف وايي له خپلې اتلولۍ به دفاع وکړي، خو شرایط تر پخوا لږ څه متفاوته دي.

ښاغلی نورمحمدوف زیاتوي: "د ما لپاره دا یو خاص وخت دی چې دلته په ابوظبي کې لوبه کوم. د کرونا وبا له شرایطو سره او دا چې ننداره‌چیان به نه‌وي، مینه‌وال به نه‌وي. لږ څه ستونزمنه ده."

روسی لوبغاړی حبیب نورمحمدوف چې د افغانستان په شمول په ټوله نړۍ کې مینه‌وال لري د (یو اېف سي) د سپک وزن اتل دی او تر اوسه‌یې له ۲۸ لوبو هېڅ یوه نه‌ده بایللې.

امریکایی فایټر جستین ګیجي ۲۲ لوبې ګټلي او دوه‌یې بایللي، خو دی هم تر حبیب کم نه‌ګڼل کېږي او د دوی د اوسنۍ لوبې وړاندوینې هم تقریباً مساوي دي.

سادیر ژاپاروف د قرغزستان اساسي قانون د بدلون لایحه توشېح کړه

د قرغزستان موقت صدراعظم او د حکومت د لومړی درجه چارواکی سادیر ژاپاروف

د قرغزستان حکومت د دغه هېواد په اساسي قانون کې د بدلون هغه لایحه نن توشېح کړه چې له مخې یې ولسمشریزې او پارلماني ټاکنې ځنډېږي.

د قرغزستان پارلمان پرون دغه لایحه تصویب کړه، اساسي قانون کې له دې بدلون سره سادیر ژاپاروف اجازه لري چې ولسمشریزو ټاکنو ته ځان نوماند کړي.

ژاپاروف د خپل یوه سیال د تښتونې په جرم په یوولس نیم کاله بند محکوم و.

نوموړی د اکټوبر د څلورمې ټاکنو وروسته د راولاړو شویو اعتراضونو پایله کې خوشې شو.

نوموړی وروسته د موقت صدراعظم او د حکومت د لومړي درجه چارواکي په توګه وټاکل شو.

قطر کې له څو میاشتني ځنډ وروسته د اوښ ځغلولو سیالۍ پیل شوې

ارشیف، متحده عربي اماراتو کې د اوښ ځغلولو سیالۍ

په قطر کې د اوښ ځغلولو سیالۍ له څو میاشتني ځنډ وروسته بېرته پيل شوې.

دغه سیالۍ تېره فبروري میاشت کې د کرونا وبا د خپرېدو له کبله درول شوې وې.

د منډې دغې سیالۍ کې تر اپرېل میاشتې پورې زرګونه اوښان ځغلول کېږي او وړونکو کسانو ته په بېلابېلو کټه ګوریو کې له ۲،۱۰۰ تر دوه لکه او ۵۰ زرو ډالرو جایزه ورکول کېږي.

لوبه داسې ده چې اوښان په یوه ټاکل شوي واټن کې یوازې ځغلي او تر ټولو ګړندی هغه‌یې جایزه ګټي.

د اوښ ځغلولو سیالۍ چې د عربو یوه پخوانۍ لوبه ده، له ۱۹۷۰ کال راهیسې په رسمي ډول په قطر کې ترسره کېږي.

سږنیو سیالیو کې له دوو زرو تر ۱۳ زرو پورې اوښان برخه اخلي.

امریکا: د روسیې له ملاتړه برخه‌منو هکرانو پر ګڼو ادارو سایبري حملې کړي

ارشیف

د امریکا متحده ایالات وایي، وروستیو څو اوونیو کې د روسیې د دولت له ملاتړه برخه‌منو هکرانو پر لسګونه ایالتي او محلي ادارو باندې سایبري بریدونه کړي دي.

هکرانو له لږ تر لږه دوو سرورونو څخه اطلاعات غلا کړي دي.

د امریکا د فدرالي څېړنو ادارې (اېف.بي.ای) پرون وویل، تر اوسه هېڅ داسې نښې نښانې نه‌شته چې دغو هکرانو دې د الوتکو د الوتنې، ښوونې او روزنې، ټاکنو او یا حکومتي عملیاتو سیستم ګډوډ کړی وي.

د هکرانو د بریدونو خبرداری داسې مهال ورکول کېږي چې امریکا کې ولسمشریزو ټاکنو ته له دوه اوونیو کمه موده پاتې ده.

امریکایي چارواکو د اکټوبر په ۲۱مه ادعا وکړه چې ایران او روسیې د امریکا د رأی ورکوونکو اطلاعات ترلاسه کړي او هڅه کوي چې له انتخاباتو مخکې پر عامه فکرونو اغېز وکړي.

روسیې او ایران دغه ادعاوې رد کړې دي.

اروپا کې د کرونا دوهمه څپه؛ د تېرو ۱۰ ورځو نوې پېښې دوه برابره شوي

چک کې روغتیايي کارکوونکي په کرونا ویروس د اخته ناروغ د درملنې پر مهال

په اروپا کې د کرونا ویروس دوهمه څپه ګړندۍ روانه ده او تېرو ۱۰ ورځو کې نوې پېښې څه باندې دوه برابره شوې دي.

روېټرز ویلي، پرون په ټوله اروپا کې د لومړي ځل لپاره په ورځنۍ کچه د کرونا څه باندې دوه لکه پېښې ثبت شوي چې دې سره په ټوله اروپا کې روغتونونه هم تر فشار لاندې راغلي دي.

په دغې لویه وچه کې تر ټولو زیاتې پېښې چک جمهوریت کې رامنځته کېږي او حکومت‌یې هغه پلان تأیید کړی چې له ناټو او اروپایي ټولنې دې ۳۰۰ پوځي روغتیایي کارکوونکي د ناروغانو درملنه کې مرسته وکړي.

بلجیم او یو شمېر نورو هېوادونو کې روغتونونه هغه ناروغان نه‌مني چې بېړنی روغتیایي وضعیت ونه‌لري.

د پولنډ په وارسا ښار کې حکومت ملي ستډیوم په ګرځنده روغتون اړوي چې د ۵۰۰ ناروغانو درملنه به په‌کې کېږي.

په فرانسه کې د روغتونونو ۴۴ په سلو کې بسترونه د 'کووېډ-۱۹' په ناروغانو ډک شوي دي.

د ډونالد ټرمپ او جوبایډن وروستۍ مناظره کې کوم موضوعات شامل وو؟

د ډونالد ټرمپ او جوبایډن وروستۍ مناظره

د امریکا ولسمشر ډونالد ټرمپ او انتخاباتي سیال‌یې جوبایډن پرون په وروستۍ مناظره کې ګډون وکړ.

د امریکا ولسمشرۍ انتخاباتو ته تر دوو اونیو لږ وخت پاته دی.

په دې ۹۰ دقیقه‌یي مناظره کې د دواړو سیالانو ترمنځ د لومړنۍ مناظرې پرتله لفظي نرمښت موجود وو.

ډونالد ټرمپ چې په ډېرو نظرپوښتنو کې تر جوبایډن شاته ښودل شوی دی د دې مناظرې په اصلي موضوع کې چې د کرونا ویروس کنټرول وو، د دې وبا د خورېدو د کنټرول د تګلارې دفاع وکړه.

ولسمشر ټرمپ وویل، د امریکا متحده ایالات له دې ویروس سره ژوند زده کوي او په خبره‌یې د روان کال تر پایه به د دې ناروغۍ لپاره واکسین جوړ شي.

جوبایډن بیا وویل چې د کرونا ویروس خورېدل لا هم دوام لري او په خبره‌یې ولسمشر ټرمپ نیت نه‌لري د هغه څه چې ده یو تیاره ژمی وباله مخه ونیسي.

د بایډن په خبره ۲۲۰ زره امریکایان مړه شول او هغه کس چې د دغو مړینو مسؤل دی باید د امریکا ولسمشر پاته نه‌شي.

د اذربایجان او ارمنستان تازه جګړې د واشنګټن منځګړیتوب ته هیلې پیکه کړې

اذربایجان کې ویجاړه شوې سیمه

هغه هیلې چې په واشنګټن کې راروانې خبرې به د نګورنو قره‌باغ د لانجنمې سیمې پر سر د اذربایجان او ارمنستان جګړې پای ته ورسوي، پرون وروسته له هغه پیکه شوې چې دواړو لورو بیا جګړې وکړې او باکو او ایروان خپل دریځونه نور هم کلک کړل.

د اذربایجان ولسمشر الهام علییف په یوه مرکه کې چې پرون پنجشنبه خپره شوه وویل چې یوې سوله‌ییزې حل‌لارې ته رسېدل ډېر لیرې دي.

له دې یوه ورځ مخکې د ارمنستان صدراعظم نیکول پاشینیان ویلي و چې دی په دې پړاو کې د دې اوږدې لانجې د حل لپاره کومه ډیپلوماتیکه لاره نه‌ویني.

خو له دې منفي څرګندونو سره سره د روسیې ولسمشر ولادیمیر پوتین وویل دی هیله‌من دی چې متحده ایالات به د دې لانجې د حل لپاره د یوې حل‌لارې په موندلو کې له مسکو سره همکاري وکړي.

د روسیې په منځګړتوب د اذربایجان او ارمنستان د جګړې د پای ته رسولو لپاره دوه مخکېني اعلان شوي اوربندونه له نافذېدو ډېر ژر وروسته مات شول او دواړو خواوو د درنې توپخانې، توغندیو او بې‌پیلوټه الوتکو په وسیله په خپلو کې درنه جګړه پیل کړه.

سعد حریري یو ځل بیا د لبنان د صدراعظم په توګه معرفي شو

سعد حریري

د لبنان ولسمشر یو ځل بیا سعد حریري د صدراعظم په توګه معرفي کړ.

د روېټرز خبري اژانس د راپور له مخې ولسمشر میشل عون پرون پنجشنبه له حریري څخه وغوښتل چې خپله کابینه ژر تر ژره جوړه کړي.

ښاغلی حریري تېر کال په ټول لبنان کې د خلکو له پراخو مظاهرو وروسته د صدارت له څوکۍ استعفا ورکړه، خو دا ځل د ۶۴ موافقو رایو په ګټلو سره وتوانېد چې د صدراعظم په توګه د بیاغوره کېدو لپاره لازم نصاب ترلاسه کړي.

حریري ته داسې مهال د کابینې د جوړولو دنده سپارل کېږي چې لبنان د واک د وېش، بانکي بحران، د فقر د زیاتېدو، پورونو او ستونزو سره لاس او ګرېوان دی.

امریکا کې د 'کووېډ-۱۹' علاج لپاره یو ډول درمل تأیید شول

د 'کووېډ-۱۹' ضد یو واکسین تطبیق

د امریکا د خوړو او درملو مسؤلې ادارې د ویروس ضد یو ډول درمل د 'کووېډ-۱۹' د علاج لپاره په رسمي ډول تأیید کړي دي.

دې ادارې پرون د اکټوبر په ۲۲مه د ګیلاد ساینس د درمل جوړولو شرکت یو ډول درمل چې د ویکلوري په نوم یادېږي تأیید کړل.

د نوموړې ادارې کمېشنر ستیفن هان وویل چې دا درمل پر ډېرو کلینیکي ازموینو له څېړنو وروسته تأیید شول. هغه دا درمل د کرونا د وبا پر وړاندې په مبارزه کې مهم ساینسي پرمختګ وباله.

د 'کووېډ-۱۹' د علاج لپاره له دې مخکې له ستیراید، دیکسامیتازون او نورو درملو څخه هم کار اخیستل شوی دی، خو ویکلوري چې د پیچکارۍ په وسیله ناروغ ته ورکول کېږي په ا مریکا کې د دې ناروغۍ لپاره یوازني او لومړني تأیید شوي درمل ګڼل کېږي.

ویکلوري لومړی د ایبولا د علاج لپاره جوړ شوی و. ولسمشر ډونالد ټرمپ ته چې د روانې میاشتې په لومړیو کې په کرونا اخته شوی و، هم دا او ځیني نور درمل د علاج لپاره ورکړل شوي وو.

امنیت شورا د تاجکستان ځانګړي ځواک پر پخواني قوماندان بندیزونه تمدید کړل

ګل مراد حلیموف

د ملګرو ملتونو امنیت شورا د تاجکستان د کورنیو چارو وزارت د ځانګړي ځواک د پخواني قوماندان ډګروال ګل مراد حلیموف پر ضد بندیزونه تمدید کړل.

حلیموف په ۲۰۱۵ م کال په سوریه کې له داعش سر یوځای شو او په وروستیو کلونو کې یې څو ځلې د وژلو خبرونه خپاره شول.

د حلیموف نوم د ملګرو ملتونو د امنیت شورا د بندیزونو په تازه لېست کې چې پرون خپور شو، بیا راغلی دی.

'ایران او روسیې د ځینو امریکايي رأی ورکوونکو معلومات ترلاسه کړي'

د روسیې او ایران بیرغونه

د امریکا د ملي امنیت چارواکي وایي، ایران او روسیې دواړو د امریکایي رأی ورکوونکو په اړه معلومات ترلاسه کړي او هڅه کوي چې د نومبر په درېیمه د ولسمشرۍ تر انتخاباتو مخکې پر عامه افکارو اغېز وکړي.

د امریکا د استخباراتو د ملي ادارې مشر جان راتکلیف پرون په یوه خبري کنفرانس کې وویل، معلومات‌یې ترلاسه کړي چې ایران او دغه‌راز روسیې د یو شمېر رأی ورکوونکو د نوم لیکنې په اړه معلومات ترلاسه کړي دي.

راتکلیف او د امریکا د پولیسو د تحقیقاتو د فدرالي ادارې «اف بي ای» مشر کریس ورې خبریالانو ته وویل، هر هغه بهرنی هېواد به چې د امریکا په انتخاباتو کې مداخله کوي، متحده ایالاتو ته تاوان ورکړي. دواړو چارواکو د ایران او د روسیې له دې هڅو سره سره امریکایانو ته د انتخاباتو د پروسې په اړه ډاډ ورکړ.

راتکلیف وویل، ایران د جعلي اېمېلونو له لارې د رأی ورکوونکو د بېرولو، د ټولنیزو ناکراریو د رامنځته کولو او ولسمشر ډونالد ټرمپ ته د زیان رسولو هڅې کړې دي.

راتکلیف وویل، د امریکا استخباراتو د روسیې له‌خوا د ورته اقداماتو څه نه‌دي لیدلي، خو دې هېواد د یو شمېر رأی ورکوونکو په اړه معلومات ترلاسه کړي، هغسې چې په ۲۰۱۶ کال کې یې کړي و.

کرونا ویروس د امریکا نږدې درېیو برخو ته د خپرېدو په حال کې دی

نیویارک کې روغتیايي کارکوونکي

کرونا ویروس د امریکا نږدې درېیو برخو ته د خپرېدو په حال کې دی او په اروپا کې یې ډېرې خپرېدا دولتونه اړ کړي چې نوي بندیزونه ولګوي او د نورو سختو هغو خبرداری ورکړي.

د امریکا په لوېدیځه او منځنۍ برخه کې یې چې د کرونا ویروس په چټکۍ د خپرېدو په حال کې دی، په شپږو ایالتونو کې یې تر ټولو زیاتې نوې پېښې ثبت شوې دي.

په متحده ایالاتو کې په وروستۍ یوه اوونۍ کې د دغه ویروس له ا مله د مړو شمېر د ورځې په متوسط ډول ۷۵۷ تنو ته رسېږي. په دې سره په ټوله امریکا کې د مړو شمېر۲۲۲ زرو ته رسېدلی دی.

په اروپا کې د دغه ویروس د نوې څپې د لاخپرېدو د مخنیوي د هڅو په ترڅ کې پولنډ او پرتګال نوي بندیزونه لګولي او خبرداری یې ورکړی چې نور به هم ولګوي.

په دغو هېوادونو کې د ماسک کارول اجباري شوي، غونډې محدودې شوي، بارونه او رستورانتونه بند شوي، تقریباً بېرته د بشپړ بندیزونو یو وضعیت رامنځته شوی دی.

د هند کرکټ غوره لیګ؛ راجستان رایلز له سنرایزرس حیدراباد سره لوبېږي

سنرایزرس حیدراباد لوبډله

ټاکل شوې ده چې نن د هند د کرکټ غوره لیګ سیالیو په ترڅ کې راجستان رایلز لوبډله له سنرایزرس حیدراباد سره ولوبېږي.

راجستان رایلز تر اوسه پورې په جدول کې شپږم ځای لري او سن رایزرس حیدراباد لوبډله چې یوه لوبه‌یې کمه کړې ده په اووم مقام کې ده.

په سنرایزرس حیدراباد کې د افغانستان دوه لوبغاړي، راشد خان او محمد نبي لوبېږي.

د هند د کرکټ غوره لیګ لوبې د کرونا ویروس له امله په متحده عربي اماراتو کې د سپټمبر په ۱۹مه پيل شوې دي او د نومبر تر ۱۰مه به روانې وي.

نور راوښيه

XS
SM
MD
LG