د لاسرسۍ وړ لېنکونه

تازه خبر
جمعه ۹ لړم ۱۳۹۹ کابل ۱۱:۰۸

افغانستان

عبدالله عبدالله د پاکستان د بهرنیو چارو وزیر سره وکتل

عبدالله عبدالله د پاکستان د بهرنیو چارو وزیر شامحمود قریشي سره لیدلي.

د افغانستان د ملي مصالحې د عالي شورا رییس عبدالله عبدالله پاکستان ته په رسېدو د دغه هېواد د بهرنیو چارو له وزیر شاه محمود قریشي سره وکتل.

د دغو خبرو جزییات تر دې دمه نه دي راوتلي.

ښاغلي عبدالله مخکې په خپل ټوېټر هیله ښودلې وه چې دا سفر یې د دوو ګاونډيو هېوادونو په اړیکو په خاصه توګه په افغانستان کې یوې با عزته او دایمي سولې ته د رسېدو په برخه کې د همکاریو نوی باب پرانېزي.

اخوا د پاکستان په چارو کې د افغان ولسمشر ځانګړی استازی محمد عمر داوودزی چې په دې سفر کې د ښاغلي عبدالله ملګرتیا کوي ازادي راډیو ته وویل: "د پخوا په نسبت وضعیت بدل شوی دی، د لومړي ځل لپاره د افغانستان د جګړې دوه اړخونه چې افغانان دي، دوحه کې مخامخ خبرو ته ناست دي، پاکستان هم هر ډول لازمې اشارې او علامې څرګندوي او د سولې بهیر کې همکارۍ ته جدي دی."

په افغانستان کې د ناټو او اروپايي ټولنې لوړپوړیو استازیو پاکستان ته د عبدالله عبدالله سفر ستایلی او ویلي یې دي چې د دغو هېوادونو د اړیکو د ټینګښت ملاتړي دي او سیمه باید د افغانستان د سولې او ثبات لپاره همکاري وکړي.

عبدالله عبدالله داسې وخت پاکستان ته تللی چې په دوحه کې د افغانستان د دولت او طالبانو ټیمونه خبرې کوي خو په ځينو لانجمنو مسلو سره ایسار دي.

تمه ده ښاغلی عبدالله په دې سفر کې د پاکستان له صدراعظم عمران خان او نورو لوړپوړو چارواکو سره هم وګوري.

د ورځې تازه خبرونه دلته ولولئ

ارزګان کې د افغان هوايي ځواکونو حملې طالبانو ته مرګ‌ژوبله اړولې

د ارزکان نقشه

د ارزګان ولایت د والي ویاند وايي، په دهراود ولسوالۍ کې د افغان هوايي ځواک په حملو کې وسله‌والو طالبانو ته مرګ‌ژوبله اوښتې ده.

احمد شاه ساحل نن جمعه ازادۍ راډيو ته وویل دغه بریدونه تېره شپه د ولسوالۍ د بازار په شااوخوا کې شوې دي.

ښاغلي ساحل زیاته کړه، چې د وژل شویو وسله‌والو طالبانو دقیق شمېر معلوم نه‌دی.

هغه زیاته کړه: "افغان هوايي ځواک پر ځینو سیمو بریدونه کړي دي، ډېرې سیمې یې په نښه کړې دي. وسله‌والو طالبانو ته‌یې درنه مرګ‌ژوبله اړولې، خو دقیق شمېر یې لا تر دا مهاله نه شته."

د والي ویاند وايي په ولسوالۍ کې له څو ورځو جګړه روانه ده او په پرونۍ جګړه کې یو سرتېری هم وژل شوی دی.

په ارزګان کې چارواکي وايي، هڅه کوي د هراود ولسوالۍ هغه سیمې چې وسله‌والو طالبانو په وروستیو ورځو کې نیولي، بېرته ونیسي.

پروان کې ۵ تنه د یوه ځوان د وژلو په تړاو نیول شوي

ارشیف

پروان کې چارواکي وايي، پنځه تنه‌یې د یو ۲۸ کلن کس د وژلو په تړاو نیولي دي.

د پروان د امنیې قومندانۍ د مطبوعاتي دفتر مشر سلیم نوري ازادي راډیو ته وویل، پولیسو دا کسان د چاریکار ښار په یوولسمه ناحیه کې د پنجشنبې په ورځ نیولي دي.

راپورونه وايي تر دې دوه ورځې مخکې یو ځوان هلک په چاریکار کې په ډزو وژل شوی و.

د دې پېښې علت او انګیزه تر اوسه روښانه نه‌ده.

چارواکي: بدخشان کې هوايي بريد ۲۰ وسله‌وال طالبان ووژل

ارشیف، د افغان ځواکونو هوايي حمله

د بدخشان ولایت چارواکي وايي، د بر یفتل په دوابه سیمه کې پرون چهارشنبه شل تنه وسله‌وال طالبان په هوايي برید کې ووژل شول.

د بدخشان ولایت د امنیه قوماندانۍ ویاند ثناالله روحاني ازادي راډیو ته په دې اړه وویل: "هوايي ځواک پر هغو سنګرونو چې په‌خوا د ولسي پاڅونوالو وو او طالبانو هغه سیمه نیولې وه، برید وکړ چې د طالبانو نږدې ۳ مورچې ویجاړې شوي او د دولت ۲۰ وسله‌وال مخالفان وژل شوي او ۷ نور ژوبل شوي دي"

طالبانو په دې اړه څه نه‌دي ویلي.

د راپورونو له مخې طالبانو نږدې دوې اوونۍ وړاندې د بدخشان ولایت د مرکز فیض اباد ښار په اتمه حوزه کې د بریفتل سیمه ونیوله.

د کاپیسا امنیه قوماندان له دوو نورو سره په یوه غلچکۍ حمله کې ټپي شو

د کاپیسا ولایت امنیه قوماندان فرید احمد مشعل

د کاپیسا ولایت امنیه قوماندان فرید احمد مشعل له دوو تنو نورو سره د طالبانو په یوه غلچکۍ حمله کې ټپي شو.

د کاپیسا د امنیه قوماندانۍ ویندوی عبدالشایق شورش ازادي ته وویل چې دا پېښه پرون مازدیګر وشوه.

هغه زیاته کړه: "قوماندان صاحب د اله‌سای ولسوالۍ د لیدو لپاره تللی و، کله چې بېرته راستنېدو د اله‌سای او تګاب ترمنځ د کورغل په سیمه کې د دښمن له لوري غلچکۍ برید وشو، دوه ساعته جګړه وشوه او له بده مرغه قوماندان صاحب، د پولیسو د امنیت مدیر او یو سرتېری سرسري ټپیان شول او د قوماندان صاحب چلوونکی شهید شو."

طالبانو د دې پېښې په اړه لا څه نه‌دي ویلي.

'زلمي خلیلزاد او سکاټ مېلر له ملا عبدالغني برادر سره لیدلي'

ارشیف، زلمی خلیلزاد په قطر کې له یو شمېر طالب چارواکو سره د لیدو پر مهال.

د طالبانو د قطر دفتر ویاند وايي، د افغانستان د سولې لپاره د امریکا ځانګړي استازي زلمي خلیلزاد او د امریکايي ځواکونو عمومي قوماندان جنرال سکاټ مېلر د طالبانو د سیاسي دفتر له مشر ملا عبدالغني برادر سره وکتل.

د محمد نعیم په وینا په دې کتنه کې چې پرون ماښام په دوحه کې وشوه، دواړو خواوو د امریکا او طالبانو د موافقې د تطبیق، د طالبانو د نورو بندیانو د خلاصون، له تورو لېستونو د طالب مشرانو د نومونو د ایستلو او د جګړې د زیاتېدو پر عواملو خبرې وشوې.

وسله‌والو طالبانو په وروستیو کې د افغانستان په بېلابېلو سیمو کې خپلې جګړې ته زور ورکړی دی.

چارواکي: بغلان کې ۱۸ وسله‌وال طالبان ووژل شول

ارشیف، بغلان کې د افغان ځواکونو عملیات

د بغلان امنیتي چارواکي وايي چې په دغه ولایت کې په یو لړ هوايي او ځمکنیو عملیاتو کې ۱۸ وسله‌وال طالبان وژل شوي دي.

د بغلان امنیه قوماندان مل پاسوال محمد یونس صمیمي وايي، په دې عملیاتو کې چې د بغلان په خوست ولسوالۍ کې وشول، ۱۵ نور وسله‌وال طالبان ژوبل شوي دي.

دی همداراز وايي چې په دې ولسوالۍ کې ۲۵ کلي د دولت له وسله‌والو مخالفانو تصفیه شوي دي.

په بغلان کې د ازادي رادیو خبریال وايي چې طالبانو څو ورځې وړاندې پر دې ولسوالۍ له څو خواوو حملې پیل کړې وې.

وسله‌والو طالبانو په دې اړه څه نه‌دي ویلي.

'طالبانو د ارزګان د دهراوود ولسوالۍ بازار او امنیه قومانداني نیولي'

د افغانستان په عمومي نقشه کې ارزګان ولایت

ځیني راپورونه وايي چې وسله‌والو طالبانو د ارزګان ولایت د دهراوود ولسوالۍ بازار او امنیه قومانداني نیولي دي.

پر دې ولسوالۍ له تېرو څو ورځو راهیسې د طالبانو حملې روانې دي.

په ولسي جرګه کې د ارزګان د خلکو یوه استازي بسم‌الله جان محمد او د دهراوود ځینو اوسېدونکو نن ازادي راډیو ته وویل چې طالبان د دهراوود بازار ته داخل شوي او امنیه قومانداني یې نیولې ده.

بسم‌الله جان محمد وايي چې اوس د ولسوالۍ په بازار کې جګړه روانه ده.

پرون د ارزګان چارواکو ادعا کړې وه چې دې ولسوالۍ ته کمکي ځواک استول شوی دی.

د افغانانو په مشرۍ له سولې بهیر د هند او د منځنۍ اسیا هېوادونو ملاتړ

قطر کې د افغانستان دولت او طالبانو ترمنځ د سولې خبرو پرانیست غونډه

د هند او د منځنۍ اسیا هېوادونو د بهرنیو چارو وزیرانو په ګډه غونډه کې په افغانستان کې پر داسې سولې ټینګار وشو چې واک‌یې د افغانانو وي.

په دې غونډه کې چې د چهارشنبې په ورځ انلاین ترسره شوه، اصلي اجنډا یې د هند او د منځنۍ اسیا د هېوادونو ترمنځ د سوداګرۍ پراختیا وه.

د افغانستان د بهرنیو چارو سرپرست وزیر محمد حنیف اتمر د مېلمه په توګه په دې غونډه کې برخه واخیسته.

د هند، ترکمنستان، ازبکستان، تاجکستان، قرغزستان او قزاقستان د بهرنیو چارو وزیرانو تر غونډې وروسته په ګډ بیان کې وویل چې دوی په افغانستان کې د سولې د داسې بهیر ملاتړ کوي چې مشري یې د افغانانو وي، مالکیت‌یې د افغانانو وي او واک‌یې هم له افغانانو سره وي.

افغان ځواکونو د کندهار ارغنداب ولسوالۍ کې د طالبانو ضد عملیات پيل کړي

ارشیف، افغان امنیتي ځواکونه

د کندهار په ارغنداب ولسوالۍ کې افغان ځواکونو د طالبانو پر ضد عملیات پيل کړي دي.

د کندهار د امنیه قوماندانۍ ویاند جمال ناصر بارکزي ازادي راډیو ته وویل چې دا عملیات د بابرو، لاهور او چهارغولبې په سیمو کې پيل شوي او ورو ورو مخته ځي.

ښاغلی بارکزی زیاتوي: "وسله‌وال ترهګر هلته په ملکي کورونو کې پټ دي. زموږ امنیتي ځواکونو ډېر په احتیاط هلته عملیات روان کړي، که خدای کول ډېر ژر به سیمه له ترهګرو څخه پاکه شي."

د ارغنداب د امنیتي وضعیت د ارزونې لپاره د ملي اردو لوی درستیز ستر جنرال محمد یاسین ضیاء او د کورنیو چارو وزارت ارشد معین ستر پاسوال عبدالصبور قانع کندهار ته رسېدلي دي.

د سولې روان بهیر کې د ښځو حقونو ته د افغانستان لومړۍ مېرمنې اندېښنه

د افغانستان لومړۍ مېرمن رولا غني

د افغانستان لومړۍ مېرمنې د سولې په روان بهیر کې د ښځو حقونو ته اندېښنه ښکاره کړه.

د اتلانتیک شورا د څېړنیز مرکز له لوري په جوړه شوې انلاین غونډه کې چې پرون د امریکا متحده ایالاتو پخوانۍ لومړۍ مېرمن لورا بوش هم برخه اخیستې وه، رولا غني وویل، که چېرته د سولې د توافق په ترڅ کې طالبانو ته ډېر څه وسپارل شي هغه پرمختګونه به له خطر سره مخامخ شي چې په وروستیو کې افغان ښځو کړي دي.

مېرمن غني زیاتوي: "افغان ښځې سوله غواړي، افغان نارینه هم سوله غواړي، موږ ټول سوله غواړو. څوک، په ګوټ ګوټ کې له ۴۰ کلونو ناامنۍ او شخړو وروسته سوله نه‌غواړي، خو موږ په هره بیه سوله نه‌غواړو."

د قطر په پلازمېنه دوحه کې د سپټمبر په ۱۲مه د افغان دولت د پلاوي او طالبانو ترمنځ لیدنې کتنې پيل شوې دي او تر اوسه دواړه لوري د سولې د خبرو پر کړنلارې موافقې ته نه‌دي رسېدلي.

د افغان دولت په ۲۱ کسیز پلاوي کې څلور مېرمنې دي او د طالبانو په پلاوي کې مېرمنې نه‌شته.

امریکا یو افغان د برمته کولو د یوې پېښې په تړاو دغه هېواد ته وروستی

ارشیف

د امریکا د فدرالي ادارې چارواکو اعلان وکړ چې یو افغان‌یې متحده ایالاتو ته د ۲۰۰۸ کال د برمته کولو د یوې پېښې په تړاو راوستی دی.

حاجي نجیب‌الله پرون په نیویارک کې محکمې ته وړاندې شو. پر ده تور دی چې په ۲۰۰۸ کال کې یې د نیویارک ټایمز خبریال ډېوېډ راډ او افغان خبریال طاهر لودین له یوه موټر چلوونکي سره په افغانستان کې برمته کړي وو.

د فدرالي ادارې چارواکو وویل چې ۴۲ کلن نجیب‌الله یې چې د افغانستان تابعیت لري له اوکراین څخه امریکا ته بیولی دی.

دا دوه خبریالان وروسته له اوو میاشتو د پاکستان د قبایلو له یوې سیمې وتښتېدل. دوی په افغانستان کې نیول شوي وو بیا یې په زوره پاکستان ته لېږدولي وو او د دوی موټر چلوونکی د دې پېښې قرباني شو.

د پاکستان د ویزو په برخه کې د ستونزو پر هواري د اتمر او قریشي خبرې

د عکس ښي لور ته شاه محمود قریشي او چپ لور ته محمد حنیف اتمر

د افغانستان او پاکستان د بهرنیو چارو وزیرانو د پاکستان د ویزو په برخه کې د ستونزو پر هواري خبرې وکړې.

حنیف اتمر او شا محمود قریشي د دغو ټیلفوني خبرو پر مهال په افغانستان کې د پاکستان د کونسلي چارو د پياوړتیا پر امکان بحث کړی دی.

د افغانستان د بهرنیو وزارت ویاند ګران هېواد ازادي راډیو ته وویل چې دغه ټیلفوني خبرې تېر ماښام وشوې.

هغه زیاته کړه: "د بهرنیو چارو سرپرست وزیر محمد حنیف اتمر له خپل پاکستاني سیال شا محمود قریشي سره د دوه اړخیزو اړیکو پر پیاوړتیا، د افغان وګړو د ویزو د مشکلاتو پر حل او د کنسلي خدماتو د ظرفیت په لوړولو خبرې وکړې."

د ویزو د ستونزو د هواري په اړه ډېر جزییات نه دي ورکړل شوي، خو له دې وړاندې پاکستاني چارواکو ویلي، د دغه بهیر د اسانه کولو هڅه کوي.

پاکستان شاوخوا اته میاشتې د افغانانو لپاره ویزې بندې کړې وې او اوس ډېر افغانان د ویزو تقاضا لري.

تېره اونۍ جلال اباد کې د ویزې اخیستو پر مهال ټېل ماټېل کې لږ تر لږه دیارلس ښځې مړې شوې او نږدې همدې شمېر کې ښځې او نارینه ټپیان شول.

د افغانستان د بهرنیو چارو وزارت خبرپاڼه کې راغلي چې د وزارت سرپرست حنیف اتمر له پاکستاني سیال سره د دوه اړخیزو اړیکو په پیاوړتیا او سولې بهیر کې د پرمختګونو په اړه هم غږېدلی دی.

چارواکي: په دهراود کې طالبانو د ولسوالۍ د بازار یو شمېر سیمې نیولي

ارشیف

د ارزګان په دهراود ولسوالۍ کې خلک او ولسي استازي وایي چې طالبانو د ولسوالۍ د بازار یو شمېر سیمې نیولي دي.

ځایي اوسېدونکو هلته د ازادي راډیو خبریال ته ویلي، چې طالبانو تېره شپه د ولسوالۍ پر مرکزي پوستو بریدونه کړي چې لا هم جګړه روانه ده.

په ولسي جرګه کې د ارزګان استازی بسم الله محمدي، چې خپله د دهراود اوسېدونکی دی، وایي چې طالبان د ولسوالۍ او امنیه قومندانۍ ودانیو ته نږدې شوي دي.

هغه زیاته کړه: "زما په نظر دوی به له قومندانۍ او ولسوالۍ څخه دوه سوه متره لرې وي، باید پلي کمانډویان د عملیاتو لپاره مرسته وکړي، پنځه-شپږ پوستې محاصره دي، د خیر محمد په نوم یو تکړه قومندان و، هغه شهید شوی دی."

په دغه ولایت کې د ملي اردو د څلورمې لوا ویاند جګړن اقا محمد صافي ازادۍ راډيو ته وویل، چې په دهراود ولسوالۍ کې وضعیت عادي دی او طالبانو کومه سیمه نه ده نیولې.

پر دهراوود ولسوالۍ طالبانو له تېرې یوې میاشتې راهسې بریدونه پیل کړي.

د کندز مسګران: لرغونی مسګري صنعت مخ په ورکېدو دی

ارشیف

په کندز ښار کې مسګران وايي، په دې ولایت کې دا لرغونی صنعت مخ په ورکېدو دی.

په دې ولایت کې د مسګرۍ یا مسي لوښو د جوړولو کاروبار دلته اوږده مخینه لري، خو د دې ولایت یو مسګر غلام حسین په وینا له هغې ورځې چې ښيښه يي، پلاستیکي او فلزي لوښي عام شوي، د مسي لوښو بازار کم شوی او ورسره دلته د مسګرۍ صنعت هم په ختمېدو دی.

غلام حسین وايي، د مسګرۍ په کار کې ورته پخوانۍ ګټه او خوند نه شته، خو دا چې دا کسب ورته له پلار نېکه په میراث پاتې دی نو ځکه دوام ورکوي.

خو خلک ولې مسي لوښې نه اخلي؟

د امام صاحب د ولسوالۍ اوسېدونکی صدیق الله وايي، مسي لوښي په لاس جوړېږي او په بازار کې په عصري فابریکه يي بڼه د جوړو شویو لوښو څخه یې بیه لوړه ده.

د کندز د سوادګرۍ او صنعت ریاست چارواکي بیا په هېواد کې د ازاد بازار موجودیت د مسي لوښو په څېر د دودیزو صنعتونو او ځینو کورنیو تولیداتو پر وړاندې ننګونه بولي.

د دې ادارې رئیس غلام علي عیدي زاده کندز کې د مسګرو د اندېښنو په اړه وویل: "د سوداګرۍ او صنعت وزارت له مسګرانو سره خپله همکارې اعلان کړې، موږ له مسګرانو سره له نږدې اړیکې او همکارې لرو او ستونزو ته توجه کوو، انشاءالله د مسګرۍ صنعت د ژوندې پاتې کېدو لپاره خپلې هڅې کوو."

مسګرۍ د افغانستان پخوانی صنعت دی او تېرو کلونو کې په کورنو کې کارېدونکي ډېر لوښې له مسو جوړېدل او بازار یې تود و، خو اوس چې له ګاونډیو هېوادونو څخه په معاصرو فابریکو کې جوړ شوي رنګارنګ فلزي، ښیښه یي او پلاستیکي لوښي افغانستان ته را واردېږي، او بیې یې هم ارزانه دي.

په افغانستان کې د قیمتي ډبرو د پروسس مرکز جوړېږي

ارشیف

په افغانستان کې د قیمتي ډبرو د پروسس مرکز جوړېږي.

د کانونو او پټرولیم وزارت وايي، د پانګونې اسانتیا لپاره د قانوني اسانتیاوو د چمتو کولو تر څنګ د غیرقانوني استخراج د مخنیوي لپاره په افغانستان کې د قیمتي ډبرو د پروسس د مرکز په جوړولو کار روان دی.

د دې وزارت ویاند ویاند عبدالقدیر مطفي نن ازادي راډيو ته وویل چې وزارت په دې اړه د یوې بلجیمي کمپنۍ له استازو سره خبرې کړي او په نږدې راتلونکي کې به یې کارونه پیل شي.

دغه بلجیمي کمپنۍ چې کابل ته به راځي، د قیمتي او نیمه ‌قیمتي ډبرو د پانګونې په برخه کې به کار وکړي.

وزارت وايي، په دې سره به د هېواد عایدات زیات او سلګونو کسانو ته به د دندو فرصتونه برابر شي.

اوسمهال د افغانستان قیمتي ډبرې د پروسس لپاره بهرنیو هېوادونو ته وړل کېږي.

نور راوښيه

XS
SM
MD
LG