د لاسرسۍ وړ لېنکونه

تازه خبر
پنجشنبه ۱ لړم ۱۳۹۹ کابل ۰۷:۳۴

افغانستان

طالب مرکچي پلاوی: ښځې دې د راتلونکې په اړه هېڅ ډول اندېښنه ونه لري

قطر کې د طالبانو د مرکچي پلاوي غړي

په قطر کې د طالبانو د مرکچي پلاوی یو غړی وایي، د افغانستان ښځې باید د خپلې راتلونکې په اړه هېڅ ډول اندېښنه ونه لري.

طالبانو په خپله واکمنۍ کې ښځې له زده کړو او کارونو منعه کړې وې.

اوس چې له دې ډلې سره د سولې خبرې روانې دي، د د بشري حقونو فعالان په افغانستان کې د ښځو راتلونکې ته اندېښمن دي.

مولوی عبدالسلام حنفي د طالبانو له الاماره ویبپاڼې سره مرکه کې ویلي د طالبانو د واکمنۍ پر مهال هم ښځو روغتونونو کې کار کاوه او د پولیسو لیکو کې یې د تالاشۍ دنده مخته وړه، خو په خبره یې دا چې حالات جنګي وو او دوی سره د اوس په نسبت امکانات کم وو، نورو برخو کې یې حقونه خوندي نه وو.

هغه زیاته کړه: "د افغانستان په اسلامي نظام کې د ټولنې د ټولو اقشارو حقونه خوندي دي، مونږ د افغانستان ټولو ښځو ته ډاډ ورکوو چې انشاالله د دوی ټول حقونه به په اسلامي نظام کې محفوظ وي."

افغان مېرمنې د طالبانو د نظام له ړنګېدو وروسته په تېرو ۱۹ کلونو کې د زده کړو او کار په برخه کې د پام وړ لاسته راوړنې لري.

دوی اندېښمنې دي چې د طالبانو سره د روغې جوړې په صورت کې د دوی پر حقونو جوړجاړی ونه شي.

په وروستیو کې د نړۍ یو شمېر پخوانیو او اوسنیو مشرانو او مخکښو نړیوالو څېرو هم په یو پرانیستې لیک کې د سولې په بین الافغاني خبرو کې د ښځو د حقونو پر بشپړ خوندیتوب ټینګار وکړ.

د ورځې تازه خبرونه دلته ولولئ

یو.اېن.اېچ.سي.ار: هلمند کې شااوخوا ۴۰ زره کسان بې‌ځایه شوي

هلمند کې د وروستیو جګړو له امله یو شمېر بې‌ځایه شوې کورنۍ

د کډوالو په چارو کې د ملګرو ملتونو عالي کمېشنرۍ په هلمند کې د بې‌ځایه شویو کسانو د خوندیتوب او ملاتړ غږ کړی دی.

«یو.اېن.اېچ.سي.ار» نن په یوه بیان کې وویل چې هلمند کې د تېرو ۱۰ ورځو جګړو له امله شاوخوا ۴۰ زره کسان بې‌ځایه شوي دي.

دغې ادارې ویلي، دوی کې پنځه زره داسې کسان دي چې بېړنیو مرستو ته اړتیا لري.

بیان کې راغلي، «یو.اېن.اېچ.سي.ار» له یو شمېر بې‌ځایه شویو کسانو سره د سرپناه، کمپلو، ترپالونو او د پخلنځي د وسایلو او دغه‌راز نقدو پیسو مرسته کړې ده.

راپور کې نه‌دي ویل شوي چې څه شمېر کسانو دغه مرستې ترلاسه کړې دي، خو په‌کې راغلي چې د مرستې ټیمونه په سروې بوخت دي.

ملګري ملتونه وایي، څه باندې دوه لکه او ۲۰ زره افغانان د روان زېږدیز کال له پيله بې‌ځایه شوي چې له دې سره د ټولو بې‌ځایه شویو شمېر ۴،۱ میلیونو ته رسېږي.

پکتیا کې خښ شویو ماینونو تېرو ۶ میاشتو کې ۶۷ ملکیان وژلي

ارشیف، پکتیا کې ماین چاودنه

پکتیا کې چارواکي وایي چې ۶۷ ملکیان تېرو شپږو میاشتو کې د خښو شویو ماینونو په چاودنو کې وژل شوي دي.

دغلته سرپرست امنیه قوماندان لطف‌الله کامران نن د امنیتي ځواکونو یوې غونډې ته وویل، دغه ماینونه د وسله‌والو طالبانو له‌خوا ایښودل شوي دي.

کامران وایي، دې موده کې نږدې پنځه نیم سوه ماینونه خښ شوي چې ډېره برخه‌یې شنډ شوي دي.

ښاغلی کامران زیاتوي: "۵۴۳ ماینونه ایښودل شوي دي، ۷۶ ملکي کسان دغو ماینونو کې شهیدان شوي دي او ۱۸۴ نور ټپیان شوي دي."

د کامران په خبره، وژل شویو کې ښځې او ماشومان هم شامل دي.

طالبانو تر اوسه د چارواکو د دغې ادعا په اړه څه نه‌دي ویلي.

سټولټنبرګ: طالبان دې تاوتریخوالی د پام وړ کچې ته راټیټ کړي

ینس سټولټنبرګ

د ناټو عمومي منشي له طالبانو وغوښتل چې افغانستان کې تاوتریخوالی د پام وړ کچې ته راټیټ کړي.

ینس سټولټنبرګ نن (د تلې ۳۰مه) په بروکسل کې د ناټو د دفاع وزیرانو د غونډې په درشل کې وویل، طالبان باید د دوو لسیزو لاسته راوړنو ته درناوی وکړي.

ښاغلی سټولټنبرګ زیاتوي: "طالبان باید په خپلو ژمنو عمل وکړي، دوی دې د تاوتریخوالي کچه په پراخه توګه کمه کړي او اوربند ته دې لاره هواره کړي، باید له القاعده شبکې او نورو ترهګرو ډلو سره اړیکې پرې او ښې روحیې سره خبرو ته کېني."

سټولټنبرګ وویل، ناټو د افغانستان اوږدمهاله امنیت ته ژمن دی او په همدې خاطر دغه سازمان تر ۲۰۲۴ کال پورې افغان ځواکونو سره مالي مرسته کوي.

د ناټو عمومي منشي دغه غوښتنه داسې مهال کوي چې افغانستان کې د سولې له خبرو سره سره د طالبانو جګړې روانې دي.

'د تخار روغتون ته د څه باندې ۳۰ امنیتي پرسونل مړي وروړل شوي'

ارشیف

د تخار د عامې روغتیا ریاست وایي، د څه باندې دېرشو امنیتي او دفاعي پرسونل مړي روغتون ته وروړل شوي دي.

د روغتیا رییس سید عبدالله قیوم حیرت ازادي راډیو ته وویل، دغه ځواکونه تېره شپه له طالبانو سره جګړه کې وژل شوي دي.

هغه زیاته کړه: "د تخار له ځانګړې قطعې لس جسدونه او له ۹۹۹مې قطعې هم لس جسدونه را وړل شوي دي، د تخار ۱۷ پولیس هم وژل شوي چې د ۱۲ هغو جسدونه راوړل شوي دي."

حیرت وایي، په وژل شویو کې د تخار د امنیه قومندانۍ د امنیت امر راز محمد دور اندېش هم شامل دی.

له دې وړاندې د تخار امنیتي چارواکو د ښاغلي دور اندېش او د هغه د ساتونکو وژل تایید کړي دي.

دوی ویلي، طالبانو ته هم جګړه کې درنه مرګ ژوبله اوښتې، خو طالبانو لا څه نه دي ویلي.

هلمند چارواکي: ناوې کې ۳۵ طالبان وژل شوي

امنیتي ادارو د دغو عملیاتو په اړه خبرپاڼې خپرې کړي او ویل شوي چې دغلته هوایي ځواک هم کارېدلی دی. 

چارواکي په هلمند کې د ۳۵ طالبانو د وژلو خبره کوي، دغه ادعا لا طالبانو رد یا تایید کړې نه ده.

دغه طالبان په ناوې ولسوالۍ کې د دوو جلا عملیاتو پایله کې وژل شوي دي، هغه ولسوالۍ چې وروستیو کې طالبانو پرې حمله کړې وه.

دفاع وزارت او ملي امنیت ریاست دواړو د دغو عملیاتو په اړه خبرپاڼې خپرې کړي او ویل شوي چې دغلته هوایي ځواک هم کارېدلی دی.

طالبانو ویلي، د هلمند د مرکز په ګډون یې بېلابېلو ځایونو کې وروستۍ حملې د هغو سیمو د بېرته نیولو لپاره دي چې د دوی په ټکو حکومتي ځواکونو ترې نیولې دي.

د تخار د امنیت امر راز محمد دوراندېش د طالبانو په برید کې ووژل شو

د تخار ولایت د امنیت امر راز محمد دوراندېش

د تخار امنیتي چارواکو تأیید کړه چې د دغه ولایت د امنیت امر راز محمد دوراندېش د طالبانو په برید کې وژل شوی دی.

د تخار د امنیه قوماندانۍ ویاند خلیل اسیر له رسنیو سره په خبرو کې یوازې د راز محمد دوراندېش وژل کېدل تأیید کړي او نور یې جزئیات نه‌دي شریک کړي.

د تخار یو شمېر اوسېدونکو ازادي راډیو ته ویلي چې بېګا د بهارک ولسوالۍ په سپين جومات کلي کې افغان امنیتي ځواکونو او طالبانو نښته کړې او په راز محمد دوراندېش سربېره‌یې یو شمېر نور افغان پولیس هم وژلي دي.

دوی ویلي چې په نښتو کې د پولیسو زرې موټر او رنجرې سوځول شوي او یو شمېر د طالبانو لاس ته لوېدلي.

چارواکو د خلکو د دغو څرګندونو په اړه څه نه‌دي ویلي.

طالبانو هم تر اوسه کومه تبصره نه‌ده کړې.

زابل کې د ښځو په وړاندې د تاوتریخوالي کمېدو په اړه غونډه وشوه

افغان مېرمنې

په زابل کې په یوه غونډه کې د ښځو په وړاندې د تاوتریخوالي د کمېدو او د هغوی د نورو ستونزو د هواري پر لارو چارو خبرې وشوې.

د زابل د ولایت له مطبوعاتي دفتره په خپره شوې خبرپاڼه کې ویل شوي چې په دې غونډه کې چې مشري یې والي محمد نبي احمدزي کوله او د ښځو په وړاندې د تاوتریخوالي د کمېسیون ټولو غړو ګډون کړی و، د مېرمنو پر وړاندې د تاوتریخوالي پر کمښت، د دوی پر اقتصادي، تعلیمي، روغتیایي، کلتوري او یو شمېر نورو برخو کې پر شته ستونزو باندې خبرې وشوې او په اړوند یې لازم تصمیمونه ونیول شول.

د خبرپاڼې له مخې ښاغلي احمدزي د اړوندو دولتي ادارو استازو ته لارښوونه وکړه چې مېرمنو ته دې د کاري فرصتونو په پیدا کولو کې خپل نهایي کوشش وکړي او په خپلو اعلان شويو بستونو کې دې لومړیتوب لوستو او په کار پوه مېرمنو ته ورکړي.

خوست کې د کرونا ویروس مخنیوي لپاره د عامه پوهاوي کمپاین پیل شو

د کرونا د مخنیوي لپاره دوا پاشي

د خوست روغتیایي کارکوونکو د کرونا ویروس د نوې څپې د مخنیوي لپاره د عامه پوهاوي یو کمپاین پیل کړی او له خلکو غواړي چې روغتیایي سپارښتنې جدي په پام کې ونیسي.

د دغه کمپاین یوه مسؤل ډاکټر عبدالواحد نیازي ازادي راډیو ته وویل، د هوا په سړېدو سره د کرونا ویروس د خپرېدو خطر زیات دی او د مخنیوي تر ټولو غوره لاره‌یې دا ده چې خلک باید د نورو سپارښتونو ترڅنګ لازم واټن په پام کې ونیسي، لاسونه تل ومینځي او له ماسک څخه استفاده وکړي.

هغه زیاته کړه: "که چېرته‌یې د مخنیوي تدابیر په سمه توګه عملي نه‌شي، امکان لري دا څپه به شدیده وي او امکان لري چې تلفات به‌یې هم زیات وي."

د روغتیایي چارواکو په وینا په خوست کې تر اوسه د کرونا ۴۳۲ مثبتې پېښې ثبت شوې او له امله‌یې هم ۳۸ تنه مړه شوي دي.

د رسمي شمېرو له مخې تر اوسه په ټول افغانستان کې پر کرونا له ۴۰ زرو ډېر کسان اخته شوي او له امله‌یې هم یو نیم زر کسان مړه شوي دي.

نن نوماند وزیران او دوه رئیسان ولسي جرګې ته ورپېژندل کېږي

د افغانستان ولسي جرګه

ټاکل شوې نن ټول نوماند وزیران او د دوو ادارو رئیسان د باور رایې اخیستو لپاره ولسي جرګې ته وروپېژندل شي.

د ولسمشر مرستیال ویاند دوا خان مینه‌‌پال ازادي راډیو ته وویل، ولسمشر اشرف غني به د کابینې ټول ۲۶ غړي او د دوو ادارو رئیسان دې جرګې ته وروپېژني.

اشرف غني د مارچ په نهمه د ولسمشر په توګه د لوړې په مراسمو کې ژمنه کړې وه چې په دوو اوونیو کې به خپله کابینه ولسي جرګې ته د باور رایې اخیستو لپاره وروپېژني، خو له هغه وخته څه باندې اووه میاشتې تېرې شوې دي.

د ولسي جرګې منشي اسدالله شهباز ازادي راډیو ته وویل، د جرګې پنځه کمېسیونونه به د دغو نوماندانو اسناد څېړي او وروسته به‌یې اداري پلاوي ته سپاري. په ولسي جرګه کې نوماند وزیرانو ته د باور رایو پخوانیو بهیرونو ته په پام داسې نه‌ښکاري چې دغه پروسه به له ستونزو خالي وي.

میدان وردګ چارواکي: جلریز کې چاودنو ۵ تنه وژلي 

ارشیف

د میدان وردګو په جلریز ولسوالۍ کې نن سهار دوو چاودنو لږ تر لږه ۵ تنه وژلي دي.

د میدان وردک د والي ویاند محب اله شریفزوی ازادي راډیو ته وویل: "د جلریز ولسوالي په کوټه عشرو سیمه کې پر یوه تونس او یوه سراچه موتر چاودنې شوې دي چې ۵ تنه شهیدان شوي، ۹ ټپيان چې پنځه یې ښځې څلور یې ماشومان دي."

ټپیان رووغتونونو ته انتقال شوې دي.

د دې چاودنو مسوولیت چا په غاړه نه دی اخیستی.

د غزني چارواکي: قره باغ کې د موټر بم برید مخه نیول شوې

ارشیف

د غزني د امنیتي چارواکو په وینا د دې ولایت په قره باغ ولسوالي کې نن د یوه موټر بم برید مخه ونیول شوه.

د غزني د امنیه قومانداني ویاند احمد خان سیرت وایي، د سهار لسو بجو خواته ترهګرو د یو سراچه موټر په واسطه چې له چاودیدونکو موادو ډک و د قره باغ په ولسوالي کې د برید نیت درلود.

هغه زیاته کړه: "مخکې تر دې چې خپل هدف ته ورسېږي د قره باغ ولسوالي اتلو پولیسو برید پرې وکړ او په موټر کې چاودنه وشوه، د دې چادونې له امله د قره باع ولسوالي درې پولیس برسېرن ټپیان شوي دي."

ښاغلي سیرت برید کوونکو ته د اوښتي زیان په اړه څه نه دې ویلي.

د ملي امنیت ځواکونو لغمان کې د طالبانو ۷ کسیزه ډله نیولې

لغمان کې د طالبانو د اوه کسیزې نیول شوې ډلې انځور

د افغانستان د ملي امنیت عمومي ریاست وايي، چې په لغمان کې يې د طالبانو اوه کسیزه ډله نیولې ده.

د ملي امنیت عمومي ریاست په یوه اعلامیه کې ویلي دي چې یاده اوه کسیزه ډله د ځانګړو ځواکونو په عملیاتو کې نیول شوي دي.

په اعلامیه کې ویل شوي چې نیول شوې ډلې د لغمان د ولایتي شورا په یوه غړي او دغه راز د امنیې قومندانۍ په یو رنجیر په چاودونو کې لاس درلود.

په دواړو پېښو کې څلور تنه ولسي وګړي وژل شوي او ۱۶ تنه نور ټپیان شوي وو.

ملي امنیت عمومي ریاست ویلي، یادې ډلې په مرکز مهترلام ښار کې د ولسي وګړو په یوه غونډه کې د یو ماین د ځای پر ځای کولو هوډ هم درلود خو دې هدف ته تر رسېدو وړاندې ونیول شول.

د یوه بل خبر له مخې تېره ورځ په مرکز مهترلام کې هم یو لړ عملیات ترسره شوي چې په پایله کې يې د طالبانو یو تن مالي تمویلونکی قاري ذکرالله مشهور په کشمیر له یوه کس څخه د ۵۰ زره افغانیو د باج اخیستلو پرمهال لاس په لاس نیولی شوی دی.

د لغمان د مسئولینو په خبره، نیول شوي کس په باج اخیستنه، د ترورېستي پېښو په طرحه کولو او د ماینونو ځای پرځای کولو کې لاس درلود.

وسله والو طالبانو په دې اړه څه نه دي ویلي.

د ازبکستان مرستیال صدراعظم او د بهرنۍ سوداګرۍ وزیر کابل ته راځي

د افغانستان او ازبکستان نقشې او بیرغونه

د افغانستان د بهرنیو چارو وزارت کابل ته د ازبکستان د صدراعظم مرستیال او د پانګونې او بهرنۍ سوداګرۍ د وزیر سردار اوکتامویچ امورزاکوف سفر د دواړو هېوادونو د سوداګریزو اړیکو پراختیا لپاره ګټور ګڼي.

د دغه وزارت ویاند ګران هېواد نن ازادي راډيو ته وویل چې دوی به د هېواد له چارواکو سره د همکاریو د پراختیا او کابل او تاشکند ترمنځ د دوه اړخیزو اړیکو د پياوړتیا په هکله خبرې اترې وکړي.

هغه زیاته کړه: "د دوه اړخیزو سیمه‌ییزو او سوداګریزو اړیکو پراختیا په موخه د ازبکستان د لومړي وزیر مرستیال د یو لوړپوړي پلاوي په مشرۍ نن کابل ته راځي."

د دې سفر په ترڅ کې به د دواړو هېوادونو چارواکي د دوه اړخیزو سیاسي، اقتصادي، امنیتي او فرهنګي اړیکو د پياوړتیا او د سوداګرۍ او ترانزیټ، سیمه‌ییز پیوستون او ګډو زېربنايي پروژو په برخه کې د همکاریو په پراختیا خبرې اترې وکړي.

همداراز، تمه ده چې د همدې سفر په ترڅ کې د افغانستان د کار او ټولنیزو چارو او د کرنې، مالدارۍ او اوبو لګولو وزارتونه له خپلو ازبکستاني پلاويو سره د همکارۍ تړونونه هم لاسلیک کړي.

د افغانستان او ازبکستان ترمنځ په کلني ډول د ۴۰۰ میلیونه ډالرو په اندازه سوداګریزه راکړه ورکړه کېږي.

ناټو د افغان امنیتي ځواکونو د مالي ملاتړ ژمنه بیا تکرار کړه

د ناټو د عمومي منشي ینس سټولټنبرګ

ناټو متحدانو د دوشنبې په ورځ د افغان امنیتي ځواکونو د مالي ملاتړ ژمنه تکرار کړه.

د دې ائتلاف د اعلامیې له مخې چې د دوشنبې په ورځ خپره شوه، د ائتلاف متحدانو او شریکانو په یوه غونډه کې وویل چې تر ۲۰۲۴م کال پورې به د افغان امنیتي ځواکونو مالي ملاتړ کوي.

په اعلامیه کې د ناټو د عمومي منشي ینس سټولټنبرګ له قوله راغلي چې له افغان امنیتي ځواکونو سره به د ناټو متحدانو او شریکانو مالي ملاتړ تر ۲۰۲۰م کال ورهاخوا هم دوام وکړي.

ده زیاته کړه: "له افغان ځواکونو سره نړیوال مالي ملاتړ د افغانستان د امنیت په برخه کې زموږ د ژمنتیا یوه مهمه برخه ده. متحدانو د افغان ملي پوځ وجهي صندوق ته د دې صندوق له جوړېدو راهیسې د ۲۰۲۰م کال د اکټوبر تر پنځمې پورې ۳.۲ میلیارده ډالره ورکړي دي."

ناټو ائتلاف په ۲۰۰۷م کال کې د افغان ملي پوځ په نوم وجهي صندوق رامنځته کړ چې د نړیوالو په مالي مرسته پر مخ ځي.

د ناټو د معلوماتو له مخې د دې وجهي صندوق له لارې افغان ځواکونو ته روزنه او مسلکي نظامي زده‌کړې ورکول کېږي.

دا درېیم لوی وجهي صندوق دی چې له لارې یې نړیوال د افغان پوځ ملاتړ کوي.

دوه نور د نظم او قانون وجهي صندوق یا «LOTFA» او د افغان امنیتي ځواکونو لپاره د امریکا وجهي صندوق یا «ASFF» نومېږي.

خلیلزاد: د امتیاز ګټلو لپاره د تاوتریخوالي زیاتوالی خطرناک دی

زلمی خلیلزاد

د افغانستان د سولې لپاره د امریکا ځانګړی استازی وايي، د سولې د خبرو پر مهال دا باور چې د امتیاز د ګټلو لپاره باید تاوتریخوالی زیات شي، خطرناک دی.

زلمي خلیلزاد پرون دوشنبه پر ټویټر د پیغامونو په یوه لړۍ کې لیکلي د ده تمه دا وه چې تاوتریخوالی به کمېږي او کم به پاتې کېږي. دی زیاتوي چې ښکېل اړخونه باید هغو مسایلو ته چې خبرې او تفاهم پرې شوي، ژمن پاتې شي.

خلیلزاد وايي، د سرغړونو بې‌بنسټه تورونه او پاروونکې څرګندونې د سولې د خبرو له پرمختګ سره مرسته نه‌کوي او ټینګار کوي چې باید د امریکا او طالبانو د سولې موافقه او د افغانستان او امریکا ګډه اعلامیه په جدي ډول په پام کې ونیول شي.

ښاغلی خلیلزاد دا څرګندونې داسې مهال کوي چې د افغان دولت او طالبانو ترمنځ په دوحه کې روانو خبرو تر اوسه نتیجه نه‌ده ورکړې او ورسره د هېواد په بېلابېلو ولایتونو کې جګړو زور اخیستی.

نور راوښيه

XS
SM
MD
LG