د لاسرسۍ وړ لېنکونه

تازه خبر
سه شنبه ۲۹ تله ۱۳۹۹ کابل ۱۰:۳۱

نړۍ

د لوکاشینکا پر ضد د ښځو د یوې مظاهرې لسګونه ګډونوالې نیول شوي

بلاروس کې د پولیسو له‌خوا نیول شوې مېرمن

د بلاروس امنیتي ځواکونو په پلازمېنه مېنسک کې د الکساندر لوکاشینکا پر ضد د ښځو د یوې مظاهرې لسګونه ګډونوالې نیولې دي.

په مېنسک کې پرون شنبه ښځو مظاهره وکړه او اکثرو یې په لاسونو کې د ګلانو ګېډۍ لېږدولې.

د ازادي راډیو بلاروسي څانګه وایي، د مظاهرې ضد پولیسو پر ښځینه اعتراض کوونکو سربېره ځیني خبریالان هم نیولي دي.

بلاروس کې د الکساندر لوکاشینکا پر ضد مظاهرې له شااوخوا یوې نیمې میاشتې راهیسې روانې دي. اعتراض کوونکي د لوکاشینکا استعفا غواړي. له اعتراضونو سره سره لوکاشینکا د سپټمبر په ۲۳مه، د ولسمشر په توګه لوړه وکړه.

د ورځې تازه خبرونه دلته ولولئ

له اذربایجان او ارمنستان د ملګرو ملتونو امنیت شورا د اوربند غوښتنه

نګورنو قره‌باغ

د ملګرو ملتونو امنیت شورا پر اذربایجان او ارمنستان غږ کړی چې اوربند په کلکه رعایت کړي.

دې شورا په خپله پرونۍ غونډه کې د نګورنو قره‌باغ د لانجمنې سیمې د وضعیت په اړه بحث وکړ. د امنیت شورا ۱۵ غړو د دواړو لورو ترمنځ د اوربند د رعایت په برخه کې د ملګرو ملتونو د سرمنشي انتونیو ګوترش پر غوښتنه ټینګار وکړ.

فرانسپرس خبري اژانس د یوه ډیپلومات له قوله راپور ورکړی دی چې وايي د امنیت شورا ټولو غړو دا ومنله چې په نګورنو قره‌باغ کې وضعیت کړکېچن دی او د دواړو خواوو ځواکونه باید په شا تګ وکړي او اوربند ته غاړه کېږدي.

نوی اوربند چې د شنبې په ورځ اعلان شو، په نګورنو قره‌باغ کې د سپټمبر له ۲۷مې نېټې راهیسې د پیل شوې جګړې د پای ته رسولو لپاره دوهمه هڅه ده.

اذربایجان او ارمنستان پرون سهار پر یو بل د ډزو د بیا پیل تورونه ولګول او دا وېره رامنځته شوه چې ښايي نوی اوربند هم بې‌کومې ګټې مات شي.

په ملګرو ملتونو کې د روسیې سفیر واسیلي نبنزیا وویل د امنیت شورا په غونډه کې د اوربند د څرنګوالي د څېړنې او تأیید پر اړتیا بحث وشو.

د اوکراینۍ الوتکې قربانیانو ته پر تاوان ورکولو د تهران او کیف خبرې

ایران کې ویشتل شوې اوکراینۍ الوتکه

ایران به د لوېدلې اوکراینۍ الوتکې قربانیانو ته د تاوان ورکولو په اړه د دوهم پړاو خبرو لپاره د اوکرایني چارواکو کوربه وي.

یاده الوتکه د روان کال په جنورۍ میاشت کې څو شیبې وروسته په تهران کې تر الوتلو وروسته ولوېده او ټول ۱۷۶ کسان په‌کې مړه شول. ایران وروسته ومنله چې دا الوتکه‌یې په تېروتنه ویشتلې.

د اوکراین د بهرنیو چارو مرستیال وزیر یېفهین ینن او د ایران د بهرنیو چارو مرستیال وزیر محسن بهاروند د دوشنبې په ورځ په تهران کې دوه ورځنۍ غونډه پیل کړه.

په لومړي پړاو خبرو کې اوکرایني او ایراني چارواکو په کیف کې سره لیدلي وو. اوکرایني لوري ویلي وو چې دې پروسې ته په محتاطه توګه خوشبینه دي.

یاده الوتکه په همغه شپه وویشتل شوه چې ایران په عراق کې پر امریکايي پوځيانو د بالیستیک توغندیو حمله وکړه او د تهران د هوايي دفاع ځواکونه په تیارسی حالت کې وو.

د ایران د توغندیو حمله د امریکا د هغې حملې په غبرګون کې وه چې پنځه ورځې مخکې يې په بغداد کې د ایران د قدس ځواکونو قوماندان جنرال قاسم سلیماني وژلی وو.

د ایران عامې روغتیا وزارت: د خلکو بې‌پروايۍ د کرونا پېښې زیاتې کړي

ایران کې په کرونا اخته شوي خلک

د ایران د روغتیا وزارت وايي، د خلکو بې‌پروايي په دې هېواد کې د کرونا ویروس پېښې زیاتې کړې دي.

د دې وزارت ویاندې سیما سادات لاري د دوشنبې په ورځ انتقاد وکړ چې خلک روغتیايي مشورو ته غوږ نه‌نیسي.

ده وویل: "زموږ په هېواد کې اوس‌مهال د ناروغۍ وضعیت د روغتیايي پروتوکول پر وړاندې د بې‌پامۍ په نتيجه کې دی. په تېرو اوونیو کې له ماسکونو په استفاده کې کموالی او همداراز ټولنيز واټن نه‌مراعتولو خطر زیات کړی دی."

په ایران کې د دوشنبې په ورځ د کرونا ویروس ۳۳۷ مړینې ثبت شوې چې په ۲۴ ساعتونو کې تر ټولو لوی شمېر دی.

د ایران د روغتیا وزارت په وینا، اوس‌مهال تر ۵۳۴ زره زیات کسان په دې هېواد کې په کرونا ویروس اخته دي. د مړینې شمېر شااوخوا ۳۱ زره اعلان شوی دی.

خو یو شمېر کسان په دې باور دي چې په ایران کې په کرونا ویروس د اخته او مړو شویو کسانو شمېر تر رسمي اعلان شوي شمېر زیات دی.

د سریلانکا لنکن کرکټ غوره لیګ لپاره ۲ افغان لوبغاړي واخیستل شول

د سریلانکا بیرغ

په سریلانکا کې د لنکن غوره لیګ ۲۰ اوریزو کرکټ لوبو لپاره دوه افغان لوبغاړي اخیستل شوي دي.

د دوشنبې په ورځ نوین‌الحق د کنډې ټسکرز او حضرت‌الله ځاځی د ګال ګلیډیېټرز لوبډلې واخیستل.

دا پروسه په انلاین بڼه ترسره شوه.

دا ۲۰ اوریزې سیالۍ به د نومبر له ۲۱مې په سریلانکا کې پیلېږي او د ډسمبر تر ۱۳مې دوام کوي.

بلجیم، هالنډ او جرمني غواړي د ښځو د فوټبال نړیوال جام کوربه‌توب وکړي

۲۰۱۹ کال کې د امریکا د ښځینه‌وو فوټبال ملي لوبډله د نړیوال جام ګټونکې شوه.

بلجیم، هالنډ او جرمني په ۲۰۲۷ کال کې د ښځو د فوټبال د نړیوال جام لوبو لپاره د کوربه‌توب ګډې هڅې پیل کړې دي.

دغو هېوادونو نن وویل چې دا پروګرام د (درې ملته یو ګول) په نوم مخته وړي.

د فوټبال نړیوال فدراسیون تر اوسه په دې اړه د وړاندیزونو د منلو لپاره یو ضرب‌الاجل نه‌دی اعلان کړی.

استرالیا او نیوزیلنډ په ۲۰۲۳ کال کې په ګډه د ښځو د فوټبال نړیوال جام لوبو کوربه‌توب کوي.

اروپایي هېوادونو د کرونا ویروس نویو پېښو کې ۴۴ سلنه زیاتوالى راغلى

ارشيف

په اروپا کې د کرونا ویروس له کبله د مړو شویو شمېره تر ۲۵۰ زرو واوښت.

دا خبر نن داسې مهال خپور شوی چې اروپایي هېوادونه د کرونا ویروس د تازه پېښو د خورېدو د مخنیوي لپاره مبارزې ته دوام ورکوي.

اروپایي هېوادونو په تېرو اوو ورځو کې د کرونا ویروس د نویو پېښو د ۴۴ سلنې ډېروالی ثبت کړی دی.

همدا د دې سبب شوی چې یو شمېر هېوادونه نوي محدودیتونه ولګوي.

شمالي او جنوبي امریکا هم د کرونا ویروس د مخنیوي مبارزې ته دوام ورکوي.

په امریکا متحده ایالاتو کې د اکتوبر پر ۱۷ څه باندې ۵۲ زره کسان تازه په دې ناروغۍ اخته شوي دي.

په ټوله نړۍ کې په کرونا ویروس د اخته کسانو شمېره تر څلویښت میلیونه اوښتې ده.

الکسي ناوالني: کريملين مې روسیې ته د بېرته ستنېدو مخنیوی کوي

الکسي ناوالني

روسیې د رژیم سیاسي مخالف الکسي ناوالني وایي، کریملین تر خپله وسه هڅه کوي چې روسیې ته د هغه د بېرته ستنېدو مخه ونیسي.

ناوالني له سي.بي.ایس امریکایي رسنۍ سره مرکه کې چې پرون خپره شوه ویلي، دی لا هم پلان لري چې راتلونکو څو میاشتو کې بېرته روسیې ته ولاړ شي او خپل کار پیل کړي.

نوموړي دا مرکه د جرمني په پلازمېنه برلین کې کړې ده، چېرته چې نوموړی له اګست میاشتې راهیسې د مسمومېدو له کبله تر درملنې لاندې دی.

ناوالني چې له دوه دېرش ورځو بسترېدو وروسته د سپټمبر په ۲۲مه له روغتونه رخصت شوی ویلي، د هرې ورځې په تېریدو د پیاوړتیا احساس کوي.

نړۍ کې په کرونا ویروس د اخته خلکو شمېر له ۴۰ میلیونو واوښت

ارشیف

په نړۍ کې په کرونا ویروس د اخته خلکو شمېر له څلوېښتو میلیونو واوښت.

له دې ډلې نږدې یو میلیون او یو سل او دولس زره کسان مړه شوي دي.

یو شمېر اروپايي هېوادونو یو وار بیا د کویډ۱۹ په مثبتو پېښو کې له جدي زیاتوالي اندېښنه ښودلې.

بریټانیا ویلي چې ۱۷ زره نوې پېښې یې ثبت کړې دي.

اخوا سلواکیا چې تر نورو اروپايي هېوادونو په کې کم خلک په کرونا اخته شوي و داسې پلان لري چې خپل ټول وګړي د کرونا په وړاندې معاینه کړي.

د سلواکیا صدراعظم ایګور ماتوویچ په دې اړه وویل: "دا معاینه داسې یوه طریقه ده چې له لارې یې کولای شو د عفونت لارې یا بندې کړو یا یې منحرفې کړو، که دا کار وکړای شو نه یواځې د اروپا بلکې د ټولې نړۍ لپاره به یوه الګو و اوسو."

په چک جمهوریت کې هم چې اوس تر نورو اروپايي هېوادونو په ورځنۍ کچه زیاتې مثبتې پېښې پکې ثبتېږي دوه اوونۍ نور هم لګېدلي محدودیتونه جاري ساتي.

په دغه هېواد کې تېر دوه اوونۍ د مثبتو پېښو شمېر د نورو اروپايي هېوادونو لس چنده زیات بلل شوی.

فرانسه کې د وژل شوي ښوونکي په یاد غونډې شوي

دوژل شوي ښوونکي خواخوږو د پاریس په جمهوریت میدان کې د ګلو ګېډۍ کېښودې او په بنرونو یې د فکري افراطیت پر ضد لیکلي و.

فرانسې په پلازمېنه پاریس کې پرون زرګونه کسان د هغه ښوونکي د درنښت لپاره ټول شوي و چې دری ورځې مخکې د یوه چیچن ځوان له خوا د چړو په ضربه ووژل شو او سر یې غوڅ شو.

۴۷ کلن سامویل پاتي د بیان د ازادۍ په اړه په یوه درسي بحث کې د اسلام د پیغمر حضرت محمد یو کاریکاتور خپلو زده کوونکو ته ورښودلی و.

دوژل شوي ښوونکي خواخوږو د پاریس په جمهوریت میدان کې د ګلو ګېډۍ کېښودې او په بنرونو یې د فکري افراطیت پر ضد لیکلي و.

په ځينو نورو ښارونو له هغې ډلې لیون، تولوس، ستراسبورګ او مارسي کې هم د وژل شوي ښوونکي د درنښت په پار غونډې وشوې.

سامویل پاتي د اکتوبر په شپاړسمه د عبدالله په نوم د یوه چیچنايي ځوان په لاس چې مخکې په مسکو کې اوسېده او پاریس ته کډوال شوی و د چړو په ضربه ووژل شو او سر یې غوڅ شو.

عبدالله د معلم تر وژلو لنډه موده وروسته د پولیسو له لوري ووژل شول.

ایران سره د وسلو کاروبار په اړه بنسټونو او اشخاصو ته د امریکا خبرداری

د امریکا د بهرنیو چارو وزیر مایک پومپیو

امریکا متحده ایالتونو ګواښ کړی په هر هغه کس یا بنسټ به بندیز ولګوي چې له ایران سره د وسلو کاروبار کوي.

امریکا دا ګواښ څو ساعته وروسته له هغه وکړ چې تهران ادعا وکړه د ملګرو ملتونو له خوا ورباندې لګېدلی د وسلو بندیز پای ته ورسېد.

له ایران سره د نړۍ د اټومي قدرتونو د ۲۰۱۵ کال د تړون په اساس د ۲۰۲۰ کال د اکتوبر اتلسمه په ایران د وسلو د بندیزونو د پای ته رسولو نېټه ټاکل شوې وه په دې شرط چې ایران په خپلو ژمنو ولاړ وي.

امریکا په ۲۰۱۸ کال کې له ایران سره له اټومي تړون ووتله او سخت بندیزونه یې پرې ولګول.

د امریکا د بهرنیو چارو وزیر مایک پومپیو پرون په یوه اعلامیه کې ویلي چې امریکا چمتو ده د خپلو ادارو په مټ په هر هغه کس یا بنسټ چې په ایران باندې د متعارفه وسلو په پلور، پېر، انتقال او اکمال کې ښکېل وي بندیز ولګوي.

ملګرو ملتونو سازمان په ایران باندې د ټانکونو، جنګي الوتکو او درنو توغندیو په څېر د متعارفو وسلو بندیز لګولی و.

د هندوستان د کرکټ غوره لیګ سیالي؛ نن دوه لوبې ترسره کېږي 

د سنرایزر حیدر اباد لوبډله

تمه ده چې نن د هندوستان د کرکټ غوره لیګ یا ای پي ایل سیالیو په لړ کې نن دوه سیالۍ ترسره شي.

سنرایزر حیدر اباد له کلکته نایټ رایډرز او ممبۍ انډینز له ګنکز ایلیون پنجاب لوبډلې سره مخامخ دي.

د دې سیالیو د تېرې ورځې په لوبو کې بیا ډیلي او بنګلور لوبډلو بریاوې خپلې کړې.

ډیلې چنای سوپر کینګز او رایل چلنجرز بنګلور راجستان رایلز لوبډلې ته ماتې ورکړه.

اوسمهال ممبي لوبدله د دې سیالیو د نومرو د جدول په سر کې ځای لري.

پاکستان کې د ځمکې ښویېدنې په پېښه کې ۱۰ کسان مړه شوي دي

ارشیف

د پاکستان په شمالي سیمه ګلګت بلتستان کې د ځمکې ښویېدنې په پېښه کې یو موټر تر خټو او خاورو لاندې شوی او لږ تر لږه ۱۰ کسان مړه شوي دي.

په دغه میني بس موټر کې ۱۵ کسان نن له راولپنډۍ څخه سکادو سیمې ته روان و، چې د اسلام اباد د شمال په ۲۴۰ کیلومترۍ کې پرته ده.

د پولیسو یوه چارواکي وکیل خان وویل، د ژغورونکو کارکوونکي او محلي رضاکاران د ژوندي پاتې شویو کسانو د موندلو لپاره د خاورو او خټو په لیرې کولو بوخت دي.

په ملبورن کې د کرونا ویروس خپرېدو له امله لګول شوي محدویتونه راکمېږي

په ملبورن کې د کرونا ویروس د مهارولو لپاره ۱۰۰ ورځنی محدودیت لګول شوی و.

د اسټرالیا په دویم لوی ښار ملبورن کې چارواکو نن د محدودیتونو د کمولو اعلان وروسته تر دې وکړ، چې د کرونا ویروس مثبتې پېښې په کې په کمېدو شوې.

په ملبورن کې د کرونا ویروس د مهارولو لپاره ۱۰۰ ورځنی محدودیت لګول شوی و، خو اوس خلک کولای شي د مجازو فعالیتونو لپاره دوه ساعته دباندې تېر کړي.

چارواکو هغو کسانو ته له نورو د جسمي فاصلې سپارښتنه کړې، چې له خپلو کورونو ۲۵ کیلومتره لیرې فعالیتونه کوي.

په ټوله نړۍ کې په کرونا ویروس د اخته کسانو شمېر شپږدېرش میلیونو ته نږدې شوی او په دې ویروس تر یو ملیون او یو لکو ډېر کسان مړه شوي دي.

ارمنستان او اذربایجان یو او بل د تازه اوربنده په سرغړونه تورن کړل

د اذرباییجان دفاع وزارت د ارمنستان ځواکونه تورن کړي، د تماس پر هغه کرښه چې دواړه سیال لوري سره جلا کوي، د هاوان ډزې کړې دي. 

ارمنستان او اذربایجان یو او بل په لانجمنه سیمه نګورنو قره باغ کې د جګړو د درېدو په هدف له لګول شوي تازه اوربنده په سرغړونه تورن کړ.

د بشري چارو په خاطر دغه اوربند له تېرې شپې راهیسې نافذ شوی و.

د ارمنستان دفاع وزارت یوې ویاندې وویل، چې نن سهار وختي د دوی «د دښمن له اړخه» د توغندیو او توپونو ډزې شوې دي.

بلخوا د اذربایجان دفاع وزارت د ارمنستان ځواکونه تورن کړي، د تماس پر هغه کرښه چې دواړه سیال لوري سره جلا کوي، د هاوان ډزې کړې دي.

دا تورونه په داسې حال کې پورې کېږي، چې تر دې څو ساعته مخکې ارمنستان او اذربایجان ویلي وو، چې دوی پر یوه نوي اوربند موافقه کړې ده.

د اوربند په مخکینۍ موافقه کې، چې تطبیق نه شوه، د اوربند موده ۷۲ ساعته ټاکل شوې وه.

د نوګورنو قره باغ جګړه نږدې درې اوونۍ مخکې د سپټمبر پر ۲۷ مه پیل شوه او تر اوسه په کې سلګونه تنه پوځیان او لسګونه ملکیان وژل شوي دي.

'ملګرو ملتونو پر ایران د متعارفو وسلو د پلورلو بندیز پای ته ورساوه'

د ایران بیرغ

د ایران د بهرنیو چارو وزارت وايي، ملګرو ملتونو نن د اکټوبر په ۱۸مه د ایران او نړیوالو قدرتونو ترمنځ د ۲۰۱۵ کال د اټمي موافقې پر اساس پر دغه هېواد د متعارفو وسلو د پلورلو بندیز پای ته ورساوه.

دا وزارت وايي چې پر ایران د بندیز پای ته رسېدا په یوه اعلامیه کې اعلان شوې او ورسره اسلامي جمهوریت ته او یا ورڅخه د وسلو پر انتقال، ورسره تړلو فعالیتونو او مالي خدماتو باندې بندیزونه پای ته رسېدلي دي.

په تیوري کې ایران کولای شي چې د ټانکونو، جنګي الوتکو او لویو توپونو په شان متعارفې وسلې رانیسي یا وپلوري.

امریکا پر ایران د وسله‌وال بندیز د پای ته رسېدو مخالفت کړی او ویلي یې دي چې ایران نړیوال امنیت ته ګواښ پېښوي.

نور راوښيه

XS
SM
MD
LG