د لاسرسۍ وړ لېنکونه

تازه خبر
شنبه ۹ سلواغه ۱۴۰۰ کابل ۰۸:۵۱

افغانستان

چارواکي: کابل کې ماین چاودنې یو ماشوم وواژه

ارشیف

په کابل کې نن د ماین چاودنې په یوه پېښه کې یو یولس کلن ماشوم ووژل شو.

د کابل امنیه قومنداني وايي، دا پېښه د اتمې امنیتي حوزې اړوند کارته نو سیمه کې شوې ده.

د امنیه قوماندانۍ ویاند فردوس فرامرز ازادي رادیو ته په یو استول شوي لیکلي پیغام کې ویلي، چې دا د افغانستان د خلکو د سولې او سوکالۍ د دښمنانو کار دی.

نوموړي ویلي، د پېښې څېړل پیل شوي دي.

تر اوسه د دغه پېښې مسوولیت چا پر غاړه نه دی اخیستی.

د ورځې تازه خبرونه دلته ولولئ

امریکايي قاضي: بایډن دې د افغانستان د کنګلو پیسو په اړه پرېکړه وکړي

آرشیف

د امریکا یوې محکمې د ولسمشر جو بایډن ادارې ته دوه اوونۍ نور مهلت ورکړی چې د افغانستان د کنګل شوېو بانکي شتمنیو په اړه پرېکړه وکړي.

د راپورونو له مخې د نیویارک د منهاټن د محکمې قاضي سارا نیتبورن د امریکا د عدلیې وزارت ته د فبروري تر ۱۱مې پورې وخت ورکړی، څو د افغانستان د دې شتمنیو په برخه کې خپلې سپارښتنې ور وسپاري.

تمه وه چې د امریکا حکومت د افغانستان د دې شتمنۍ په اړه خپلې سپارښتنې پرون (د سلواغې په اتمه نېټه) سپارلې وای.

د افغانستان بانک دا مالي شتمني د زمري په ۲۴مه نېټه پر افغانستان د طالبانو له واکمنېدو سره سم د نیویارک په فدرال بانک کې کنګل شوې.

د رویټرز خبري آژانس د راپور له مخې مېرمن نیتبورن د دې پیسو اندازه ۷ میلیارډه ډالره ښودلې ځکه د نوموړې په وینا پر متحدو ایالاتونو د ۲۰۰۱م زیږدیز کال د سېپټمبر د ۱۱مې نېټې د پېښې د یو شمېر قربانیانو کورنیو د تاوان غوښتنه کړې،

په داسې حال کې چې د دې شتمنۍ اصلي ارزښت ۹،۵ میلیارد ډالر اټکل شوی.

ایراني مظاهره چیانو له پولې هاخوا د افغان سوداګرو موټرونه زیانمن کړل

د افغانستان او ایران ګډه پوله

په نیمروز کې د طالبانو د حکومت سیمه ییز چارواکي تاییدوي چې پرون له ایران سره په ګډ سرحد کې ایراني معترضانو د لاریون پر مهال له پولې هاخوا د افغان سوداګرو موټر زیانمن کړل.

په نیمروز کې د طالبانو د اطلاعاتو او فرهنګ د ریاست سرپرست رییس مفتي حبیب الله الهام ازادي راډیو ته وویل، د ایران له سیستان بلوچستان ایالت څخه یو شمېر معترضان چې د هلمند له اوبو یې د اوبه خور د برخې د زیاتېدو غوښتنه کوله د لاریون پر مهال د ایران په زابل سیمه کې د افغان سوداګرو د ټرکونو (لاریو) پر تم ځای برید وکړ او د څو لاریو شیشې یې ماتې کړې.

ښاغلي الهام په دې اړه نور جزییات ورنه کړل، خو ویې ویل چې دا موضوع به د دواړو هېوادونو د چارواکو له خوا حل شي.

په همدې حال کې یو شمېر موټر چلوونکو چې لارۍ یې د لاریون پر مهال زیانمنې شوې دي د ایران له حکومته د تاوان غوښتنه وکړه.

د هلمند د سیند اوبه تل د افغانستان او ایران ترمنځ لانجمنه مساله وه، خو پخوانیو حکومتونو له ایران سره د یو تړون په اساس دا موضوع حل کړې وه مګر په افغانستان کې د حکومتونو له کمزوري کېدو او د وچکالیو له زیاتېدو وروسته په دې برخه کې لانجې پرځای پاتې دي.

هند وايي، افغانستان ته یې ۳،۶ ټنه روغتیايي مرستې او درمل استولي

ارشیف، د هند مرسته

هند وايي، افغانستان ته یې په تېرو څو اونیو کې ۳،۶ ټنه روغتیايي مرستې او همدا راز د کووېډ-۱۹ ناروغۍ ضد واکسین پنځه لکه ډوزه استولي دي.

نوې ډېلي همدا راز وايي چې افغانستان ته د هغو غنمو د استولو پر چاره هم کار روان دی چې مخکې یې له افغانانو سره ژمنه کړې وه.

د هندي رسنیو د راپورونو له مخې د هند د بهرنیو چارو وزارت ویاند پرون یوې خبري غونډې ته وویل، هند د غلې، د کرونا ضد واکسین او ضروري درملو په ګډون د افغانستان له خلکو سره بشري مرستو ته ژمن دی.

هند ډېر پخوا د پاکستان له لارې افغانستان ته د پنځوس زره ټنه غنمو او درملو د استولو ژمنه کړې وه.

ویل کېږي چې نوي ډېلي او اسلام آباد، افغانستان ته د دې مرستې د استولو د څرنګوالي په اړه وروستۍ پرېکړې ته نژدې شوي دي.

 د سلګونو ایرانیانو  لاریون؛ طالبان دې د کمال خان بند اوبه را خوشې کړې

د کمال خان بند

راپورونه وايي په ایران کې د نیمروز ولایت پولې ته څېرمه په سلګونو ایرانیانو په یوه مظاهره کې له افغانستانه د کمال خان بند د اوبو د خوشې کولو غوښتنه وکړه.

د دې مظاهرې پر مهال د ابرېشم تجارتي لار هم د هر ډول ترافیکو پرمخ تړل شوې وه چې د ایران او افغانستان ترمنځ غزېدلې ده.

دغو مظاهره چیانو ویلي، دغه لار تر هغو نه پرانېزي چې په افغانستان کې د طالبانو حکومت له کمال خان بنده اوبه ورخوشې کړي نه وي.

کمال خان بند د پخواني ولسمشر محمد اشرف غني د حکومت پرمهال تر رغونې وروسته پرانیستل شو چې ورسره ایران ته د بهېدونکو اوبو مخه ونیول شوه.

ښاغلي غني ویلي وو، تر هغو چا ته اوبه نه خوشې کېږي چې د اوبو په بدل کې یې افغانستان ته پیسې نه وي ورکړي.

ده ویلي که ایران غواړي چې د افغانستان له اوبو استفاده وکړي، یا دې پیسې یا هم تېل افغانستان ته ورکړي.

د جدي پر ۲۸‌مه، د ایران دولتي رسنۍ صدا وسیما په کابل کې د ایران د سفارت د مرستیال حسن مرتضوي له قوله راپور ورکړ چې طالبانو د کمال خان بند اوبه ایران ته خوشې کړي، خو طالبانو دا موضوع رد کړله.

ملګري ملتونه: په افغانستان کې ۲۳ ملیونه وګړي عاجلو بشري مرستو ته اړتیا لري

بې وزله کورنۍ او ژمۍ

د ملګرو ملتونو د خوړو نړیوال پروګرام وايي په افغانستان کې ۲۳ ملیونه وګړي، د روان ژمي پر مهال عاجلو بشري مرستو ته اړتیا لري.

د دغه سازمان د افغانستان څانګې نن په یوه ټویټ کې ویلي چې تر ټولو د زیانګالو کسانو تر تثبیت وروسته، د خوړو نړیوال پروګرام د نورو همکارو سازمانونو په مرسته خوراکي توکي وېشي.

وروسته له هغې چې طالبانو د اګست په نیمايي کې پر کابل هم ولکه ټینګه کړه، د ملګرو ملتونو په ګډون ګڼو نړیوالو سازمانونو په افغانستان کې د بشري بحران د پراخېدو خبرداری ورکړ.

ملګري ملتونه: افغانستان کې اقتصادي وضعیت د اندېښنې وړ دی

داخلي بې ځایه شوي

د کډوالو په چارو کې د ملګرو ملتونو لویه کمېشنري وايي، په افغانستان کې اقتصادي وضعیت د اندېښنې وړ دی.

د دغه سازمان د اسیا پسفیک څانګې نن په یوه ټویټ کې ویلي، وضعیت ډراماتیک دی، خلک دندې نه لري، د روان بحران، د بهرنیو پرمختیايي مرستو د کموالي له کبله اقتصاد سقوط شوی دی.

د کډوالو په چارو کې د ملګرو ملتونو لویه کمېشنري وايي، په افغانستان کې د دوی استازي د افغانانو فوري بشري اړتیاوې درک کوي او خپلې مرستې کوي.

وروسته له هغې چې طالبانو د اګست په نیمايي کې پر کابل هم ولکه ټینګه کړه، د ملګرو ملتونو په ګډون ګڼو نړیوالو سازمانونو په افغانستان کې د بشري بحران د پراخېدو خبرداری ورکړ.

د اروپايي ټولنې د پناه غوښتونکو په ډله کې د افغانانو شمېر زیات شوی 

ارشیف; قطري الوتکه

تازه شمېرې ښيي چې په اروپايي ټولنه کې د پناه غوښتونکو په ډله کې د افغانانو شمېر زیات شوی دی.

د جرمني خبري اژانس په حواله، یوازې په نوامبر میاشت کې د اروپايي ټولنې او نورو اروپايي هېوادونو کې د پناه غوښتنې ۷۱زره ۴۰۰ درخواستونه ثبت شوي چې د اکتوبر میاشتې په نسبت ۹ سلنه زیاتوالی ښيي.

د اروپايي ټولنې چارواکو نن جمعه ویلي چې دا په ۲۰۱۶کال کې د کډوالو تر بحران وروسته د پناه غوښتونکو دویم لوړ شمېر دی.

د اروپايي ټولنې د پناه غوښتونکو ادارې، په حواله، په ثبت شویو درخواستونو کې ۱۳۰۰۰ یې د افغان وګړو دي چې ورپسې د سوریې د وګړو شمېر زیات دی.

په اګست میاشت کې پر افغانستان د طالبانو له واکمنېدو وروسته له افغانستانه د خلکو د مهاجرت اندازه زیاته شوې ده.

له هغې راهیسې له افغانستانه د خلکو د راایستلو یا تخلیې په عملیاتو کې په لسګونو زره افغانانو چې له نړیوالو ځواکونو او غربي حکومتونو سره یې کار کړی و، وایستل شول.

د قطر یوه لوړ-پوړي چارواکي پرون رویټرز خبري اژانس ته وویل چې دغه هېوادونه له افغانستان د خلکو د راایستلو لپاره بېرته الوتنې پیلوي.

د هلمند په ګرشک کې د هاوان مرمۍ چاودنې ۱ ماشوم وژلی او ۲ نور یې ټپیان کړي 

ارشیف؛ په مهترلام کې چاودنې ماشومان ټپبان کړي

د هلمند ولایت په ګرشک ولسوالۍ کې د هاوان د یوې زړې مرمۍ چاودنې، یو ماشوم وژلی او دوه نور یې ټپیان کړي دي.

په هلمند کې د طالبانو د اطلاعاتو او فرهنګ رئیس حافظ راشد هلمندي ازادۍ رادیو ته وویل پېښه هغه مهال وشوه چې یوه ماشوم د ګرشک ولسوالۍ په سربند سیمه کې د هاوان له ناچاودې مرمۍ سره لوبې کولې.

هلمندی وایي:" پېښه په ګرشک ولسوالۍ کې رامنځ ته شوې ده. متاسفانه دولس- دولس نیمې بجې شااوخوا د ګرشک ولسوالۍ په سربند سیمه کې ماشومانو د هاوان یوه زړه مرمۍ موندلې وه، رااخیستې یې وه او په ډبرو یې ټکولې وه نو چاودېدلې ده."

په افغانستان کې د ناچاودو مهماتو د چاودنې په پېښو کې د انساني تلفاتو په شمېر کې زیاتوالی راغلی.

د مرغومي په ۲۰مه د ننګرهار ولایت په لعلپورې ولسوالۍ کې د هاوان د زړې مرمۍ په چاودنه کې د ۶ ماشومان په ګډون ۷ کسان او په سبا یې په همدې ولسوالۍ کې په ورته پېښه کې دوه مېرمنې ووژل شوې.

ایران: د امریکا د بندیزونو له امله د افغان کډوالو د ساتنې توان له لاسه ورکوو

د افغانستان-ایران پوله

ایران وايي چې د افغان کډوالو د ساتنې توان پردې هېواد د امریکا د بندیزونو له کبله له لاسه ورکوي.

ایراني رسنیو پرون په ملګروملتونو کې د ایران د سفیر او دایمي استازي مجید تخت روانچي له قوله خبر ورکړ چې نوموړي د امنیت شورا غونډې ته ویلي، ایران له زرګونه افغان کډوالو سره چې هره ورځ د دې هېواد قلمرو ته ننوځي لازمې مرستې کوي خو دی زیاتوي چې د متحدوایالاتونو د بندیزونو په نتیجه کې د ایران مالي سرچینې محدودېږي.

د فارس خبري اژانس د راپور له مخې تخت روانچي ویلي، که نړیواله ټولنه په ایران کې له ډېره افغان کډوالو سره د پام وړ او پر وخت مرستې ونه کړي نو تهران به په یوازې ځان له هغوی سره د مرستې د دوام توان نه لري.

د راپور له مخې په ملګروملتونو کې د ایران سفیر له نړیوالې ټولنې او په خاص ډول مرستندویو هېوادونو وغوښتل چې پر خپلو مکلفیتونو عمل وکړي او د افغان کډوالو لپاره نوري او اضافي مالي مرستې ځانګړې کړي.

د ملګروملتونو د شمېرنو له مخې په ایران کې څه کم اته لکه راجسټر شوي او شااوخوا دوه میلیون غیرقانوني افغان کډوال اوسېږي.

راپور: مرستندویې موسسې افغانستان ته پیسې نه شي لېږدولی

ډالر

په یوه نوي راپور کې څرګنده شوې چې د طالبانو واک ته له رسېدو وروسته پر افغانستان د لوېدیځو هېوادونو د اقتصادي بندیزونو له کبله مرستندویې موسسې افغانستان ته پیسې نه شي انتقالولی.

د راپور له مخې، له دې امله ملیونونه افغانان د بیړنیو مرستو له ترلاسه کولو محروم شوي دي.

په دې راپور کې چې د ناروې د کډوالو شورا خپور کړی، راغلي چې ناممکنه ده هغو ملیونونو کسانو ته مرستې ورسول شي چې اړتیا ورته لري مګر دا چې د امریکا د خزانې وزارت او نورې مرستندویې ټولنې فوري اقدام وکړي او بانکونو ته د پیسو د انتقال اجازه ورکړي.

طالبان: سراج الدین حقاني امریکا او نړیوالې ټولنې ته ګواښ نه دی کړی

سراج الدین حقاني

د طالبانو د کورنیو چارو وزارت ویلي، د دوی وزیر سراج الدین حقاني امریکا او نړیوالې ټولنې ته ګواښ نه دی کړی.

دا خبره یاد وزارت نن په خپل ټوېټر لیکلې.

په ټويټ کې چې نن انګریزي او پرون پښتو باندې شوی ادعا شوې چې له الجزیرې ټلوېزیون سره د سراج الدین حقاني د خبرو په استناد ځینو رسنیو ناسم راپورونه خپاره کړي چې که طالبان په رسمیت ونه پېژندل شي امریکا او نړیوالې ټولنې ته به ګواښ پېښ کړي.

په دغه ټويټ کې زیاته شوې چې حقاني هېڅ ګواښوونکې کلمه نه ده کارولې.

د ټويت دوهمه برخه کې راغلي چې طالبان د دوحې تړون ته ژمن دي او د افغانستان خاوره به د هېچا پر ضد ونه کارول شي.

د طالبانو د کورنیو چارو وزیر سراج الدین حقاني د امریکا او ملګرو ملتونو په تور لېسټ کې دی.

دی د 'اېف.بي.ای' د تعقیب لاندې کسانو کې دی او د داسې معلوماتو په بدل کې چې د هغه د نیولو سبب شي لس میلیونه ډالره جایزه اېښودل شوې ده.

له کابله قطر ته په چارتر الوتکه کې له ۳۰ زیات امریکایان لاړل

آرشیف، د قطر یوه چارتر شوې الوتکه

امریکایي 'اېن.بي.سي' ټلوېزیون د ځینو سرچینو په حواله وایي چې له څو میاشتني ځنډ وروسته د کابل له نړیوال هوایي ډګره د قطر د هوایي شرکت په یوه چارټر الوتکه کې له ۳۰ زیات امریکایان قطر ته ولېږدول شول.

د راپور له مخې دا خبره د امریکا د کانګرس یوه چارواکي او له دغې موضوع باخبرو دوو نورو کسانو کړې او ویلې یې دي چې دغه چارټر الوتکه د قطر د بهرنیو چارو وزارت له خوا چمتو شوې او پیسې یې د امریکا د بهرنیو چارو وزارت ورکړي دي.

د امریکا د بهرنیو چارو وزارت ویاند نېډ پرایس روانه اوونۍ وویل، د بهرنیو چارو وزیر انتوني بلېنکن له خپل قطري سیال محمد بن عبدالرحمن الثاني سره په ټیلیفوني خبرو کې له هغه غوښتي چې د همکاریو په ترڅ کې دې د کابل له هوایي ډګره چارټر الوتنې بېرته پیل کړي.

دا د تېر کال د نوومبر له میاشتې راهیسې لومړی ځل دی چې د کابل له نړیوال هوایي ډګره د خلکو د اخیستلو لپاره یوه چارټر الوتنه ترسره کېږي.

د امریکا د حکومت یوه چارواکي هم دوحې ته د دغې الوتنې د ترسره کېدو خبره تایید کړې چې امریکایان یې لېږدولي، خو دقیق شمېر یې نه دی ښودلی.

دغه اقدام څو ورځې وروسته له هغې کېږي چې طالب چارواکو په مزار شریف کې د څلویښتو کسانو چې د دوی په خبره د مزارشریف د هوایي ډګر له لارې په غیر غیر قانوني توګه له هېواده وتل، د نیولو خبر ورکړ.

د ملګرو ملتونو سرمنشي: افغانستان له یوه ډېر بحراني حالت سره مخ دی

د ملګرو ملتونو سرمنشي انتونیو ګوترېش

د ملګرو ملتونو سرمنشي انتونیو ګوترېش وایي، افغانستان له یوه ډېر بحراني حالت سره مخامخ دی او له هېوادونو غواړي چې د طالبانو تر واکمنۍ لاندې دې هېواد کې د بشري فعالیتونو د ترسره کولو لپاره د پیسو ټولو اړینو لېږد رالېږد ته اجازه ورکړي.

ګوترېش دغه څرګندونې تېره شپه د ملګرو ملتونو امنیت شورا غونډې ته چې د افغانستان په اړه جوړه شوې وه، وکړې او زیاته یې کړه چې افغانان اوس مرستو ته اړتیا لري.

دی وايي: "د اخلاقي مسؤلیت په توګه او د سیمه ییز، نړیوال امنیت او سوکالۍ لپاره موږ نه شو کولی دوی 'افغانان' پرېږدو. دوی سولې ته اړتیا لري، دوی هیلې ته اړتیا لري، دوی مرستې ته اړتیا لري."

د ملګرو ملتونو سرمنشي دغه راز د هر ډول قوانینو یا شرطونو چې په افغانستان کې له سختې لوږې سره د مخامخ میلیونونو کسانو د ژوند ژغورنې، د زده کړې او ټولنیزو خدمتونو لپاره د مرستې عملیات محدودوي، پر ځنډولو یا تعلیق ټینګار وکړ.

هغه وویل، افغانستان کې ټول خدمات د سقوط په درشل کې دي او د نغدو پیسو نشتوالي اړو کسانو ته د مرستو رسولو په برخه کې د ملګرو ملتونو او مرستندویه ډلو وړتیاوې محدودې کړي دي.

تېره میاشت د ملګرو ملتونو امنیت شورا پر افغانستان د ملګرو ملتونو له لګول شوېو بندیزونو څخه د بشرپالنې مرستې استثنا کړې.

خو پر افغانستان د طالبانو له بیا واکمنېدو راهیسې تر اوسه په امریکا کې د افغانستان شااوخوا نهه نیم میلیار ډالره شتمنې کنګل ده.

په ملګرو ملتونو کې د امریکا استازې لیندا توماس ګرینفیلډ د امنیت شورا غونډې ته وویل، واشنګټن هڅه کوي، دا ډاډ ترلاسه کړي چې د امریکا بندیزونه د بشري فعالیتونو مخه ونه نیسي او پر مختلفو لارو غور کوي چې د نغدو پیسو د کمښت ستونزې کمې کړي.

د کندز د قلعه زال اوسېدونکي: پُل نړیدلی کښتیو کې تګ د سر په بیه تمامېږي

د کندز د قلعه زال او اقتپې ترمنځ پُل

د کندز د قلعه زال ولسوالۍ اوسېدونکي وايي، د عمومي پُل خرابوالي له ګڼو ستونزو سره مخ کړي دي.

د ځایي اوسېدونکو په خبره اوس خلک د کښتیو په وسیله قلعه زال او اقتپې ته تګ را تګ کوي، خو د اوبو د زیاتوالي او سیلابونو په موسم کې په کښتیو کې تګ را تګ د دوی د سر په بیه تمامېږي.

د دغې ولسوالۍ اوسېدونکی ۴۰ کلن خدای نور ازادي راډیو ته وویل: "کابو ۶ کاله وړاندې د دغې ولسوالۍ پُل د جګړو پر مهال پر بمونو الوځول شوی و، خلک اوس په کښتیو کې ځي راځي، دې مسالې د ۸۰ کلیو اوسېدونکي له ګڼو ستونزو سره مخ کړي. سل افغانۍ کښتۍ ته ورکوو، کله چې اوبه زیاتې شي، کښتۍ چپه شي، هر کال یو- دوه موټره په سیند کې غرقېږي."

د قلعه زال مېشتو د خبرو له مخې، د قلعه زال پُل د پخواني نظام له لوري په ۲۰۱۰م زیږدیز کال کې د ۱۲۰ مترو په اوږدوالي د څه باندې ۷ میلیونه ډالرو په ارزښت جوړ شوی و چې د قلعه زال سیمه یې د دغې ولسوالۍ له مرکز اقتپې سره نښوله.

د کندز سیمه ییز طالب چارواکي بیا ډاډ ورکوي چې راتلونکي کال به د قلعه زال ولسوالۍ د نړېدلي پُل د بیارغونۍ کار پیل شي.

د قلعه زال ولسوالۍ د ۶۰ کیلومتر واټن په درلودو سره د کندز ښار شمال لویدیځ لور ته موقعیت لري او د کندز له سرحدي ولسوالیو څخه شمېرل کېږي.

د دغې ولسوالۍ اوسېدونکي په کرنه، مالدارۍ او غالۍ اوبدلو بوخت دي او له همدې لارې د خپلو کورنیو لګښت پوره کوي.

امریکا: افغان ډپلوماټان دې واشنګټن کې د افغانستان سفارت بند کړي

واشنګټن کې د افغانستان سفارت

العربیه ټلوېزیون وايي، د امریکا حکومت په خپل هېواد کې افغان ډپلوماټانو ته خبر ورکړی چې دوی په واشنګټن کې د افغانستان سفارت او همدا راز په نیویارک او لاس انجلس کې کونسلګرۍ بند کړي.

العربیه ادعا کوي چې له موضوع خبرو سرچینو دا هم ورته ویلي چې امریکا د افغان ډپلوماټانو ډپلوماټیک مصونیت هم اخلي.

تراوسه پورې د امریکا حکومت په دې اړه رسماً څه نه دي ویلي، خو په امریکا کې افغان ډپلوماټانو چې د افغانستان د پخواني حکومت استازیتوب کوي، پرون وویل چې بانکي حسابونه یې تړل شوي دي.

د امریکا غږ انګلیسي څانګې پر خپله وېبپاڼه د دوو ډپلوماټانو په قول ویلي چې په امریکا کې د افغانستان د سفارت او دوو کونسلګریو حسابونه بند شوي دي.

امریکا غږ وايي چې دغو افغان ډپلوماټانو نه غوښتل چې نومونه یې څرګند شي.

نور راوښيه

XS
SM
MD
LG