د لاسرسۍ وړ لېنکونه

تازه خبر
دوشنبه ۵ لړم ۱۳۹۹ کابل ۱۰:۳۹

افغانستان

خالد: دښمن دې د پنجاب په فرمایش د افغان اردو د له‌منځه وړلو خوب نه‌ویني

د ملي دفاع سرپرست وزیر اسدالله خالد

د ملي دفاع سرپرست وزیر اسدالله خالد وايي، افغان ملي اردو به اجازه ورنه‌کړي چې په تېرو لاسته راوړنو معامله وشي.

ښاغلي خالد چې نن‌یې افغان هوايي ځواک سره د امریکا متحده ایالاتو له‌خوا د څلورو «A-29» سوپر ټوکانو الوتکو د مرستې په مراسمو کې خبرې کولې وویل، افغان اردو اوس د خپل هېواد له ارضي تمامیت په بشپړه توګه دفاع کولای شي او دا یې ثابته کړې هم ده.

ښاغلي خالد د سولې خبرو ته په اشاره وویل، دښمن دې د پنجاب په فرمایش د افغان اردو د له‌منځه وړلو خوب نور نه‌ویني.

هغه زیاته کړه: "د دې جګړې موخه، زموږ له خاورې ساتنه ده، زموږ له ارزښتونو ساتنه ده، له هغو ارزښتونو څخه ساتنه ده چې په تېرو دوو لسیزو کې مو ترلاسه کړي دي. نور باید دښمن دا خوب له ذهنه وباسي چې د پنجاب په فرمایش د افغانستان اردو، لکه څنګه چې یو ځل د دې بدې صحنې لیدونکي وو، بیا له‌منځه یوسي، په هېڅ قیمت، په داسې حال چې د بین‌الافغاني خبرو څخه ملاتړ کوو، ولې د ټولو ارزښتونو د ساتنې په شرط."

ښاغلي خالد دا هم وویل چې سوله تېر ته د ستنېدو په معنی نه‌ده او نه به هم اجازه ورکړل شي چې افغان مېرمنې د تېر په څېر په لوبغالو کې په قمچینې ووهل شي.

د ملي دفاع سرپرست وزیر د افغانستان هوايي ځواک نسبت نورو کلونو ته پیاوړی وباله او زیاته‌یې کړه، له نویو الوتکو به د افغانستان د دفاع په برخه کې ګټه واخیستل شي.

د ورځې تازه خبرونه دلته ولولئ

په خوست کې چاودنه شوې

ارشیف

په خوست ښار کې نن مازیګر یوه چاودنه شوې ده.

د امنیه قومندانۍ ویاند عادل حیدر ازادي راډیو ته وویل چې چاودېدونکي مواد په یوه موټرسایکل کې ځای پر ځای شوي و او څلور کسان یې ټپیان کړي دي.

چاودنه په خوست ښار کې د بې پولې ډاکترانو زیږنتون ته څېرمه شوې.

چا د دې بمي چاودنې مسوولیت په غاړه نه دی اخیستی.

چارواکي: د هرات ښاروال او ۷ همکاران یې د بډې اخیستلو په تور نیول شوي

ارشیف

د هرات ښاروال غلام حضرت مشفق او د هغه ۷ همکاران د اداري فساد او بډې اخیستلو په تور ونیول شول.

د کورنیو چارو وزارت ویاند طارق آرین نن د دغو کسانو د نیولو خبره اعلان کړه.

د هرات ولایت یوه سیمه ییز چارواکي د نوم د نه ښودلو په شرط ازادي راډیو ته وویل چې مشفق او د هغه ملګري باالفعل د کورنیو چارو وزارت د درنو جرمونو د پلاوي له خوا ونیول شول.

تر دې دمخه د هرات په ښاروالۍ کې د فساد راپورونه ورکړل شوي وو.

ښاغلي مشفق ته نږدې کسانو تر دې دمه په دې اړه څه نه دي ویلي.

پرون بیا د افغانستان د لویې څارنوالۍ ویاند جمشید رسولي ازادي راډیو ته وویل چې د درنو جرمونو څارنوالي د هرات د والي، د ولایتي شورا د دریو غړیو او د روغتیا د رییس په شمول د ۲۱ چارواکو دوسیې چې د کرونا ویروس د بودیجې په برخه کې په فساد تورن دي تکمیل او محکمې ته سپارلي دي.

عمران خان: هند به د افغانستان خاوره د پاکستان پر ضد وکاروي

د پاکستان صدراعظم عمران خان

د پاکستان صدراعظم عمران خان ویلي هېواد یې اندېښمن دی چې هندوستان به د افغانستان له خاورې د پاکستان د بې ثباته کولو لپاره کار واخلي.

هغه دا خبرې نن په اسلام اباد کې د افغانستان او پاکستان د پانګونې او سوداګرۍ د فوروم (مجمع) په پرانیست غونډه کې وکړې.

هغه زیاته کړه: "په پاکستان کې یوه اندېښنه شته چې هندوستان به په زموږ په هېواد کې د ګډوډۍ د رامنځته کولو او د بې ثباتۍ لپاره افغانستان وکاروي، خو موږ دلته پرېکړه کړې څه چې د افغانستان خلک غواړي موږ یې ملاتړ کوو، ښې اړیکې ورسره جوړوو، ځکه د دې سیمې راتلونکې د افغانستان او پاکستان په اړیکو، همکارۍ او سوداګریو تړلې ده."

عمران خان او پاکستاني چارواکو مخکې له دې هم داسې ادعاوې کړي چې هندوستان د افغانستان له خاورې د پاکستان د بې ثباتۍ لپاره هڅې کوي.

افغان چارواکو او یا د هندوستان حکومت تازه د عمران خان د څرګندونو په تړاو څه نه دي ویلي خو پخوا افغان چارواکو ویلي و چې هیڅوک د افغانستان خاوره د بل چا پر ضد نه کاروي او نه دوی اجازه ورکوي.

په کابل کې د رګبي سیالۍ پیل شوې

آرشیف

په کابل کې د رګبي د ۸ لوبډلو ترمنځ سیالۍ پیل شوې.

د افغانستان د رګبي فدراسیون رئیس حارث رحماني نن ازادي راډيو ته وویل، چې په یادو سیالیو کې دوه لوبډلې له کابل او پاتې نورې له لغمان، غزني، پنجشیر، کاپیسا، پروان او بامیانو دي.

ښاغلی رحماني وايي، یادې سیالۍ د افغانستان د رګبي ملي لوبډلې لپاره د غوره لوبغاړو د پېژندلو په هدف ترسره کېږې.

د نوموړي په وینا چې دغه سیالۍ د ۴ ورځو لپاره روانې وې چې له منځه يې ۳۰ لوبغاړي د رګبي ملي لوبډلې لپاره غوره شول.

په هرات کې د فوټسال جام سیالۍ پیل شوي

آرشیف

په هرات کې د سولې بهیر په ملاتړ د فوټسال جام سیالۍ پیل شوې.

د دغه ولایت د بدني روزنې ریاست فني او مسلکي مدیر ضیا الحق ضیا نن ازاي راډيو ته وویل، چې په یادو سیالیو کې ۲۴ لوبډلو برخه اخیستې ده.

د ښاغلي ضیا په خبره یادې سیالۍ د ۴۰ ورځو لپاره دوام کوي چې هره ورځ به دوه لوبډلې سره مخ شي.

د نوموړي په خبره، یادې سیالۍ د سولې له بهیر د ملاتړ او د لوبغاړو د پیاوړتیا په هدف ترسره کېږي.

ملي امنیت په هلمند کې د اتلانو په نوم ۱۰۰۰ کسیزه ډله رامنځته کړې

افغان ملي امنیتي ځواکونه

د افغانستان ملي امنیت ریاست په هلمند کې د اتلانو په نوم یوه زر کسیزه ډله رامنځته کړې ده.

د سیمه‌ییزو چارواکو په خبره په دې زر کسیزه ډله کې د هلمند یو شمېر اوسېدونکي شامل دي څو د افغان امنیتي ځواکونو تر څنګ د طالبانو په وړاندې وجنګېږي.

د هلمند د والي ویاند عمر ځواک نن په دې اړه ازادي راډیو ته وویل: "دا ډله د ملي امنیت په چوکاټ کې رامنځته شوې او ټول امکانات همدا اداره ورکوي څو امنیتي چارې مخته یوسي او وکولای شي چې په منظمه توګه په سیمه کې امنیت ټینګ کړي."

له دې مخکې هم په هلمند او ځینو نورو سیمو کې ورته ډلې رامنځته شوې وې.

په ځینو برخو کې بیا خلکو شکایت کړی و چې د دغو ډلو ځینو غړیو د سیمې خلک ځورول.

میدان وردګ چارواکي: نرخ او سیداباد کې ۲۱ طالبان وژل شوي

د افغان امنیتي ځواکونو یو انځور

چارواکي وايي، میدان وردګو ولایت کې ۲۱ طالبان وژل شوي دي.

د دغه ولایت د والي محیب‌الله شریف زوی نن ازادۍ راډيو ته وویل چې دغه وسله‌وال د افغان امنیتي ځواکونو سره د مخامخ جګړې پرمهال هغه مهال وژل شوي کله چې غوښتل پر یو شمېر امنیتي پوستو ډله‌ییز بریدونه وکړی.

نوموړی وايي، تېره شپه لسګونه وسله‌والو طالبانو د سیداباد ولسوالۍ په عبدالمحی الدین سیمه کې غوښتل چې پر د امنیتي ځواکونو برید وکړي چې د افغان امینتي ځواکونو د غبرګون په پایله کې ۱۶ وسله‌وال مخالفین وژل شوي.

شریف زوی زیاتوي د دې تر څنګ د نرخ ولسوالۍ په دراني سيمه کې هم د قاري اسماعیل په ګډون ۵ کسه وسله‌وال مخالفین وژل شوي هغه مهال ووژل شوه چې غوښتل يي دغلته پر امنیتي پوستو برید وکړي.

دغه چارواکي وايي، چې یو شمېر وسلې او مهمات يې د امنیتي ځواکونو لاس ته ورغلي دي.

په همدې حال کې په افغانستان کې د امریکايي ځواکونو ویاند ساني لګېت پر خپل ټوېټر په نرخ کې د برید په اړه خبر خپور کړی دی.

هغه لیکلي چې د امریکا هوايي ځواک بېګا د افغان امنیتي او دفاعي ځواکونو په ملاتړ او د امریکا – طالبانو د دوحې تړون په اساس د میدان وردګو په نرخ ولسوالۍ کې هوايي برید وکړ او ۵ طالب جنګیالي یې ووژل.

وسله‌والو طالبانو تر اوسه په دي اړه څه نه‌دي ویلي.

د بنګله دیش دیني عالمانو د افغانستان روانه جګړه حرامه وبلله

غزني کې د وسله والو طالبانو یو انځور-01 May 2019

د افغانستان د بهرنیو چارو وزارت وايي د بنګله دیش دیني عالمانو او مفتیانو د افغانستان روانه جګړه حرامه او له شرعي نصوصو سره په ټکر کې بللې ده.

دا خبره یاد وزارت نن په یوه اعلامیه کې کړې ده.

د اعلامیې له مخې بنګله دیشي عالمان او مفتیان جمعه په ډاکه کې د افغانستان د سولې لپاره یو کنفرانس جوړ کړی و.

د بهرنیو چارو وزارت وايي، چې د بنګله دیش دیني عالمانو په قطر کې د افغانستان د سولې په تړاو د روانو خبرو د ملاتړ تر څنګ په دننه هېواد کې د وژنو په سمدستي درېدو ټینګار کړی دی.

تر دې مخکې په ۲۰۱۸ کال کې اندونیزیا او تر هغه را وروسته دوه واره سعودي عربستان د افغانستان د سولې په تړاو د دیني عالمانو لویې غونډې جوړې کړې وې.

سره له دې چې د نړۍ دیني عالمانو په افغانستان کې روانه جګړه مردوده ګڼلې خو بیا هم په دغه هېواد کې جنګ روان دی او تر اوسه د اوربند د ټينګښت هڅو نتیجه نه ده ورکړې.

ملګري ملتونه: افغانستان کې اوربند له کویډ۱۹ سره مبارزه کې مرسته کوي

کندهار کې د اوربند ورځو یو انځور-18 June 2018

د ملګرو ملتونو سازمان وايي، په افغانستان کې د بشردوستانه اوربند ټینګښت به ټول په دې برلاسي کړي چې د ګډ (دښمن ) یعنې کویډ۱۹ پر ضد مبارزه وکړي.

په کابل کې د دغه سازمان د استازولۍ دفتر یوناما نن په ټویټر باندې لیکلي چې بشردوستانه اوربند به له ژمي مخکې ټولو اړمنو افغانانو ته د مهمو بشري مرستو د رسېدو زمینه برابره کړي.

ملګرو ملتونو له دې مخکې هم په وار وار په افغانستان کې د جګړې له ښکېلو خواو په تېره بیا طالبانو غوښتي چې بشردوستانه اوربند ته غاړه کیږدي.

سره له دې چې په دوحه کې د افغان حکومت او طالبانو د ټیمونو تر منځ خبرې روانې دي خو په دغه هېواد کې جګړو زور اخیستی دی.

'د تېر کال په پرتله د عوایدو راټولولو کې ۱۲ سلنه کمښت راغلی'

مالیې وزارت

د افغانستان د مالیې وزارت له لوري د روان مالي کال له پیل څخه تر اوسه پورې ۱۳۵ میلیارده ۵۶۸ میلیونه افغانۍ ملي عواید راټول شوي چې دا د تېر کال په پرتله ۱۲ سلنه کمښت ښیي.

د مالیې وزارت ویاند شمعروز مسجدي نن ازادي راډيو ته وویل، چې له دې جملې ۵۹ میلیارده ۲۱۴ میلیونه افغانۍ له ګمرکونو، ۱۰ میلیارده ۴۴۱ میلیونه له مستوفیتونو، ۲۰ میلیارده او ۴۵۹ میلیونه غیر مالیاتي عوایدو ، ۱۸ میلیارده ۱۱ له لویو مالیه ورکوونکو له برخې ۱۱ میلیارده ۳۸۱میلیونه له منځنیو مالیه ورکوونکو، ۲۴۵۷ میلیونه له کوچنیو مالیه ورکوونکو برخې څخه او ۱۲ میلیارده او ۷ سوه میلیونه افغانۍ له نورو برخو راټولې شوي دي.

دغه وزارت وايي،د کرونا ویروس له امله رامنځته شوی قرنطین سبب شو چې عواید راکم شي.

نوموړي وویل، چې تېر کال۱۵۵ عشاریه ۴ میلیارده افغانۍ راټول شوي وو.

دغه وزارت همداشان وايي، د ۱۳۹۹ مالي کال له پیل نه د لړم میاشتې تر ۳ مې نېټې پورې ۸۹ میلیارده ۱۸۸میلیونه افغانۍ (۵۴٪) پراختیایې بودیجه او ۲۰۹ میلیارده ۱۴۳ میلیونه افغانۍ (۶۸٪) عادي بودیجه لګول شوی ده.

نوموړي وویل، چې په ټوله کې دا د ملي بودیجې ۲۹۸ میلیارده ۳۳۱ میلیونه افغانۍ (۶۳٪) جوړوي.

د افغانستان د ۱۳۹۹ کال ملي بودجه ۴۲۸ میلیارده افغانۍ وه چې ۲۸۹ یې عادي او ۱۳۹ میلیارده‌ یې پراختیايي بودیجه ده.

د افغانستان د صنعت او سوداګرۍ سرپرست وزیر پاکستان ته رسېدلی

د افغانستان د صنعت اوسوداګرۍ سرپرست وزیر نثار احمد غوریاني

ټاکل شوې چې د افغانستان د صنعت اوسوداګرۍ سرپرست وزیر نثار احمد غوریاني پاکستان ته د سفر پرمهال له پاکستاني سوداګرو او پانګوالو سره وګوري.

ښاغلی غوریاني د افغانستان او پاکستان د ۲۰۲۰ م کال د پانګونې او سوداګرۍ په ناسته کې ګډون لپاره نن اسلام اباد ته ورسېد.

د افغانستان د سوداګرۍ وزارت ویاند جواد دبیر نن ازادي راډيو ته وویل، ښاغلی غوریاني به پاکستان ته د سفر پر مهال د افغانستان او پاکستان د ۲۰۲۰م کال د پانګونې او سوداګرۍ په ناسته کې وینا هم کوي او د افغان سوداګرو د ستونزو په هوارولو به ټينګار وکړي.

دغه ناسته نن دوشنبې په اسلام اباد کې پرانستل کېږي.

د پاکستان له لوري پرافغان سوداګرو د تعارفو لوړېدل، د مالونو ځنډېدل او په لارو کې اخاذي د سوداګرو له عمده ستونزو دي.

دفاع وزارت: ارزګان کې ۱۳ وسله‌وال طالبان وژل شوي

د ارزګان نقشه

د افغانستان دفاع وزارت وایي چې د ارزګان په دهراود ولسوالۍ کې یې ۱۳ وسله‌وال طالبان وژلي او ۱۴ تنه یې ژوبل کړي دي.

د وزارت مطبوعاتي دفتر وایي، طالبانو دغلته د امنیتي ځواکونو پر پوستو بریدونه وکړل چې ځوابي ډزو کې دا مرګ‌ژوبله ور واوښته.

وزارت ادعا کوي چې له طالبانو نه د جګړې په ډګر کې ۱۱ میله وسلې هم پاته دي.

طالبانو تراوسه د افغان چارواکو د ادعا په اړه څه نه‌دي ویلي.

د ارزګان له مرکز ترینکوټ او دهراوود ولسوالۍ شااوخوا سیمو نه وروستیو کې د ناامنیو راپورونه ډېر خپریږي.

کابل کې ماین چاودنې ۳ ملکي کسان ټپیان کړي

د کابل نقشه

کابل کې نن سهار د ماین چاودنې درې ملکي کسان ټپیان کړل.

امنیه قومندانۍ په یوه خبرپاڼه کې ویلي چې دغه مقناطیسي ماین د شپږمې حوزې اړوند حاجي نبي ښارګوټې کې د ملکیانو پر پراډو ډوله موټر وچاودېد.

د پېښې په اړه نور جزئیات نه‌دي ورکول شوي او مسؤلیت یې هم کومې ډلې پر غاړه نه‌دی اخیستی.

د هلمند والي: د نويو ځواکونو په مرسته به سیمې له طالبانو تصفیه شي

افغان ځواکونه

د هلمند والي وايي چې دې ولایت ته د استول شویو نویو ځواکونو په مرسته به د مرکز لښکرګاه سیمې له طالبانو تصفیه شي.

د هلمند والي جنرال محمدیاسین پرون پر خپله فیس‌بوک پاڼه خبر ورکړ چې له مرکز څخه ځانګړي ځواکونه د لومړي پړاو عملیاتو لپاره لښکرګاه ته ورسېدل.

ښاغلي یاسین تېرماښام ازادۍ راډیو ته وویل چې مرستندوی ځواکونه به په هغو سیمو کې عملیات وکړي چې مخکې یې تکتیکي په شاتګ ترې کړی و.

طالبانو دوه اوونۍ مخکې د لښکرګاه څلورمه ناحیه ونیوله او پر نورو سیمو یې هم حملې وکړې. جنرال یاسین وايي چې د نويو ځواکونو عملیات به له لښکرګاه څخه د بېلابېلو سیمو پر لور پیل شي.

یاسین زیاته کړه: "په درېیو-څلور استقامتونو کې به عملیات پیلېږي. هغه ساحې چې دښمن په کې ماینونه ایښي یا پلونه وران شوي، دا به پاکوي او ترمیموي به‌یې."

د هلمند والي زیاتوي چې د دې عملیاتو په نتیجه کې به، خپلو مېنو ته د بې‌ځایه شویو کورنیو د راستنېدو امکان هم برابر شي.

امریکا د القاعده شبکې د جګپوړي غړي ابومحسن المصري وژل کېدل تأیید کړ

د القاعده شبکې جګپوړي غړي ابومحسن المصري

د متحده ایالاتو په افغانستان کې د القاعده شبکې د جګپوړي غړي ابومحسن المصري وژل کېدل تأیید کړي دي.

د رویټرز خبري اژانس د راپور له مخې د امریکا د تروریزم پرضد د مبارزې د ملي مرکز مشر کریس مېلر د محاربې له لیکې د المصري وتل د القاعده شبکې لپاره لویه ماته بللې او ویلي یې دي چې القاعده شبکې د امریکا او د امریکا د متحدانو له‌خوا سختې پرله پسې ضربې خوړلې دي.

د افغانستان د ملي امنیت لوی ریاست پرون یکشنبې په یوه بیان کې وویل چې المصري د غزني ولایت په اندړو ولسوالۍ کې د دې ادارې د ځواکونو د ځانګړو عملیات په ترڅ کې وژل شوی دی.

په بیان کې یادونه شوې چې المصري له طالبانو او حقاني شبکې سره نږدې اړیکې پالل او د دوی وسله‌وال یې تمویلول.

نور راوښيه

XS
SM
MD
LG