د لاسرسۍ وړ لېنکونه

تازه خبر
شنبه ۸ لیندۍ ۱۳۹۹ کابل ۰۱:۱۹

افغانستان

'له طالبانو سره د افغان حکومت مرکچي پلاوي خبرې به د شنبې په ورځ پیل شي'

قطر کې د طالبانو د سیاسي دفتر یو شمېر غړي

دولتي سرچینې وايي چې د افغانستان د سولې مرکچي پلاوی به سبا له طالبانو سره د خبرو لپاره دوحې ته لاړ شي.

د سولې د مرکچي پلاوي دوو غړو فوزیې کوفي او حفیظ منصور له ازادي راډیو سره په خبرو کې قطر ته د افغان پلاوي سبانی سفر تأیید کړ.

فوزیې کوفي وویل چې دواړه خواوې به د شنبې په ورځ خبرې پیل کړي.

د افغانستان د سولې مرکچي پلاوی له یوې اوونۍ راهیسې له طالبانو سره د خبرو لپاره په دې خاطر انتظار و چې ظاهراً طالبان حاضر نه‌ول چې خبرې وکړي، خو اوس ویل شوي چې طالبان هم حاضر شوي چې د سولې خبرو ته کېني.

د ورځې تازه خبرونه دلته ولولئ

چارواکي: په پکتیا کې سږ کال د جلغوزو حاصلات لس سلنه زیات شوي

ارشيف


په پکتیا کې د جلغوزو د پروسس او بسته بندۍ د شرکت کارونه بشپړ شول.

د دغه ولایت د سوداګرۍ خونې مشر ناصر عالمیار وایي، چې په دغه شرکت کې زرو کسانو ته د کار زمینه برابره شوې او په کلني ډول به ۶۰۰۰۰ ټنه جلغوزې بسته بندي شي.

سږ کال په دغه ولايت کې جلغوزو څه باندې ١٣زره مټريک ټنه حاصل ورکړی چې د تېر کال په پرتله لس سلنه زياتوالى ښيي.

چارواکي وايي، که څه هم اوسمهال ګاونډي هېواد پاکستان ته د جلغوزو د قاچاق مخه تر ډېره نيول شوې، خو بيا هم يوه اندازه جلغوزي دغه هېواد ته په قاچاقي ډول وړل کېږي او پاکستان يې بيا په خپل نوم نورو هېوادونو ته صادروي.

چارواکی وايي، په کور دننه د جلغوزو د پروسس د ورته مزکزونو په جوړېدو سره به دا ستونزه هواره شي.

"بهر ته د افغاني غاليو صادرات دوه برابره کم شوي"

ارشيف

د افغانستان د غالیو د صادرونکو ټولنه وايي، سږکال یې بهر ته صادرات د تېر کال په پرتله دوه برابره کم شوي دي.

د غالیو تولیدونکو او صادرونکو ټولنې مشر محمد عظیم اسلم زاده ازادي راډیو ته وویل چې سږکال شاوخوا ۲۵۰ زره مټر مربع غالۍ بهر ته صادرې شوې دي.

په داسې حال کې چې تېر کال تر همدې مودې دا کچه شاوخوا ۱۰۰ زره مټر مربع غالیو ته رسېده.

نوموړي وویل چې د کرونا ويروس له حده زیاته اغېزه د غالیو پر تولیدونکو ده او ډېری غالۍ اوبدونکي دم ګړۍ نه شي کولای خپل تولیدات په مناسبه بیه وپېري.

غالۍ اوبدنه او د غالیو پروسس هغه صنعت دی چې ډېرو کسانو ته د کار زمینه برابروي.

که څه هم ویل کېږي چې اوسمهال په هېواد کې یو میلیون تنه په غالۍ اوبدلو او غالۍ پلورلو بوخت دي خو ځينې غالۍ اوبدونکي وایي چې د هرې ورځې په تېرېدو سره په هېواد کې د غالۍ اوبدونکو شمېر کمېږي.

د افغانستان د بهرنیو چارو وزیر له خپل پاکستاني سیال سره پر ۴ موضوعاتو غږېدلی

د افغانستان د بهرنیو چارو وزیر له خپل پاکستاني سیال سره

د افغانستان او پاکستان د بهرنیو چارو وزیرانو د اسلامي هېوادونو د همکارۍ سازمان د غونډې په درشل کې سره ولیدل.

محمد حنیف اتمر په خپل ټوېټر لیکلي چې له خپل پاکستاني سیال شاه محمود قریشي سره یې د سولې د راتلونکي پړاو، امنیت، د کډوالو په بېرته ستنېدو او اقتصادي همکاریو خبرې کړي دي.

د پاکستان د بهرنیو چارو وزیر هم له ښاغلي اتمر سره تر لیدنې وروسته په خپل ټوېټر لیکلي چې پاکستان د ټولو لپاره د یوه سوکاله راتلونکي په هدف له افغانستان سره د اړیکو غښتلتیا ته ژمن دی.

د افغانستان د بهرنیو چارو وزارت وايي چې د اسلامي هېوادونو د همکارۍ سازمان د بهرنیو چارو وزیرانو په غونډه کې به افغان پلاوی له ګډونوالو هېوادونو د افغان سولې او ثبات لپاره د همکارۍ غوښتنه وکړي.

فوزیه کوفي: د ښځو د حقونو له خوندیتوب پرته سوله له ناکامۍ سره مخ کیږي

د افغانستان د دولت د مرکچي پلاوې غړې فوزیه کوفي

د افغانستان د دولت د مرکچي پلاوې غړې فوزیه کوفي وایي چې د ښځو د حقونو او شته لاسته راوړنو له خوندیتوب او درناوي پرته د سولې له ناکامۍ سره مخ کېږي.

مېرمن کوفي دا خبره پرون جمعه(د لیندۍ ۷) د اسلام اباد د څېړنو د انسټیټوټ په یوه وېبينار یا انلاین غونډه کې وکړه.

نوموړې وويل: "د پروسې پر مهال که وګورو چې د خبرو د ښکېلو لورو له خوا د ښځو د حقونو خوندیتوب نه یقیني کېږي او د افغانستان لاسته راوړنو، بشري حقونو، تنوع او ټول شمولیت ته درناوی نه کېږي هغه به داسې یو وخت وي چې دا پروسه به نه کامیابیږي."

په دې غونډه کې د ولسي جرګې غړې شینکۍ کړوخېل هم ټینګار وکړ چې د سولې په خبرو کې باید د ښځو ونډه زیاته شي.

هغې زیاته کړه چې ښځې د ټولنیزې پخلاینې په برخه کې تر ټولو مهم رول ادا کوي.

د کرکټ ۴ افغان لوبغاړي 'بېګ باش' کې د لوبېدو لپاره اسټرالیا ته لاړل

ارشیف، عکس تئزیني بڼه لري

د افغانستان د کرکټ څلور ملي لوبغاړي په بېګ باش کې د لوبېدو لپاره اسټرالیا ته ولاړل.

محمد نبي پرون په خپل ټوېټر لیکلي چې له ځوانانو سره بېګ باش یا د اسټرالیا د کرکټ غوره لیګ ته روان شو.

محمد نبي، مجیب ځدراڼ، ظاهرخان او نوراحمد لکڼوال په بېګ باش کې د لوبېدو لپاره اسټرالیا ته تللي.

تر دې مخکې راشد خان د هند د کرکټ له غوره لیګ څخه مستقیماً د بېګ باش سیالیو لپاره اسټرالیا ته تللی دی.

د اسټرالیا د کرکټ د شل اوریزو سیالیو غوره لیګ بېګ باش د ډسمبر له لسمې پيلیږي.

دفاع وزارت: د بادغیس د ابکمري لپاره طالب ولسوال وژل شوی

د افغانستان په نقشه کې د بادغیس ولایت

د افغانستان دفاع وزارت وایي، د بادغیس ابکمري ولسوالۍ لپاره یې د طالبانو نومول شوی ولسوال وژلی دی.

د وزارت په خبرپاڼه کې راغلي، ملا امین الله چې په خادم مشهور و، تېره شپه له ۷ ملګرو سره هغه مهال ووژل شو چې پر همدې ولسوالۍ یې د برید نیت درلود.

دفاع وزارت ویلي، د دغو عملیاتو پر مهال له هوایي ځواکه هم کار اخېستل شوی دی.

طالبانو تراوسه د چارواکو د دغې ادعا په اړه څه نه دي ویلي.

د افغانستان او پاکستان د بهرنیو چارو وزیرانو د تاوتریخوالي پر کمولو ټینګار وکړ

د افغانستان او پاکستان د بهرنیو چارو وزیرانو په افغانستان کې د تاوتریخوالي پر داسې کمولو ټینګار وکړ چې اوربند ته لاره هواره کړي.

محمد حنیف اتمر او شاه محمود قریشي نن ( جمعه) د اسلامي همکاریو سازمان د بهرنیو چارو وزیرانو د غونډې په څنډه کې چې نایجر کې جوړه شوې، دا خبرې وکړې.

د پاکستان د بهرنیو چارو وزارت په یوه بیان کې د قریشي په حواله ویلي، کابل ته د صدر اعظم عمران خان دسفر پر مهال داسې ګډ لیدلوری رامنځته شوی چې سولې ته په رسېدو کې مرسته کوي.

بل لورته د افغانستان د بهرنیو چارو وزارت د ویاند مرستیال حامد تهذیب وایي، ښاغلی اتمر دغې دوه ورځنۍ غونډې ته د جمهوري نظام او د تېرو کلونو د لاسته راوړنو د ملاتړ جلبولو په هدف تللی.

ښاغلی تهذیب زیاتوي: "دغه کانفرانس کې زموږ پيغام واضح دی، هغه دا چې افغانستان کې جګړه ناروا ده، د اسلامي هېوادونو ټولنه دې د جګړې د ناروا بللو ترڅنګ له داسې نظام او سولې ملاتړ وکړي چې هغه کې د جمهوریت او مدني حقونو په ګډون د تېرو ۱۸ کلونو لاسته راوړنې تضمین شي."

د اسلامي همکاریو سازمان د بهرنیو چارو وزیرانو ۴۷مه غونډه نن او سبا د نایجر په نیامي ښار کې ترسره کېږي.

کورنیو چارو وزارت د خورشید ټلوېزیون د پخواني کارکوونکي د مړینې پېښه څیړي

د خورشید ټلوېزیون د خپرونو پخوانی رئیس رفیع الله صدیقي

د افغانستان کورنیو چارو وزارت وایي، د خورشید ټلوېزیون د پخواني کارکوونکي او د یوې همکارۍ د مړینې( مرموزه) پېښه یې تر څیړنې لاندې ده.

د وزارت ویاند طارق ارین رسنیو ته ویلي، هر کله چې پرمختګ وشي، دوی به یې له خلکو سره شریک کړي.

د خورشید ټلوېزیون د خپرونو پخوانی رئیس رفیع الله صدیقي او د هغې د یوې همکارې فهیمې فیض مړی پرون د کابل په استالف ولسوالۍ کې وموندل شو.

کورنیو چارو وزارت له دې وړاندې ویلي و، لومړنۍ موندنې یې ښيي چې دغه کسان د ګاز نېونې له کبله مړه شوي دي، خو نا تایید شوي راپورونه بیا د دوی د مسمومېدو خبره کوي.

رفیع صدیقي پر خورشید ټلوېزیون سربیره د یوه څه مودې لپاره د ټاکنو کمېسیون او کانونو وزارت د ویاند په توګه هم پاتې شوی دی.

نورستان چارواکي: ددې ولایت په روغتيايي مرکزونو کې درمل نشته

د افغانستان په نقشه کې د نورستان ولایت

په نورستان کې روغتيايي کارکوونکو ته د څلورو مياشتو معاشونه ورکړل شوي، خو په روغتيايي مرکزونو کې درمل نشته.

د نورستان د عامې روغتيا رئیس ډاکتر ذکي الله ستوري ازادي راديو ته وويل چې په روغتيايي مرکزونو کې د درملو د کمي د پوره کولو او نورو اسانتياوو د برابرولو لپاره د عامې روغتیا وزارت خپلې همکارې موسسې 'اهیډ'ته پیسې ورکړي دي.

په نورستان کې د ۴۲ روغتيايي مرکزونو روغتيايي کارکوونکو د معاشونو د نه ورکړې له امله څه باندې دوې میاشتې اعتصاب کړی وو.

چارواکي: په تخار کې ۱۰ تنه په بېلابېلو جرمونو نيول شوي

آرشیف، عکس تئزیني بڼه لري

د تخار د ملي امنیت اداره وايي چې ۱۰ تنه یې د وسله والو غلاوو، قتلونو او د وسلو د خرڅلاو په تور نیولي دي.

د تخار د والي ویاند محمدجواد هجري په دې اړه ازادي راډیو ته وویل: "د تخار د ملي امنیت د ریاست موظفانو په تالقان ښار کې په درېيو اوپراتیفي عملیاتو کې دا کسان نیولي دي."

ده دا هم وویل چې له نیول شوېو کسانو څخه یو موټر، یو کلاشینکوف او یوه اندازه مهمات ترلاسه شوي او ضبط شوي دي.

د خورشید ټلوېزيون د مخکېني اجرائيوي مشر مړی موندل شوی

د خورشید ټلوېزيون مخکېنی اجرائيوي مشر رفيع صديقي

د کابل د قره‌باغ ولسوال خواجه حنيف صديقي وايي چې د خورشید ټلوېزيون د مخکېني اجرائيوي مشر رفيع صديقي او يو تن بل مړي د دغه ولسوالۍ روغتون ته لېږدول شوي دي.

د قره‌باغ ولسوال وايي، روښانه نه‌ده چې دا دوه تنه څنګه مړه شوي، خو د ده په وينا ښايي ګاز نيولي وي.

ښاغلی حنيف صديقي زياتوي، د دوی پر بدن داسې نښې چې پر دوی د حملې ښکارندوي وي، نه‌ليدل کېږي.

د قره‌باغ د ولسوال په وينا دوی د ولسي جرګې د يوه غړي په بلنه دغې ولسوالۍ ته تللي وو.

د افغانستان د کورنیو چارو وزارت هم وايي چې رفيع صديقي ګاز نيولی او مړ شوی دی.

د وژل شوي داعي کورنۍ د حکومت پر ځنډني پلټنو انتقاد کوي

په هلمند کې د ازادي راډیو وژل شوی خبریال الیاس داعي

په هلمند کې د ازادي راډیو د خبریال محمد الیاس داعي کورنۍ د نوموړي د وژنې په تړاو د حکومت پر ځنډني پلټنو انتقاد کوي.

د محمد الیاس داعي د وژل کېدو شاوخوا دوه اوونۍ پوره شوې، خو حکومت تراوسه په دې اړه پلټنو کې پرمختګ نه لري.

د ښاغلي داعي ورور مدثر دعوت ازادي راډیو ته په مرکې کې وویل چې حکومت باید د الیاس داعي قاتلین ونیسي او سزا ورکړي: "په لومړیو ورځو کې چې موږ له دوی سره اړیکې ټینګولې دوی پر ځینو ځایونو او کسانو باندې شک ښوده. موږ ته یې ویل چې پر ځینو کسانو شک لري، خو زموږ غوښتنه دا وه چې باید هغه کسان ونیول شي او یا سزا ورکړل شي چې د دې پېښې عاملین دي، خو لاهم تر اوسه په دې اړه هېڅ پرمختګ نه دی شوی چې چا دا کار کړی او ولې یې کړی دی."

وسله والو طالبانو هم وړاندې ویلي و چې د ښاغلي داعي د وژنې په اړه پلټنې کوي.

په هلمند کې د ازادي راډیو خبریال محمد الیاس داعي د نومبر د میاشتې په ۱۲مه په لښکرګاه ښار کې د ده په موټر کې د ځای پرځای شوي بم په چاودنه کې ووژل شو او یو ورور یې ټپي شو.

دغې پیښې په کور دننه او بهر پراخ غبرګونونه راوپارول.

بلخ چارواکي: د سیمه ییزو پولیسو یو قوماندان وژل شوی

ارشیف

د بلخ امنیه قوماندانۍ تأیید کړه چې د چمتال ولسوالۍ د سیمه ییزو پولیسو یو قوماندان د نامعلومو وسله والو لخوا وژل شوی دی.

د بلخ د امنیه قوماندانۍ ویاند عادل شاه عادل ازادي راډیو ته وویل چې دغه قوماندان امیرګل نومېده او تېره شپه د مزارشریف ښار د پنځمې حوزې اړوند سیمو کې د نامعلومو کسانو په ډزو ووژل شو.

ښاغلي عادل وویل چې د دې پېښې په اړه څېړني پیل شوي دي، خو تر اوسه په دې تړاو څوک نه دي نیول شو.

د دې پېښې مسؤلیت تر اوسه چا نه دی منلی.

د نورستان د کلیو د پراختیا او بیارغونې چارو تښتول شوی رئیس راخوشې شو

ارشیف

د نورستان د کلیو د پراختیا او بیارغونې چارو رئیس د وسله والو له منګولو راخوشې شو.

انجنیر سید معصوم سیدي یوه اوونۍ وړاندې د کونړ ولایت د چپې درې ولسوالۍ په مربوطاتو کې وسله والو کسانو تښتولی و.

د نورستان د حج او اوقافو رئیس او د قومي جرګې مشر مولوي محمد انور ازادي راډیو ته وویل چې ښاغلی سیدي د قومي جرګې په هڅو تېره شپه راخوشې شو.

دی وايي: "د نورستان د انکشاف دهات رئیس چې څه موده وړاندې نا معلومو وسله والو له ځانه سره بیولی وو، د ولسونو او ځایي مشرانو په هڅه خوشې شوی دی."

سید معصوم سیدي د نورستان مرکز پارون ته روان وو چې په کمین برابر شو، د برید پر مهال د سیدي یو ملګری وژل شوی و.

کندهار چارواکي: هوايي ډګر کې مسافرو ته اسانتیاوې په بشپړېدو دي

د کندهار هوايي ډګر

د کندهار چارواکي وایي، د احمدشاه بابا نړیوال هوایي ډګر کې مسافرو او د هغوی ښه راغلاست ویوونکو ته لازمې اسانتیاوې د بشپړېدو په حال کې دي.

د کندهار د ولایت د مطبوعاتي دفتر مسؤل احمد بهیر احمدي تېره شپه ناوخته ازادي راډیو ته وویل: "له تېرو څو میاشتو راهیسې د احمدشاه بابا په نړیوال هوایي ډګر کې د مسافرو او د هغوی د ښه راغلاست ویونکو لپاره د ټرانسپورټ، هلته د رسټورانټ، د جومات، تشنابونو او د موټرو د تم ځای او همدارنګه د میدان داخل ته له موټرو سره د اجازې ورکولو اړوند لازمو اسانتیاوو برابرولو په موخه د ولایتي ادارې هڅې پیل شوې دي."

پرون چهارشنبې هم د احمدشاه بابا په نړیوال هوایي ډګر کې د ناټو د غوڅ ملاتړ ملاتړ د ماموریت د سلاکارانو په ګډون د دې ولایت پوځي او ملکي مسولینو په یوه غونډه کې د رغونې چارې وارزولې، څو هر څومره ژر مسافرین په دې هوایي ډګر کې له لازمو اسانتیاوو برخمن شي.

نور راوښيه

XS
SM
MD
LG