د لاسرسۍ وړ لېنکونه

تازه خبر
چهارشنبه ۹ تله ۱۳۹۹ کابل ۰۱:۵۱

افغانستان

مسعود اندرابي: پر امرالله صالح نننۍ حمله د حقاني شبکې حملو ته ورته وه

پر امرالله صالح د نننۍ حملې سیمه

د افغانستان د کورنیو چارو وزیر وايي، په کابل کې نننۍ چاودنه کې هغه مواد کارول شوي چې معمولاً یې د حقاني شبکه خپلو بریدونو کې کاروي.

مسعود اندرابي پر خپل ټویټر لیکلي، لومړنۍ څېړنې ښيي چې په دې برید کې له (نایټرو ګلیسیرین) او نورو کیماوي موادو کار اخیستل شوی دی.

نایټرو ګیلسیرین د ډینامیټ په جوړولو کې کارول کېږي.

د کورنیو چارو د وزیر په ټویټ کې ویل شوي، ننني برید کې کارول شوي مواد او د برید بڼه هغو بریدونو ته ورته ده چې ترې دې مخکي یې د حقاني شبکې مسؤلیت منلی دی.

د پولیسو په وینا په دې چاودنه کې لږ تر لږه ۱۰ تنه ولسي خلک وژل شوي دي.

راپورونه د روغتیا وزارت د چارواکو له خولې وايي، ۳۱ تنه نور په برید کې ژوبل شوي دي.

د کابل د تایمني سیمې په دې چاودنه کې د افغانستان د ولسمشر لومړی مرستیال امرالله صالح هم برسېرن ټپي شوی دی.

طالبانو چې د حقاني شبکه‌یې هم یوه برخه ده، په دې برید کې لاس لرل رد کړي.

پر لوړپوړو افغان چارواکو سربېره اروپايي ټولنې او پاکستان دا برید غندلی دی.

د ورځې تازه خبرونه دلته ولولئ

لغمان کې د هاوان مرمۍ د یوې کورنۍ ۳ غړي وژلي

د لغمان ولایت نقشه

په لغمان کې د هاوان مرمۍ د یوې کورنۍ درې غړي وژلي او درې تنه نور یې ټپیان کړي دي.

د لغمان د والي ویاند اسدالله دولت‌زي ازادي راډيو ته وویل چې بېګا شااوخوا اته بجې د لغمان د الینګار ولسوالۍ په قلعټک سیمه کې پر یوه کور د هاوان مرمۍ لګېدلې.

هغه وايي وژل شوي یوه ښځه او دوه ماشومان دي.

د پېښې درې ټپیان چې ماشومان دي روغتون ته وړل شوي.

د لغمان د والي ویاند که څه هم ونه‌ویل چې دغه مرمۍ د کوم لوري له‌خوا توغول شوې، خو په سیمه کې وخت نا وخت د افغان ځواکونو او وسله‌والو طالبانو ترمنځ پر یو بل د بریدونو خبرونه ورکول کېږي.

خو وسله‌وال طالبان بیا د دغې پېښې مسؤلیت پر افغان ځواکونو وراچوي او وایي چې هاوان د افغان ځواکونو له‌خوا توغول شوی دی.

جمهوریت څلورلاري کې ماین چاودنې ۲ پوځيان ټپيان کړي

د کابل نقشه

د کابل د ۱۱مې حوزې په جمهوریت څلورلاري کې یوې ماین چاودنې دوه پوځيان ټپيان کړي.

د پولیسو ویاند فردوس فرامرز ازادي راډيو ته تأیید کړه چې د مقناطیسي ماین دا چاودنه په ۲۰ باندې اووه بجو په یوه فورډ (پوځي موټر) شوې ده.

چا د دې پېښې مسؤلیت نه‌دی منلی.

په دې وروستیو کې په کابل ښار کې د مقناطیسي ماین چاودنې زیاتې شوي.

د افغانستان په پلازمېنه کې دا چاودنه داسې وخت کېږي چې هلته په دوحه کې د افغانستان د دولت پلاوی او طالبان د سولې په خبرو بوخت دي او وايي هڅه‌یې ده چې روان تاوتریخوالی ختم کړي.

زلمی خلیلزاد دوحې ته روان شوی

زلمی خلیلزاد

زلمي خلیلزاد ویلي له روانو خبرو دا تمه ده چې د افغانستان د سیاسي راتلونکې نقشې او یو تلپاتي او هر اړخیز اوربند په لور پرمختګ وشي.

د افغانستان د سولې لپاره د امریکا خاص استازي ښاغلي خلیلزاد نن دا خبره په خپل ټویټر لیکلې.

هغه ویلي د دوحې او سولې په لور روان دی څو له شریکانو سره د افغانانو په مالکیت او مشرۍ د سولې د خبرو او سولې پسې سیمه‌ییز اتصال، سوداګرۍ او د ودې د پراختیا په اړه وغږېږي.

ښاغلی خلیلزاد داسې وخت دوحې ته روان شوی چې هلته د افغانستان د دولت او طالبانو د مرکچیانو ترمنځ خبرې روانې دي.

نن عبدالله د پاکستان د دیني عالمانو د شورا له غړو سره ګوري

د ملي مصالحې عالې شورا مشر عبدالله عبدالله

تمه ده چې د افغانستان د ملي مصالحې عالي شورا مشر عبدالله عبدالله نن د پاکستان د دیني عالمانو د شورا له غړو سره وګوري.

تر دې مخکې د مولانا فضل‌الرحمن په ګډون یو شمېر پاکستانیو دیني عالمانو په افغانستان کې د نړیوالو ځواکونو په وړاندې جهاد روا بللی و.

د ملي مصالحې عالي شورا جګپوړي سلاکار او د رسنیو د دفتر مشر مجیب‌الرحمن رحیمي تېره شپه ازادي راډیو ته وویل چې ښاغلی عبدالله به د پاکستان دیني عالمانو ته واضح پیغام ورکړي.

هغه زیاته کړه: "دیني عالمانو ته به زموږ پیغام هماغه پیغام وي چې ټولو ته مو درلوده او غوښتنه به مو له هغوی دا وي چې افغانستان یو اسلامي هېواد دی. په راتلونکي کې راشئ زموږ له عالمانو سره کېنئ او هڅه وکړئ چې هغه دیني مشروعیت چې طالبان یا ترهګر یې ادعا کوي، تر پوښتنې لاندې راولئ نه د افغانستان د دولت او د دې هېواد د خلکو مشروعیت."

تمه ده چې ښاغلی عبدالله به نن د پاکستان له ولسمشر عارف علوي سره هم وګوري.

ښاغلی عبدالله چې د یوه پلاوي په مشرۍ د دوشنبې په ورځ پاکستان ته تللی، نن به دغه سفر پای ته ورسوي.

د نوموړي د دغه درې ورځني سفر هدف د افغانستان د سولې پروسې لپاره د پاکستان د ملاتړ جلبول دي.

د افغانستان د فوټبال غوره لیګ؛ طوفان هریرود او موج‌های امو لوبه کوي

د افغانستان د فوټبال غوره لیګ ځیني لوبغاړي

د افغانستان د فوتبال غوره لیګ سیالیو په ترڅ کې طوفان هریرود او موج‌های امو به نن سره لوبه وکړي.

دا به د دغو سیالیو څلورمه لوبه وي.

د افغانستان د فوتبال غوره لیګ نهم دور د تېرې پنچشنبې په ورځ په کابل کې پیل شو.

د افغانستان د فوټبال فدراسیون ویلي، د نجونو او ښځو په ګډون ډېر خلک د دغو ولولو ننداره کوي.

د ارزګان په ګېزاب کې یو شمېر سیمې له طالبانو بېرته نیول شوي

ارشیف

د ارزګان چارواکي وایي چې د دې ولایت په ګېزاب ولسوالۍ کې یې یو شمېر سیمې له طالبانو بېرته نیولي او هغوی ته‌یې مرګ‌ژوبله اړولې ده.

د دې ولایت د امنیه قوماندان شفیق‌الله سهار تېره شپه ازادي راډیو ته وویل چې دغه عملیات افغان امنیتي او دفاعي ځواکونو له کمانډو ځواکونو سره په ګډه ترسره کړي دي.

ده وویل: "دره سنجد ساحه‌یې نیولې او هلته مو څلور پوستې واچولې. خیلنو ساحه ده، کنډوګک ساحه ده. دغو ساحو کې چې طالبان وو، دا مو بېرته ونیولې. ۱۱ طالبان وژل شوي."

د ښاغلي سهارپه وینا د وسله‌والو طالبانو یو شمېر وسلې او موټرسایکلونه هم د افغان ځواکونو لاس ته ورغلي دي.

پر ګېزاب ولسوالۍ وسله‌والو طالبانو تېره اوونۍ پراخ برید کړی او ډېرې سیمې یې تر خپل کنټرول لاندې راوستې وې.

وسله‌والو طالبانو تر اوسه په دې اړه څه نه‌دي ویلي.

عبدالله عبدالله: هیله لرم د قطر مذاکرات پایله ورکړي

عبدالله عبدالله د پاکستان د مشرانو جرګې رئیس صادق سنجنراني سره د لیدنې پرمهال

د افغانستان د ملي مصالحې عالي شورا مشر د پاکستان مشرانو جرګې له مشر سره په کتنه کې وویل، تمه لري چې په قطر کې روانې مذاکرې یوه پایله ورکړي او په افغانستان کې روانه جګړه پای ته ورسېږي.

عبدالله عبدالله چې پرون په درې ورځني سفر پاکستان ته لاړ نن له صدراعظم عمران خان او د مشرانو جرګې له مشر صادق سنجنراني سره وکتل.

ښاغلي عبدالله تر دې مخکې په اسلام اباد کې د پاکستان د سټراټېژیکو مطالعاتو مرکز ته په وینا کې وویل: "موږ په خپل هېواد کې د تروریزم موجودیت نه غواړو، نورو اشخاصو ته هم اجازه نه ورکوو چې له دې خاورې نورو هېوادونو ته ګواښ پېښ کړي، اوسنۍ مذاکرې تر ټولو غوره هیله ده، چې له زغم څخه په استفاده د جګړې د ختمېدو سبب شي."

د ملي مصالحې عالي شورا مشر دا څرګندونې په داسې حال کې کوي، چې د ملګرو ملتونو امنیت شورا څو میاشتې مخکې په یوه راپور کې وویل، تر ۶۰۰۰ زیات پاکستاني جنګیالي او په القاعده پورې تړلي څوسوه وسله وال په افغانستان کې فعال دي.

ډایکنډي کې د سړک غاړې ماین چاودنه کې ۱۴ تنه ملکیان وژل شوي

ارشیف

د ډایکنډي د والي دفتر وايي د سړک غاړې ماین په چاودنه کې ۱۴ تنه ملکیان وژل شوي دي.

د ډایکنډي د والي ویاند نصر اله غوري ازادۍ راډیو ته وویل، چاودنه نن سهار هغه وخت وشوه، چې په کجران ولسوالۍ کې یو مسافر-وړونکی موټر پر ښخ کړي ماین وربرابر شو.

هغه زیاته کړه: "په پېښه کې له بده مرغه ۷ ښځې، ۵ ماشومان او د چلوونکي په ګډون ۲ سړي وژل شوي دي."

د والي ویاند وايي په پېښه کې چې د طالبانو تر ولکې لاندې سیمه کې شوې، درې کسان ټپیان شوي دي.

د پېښې مسئولیت کومې ډلې نه دی منلی.

عبدالله: هېچا ته د تروریزم په هدف له خپلې خاورې د ګټنې اجازه نه ورکوو

د ملي مصالحې عالي شورا مشر عبدالله عبدالله

د ملي مصالحې عالي شورا مشر وايي، افغانستان هېچا ته د تروریزم په هدف له خپلې خاورې د استفادې یا ګټنې اجازه نه ورکوي.

عبدالله عبدالله نن په اسلام اباد کې د پاکستان د سټراټېژیکو مطالعاتو مرکز ته په وینا کې وویل: "موږ په خپل هېواد کې د تروریزم موجودیت نه غواړو، نورو اشخاصو ته هم اجازه نه ورکوو چې له دې خاورې نورو هېوادونو ته ګواښ پېښ کړي، اوسنۍ مذاکرې تر ټولو غوره هیله ده، چې له زغم څخه په استفاده د جګړې د ختمېدو سبب شي."

عبدالله عبدالله چې پرون پاکستان ته لاړ نن او سبا هم د پاکستان له عالي رتبه چارواکو سره خبرې کوي.

د ملي مصالحې عالي شورا مشر دا څرګندونې په داسې حال کې کوي، چې د ملګرو ملتونو امنیت شورا څو میاشتې مخکې په یوه راپور کې وویل، تر ۶۰۰۰ زیات پاکستاني جنګیالي او په القاعده پورې تړلي څوسوه وسله‌وال په افغانستان کې فعال دي.

ارزګان چارواکي: ګیزاب او خاص ارزګان کې ۱۸ وسله وال طالبان وژل شوي

د ارزګان نقشه

په ارزګان ولایت کې د ملي اردو یو ویاند وايي، په هوايي بریدونو کې د دولت ۱۸ مخالف وسله‌وال وژل شوي دي.

په دغه ولایت کې د ملي اردو د څلورمې پلې لوا ویاند جګړن اقا محمد صافي ازادۍ راډیو ته وویل: "ځینو وسله‌والو غوښتل تېره شپه په ګیزاب او خاص ارزګان ولسوالیو کې د امنیتي ځواکونو پر پوستو بریدونه وکړي، چې هوايي ځواک په نښه کړل"

هغه زیاته کړه: "دښمن ته ۲۳ نفره تلفات واوښتل، چې له دې جملې ۱۷ نفره یې په ساحه کې مړه پراته وو او ۵ نفره شدید ټپیان لري."

ویل شوي، وسله‌والو خپل یو مړی له ځانونو سره وړی دی.

ښاغلی صافی وايي په ځوابي عملیاتو کې د وسله‌والو ځینې مرکزونه او پوځي تجهیزات هم ویجاړ کړای شوي دي.

وسله‌والو طالبانو تر اوسه په دې اړه څه نه‌دي ویلي.

بامیان کې د کچالو او پیازو ۱۶ سړې خونې ګټې اخیستنې ته وسپارل شوې

د بامیان ولایت نقشه

په بامیان و لایت کې د کچالو او پیازو ۱۶ صفر انرژۍ سړې خونې ګټې اخیستنې ته وسپارل شوې.

د افغانستان د کرنې او مالدارۍ وزارت ویاند اکبر رستمي نن ازادي راډیو ته وویل، چې دغه خونې د بامیان په کهمرد ولسوالۍ کې د کرنیز محصولاتو د مدیریت پروژې پر مټ د نږدې اته میلیونه افغانیو په لګښت جوړې شوې دي.

هغه زیاته کړه: "په بامیان ولایت کې د کچالو او پیازو د ساتنې ۱۶ صفر انرژۍ سړې خونې ګټې اخیستنې ته وسپارل شوې، ټاکل شوې چې په راتلونکې یوه میاشتې کې به په دغه ولایت کې ۱۳۹ نورې سړې خونې هم ګټې اخیستنې ته وسپارل شي، چې هره خونه کې به ۱۲ ټنه کچالو ساتلو ظرفیت لري."

د ښاغلي رستمي په خبره، روان کال په بامیانو ولایت کې د کچالوو درې لکه اتیا زره ټنه حاصلات تر لاسه شوي دي.

یاد وزارت په پلان کې لري، چې په بامیان، میدان وردګ، غور، کابل، بادغیس او یو شمېر نورو هغه ولایتونو کې چې کچالو په کې زیات کرل کېږي شااوخوا ۲۵۰۰ سړې خونې جوړې کړي.

ولسمشر غني د افغانستان د خونو فدراسیون پرانیست

افغان ولسمشر محمد اشرف غني

جمهور رئیس محمد اشرف غني د افغانستان د خونو فدراسیون رسماً پرانیست.

له ارګه په خپره شوې خبر پاڼه کې راغلي، ښاغلي غني په دې پرانیست غونډه کې وویل، چې افغانستان د خونو فدارسیون په پرانیستلو سره د اقتصاد یوه واحده ژبه او ادرس پیدا کړ.

د افغانستان د خونو فدراسیون عمومي رئیس محمد اسماعیل غضنفر وویل، خصوصي سکټور له پاشلتیا تېر شوی او اوس د خونو فدراسیون په جوړېدو سره یې د افغانستان د هوساینې لپاره تر یوه چتر لاندې استوار ګامونه واخیستل.

د خونو فدارسیون کې د کرنې او مالدارۍ تولیداتو، د ښځو د سوداګرۍ او صنایعو، د دوکاندارنو او کسبګرو، د پانګونې او سوداګرۍ، د کانونو او صنایعو او په افغانستان کې د نړیوالې سوداګرۍ خونې غړیتوب لري.

د اقتصادي فعالیتونو انسجام، د کار ایجاد او د بې وزلۍ راکمول، د متشبثینو او سوداګرو ښځو پیاوړتیا، د پانګونې جلبول، پر ځان د اتکا تمرکز، د مسلکي او فني زده کړو برابرول، د سوداګریزو شخړو حلول، د باور د فضا پیاوړي کول، د کورنیو تولیداتو وده او د خصوصي سکټور، دولت او نړیوالو شریکانو ترمنځ د متقابلې همکارۍ هڅې د دغه فدراسیون د جوړولو موخه یاده شوې.

'د افغانستان-خېبر پښتونخوا ټولې لارې به د اوونۍ څلور ورځې پرانیستل شي'

ارشیف

پاکستاني چارواکو اعلان کړی چې په خېبر پښتونخوا کې به له افغانستان سره ټولې لارې د اوونۍ څلور ورځې پرانیزي.

د پاکستان د کورنيو چارو وزارت د دوشنبې په ورځ (د سپټمبر په ۲۸مه) ويلي چې د شنبې، سې شنبې، چهارشنبې او پنجشنبې په ورځو به دا لارې د پلي تګ راتګ لپاره پرانیستې وي.

ازادي راډيو ته په رسېدلي دغه بيان کې ويل شوي چې د تورخم لار به يوازې د هغو افغانانو لپاره پرانیستې وي چې پاسپورټ او ویزه ولري.

دا نه‌دي ويل شوي چې دا لارې به څه وخت خلاصې شي.

د افغانستان او پاکستان ترمنځ خلک د تورخم ترڅنګ د غلام خان، انګور اډې، خرلاڅو او مومندو پر لارو تګ راتګ کوي.

دا پرېکړه وروسته له هغه شوې چې څو موده مخکې پاکستان د کرونا ویروس د مخنیوي په هدف له افغانستان سره لارې تړلې وې.

پاکستان په افغانستان کې د خپلو کارګرو لپاره د ویزې اسانتیا غواړي

د پاکستان د ملي اسامبلې رئیس اسد قیصر

د پاکستان د ملي اسامبلې رئیس په افغانستان کې د پاکستاني وګړو لپاره د کار د ویزو د اسانتیا او په افغانستان کې پاکستاني قونسلي چارواکو ته په افغان زندانونو کې د پاکستاني بندیانو د لاسرسي غوښتنه کړې ده.

دا معلومات د پاکستان د ملي اسامبلې پر رسمي ټويټرپاڼه د دوشنبې په ماښام خپاره شوي.

د معلوماتو له مخې د پاکستان د ملي اسامبلې رئیس اسد قیصر دا غوښتنې د افغانستان د ملي مصالحې عالي شورا له رئیس عبدالله عبدالله سره په اسلام‌اباد کې د دوشنبې په ورځ د لیدو پر مهال مطرح کړي.

د افغانستان د ملي مصالحې عالي شورا ویاند فریدون خوځون د دوشنبې په ورځ په دې اړه ازادي راډيو ته وویل چې ښاغلي عبدالله او ښاغلي قیصر په دې کتنه کې پر دوه اړخیزو اړیکو خبرې وکړې.

ده زیاته کړه: "زموږ تمه دا ده چې دا سفر به وکړای شي د دواړو هېوادونو ترمنځ اړیکې پراخې کړي. هغه ژمنې چې وشوې په صادقانه توګه عملي شي."

ټاکل شوې ده د افغانستان د ملي مصالحې عالي شورا رئیس عبدالله عبدالله نن د سې شنبې په ورځ د پاکستان د صدراعظم عمران خان، ولسمشر عارف علوي او لوی درستیز قمر جاوېد باجوه سره وویني.

ارګ: د بیان ازادي او اطلاعاتو ته لاسرسی به خوندي وساتل شي

د افغانستان د ولسمشر ویاند صدیق صدیقي

افغانستان د ولسمشر ویاند وايي حکومت خلکو ته ډاډ ورکوي چې د بیان ازادي او اطلاعاتو ته لاسرسی به د نورو لاسته راوړنو په څېر خوندي وساتل شي.

صدیق صدیقي د اطلاعاتو د لاسرسي د نړیوالې ورځې په مناسبت په یوه ویډیويي پیغام کې دا خبرې کړي.

هغه زیاته کړه: "موږ خپلو خلکو ته ډاډ ورکوو چې د بیان ازادي او اطلاعاتو ته لاسرسی، حساب کتاب او ځواب وینه به زموږ د خلکو د اساسي حقونو په توګه پر خپل ځای وي او حکومت د تېرو نولسو کلونو د ارزښتونو ساتنې ته متعهد دی."

د سېپټېمبر اته ویشتمه د ملګرو ملتونو له خوا اطلاعاتو ته د لاسرسي نړیواله ورځ یاده شوې.

هدف یې دا ښودل شوی چې حکومتونه او مسوولین د اطلاعاتو شریکولو ته وهڅول شي.

نور راوښيه

XS
SM
MD
LG