د لاسرسۍ وړ لېنکونه

تازه خبر
دوشنبه ۳۱ وږی ۱۳۹۹ کابل ۱۱:۳۴

افغانستان

ښايي نوی کابل بانک د افغانستان ملي بانک سره یوځای شي

نوی کابل بانک

ټاکل شوې چې نوی کابل بانک د افغانستان له ملي بانک سره یوځای شي.

د مالیې وزارت ویاند شمروز مسجدي نن ازادي راډيو ته وویل چې په دې تړاو ناسته هم شوې ده.

نوموړي وویل چې په دې ناسته کې د مالیې سرپرست وزیر عبدالهادي ارغندیوال، د افغانستان بانک سرپرست اجمل احمدي، د افغانستان د مرکزي سرشمېرنې ادارې رئیس احمد جاوېد رسولي، د نوي کابل بانک او ملي بانک رئیسانو او د ولسمشرۍ ماڼۍ د چارو ادارې استازي ګډون کړی وو.

ښاغلي مسجدي په دې تړاو ازادي راډيو ته وویل: "د افغانستان د مرکزي سرشمېرنې ادارې د ولسمشر له حکم سره سم د دواړو بانکونو تخنیکي سیستمونه څېړلي، د دواړو بانکونو څرنګوالی او وړتیاوې پېژندلي او طرحه چمتو شوې ده چې په دې طرحه کې د یادو بانکونو د یوځای کېدو لنډ مهاله، منځ‌مهاله او اوږدمهاله اقدامات روښانه شوي دي."

نوموړي زیاته کړه چې د دې ناستې پر مهال دواړو لورو د بانکونو یوځای کېدو ته چمتووالی وښود.

د مالیې وزارت وايي، همدارنګه پرېکړه وشوه چې د ولسمشرۍ عالي مقام له نظرونو اخیستو وروسته د یادې طرحې په تړاو د افغانستان له نړیوالو شریکانو په ځانګړې توګه د پیسو له نړیوال صندوق او نړیوال بانک سره تخنیکي سلا مشورې هم وشي.

د مالیې وزارت وايي، دغه پرېکړه ولسمشر ځکه وکړه چې د دولتي بانکونو شمېر راکم او خلکو ته د خدمتونو وړاندې کول مؤثر شي.

کابل بانک څو کاله مخکې د مالي بحران له امله ډېوالي او د حکومت په چوکاټ کې د نوي کابل بانک په نوم ونومول شو.

د ورځې تازه خبرونه دلته ولولئ

د ناټو استازی: افغانان داسې سولې ته هیله‌من دي چې بشري حقونه خوندي کړي

په افغانستان کې د ناټو ملکي استازی سټیفانو پونتېکورو

په افغانستان کې د ناټو ملکي استازي د سولې نړیوالې ورځې په مناسبت ویلي، افغانان داسې سولې ته هیله‌من دي چې بشري حقونه‌یې خوندي کړي.

سټیفانو پونتېکورو ویلي، ناټو سازمان سولې ته د رسېدو په برخه کې د افغانستان ملاتړ ته ژمن دی.

هغه زیاته کړه: "دا په رښتیا یو تاریخي فرصت دی چې د افغانستان د لسیزو جګړو ته یوه سیاسي حل لاره پیدا کړي، نن ډېر افغانان دا نېکمرغي نه‌لري چې وطن په سوله کې وویني، خو دوی هیله لري، د دوی هیله با ثباته او دومداره سولې ته ده چې جګړه ختمه کړي او د ټولو افغانانو بشري حقونه خوندي کړي."

نن د سپټمبر ۲۱مه د سولې نړیواله ورځ ده. د دې ورځې په مناسبت د ملګرو ملتونو سرمنشي انتونیو ګوترش په نړیوال اوربند ټینګار کړی او له ټولو یې غوښتي چې د جګړو د درولو لپاره دې سوله‌ییزې او ډیپلوماتیکې لارې چارې غوره کړي.

ملګرو ملتونو په ۱۹۸۱ کال کې د سولې نړیواله ورځ ونوموله او د دې کار هدف په نړۍ کې د جګړو پای ته رسول او سوله‌ییز ژوند ته د خلکو هڅول یاد شوي.

'د هوایي دهلېزونو له لارې صادرات بېرته عادي حالت ته ګرځېدلي'

ارشیف

د افغانستان د سوداګرۍ او پانګونې خونې چارواکي وايي، د کرونا ویروس له امله له قرنطین وروسته د هوایي دهلېزونو له لارې صادرات بېرته خپل عادي حالت ته راګرځېدلي دي.

د دغې خونې مرستیال یونس مومند نن ازادي راډیو ته وویل، اوس‌مهال د هوایي دهلېزونو له لارې تر ډېره وچې او تازه مېوې، زعفران، قیمتي ډبرې او لاسي صنایع صادرېږي.

هغه زیاته کړه: "له قرنطین وروسته اوس‌مهال بهر ته صادرات عادي شوي، امارت، هند، سعودي، قطر، بهرین هغه هېوادونه دي چې ورته د هوایي دهلېز له لارې صادرات کېږي."

نوموړي وویل، وروستیو کې ترکش ایرلاین هم خپل پروازونه شروع کړي چې نږدې راتلونکي کې به اروپا ته هم صادرات پیل شي.

د سوداګرۍ او صنایع خونې چارواکي وايي،که وضعیت همداسې دوام وکړي په صادراتو کې به زیاتوالی راشي.

سږ کال د قرنطین له امله نورو هېوادونو ته درې زره ټنه صادرات شوي.

دا په داسې حال کې ده چې افغانستان په ۲۰۱۹ کال کې د هوايي دهلېزونو له لارې بهرنیو هېوادونو ته شااوخوا ۵،۳۰۰ ټڼه سوداګریز توکي صادر کړي وو.

افغانستان د لومړي ځل لپاره په ۲۰۱۷ کال کې له هند سره هوايي دهلېز پرانیست او له هغې وروسته‌یې دا لړۍ یو شمېر عربي او اروپايي هېوادونو ته هم وغځوله.

افغانستان کې د غنمو حاصلات ۵.۱ میلیون مټریک ټنو ته رسېدلي

د غنمو د پاکولو پروسه

د افغانستان د کرنې، اوبو لګولو او مالدارۍ وزارت او د ملي احصائیې او معلوماتو ادارې د یوې ګډې سروې پایله ښیي چې روان کال په دغه هېواد کې د غنمو حاصلات ۵.۱ میلیون مټریک ټنو ته رسېدلي دي.

د دغه وزارت ویاند اکبر رستمي نن ازادي راډيو ته وویل، د دغو حاصلاتو ۴.۰۳ میلیون مټریک ټنه‌یې له اوبیزو کروندو او ۱.۱۵ میلیون مټریک ټڼه‌یې له للمي کروندو څخه اخیستل شوي دي.

دغه سروې په ۳۰ ولایتونو، ۱۷۷ ولسوالیو او ۸۸۵ کلیو کې شوې ده.

ښاغلی رستمي وایي چې د کرنې، اوبو لګولو او مالدارۍ وازرت او د احصائیې او معلوماتو ملي ادارې د ګډې سروې پر بنسټ تېر کال د غنمو د تولید کچه ۴.۹ میلیون ټڼه وه چې سږني حاصلات نږدې ۲۰۰ زره مټریک ټنه زیاتوالی ښیي.

د تېر کال په پرتله په روان کال کې د غنمو د ټولیز تولید د کچې د زیاتوالي لامل د غنمو د کروندو زیاتېدل او د للمي کروندو د تولیداتو زیاتوالی دی.

تخار، هرات، کندهار، هلمند، کندز او غزني په ترتیب سره په روان کال کې تر ټولو زیات د غنمو حاصلات لري.

دغه‌شان پنجشېر، نورستان، غور، پکتیا، نیمروز او کاپیسا په ترتیب سره تر ټولو لږ غنم تولید کړي دي.

خلیل‌زاد د جګړې زیاتوالی د خواشینۍ وړ بللی

د افغانستان د سولې لپاره د امریکا ځانګړی استازی زلمی خلیلزاد

د افغانستان د سولې لپاره د امریکا ځانګړي استازي د جګړې زیاتوالی د خواشینۍ وړ بللی دی.

زلمي خلیلزاد پر خپله ټویټرپاڼه لیکلي: "له تېرو څو ورځو راهیسې افغانستان کې تاوتریخوالی په څرګند ډول زیات شوی چې د تأسف خبره ده او د ګڼ شمېر ملکیانو په ګډون افغانان په‌کې وژل کېږي."

ده وړاندې لیکلي، دې ته په پام چې وروستیو کې د سولې خبرې پيل شوي، نو اړینه ده چې ټول اړخونه تاوتریخوالي کې د پام وړ کموالی راولي.

په دې وروستیو ورځو کې له بېلابېلو ولایتونو د ملکیانو او دولتي سرتېرو د مرګ‌ژوبلې راپورونه خپاره شول.

د پکتیکا په جاني‌خېلو او د کندز خان‌اباد کې د ماین چاودنې او هوايي برید له کبله چارواکو د ۴۰ ملکیانو د مرګ‌ژوبلې خبر ورکړ.

مسعود اندرابي: د پلازمېنې امنیتي کمربند پراخ شوی

د افغانستان د کورنیو چارو وزارت سرپرست مسعود اندرابي

د افغانستان د کورنیو چارو وزارت سرپرست وايي د کابل په ځینو ولسوالیو کې یې د وروستیو ناامنیو په وړاندې د پلازمېنې امنیتي کمربند پراخ کړی دی.

مسعود اندرابي له ازادي راډیو سره په ځانګړې مرکه کې وویل چې د کابل په ګڼ مېشتي ښار کې د امنیتي زېربناوو کمښت ناامنۍ زیاتې کړي، خو د ده په خبره پولیس د وضعیت په کنټرول برلاسي دي.

هغه زیاته کړه: "د امنیت د ټینګښت لپاره کومې تمې چې کېږي یوې قوي زېربنا ته اړتیا لري، له دې سره سره هم د هغو پروګرامونو په مټ چې په کورنیو چارو وزارت او د کابل د پولیسو له‌خوا نیول شوي موږ د تېرو کلونو په نسبت په کابل کې د جرمونو کچه ډېره په لوړه نه‌ګورو."

ښاغلی اندرابي د ادرسونو د یوه منظم سیستم نشتوالی او په دودیزه توګه د سندونو پروسس د قوي زېربناو بېلګې یادوي.

په دې وروستیو کې د کابل اوسېدونکو د مقناطیسي چاودنو، هدفي وژنو او وسله‌والو غلاوو په اړه ډېر شکایتونه کړي. د کورنیو چارو سرپرست وزیر او نوماند ښاغلی اندرابي بیا وايي چې هدفي وژنې د طالبانو د امتیاز غوښتنې له پروګرامونو دي.

هغه ادعا چې طالبانو رد کړې.

'میدان وردک کې ۱۷ طالب جنګیالي وژل شوي'

ارشیف، د افغان ځواکونو د زغروال موټرو کاروان

د میدان وردګو چارواکي وايي چې په دې ولایت کې ۱۷ تنه طالبان له افغان ځواکونو سره په نښته کې وژل شوي دي.

د میدان وردګو د والي ویاند محب‌الله شریف‌زوی ازادي راډیو ته وویل جګړه پرون ماښام هغه مهال پیل شوه چې طالبانو چک ولسوالۍ ته د تلو پر مهال پر دولتي ځواکونو برید وکړ.

هغه زیاتوي چې د امنیتي ځواکونو په ځوابي برید کې ۱۷ طالبان مړه او دوه نور ټپیان شول.

ښاغلی شریف‌زوی زیاتوي چې په جګړه کې دولتي سرتېري نه‌دي زیانمن شوي.

طالبانو تر اوسه په دې اړه څه نه‌دي ویلي.

'طالبان بدخشان کې تر خپل ولکې لاندې سیمو کې د پولیو واکسین مخه نیسي'

بدخشان کې د پولیسو واکسین تطبیق

د بدخشان سیمه‌ییز چارواکي وايي چې طالبان تر خپل ولکې لاندې سیمو کې د ماشومانو د ګوزڼ یا پولیو پر ضد د واکسین تطبیق ته اجازه نه‌ورکوي.

د بدخشان د روغتیا ریاست مرستیالې نوشین ګُهر کریمي ازادي راډیو ته وویل چې د شااوخوا ۲۶۵ زره ماشومانو د واکسین پلان جوړ شوی و، خو د طالبانو د ممانعت له کبله په راغستان، کوهستان، وردوج او یمګان ولسوالیو کې له پنځو کالو کم عمره ۲۶ زره ماشومان له واکسین بې‌برخې شوي دي.

مېرمن ګهر زیاتوي: "په بدخشان کې د ماشومانو له ټول ټاکلي هدف څخه ۲۶،۰۰۰ ماشومان له واکسین څخه پاتې شوي. البته په هغو ولسوالیو کې چې امنیت‌یې خراب دی."

خو د روغتیا ریاست مرستیاله وايي، هیله لري چې طالبان به روغتیايي ټیمونو ته د پولیو د واکسین د تطبیق اجازه ورکړي. مېرمن کريمي وايي چې له طالبانو له سره د قومي مشرانو په منځګړیتوب په دې اړه خبرې روانې دي.

کندز کې د 'بدلون ' په نوم د سیمه ییزې راډیو خپرونې ودرېدې

بدلون راډیو

په کندز کې د بدلون په نوم د یوې سیمه ییزې راډیو مسئولین وايي، چې د مالي او تخنیکي ستونزو له امله یې خپلې خپرونې درولي دي.

د دغې سیمه ییزې راډیو بنسټ ایښودونکي او د امتیاز څښتن نظیف الله نظیف وايي، د بدلون راډیو هدف فکري رغونه، ښونې ته د ولس هڅونه، یووالی او سولې ته کار کول وو، چې له پیله تر ننه یې د ولس ويښتابه ته کار وکړ.

هغه زیاته کړه: "په تېرو کلونو کې چې موږ راډيو چلوله موږ مادې امکانات د سوداګریزو اعلاناتو له لارې موندل خو د کندز دوه وارې سقوط او له هغې راورسته د کرونا وضعیت د دې لامل شو چې موږ هغه مادې امکانات چې د دې رسنۍ د چلولو لپاره درلودل له لاسه ورکړو، د مادې امکاناتو نشتوالی له کبله دې ته اړ شو چې راډیو وتړو."

د ښاغلي نظیف په وینا، بدلون راډیو د کندزولایت سربېره د بغلان، تخار او د سمنګان ولایتونو په یوشمېر ولسوالیو کې هم په رڼه بڼه اورېدل کېده، څلوریشت ساعته خپرونې او کابو یو میلیون اورېدونکي یې درلودل.

په کندز کې د افغان ژورنالیستانو د خوندیتوب کمیټې هم د دغې راډيو د خپرونو د بندېدو په اړه خپله انديښنه څرګنده کړه.

د ازادي راډیو خبریال هڅه وکړه څو په دې اړه د سیمه ییزو چارواکو نظر واخلي خو بریالی نه شو.

که څه هم په افغانستان کې په تېرو څو لسیزو کې تصویري رسنیو د پام وړ پرمختګ کړی خو راډیو د هغوځانګړو له امله چې لري یې، لکه کم مصرف، هر ځای ته بې تکلیفه انتقال او له برښنا پرته ورته لاسرسی، لا هم د خلکو تر منځ د اطلاع رسونې د یوې ښې وسیلې په توګه خپل ځای لري.

لغمان کې د وریجو سږني حاصلات نږدې ۴۰ زرو ټنو ته رسېدلي

ارشیف

د لغمان د وریجو سږني حاصلات نږدې ۴۰ زره ټنو ته ورسېدل.

د افغانستان د کرنې او مالدارۍ وزارت ویاند اکبر رستمي نن ازادي راډيو ته وویل، چې په دې ولایت کې د وریجو حاصلات ځکه زیات شوي چې د شولو د عصري کرکېلي لپار د کرنې وزارت له خوا د شولو لسګونه ننداریزې قطعې جوړې شوي چې بزګرانو ته په کې د عملي روزنې زمینه برابره شوې ده.

ښاغلی رستمي وايي، دا د خوړو خوندیتوب او د بزګرانو د اقتصادي پیاوړتیا لامل ګرځي.

نوموړي وویل، چې تېر کال په دغه ولایت کې د وریجو حاصلات یوازې ۳۰ زره ټنه وه.

لغمان ټولټال ۲۱ زره او ۸۷۶ هکټاره کرنیزه ځمکه لری، چې ۳۲ هکټاره یې للمي او اته زره او ۱۵۶ هکټاره یې نمجنه او جبه زاره ځمکه ده، چې یواځې د شولو د کښت لپاره مناسبه ده.

افغان حکومت د سیمې هېوادونو سره د سیمه ییزو همکاریو پراختیا وغوښته

محمد حنیف اتمر

د افغانستان لوړ رتبه پلاوي د تاجکستان له چارواکو سره د اقتصادي همکاریو پراختیا او په سیمه ییزه همکارۍ کې د افغانستان دریځ پیاوړي کولو په اړه ټينګار وکړ.

د افغانستان د بهرنیو چارو وزارت ویاند ګران هېواد نن ازادي راډو ته وویل، چې دغه کتنه د بهرنیو چارو سرپرست وزیر محمد حنیف اتمر په مشرۍ ترسره شوې ده.

هغه زیاته کړه: "د افغان حکومت لوړ رتبه پلاوي د صنعت او سوداګرۍ سرپرست معین عبدالکریم مالکیار او نورو چارواکو په ملتیا دغه ناسته ترسره کړې او تاجک چارواکو سره یې د اقتصادي همکاریو په پراختیا او په سیمه ییزه همکارۍ بحث کړی دی."

ښاغلي اتمر د تاجکستان لومړي وزیر قاهر رسول زاده او د تاجکستان ولسمشر ښاغلي امام علي رحمان سره هم لیدنه کړې ده.

بهرنیو چارو وزارت وايي، په دې غونډو کې هوکړه شوې ده چې د دواړو هېوادونو سکتوري ادارې د اقتصاد، انرژۍ، سوداګرۍ او ټرانزیټ په برخو کې د عملي پروژو د پلان او پلي کولو لپاره ګډه ناسته او ګډ کار کوي.

دغه شان په دې هم ټینګار شوی چې د بریښنا تولید، ټرانزیټ او لېږدونې پروژې چې د سیمې په نښلولو کې مهم رول لوبوي او په سیمه کې د افغانستان دریځ پیاوړی کوي، باید د دواړو دولتونو تر منځ د دوه اړخیزو همکاریو لومړیتوبونه وي.

فراه چارواکي: یوې نجلۍ د جبري واده په اعتراض ځان وژلی

ارشیف

په فراه کې یوې نجلۍ د جبري واده په اعتراض کې ځان وژلی دی.

د فراه ولایت د چارواکو په وینا، دا پېښه تېره شپه د فراه ښار په چهارباغ سیمه کې شوې ده.

د فراه د والي ویندوی محب الله محب وايي چې نجلۍ د جبري واده په خاطر ځان زیندۍ کړی او پولیس هڅه کوي چې هغه کس ونیسي چې نجلۍ یې ځان وژلو ته مجبوره کړې ده.

ولسمشر محمد اشرف غني بامیان ته لاړ

د افغانستان ولسمشر محمد اشرف غني

د افغانستان ولسمشر محمد اشرف غني د بامیان د وضعیت د لیدلو لپاره نن سهار دغه ولایت ته لاړ.

د ارګ له خبرپاڼې سره سم، ولسمشر غني به په بامیان کې د یکاولنګ – دره صوف د سړک د جوړولو چارې هم وګوري.

دغه راز په پام کې ده چې د ولسمشر د دوو مرستیالانو په ګډون د حکومت د مشرتابه ځانګړې امنیتي غونډه د ولسمشر غني د سفر په لړ کې په بامیان کې جوړه شي.

مسعود اندرابي: د امنیتي تړون پر اساس چا ته وسلې نه ورکول کېږي

د کورنیو چارو سرپرست وزیر مسعود اندرابي

د کورنیو چارو سرپرست وزیر مسعود اندرابي وايي، د امنیتي تړون پر اساس چا ته وسلې نه ورکول کېږي.

هغه له ازادي راډیو سره په ځانګړې مرکه کې وویل، امنیتي تړون له جرمونو سره د مبارزې لپاره په کابل او نورو ښارونو کې د پولیسو او خلکو ترمنځ یو اخلاقي تفاهم دی، نه د وسلو وېش.

اندرابي زیاته کړه: "په دې کې هېڅ داسې پلان چې چا ته سلاح ورکړو، مهمات ورکړو یا ملېشې جوړې کړو، شامل نه دی، زه او موږ ټول له دې سره مخالف یوو."

ده دا هم وویل چې د امنیتي تړون بل هدف د کابل ښار د ترافیکي نظم له ښه کېدو سره مرسته ده.

تر دې وړاندې داسې ګنګوسې خپرې شوې وې چې ګنې حکومت غواړي چې د امنیتي تړون د پروګرام د پیلولو له لارې ښاریان په وسلو سمبال کړي.

خلیلزاد په افغانستان کې د سولې د راتلو لپاره اوسنی چانس بې ساری بللی

زلمی خلیلزاد

د افغانستان لپاره د امریکا ځانګړي استازي زلمي خلیلزاد په افغانستان کې د سولې د راتلو لپاره اوسنی چانس بې ساری بللی دی.

ښاغلي خلیلزاد پر خپله ټویټرپاڼه لیکلي چې په افغانستان کې د خبرو له لارې د یوه سیاسي جوړجاړي او په افغانستان کې د سولې لپاره پراخ نړیوال ملاتړ شته او باید له دې بې ساري فرصته ګټه واخیستل شي.

ښاغلي خلیلزاد د افغانستان د سولې د خبرو په اړه د ملګروملتونو د امنیت شورا د اعلامیې هرکلی کړی چې په هغه کې یې د افغانستان پر مځکنۍ بشپړتیا، حاکمیت، ملي یووالي او خپلواکۍ ټینګار کړی دی.

امنیت شورا په دې اعلامیه کې، چې د جمعې په ورځ یې خپره کړه، وویل، په افغانستان کې ټینګه سوله د افغانانو تر مشرۍ لاندې او د افغانانو ترمنځ د ټولشموله خبرو په نتیجه کې راتلای شي.

چارواکي: کابل کې د هدفي وژنو د پلان مرکز کشف او له منځه یوړل شو

دغه مرکز د یوه کور دننه و چې نژدې پنځوس میله قلمي وسلې او ۱۴ مقناطیسي ماینونه په کې موندل شوي دي.

امنیتي چارواکي وایي، کابل کې یې د هدفي وژنو د پلانولو یو مرکز کشف او له منځه وړی دی.

د کابل امنیه قومندانۍ په یوه خبرپاڼه کې ویلي، دغه مرکز د یوه کور دننه و چې نژدې پنځوس میله قلمي وسلې او ۱۴ مقناطیسي ماینونه په کې موندل شوي دي.

خبرپاڼه کې د دغه مرکز اصلي ځای نه دي ښودل شوی او دا هم نه دي ویل شوي چې په تړاو یې څوک نیول شوي او که نه.

امنیه قومندانۍ د نیول شویو توکو انځورونه هم رسنیو ته لېږل شوي دي.

نور راوښيه

XS
SM
MD
LG