د لاسرسۍ وړ لېنکونه

تازه خبر
پنجشنبه ۱۰ تله ۱۳۹۹ کابل ۱۰:۵۷

خبرونه

سویتلانا څیخانوسکایا: بیلاروس په ژور سیاسي بحران کې ښکېل دی

سویتلانا څیخانوسکایا

په بیلاروس کې جمهوري ریاست ته د اپوزیسیون کاندیدې سویتلانا څیخانوسکایا ویلي چې هېواد يې په ژور سیاسي بحران کې ښکېل دی او د الکساندر لوکاشینکا حکومت د خپلو خلکو غږ نه اوري.

هغې پرون وویل چې بیلاروس بدل شوی او خلک یې بیدار شوي دي.

هغې ویلي چې دالکساندر لوکاشینکا رژیم باید په دې وپوهېږي چې د بیلاروس خلک نور له خپله دریځه نه شاته کېږي.

هغې تردې مخکې، د ملګرو ملتونو له سازمانه غوښتنه کړې چې د بیلاروس د لانجې د پای ته رسولو لپاره مرسته وکړي.

د ورځې تازه خبرونه دلته ولولئ

غني: د هلمند برېښنا بند او نهر سراج کانال ته دې لومړیتوب ورکول شي

محمد اشرف غني

ولسمشر اشرف غني چارواکو ته دنده سپارلې چې د هلمند ولایت د موسی کلا د برېښنا بند او د نهر سراج کانال ته لومړیتوب ورکړي.

د افغانستان جمهوري ریاست په یوه خبرپاڼه کې چې نن خپره شوه وايي چې دا پرېکړه د اقتصاد عالي شورا په غونډه کې شوې ده.

په خبرپاڼه کې راغلي چې ولسمشر د مالیې وزارت ته دنده سپارلې چې د راتلونکي کال په بودجه کې دې دوو پروژو ته لومړیتوب ورکړي.

د خبرپانې له مخې ولسمشر غني د اوبو د چارو د تنظیم اداره مؤظفه کړه چې د موسی کلا د برېښنا بند او د نهر سراج د کانال په اړه څېړنې وکړي او د مالیې وزارت ته‌یې هدایت ورکړ چې له دې ادارې سره چارې همغږې وکړي.

وېلسن: د سولې خبرو د کړنلارې په اړه بحث کې اړتیا وړ مرستې ته چمتو یو

راس وېلسن

په کابل کې د امریکا سرپرست سفیر او شارژدافیر وايي چې متحده ایالات او نور هېوادونه د افغانستان د سولې له بهیر سره هرې هغې مرستې ته چمتو دي چې په قطر کې د افغان دولت او طالبانو مرکچي پلاوي د سولې د خبرو د کړنلارې په اړه د بحث پر مهال د هغو اړتیا ویني.

راس وېلسن دا څرګندونې نن د عامې روغتیا وزارت ته د متحده ایالاتو له‌خوا د مصنوعي تنفس د ۱۰۰ وسیلو یا وینټلاټورونو د مرستې د سپارلو پر مهال په یوه غونډه کې وکړې.

هغه وویل، په دوحه کې د سولې خبرې ښايي یو څه زیات وخت واخلي ځکه دواړه لوري له صفر څخه پیل کوي.

ښاغلي وېلسن زیاته کړه د امریکا او د نورو هغو هېوادونو د نظریو منل چې په افغانستان کې د سولې له هڅو سره مرسته کوي په خبرو کې په ښکېلو خواوو پورې اړه لري.

د امریکا سرپرست سفیر وویل، امریکا دا لېوالتیا نه‌لري چې پر مرکچي پلاویو خپل نظر تحمیل کړي، بلکې د اړتیا په صورت کې مرستې ته چمتو ده.

کابل کې امریکا سفارت افغانستان ته د مصنوعي تنفس ۱۰۰ دستګاوې ورکړې

کابل کې د امریکا سفارت

د روغتیا وزارت وايي، په کابل کې د متحده ایالاتو سفارت نن د مصنوعي تنفس ۱۰۰ وسیلې یا وینټلاټورونه دې وزارت ته وسپارل.

په افغانستان او ډېرو نورو هېوادونو کې د مصنوعي تنفس وسیلو ته وروسته له هغه اړتیا زیاته شوه چې د 'کووېډ-۱۹' د ناروغانو شمېر زیات شو.

په کابل کې د امریکا سرپرست سفیر او شارژدافیر راس وېلسن په یوه وېډیويي پیغام کې د دې مرستې په اړه خبرې کړي.

ښاغلي وېلسن زیاته کړه: "موږ دا وینټلاټورونه په افغانستان کې د طبي وسایلو جدي اړتیا ته په ځواب کې چمتو کړي دي. دا د کرونا د وبا پر وړاندې د امریکا د حکومت د اقداماتو یوه برخه ده."

د افغانستان د روغتیا وزارت په یو بیان کې وايي چې د روغتیا وزیر احمد جواد عثماني د امریکا دا مرسته د کرونا د ناروغانو د علاج لپاره خورا مهمه وبلله.

ښاغلي عثماني ویلي دي چې امریکا د افغانستان یو شمېر روغتيايي کارکوونکو ته هم، د مصنوعي تنفس د وسیلو د زده‌کړې روزنه ورکوي.

'د ټرمپ او بایډن مناظرې د نور نظم او اضافي تدابیرو اړتیا په ډاګه کړه'

د ډونالد ټرمپ او جوبایډن مناظره

د امریکا د ولسمشرۍ د انتخاباتو د کاندیدانو ترمنځ د مناظرې تنظیموونکي وايي سږنۍ بې‌نظمه ټلوېزیوني مناظره د هغو مسایلو په اړه په بحثونو کې چې رأی ورکوونکي باید پرې پوه شي د نور نظم او اضافي تدابیرو اړتیا په ډاګه کړه.

د ولسمشرۍ په انتخاباتو کې د ډیموکرات ګوند کاندید جوبایډن او ولسمشر ډونالد ټرمپ پرون چهارشنبه په ۹۱ دقیقې بې‌نظمه ټلوېزیوني مناظره کې سره مخامخ شول چې په ترڅ کې یې پر یو بل لفظي حملې وکړې، سپکې سپورې یې وویلې او د یو بل خبرې یې اخلال کړې.

د ولسمشرۍ د مناظرې کمېسیون پرون د سپټمبر په ۳۰مه په یوه بیان کې وویل چې په راتلونکو دوو مناظرو کې د ښه نظم د راوستو لپاره به ډېر ژر یو لړ اضافي تدابیر اعلان کړي.

داسې وړاندیزونه هم شته چې د مناظرې کوربه باید دا صلاحیت ولري چې د یوه کاندید مایکروفون بند کړي.

د اروپايي ټولنې مشران د بلاروس او ختیځې مدیترانې پر ستونزو بحث کوي

ارشیف، د اروپايي ټولنې مشران

د اروپايي ټولنې مشران په بروکسل کې راټول شوي څو د بلاروس د کړکېچ او د ختیځې مدیترانې په ګډون د ځینو کورنیو ستونزو په اړه بحث وکړي.

دې لانجو د اروپايي ټولنې په غړو هېوادونو کې د کرونا وبا پر ضد د مبارزې او په ختیځه مدیترانه کې د انرژۍ د زېرمو پر سر له ترکیې سره د اروپايي ټولنې د غړو یونان او قبرس د شخړې د حل هڅې له خنډ سره مخامخ کړې دي.

د دې دوه ورځنۍ سرمشریزې د لومړۍ شپې خبرې به د مدیترانې سمندرګي په ختیځ کې له ترکیې سره د یونان او قبرس پر لانجې متمرکزې وي.

ترکیې په جولای میاشت کې دې سیمې ته د پلټنو لپاره خپلې کښتۍ واستولې چې پوځي کښتیو بدرګه کولې. یونان هم د ځوابي اقدام په توګه د فرانسې په مرسته سیمې ته خپل سمندري ځواکونه واستول.

د اروپايي ټولنې غړي باید قبرس ته هم قناعت ورکړي چې وايي که پر ترکیې بندیزونه ونه‌لګول شي، نو په بلاروس کې د سیاسي بحران له کبله د بندیزونو طرحه به رد کړي.

د اوکراین لوهانسک ځنګلونو کې درنې اور لګېدنې ۵ کسان ووژل

د اوکراین لوهانسک ځنګلونو کې لګېدلی اور

اوکرایني چارواکي د اوکراین د ختیځې سیمې لوهانسک په ځنګلونو کې د درانه اور د لګېدو له کبله د لږترلږه ۵ کسانو د مړینې خبر ورکوي.

د اوکراین د بېړنیو خدماتو دولتي ادارې نن په یوه بیان کې همداراز وویل چې د سیمې د درېیو ولسوالیو په ځنګلونو کې د اور لګېدو په پېښه کې ۱۰ نور کسان هم ټپیان شوي او ۱۲۰ تنه نور له سیمې ایستل شوي دي.

چارواکي وايي چې د اور وژنې لپاره د اطفائیې زر تنه پرسونل سیمې ته استول شوي. د ولسمشر ولادیمیر زلنسکي د قانون د تنفیذ له ځواکونو غوښتي چې د اور لګېدو علت معلوم کړي.

شاهین قول اردو: سرپل کې د طالبانو یو سرګروپ ونیول شو

ارشیف، سرپل کې د افغان ځواکونو عملیات

په شمال کې شاهین قول اردو، په سرپل ولایت کې د طالبانو د یوه سرګروپ د نیولو خبر ورکوي.

د ۲۰۹ شاهین قول اردو مطبوعاتي څانګه په یوه بیان کې وايي چې د نعیم په نوم د طالبانو دا سرګروپ له خپلو دوو وسله‌والو سره په صیاد ولسوالۍ کې له افغان امنیتي-دفاعي ځواکونو سره د نښتې پر مهال نیول شوی.

په بیان کې راغلي دي چې له دې کسانو څخه وسلې او چاودېدونکي مواد هم ترلاسه شوي دي.

هلمند کې موټر بم چاودنې ۱۱ تنه ووژل

ارشیف

د هلمند امنیتي چارواکي په نهر سراج ولسوالۍ کې په یوه موټربم چاودنه کې د لږترلږه ۱۱ کسانو د وژل کېدو خبر ورکوي.

د هلمند د والي ویاند عمر ځواک وايي، چاودنه تېر ماښام د یوې امنیتي پوستې مخې ته وشوه او قربانیان‌یې څلور ملکي وګړي او اووه سرتېري دي. د دې برید مسؤلیت تر اوسه هېڅ یوې ډلې نه‌دی منلی.

په افغانستان کې د ملګرو ملتونو مرستندوی دفتر یوناما ویلي دي چې د روان ۲۰۲۰ کال په لومړۍ نیمايي کې د افغانستان په جګړو کې له ۱،۲۸۰ زیات ملکي وګړي وژل شوي دي.

هلمند کې پر کروندګرو ۱،۲۰۰ مټریک ټنه اصلاح شوي غنم وېشل کېږي

ارشیف

د افغانستان کرنې، اوبو لګونې او مالدارۍ وزارت وایي، سږ کال به د هلمند ولایت کروندګرو باندې ۱،۲۰۰ مټریک ټنه اصلاح شوي غنم ووېشل شي.

د دې وزارت ویاند اکبر رستمي ازادي راډیو ته ویلي، روان کال ټول هېواد کې ۵.۱ میلیون ټنه غنم کرل شوي چې ډېری یې تخار، هلمند، کندهار ،نیمروز کې کرل شوي دي.

د ښاغلي رستمي په وینا، په پام کې ده چې د کرنې، اوبو لګونې او مالدارۍ وزارت به روان کال ټول هېواد کې ۱۴،۰۰۰ ټنه اصلاح شوي تخمونه په ۶۰۰ کرونګرو ووېشي.

د کرنې، اوبو لګونې او مالدارۍ وزارت د معلوماتو له مخې، روان کال په کروندګرو د اصلاح شویو تخمونو وېشل به د غنمو د حاصلاتو بهیر چټک کړي.

عبدالله: افغان دولت او طالبان پر اختلافي مسایلو روغې جوړې ته نږدې شوي

عبدالله عبدالله

د افغانستان د ملي مصالحې عالي شورا مشر عبدالله عبدالله وایي چې د افغان دولت او طالبانو مرکچیان پر یو لړ هغو اختلافي مسایلو روغې جوړې ته نږدې شوي چې په قطر کې یې د دواړو لورو ترمنځ د سولې خبرې ټکنۍ کړې دي.

دواړو لورو چې د تېرې سپټمبر میاشتې له ۱۲مې راهیسې په دوحه کې خبرې پیل کړي تر اوسه‌یې د خبرو د دوام لپاره کړنلاره نه‌ده نهایي کړې.

یو د اختلافي ټکو پر حنفي مذهب د طالبانو ټینګار دی، خو د افغان دولت مرکچیانو د جعفري مذهب چې د افغانستان په اساسي قانون کې یې د پیروانو حقونه خوندي شوي، مسئله رامخې ته کړې ده.

ښاغلي عبدالله پرون په اسلام‌اباد کې له فرانسپرس خبري اژانس سره په مرکه کې وویل چې دغه اختلافي مسئله تر ډېره هواره شوې ده.

ښاغلي عبدالله زیاته کړه چې دواړو لورو د اوس لپاره د حنفي اصول چې شیعه‌ګانو او نورو اقلیتونو سره به هېڅ ډول توپیري چلند نه‌کېږي، په رسمیت پېژندلی.

طالبان دغه‌راز غواړي چې د سولې په یوې احمتالي موافقه کې د افغان دولت له نوم څخه ډډه وشي او پر ځای یې هغه یو ډول د افغانانو ترمنځ موافقه ونومول شي.

ښاغلي عبدالله وویل، داسې ښکاري چې په دې برخه کې هم پرمختګ شوی، خو نوموړي نور جزئیات ورنه‌کړل.

د امریکا دوه ستر هوایي شرکتونه له ۳۲ زرو زیات کارکوونکي له کاره رخصتوي

د امریکا بیرغ

د امریکا دوه ستر هوایي شرکتونو امیریکن او یونایټډ په پام کې لري چې سر له ننه له ۳۲ زرو زیات کارکوونکي له کاره رخصت کړي.

له دغو دواړو شرکتونو چې له کانګرسه‌یې د میلیاردونو ډالرو مرسته ترلاسه کړې، غوښتل شوي و چې د سپټمبر د میاشتې تر پایه څوک له کاره ونه‌باسي. که له دوی سره بیا مرسته ونه‌شي ښایي ګڼ کسان له کاره وباسي.

دواړو هوایي شرکتونو ویلي چې د دې کار مخه نیول کېدای شي که د ټرمپ اداره او کانګرس د کارونو د خوندیتوب د ملاتړ لپاره د شپږو نورو میاشتو په مخه پر نورو ۲۵ میلیارده ډالرو مرستې موافقه وکړي.

که څه هم دواړه ګوندونه د هوایي شرکتونو ملاتړ کوي، خو تمه ده چې دغه مرسته به د مرستو په یوه لویه بسته کې شامله وي.

د استازو جرګې مشرې نانسي پلوسي او د خزانې وزیر سټیفن منوچین پرون له څه باندې یوه میاشت وروسته د لومړي ځل لپاره سره مخامخ ولیدل ترڅو یوه حل لاره ومومي.

د کانګرس غړي تر فشار لاندې دي چې د نومبر په درېیمه تر انتخاباتو مخکې باید د ځپل شوي اقتصاد د رغولو لپاره پر مرستې موافقه وکړي.

د هرات-کندهار پر لویه لاره یوې ترافیکي پېښې ۱۰ تنه وژلي

د کندهار نقشه

د هرات-کندهار پر لویه لاره په یوه ترافیکي پېښه کې ۱۰ تنو خپل ژوند له لاس ورکړ.

د هرات د والي ویاند جیلاني فرهاد ازادي راډیو ته وویل، دا پېښه نن سهار په ادرسکن ولسوالۍ کې هغه مهال رامنځته شوه چې یوه ۳۰۳ بس له یوه فلاینګ‌کوچ ډوله موټر سره ټکر وکړ.

هغه زیاته کړه: "په وژل شویو کې پنځه سړي، دوه ماشومان او درې ښځې دي. ټول ټپیان هم ملکي وګړي دي."

د ښاغلي فرهاد په خبره په دې پېښه کې اته تنه ټپیان شوي چې د درملنې لپاره روغتیایي مرکزونو ته انتقال شوي دي.

د هرات-کندهار یوه له هغو لویو لارو څخه ده چې ډېرې ترافیکي پېښې په‌کې کېږي.

پوتین او مکرون د اذربایجان او ارمنستان د جګړې د بندېدو غوښتنه وکړه

د روسیې ولسمشر ولادیمیر پوتین او د فرانسې ولسمشر امانوئل مکرون

د روسیې ولسمشر ولادیمیر پوتین او د فرانسې ولسمشر امانوئل مکرون د نګورنو قره‌باغ شااوخوا د اذربایجان او ارمني ټبره ځواکونو ترمنځ د جګړې د بندېدو غوښتنه وکړه.

کرملېن نن وویل چې دواړو مشرانو د ټیلیفون له لارې د نګورنو قره‌باغ د لانجمنې سیمې پر سر د شخړو د ډیپلوماتیک هواري پر لارو چارو خبرې وکړې.

دا په څو کلونو کې تر ټولو سختې نښتې دي چې د دې سیمې پر سر له څلورو ورځو راهیسې پیل شوي دي.

دواړو مشرانو ویلي، چمتو دي چې د دغو جګړو د بندولو او د اروپا د امنیت او همکارۍ د سازمان له‌خوا د مېنسک په نوم ډلې چې مشري یې په ګډه روسیه، فرانسه او متحده ایالات کوي، له‌خوا د خبرو د بېرته پیلولو په ملاتړ اعلامیه خپره کړي.

د اذربایجان او ارمني ټبره ځواکونو ویلي چې جګړو ته به دوام ورکړي چې دا د یوې احتمالي بشپړې جګړې د پېښېدو او سیمې د کړکېچ د پراخېدو په اړه اندېښنې زیاتوي.

دواړو لورو له راز راز وسلو څخه پر یو بل بریدونه کوي.

عراق کې پر امریکایي پوځیانو توغندي ویشتل شوي

ارشیف

په عراق کې هغه وسله‌وال چې ایران‌یې ملاتړ کوي د کردستان په اربیل ښار کې پر امریکایي پوځیانو توغندي ویشتي دي.

دا خبره د عراق د کردستان په نیمه خپلواکه سیمه کې د ترورېزم ضد ادارې وکړه.

دې ادارې په خپله خبرپاڼه کې چې پرون‌یې خپره کړه ویلي دي چې په نینوا ولایت کې د شېخ امیر د کلي له لوري شپږ توغندي د اربیل پر هوایي ډګر توغول شوي دي.

په دې ځای کې امریکایي ځواکونه دېره دي.

د دغو توغندیو څلور د هوایي ډګر په غولي کې چاودېدلي دي او دوه‌یې نه‌دي منفجر شوي.

شېخ نواف ال احمد الصباح د کوېټ د نوي امیر په توګه لوړه وکړه

د کوېټ نوي امیر شېخ نواف ال احمد الصباح

شېخ نواف ال احمد الصباح د کوېټ د نوي امیر په توګه لوړه وکړه.

دی د کوېټ د متوفی امیر میرنی ورور دی چې څو کاله‌یې د کوېټ د امنیتي چارو په برخه کې کار کړی دی.

د کوېټ مخکېنی امیر صباح احمد الصباح درې ورځې مخکې د ۹۱ کلونو په عمر وفات شو.

داسې اټکل نه‌کېږي چې د کوېټ نوی ۸۳ کلن امیر به د خپل ورور ډیپلوماتیک مسیر په بله روان کړي.

نوی ولیعهد لا نه‌دی ټاکل شوی.

نور راوښيه

XS
SM
MD
LG