د لاسرسۍ وړ لېنکونه

تازه خبر
سه شنبه ۶ لړم ۱۳۹۹ کابل ۱۱:۳۴

خبرونه

هلمند کې د جوارو سږني حاصلات زرګونه ټنو ته رسېږي

ارشیف

د هلمند د جوارو سږنۍ حاصلات نږدې ۱۹۰ زره ټنو ته رسېږي چې نورو ولایتونو ته به هم صادر شي.

د هلمند د کرنې، اوبو لګولو او مالدارۍ رئیس زلمي الکو نن ازادي راډيو ته وویل چې سږ کال د دې ولایت په ۳۷ زره او ۲۳۵ هکټاره ځمکه کې جوار کرل شوي چې له دغو کروندو څخه به ۱۸۹زره او ۸۹۸ ټنه جوار تر لاسه شي.

د هلمند د کرنې، اوبو لګولو او مالدارۍ رئیس زلمی الکو وایي، د هلمند اقلیم د جوارو کرکېلي لپاره مناسب اقلیم دی او په دې ولایت کې د جوارو بېلابېل ډولونه کرل کېږي او د پلور لپاره نورو ولایتونو ته صادریږي.

د هلمند د کرنې رئیس زلمی الکو وویل، دوی هڅه کوي، چې هلمند کې د جوارو د پروسس لپاره د خصوصي سکټور په برخه کې زمینه برابره کړي چې د دې ولایت جوارو لپاره د بازار موندنې ترڅنګ د غوړیو تولید برخه کې اسانتیاوې رامنځته شي.

هلمند د هغو ولایتونو په ډله کې ده، چې د بېلابېلو کرنیزو توکو د کرکېلي لپاره مناسبه هوا لري.

د ورځې تازه خبرونه دلته ولولئ

د روغتیا نړیوال سازمان مشر د کرونا د دوامداره کېدو خبرداری ورکړ

د «WHO» مشر تدروس ادهانوم ګبریاسوس

په داسې حال کې چې په ټوله نړۍ کې د کرونا د مثبتو پېښو موارد په زیاتېدو دي، د روغتیا نړیوال سازمان مشر د دې وبا د دوامداره کېدو په اړه خبرداری ورکړی.

د «WHO» مشر تدروس ادهانوم ګبریاسوس پرون د اکټوبر په ۲۶مه، په ژنیو کې خبریالانو ته وویل چې د ځمکې د شمالي نیم کرې په ډېرو هېوادونو کې د 'کووېډ-۱۹' ناروغۍ له کبله په روغتونونو کې د خلکو د بستر کېدو پېښې زیاتې شوې دي.

هغه زیاته کړه چې د جدي مراقبت څانګې، په تېره د اروپا او شمالي امریکا په ګډون په ځینو ځایونو کې نوي ناروغان نه‌شي منلی ځکه ځای نه ورته لري.

د جانز هاپکنز پوهنتون د شمېرو له مخې له ۴۳ میلیونو زیات انسانان په ټوله نړۍ کې په دې ناروغۍ اخته شوي او له ۱۱ لکو زیات کسان مړه شوي دي.

مسافر: د کندهار-ارزګان پر لار د خښ شویو ماینونو له امله سفر نه‌شو کولای

د کندهار-ارزګان لويه لار

د کندهار-ارزګان د لويې لارې مسافر او موټر چلوونکي وايي پر عمومي لارو د خښ شویو ماینونو او جګړو له امله په ډاډه زړه سفر نه‌شي کولای او مجبور دي چې پر فرعي لارو تګ راتګ وکړي.

د دوی په وینا دا ستونزه د دې لامل شوې چې د سفر وخت‌يې له یوې ورځې دوو او درېیو ورځو ته اوږد شي او د لارې کرایه هم لوړه شي.

امین‌الله او د هغه لسګونه نور ملګري چې د کندهار-ارزګان پر لویه لار موټر چلوي وايي عمومي لارې د جګړې او ماینونو له امله ډېر وخت تړلې وي او دوی مجبور دي چې پر اوږدو فرعي لارو تګ راتګ وکړي.

په عین وخت کې د ارزګان اوسېدونکی محمد زمان وايي د عمومي لارو د تړل کېدو سره سم د موټرو د لارو کرایه او ارزګان ولایت کې د خوراکي توکو بیې هم لوړې شوي.

د کندهار والي حیات‌الله حیات وايي وسله‌والو طالبانو په تېرو څو میاشتو کې د کندهار-ارزګان د لويې لارې ډېرې برخې تخریب کړي چې رغول‌یې وخت ته اړتیا لري.

د نوموړي په وینا د دغه لارې د شاهراه کنډک د امنیتي ځواکونو د تشکیل کموالی بله هغه ستونزه ده چې له امله‌یې لار ناامنه وي.

امریکا پر ایران نوي بندیزونه ولګول

د امریکا بیرغ

متحده ایالاتو پر ایران نوي بندیزونه لګولي دي او دا ځل‌یې د دې هېواد د تېلو په سکټور کې فعال شرکتونه، مؤسسې او افراد په نښه کړي.

په نویو بندیزونو کې د ایران د پټرولیم وزارت، د ایران د تېلو ملي کمپنۍ او د ایران د ټانکرونو ملي شرکت شامل دي.

د امریکا د خزانې وزارت پرون د اکټوبر په ۲۶مه نېټه په یوه بیان کې وویل، هغوی چې بندیزونه پرې لګېدلي، د ایران د سپاه پاسداران اړوند قدس ځواک ملاتړ کوي. په بیان کې د خزانې د وزیر ستیفن منوچین له قوله ویل شوي دي چې د ایران رژیم د قدس ځواک د ورانکارو فعالیتونو د تمویل لپاره د تېلو له سکټور څخه کار اخلي.

بیان زیاتوي چې د ایران حکومت د خپلو خلکو د ملاتړ پر ځای د ترورېستي ډلو او د خپل اټمي پروګرام ملاتړ ته لومړیتوب ورکوي.

د امریکا سنا امي کوني باریټ د سترې محکمې غړیتوب لپاره تأیید کړه

 امي کوني باریټ

د امریکا سنا د سترې محکمې د غړیتوب لپاره د امي کوني باریټ نوماندي تأیید کړه.

له دې سره د سترې محکمې انډول ۳-۶ د محافظه‌کارانو په ګټه بدل شو چې دا د ولسمشر ډونالد ټرمپ لپاره یوه سیاسي بریا ګڼل کېږي.

د امریکا د مشرانو جرګې چې اکثریت په‌کې جمهوري‌پال دي، پرون د اکټوبر په ۲۶مه، د ۴۸ مخالفو رایو پر وړاندې په ۵۲ موافقو رایو ۴۸ کلنې باریټ ته رایې ورکړې.

د سترې محکمې څوکۍ تېره میاشت وروسته له هغه تشه شوه چې په امریکا کې د عدالت مخکښه لبرال څېره روت بادېر ګینسبورګ مړه شوه.

ډیموکراتانو په سنا کې د باریټ لپاره د رأی اخیستو سره مخالفت کړی و او ویلي یې و، د نوماندې د معرفي کولو او هغې ته د رأی ورکولو بهیر دې د ولسمشرۍ له انتخاباتو وروسته چې د نومبر په درېیمه نېټه کېږي، ترسره شي.

د کارګرانو، محصلانو او متقاعدانو مظاهرې؛ لوکاشینکا دې استعفا وکړي

بلاروس کې مظاهره‌چیان

کارګران، محصلان او متقاعدان پرون دوشنبه د بلاروس د پلازمېنې مېنسک لارو سړکونو ته راووتل او له الکساندر لوکاشینکا یې د استعفا غوښتنه وکړه.

دوی شعار ورکاوه چې لوکاشینکا له واکه د لیرې کېدو لپاره د اکټوبر میاشتې د ۲۵مې نېټې ټاکل شوي مهلت ته پام نه‌دی کړی.

اعتراض کوونکو وویل، لوکاشینکا نه‌یوازې له واکه لیرې نه‌شو، بلکې پر اعتراض کوونکو یې د امنیتي تدابیرو په سختولو سره فشارونه لا زیات کړي دي.

راپورونه وايي پولیسو پرون په مېنسک کې د لسګونه زره اعتراض کوونکو په وړاندې رابړي مرمۍ وکارولې او په سلګونه کسان ونیول شول.

په بلاروس کې د اګسټ میاشتې د نهمې د ولسمشرۍ تر ټاکنو وروسته د لوکاشینکا پر ضد پراخ ولسي اعتراضونه روان دي.

الکساندر لوکاشینکا ځان د دغو ټاکنو ګټونکی بولي، خو اعتراض کوونکي وايي په دغو ټاکنو کې په پراخه پیمانه درغلۍ او سرغړونې شوې دي.

پکتیا کې ځیني محلي پولیس له روزنې وروسته ملي پولیسو کې ادغام شول

ارشیف، بدخشان کې محلي پولیس

د پکتیا محلي چارواکي وايي په ملي پولیسو کې د محلي پولیسو د ادغام پروسه په چټکۍ روانه ده.

پرون هم نږدې ۴۰ تنه محلي پولیس تر روزل کېدو وروسته په ملي پولیسو کې مدغم شول.

د پکتیا د والي ویاند عبدالرحمن منګل پرون ناوخته ازادي راډیو ته وویل: "د پکتیا ولايت په احمدخېلو ولسوالۍ کې ځیني سیمه‌ییز پولیس تر یو میاشتنۍ روزنې وروسته د ملي پولیسو په لیکو کې مدغم شول. دغه پولیس به د یادې ولسوالۍ د امن تأمینولو په برخو کې په دنده وګمارل شي."

د کورنیو چارو سرپرست وزیر مسعود اندرابي درې اوونۍ مخکې ویلي وو چې تر درېیو میاشتو پورې به په افغانستان کې د محلي پولیسو ۲۴ زره کسیز تشکیل ختم شي.

د محلي پولیسو پر تشکیل او د فعالیتونو پر څرنګوالي له تېرو ۱۰ کلونو راهیسې انتقادونه شوي دي.

لاوروف: د نړیوالو مسایلو حل کې به له ترکیې سره همکارۍ ته دوام ورکړو

د روسیې د بهرنیو چارو وزیر سرګي لاوروف

د روسیې د بهرنیو چارو وزیر وايي هېواد به‌یې د نړیوالو مسایلو په حل کې له ترکیې سره خپلې همکارۍ ته دوام ورکړي.

سرګي لاوروف پرون په اتن کې له خپل یوناني سیال نیکوس دنیا سره تر کتنې وروسته وویل: "که څه هم په ځینو قضیو کې زموږ کړنلار سر نه سره خوري، خو موږ کولای شو له انقرې سره ځیني ګډ ټکي پیدا کړو."

سرګي لاوروف زیاته کړه، روسیه که څه هم له ترکیې سره ښې اړیکې لري، خو له ستونزو تشې نه‌دي.

د روسیې د بهرنیو چارو وزیر وویل، د هېوادونو ترمنځ هر ډول ولاړې شوې ستونزې باید د ډیالوګ له لارې حل شي او د یونان او ترکیې ترمنځ هم ښايي ځیني ستونزمن مسایل وي.

د یونان او ترکیې ترمنځ وروسته له هغې کړکېچ راغی چې انقرې پرېکړه وکړه، لانجمنو اوبو ته خپلې تحقیقاتي کښتۍ ولېږي.

دې مسئلې د سمندري حدودو او د تطبیقاتو د حقونو پر سر د ناټو د دغو دوو غړو هېوادونو ترمنځ کړکېچ رامنځته کړ.

دفاع وزارت: د کندهار-هلمند لویه لار له طالبانو تصفیه شوه

افغان ځواکونه

د افغانستان دفاع وزارت له طالبانو، د کندهار-هلمند د لویې لارې د تصفیې خبر ورکړ.

د دغه وزارت مرستیال ویاند فواد امان تېر ماښام ازادي راډیو ته وویل، اوس خلک کولای شي په ډاډه زړه پر دې لار تګ راتګ وکړي.

هغه زیاته کړه: "د افغانستان امنیتي او دفاعي ځواکونو د خلکو د ساتنې د مسؤلیت په چوکاټ کې د کندهار-هلمند پر لار پوځي عملیات وکړل او دغه لار یې په بشپړ ډول تصفیه کړه. د دې لارې په اوږدو کې په لسګونه ماینونه کشف او شنډ کړای شول."

وسله‌والو طالبانو د دغو عملیاتو په اړه څه نه‌دي ویلي.

پر هلمند د وسله‌والو طالبانو له تازه ډله‌ییزې حملې وروسته د کندهار-هلمند د لویې لارې ځینې برخې ناامنه شوې وې.

د پاکستان سوداګرۍ وزارت یو تخنیکي هیئت له افغان سوداګرو سره ګوري

پاکستان ته د افغانستان د سوداګرۍ وزارت تللی پلاوی

په پام کې ده نن سې شنبه، د پاکستان د سوداګرۍ وزارت یو تخنیکي هیئت د افغانستان او پاکستان د سوداګرو د ستونزو پر حل خبرې وکړي.

د افغانستان د سوداګرۍ او صنایع خونې مرستیال خانجان الکوزی چې دا مهال په اسلام‌اباد کې دی، ازادي راډیو ته پرون وویل: "اوس د پاکستان د صدراعظم صاحب له هدایت سره سم‌یې خپل اقتصادي سلاکار ته هدایت ورکړ چې د سې شنبې د سهار پر ۱۰ بجو به یوه تخنیکي ډله د پاکستان په سوداګرۍ وزارت کې سره وګوري، د اوس وخت لپاره به په کراچۍ او نورو بندرونو کې د راغلې ستونزې په اړه بحث کوي."

پاکستان ته د ولسي جرګې د یوه هیئت تر سفر وروسته موافقه وشوه چې د سوداګرۍ او صنایعو خونو یو هیئت په تجارتي برخه کې د پرتو ستونزو پر حل د خبرو لپاره پاکستان ته لاړ شي.

روغتیا سازمان: افغانستان کې به نږدې ۱۰ میلیونه ماشومان پولیو واکسین شي

ارشیف

په افغانستان کې د روغتیا نړیوال سازمان وايي، په پام کې ده نږدې ۱۰ میلیونه ماشومان چې عمرونه‌یې تر ۵ کلونو کم دي د ګوزڼ یا پولیو پر ضد واکسین شي.

دغه سازمان پرون ناوخته په ټویټر کې لیکلي چې د پولیو یا ګوزڼ ضد واکسین لومړی کمپاین د کرونا ویروس یا 'کووېډ-۱۹' ناروغۍ له کبله ځنډېدلی و.

په افغانستان کې د ګوزڼ له‌منځه وړلو ملي پروګرام د عامه پوهاوي مسؤل میر جان راسخ ازادي راډیو ته ویلي چې په افغانستان کې د روان میلادي کال له پیله د ګوزڼ ۵۳ مثبتې پېښې ثبت شوې دي.

د روغتیا نړیوال سازمان وايي اوس ۹ میلیونه او ۹ لکه ماشومان په تازه کمپاین کې واکسین کوي او له ټولو اړخونو یې غوښتنه کړې چې د کمپاین په عملي کولو کې همکاري وکړي.

اشرف غني پر کوثر دانش ښوونیز مرکز د ترورېستي برید د څېړنې امر وکړ

ولسمشر اشرف غني

د افغانستان جمهوري ریاست په کابل کې پر "کوثر دانش" ښوونیز مرکز د وروستۍ بمي حملې د هر اړخیزې څېړنې امر وکړ.

د کابل په ۱۳مه حوزه کې پر دغه مرکز د شنبې په ورځ په ځانمرګي برید کې ۲۴ کسان ووژل شول او نږدې ۶۰ تنه نور ټپیان شول.

د جمهوري ریاست مرستیال ویاند دوا خان مینه‌پال ازادي راډیو ته وویل، د ولسمشر محمد اشرف غني په مشرۍ پرون ناوخته په هغه غونډه کې د دې حملې د څېړنې سپارښتنه وشوه چې د امنیتي ادارو مشران او د قربانیانو د کورنۍ غړي په‌کې حاضر وو.

هغه زیاته کړه: "ولسمشر اړوندو ارګانونو ته لارښوونه وکړه چې پر کوثر روزنیز مرکز ترورېستي برید په هر اړخیزه توګه وارزوي او د دغه ترورېستي برید شبکې او عاملان دې وپېژندل شي او له‌منځه دې یووړل شي، همدارنګه دې د دشت برچي سیمې د امن د ټینګښت په اړه لا زیات کار وشي."

پر کوثر دانش د وروستۍ حملې مسؤلیت د داعش ډلې منلی دی.

په خوست کې چاودنه شوې

ارشیف

په خوست ښار کې نن مازیګر یوه چاودنه شوې ده.

د امنیه قومندانۍ ویاند عادل حیدر ازادي راډیو ته وویل چې چاودېدونکي مواد په یوه موټرسایکل کې ځای پر ځای شوي و او څلور کسان یې ټپیان کړي دي.

چاودنه په خوست ښار کې د بې پولې ډاکترانو زیږنتون ته څېرمه شوې.

چا د دې بمي چاودنې مسوولیت په غاړه نه دی اخیستی.

چارواکي: د هرات ښاروال او ۷ همکاران یې د بډې اخیستلو په تور نیول شوي

ارشیف

د هرات ښاروال غلام حضرت مشفق او د هغه ۷ همکاران د اداري فساد او بډې اخیستلو په تور ونیول شول.

د کورنیو چارو وزارت ویاند طارق آرین نن د دغو کسانو د نیولو خبره اعلان کړه.

د هرات ولایت یوه سیمه ییز چارواکي د نوم د نه ښودلو په شرط ازادي راډیو ته وویل چې مشفق او د هغه ملګري باالفعل د کورنیو چارو وزارت د درنو جرمونو د پلاوي له خوا ونیول شول.

تر دې دمخه د هرات په ښاروالۍ کې د فساد راپورونه ورکړل شوي وو.

ښاغلي مشفق ته نږدې کسانو تر دې دمه په دې اړه څه نه دي ویلي.

پرون بیا د افغانستان د لویې څارنوالۍ ویاند جمشید رسولي ازادي راډیو ته وویل چې د درنو جرمونو څارنوالي د هرات د والي، د ولایتي شورا د دریو غړیو او د روغتیا د رییس په شمول د ۲۱ چارواکو دوسیې چې د کرونا ویروس د بودیجې په برخه کې په فساد تورن دي تکمیل او محکمې ته سپارلي دي.

عمران خان: هند به د افغانستان خاوره د پاکستان پر ضد وکاروي

د پاکستان صدراعظم عمران خان

د پاکستان صدراعظم عمران خان ویلي هېواد یې اندېښمن دی چې هندوستان به د افغانستان له خاورې د پاکستان د بې ثباته کولو لپاره کار واخلي.

هغه دا خبرې نن په اسلام اباد کې د افغانستان او پاکستان د پانګونې او سوداګرۍ د فوروم (مجمع) په پرانیست غونډه کې وکړې.

هغه زیاته کړه: "په پاکستان کې یوه اندېښنه شته چې هندوستان به په زموږ په هېواد کې د ګډوډۍ د رامنځته کولو او د بې ثباتۍ لپاره افغانستان وکاروي، خو موږ دلته پرېکړه کړې څه چې د افغانستان خلک غواړي موږ یې ملاتړ کوو، ښې اړیکې ورسره جوړوو، ځکه د دې سیمې راتلونکې د افغانستان او پاکستان په اړیکو، همکارۍ او سوداګریو تړلې ده."

عمران خان او پاکستاني چارواکو مخکې له دې هم داسې ادعاوې کړي چې هندوستان د افغانستان له خاورې د پاکستان د بې ثباتۍ لپاره هڅې کوي.

افغان چارواکو او یا د هندوستان حکومت تازه د عمران خان د څرګندونو په تړاو څه نه دي ویلي خو پخوا افغان چارواکو ویلي و چې هیڅوک د افغانستان خاوره د بل چا پر ضد نه کاروي او نه دوی اجازه ورکوي.

د ای پي ایل سیالیو دوام؛ نن کلکته او پنجاب لوبه کوي

ای پي ال سیالیو کې د پنجاب لوبډلې د لوبغاړی راهول یو انځور

د هند د ای پي ایل سیالیو په دوام نن شپه شپږ نیمې بجې د کلکتې نایټ رایډرز او کینګز ایلیون پنجاب ترمنځ لوبه کېږي.

د تېرې شپې په لوبه کې بیا چنای سوپر کېنګز رایل چلنجرز بنګلور لوبډلې ته په ۸ ویکټو ماتې ورکړه.

چنای سوپر کېنګز د ۶ لوبغاړو په له لاسه ورکولو ۱۴۶ منډې وکړې او مقابله لوبډله بیا د ۲ لوبغاړو په سوځېدو په ۱۹ اور کې ۱۵۰ منډې وکړې.

همدارنګه ممبيي انډينز د پنځو لوبغاړو په سوځېدو ۱۹۶ منډې وکړې او راجستان رایلز بیا ټاکلی هدف د دوو لوبغاړو په سوځېدو په ۱۹ اور کې پوره کړ.

د لومړي پړاو لوبې به د نوومبر تر درېیمې دوام وکړي.

نور راوښيه

XS
SM
MD
LG