د لاسرسۍ وړ لېنکونه

تازه خبر
سه شنبه ۱ تله ۱۳۹۹ کابل ۱۰:۱۸

خبرونه

د افغانستان او ایران ترمنځ سوداګریزې ستونزې حلېږي

تهران کې د افغان او ایراني چارواکو د غونډې انځور

د افغانستان او ایران ترمنځ د سوداګریزو او ټرانسپورتي ستونزو د هواري په هدف غونډه وشوه.

د افغانستان د سوداګرۍ وزارت ویاند جواد دبیر نن ازادي راډيو ته وویل، په هغه دوه ورځنۍ ناسته کې چې تېره ورځ په تهران کې جوړه شوې وه د ایران له لارې نورو هېوادونو ته د افغاني توکو د صاداراتو په برخه کې د ستونزو په هواري خبرې وشوې.

هغه زیاته کړه: "دا مهال د افغانستان کالي د ایران له لارې نورو هېوادونو ته صادرېږي خو دا چې د ټرانسپورت او ټرانزیټ په برخه کې افغان سوداګر کومې ستونزې لري د دغو ستونزو د هواري په اړه په دغه غونډه کې خبرې شوې دي."

د نوموړي په خبره، په دغه غونډه کې د دواړو هېوادونو تر منځ هم د سوداګریزو اړیکو په پراختیا خبرې شوې دي.

د شمېرو له مخې دا مهال په کلني ډول له ایران سره د افغانستان سوداګري تر یو میلیارد ډالرو اوړي.

د دغه وزارت په وینا، دا مهال افغانستان په کلني ډول یو میلیارد او دوه سوه میلیونه واردات او ۱۵ میلیونه صدارات لري.

د ورځې تازه خبرونه دلته ولولئ

تر یوې وسله‌والې نښتې وروسته د غور-کابل لویه لار وتړل شوه

د افغانستان په نقشه کې غور ولایت

د غور ولایت یو چارواکی وایي نن تر یوې وسله‌والې نښتې وروسته د غور-کابل لویه لار وتړل شوه.

د غور د دولتیار ولسوال، محمد موسی کلیم ازادي رادیو ته وویل، د امنیتي ځواکونو او طالبانو ترمنځ نښته نن سهار پیل شوه.

ځینو مسافرو هم د ازادي راډیو له خبریال سره په خبرو کې له حکومته د دې لارې د خلاصولو غوښتنه کړې ده.

طالبانو د دې نښتې او د لارې د تړل کېدو په اړه څه نه‌دي ویلي.

د چین ولسمشر یو منتقد په ۱۸ کاله بند محکوم شو

چین کې یوه محکمه

چین د ولسمشر شي جین پېنګ یو منتقد او د املاکو د معاملو مشهوره څېره په ۱۸ کاله بند محکوم کړ.

رین ژیکیان د پیکېنګ د یوې محکمې د حکم له مخې، په ۶۱۸ زره ډالرو مالي جریمه هم محکوم شوی دی.

هغه د محکمې له‌خوا په اداري فساد، رشوت اخیستو، درغلۍ او له قدرته په ناوړه استفادې تورن شوی دی.

د محکمې په ویناو ژیکیان دا لګېدلي تورونه منلي او پر خپل جرم‌یې اعتراف کړی دی.

ویل کېږي دغه ۶۹ کلن شتمن کس، د چین د کمونېست ګوند له غړو، له دې ډلې د ولسمشر له مرستیال وانګ کیشان سره نږدې اړیکې لرلې.

چک جمهوریت له افغانستان سره د دفاعي اړیکو د پراختیا ژمنه وکړه

شهزاد اریوبي او مارتین پوویسېل

د چک جمهوریت یوه ډیپلومات له افغانستان سره د خپل هېواد د دفاعي اړیکو د پراختیا ژمنه وکړه.

په پراګ کې د افغانستان سفارت په یوه اعلامیه کې وویل چې د چک د بهرنیو چارو وزارت یوه مرستیال مارتین پوویسېل دا ژمنه د چک جمهوریت لپاره د افغانستان له سفیر شهزاد اریوبي سره په کتنه کې وکړه.

په پراګ کې د افغانستان سفارت په یوه اعلامیه کې وویل چې ښاغلي پوویسېل د افغانستان د سولې لپاره پر پیل شویو هڅو خوښي وښووله.

د ایران په یوه زندان کې د حکومت ضد اعتراضونو یو فعال ومړ

نادر مختاري

یو ایرانی وګړی، چې په نومبر میاشت کې یې د حکومت ضد اعتراضونو کې برخه اخیستې وه، د تهران په یوه توقیف ځای کې مړ شو.

دا خبر د ایران د اپوزیسیون ویبپاڼې کلمه پرون ورکړی دی.

کلمه وايي، نادر مختاري چې ۳۵ کلن و، د شنبې په ورځ د کهرېزک په توقیف ځای کې ساه ورکړه.

تر اوسه ایراني چارواکو د دې پېښې په اړه څه نه دي ویلي.

د کلمه ویبپاڼې په وینا مختاري په کرج ښار کې د مظاهرو پر مهال تر نیول کېدو وروسته د امنیتي ځواکونو له خوا داسې ډبول شوی و، چې کوما حالت ته تللی و.

دی د مارچ میاشتې په وروستیو کې پرسد کېدو وروسته له انتقادونو سره- سره کهرېزک توقیف ځای ته ولېږدول شو.

اسټرالیا کې د لسګونه نهنګانو د ژغورنې هڅې پیل شوي

د پاتې نهنګانو د ژغورنې عملیات به احتمالاً څو ورځې وخت ونیسي.

په اسټرالیا کې نن ژغورونکي هڅه کوي، په لسګونو نهنګان چې د یوه ساحل په کم عمقه اوبو کې راګیر پاتې دي، وژغوري.

د ژغورنې دا اقدام وروسته له هغې کېږي، چې په تاسمانیا ټاپو کې په لسګونو ژوي مړه شول.

سمندري ژوندپوهان اټکل کوي، چې د ۲۷۰ نهنګونو له ډلې ۹۰ یې مړه شوي دي.

معلومه نه ده، چې دغو نهنګانو ولې ساحلي سیمو ته، چې د اوبو اندازه یې کمه ده، مخه کړې وه.

د پاتې نهنګانو د ژغورنې عملیات به احتمالاً څو ورځې وخت ونیسي.

د پیلوټ په نوم دغه نهنګان د سمندري ډولفینونو له ډلې دي، چې تر غټېدو وروسته یې اوږدوالی ۷ مټرو او وزن یې ۳ ټُنو ته رسېږي.

په ۲۰۰۹میلادي کال کې هم په ورته پېښه کې شا و خوا ۲۰۰ نهنګان په دغه ساحل کې راګیر پاتې وو.

بدخشان کې د ۳ ولسوالیو لپاره د طالبانو د پوځي کمېسیون مرستیال ووژل شو

بدخشان کې امنیتي ځواکونه

د بدخشان پولیس وايي، د درېیو ولسوالیو لپاره د طالبانو د پوځي کمېسیون مرستیال په یوه وسله‌واله نښته کې ووژل شو.

د بدخشان د امنیه قوماندانۍ ویاند وايي لومړی وسله‌والو طالبانو تېره شپه په راغستان ولسوالۍ کې د امنیتي ځواکونو پر پوستو حمله وکړه چې وروسته‌یې په وړاندې امنیتي ځواکونو جګړه پیل کړه.

د مرګ‌ژوبلې په اړه‌یې ثناالله روحاني وویل: "په دې نښته کې د راغ، کوهستان او یاوان ولسوالیو لپاره د طالبانو د پوځي کمېسیون مرستیال مولوي عطاالله چې په ابراهیم مشهور و، وژل شوی دی."

د بدخشان د امنیه قوماندانۍ ویاند وايي امنیتي ځواکونه په سیمه کې په فعال دفاعي حالت کې دي. وسله‌والو طالبانو د دې پېښې په اړه څه نه‌دي ویلي.

پولیس: کندهار کې ۸ وسله‌وال طالبان وژل شوي

افغان امنیتي ځواکونه

د کندهار پولیس وايي، په تخته پل ولسوالۍ کې د سرې قطعې د مرستیال په ګډون اته وسله‌وال طالبان وژل شوي دي.

د کندهار د امنیه قوماندانۍ ویاند جمال ناصر بارکزي ازادي راډیو ته وویل، لومړی وسله‌والو طالبانو غوښتل تېره شپه د امنیتي ځواکونو پر پوستو برید وکړي، خو د پولیسو پر کمین وربرابر شول.

هغه زیاته کړه: "دوی د پولیسو له‌خوا په شا تمبول شوي دي. ۸ وسله‌وال ترهګر وژل شوي دي چې په وژل شویو کې یو یې د سرې قطعې مرستیال بشیرمل هم شامل دی او ۳ نور ټپیان دي."

وسله‌والو طالبانو تر اوسه په دې اړه څه نه‌دي ویلي.

هلمند کې یوه نفوذي پولیس خپل ځیني ملګري وژلي

د هلمند ولایت نقشه

د هلمند د والي ویاند تأییدوي چې په نادعلي ولسوالۍ کې یوه نفوذي پولیس خپل ځیني ملګري وژلي دي.

د والي ویاند عمر ځواک پېښه تأییدوي، خو وايي په پېښه کې درې پولیس ټپیان او ځیني نور وژل شوي دي.

بل‌خوا د پولیسو یوې سرچینې په سیمه کې د ازادي راډیو خبریال ته وویل، دغه نفوذي کس د عبدالباري په نوم د یوه قوماندان په ګډون پنځه پولیس نن سهار وژلي او بیا تښتېدلی دی.

د حملې مسؤلیت تر اوسه چا نه‌دی منلی.

تېرو دوو اوونیو کې له ۸ میلیارده افغانیو ډېر عواید راټول شوي

د مالیې وزارت

د ۱۳۹۹ مالي کال د وږې میاشتې له ۱۴مې نه تر ۳۰مې پورې ۸ میلیارده ۴۲۳ میلیونه افغانۍ ملي عواید راټول شوي دي.

د مالیې وزارت ویاند شمروز مسجدي نن ازادي راډيو ته وویل چې له دې جملې ۵۹۳ میلیونه له مستوفیتونو، یو میلیارد ۷۲۶ میلیونه له مالیاتي عوایدو، یو میلیارد ۳۷۷ میلیونه له غیر مالیاتي عوایدو او ۴ میلیارده ۷۲۵ میلیونه له ګمرکونو څخه ترلاسه شوي دي.

نوموړي وویل چې د روان کال د وږې میاشتې د لومړیو دوو اوونیو په پرتله ۲ میلیارده ۵۸۶ میلیونه افغانۍ لوړوالی ښیي.

د روان مالي کال له پیل څخه تر اوسه پورې ۱۱۶ میلیارده ۵۸۹ میلیونه افغانۍ ملي عواید راټول شوي دي.

د مالیې وزارت د معلوماتو پر بنسټ، د ۱۳۹۹ مالي کال له پیل نه د وږې میاشتې تر ۳۰مې پورې ۷۴ میلیارده ۹۸۷ میلیونه افغانۍ (۴۵٪) پراختیایي بودجه او ۱۸۳ میلیارده ۷۲۹ میلیونه افغانۍ (۶۰٪) عادي بودجه لګول شوې ده چې په ټوله کې د ملي بودجې ۲۵۸ میلیارده ۷۱۶ میلیونه افغانۍ (۵۵٪) جوړوي.

د افغانستان او ایران ترمنځ د سوداګرۍ لومړنی نندارتون جوړ شو

په یاد نندارتون کې د افغاني او ایراني محصولاتو ۱۰۰ غرفې جوړې شوې دي.

د افغانستان او ایران ترمنځ د سوداګرۍ او پانګونې لومړنی نندارتون نن په کابل کې جوړ شو.

د افغانستان د سوداګرۍ او پانګونې خونې مرستیال یونس مومند نن ازادي راډيو ته وویل چې په دغه یو ورځني نندارتون کې د افغانستان او ایران محصولات نندارې ته ایښودل شوي دي.

په یاده ناسته کې د ملي شورا یو شمېر غړي د خصوصي سکټور د رهبرۍ غړي او د دواړو هېوادونو متشبثینو ګډون کړی.

په یاد نندارتون کې د افغاني او ایراني محصولاتو ۱۰۰ غرفې جوړې شوې دي.

د افغانستان د سوداګرۍ خونې چارواکي هیله‌مندي ښیي چې دغه نندارتون کې به افغاني او ایراني محصولاتو ته بازار موندنه وشي.

د افغانستان د سوداګرۍ او پانګونې خونې د معلوماتو پر بنسټ ایران سره د افغانستان کلنۍ راکړه ورکړه یو نیم میلیارد ډالرو ته رسېږي.

پر بیلاروس د بندیزونو غونډه بې پایلې پای ته رسېدلې

د اروپايي ټولنې د بهرنۍ پالیسۍ مشر جوزیپ بوریل په بروکسل کې د بیلاروس د اپوزیسیون د تبعیدي مشرې سويتلانا څیخانوفسکايا سره د خبرو پرمهال.

د اروپايي ټولنې د بهرنیو چارو وزیران په بروکسل کې په خپله پرونۍ غونډه کې د بیلاروس د اپوزیسیون د تبعیدي مشرې سويتلانا څیخانوفسکايا له غوښتنې سره سره پردې هېواد د بندیزونو د لګولو په اړه موافقې ته ونه رسېدل.

قبرس د دې بندیزونو له پلان سره مخالفت وکړ او په عین حال کې یې د غونډې له اجنډا د یوې وتلې غوښتنې په ترڅ کې د ترکیې پرضد په مدیترانې سمندرګي کې د ګاز د زېرمو د پلټڼې په خاطر د اروپايي ټولنې د اقداماتو غوښتنه وکړه.

تمه ده چې پر بیلاروس د بندیزونو د مسئلې په اړه د پنجشنبې او جمعې په ورځو، د اروپايي ټولنې په سرمشریزه کې هم بحث وشي.

د اروپايي ټولنې د بهرنۍ پالیسۍ مشر جوزیپ بوریل د دې ټولنې د بهرنیو چارو د وزیرانو له پرونۍ غونډې وروسته خبریالانو ته وویل که څه هم پر بیلاروس د بندیزونو د لګولو په برخه کې واضحه اراده شته خو د ټولو رایو اجماع چې په دې برخه کې اړینه ده، ترلاسه نه شوه.

ایران له امریکا سره د بندیانو تبادلې ته چمتووالی ښودلی

د ایران د بهرنیو چارو وزیر محمدجواد ظریف

ایران له متحدایالاتو سره د بندیانو د تبادلې ته چمتووالی ښودلی.

د ایران د بهرنیو چارو وزیر محمدجواد ظریف پرون د سېپټېمبر په ۲۱مه په نیویارک کې د بهرنیو اړیکو د شورا تحقیقاتي مرکز ته په آنلاین وینا کې وویل چې هېواد یې له امریکا سره د ټولو بندیانو تبادلې ته چمتو دی.

ښاغلي ظریف دې پوښتنې ته په ځواب کې چې آیا تهران د ایراني الاصله امریکايي وګړي باقر نمازي او د هغه د زوی سیامک خوشې کولو ته چمتو دی کنه وویل، د ده لپاره یوازینۍ لاره چې قضا د امریکايانو خوشې کولو ته قانع کړي له هغو ایراني وګړو سره چې د ده په وینا امریکا په ناحقه نیولي دي د هغوی تبادله ده.

ظریف وویل چې تبادله باید یو د یوه پر وړاندې نه بلکې عمومي وي.

واشنګټن له ډېرې مودې راهیسې د باقر او سیامک نمازي د خوشې کېدو غوښتنه کړې.

دوی له ۲۰۱۶ او ۲۰۱۵ کلونو راهیسې په بند کې دي.

'ننګرهار کې له ۱۰۰ زیات طالبان وژل شوي'

ننګرهار ښار

د ننګرهار چارواکي وايي چې امنیتي ځواکونو د دې ولایت په شېرزاد ولسوالۍ کې د عملياتو پر مهال له ۱۰۰ زیاتو وسله‌والو طالبانو ته مرګ‌ژوبله اړولې او ۱۰ کلي يې له وسله‌والو تصفیه کړي دي.

د ننګرهار ولایت مطبوعاتي دفتر نن په یوه بیان کې دا خبر ورکړی، خو د مړو او ټپیانو دقیق شمېر او د جګړې وخت‌یې نه‌دی ښودلی او دا یې هم نه‌دي ویلي چې ایا افغان ځواکونو ته هم مرګ‌ژوبله اوښتې که نه.

په بیان کې د ۲۰۱ سېلاب قول اردو د څلورمې پلې لوا د قوماندان جنرال محمد کریم نیازي له قوله راغلي چې وايي د دې عملیاتو په ترڅ کې د وسله‌والو مخالفینو له‌خوا یو شمېر ځای پر ځای شوي ماینونه هم کشف او شنډ شوي دي.

سروې: د نړۍ شااوخوا ۸۰ سلنه بې‌ځایه شویو دندې له لاسه ورکړي

د افغانستان په ګډون د ځینو نورو هېوادونو بیرغونه

د ناروې د پناه غوښتونکو شورا په نوم یوې غیر دولتي ادارې نوې سروې ښيي چې د افغانستان په ګډون په ټوله نړۍ کې د جګړې له کبله شااوخوا ۸۰ فیصده بې‌ځایه شویو کسانو خپلې دندې له لاسه ورکړې دي.

دا سروې د دوشنبې په ورځ (د سپټمبر په ۲۱مه نېټه) خپره شوه.

دې ادارې د ۱۴ هېوادونو له ۱،۴۳۱ بې‌ځایه شویو او کډوالو سره خبرې کړي.

په دې سروې کې ۷۰ فیصده کسانو ویلي چې د کرونا ویروس له خپرېدو راهیسې يې د کورنۍ خواړه کم شوي او ۷۳ فیصده کسانو ویلي چې د اقتصادي ستونزو له کبله‌یې اولادونه ښايي ښوونځي ته لاړ نه‌شي.

د ملګرو ملتونو د معلوماتو له مخې د ۲۰۱۹م کال له پای او کرونا ویروس له پیلېدو راهیسې په ټوله نړۍ کې ۷۹.۵ فیصده کسان د جګړې له کبله بې‌ځایه شوي وو چې دا د نړۍ د انسانانو د شمېر یو فیصد کېږي. د کرونا ویروس وبا د کډوالو او بې‌ځایه شویو په ګډون هغه کسان له اقتصادي ستونزو سره مخامخ کړي چې وضعیت‌یې له مخکې ښه نه‌وو.

سویډن د افغان سولې خبرو کې د ښځو د شمېر د زیاتېدو غوښتنه وکړه

د سویډن د بهرنیو چارو وزیره ان لیند

د سویډن د بهرنیو چارو وزیره ان لیند وايي، د افغانستان د ښه راتلونکي لپاره دوه خبرې ډېرې مهمې دي چې د تاوتریخوالي کمول او د مذاکراتو پر مېز د ښځو شمېر زیاتول دی.

مېرمن لیند دا خبره د دوشنبې په ماښام پر خپله ټويټرپاڼه لیکلې. تر دې مخکې په افغانستان کې د اروپايي ټولنې دفتر هم د سولې د نړیوالې ورځې په مناسبت په افغانستان کې د زیاتېدونکي تاوتریخوالي په اړه اندېښنه ښودلې وه.

دې ادارې ویلي په طالبانو باندې بیا غږ کوي چې تاوتریخوالي سمدستي بند کړي او ژر تر ژره اوربند وکړي.

همداراز د ملګرو ملتونو مرستندویه ادارې یا یوناما هم ویلي چې د ملکيانو د مرګ‌ژوبلې زیاتېدو په اړه اندېښنه لري.

دې ادارې ویلي چې ښکېلې خواوې باید د خلکو د ساتلو لپاره سمدستي لاس په کار شي او د دوحې د سولې خبرو لپاره دې مناسبه فضا رامنځته کړي.

نور راوښيه

XS
SM
MD
LG