د لاسرسۍ وړ لېنکونه

تازه خبر
یکشنبه ۶ تله ۱۳۹۹ کابل ۰۱:۴۵

خبرونه

د ملګرو ملتونو امنیت شورا د افغانستان په اړه غونډه کوي

د ملګرو ملتونو د امنیت شورا ناسته

د ملګرو ملتونو د امنیت شورا د پنجشنبې په ورځ (د سپټمبر په درېیمه) د افغانستان پر وضعیت غونډه کوي.

د امنیت شورا غونډې ته به د یوناما څلور میاشتنی راپور وړاندې شي.

په کابل کې د ملګرو ملتونو د مرستندویه دفتر، یوناما پر وېب‌پاڼه دا راپور په بشپړ ډول خپور شوی دی.

یوناما ویلي چې د افغانستان لپاره د ملګرو ملتونو د عمومي منشي ځانګړې استازې، دیبورا لاينز به د امنیت شورا ته د افغانستان د وضعیت په اړه خبرې وکړي.

راپور د (پر نړیواله سوله او امنیت د افغانستان د وضعیت اغېز) تر سرلیک لاندې جوړ شوی دی.

د ورځې تازه خبرونه دلته ولولئ

بیلاروس کې د لاریونونو دوام؛ یو شمېر لاریون کوونکې نیول شوي

دا اعتراضونه پر مینسک سربېره په نورو ښارونو کې هم وشول. 

په بیلاروس کې د الکساندر لوکاشینکا پر ضد اعتراضونه چې تر یوې میاشتې یې ډېره موده کېږي، لا هم دوام لري.

لوکاشینکا د اګسټ په ۹مه د ولسمشریزو ټاکنو د ګټلو ادعا کوي، خو مخالفین یې په ټاکنو کې د پراخو درغلیو تور پورې کوي.

یو شمېر معترضې مېرمنې چې زیاتو یې له ځانه سره ګلان لېږدول، نن په مینسک کې په لاریون راوتلې وې.

په بیلاروس کې د آزادي راډیو خبریال وایي چې د بلوا ضد پولیسو سمدستي مداخله وکړه او لږ تر لږه لس مېرمنې یې ونیولې.

په نیول شویو کې ۷۳ کلنه نینا باهینسکایا هم شامله ده.

دا له جسمې اړخه کمزورې، خو یوه قاطع مېرمن ده چې د لوکاشینکا پر ضد اعتراضونو کې یې پرلپسې ګډون کړی دی.

دا اعتراضونه پر مینسک سربېره په نورو ښارونو کې هم وشول.

الکساندر لوکاشینکا د پراخو اعتراضونو سره سره د سېپټېمبر پر ۲۳ د ولسمشرۍ لوړه پرځای کړه.

د کاپیسا چارواکي: حصه دوم کې پر دوو نجونو ډله ییز جنسي تېری شوی

ارشیف

د کاپیسا امنیتي مسئولین وایي، په دې ولایت کې د غیر مسئولو وسله والو لخوا پر دوو نجونو ډله ییز جنسي تېری شوی دی.

یوې سرچینې چې د موضوع د حساسیت له کبله یې نه غوښتل نوم یې واخیستل شي آزادي راډیو ته وویل چې دا پېښه تېره شپه د کاپیسا ولایت په حصه دوم ولسوالۍ کې شوې.

د دغې سرچینې په وینا یوولسو نامعلومو وسله والو پر دوو پیغلو نجونو ډله ییز جنسي تېری وکړ.

سرچینه زیاتوي، د پېښې عاملین له سیمې تښتېدلي او د کاپیسا پولیسو په دې اړه پلټنې پیل کړي دي.

په دې اړه نور جزئیات نه دي ورکړل شوي.

خلیلزاد: ښایي طالبان د سیاسي هوکړې مخکې دایمي اوربند ونه مني

زلمی خلیلزاد

د افغانستان د سولې لپاره د امریکا متحده ایالاتو ځانګړی استازی وړاندوینه کوي چې طالبان به ښایي یوې سیاسي هوکړې ته تر رسېدو دمخه دایمي اوربند ونه مني.

زلمي خلیلزاد پرون د پي بې اس نیوز اور امریکایې رسنۍ د خبریال د پوښتنې په ځواب کې دا خبره وکړه.

هغه وویل: "فکر کوم تاسو سم وایاست چې طالبان به تر هغو یو هر اړخیز او دایمي اوربند ونه مني چې یوه سیاسي حل لاره نه وي موندل شوې او دا په نورو ځایونو کې هم په ورته شخړو کې بې ساری کار نه دی، زه فکر کوم هغوی د تاوتریخوالي کموالی عملي کولی شي او په پام کې به یې ولري البته دا په دې پوري اړه لري چې وړاندیزونه څه دي."

دا څرګندونې داسې مهال کېږي چې په قطر کې د افغان حکومت او طالب استازو ترمنځ د سولې خبرو سره هممهاله د افغانستان په بېلابېلو ښارونو کې درنې جګړې دوام لري.

زلمي خلیلزاد دا هم ویلي چې د روانو جګړو د ډېروالي سره سره د تاوتریخوالي کچه او د ملکي او پوځيانو د مرګ ژوبلې شمېره د پروسږ کال تر همدې مودې پرتله کمه ده.

دغه امریکایې ډیپلومات زیاتوي چې د جګړو د دواړو لورو لخوا د تاوتریخوالي کمېدو ته اړتیا ده.

په همدې ترڅ کې طالبانو نن په بدخشان او بامیان ولایتونو کې د یو شمېر سرتېرو د وژل کېدو ادعا کړې، خو کره شمېره یې نه ده ښودلې.

د هند کرکټ غوره لیګ سیالۍ؛ نن حیدر اباد او کلکتې لوبډلې سره لوبه کوي

دوه افغان لوبغاړي محمد نبي او راشد خان هم په سنرایزر حیدر لوبډله کې لوبه کوي.

ټاکل شوې ده د هند کرکټ غوره لیګ په روانو لوبو کې نن د حیدر اباد او کلکتې لوبډلې سیالي وکړي.

دوه افغان لوبغاړي محمد نبي او راشد خان هم په سنرایزر حیدر لوبډله کې لوبه کوي، که څه هم راشد خان په لومړیو دوه لوبو کې د لوبیدو چانس ترلاسه کړی خو محمد نبي عیس خېل ته بیا تر دا مهال د لوبېدو چانس نه دی ورکړل شوی.

په یاد لیګ کې تېره شپه د چینايي یوپرکنګ او همداراز ډهلي کاپیټلس ترمنځ لوبه ترسره شوه چې په کې ډهلي لوبډلې چینايي لوبډلې ته په ۴۴ منډو ماتې ورکړه.

هرات کې د فول رزم جام سیالۍ ترسره شوې

ارشیف

په هرات ولایت کې نن د نشه يي توکو پر ضد د مبارزې تر نوم لاندې د فول رزم جام سیالۍ ترسره شوې.

د هرات ولایت د فول رزم فدارسیون په یوې اعلامیې کې راغلي، په دغو سیالیو کې له ۱۲ زونونو ۶۰ تنکیو ځوانانو، ځوانانو او لویانو ګډون کړی.

د اعلامیې له مخې په دغو سیالیو کې ۱۲ ورزشکاران تر نورو ښه وځلېدل.

د یو بل خبر له مخې د هرات ولایت د بدني روزنې ریاست فني مدیر ضیاالحق ضیا ازادي راډیو ته وویل، په دغه ولایت کې د ۲۲ ورزشکارانو ترمنځ د بدمنټون سیالۍ هم روانې دي.

د ضیا په خبر د بدمنټون دغه ټاکنیزې سیالۍ کې له خبریالانو د ملاتړ په نامه نومول شوې، چې په کې تنکیو ځوانانو، ځوانانو او لویانو ګډون کړی.

د فوټبال غوره لیګ سیالیو دوام؛ شاهین اسمايي دوهم سیالي وګټله

ارشیف

د افغانستان د فوټبال د غوره لیګ سیالیو په دوهمه لوبه کې شاهین اسمايي لوبډلې میوند اتلانو ته صفر د درې په مقابل کې ماته ورکړه.

د افغانستان د فوټبال فدارسیون مطبوعاتي مسئول شفیع شاداب ازادي راډيو ته وویل، چې نن او سبا کومه لوبه نه کېږي، د دوشنبې په ورځ به سپین غر بازان لوبډله موجهای امو لوبډلې سره د سیالۍ ډګر ته وځي.

د افغانستان د فوټبال غوره لیګ سیالۍ د تېرې پنجشنبې په ورځ پيل شوې، چې په لومړۍ لوبه کې طوفان هریرود لوبډلې اباسین څپې لوبډلې ته یو د صفر په مقابل کې ماتې ورکړه.

د فوټبال غوره لیګ نهم پړاو پچه اچونه د تېرې جمعې په ورځ ترسره شوه، چې په لومړي ګروپ کې شاهین اسمايي، سیمرغ البرز، عقابان هندوکش او د میوند اتلان شامل دي، خو په دویم ګروپ کې یبا طوفان هریرود، سپین غربازان، موجهای آمو او د اباسین څپې لوبډلې ګډون لري.

کندز چارواکي: علي آباد کې ماین چاودنې ۲ کسه وژلي

ارشیف

د کندز په علي آباد و لسوالۍ کې د ماین په چاودنه کې دوه ملکي وګړي وژل شوي دي.

د کندز د امنیه قومندانۍ ویاند هجرت الله اکبري نن رسنیو ته وویل چې طالبانو د یادې ولسوالۍ په رمضاني کلي کې ماین خښ کړی وو چې نن سهار پر ملکي وګړو وچاودېد.

د ښاغلي اکبري په خبره په دې پېښه کې ۴ نور ملکیان ټپیان شوي دي.

طالبانو تر اوسه په اړه تبصره نه ده کړې.

ایرانۍ فعالې 'نسرین ستوده' د نه خوړو اعتصاب پای ته ورساوه

نسرین ستوده

د بشري حقونو یوې بندي ایرانۍ فعالې نسرین ستوده خپل د نه خوړو اعتصاب پای ته ورساوه.

د نوموړي مېړه رضا خاندان نن پر ټولنیزو رسنیو ولیکل چې مېرمنې یې د نازک روغتیایي وضعیت له کبله دا اقدام وکړ.

نوموړي د اګسټ له ۱۱ څخه د تهران په ایوین زندان کې د نه خوړو اعتصاب پیل کړی وو او دلیل یې دا ښودلی وو چې په ایران کې سیاسي بندیان د کرونا ویروس له خطر سره مخامخ دي.

نسرین ستوده د سېپټېمبر پر ۱۹ مه د خراب روغتیایې وضعیت له کبله روغتون ته انتقال شوه خو څلور ورځې وروسته بېرته زندان ته یوړل شوه چې پراخ غبرګونونه یې راوپارول.

نسرین ستوده د ۲۰۱۸ کال په جون میاشت کې په تهران کې له خپله کوره ونیول شوه.

نوموړې د سیاسي بندیانو چې په هغوی کې د جبري حجاب پر ضد اعتراض کوونکي ښځې هم شاملې دي، د دفاع په تور په ۳۸ نیم کاله بند او ۱۴۸ درو وهلو محکومه شوه.

دا باید ۱۲ کاله بند تېر کړي چې په ضمانت د خوشې کېدو شرایط پوره کړي.

اوکراین کې د یوې الوتکې د لوېدو له امله  ۲۶ کسان وژل شوي

پوځ وایي، ډېری وژل شوي کسان د خارکیف د ملي هوایي ځواک د پوهنتون زده کوونکي وو.  

د اوکراین پوځ وایي، په دې هېواد کې د یوې پوځي مسافر وړونکې الوتکې د لوېدو له کبله ۲۶ سپرلۍ وژل شوي دي.

د اوکراین هوایې ځواکونو ویلي دا انټونوف An-26 ډوله الوتکه پرون مازدیګر د دې هېواد په شمال ختیځ سیمه خارکیف کې د کېناستلو پر مهال لویدلې ده.

چارواکو وروسته وویل چې یوه پیلوټ د الوتکې تر کېناستلو لږ مخته د یوه انجن د خرابوالي راپور ورکړی دی.

په دې پېښه کې په لومړي سر کې دوه کسان ژوندي پاتې شوي وو او روغتون ته انتقال شول چې وروسته د یوه کس د مړینې خبر ورکړل شو.

د پېښې د علت په اړه تحقیقات روان دي.

پوځ وایي، ډېری وژل شوي کسان د خارکیف د ملي هوایي ځواک د پوهنتون زده کوونکي وو.

د اوکراین ولسمشر ولادیمیر زیلینسکي په یوې اعلامېې کې ویلي چې نن ناوخته به د پېښې سیمې ته ولاړ شي.

ټرمپ یوه محافظه کاره  قاضي 'امې کاني باریټ' د سترې محکمې مشره ټاکي

راپورونه وایي، د امریکا متحده ایالاتو ولسمشر ډونالډ ټرمپ په پام کې لري یوه محافظه کاره قاضي "امې کاني باریټ" د سترې محکمې د مشرې په توګه معرفي کړي.

دا راپورونه داسې مهال خپرېږي چې د امریکا ولسمشرۍ ټاکنو ته یوازې څو اونۍ وخت پاتې دی.

تمه ده چې ولسمشر ټرمپ نن مازدیګر دا اعلان وکړي.

د نیویارک ټایمز او سي ان ان په ګډون یو شمېر امریکایې رسنیو پرون راپور ورکړ چې ولسمشر د دې کار نیت لري.

چارواکي: فیض آباد کې  ۹ وسله والو طالبانو ته مرګ ژوبله اوښتې

ارشیف

چارواکي وايي، د بدخشان په فیض آباد ښار کې ۴ وسله وال طالبان وژل شوي او ۵ نور ټپیان دي.

د بدخشان د امنیه قومندانۍ ویاند ثناالله روحاني نن آزادي راډیو ته وویل چې دا پېښه تېره شپه د طالبانو تر برید وروسته وشوه.

هغه زیاته کړه: " د دولت وسله والو مخالفینو تېره شپه د دوآبه په یفتل سیمه کې د ملي پاڅون کوونکو پر پوستو ډله ییز بریدونه وکړل چې د افغان ځواکونو له سخت مقاومت سره مخامخ شول، دغې نښتې تر درېیو بجو دوام وکړ، طالبانو بېرته شاتګ وکړ."

ښاغلی روحاني زیاتوي چې په دې نښتو کې د قومندان غازي په نوم د سیمه ییزو پولیسو یو قومندان هم وژل شوی او یو بل ملګری یې ټپي شوی دی.

وسله والو طالبانو تر اوسه د دې پېښې په اړه څه نه دې ویلي.

افغان چارواکي: ټول هېواد کې لسګونه پراختیايي پروژې پلي کېږي

ارشیف

د افغانستان د کلیو او پراختیا وزارت وايي، په دغه هېواد کې ۲۵۹ پراختیايي پروژې پلي کوي.

د دغو پروژو تړون نن له یو شمېر خصوصي شرکتونو سره لاسلیک شو.

د افغانستان د کلیو او پراختیا وزارت ویاند فریدون اژند وايي، چې د دغو پروژو ټولیز لګښت له دوو میلیاردو افغانیو اوړي او په لومړي ځل کوچیان هم ورنه برخمن شوي.

د دغه وزارت د اعلامیې پر بنسټ، په یادو پروژو کې د څښاک د پاکو اوبو، سړکونو، استنادي او محافظتي دېوالونه او د اوبو رسولو د کانالونه جوړول شامل دي.

په اعلامیه کې راغلي، له نویو پروژو به په لرې پرتو سیمو کې ۲ میلیون کسان ګټه واخلي، او له یو نیم میلیون زیاتې کاري ورځې به هم رامنځته کړي.

اسټرالیايي کمپنۍ د افغانستان کانونو راایستنې برخه کې پانګه اچونه کوي

ارشیف

د افغانستان د کانونو او پټرولیم وزارت وايي، اسټرالیا فورټسکیو میټل کمپنۍ په افغانستان کې د سروزور، لیتیم او اوسپنې د کانونو د راایستنې په برخه کې پانګونې ته لېوالتیا ښودلې.

د دغه وزارت ویاند عبدالقدیر مطفي نن ازادي راډيو ته وویل، چې د دغې کمپنۍ او د کانونو وزارت د تخنیکي ټیمونو ترمنځ د چارو د ښې همغږۍ او تخننیکي معلوماتو شریکولو لومړنۍ ناسته د پنجشنبې په ورځ وشوه.

مطفي زیاته کړه: "د تفاهم لیک پر بنسټ اسټرالیا فورتسکیو میټل ګروپ کمپنۍ، چې یو شمېر ملیارډران په کې راټول شوي لېوالتیا ښودلې، چې په افغانستان د سره زرو، لیتیم او اوسپنه د کانونو د استخراج په برخه کې پانګونه وکړي."

د ښاغلي مطفي په خبره د افغان حکومت او فورتسکیو میټل کمپنۍ ترمنځ د لاسلیک شوي تفاهم لیک پربنسټ به یاده کمپنۍ په بېلابېلو برخو کې له پانګونې سربېره د تخنیکي ظرفیتونو په لوړلو کې هم له افغانستان سره مرسته کوي.

د افغانستان په بامیانو، پکتیکا، بدخشان، یو شمېر ولایتونو کې د سرو زرو، اوسپنې او مسو پراخې کانانونو موجود دي.

عمران خان: د هند ملت‌پال حکومت د مسلمانانو پر وړاندې د تبعیض ملاتړ کوي

عمران خان

د پاکستان صدراعظم عمران خان وايي په هند کې د هندوانو ملت‌پال حکومت د مسلمانانو پر وړاندې د کرکې پارولو او تبعیض ملاتړ کوي.

عمران خان پرون جمعه د ملګرو ملتونو عمومي اسامبلې ته په وینا کې چې له مخکې ثبت شوې وه وویل په هند کې له اسلام څخه د وېرې رامنځ‌ته کول واکمني کوي چې د ده په وینا په دې هېواد کې یې د نږدې ۲۰۰ میلیونه مسلمانانو ژوند له ګواښ سره مخامخ کړی دی.

عمران خان وویل، د هند حکومت باور لري چې هند یوازې د هندوانو لپاره دی او نور خلک‌یې د انډول حق لرونکي وګړي نه‌دي.

پاکستاني مشرانو پخوا تر دې هم پر کشمیر چې ډېری وګړي یې مسلمانان دي د ولکې د پراخولو لپاره د هند پر هڅو انتقاد کړی دی.

ناوالني: ژوند مې هغه پیلوټ او صحي پرسونل ژغورلی چې سمدستي مرسته‌یې وکړه

الکسي ناوالني

د روسیې د اپوزېسیون مشر الکسي ناوالني وايي، ژوند یې هغه پیلوټ او صحي پرسونل ژغورلی دی چې له ده سره‌یې سمدستي روغتیايي مرسته وکړه.

ناوالني پر خپل انسټاګرام لیکلي، له ناروغۍ وروسته پیلوټ، الوتکه په چټکۍ سره کېنوله او روغتيايي کارکوونکي سمدستي وپوهېدل چې دی مسموم شوی او ده ته‌یې د مسمومیت ضد درمل ورکړل.

د روسیې د اپوزېسیون ۴۴ کلن مشر په الوتکه کې له سایبریا څخه مسکو ته روان و چې ناڅاپه ناروغه شو او الوتکې په اومسک ښار کې بېړنۍ ناسته وکړه.

هغه وروسته برلین ته ولېږدول شو او نږدې دوه اوونۍ یې په بې‌سده حالت کې په روغتون کې تېرې کړې.

جرمني متخصصانو ویلي دي چې ناوالني په نوویچوک ډوله کیمیاوي موادو چې په پخواني شوروي اتحاد کې جوړېدل مسموم شوی. ناوالني چې د کرملېن له سرسختو منتقدانو څخه دی اوس‌مهال په جرمني کې دی او روغتیايي وضعیت‌یې ډاډمن بلل شوی.

ډاکتران وايي که د نوموړي وضعیت د اوس په شان په چټکۍ سره ښه شي، نو د ناروغۍ ټولې نښې به‌یې له‌منځه ولاړې شي.

نور راوښيه

XS
SM
MD
LG