د لاسرسۍ وړ لېنکونه

تازه خبر
یکشنبه ۶ تله ۱۳۹۹ کابل ۰۱:۵۹

افغانستان

برېښنا شرکت له ازبکستان سره افغانستان ته د برېښنا پر لېږد سلا شو

د برېښنا شرکت نښان

برېښنا شرکت د ازبکستان د انرژۍ له وزارت سره افغانستان ته د برېښنا د انتقال د قرارداد پر لاسلیک سلا شو.

په تاشکند کې پر موافقه نن د بهرنیو چارو سرپرست وزیر محمد حنیف اتمر په حضور کې د ازبکستان د انرژۍ له وزارت سره بحث وشو.

د افغانستان د بهرنیو چارو سرپرست وزیر محمد حنیف اتمر د یوه دولتي هیئت په مشرۍ نن ازبکستان ته لاړ.

د بهرنیو چارو وزارت ویاند ګران هېواد نن رسنیو ته وویل، په دې سفر کې پر ځینو نورو موضوعاتو هم موافقې کېږي.

ښاغلی هېواد زیاتوي: "د دې سفر موخه د دوه اړخیزو پراختیا، ټرانسپورت، پانګونې او د برېښنا د انتقال د زمینې برابرول او د ازبکستان له لوري سره د قراردادونو لاسلیکول دي."

د افغانستان د بهرنیو چارو وزارت د دې میلادي میاشتې په لومړیو کې ویلي وو چې کابل او تاشکند به افغانستان ته د ۱۰ کلونو لپاره د برېښنا پر لېږد موافقه وکړي.

تر دې مخکې ولسمشر محمد اشرف غني ویلي وو چې ازبکستان به افغانستان ته په ارزانه بیه برېښنا ورکوي.

د ورځې تازه خبرونه دلته ولولئ

طالب مرکچي پلاوی: ښځې دې د راتلونکې په اړه هېڅ ډول اندېښنه ونه لري

قطر کې د طالبانو د مرکچي پلاوي غړي

په قطر کې د طالبانو د مرکچي پلاوی یو غړی وایي، د افغانستان ښځې باید د خپلې راتلونکې په اړه هېڅ ډول اندېښنه ونه لري.

طالبانو په خپله واکمنۍ کې ښځې له زده کړو او کارونو منعه کړې وې.

اوس چې له دې ډلې سره د سولې خبرې روانې دي، د د بشري حقونو فعالان په افغانستان کې د ښځو راتلونکې ته اندېښمن دي.

مولوی عبدالسلام حنفي د طالبانو له الاماره ویبپاڼې سره مرکه کې ویلي د طالبانو د واکمنۍ پر مهال هم ښځو روغتونونو کې کار کاوه او د پولیسو لیکو کې یې د تالاشۍ دنده مخته وړه، خو په خبره یې دا چې حالات جنګي وو او دوی سره د اوس په نسبت امکانات کم وو، نورو برخو کې یې حقونه خوندي نه وو.

هغه زیاته کړه: "د افغانستان په اسلامي نظام کې د ټولنې د ټولو اقشارو حقونه خوندي دي، مونږ د افغانستان ټولو ښځو ته ډاډ ورکوو چې انشاالله د دوی ټول حقونه به په اسلامي نظام کې محفوظ وي."

افغان مېرمنې د طالبانو د نظام له ړنګېدو وروسته په تېرو ۱۹ کلونو کې د زده کړو او کار په برخه کې د پام وړ لاسته راوړنې لري.

دوی اندېښمنې دي چې د طالبانو سره د روغې جوړې په صورت کې د دوی پر حقونو جوړجاړی ونه شي.

په وروستیو کې د نړۍ یو شمېر پخوانیو او اوسنیو مشرانو او مخکښو نړیوالو څېرو هم په یو پرانیستې لیک کې د سولې په بین الافغاني خبرو کې د ښځو د حقونو پر بشپړ خوندیتوب ټینګار وکړ.

بدخشان کې د ماشومانو ګوزڼ ۲ پېښې ثبت شوې

د پولیو یا ګوزڼ له امله فلج شوی ماشوم

په بدخشان ولایت کې د ماشومانو د ګوزڼ دوه پېښې ثبت شوې.

د بدخشان عامې روغتیا ریاست چارواکي وايي چې دا له ۱۴ کلونو وروسته لومړی ځل دی چې د ماشومانو د ګوزڼ پېښې په دې ولایت کې ثبت کېږي.

د بدخشان د عامې روغتیا ریاست مرستیالې نوشین ګهر ازادي راډیو ته وویل، په پولیو یا ګوزڼ دا دوه تر پنځو کلونو کوچني ماشومان د یمګان او کشم ولسوالیو اوسېدونکي دي.

د بدخشان د ولایتي شورا ځیني غړي وايي چې په وروستیو کې د طالبانو د مخالفت له کبله په دې ولایت کې سلګونه ماشومان د پولیو له واکسینه بې‌برخې شوي دي.

خو د طالبانو ویاند ذبیح‌الله مجاهد وايي چې ډله‌یې د پولیو واکسین د تطبیق مخه نه‌نیسي.

په وروستیو کلونو کې د ګوزڼ یا پولیو ناروغي د افغانستان په څو ختیځو او جنوبي ولایتونو پورې محدوده شوې وه.

بشري حقونو کمېسیون: کندهار کې پر ۳۴۰ تنو هدفي بریدونه شوي

ارشیف

په کندهار کې د بشري حقونو خپلواک کمېسیون وايي، په تېر یوه کال کې په دې ولایت کې پر ۳۴۰ تنو هدفي بریدونه شوي دي.

د راپورونو له مخې، د سږ کال د روژې له میاشتې را په دې خوا په کندهار کې هدفي بریدونه زیات شوي دي.

په دې بریدونو کې چې عموماً له موټرسایکل څخه په کار اخیستو کېږي، قومي مشران، د امنیتي ادارو کارکوونکي او پولیس په نښه کېږي.

د کندهار د بشري حقونو د خپلواک کمېسیون د معلوماتو پر اساس په هدفي بریدونو کې ۲۲۰ تنه وژل شوي او ۱۲۰ نور ټپیان شوي دي.

د کندهار د امنیه قوماندانۍ ویاند جمال ناصر بارکزی وايي چې امنیتي ځواکونو یو شمېر حمله کوونکي نیولي دي.

چارواکي: ارزګان کې لسګونه امنیتي ځواکونه محاصره شوي

د ارزګان نقشه

د ارزګان ولایت په دهراوود ولسوالۍ کې لسګونه امنیتي ځواکونه محاصره شوي دي.

د دې ولسوالۍ امنیه قوماندان جان محمد کریمي تېره شپه ناوخته ازادي راډیو ته وویل چې طالبانو حملې نورې هم زیاتې کړې دي.

هغه زیاته کړه: "کریمي همداراز وویل چې پرون په دې سیمه کې ۵ افغان سرتېري ټپیان شوي او طالبانو ته هم مرګ‌ژوبلې اوښتي، خو د دقیق شمېر په اړه معلومات نه‌لري."

له دې سره په یو وخت د ارزګان په ګېزاب ولسوالۍ کې هم طالبانو بریدونو ته زور ورکړی دی.

د طالبانو ویاند قاري یوسف احمدي ویلي چې د دهراوود او ګېزاب په جګړو کې لسګونه افغان سرتېري وژل شوي یا ټپیان شوي دي.

راشد لطیف: محمد نبي به د نړۍ په کچه لومړی درجه لوبغاړی پاتې شي

محمد نبي

د پاکستان پخواني کرکټر راشد لطیف د کرکټ افغان لوبغاړی محمد نبي ستایلی او ویلي یې دي چې نبي به تل د نړۍ په کچه لومړی درجه لوبغاړی پاتې شي.

دا څرګندونې وروسته تر هغه کېږي چې محمد نبي په تازه درجه‌بندۍ کې د نړۍ په کچه د ۲۰ اوریزو او یو ورځنیو لوبو لومړی درجه الراونډر اعلان شو.

۳۵ کلن محمد نبي تېرو څو کلونو کې د افغانستان په ملي لوبډله او بهرنیو لیګونو کې ښه ځلېدلی دی او ګڼ شمېر مینه‌وال لري. محمد نبي او د کرکټ بل افغان ستوری راشد خان دا مهال د هند د کرکټ په لیګ کې د سنرایزرس حیدراباد په لوبډله کې لوبېږي.

له افغانستان سره د ناټو او اروپایي ټولنې د استازو د همکارۍ ډاډ

افغانستان کې د ناټو ملکي استازی ستیفانو پونتېکورو

په افغانستان کې د ناټو او اروپایي ټولنې استازو دولت ته د ثبات لپاره د همکاریو د دوام ډاډ ورکړی دی.

افغانستان کې د ناټو ملکي استازی ستیفانو پونتېکورو پر خپله ټویټرپاڼه لیکلي، د افغانستان د دوامداره ثبات د ملاتړ لپاره به د ناټو او اروپایي ټولنې همکارۍ دوام پیدا کړي.

کابل کې د اروپایي ټولنې سفیر بیا په جلا ټویټ کې ویلي چې دوی په افغانستان کې له ناټو سره یوځای د پياوړو ملکي پولیسو جوړولو ته کار کوي.

دغه څرګندونې وروسته تر هغه کېږي چې کابل کې د ناټو او اروپایي ټولنې استازو پرون ګډه ناسته درلوده.

قطر کې افغان پلاوی: له ۳ ورځو راهیسې مو له مقابل لوري سره نه‌دي لیدلي

قطر کې د سولې خبرو پیلېدل

په قطر کې د افغان دولت مرکچي پلاوی وایي، له تېرو درېیو ورځو راهیسې دوی خپل‌منځي غونډې کوي او له مقابل لوري سره‌یې نه‌دي لیدلي.

د سولې په چارو کې د دولت وزارت ویانده ناجیه انوري وایي، ګډو هوکړو ته رسېدل وخت غواړي، خو دوی ګام پر ګام مخته ځي.

هغې زیاته کړه: "تېرو ورځو کې د افغانستان د اسلامي جمهوریت مذاکره کوونکی پلاوی پر هغو موضوعاتو چې ډېر کار ته‌یې اړتیا لرله، داخلي جلسې جوړې کړې دي. مذاکره دوه اړخیز بهیر دی او په ځینو مواردو کې مشترکو ټکو ته د رسېدو لپاره اوږدېدای شي."

بین‌الافغاني خبرې دوه اوونۍ مخکې دوحه کې پیل شوي، خو تر اوسه د مخامخ خبرو تګلاره او اجنډا نه‌ده بشپړه شوې.

د دواړو لورو مرکچیان هیله‌من دي چې ژر به دغه تګلاره بشپړه شي ځکه د دوی په ټکو اختلافي مسایل جدي نه‌دي.

د کاپیسا چارواکي: حصه دوم کې پر دوو نجونو ډله ییز جنسي تېری شوی

ارشیف

د کاپیسا امنیتي مسئولین وایي، په دې ولایت کې د غیر مسئولو وسله والو لخوا پر دوو نجونو ډله ییز جنسي تېری شوی دی.

یوې سرچینې چې د موضوع د حساسیت له کبله یې نه غوښتل نوم یې واخیستل شي آزادي راډیو ته وویل چې دا پېښه تېره شپه د کاپیسا ولایت په حصه دوم ولسوالۍ کې شوې.

د دغې سرچینې په وینا یوولسو نامعلومو وسله والو پر دوو پیغلو نجونو ډله ییز جنسي تېری وکړ.

سرچینه زیاتوي، د پېښې عاملین له سیمې تښتېدلي او د کاپیسا پولیسو په دې اړه پلټنې پیل کړي دي.

په دې اړه نور جزئیات نه دي ورکړل شوي.

خلیلزاد: ښایي طالبان د سیاسي هوکړې مخکې دایمي اوربند ونه مني

زلمی خلیلزاد

د افغانستان د سولې لپاره د امریکا متحده ایالاتو ځانګړی استازی وړاندوینه کوي چې طالبان به ښایي یوې سیاسي هوکړې ته تر رسېدو دمخه دایمي اوربند ونه مني.

زلمي خلیلزاد پرون د پي بې اس نیوز اور امریکایې رسنۍ د خبریال د پوښتنې په ځواب کې دا خبره وکړه.

هغه وویل: "فکر کوم تاسو سم وایاست چې طالبان به تر هغو یو هر اړخیز او دایمي اوربند ونه مني چې یوه سیاسي حل لاره نه وي موندل شوې او دا په نورو ځایونو کې هم په ورته شخړو کې بې ساری کار نه دی، زه فکر کوم هغوی د تاوتریخوالي کموالی عملي کولی شي او په پام کې به یې ولري البته دا په دې پوري اړه لري چې وړاندیزونه څه دي."

دا څرګندونې داسې مهال کېږي چې په قطر کې د افغان حکومت او طالب استازو ترمنځ د سولې خبرو سره هممهاله د افغانستان په بېلابېلو ښارونو کې درنې جګړې دوام لري.

زلمي خلیلزاد دا هم ویلي چې د روانو جګړو د ډېروالي سره سره د تاوتریخوالي کچه او د ملکي او پوځيانو د مرګ ژوبلې شمېره د پروسږ کال تر همدې مودې پرتله کمه ده.

دغه امریکایې ډیپلومات زیاتوي چې د جګړو د دواړو لورو لخوا د تاوتریخوالي کمېدو ته اړتیا ده.

په همدې ترڅ کې طالبانو نن په بدخشان او بامیان ولایتونو کې د یو شمېر سرتېرو د وژل کېدو ادعا کړې، خو کره شمېره یې نه ده ښودلې.

هرات کې د فول رزم جام سیالۍ ترسره شوې

ارشیف

په هرات ولایت کې نن د نشه يي توکو پر ضد د مبارزې تر نوم لاندې د فول رزم جام سیالۍ ترسره شوې.

د هرات ولایت د فول رزم فدارسیون په یوې اعلامیې کې راغلي، په دغو سیالیو کې له ۱۲ زونونو ۶۰ تنکیو ځوانانو، ځوانانو او لویانو ګډون کړی.

د اعلامیې له مخې په دغو سیالیو کې ۱۲ ورزشکاران تر نورو ښه وځلېدل.

د یو بل خبر له مخې د هرات ولایت د بدني روزنې ریاست فني مدیر ضیاالحق ضیا ازادي راډیو ته وویل، په دغه ولایت کې د ۲۲ ورزشکارانو ترمنځ د بدمنټون سیالۍ هم روانې دي.

د ضیا په خبر د بدمنټون دغه ټاکنیزې سیالۍ کې له خبریالانو د ملاتړ په نامه نومول شوې، چې په کې تنکیو ځوانانو، ځوانانو او لویانو ګډون کړی.

د فوټبال غوره لیګ سیالیو دوام؛ شاهین اسمايي دوهم سیالي وګټله

ارشیف

د افغانستان د فوټبال د غوره لیګ سیالیو په دوهمه لوبه کې شاهین اسمايي لوبډلې میوند اتلانو ته صفر د درې په مقابل کې ماته ورکړه.

د افغانستان د فوټبال فدارسیون مطبوعاتي مسئول شفیع شاداب ازادي راډيو ته وویل، چې نن او سبا کومه لوبه نه کېږي، د دوشنبې په ورځ به سپین غر بازان لوبډله موجهای امو لوبډلې سره د سیالۍ ډګر ته وځي.

د افغانستان د فوټبال غوره لیګ سیالۍ د تېرې پنجشنبې په ورځ پيل شوې، چې په لومړۍ لوبه کې طوفان هریرود لوبډلې اباسین څپې لوبډلې ته یو د صفر په مقابل کې ماتې ورکړه.

د فوټبال غوره لیګ نهم پړاو پچه اچونه د تېرې جمعې په ورځ ترسره شوه، چې په لومړي ګروپ کې شاهین اسمايي، سیمرغ البرز، عقابان هندوکش او د میوند اتلان شامل دي، خو په دویم ګروپ کې یبا طوفان هریرود، سپین غربازان، موجهای آمو او د اباسین څپې لوبډلې ګډون لري.

کندز چارواکي: علي آباد کې ماین چاودنې ۲ کسه وژلي

ارشیف

د کندز په علي آباد و لسوالۍ کې د ماین په چاودنه کې دوه ملکي وګړي وژل شوي دي.

د کندز د امنیه قومندانۍ ویاند هجرت الله اکبري نن رسنیو ته وویل چې طالبانو د یادې ولسوالۍ په رمضاني کلي کې ماین خښ کړی وو چې نن سهار پر ملکي وګړو وچاودېد.

د ښاغلي اکبري په خبره په دې پېښه کې ۴ نور ملکیان ټپیان شوي دي.

طالبانو تر اوسه په اړه تبصره نه ده کړې.

چارواکي: فیض آباد کې  ۹ وسله والو طالبانو ته مرګ ژوبله اوښتې

ارشیف

چارواکي وايي، د بدخشان په فیض آباد ښار کې ۴ وسله وال طالبان وژل شوي او ۵ نور ټپیان دي.

د بدخشان د امنیه قومندانۍ ویاند ثناالله روحاني نن آزادي راډیو ته وویل چې دا پېښه تېره شپه د طالبانو تر برید وروسته وشوه.

هغه زیاته کړه: " د دولت وسله والو مخالفینو تېره شپه د دوآبه په یفتل سیمه کې د ملي پاڅون کوونکو پر پوستو ډله ییز بریدونه وکړل چې د افغان ځواکونو له سخت مقاومت سره مخامخ شول، دغې نښتې تر درېیو بجو دوام وکړ، طالبانو بېرته شاتګ وکړ."

ښاغلی روحاني زیاتوي چې په دې نښتو کې د قومندان غازي په نوم د سیمه ییزو پولیسو یو قومندان هم وژل شوی او یو بل ملګری یې ټپي شوی دی.

وسله والو طالبانو تر اوسه د دې پېښې په اړه څه نه دې ویلي.

افغان چارواکي: ټول هېواد کې لسګونه پراختیايي پروژې پلي کېږي

ارشیف

د افغانستان د کلیو او پراختیا وزارت وايي، په دغه هېواد کې ۲۵۹ پراختیايي پروژې پلي کوي.

د دغو پروژو تړون نن له یو شمېر خصوصي شرکتونو سره لاسلیک شو.

د افغانستان د کلیو او پراختیا وزارت ویاند فریدون اژند وايي، چې د دغو پروژو ټولیز لګښت له دوو میلیاردو افغانیو اوړي او په لومړي ځل کوچیان هم ورنه برخمن شوي.

د دغه وزارت د اعلامیې پر بنسټ، په یادو پروژو کې د څښاک د پاکو اوبو، سړکونو، استنادي او محافظتي دېوالونه او د اوبو رسولو د کانالونه جوړول شامل دي.

په اعلامیه کې راغلي، له نویو پروژو به په لرې پرتو سیمو کې ۲ میلیون کسان ګټه واخلي، او له یو نیم میلیون زیاتې کاري ورځې به هم رامنځته کړي.

اسټرالیايي کمپنۍ د افغانستان کانونو راایستنې برخه کې پانګه اچونه کوي

ارشیف

د افغانستان د کانونو او پټرولیم وزارت وايي، اسټرالیا فورټسکیو میټل کمپنۍ په افغانستان کې د سروزور، لیتیم او اوسپنې د کانونو د راایستنې په برخه کې پانګونې ته لېوالتیا ښودلې.

د دغه وزارت ویاند عبدالقدیر مطفي نن ازادي راډيو ته وویل، چې د دغې کمپنۍ او د کانونو وزارت د تخنیکي ټیمونو ترمنځ د چارو د ښې همغږۍ او تخننیکي معلوماتو شریکولو لومړنۍ ناسته د پنجشنبې په ورځ وشوه.

مطفي زیاته کړه: "د تفاهم لیک پر بنسټ اسټرالیا فورتسکیو میټل ګروپ کمپنۍ، چې یو شمېر ملیارډران په کې راټول شوي لېوالتیا ښودلې، چې په افغانستان د سره زرو، لیتیم او اوسپنه د کانونو د استخراج په برخه کې پانګونه وکړي."

د ښاغلي مطفي په خبره د افغان حکومت او فورتسکیو میټل کمپنۍ ترمنځ د لاسلیک شوي تفاهم لیک پربنسټ به یاده کمپنۍ په بېلابېلو برخو کې له پانګونې سربېره د تخنیکي ظرفیتونو په لوړلو کې هم له افغانستان سره مرسته کوي.

د افغانستان په بامیانو، پکتیکا، بدخشان، یو شمېر ولایتونو کې د سرو زرو، اوسپنې او مسو پراخې کانانونو موجود دي.

نور راوښيه

XS
SM
MD
LG