د لاسرسۍ وړ لېنکونه

تازه خبر
پنجشنبه ۱۰ تله ۱۳۹۹ کابل ۱۲:۱۹

نړۍ

لیبیا کې په رسمیت پېژندل شوي حکومت اوربند اعلان کړ

ارشیف

په لیبیا کې د ملګرو ملتونو لخوا په رسمیت پېژندل شوي حکومت سملاسي اوربند اعلان کړ.

په طرابلس کې د واکمن حکومت صدراعظم فایز السراج جمعه په یوه انلاین پیغام کې وویل چې پوځیانو ته یې امر کړی اوربند وکړي.

فایز زیاته کړه چې کال ته به ولسمشرۍ ټاکنې هم ترسره شي.

صدراعظم ویلي، د دې کار هدف دا دی چې په هېواد کې یې امن راشي او بهرني قراردادي جنګیالي ووځي.

د فایز تر قومندې لاندې پوځیانو دوه میاشتې مخکې طرابلس ته نږدې د څو سیمو کنټرول په لاس کې واخیست او د ملیشه قومندان خلیفه باالقاسم حفتر د پوځي کمپاین مخه یې ونیوله.

ترکیه او قطر د طرابلس له حکومته ملاتړ کوي په داسې حال کې چې مصر، روسیه او متحده عربي امارات د حفتر ملاتړي دي.

خلیه حفتر چې د حکومت پر ضد وسله والو پاڅون کړی تر اوسه د اوربند په اړه کومه تبصره نه ده کړې.

خلیفه حفتر د لیبیا د پخواني دیکتاتور معمر قذافي قومندان و چې بیا ورسره چپ شو او په ۲۰۱۱ کال کې د معمر تر وژل کېدو وروسته بېرته هېواد ته ستون شو چې تر اوسه د واک د ترلاسه کولو لپاره مبارزه کوي.

د ورځې تازه خبرونه دلته ولولئ

د امریکا دوه ستر هوایي شرکتونه له ۳۲ زرو زیات کارکوونکي له کاره رخصتوي

د امریکا بیرغ

د امریکا دوه ستر هوایي شرکتونو امیریکن او یونایټډ په پام کې لري چې سر له ننه له ۳۲ زرو زیات کارکوونکي له کاره رخصت کړي.

له دغو دواړو شرکتونو چې له کانګرسه‌یې د میلیاردونو ډالرو مرسته ترلاسه کړې، غوښتل شوي و چې د سپټمبر د میاشتې تر پایه څوک له کاره ونه‌باسي. که له دوی سره بیا مرسته ونه‌شي ښایي ګڼ کسان له کاره وباسي.

دواړو هوایي شرکتونو ویلي چې د دې کار مخه نیول کېدای شي که د ټرمپ اداره او کانګرس د کارونو د خوندیتوب د ملاتړ لپاره د شپږو نورو میاشتو په مخه پر نورو ۲۵ میلیارده ډالرو مرستې موافقه وکړي.

که څه هم دواړه ګوندونه د هوایي شرکتونو ملاتړ کوي، خو تمه ده چې دغه مرسته به د مرستو په یوه لویه بسته کې شامله وي.

د استازو جرګې مشرې نانسي پلوسي او د خزانې وزیر سټیفن منوچین پرون له څه باندې یوه میاشت وروسته د لومړي ځل لپاره سره مخامخ ولیدل ترڅو یوه حل لاره ومومي.

د کانګرس غړي تر فشار لاندې دي چې د نومبر په درېیمه تر انتخاباتو مخکې باید د ځپل شوي اقتصاد د رغولو لپاره پر مرستې موافقه وکړي.

پوتین او مکرون د اذربایجان او ارمنستان د جګړې د بندېدو غوښتنه وکړه

د روسیې ولسمشر ولادیمیر پوتین او د فرانسې ولسمشر امانوئل مکرون

د روسیې ولسمشر ولادیمیر پوتین او د فرانسې ولسمشر امانوئل مکرون د نګورنو قره‌باغ شااوخوا د اذربایجان او ارمني ټبره ځواکونو ترمنځ د جګړې د بندېدو غوښتنه وکړه.

کرملېن نن وویل چې دواړو مشرانو د ټیلیفون له لارې د نګورنو قره‌باغ د لانجمنې سیمې پر سر د شخړو د ډیپلوماتیک هواري پر لارو چارو خبرې وکړې.

دا په څو کلونو کې تر ټولو سختې نښتې دي چې د دې سیمې پر سر له څلورو ورځو راهیسې پیل شوي دي.

دواړو مشرانو ویلي، چمتو دي چې د دغو جګړو د بندولو او د اروپا د امنیت او همکارۍ د سازمان له‌خوا د مېنسک په نوم ډلې چې مشري یې په ګډه روسیه، فرانسه او متحده ایالات کوي، له‌خوا د خبرو د بېرته پیلولو په ملاتړ اعلامیه خپره کړي.

د اذربایجان او ارمني ټبره ځواکونو ویلي چې جګړو ته به دوام ورکړي چې دا د یوې احتمالي بشپړې جګړې د پېښېدو او سیمې د کړکېچ د پراخېدو په اړه اندېښنې زیاتوي.

دواړو لورو له راز راز وسلو څخه پر یو بل بریدونه کوي.

عراق کې پر امریکایي پوځیانو توغندي ویشتل شوي

ارشیف

په عراق کې هغه وسله‌وال چې ایران‌یې ملاتړ کوي د کردستان په اربیل ښار کې پر امریکایي پوځیانو توغندي ویشتي دي.

دا خبره د عراق د کردستان په نیمه خپلواکه سیمه کې د ترورېزم ضد ادارې وکړه.

دې ادارې په خپله خبرپاڼه کې چې پرون‌یې خپره کړه ویلي دي چې په نینوا ولایت کې د شېخ امیر د کلي له لوري شپږ توغندي د اربیل پر هوایي ډګر توغول شوي دي.

په دې ځای کې امریکایي ځواکونه دېره دي.

د دغو توغندیو څلور د هوایي ډګر په غولي کې چاودېدلي دي او دوه‌یې نه‌دي منفجر شوي.

شېخ نواف ال احمد الصباح د کوېټ د نوي امیر په توګه لوړه وکړه

د کوېټ نوي امیر شېخ نواف ال احمد الصباح

شېخ نواف ال احمد الصباح د کوېټ د نوي امیر په توګه لوړه وکړه.

دی د کوېټ د متوفی امیر میرنی ورور دی چې څو کاله‌یې د کوېټ د امنیتي چارو په برخه کې کار کړی دی.

د کوېټ مخکېنی امیر صباح احمد الصباح درې ورځې مخکې د ۹۱ کلونو په عمر وفات شو.

داسې اټکل نه‌کېږي چې د کوېټ نوی ۸۳ کلن امیر به د خپل ورور ډیپلوماتیک مسیر په بله روان کړي.

نوی ولیعهد لا نه‌دی ټاکل شوی.

چک د کرونا ویروس د خپرېدو مخنیوي لپاره بېړنی حالت اعلان کړ

چک جمهوریت کې د کرونا د مخنیوي لپاره خلکو ماسکونه تړلي

چک جمهوریت سر له راتلونکې دوشنبې د کرونا ویروس د خپرېدو د مخنیوي لپاره یو ځل بیا بېړنی حالت اعلان کړ.

د چک روغتیا وزیر رومان بریمولا د چهارشنبې په ورځ د حکومتي چارواکو تر فوق‌العاده غونډې وروسته وویل: "ګڼو لاملونو دې ته اړ کړم چې د بېړني حالت وړاندیز وکړم. اوسنی وضعیت ښه نه‌دی. چک جمهوریت په وروستیو کې یو له هغو هېوادونو نه دی چې ډېر کسان په‌کې په کرونا ویروس اخته شوي. موږ باید د بریتانیا، فرانسې یا اسرائیل په څېر یو لړ اقدامات د دې لپاره وکړ چې د زیاتېدو مخه ونیسو."

د بندیز د لومړیو دوو اوونیو په مخه به تر ۲۰ تنو ډېر په بهر کې او تر ۱۰ ډېر په داخل کې نه‌شي سره یوځای کېدلی، لوبو ته به نندارچیان نه‌کېني، منځني ښوونځي به بندېږي او په روغتونونو کې به د مرستې لپاره د طب له محصلینو مرسته غوښتل کېږي.

په چک جمهوریت کې په وروستۍ یوې میاشت کې تر ۴۰ زره ډېر کسان په کرونا اخته شوي چې د نفوس په تناسب په اروپا کې دوهم هېواد دی چې ډېر کسان په‌کې 'کووېډ-۱۹' ناروغۍ نیولي دي.

چک جمهوریت د مارچ په میاشت کې لومړی ځل د کرونا د خپرېدو د مخنیوي لپاره اضطراري حالت اعلان کړی و چې دوه میاشتې یې دوام وکړ.

د 'ای پي ایل' سیالیو دوام؛ راشد خان په لومړي ځل جایزه واخیسته

راشد خان

د هندوستان د کرکټ غوره لیګ سیالیو 'ای پي ایل' په روانو سیالیو کې افغان لوبغاړي راشد خان د لومړي ځل لپاره د غوره لوبغاړي جایزه واخیسته.

راشد خان د تېرې شپې په لوبه کې د ډېلي کپیټلز لوبډلې درې مهم لوبغاړي له میدانه بهر کړل او د سنرایزرس حیدراباد لوبډلې ته‌يې بریا خپله کړه.

راشد خان په څلورو اورونو کې تر ټولو کمې ۱۲ منډې ورکړې او درې مهمې وېکټې يې واخیستې.

په دې لوبه کې چې تېره شپه د ابوظبي په لوبغالي کې ترسره شوه، سنرایزرس حیدراباد لوبډلې په ټاکلو ۲۰ اورونو کې د څلورو لوبغاړو په سوځېدو ۱۶۳ منډې هدف وټاکه، خو ډېلي لوبډلې یاد هدف پوره نه‌شو کړای او د اووه لوبغاړو په سوځېدو يې ایله ۱۴۷ منډې وکړې او دا لوبه‌يې د ۱۵ منډو په توپیر سیالې لوبډلې ته وبایلله.

دا په روانو لوبو کې د حیدراباد لومړۍ بریا ده او د ډېلي کپيټلز لومړۍ ماتې ده.

د دې سیالیو د نن ماښام په لوبه کې چې د دوبۍ په نړیوال کرکټ لوبغالي کې به ترسره شي راجستان رایلز او کلکته نایټ رایډرز لوبډلې د یو بل په وړاندې د سیالۍ ډګر ته ځي.

هند کې پر یوه جومات د حملې تورنو طراحانو ۳۰ کاله وروسته برائت واخیست

د هند ستره محکمه

یوې هندي محکمې ټولو هغو ۳۲ کسانو ته چې نږدې ۳۰ کاله دمخه پر یوه جومات په برید کې په لاس لرلو تورن وو، برائت ورکړ.

هغه برید د هندوانو او مسلمانانو ترمنځ تاوتریخوالی راوپاراوه او شاوخوا دوه زره کسان په‌کې ووژل شول.

د هند د ملت‌پالي بهاراتیا جاناتا ګوند یو شمېر لوړپوړي مشران په تورنو کسانو کې شامل وو چې نن د سپټمبر ۳۰مه برائت ورکړل شو.

دغو کسانو هغه تورونه رد کړي چې ګواکې په ۱۹۹۲ کال کې یې په اتراپرادېش ایالت کې د بابري په نوم د ۱۶مې پېړۍ پر جومات د برید سپارښتنه کړې وي.

هندوان په دې باور دي چې دا جومات د رام په نوم د دوی د یوه خدای په زېږن ځای کې جوړ شوی او ادعا کوي چې جومات د یوه زیارت پر سر جوړ شوی وو.

په ۱۹۹۳ کال کې ۴۹ کسان په دې برید کې په لاس لرلو تورن شول، خو له هغه وخته له دې ډلې ۱۷ کسان مړه شوي دي.

پاتې ۳۲ تنو نن د یوې ځانګړې محکمې څخه برائت واخیست.

محکمې حکم وکړ چې دا جومات د ټولنې ضد عناصرو له‌خوا وران شوی وو او داسې اسناد نه‌شته چې دا کار له مخکې پلان شوی ثابت کړي.

تېر ۲۴ ساعته اوکراین کې له ۴۰۰۰ ډېر کسان په کرونا ویروس اخته شوي

تر اوسه په اوکرایین کې ۹۵۹۲۰۲ تنه په کرونا ویروس اخته شوي .

په اوکراین کې په تېرو ۲۴ ساعتونو کې څه باندې ۴۰۰۰ کسان په کرونا ویروس اخته شوي دي.

دا د روان کال د مې میاشتې راهیسې چې دا وبا په اوکراین کې خوره شوه، په دې هېواد کې په یوه ورځ د کویډ ۱۹ ناروغانو تر ټولو لوړه شمېره ده چې ثبت شوه.

د اوکراین د عامې روغتیا وزیر ماکسیم ستیپانوف نن په کیف کې خبریالانو ته وویل، په ۴۰۲۷ نویو ناروغانو کې ۲۷۶ تنه یې ماشومان او ۱۷۱ تنه روغتیایې کارکوونکي دي.

د ستیپانوف په خبره له دې شمېرې څخه ۷۳۳ تنه په روغتون کې بستر شوي دي.

تر اوسه په اوکرایین کې ۹۵۹۲۰۲ تنه په کرونا ویروس اخته شوي چې ۴۱۲۹ ترې مړه شوي دي.

'ترکیې د ارمنستان یوه جنګي الوتکه نسکوره کړې'

د ترکیې جنګي الوتکې لوېدل

ارمنستان وایي، د ترکیې 'اف-۱۶' جنګي جټ الوتکې یې یوه جنګي الوتکه رانسکوره کړې ده.

انقرې سمدستي د ایریوان دغه ادعا نادرسته وبلله.

د ارمنستان د دفاع وزارت یوه ویاند شوشان استی پنیان په خپله فېس‌بوک پاڼه کې لیکلي چې د سوخوی سو ۲۵ الوتکه‌یې د دې هېواد په هوایي قلمرو کې د مأموریت په جریان کې رانسکوره شوې ده.

د هغه په وینا د الوتکې پیلوټ د یوه اتل په څېر خپل ژوند له لاسه ورکړ.

د ارمنستان د تېرې ورځې دغه ادعا داسې مهال کېږي چې له اذربایجان سره د لانجمنې سیمې نګورنو قره‌باغ پر سر د دې هېواد جګړه پرون پرله‌پسې درېیمه ورځ روانه وه.

نړیوالې ټولنې له دواړو لورو غوښتي چې شخړې سمدستي پای ته ورسوي.

د ملګرو ملتونو امنیت شورا د نګورنو قره‌باغ د جګړې د درېدو غوښتنه وکړه

د ملګرو ملتونه امنیت شورا

د ملګرو ملتونو امنیت شورا د نګورنو قره‌باغ د جګړې د سمدستي درېدو غوښتنه وکړه.

امنیت شورا بېګا د ارمنستان او اذربایجان ترمنځ د نګورنو قره‌باغ په لانجمنه سیمه باندې د تازه جګړې په اړه غونډه درلوده.

د دې شورا غړو د جګړې د سمدستي درېدو غږ وکړ او هم‌یې د ملګرو ملتونو د سرمنشي له هغه دریځه ملاتړ وکړ چې ښکېلې خواوې باید له تاوتریخوالي لاس په سر شي او مؤثرو خبرو ته وګرځي.

ارمنستان د نګورنو قره‌باغ په جګړه کې ترکیه هم د اذربایجان په ملاتړ تورنه کړې او پرون‌یې ادعا کړې چې د ترکیې یوه جټ الوتکه‌یې نسکوره کړې ده.

ترکیې دا ادعا رد کړه.

دواړو خواو ته تر پرونه چې د جګړې درېیمه ورځ وه د ډېرو تلفاتو د اوښتو خبره شوې ده.

ټرمپ او جوبایډن ترمنځ مناظره کې دواړو یو بل وننګول

د امریکا ولسمشر ډونالد ټرمپ او ډیموکرات کاندید جوبایډن ترمنځ لومړنۍ ټلوېزیوني مناظره

د امریکا متحده ایالاتو د ولسمشرۍ ټاکنو د کاندیدانو ډونالد ټرمپ او جوبایډن ترمنځ لومړنۍ ټلوېزیوني مناظره وشوه.

دا مناظره د اوهایو ایالت په کلویلند کې د فاکس نیوز د نطاق کریس والاس په کوربه‌توب وشوه چې له اول سره کاندیدانو په یو بل لفظي ګوزارونه کول.

جوبایډن ټرمپ یو مسخره او د پوتین لاسپوڅی وباله او په یوه برخه کې یې هغه ته وویل چې غلی کېږې (خوله بندوې) که نه؟

ټرمپ هم په ځواب کې بایډن ته کیڼ اړخی افراطي ووایه او څو واره‌یې هغه له افراطیانو سره تړلی وباله.

په دې مناظره کې د امریکا متحده ایالاتو په اکثرو کورنیو مسئلو د کرونا له مدیریت، اقتصادي کمزوریو، توکم‌پالنې او د قانون د حاکمیت په مسئلو بحث وشو.

د کرونا ویروس د مدیریت په برخه کې د ټرمپ په ادارې باندې د جوبایډن له‌خوا د کم‌کارۍ نیوکې وشوې او ویې‌ویل چې دوه لکه کسان مړه شول، خو ټرمپ وویل چې که دا د جوبایډن اداره وی ښايي دوه میلیونه امریکایان به مړه شوي و.

د توکم‌پالنې په لانجمنه موضوع هم دواړو کاندیدانو په یو بل نیوکې وکړې.

د قانون د حاکمیت په برخه کې چې جوبایډن د ډیموکراتانو مخکينۍ اداره بریالۍ بلله د ټرمپ له نیوکو سره مخ شو او ويې‌ویل په اکثرو هغو ښارونو کې پېښې شوي چې والیان او ښاروالان‌یې ډیموکراتان دي.

د کوېټ امیر شېخ صباح احمد جابرالصباح مړ شو

د کوېټ امیر شېخ صباح احمد جابرالصباح

د کوېټ امیر شېخ صباح احمد جابرالصباح د ۹۱ کلنۍ په عمر مړ شو.

د کوېټ د شاهي چارو وزیر شېخ علي جراح الصباح پرون ناوخته د ټلوېزیون له لارې د هغه د مړینې خبر ورکړ.

د کوېټ د امیر د روغتیایي وضعیت په اړه له څو میاشتو راهیسې ګونګوسی روانې وې.

شېخ صباح له تېر کال راهیسې څو ځلې روغتون ته لېږدول شوی و.

نوموړي په ۲۰۰۶ کال د تېلو د دغه تولیدوونکي او د متحده ایالاتو د متحد هېواد د چارو واګې په لاس کې اخیستې وې.

د هغه ورور ولیعهد شېخ نواف احمد الصباح د هغه د ځای ناستي په توګه معرفي شوی دی.

د شارلي ابدو پر دفتر حمله کوونکی: نه‌پوهېدم چې د مجلې دفتر بدل شوی

په ۲۰۱۵ کال په پاریس کې د شارلي ابدو پر دفتر په حمله کې دولس تنه ووژل شول. 

هغه پاکستاني وګړي چې د طنزیه مجلې شارلي ابدو د پخواني دفتر په مخکې د دوو تنو په ټپي کولو تورن دی ویلي چې دی نه‌پوهېده چې د دغې مجلې دفتر بدل شوی او غوښتل‌یې چې هغه ته اور ورته کړي.

دا خبره د فرانسې یوه څارنوال ژان فرانسوز ریکارډ پرون خبریالانو ته وکړه.

د هغه په وینا دغه مشکوک کس چې ځان‌یې ۱۸ کلن حسن معرفي کړی، غوښتل چې د اور لګېدو له درې بوتلونو په استفادې دغه دفتر ته اور واچوي.

په ۲۰۱۵ کال په پاریس کې د شارلي ابدو پر دفتر په حمله کې ۱۲ تنه ووژل شول.

حمله کوونکو دغه حمله د دغې مجلې له‌خوا حضرت محمد ته د منسوبو کاریکاتورونو د خپرولو په غچ کې کړې وه.

تر دغې حملې وروسته د دغې مجلې دفتر یوه ناڅرګند ځای ته لېږدول شوی دی.

دغې مجلې روانه میاشت کې له حمله کوونکو سره د اړیکو لرلو په تور د ۱۴ کسانو د محاکمې له پیل سره هم‌مهاله بیا دغه کاریکاتورونه خپاره کړي و.

د 'ای پي ایل' سیالیو په لړ کې نن ډیلي او حیدراباد سره لوبه کوي

په سنرایزرز حیدراباد ټیم کې دوه افغان لوبغاړي راشد خان او محمد نبي هم شامل دي. 

د هندوستان د کرکټ غوره لیګ یا 'ای پي ایل' سیالیو په لړ کې نن د ډیلي کاپیټلز او سنرایزرز حیدراباد ټیمونه په خپلو کې سیالي لري.

دواړه ټیمونه به د کابل پر وخت د ماښام شپږنیمې بجې د ابوظبۍ د کرکټ په میدان کې سره مخامخ شي.

په سنرایزرز حیدراباد ټیم کې دوه افغان لوبغاړي راشد خان او محمد نبي هم شامل دي.

په پرونۍ مسابقه کې چې د رویال چلنجرز بنګلور او ممبۍ انډینز ترمنځ وه، مسابقه چې په شلو اوورونو کې مساوي شوه سوپر اوور ته ووتله، خو وروسته په اضافي اوور کې رویال چلنجرز ټیم وتوانېد سیالي وګټي.

د بیلاروس د کړکېچ اواري لپاره د فرانسې هڅې

د فرانسې ولسمشر ایمانویل مکرون

د فرانسې ولسمشر ژمنه وکړه، چې اروپا به په بیلاروس کې د روان کړکېچ د اواري لپاره په منځګړیتوب کې همکاري وکړي.

ایمانویل مکرون دا خبره په لیتوانیا کې د بیلاروس د اپوزیسیون له مشرې سویتلانا څیخانوفسکایا سره تر کتنې وروسته وکړه.

د بیلاروس د اپوزیسیون مشرې وویل، د فرانسې ولسمشر په بیلاروس کې د روان کړکېچ د حل لپاره له خپلې وسې سره د همکارۍ ژمنه ورسره وکړه.

بلخوا د لیتوانیا ولسمشر ګیتاناس ناوسیدا چې د خپل فرانسوي سیال تر څنګ و، په ویلنیوس کې خبریالانو ته په خبرو کې وویل، د ولسمشرۍ تېرې ټاکنې، چې په نتیجه کې یې الکساندر لوکاشینکا بریالی اعلان شوی، عادلانه نه وې.

هغه زیاتوي: "الکساندر لوکاشینکو ټاکنې نه دي ګټلي، دا ټاکنې غیرعادلانه وې او لاسوهنې په کې شوي، تر هغو چې په دغه هېواد کې تازه ټاکنې شوې نه وي، موږ لوکاشینکا د مشروع مشر په توګه نه شو منلی."

که څه هم لوکاشینکا ځان د اګسټ د نهمې د ولسمشرۍ ټاکنو ګټونکی بولي، خو اپوزیسیون چې له هغې راهیسې اعتراضونه کوي، وايي په ټاکنو کې درغلي شوې او ګټونکې څیخانوفسکایا ده.

نور راوښيه

XS
SM
MD
LG