د لاسرسۍ وړ لېنکونه

تازه خبر
چهارشنبه ۹ تله ۱۳۹۹ کابل ۰۳:۳۸

نړۍ

د تاجکستان ولسمشر: هیله لرم ژر تر ژره افغانستان کې بشپړه سوله راشي

د تاجکستان-بدخشان سرحدي سیمه

د تاجکستان ولسمشر امام علي رحمان ویلي په دې هیله دی چې ژر تر ژره په افغانستان کې بشپړه سوله تأمین شي.

رحمان پرون د تاجکستان-بدخشان سرحدي سیمې ته تللی و او د امو سیند په غاړه ولاړو افغانانو ته‌یې په لوډ سپیکر باندې وینا کوله.

هغه زیاته کړه: "په دې هیله یم چې زموږ په ملګري او ورور هېواد د افغانستان په اسلامي جمهوریت کې ژر تر ژره بشپړه سوله او ثبات ټینګ شي، څو په مټ‌یې زموږ تګ راتګ، د خپلویو پالل، کار، سوداګري او نورې فرهنګي او علمي همکارۍ پراخې شي."

د درواز سیمې اوسېدونکو له امام علي رحمان وغوښتل چې په سیمه‌ییزه کچه دې د دوی د اوبو، برښنا او لارو غم وخوري هغه څه چې رحمان ورسره د پوره کېدو ژمنه وکړه.

د تاجکستان سیاسي شنونکی بهرالدین پولادي بیا وايي امام علي رحمان د ولسمشرۍ ټاکنو په مخه ځان ته کمپاین کوي او غواړي وښيي چې نه‌یوازې په تاجکستان، بلکې د افغانستان په خلکو کې هم محبوبیت لري.

د ورځې تازه خبرونه دلته ولولئ

د 'ای پي ایل' سیالیو په لړ کې نن ډیلي او حیدراباد سره لوبه کوي

په سنرایزرز حیدراباد ټیم کې دوه افغان لوبغاړي راشد خان او محمد نبي هم شامل دي. 

د هندوستان د کرکټ غوره لیګ یا 'ای پي ایل' سیالیو په لړ کې نن د ډیلي کاپیټلز او سنرایزرز حیدراباد ټیمونه په خپلو کې سیالي لري.

دواړه ټیمونه به د کابل پر وخت د ماښام شپږنیمې بجې د ابوظبۍ د کرکټ په میدان کې سره مخامخ شي.

په سنرایزرز حیدراباد ټیم کې دوه افغان لوبغاړي راشد خان او محمد نبي هم شامل دي.

په پرونۍ مسابقه کې چې د رویال چلنجرز بنګلور او ممبۍ انډینز ترمنځ وه، مسابقه چې په شلو اوورونو کې مساوي شوه سوپر اوور ته ووتله، خو وروسته په اضافي اوور کې رویال چلنجرز ټیم وتوانېد سیالي وګټي.

د بیلاروس د کړکېچ اواري لپاره د فرانسې هڅې

د فرانسې ولسمشر ایمانویل مکرون

د فرانسې ولسمشر ژمنه وکړه، چې اروپا به په بیلاروس کې د روان کړکېچ د اواري لپاره په منځګړیتوب کې همکاري وکړي.

ایمانویل مکرون دا خبره په لیتوانیا کې د بیلاروس د اپوزیسیون له مشرې سویتلانا څیخانوفسکایا سره تر کتنې وروسته وکړه.

د بیلاروس د اپوزیسیون مشرې وویل، د فرانسې ولسمشر په بیلاروس کې د روان کړکېچ د حل لپاره له خپلې وسې سره د همکارۍ ژمنه ورسره وکړه.

بلخوا د لیتوانیا ولسمشر ګیتاناس ناوسیدا چې د خپل فرانسوي سیال تر څنګ و، په ویلنیوس کې خبریالانو ته په خبرو کې وویل، د ولسمشرۍ تېرې ټاکنې، چې په نتیجه کې یې الکساندر لوکاشینکا بریالی اعلان شوی، عادلانه نه وې.

هغه زیاتوي: "الکساندر لوکاشینکو ټاکنې نه دي ګټلي، دا ټاکنې غیرعادلانه وې او لاسوهنې په کې شوي، تر هغو چې په دغه هېواد کې تازه ټاکنې شوې نه وي، موږ لوکاشینکا د مشروع مشر په توګه نه شو منلی."

که څه هم لوکاشینکا ځان د اګسټ د نهمې د ولسمشرۍ ټاکنو ګټونکی بولي، خو اپوزیسیون چې له هغې راهیسې اعتراضونه کوي، وايي په ټاکنو کې درغلي شوې او ګټونکې څیخانوفسکایا ده.

پولنډ له خپلې خاورې ۵ تاجکستانيان وایستل

شک کېږي چې دغو کسانو د پولنډ او اوکراین وګړي په پولنډ کې د تروریستي اعمالو لپاره ګمارل. 

د پولنډ چارواکو د تاجکستان ۵ وګړي له اسلامي دولت ډلې یا داعش تروریستي ډلې سره د اړیکو په شک له خپلې خاورې وایستل.

شک کېږي چې دغو کسانو د پولنډ او اوکراین وګړي په پولنډ کې د تروریستي اعمالو لپاره ګمارل.

پولنډ راډیو پرون راپور ورکړ، د تاجکستان د دغو وګړو له ډلې څلور یې په مې میاشت کې نیول شوي وو او پنځم چې په ډسېمبر میاشت کې له پولنډه تښتېدلی و، چې وروسته د ټروریزم ضد نړیوالو ادارو په مرسته ونیول شو.

د پولنډ د یوې امنیتي ادارې په وینا دغه پنځم مشکوک کس سوریې ته سفر کاوه او غوښتل یې د داعش له تروریستي ډلې سره ملګری او په القاعده پورې له یوه تروریستي سازمان سره نږدې تماسونه ټینګ کړي.

د تاجکستان دغه پنځه وګړي پولنډ او د شنګهن حوزې نورو غړو هېوادونو ته له ننوتلو منع شوي دي.

د نګورنو قره‌باغ​​​​​​​ لانجمني سیمې پر جګړه درېیمې ورځې ته وغځېده

د اذرباییجان دفاع وزارت وايي، د ارمنستان پوځ پر داش کیسان سیمه د توپونو ډزې کړي، خو ارمنستان دا تورونه ناسم بللي دي. 

د ارمنستان او اذرباییجان د ځواکونو ترمنځ د نګورنو قره‌باغ لانجمني سیمې پر سر وسله واله شخړه نن درېیمې ورځې ته وغځېده.

په داسې حال کې چې په نړیواله کچه د دې جګړې د سمدستي بندېدو غوښتنه شوې، دواړه لوري یو او بل جګړې ته په لمن وهلو تورنوي.

په دې جګړه کې له دواړو لوریو د لسګونو کسانو د وژل کېدو راپورونه ورکړل شوي دي.

بلخوا د امریکا د بهرنیو چارو وزیر مایک پامپیو چې په یونان کې له خپل سیال سره تر کتنې وروسته، په یوه کنفرانس کې د ناګورنو قره باغ د جګړې په اړه وویل: "د یونان د بهرنیو چارو وزیر او ما د نګورنو قره‌باغ پر شخړې خبرې وکړې، اړتیا ده، چې دواړه لوري دغه تاوتریخوالی ودروي او څومره ژر چې ممکنه وي واقعي مذاکرو ته د ستنېدو لپاره د مینسک ډلې له مشترکینو سره له نږدې کار وکړي."

د اذرباییجان دفاع وزارت وايي، د ارمنستان پوځ پر داش کیسان سیمه د توپونو ډزې کړي، خو ارمنستان دا تورونه ناسم بللي دي.

بلخوا د ارمنستان دفاع وزارت وايي، وسله واله جګړه په تېزۍ سره روانه ده.

په پام کې ده د ملګرو ملتونو امنیت شورا نن ناوخته پر دې جګړې د بحث لپاره بېړنۍ غونډه راوبولي.

ټرمپ او جوبایډن نن په یوه مناظره کې ګډون کوي

ولسمشر ډونالد ټرمپ او د ډیموکرات ګوند کاندید جوبایډن

په پام کې ده چې د امریکا له انتخاباتو پنځه اوونۍ مخکې د ولسمشرۍ دوه کاندیدان جمهوري غوښتونکی ولسمشر ډونالد ټرمپ او د ډیموکرات ګوند کاندید جوبایډن نن د سپټمبر په ۲۹مه په یوه مناظره کې ګډون وکړي.

دا مناظره داسې مهال جوړېږي چې نیویارک ټایمز ورځپاڼې په یوه تحقیقاتي راپور کې د ولسمشر ټرمپ د مالیو له سوابقو پرده پورته کړې او تمه ده چې د دې یو نیم ساعته مناظرې بحثونه هم تر ډېره پر همدې موضوع متمرکز وي.

په راپور کې ویل شوي چې ټرمپ په تېرو ۱۷ کلونو کې یا هېڅ مالیه نه‌ده ورکړې او که‌یې ورکړې هم ډېره کمه وه.

ښاغلي ټرمپ د نیویارک ټایمز راپور جعلي خبر بللی او پرون‌یې پر ټویټر ولیکل چې ده څو میلیونه ډالر مالیه ورکړې، خو زیاتوي چې دی هم د نورو وګړو په څېر د مالیې د کرېډېټ او تخفیف مستحق دی.

پر دې سربېره بایډن په پام کې لري چې د کرونا ویروس د مخنیوي لپاره د ولسمشر ټرمپ پر پلانونو او نورو پالېسیو هم انتقادونه وکړي.

د کوسوو د استخباراتي ادارې پخوانی مشر هاګ کې محکمې ته وړاندې شو

د کوسوو بیرغ

د کوسوو د استخباراتي ادارې پخوانی مشر په هاګ کې د جنګي جرایمو په تور محکمې ته وړاندې شو.

صالح مصطفی د دوشنبې په ورځ (د سپټمبر په ۲۸مه) د استېناف محکمې ته له مراجعې ډډه وکړه.

ده وویل چې د استېناف تر مراجعې مخکې به له خپل مدافع وکیل سره مشوره وکړي.

دی ۳۰ ورځې لري چې د استېناف محکمې ته مراجعه وکړي.

مصطفی د تېرې پنجشنبې په ورځ (د سپټمبر په ۲۴مه) نېټه د کوسووو په پلازمېنه پریشتینیه کې په خپل کور کې ونیول شو.

دی لومړی الباني نژاده دی چې د ۱۹۹۰مې لسیزې د جګړې په تړاو د جنګي جرایمو په تور نیول کېږي.

د کوسوو سپېشلېسټ چېمبرز په نوم په هاګ کې محکمه د کوسوو د ازادۍ ځواک د هغو غړو پر وړاندې تورونه څېړي چې په ۱۹۸۸ او ۹۹ کلونو کې له صربیا څخه د خپلواکۍ د جګړې پر مهال په جنګي او بشریت ضد په جرایمو تورن دي.

دا محکمه د کوسوو د قانون له مخې پر مخ ځي، خو د شاهدانو د خوندیتوب په خاطر په هالند کې فعالیت کوي.

امانوئل مکرون د بلاروس رژيم د مخالفانو له مشرې سره ویني

د فرانسې ولسمشر امانوئل مکرون

ټاکل شوې ده د فرانسې ولسمشر امانوئل مکرون د بلاروس رژيم د مخالفانو له مشرې سویتلانا تيخانوفسکایا سره په لتوانیا کې وویني.

تيخانوفسکایا ادعا کوي چې دې په بلاروس کې د اګسټ د نهمې ولسمشریز انتخابات ګټلي او له ډېرې مودې واکمن الکساندر لوکاشینکا ته‌یې ماتې ورکړې.

دا وروسته له هغه لتوانیا ته لاړه چې لوکاشینکا د لاریون کوونکو ځپنه پیل کړه. دی دا خبره ردوي چې انتخابات‌یې بایللي دي.

لوکاشینکا په پټه د سپټمبر په ۲۳مه نېټه د لوړې مراسم ترسره کړل او په نتيجه کې يې پر کور او پر نړیواله کچه غصه راوپاروله.

لوېدیځ هېوادونه لوکاشینکا د بلاروس د مشروع ولسمشر په توګه په رسمیت نه‌پېژني او له ده‌یې غوښتي چې په سوله‌ییزه توګه واک انتقال کړي.

له ۵۱ ورځو راهيسې لاریون کوونکي د بلاروس لارو کوڅو ته راوځي او له لوکاشینکا غواړي چې له واکه لیرې شي.

تيخانوفسکایا د خپل سړي پر ځای د ولسمشرۍ په انتخاباتو کې کاندیده شوه، ځکه هغه پولیسو تر انتخاباتو مخکې نیولی وو.

دې ویلي چې د واک ترلاسه کولو وروسته به نوي انتخابات وکړي.

ټرمپ اداره ښايي په عراق کې د امریکا سفارت وتړي

په بغداد کې د امریکا سفارت

که د عراق حکومت د امریکا سفارت امنیت ټینګ نه‌کړي، د ولسمشر ډونالد ټرمپ اداره ښايي په عراق کې امریکايي سفارت وتړي.

د امریکايي خبري اژانسونو د راپور پر اساس، د امریکا د بهرنیو چارو وزیر مایک پومپیو د عراق له صدراعظم مصطفی الکاظمي سره د شنبې په ورځ په ټیلیفوني خبرو کې دا موضوع مطرح کړې ده.

امریکا په دې اړه رسمي اعلان نه‌دی کړی.

امریکا د ایران پر ملاتړ لرونکو ملېشو تور پورې کړی چې په عراق کې د امریکا پر سفارت راکټي حملې کوي او له کاظمي يې غوښتي چې د هغوی مخه ونیسي.

د امریکا په مشرۍ نظامي ائتلاف له بغداده په عراق او سوریه کې د داعش سخت دریځې ډلې پر وړاندې له ۲۰۱۴م کال راهیسې جګړه کوي.

وروسته له هغه چې امریکا په عراق کې د ملېشه ځواکونو پر مرکز هوايي حملې وکړې، د ایران په ملاتړ لاریون کوونکي د ۲۰۲۰ د نوي کال په ورځ په بغداد کې د امریکا سفارت ته ننوتل.

امریکا د عراق پر امنیتي ځواکونو تور پورې کړ چې لاریون کوونکو ته‌یې تر امنیتي چک پوستو د تېرېدو اجازه ورکړې وه.

نړۍ کې د 'کووېډ-۱۹' له کبله د مړو شمېر له یو میلیونو واوښت

د کرونا ناروغۍ له امله مړ شوی کس

په نړۍ کې د 'کووېډ-۱۹' ناروغۍ له کبله د مړو کسانو شمېر له یو میلیونو واوښت.

دا په داسې حال کې ده چې د نړۍ هېوادونه په کرونا ویروس د اخته کسانو د شمېر د زیاتېدو او د دې ناروغۍ د احتمالي دوهمې څپې له اندېښنو سره مقابله کوي.

د 'کووېد-۱۹' له کبله د مړینو شمېر پرون د سپټمبر په ۲۸مه، وروسته له هغه یو میلیون ته لوړ شو چې په هند کې د دې ناروغۍ د مړینو شمېر ۹۵،۵۰۰ ته ورسېد.

په هند کې تېره میاشت د کرونا د مثبتو پېښو په شمېر کې د پام وړ زیاتوالی راغی او اټکل کېږي چې که دا لړۍ همداسې دوام وکړي، نو د 'کووېډ- ۱۹' ناروغانو شمېر به‌یې تر متحده ایالاتو لوړ شي.

د امریکا د جانز هاپکنز پوهنتون وروستۍ شمېرې ښيي چې په کرونا ویروس د اخته کسانو شمېر په ټوله نړۍ کې له ۳۳ میلیونو اوښتی او د مړینو ټول شمېر یو میلیون او ۸۲۵ ته رسېدلی دی.

د ادبیاتو د نوبل جایزې ګټونکې 'سوتلانا الکسېیویچ' بیلاروس پرېښود

سوتلانا الکسېیویچ

د ادبیاتو د نوبل جایزې ګټونکې سوتلانا الکسېیویچ د ځان د خوندي کولو لپاره بیلاروس پرېښود او جرمني ته ولاړه.

دا خبره د جرمني خبري اژانس راپور کړې ده.

په بیلاروس کې له څو اوونیو د رژیم ضد مظاهرې روانې دي او حکومت هر وار سلګونه مظاهره چیان نیسي.

مظاهره چیان له واکه د الکساندر لوکاشینکا لرې کېدل غواړي.

سوتلانا الکسېیویچ چې د ۲۰۱۵ کال د نوبل جایزه ګټلې وه د لوکاشینکو سرسخته مخالفه ده.

۷۲ کلنې بیلاروسۍ لیکوالې او ژورنالیستې سوتلانا الکسېیویچ د خپل ژورنالیستیک مهارت په وسیله د هغو لویو تراژیدیو په اړه لیکنې کړي چې په شلمه پېړۍ کې په بیلاروس کې پېښې شوې دي.

شهباز شريف په ناقانونه توګه د پېسو د لېږد د قضیې په تړاو ونیول شو

د پاکستان د اپوزیسیون او د مسلم ليګ نواز ګوند مشر شهباز شريف

د پاکستان د اپوزیسیون او د مسلم ليګ نواز ګوند مشر شهباز شريف په ناقانونه توګه د پېسو د لېږد د قضیې په تړاو ونیول شو.

نوموړی وروسته له هغه د سېپټېمبر په اته ویشتمه نن دوشنبه د پاکستان د احتساب ادارې نېب له خوا د لاهور سترې محکمې مخ ته ونیول شو چې محکمې یې د ضمانت غوښتنه رد کړه.

نېب ادارې پر هغه د عایداتو په برخه کې د ستونزو په سبب او هم د پیسو د ناقانونه لېږد تورونه لګولي دي.

د نيول کېدو پر مهال د مسلم ليګ نواز ګڼ شمېر غړي موجود و او هغوی د تحريک انصاف حکومت او نېب پر ضد شعارونه ورکول.

شهباز شریف نږدې یوه اوونۍ وروسته له هغه ونیول شو چې ورور یې، د پاکستان پخواني صدراعظم نوازشریف له لندنه په یوه ویډيويي پیغام کې د پاکستان په پوځ تُند ګوزارونه وکړل.

هغه د عمران خان په مشرۍ اوسنی حکومت تورن کړ چې بې واکه دی. ​

د جرمني صدراعظمې د روسیې سیاسي مخالف 'الکسي ناوالني' سره لیدلي

د روسیې عمده سیاسي مخالف الکسي ناوالني

د روسیې عمده سیاسي مخالف الکسي ناوالني تایید کړه چې د جرمني صدراعظمه انګېلامېرکل یې لیدو ته ورغلې وه.

ناوالني وروسته یوه ورځ وروسته له هغه د انګېلامېرکل د لیدنې خبر په خپل ټوېټر ورکړ چې د جرمني دیر شپیګل مجلې راپور ورکړ انګېلامېرکل له ناوالني سره چې په روغتون کې و یوه پټه لیدنه کړې وه.

ناوالني په خپل ټویټر زیاته کړې چې د دې او د جرمني د صدراعظمې لیدنې ته باید مخفیانه ونه ویل شي ځکه د ده په خبره دا یوه خصوصي لیدنه وه او انګېلامېرکل یې له کورنۍ سره هم وغږېده.

الکسي ناوالني ۳۲ ورځې د برلین په یوه روغتون کې بستري و.

اروپايي متخصصینو ویلي چې ناوالني د نوویچوک په نوم د یوې زهري مادې په واسطه بې سده شوی و.

ناوالني وروسته له هغه د اګسټ په ۲۲ له روسیې برلین ته انتقال شو چې د روسیې په سایبریا کې تر بې سده کېدو وروسته کوما ته ولاړ.

الکسي ناوالني چې د روسیې د ولسمشر ولادیمیر پوتین یو سرسخته منتقد دی تېره اوونۍ له روغتون ووت او لا هم په جرمني کې دی.

افغانستان د اذربایجان او ارمنستان د روانې شخړې په اړه اندېښنه ښودلې

د افغانستان د بهرنیو چارو وزارت

د افغانستان د بهرنیو چارو وزارت د اذربایجان او ارمنستان ترمنځ روانې وسله‌والې شخړې باندې اندېښنه ښودلې او د خلکو په وژنه‌یې خواشینې څرګنده کړې.

د جنوبي قفقاز دغو دواړو هېوادونو پرون یو ځل بیا د نګورنو قره‌باغ لانجمنې سیمې پر سر خونړۍ شخړه وکړه او دواړو لورو ته تر ۲۳ پورې عسکر او ملکیان ووژل شول.

نګورنو قره‌باغ سیمه د اذربایجان د خاورې په توګه نړیوالو په رسمیت پېژندلې، خو له کلونو راهیسې د ارمنستان په کنټرول کې ده.

د افغانستان بهرنیو چارو وزارت نن په یوه خبرپاڼه کې ویلي چې دوی دغې سیمه کې د بیا اوربند او د لانجې د سیاسي حل غوښتونکي دي.

اذربایجان او ارمنستان د نګورنو قره‌باغ پر سر نن هم جګړې ته تیاری نیولی

نګورنو قره‌باغ کې ځواکونه

اذربایجان او ارمنستان د لانجمنې سیمې نګورنو قره‌باغ پر سر نن د دوهمې ورځې لپاره هم جګړې ته تیاری نیولی دی.

د جنوبي قفقاز د دغو هېوادونو ترمنځ وسله‌واله شخړه پرون پيل شوه چې د تېرو څلورو کلونو ورته جګړو په پرتله خونړۍ وه.

په پرونۍ نښته کې ۲۳ عسکر او ملکیان ووژل شول او دواړو لورو دغې سیمې ته نږدې هليکوپټرې، بې‌پیلوټه الوتکې او ټانګونه لېږلي دي.

پر دې شخړې د سیمې هېوادونو له هغې ډلې روسیې او ترکیې غبرګون ښودلی او د ژر تر ژره درېدو غوښتنه‌یې کړې ده.

دا مهال دواړو هېوادونو بېړنی پوځي حالت اعلان کړی دی.

د کرونا له امله په نړۍ کې د مړو شویو خلکو شمېر له یو میلیون واوښت

ارشیف، د کرونا ویروس له امله د مړه شویو کسانو لپاره قبرونه

د کرونا له لاسه په ټوله نړۍ کې د مړو شویو خلکو شمېر له یو میلیونو واوښت.

دا شمېر د ورلډومېټرس انفو وېب‌پاڼې خپور کړی چې له اول سره د کرونا ویروس په اړه تازه ارقام خپروي. د امریکا جانز هاپکنز پوهنتون هم دې ته نږدې شمېر اعلان کړی دی.

تر اوسه پورې نږدې ۳۰ میلیونه کسان په دې ویروس اخته شوي دي.

د کرونا ویروس په خاطر لګېدلو محدودیتونو دا څو وروستۍ میاشتې د ژوند عادي بڼه بدله کړې ده.

نه‌یوازې دا چې دا دی د دې ویروس له لاسه د قربانیانو شمېر له یو میلیون انسانانو واوښت، بلکې د نړۍ ګڼو هېوادونو ته‌یې سخت اقتصادي تاوان هم ورساوه.

امریکا، برازیل او هند د نړۍ هغه درې هېوادونه دي چې په‌کې د کرونا له لاسه د مړو خلکو شمېر په ترتیب تر نورو هېوادونو زیات دی.

امریکا چې د قربانیانو له پلوه په سر کې ده، تر اوسه‌یې نږدې ۲۰۵ زره کسان له لاسه ورکړي او د کرونا ویروس د ټولو اخته خلکو شمېر په‌کې له اووه میلیونو او درې لکو انسانانو اوښتی دی.

نور راوښيه

XS
SM
MD
LG