د لاسرسۍ وړ لېنکونه

تازه خبر
یکشنبه ۳۰ وږی ۱۳۹۹ کابل ۰۹:۵۵

خبرونه

څیخانووسکایا: اروپايي ټولنه دې د بلاروس د خلکو انتخاب درناوی وکړي

د بلاروس د اپوزېسیون یوه مشره سویتلانا څیخانووسکایا

د بلاروس د اپوزېسیون یوې مشرې سویتلانا څیخانووسکایا د اروپایي ټولنې له مشرانو وغوښتل چې د دې هېواد د بیدارۍ ملاتړ او د بلاروس د خلکو د انتخاب درناوی وکړي.

په دې هېواد کې د اګسټ له نهمې، د ولسمشرۍ د ترسره شویو انتخاباتو راهیسې چې په نتیجه کې یې الکساندر لوکاشینکا د شپږم ځل لپاره ولسمشر اعلان شوی، پراخ اعتراضونه روان دي.

د اروپایي ټولنې له مشرانو څیخانووسکایا دغه غوښتنه داسې مهال کوي چې په پام کې ده دوی نن په یوه بېړنۍ غونډه کې چې انلاین کېږي، د بلاروس پر سیاسي وضعیت خبرې وکړي.

دغه غونډه داسې مهال کېږي چې د بلاروس اپوزېسیون د واک د انتقال لپاره د همغږۍ یوې شورا د جوړولو هڅه کوي.

اروپایي ټولنه د بلاروس روان وضعیت چې ورځ تر بلې د دې هېواد پر ولسمشر الکساندر لوکاشینکا فشارونه په زیاتېدو دي، له نږدې څاري.

معترضان د هغه د استعفا ترڅنګ د بیا انتخاباتو د ترسره کېدو غوښتنه کوي.

څیخانووسکایا چې انتخاباتي کمپاینونو ته‌یې لسګونه زره کسان راټولېدل، ادعا کړې چې په حقیقت کې په سلو کې د ۶۰ او ۷۰ ترمنځ رایې دې ګټلې دي.

د ورځې تازه خبرونه دلته ولولئ

ولسمشر محمد اشرف غني بامیان ته لاړ

د افغانستان ولسمشر محمد اشرف غني

د افغانستان ولسمشر محمد اشرف غني د بامیان د وضعیت د لیدلو لپاره نن سهار دغه ولایت ته لاړ.

د ارګ له خبرپاڼې سره سم، ولسمشر غني به په بامیان کې د یکاولنګ – دره صوف د سړک د جوړولو چارې هم وګوري.

دغه راز په پام کې ده چې د ولسمشر د دوو مرستیالانو په ګډون د حکومت د مشرتابه ځانګړې امنیتي غونډه د ولسمشر غني د سفر په لړ کې په بامیان کې جوړه شي.

لاریون کوونکو لندن کې پولیسو سره شخړه کړې

ارشیف

د کرونا ویروس د مخنیوي لپاره پر لګول شویو بندیزونو غوسه شویو لاریون کوونکو پرون په لندن کې له پولیسو سره اخوډب وکړ.

دا لاریون وروسته له دې وشو چې د لندن ښاروال صدیق خان خبرداری ورکړ چې په ښار کې د کرونا د نویو پېښو د زیاتېدو له کبله به یو لړ محدودیتونه وضع کړي.

د بریتانیا حکومت تېره اوونۍ تر شپږو کسانو د زیاتو خلکو پر یوځای کېدو بندیز ولګاوه.

دا بندیز وروسته له دې اعلان شو چې د بریتانیا صدراعظم بوریس جانسن وویل چې هېواد ته یې د کرونا وبا دوهمه څپه راروانه ده.

مسعود اندرابي: د امنیتي تړون پر اساس چا ته وسلې نه ورکول کېږي

د کورنیو چارو سرپرست وزیر مسعود اندرابي

د کورنیو چارو سرپرست وزیر مسعود اندرابي وايي، د امنیتي تړون پر اساس چا ته وسلې نه ورکول کېږي.

هغه له ازادي راډیو سره په ځانګړې مرکه کې وویل، امنیتي تړون له جرمونو سره د مبارزې لپاره په کابل او نورو ښارونو کې د پولیسو او خلکو ترمنځ یو اخلاقي تفاهم دی، نه د وسلو وېش.

اندرابي زیاته کړه: "په دې کې هېڅ داسې پلان چې چا ته سلاح ورکړو، مهمات ورکړو یا ملېشې جوړې کړو، شامل نه دی، زه او موږ ټول له دې سره مخالف یوو."

ده دا هم وویل چې د امنیتي تړون بل هدف د کابل ښار د ترافیکي نظم له ښه کېدو سره مرسته ده.

تر دې وړاندې داسې ګنګوسې خپرې شوې وې چې ګنې حکومت غواړي چې د امنیتي تړون د پروګرام د پیلولو له لارې ښاریان په وسلو سمبال کړي.

امریکا په یو اړخیز ډول د ایران پر ضد د ملګروملتونو ټول بندیزونه ولګول

مایک پومپیو

د امریکا متحدو ایالتونو په یو اړخیز ډول د ایران پر ضد د ملګروملتونو ټول بندیزونه ولګول.

امریکا دا پرېکړه له دې سره سره وکړه چې د بندیزونو پر اغېزمنتوب د شک په خاطر د متحدو ایالتونو نژدې اروپايي متحدانو ورسره مخالفت وکړ.

د امریکا د باندنیو چارو وزیر مایک پومپیو پرون پر ایران د ملګروملتو بندیزونه، چې «ناڅاپي کلک ګوزار» بلل کېږي، اعلان کړل او د بندیزونو د سرغړواي په وړاندې یې د اقدام خبرداری ورکړ.

امریکا تر دې وړاندې پر ایران د بندیزونو د دوام لپاره امنیت شورا ته طرحه وړاندې کړې وه خو دې شورا ورسره موافقه ونه کړه.

ایران مخکې ویلي و چې که بندیزونه یې، چې په اکټوبر میاشت کې پای ته رسېږي، تمدید شول، له اتومي موافقې څخه به ووځي.

خلیلزاد په افغانستان کې د سولې د راتلو لپاره اوسنی چانس بې ساری بللی

زلمی خلیلزاد

د افغانستان لپاره د امریکا ځانګړي استازي زلمي خلیلزاد په افغانستان کې د سولې د راتلو لپاره اوسنی چانس بې ساری بللی دی.

ښاغلي خلیلزاد پر خپله ټویټرپاڼه لیکلي چې په افغانستان کې د خبرو له لارې د یوه سیاسي جوړجاړي او په افغانستان کې د سولې لپاره پراخ نړیوال ملاتړ شته او باید له دې بې ساري فرصته ګټه واخیستل شي.

ښاغلي خلیلزاد د افغانستان د سولې د خبرو په اړه د ملګروملتونو د امنیت شورا د اعلامیې هرکلی کړی چې په هغه کې یې د افغانستان پر مځکنۍ بشپړتیا، حاکمیت، ملي یووالي او خپلواکۍ ټینګار کړی دی.

امنیت شورا په دې اعلامیه کې، چې د جمعې په ورځ یې خپره کړه، وویل، په افغانستان کې ټینګه سوله د افغانانو تر مشرۍ لاندې او د افغانانو ترمنځ د ټولشموله خبرو په نتیجه کې راتلای شي.

چارواکي: کابل کې د هدفي وژنو د پلان مرکز کشف او له منځه یوړل شو

دغه مرکز د یوه کور دننه و چې نژدې پنځوس میله قلمي وسلې او ۱۴ مقناطیسي ماینونه په کې موندل شوي دي.

امنیتي چارواکي وایي، کابل کې یې د هدفي وژنو د پلانولو یو مرکز کشف او له منځه وړی دی.

د کابل امنیه قومندانۍ په یوه خبرپاڼه کې ویلي، دغه مرکز د یوه کور دننه و چې نژدې پنځوس میله قلمي وسلې او ۱۴ مقناطیسي ماینونه په کې موندل شوي دي.

خبرپاڼه کې د دغه مرکز اصلي ځای نه دي ښودل شوی او دا هم نه دي ویل شوي چې په تړاو یې څوک نیول شوي او که نه.

امنیه قومندانۍ د نیول شویو توکو انځورونه هم رسنیو ته لېږل شوي دي.

افغانستان کې سږ کال د انارو حاصلاتو کې د پام وړ زیاتوالی راغلی

کندهار، فراه، بلخ او کاپیسا هم هغه ولایتونه دي چې د کرنې وزارت په وینا، سږ کال په کې د انارو حاصلات ډېر دي.

د افغانستان د کرنې وزارت وایي، سږ کال په دغه هېواد کې د انارو حاصلات د تېرو کلونو پرتله زیات شوي دي.

د دغه وزارت ویاند اکبر رستمي ازادي راډیو ته وویل، د نورو ولایتونو ترڅنګ هلمند کې هم، چې د کوکنارو په کرکیله مشهور دی، سږکال د انارو باغونه ډک وو.

هغه زیاته کړه: "سږکال د هلمند د انارو حاصلات اته ویشت زره متریک ټنو ته رسېدلي دي، په ټوله کې د هلمند په بېلابېلو ولسوالیو کې پر ۱۲ سوه هکټاره ځمکه د انارو باغونه جوړ شوي دي."

کندهار، فراه، بلخ او کاپیسا هم هغه ولایتونه دي چې د کرنې وزارت په وینا، سږ کال په کې د انارو حاصلات ډېر دي.

یوازې کندهار کې ۱۹۰ زره ټنه انار ټول شوي چې د تېرکال پرتله لس فیصده زیاتوالي ښيي.

د چارواکو په خبره د کرنیزو برنامو پلي کول، بڼوالو ته روزنه ورکول او د باغونو ډېروالی د انارو په تولید کې د زیاتوالي لاملونه دي.

د پکتیکا په جاني خېلو کې ماین چاودنې ۲۰ کسان ټپیان کړي

ارشیف

د پکتیکا په جاني خېلو ولسوالۍ کې د ماین چاودنې شل تنه، چې اکثره یې ښځې او ماشومان دي، ټپیان کړي دي.

د امنیه قومندانۍ ویاند شامحمد ارین ویلي، ټپيانو کې یوازې یو نارینه، او نور ټول ښځې او ماشومان دي چې د ۷ تنو روغتیایي حالت یې نازک دی.

هغه زیاته کړه: "د کوچیانو یو واده و، ترکتور کې ناوې، زنانه او نارینه سپاره وو، دغه تراکتور پر ماین برابر شوی چې شل تنه په کې ټپیان شوي دي."

ټپیان د پکتیکا په روغتون کې تر درملنې لاندې دي، خو تر بېګا ناوخته معلومه نه شوه چې ټپیانو کې زوم او ناوې هم شامل دي او که نه.

د پکتیکا ځایي چارواکي وایي، دغه ماین د طالبانو له خوا ځای پر ځای شوی و، خو طالبانو لا په دې اړه څه نه دي ویلي.

د روسیې سیاسي مخالف الکسي ناوالني: په نویچوک زهري موادو مسموم شوی یم

ناوالني پر خپل انستاګرام دا انځور هم خپور کړی چې ښيي د برلین په روغتون کې له زینې ښکته کېږي

د روسیې سیاسي مخالف الکسي ناوالني ویلي، له مسمومېدو وروسته یې د رغېدو لاره ( معلومه) شوې، خو زیاته کړې ده چې ډېر وخت به ونیسي.

نوموړي پرون پر ټولنیزو رسنیو ولیکل چې په نویچوک زهري موادو مسموم شوی دی.

ناوالني پر خپل انستاګرام داسې انځور هم پوست کړی چې ښيي د برلین په روغتون کې له زینې ښکته کېږي.

نوموړي ویلي، لاهم په زینو کې په سختۍ تګ کوي او پښې یې لړزېږي.

ناوالني د اګسټ په شلمه په سایبریا کې ناروغ شو چې بیا وروسته د درملنې لپاره جرمني ته ولېږدول شو.

د جرمني دولت ویلي، خپلواکو لابراتوري معایناتو ښودلې چې هغه په زهري موادو مسموم شوی، خو روسیې دا راپورونه بې بنسټه بللي دي.

ایران کې د بشري حقونو بندي ملاتړه 'نسرین ستوده ' بستر شوې

نسرین ستوده

په ایران کې د بشري حقونو بندي ملاتړې نسرین ستوده د قلبي ستونزو له کبله بستر شوې ده.

دغه خبر د نوموړې خاوند رضا خندان ورکړی دی او ویلي یې دي چې ستوده له نفس تنګۍ، د وینې له ټیټ فشار او شدیدې کمزورۍ رنځ وړي.

ستوده د ایران په ایون زندان کې د اګسټ له یولسمې را په دېخوا د نه خوړو اعتراض کړی و.

دې د ایراني چارواکو پر دې کار اعتراض کړی چې سیاسي بندیان یې د هغو لسګونه زره زندانیانو په ډله کې نه دي شامل کړي چې د کرونا ویروس د خپرېدو له ویرې د لنډ وخت لپاره له زندان نه ازادېږي.

ستوده په ۲۰۱۸ کال کې په تهران کې له خپله کوره ونیول شوه.

هغه د سیاسي زندانیانو ، له هغې ډلې د اجباري حجاب پر وړاندې د معترضو ښځو د ملاتړ له کبله په ۳۸ نیم کاله حبس او ۱۴۸ دورو محکومه شوې ده.

د کویډ۱۹ د دوهمې څپې خپرېدوله ویرې ځینو اروپايي هېوادو محدویتونه اعلان کړل

ارشیف

یو شمېر اروپایي هېوادونو په خپلو لویو ښارونو کې د کرونا ویروس د دوهمې څپې د اندېښنو په لړ کې نوي محدودیتونه اعلان کړل.

دا محدودیتونه د سېپټېمبر پر ۱۸ داسې مهال اعلان شوي چې د امریکا متحده ایالاتو ولسمشر ډونالډ ټرمپ ادعا کړې چې تر راتلونکي اپرېل پورې به د کویډ ۱۹ ناروغۍ پر وړاندې د هر امریکایي لپاره کافي واکسین ولري.

په ټوله نړۍ کې څه باندې دېرش میلیونه وګړي په کرونا ویروس اخته شوي دي، ۹۵۰ زره کسان له همدې ناروغۍ مړه شوي دي.

که څه هم ګمان کېږي چې ریښتونې شمېرې ښایي تر دې ډېرې وي خو په اروپا کې له ډنمارک او هالنډ څخه بیا په جنوب کې تر یونان پورې د کرونا ویروس د خورېدو د کنټرول لپاره نوي محدودیتونه اعلان کړل.

د روغتیا نړیوال سازمان مسئولینو پرون ویلي چې هره اونۍ د نړۍ په سطح د کرونا ویروس دوه میلیونه نوي پېښې زیاتې شوي او له څلویښتو تر پنځوسو زرو پورې له دې ناروغۍ څخه مري.

د غزنې اوسېدونکي: ښار کې هدفي وژنې ډېرې شوي

د غزني ښار یوه څنډه

د غزنې اوسېدونکي له دولت غواړي چې په ښار کې د هدفي وژنو د دوام مخه ونیسي.

ټولنیز فعال ظهورالدین د تېرې یکشنبې په ورځ وسله والو په غزني ښار کې ویشتلی او ټپي کړی وو، چې د پنجشنبې په ورځ یې په روغتون کې ساه وکړه.

په همدې ورځ وسله والو د غزني مرکز په مغلان سیمه کې درې تنه پولیس هم په یوه برید کې ووژل.

په غزني کې له تېرو دوولسو کلونو راهیسې وسله وال وخت ناوخته هدفي وژنې ترسره کوي، چې په دې وروستیو کې یو ځل بیا تېزه شوې ده.

د دې ولایت اوسېدونکي وايي په رڼا ورځ د ښار په زړه، حتی د ولایت او قومنداني ترڅنګ دولتي کارکوونکي، امنیتي سرتېري، قومي مشران، دیني عالمان، مدني فعالان او مخورین ترور کېږي.

قومي مشر حاجي عبدالباري وايي محلي اداره باید د دغه وژنو په اړه خلکو ته ځواب ورکړي، چې ولې دغه خلک وژل کېږي او ولې یې وژونکي نه نیول کېږي.

د غزني چارواکي هم مني چې په دغه ځای کې خلک ترور کېږي، خو بیا هم د تل په څېر خلکو ته ډاډ ورکوي چې نور به دغه ډول پېښې نه تکرارېږي.

د غزني د والي او په دغه ولایت کې د نظامي شورا ویندوی وحیدالله جمعه زاده ازادي راډیو ته وویل، هڅې روانې دي چې د دغه خلکو مخینوی وکړي.

د غزني امنیتي چارواکي وايي، د امنیت د ټینګښت په موخه یې په ښار کې تلاشۍ هم زیاتې کړې، خو اوسېدونکي وايي په دې سربېره د وژنو او وسله والو بریدونو مخه نه ده نیول شوې.

کونړ کې سلګونه هکټاره ځمکه کرنیزه شوه

کونړ سیند

د افغانستان د کلیو د بیا رغونې او پراختیا وزارت وايي، د کونړ سیند پر غاړه یې د سیلابونو د مخنیوي لپاره د استنادي دېوالونو په جوړېدلو سره ۱۸۰۰ سوه هکټاره ځمکه کرنیزه شوې ده.

د دې وزارت ویاند فریدون آژند نن ازادي راډیو ته وویل، د دې پرژوې له ګتې به شاوخوا 75 زره کسان برخمن شي.

نوموړی وايي، د دې پروژې ټول لګښت چې شاوخوا ۴۵۰ میلیونه افغانۍ کېږي له دولتي بودجې ورکول شوی دی.

د افغانستان د کلیو بیا رغونې او پراختیا وزارت د معلوماتو له مخې دغه استنادي دېوالونه ۱۶ کیلو متره اوږد والی لري چې کار یې کال وړاندې پیل شوی وه او نږدې څو ورځو کې به ګټې اخیستنې ته وسپارل شي.

کونړ یو کرنیز ولایت دی چې ډېر ځله د ورښتونو او سیلابونو د راوتلو له امله د کروندګرو ځمکې او کښتونه زیانمنېږي.

د افغانستان د کلیو د بیا رغونې او پراختیا وزارت وايي، د دغه استنادي دیوالونو په جوړېدلو سره به کروندې خوندي، حاصلات ښه او کروند ګر د تاوانونو پر ځای ګټې ته کېني.

ماليې وزارت: ملي بودیجه کې تعدیلات د عوایدو د کمښت لامل شوي

مالیې وزارت

دافغانستان ماليې وزارت وايي، د روان مالي کال له پیل سره د ملي عوایدو راټولېدو لپاره ۲۰۸ میلیارده افغانۍ هدف ټاکل شوی و، خو د کرونا ویروس د خپرېدو له امله دغه وزارت دې هدف ته ونه رسېد.

د دې وزارت ویاند شمروز خان مسجدي نن ازادي راډيو ته وویل، په ملي بودیجې کې تعدیلات د دې لامل شوه چې ملي عوایدو لپاره ټاکل شوی هدف راکم شي چې اوس مهال د عوایدو لپاره ۱۷۷ میلیارده افغانۍ دی هدف ټاکل شوی دی.

ښاغلی مسجدي وايي، مالیې وزارت تر اوسه پورې ۱۱۵ میلیارده افغاني عواید راټول کړي، په داسې حال کې چې تېر کال دا وخت ۱۳۳ میلیارده افغاني عواید راټول شوي وو چې په خبره یې شاوخوا ۱۸ میلیارده کموالی ښیي.

نوموړی تمه ښي چې د مالي کال تر پایه د ملي عوایدو په راټولېدو کې د لوړوالی راشي.

امریکا: طالبان کلک او هوښیار خلک دي

قطر کې د بین الافغاني مذاکراتو د پرانیستغونډې یوه څنډه

د امریکا د متحد ایالتونو ولسمشر ډونالډ ټرمپ وایي، طالبان کلک او هوښیار خلک دي او متحد ایالتونه له دې افغان وسله والې ډلې سره ښه معامله کوي.

ښاغلي ټرمپ خبریالانو ته په واشنګتن کې دا خبره هم وکړه چې نولس کاله د افغانستان د جګړې وشول، طالبان هم له دې جګړې ستړې شوي دي.

د امریکا متحد ایالتونو له طالبانو سره د قطر په پلازمېنه دوحه کې د فبروري په نهه ویشتمه د سولې تړون لاسلیک کړ.

که چېرته طالبان د دې تړون له مخې خپلې ژمنې پرځای کړي ټول امریکایي ځواکونه به د راتلونکي میلادي کال د مې تر میاشتې له افغانستانه ووځي.

نور راوښيه

XS
SM
MD
LG