د لاسرسۍ وړ لېنکونه

تازه خبر
جمعه ۲۸ وږی ۱۳۹۹ کابل ۱۲:۱۲

خبرونه

د اروپایي ټولنې مشران انلان غونډه کې د بلاروس پر وضعیت خبرې کوي

ارشیف

د اروپایي ټولنې مشران نن په یوه بېړنۍ غونډه کې چې انلاین کېږي، د بلاروس پر سیاسي وضعیت خبرې کوي.

دغه غونډه داسې مهال کېږي چې د بلاروس اپوزېسیون د واک د انتقال لپاره د همغږۍ یوې شورا د جوړولو هڅه کوي.

اروپایي ټولنه د بلاروس روان وضعیت چې ورځ تر بلې د دې هېواد پر ولسمشر الکساندر لوکاشینکا فشارونه په زیاتېدو دي، له نږدې څاري.

نوموړی د اګسټ په نهمه د ولسمشرۍ د لانجمنو انتخاباتو په نتیجه کې د شپږمې دورې لپاره بیا ولسمشر غوره شوی، خو ډېر لوري دغه انتخابات له درغلۍ ډک بولي او د هغه د استعفا ترڅنګ د بیا انتخاباتو د ترسره کېدو غوښتنه کوي.

له هغه مهال راهیسې په دې هېواد کې پراخې مظاهرې پیل شوې دي.

د اروپایي شورا مشر چارلز میشل چې دوه ورځې وړاندې یې د دغې غونډې د جوړېدو اعلان وکړ وایي، د بلاروس خلک حق لري چې خپله راتلونکې او په ازاده توګه خپل مشر وټاکي.

هغه د اعتراض کوونکو په وړاندې تاوتریخوالی د نه‌منلو وړ وباله.

میشل همدا شان پرون د ټیلیفون له لارې د روسیې له ولسمشر ولادیمیر پوتین سره خبرې وکړې او د بلاروس د ولسمشرۍ په انتخاباتو کې د بې‌نظمیو او د معترضانو په وړاندې د ځپونکو اقداماتو په اړه‌یې اندېښنه ښکاره کړه.

دواړو مشرانو پر دې سلا وکړه چې په بلاروس کې د روان بحران د سوله‌ییز هواري لپاره تر ټولو غوره لاره خپلمنځي ډیالوګ دی.

د ورځې تازه خبرونه دلته ولولئ

بلاروس کې د بشري حقونو د سرغړونو په اړه تحقیقات پیل شول

بلاروس کې د مظاهره کوونکو پر وړاندې تاوتریخوالی

د اروپا د امنیت او همکارۍ سازمان د بلاروس د ولسمشرۍ په انتخاباتو کې د درغلیو او د بشري حقونو د سرغړونو په اړه تحقیقات پیل کړل.

ټاکل شوې د دې سازمان د کارپوهانو کمېسیون چې پرون د سپټمبر په ۱۷ مه غوره شو د خپلو څېړنو نتایج د شپږو او اتو اوونیو په ترڅ کې بشپړ کړي.

دا کمېسیون به د اګست په نهمه د بلاروس د ولسمشرۍ له انتخاباتو مخکې او وروسته د بشري حقونو د سرغړونو ګڼ راپورونه وڅېړي.

د دې انتخاباتو په پایله کې ولسمشر الکساندر لوکاشینکا د شپږمې پرله پسې دورې لپاره د دې هېواد د ولسمشر په توګه غوره شو.

د دې انتخاباتو د نتایجو له اعلان وروسته د بلاروس په بېلابېلو سیمو کې د لوکاشینکا پر ضد پراخ اعتراضونه وشول.

'روسیه لاهم د امریکا ولسمشرۍ انتخاباتو کې د لاسوهنو هڅو ته دوام ورکوي'

د امریکا د تحقیقاتو د فدرال ادارې «FBI» مشر کریستوفر ورې

د امریکا د تحقیقاتو د فدرال ادارې «FBI» مشر وايي چې روسیه لاهم د امریکا د ولسمشرۍ په انتخاباتو کې د لاسوهنو هڅو ته دوام ورکوي.

د «FBI» مشر کریستوفر ورې پرون د سپټمبر په ۱۷مه، د استازو جرګې د امنیتي کمېټې له غړو سره په خبرو کې وویل د روسیې هدف دا دی چې په انتخاباتو کې د ډیموکرات ګوند کاندید جوبایډن بدنامه کړي.

ښاغلي ورې زیاته کړه روسیه له بهر څخه د نفوذ لپاره په هغو ورانکارو فعالیتونو کې لاس لري چې هدف‌یې د ټولنیزو شبکو، نیابتي ډلو، دولتي رسنیو او انلاین خپرونو له لارې بایډن ته زیان اړول دي.

د «FBI» مشر زیاته کړه، د ده اصلي اندېښنه دا ده چې د پرله‌پسې ناسمو معلوماتو د خپرولو منظمه لړۍ ښايي د نومبر په درېیمه نېټه د ولسمشرۍ د انتخاباتو پر نتایجو خلک بې‌باوره کړي.

دا څرګندونې داسې مهال کېږي چې سپینې ماڼۍ هغه راپورونه بې‌اهمیته بللي دي چې وايي، روسیه له ولسمشر ډونالد ټرمپ سره د مرستې هڅه کوي څو په انتخاباتو کې بریالی شي.

افغان حکومت په یونان کې د افغان کډوالو لپاره ۶ لکه یورو ځانګړي کړل

موریا کمپ

د افغانستان حکومت په یونان کې د ډېرو افغان کډوالو د ستونزو د حل لپاره شپږ لکه یورو ځانګړي کړل.

د یونان په لیسبوس ټاپو کې موریا کمپ تېره اوونۍ د اورلګېدو په یوه پېښه کې ویجاړ شو او د لسګونه افغانانو په ګډون شااوخوا ۱۲ زره کډوال چې اروپا ته د مهاجرت په تمه په یونان کې دېره دي، بې‌کوره شول.

ارګ په یوه خبرپاڼه کې وايي، ولسمشر اشرف غني پرون د کابینې په غونډه کې د مالیې وزارت ته دنده وسپارله څو له دې کډوالو سره د مرستې لپاره ۶ لکه یورو چې د څه باندې ۷ لکه امریکايي ډالرو معادل کېږي د دولت له بودجې څخه ځانګړي کړي.

له دې مخکې د افغانستان د بشري حقونو خپلواک کمېسیون ویلي و چې په موریا کمپ کې د افغان پناه غوښتونکو وضعیت خواشینوونکی دی.

په همدې حال کې د یونان د کډوالو وزیر نوتیس میتاراچي پرون په ليسبوس کې وویل چې له موریا کمپ څخه شااوخوا پنځه زره بې‌ځایه شوي کډوال اوس په یوه نوي کمپ کې ځای پر ځای شوي دي.

'سروبي کې امنیتي ځواکونو د طالبانو يو مهم قوماندان وژلی'

امنیتي ځواکونه

افغان چارواکي د کابل په سروبي ولسوالۍ کې د امنیتي ځواکونو په عملیاتو کې د طالبانو د یوه مهم قوماندان د وژل کېدو خبر ورکوي.

د کورنیو چارو وزارت ویاند، طارق ارین ازادي راډیو ته وویل چې د دې عملیاتو په ترڅ کې د کابل لپاره د طالبانو د سرې قطعې مرستیال او یو بل قوماندان وژل شوي دي.

هغه زیاته کړه: "ګډو امنیتي ځواکونو په سروبي ولسوالۍ کې هدفمند عملیات کړي چې په ترڅ کې یې د کابل ولایت لپاره د ترهګرو طالبانو د سرې قطعې مرستیال قوماندان غیرت‌الله چې په ملا سنګین مشهور و، له یو بل قوماندان صلاح‌الدین صادق سره یوځای وژل شوی."

ښاغلي ارین زیاته کړه چې د افغان ځواکونو په عملیاتو کې ۱۰ تنه نور طالبان هم ټپیان شوي دي.

طالبانو تر اوسه په دې اړه څه نه‌دي ویلي.

چارواکي: ننګرهار کې لرغون پېژندونکو د بودیزم له دورې یو زندان موندلی

د جلال‌اباد ښار يوه سيمه

د ننګرهار چارواکي وايي چې افغان لرغون پېژندونکو په دې ولایت کې د بودیزم له دورې پاتې یو زندان چې شااوخوا ۲،۵۰۰ کاله مخکې جوړ شوی، موندلی دی.

د ننګرهار ولایت د رسنیو دفتر په یو بیان کې د سره رود د ولسوالۍ په سبزاباد سیمه کې د دې لرغونې ودانۍ د موندلو خبر ورکړی دی.

د بیان له مخې زندان په یوه ژوره سیمه کې جوړ شوی چې دروازې نه‌لري او له هغه ځایه د خټینو لوښو ټوټې هم ترلاسه شوې دي.

د افغانستان د اطلاعاتو او فرهنګ وزارت معین رسول باوري ازادي راډیو ته وویل چې په سبزاباد کې له درېیو کلونو راهیسې کېندنې روانې دي او په دې ترڅ کې ډېر ارزښتمن اثار ترلاسه شوې دي.

ښاغلی باوري د بودايي دورې د دې زندان د څرنګوالي په اړه وايي: "یوه خونه ده چې ګومان کېږي باید د خلکو د قید کولو او تادیب لپاره کارول شوې وي. د دې ترڅنګ نورې زغرې چې په دوه زره کاله مخکې زمانې پورې اړه لري او داسې نور شیان هم موندل شوي."

د چارواکو په وینا لرغون پېژندونکو له زندان سره په څنګ کې یوه خونه چې ۱۳ متره اوږدوالی او څلور متره سور لري او په درېیو دورو کې د رغونې چارې په‌کې ترسره شوې دي هم موندلې ده.

دفاع وزارت: طالبانو د سولې د خبرو له پیلېدو وروسته خپلو حملو ته زور ورکړی

طالبان

د تېرو څو ورځو له نښتو وروسته د افغانستان دفاع وزارت وايي چې طالبانو د سولې د خبرو له پیلېدو وروسته خپلو حملو ته زور ورکړی.

د افغانستان د دفاع وزارت مرستیال ویاند فواد امان پرون پنجشنبه ازادي راډیو ته وویل چې افغان دفاعي امنیتي ځواکونو په فعال دفاعي حالت کې هم طالبانو ته درنه مرګ‌ژوبله اړولې ده.

هغه زیاته کړه: "د افغانستان دفاعي-امنیتي ځواکونه د سولې پروسې ته د درناوي لپاره په فعال دفاعي حالت کې د خپل ځان او خپلو خلکو د دفاع په خاطر د طالبانو حملې شنډوي او هغوی ته درنه مرګ‌ژوبله هم اړوي. د طالبانو په مرګ‌ژوبله کې هم زیاتوالی راغلی دی."

د افغانستان د دولت او طالبانو پلاوو د وږې په ۲۲مه، په قطر کې د سولې خبرې پیل کړې، خو له همغې ورځې راهیسې په بېلابېلو ولایتونو کې درنې جګړې وشوې چې په ترڅ کې درنه مرګ‌ژوبله هم پېښه شوې ده.

پرون د ننګرهار ولایت چارواکو د طالبانو او دولتي ځواکونو په نښتو کې د ۲۰ دولتي سرتېرو او ۲۹ طالبانو د وژل کېدو خبر ورکړ.

په کندز، تخار او نورو ولایتونو کې هم دولتي سرتېري، طالبان او ملکي وګړي وژل شوي دي.

ننګرهار کې ۲۰ امنیتي ځواکونه او ۲۹ طالبان وژل شوي

ارشیف، ننګرهار کې د افغان ځواکونو عملیات

په ننګرهار کې ۲۰ تنه امنیتي ځواکونه او ۲۹ تنه طالبان وژل شوي دي.

د ننګرهار د والي ویاند عطاالله خوګیاڼي نن ازادي راډیو ته وویل چې طالبانو تېره شپه په حصارک، شېرزاد او خوګیاڼو ولسوالیو کې پر امنیتي پوستو بریدونه وکړل چې په ترڅ کې یې ۲۰ تنه پولیس، د اردو سرتېري او سیمه‌ییز پولیس وژل شوي او ۱۵ نور ژوبل دي.

د خوګیاڼي په وینا د افغان امنیتي ځواکونو په ځوابي بریدونو کې لږترلږه ۲۹ طالب وسله‌وال وژل شوي چې په هغو کې د طالبانو د سرې قطعې غړي او بهرنیان هم شامل دي.

طالبانو تر اوسه پورې په دې اړه څه نه‌دي ویلي.

کابل او لغمان کې د انتحاري حملې مخه ونیول شوه

ارشیف

د افغانستان ملي امنیت عمومي ریاست وايي په کابل او لغمان کې يې د انتحاري حملې مخه نیولې ده.

د ملي امنیت په خپره شوې خبرپاڼه کې راغلي دي چې د عتیق‌الله په نوم یو ځوان چې د پېښور په شمشتو سیمه کې يې دیني زده‌کړې کړې وې د کابل د ۱۷مې حوزې په اړوند سیمه کې د ملي امنیت د ځانګړو ځواکونو له لوري ونیول شو.

په اعلامیه کې راغلي دي نیول شوی کس چې په شمشتو کې د فاتح په نوم د یوه سیمه‌ییز طالب قوماندان له لوري د پېښور تیرا سیمې ته د نظامي زده‌کړو په هدف استول شوی او له زده‌کړو وروسته د انتحاري حملې لپاره افغانستان ته راستول شوی وو.

د اعلامیې په اساس نیول شوي کس غوښتل چې په کابل یا هم لغمان کې پر افغان امنیتي او دفاعي ځواکونو انتحاري حمله وکړي.

دا په داسې حال کې ده چې اوس‌مهال د قطر په پلازمېنه دوحه کې د افغان حکومت او طالبانو د مرکچي پلاوو ترمنځ د سولې خبرې اترې روانې دي.

وسله‌والو طالبانو لا تر اوسه په دې اړه څه نه‌دي ویلي.

امریکا افغان هوايي ځواک ته څلور سوپرټوکانو الوتکې ورکړې

افغان حکومت ته ورکړل شوې سوپرټوکانو الوتکې

د امریکا متحده ایالاتو نن افغان هوايي ځواک ته څلور «A-29» سوپرټوکانو الوتکې وسپارلې.

په دې مناسبت په غونډه کې د افغانستان د دفاع سرپرست وزیر اسدالله خالد وویل، افغان ملي اردو به اجازه ورنه‌کړي چې د تېرو نږدې ۲۰ کلونو پر بریاوو معامله وشي.

ده په قطر کې د سولې خبرو ته په اشارې وویل: "په ټول توان د بین‌الافغاني خبرو ملاتړ کوو، خو دا به د ټولو ارزښتونو له ساتنې سره وي."

د افغانستان د دفاع سرپرست وزیر همداراز وویل چې سوله تېر وخت ته د ستنېدو په معنی نه‌ده او نه به هم اجازه ورکړل شي چې افغان مېرمنې د تېر په څېر په لوبغالو کې په مترکو ووهل شي.

ده څلور نورې سوپرټوکانو الوتکې د افغان هوايي ځواک د لا پیاوړتیا لپاره مهمې وبللې.

پومپیو د نړۍ له مشرانو وغوښتل چې جواد ظریف سره ونه‌ویني

د امریکا د بهرنیو چارو وزیر مایک پومپیو

د امریکا د متحده ایالاتو د بهرنیو چارو وزیر مایک پومپیو د نړۍ له مشرانو وغوښتل چې د ایران له بهرنیو چارو وزیر جواد ظریف سره ونه‌ویني.

پومپیو دا غوښتنه پرون چهارشنبه د ټویټر له لارې د نوید افکاري د اعدام په عکس‌العمل کې وکړه.

ده وویل، ترڅو چې ایران د نوید افکاري وروڼه او بهرني بندیان خوشې کړي نه‌وي، د ایران د بهرنیو چارو وزیر ته دې د کتنې لپاره بلنه نه‌ورکوي.

ایراني چارواکو نوید افکاري د ۱۳۹۷ لمریز کال په سرطان کې د شېراز په اعتراضونو کې د ګډون په خاطر اعدام کړ.

د امریکا خلیج ساحلونو کې سېل او توپان ډېر زیانونه اړولي

ارشیف

وروسته له دې چې د هریکن سالي په نوم توپان د امریکا د خلیج ساحلونه وځپل سېل د سمندر د غاړې د ښارګیو او مېنو سړکونه، واټونه او پلونه زیانمن کړي او د برېښنا ستنې یې چپه کړې دي.

دا توپان چې سرعت‌یې په ساعت کې ۱۶۵ کیلومتره و، پرون (چهارشنبه) له باران سره د فلوریدا او الاباما ایالتونو په ساحلي سیمو کې پیل شو.

د توپان له کبله ونې راپرېوتې او ګڼ کورونه، سوداګريزې ودانۍ او د بېړۍ چلولو پلټ فارمونه ویجاړ شوي دي.

خالد: دښمن دې د پنجاب په فرمایش د افغان اردو د له‌منځه وړلو خوب نه‌ویني

د ملي دفاع سرپرست وزیر اسدالله خالد

د ملي دفاع سرپرست وزیر اسدالله خالد وايي، افغان ملي اردو به اجازه ورنه‌کړي چې په تېرو لاسته راوړنو معامله وشي.

ښاغلي خالد چې نن‌یې افغان هوايي ځواک سره د امریکا متحده ایالاتو له‌خوا د څلورو «A-29» سوپر ټوکانو الوتکو د مرستې په مراسمو کې خبرې کولې وویل، افغان اردو اوس د خپل هېواد له ارضي تمامیت په بشپړه توګه دفاع کولای شي او دا یې ثابته کړې هم ده.

ښاغلي خالد د سولې خبرو ته په اشاره وویل، دښمن دې د پنجاب په فرمایش د افغان اردو د له‌منځه وړلو خوب نور نه‌ویني.

هغه زیاته کړه: "د دې جګړې موخه، زموږ له خاورې ساتنه ده، زموږ له ارزښتونو ساتنه ده، له هغو ارزښتونو څخه ساتنه ده چې په تېرو دوو لسیزو کې مو ترلاسه کړي دي. نور باید دښمن دا خوب له ذهنه وباسي چې د پنجاب په فرمایش د افغانستان اردو، لکه څنګه چې یو ځل د دې بدې صحنې لیدونکي وو، بیا له‌منځه یوسي، په هېڅ قیمت، په داسې حال چې د بین‌الافغاني خبرو څخه ملاتړ کوو، ولې د ټولو ارزښتونو د ساتنې په شرط."

ښاغلي خالد دا هم وویل چې سوله تېر ته د ستنېدو په معنی نه‌ده او نه به هم اجازه ورکړل شي چې افغان مېرمنې د تېر په څېر په لوبغالو کې په قمچینې ووهل شي.

د ملي دفاع سرپرست وزیر د افغانستان هوايي ځواک نسبت نورو کلونو ته پیاوړی وباله او زیاته‌یې کړه، له نویو الوتکو به د افغانستان د دفاع په برخه کې ګټه واخیستل شي.

کرنې او مالدارۍ وزارت: فراه کې به د انارو حاصلات ۱۵۰ ټنو ته ورسېږي

ارشیف

د افغانستان د کرنې او مالدارۍ وزارت وايي، سږ کال به د فراه د انارو حاصلات ۱۵۰ ټنو ته ورسېږي.

د دغه وزارت ویاند اکبر رستمي ازادي راډيو ته وویل چې د فراه ولایت په مرکز او ځینو ولسواليو کې پر۸،۵۷۲ هکتاره ځمکه د انارو باغونه جوړ شوي دي.

هغه زیاته کړه: "روان کال د فراه د انارو حاصلات ۱۵۰ زره مټریک ټنه ته رسېدلي، له فراه سربېره په بلخ، کندهار او کاپیسا ولایتونو کې هم د انارو په حاصلاتو کې د پام وړ زیاتوالی راغلی."

ښاغلی رستمي زیاتوي چې روان کال د کندهار حاصلات ۱۹۰ زره مټریک ټنه ته رسېږي چې د تېر کال په پرتله ۱۰ سلنه زیاتوالی راغلی.

د فراه ترڅنګ د افغانستان په کندهار، کاپیسا او بلخ ولایتونو کې هم انار شته، خو د کندهار انار په نړیواله کچه شهرت لري.

د ننګرهار ګمرک یوه اوونۍ کې ۶۷۵ ميليونه افغانۍ عوايد راټول کړي

د افغانستان او پاکستان ترمنځ د سوداګریزو مالونو لېږد رالېږد

د ننګرهار ولايت ګمرک رئيس وايي چې په تېرو اتو ورځو کې يې ۶۷۵ ميليونه افغانۍ عوايد راټول کړي چې د تېرې اوونۍ په پرتله ۴۰ سلنه زیاتوالی ښيي.

نصرالله صاحبزاده له ازادي راډیو سره په خبرو کې د عوايدو د لوړېدو لاملونه داسې په ډاګه کړل: "لامل د کرونا ويروس وېرې ختمېدل، د سوداګريزو چارو ګړنديتوب، اصلاحات، شفافيت، سوداګرو ته د قانوني سهولتونو او په چارو کې د همغږۍ رامنځته کول دي."

نوموړي تمه وښوده چې په راتلونکي کې به په دغو عوایدو کې نور هم زیاتوالی راشي، خو په دې برخه کې له خپلو همکارانو او سوداګرو همکاري غوښتنه وکړه.

د ښاغلي صاحب‌زاده په وینا تېر کال په همدې ورځو کې د عوایدو راټولېدو منځنۍ کچه ۴۰ میلیونه افغانۍ وه، خو په تېرو څو ورځو کې په منځني ډول تر ۸۲ میلیونه افغانۍ راټولېږي.

دا په داسې حال کې ده چې په تېرو نږدې شپږو میاشتو کې د کرونا ویروس د لا خپراوي د مخنیوي په موخه له ګاونډیو هېوادونو سره نږدې ټولې ټرانزیتي دروازې تړل شوې وې چې په ګمرکي عوایدو یې ناوړه تأثیر کړی و.

حنیف اتمر تاجکستان ته ولاړ

د افغانستان د بهرنیو چارو سرپرست وزیر حنیف اتمر

افغانستان د بهرنیو چارو سرپرست وزیر حنیف اتمر د تاجکستان له چارواکو سره د خبرو لپاره نن هغه هېواد ته روان شو.

د افغانستان د بهرنیو چارو وزارت نن په خپره کړې خبرپاڼه کې ویلي چې حنیف اتمر به دوشنبې ته په دغه دوه ورځني سفر کې د تاجکستان د ولسمشر امام علي رحمان په ګډون له جګپوړو چارواکو سره وګوري او د دواړو هېوادونو ترمنځ د اړیکو د پیاوړي کېدو پر مختلفو مسایلو به خبرې وکړي.

امنیت، سرحدي چارې، ټرانسپورت، پانګونه، سوداګري، ټرانزیت او انرژۍ هغه برخې یادې شوې چې دواړه لوري به پرې خبرې کوي.

له ښاغلي اتمر سره په دې سفر کې یو شمېر دولتي چارواکي، والیان او د ملي شورا یو شمېر غړي هم مل دي.

نور راوښيه

XS
SM
MD
LG