د لاسرسۍ وړ لېنکونه

تازه خبر
پنجشنبه ۱۰ تله ۱۳۹۹ کابل ۱۱:۵۷

افغانستان

کورنیو چارو وزارت: یوه اوونۍ کې ۱۷۵ ملکي وګړو ته مرګ‌ژوبله اوښتې

د افغانستان د کورنیو چارو وزارت

د افغانستان د کورنیو چارو وزارت وایي په وروستۍ یوه اوونۍ کې په بېلابېلو بریدونو کې ۱۷۵ ملکي وګړو ته مرګ‌ژوبله اوښتې ده.

د کورنیو چارو وزارت ویاند طارق ارین تېر ماښام د اګسټ ۱۰مه ازادي راډیو ته وویل چې دا تلفات د طالبانو په بریدونو کې اوښتي او له دې ډلې یې وغوښتل چې د تاوتریخوالي د کمېدو په اړه خپلې ژمنې پوره کړي.

هغه زیاته کړه: "له اوربند وروسته او د تېرې یوې اوونۍ په لړ کې د طالبانو د بریدونو په ترڅ کې زموږ ۱۷۵ ملکي هېوادوالو ته مرګ‌ژوبله اوښتې. ۸۰ تنه شهیدان شوي او ۹۵ نور ټپيان دي. د تاوتریخوالي کموالی د خلکو له اساسي غوښتنو دی او طالبان باید دې غوښتنې ته په عمل کې ځواب ووايي."

د تاوتریخوالي کموالی د امریکا او طالبانو ترمنځ د فبرورۍ د ۲۹مې د موافقې له عمده برخو څخه وو، خو افغان حکومت او طالبان دواړه یو بل په پاروونکو اقداماتو تورنوي.

وسله‌والو طالبانو تر اوسه د کورنیو چارو وزارت د تازه شمېرو په اړه تبصره نه‌ده کړې.

د ورځې تازه خبرونه دلته ولولئ

عبدالله: افغان دولت او طالبان پر اختلافي مسایلو روغې جوړې ته نږدې شوي

عبدالله عبدالله

د افغانستان د ملي مصالحې عالي شورا مشر عبدالله عبدالله وایي چې د افغان دولت او طالبانو مرکچیان پر یو لړ هغو اختلافي مسایلو روغې جوړې ته نږدې شوي چې په قطر کې یې د دواړو لورو ترمنځ د سولې خبرې ټکنۍ کړې دي.

دواړو لورو چې د تېرې سپټمبر میاشتې له ۱۲مې راهیسې په دوحه کې خبرې پیل کړي تر اوسه‌یې د خبرو د دوام لپاره کړنلاره نه‌ده نهایي کړې.

یو د اختلافي ټکو پر حنفي مذهب د طالبانو ټینګار دی، خو د افغان دولت مرکچیانو د جعفري مذهب چې د افغانستان په اساسي قانون کې یې د پیروانو حقونه خوندي شوي، مسئله رامخې ته کړې ده.

ښاغلي عبدالله پرون په اسلام‌اباد کې له فرانسپرس خبري اژانس سره په مرکه کې وویل چې دغه اختلافي مسئله تر ډېره هواره شوې ده.

ښاغلي عبدالله زیاته کړه چې دواړو لورو د اوس لپاره د حنفي اصول چې شیعه‌ګانو او نورو اقلیتونو سره به هېڅ ډول توپیري چلند نه‌کېږي، په رسمیت پېژندلی.

طالبان دغه‌راز غواړي چې د سولې په یوې احمتالي موافقه کې د افغان دولت له نوم څخه ډډه وشي او پر ځای یې هغه یو ډول د افغانانو ترمنځ موافقه ونومول شي.

ښاغلي عبدالله وویل، داسې ښکاري چې په دې برخه کې هم پرمختګ شوی، خو نوموړي نور جزئیات ورنه‌کړل.

د هرات-کندهار پر لویه لاره یوې ترافیکي پېښې ۱۰ تنه وژلي

د کندهار نقشه

د هرات-کندهار پر لویه لاره په یوه ترافیکي پېښه کې ۱۰ تنو خپل ژوند له لاس ورکړ.

د هرات د والي ویاند جیلاني فرهاد ازادي راډیو ته وویل، دا پېښه نن سهار په ادرسکن ولسوالۍ کې هغه مهال رامنځته شوه چې یوه ۳۰۳ بس له یوه فلاینګ‌کوچ ډوله موټر سره ټکر وکړ.

هغه زیاته کړه: "په وژل شویو کې پنځه سړي، دوه ماشومان او درې ښځې دي. ټول ټپیان هم ملکي وګړي دي."

د ښاغلي فرهاد په خبره په دې پېښه کې اته تنه ټپیان شوي چې د درملنې لپاره روغتیایي مرکزونو ته انتقال شوي دي.

د هرات-کندهار یوه له هغو لویو لارو څخه ده چې ډېرې ترافیکي پېښې په‌کې کېږي.

سالنګ کې د مخدره موادو ۵ قاچاق کوونکي نیول شوي

د نشه‌يي موادو انتقالوونکي د پولیسو له‌خوا ونیول شول

د پروان پولیس په سالنګ ولسوالۍ کې د مخدره موادو د پنځو قاچاق کوونکو د نیولو خبر ورکوي.

د پروان د امنیه قوماندانۍ ویاند سلیم نوري ازادي راډیو ته وویل، له نشه‌یي توکو سره د مبارزې سرتېرو دا څلور تنه چې یوه‌یې ميرمن ده نیولي دي.

د پولیسو په وینا له دې کسانو سره ۲۵ کیلو ګرامه چرس او ۱۶ کیلو ګرامه تریاک وو چې په کرولا موټر کې یې له شمال څخه کابل ته وړل.

شاهین اسمایي له عقابان هندوکش لوبډلې سره لوبه کوي

د افغانستان غوره لیګ

د افغانستان د فوټبال غوره لیګ سیالیو کې ټاکل شوې ده چې نن شاهین اسمایي له عقابان هندوکش لوبډلې سره مسابقه وکړي.

دا دوه ټیمونه په الف ګروپ کې دي چې شاهین اسمایي تر اوسه د ګروپ په سر کې او عقابان هندوکش د ګروپ په اخره کې دی.

دا سیالۍ تېره پنجشنبه په کابل کې پیل شوې.

هلمند کې پر افغان ځواکونو موټر بم برید شوی

افغان امینتي ځواکونه

د هلمند په نهر سراج ولسوالۍ کې د وزیرو د مانده په سیمه کې پر افغان ځواکونو د موټر بم برید شوی دی.

د هلمند د والي ویاند عمر ځواک ازادي راډیو ته وویل: "د لومړنیو معلوماتو له مخې دا مازدا موټر بم دی. په سیمه کې یې پوسته تخریب کړې ده، نور د تلفاتو په اړه دقیق جزئیات تر اوسه نه‌شته."

دا برید تېره شپه د نهو بجو خوا ته وشو. د پولیسو یوې سرچینې چې د خبرو اجازه‌یې نه‌لرله ازادي راډیو ته وویل چې دې چاودنې ۱۵ تنه وژلي دي.

خوست کې ماین چاودنه شوې

ارشیف

په خوست ښار کې ماین چاودنې یو کس وژلی او ۶ ملکيان یې ټپیان کړي.

د خوست والي ویاند طالب منګل ازادي راډیو ته وویل، چې دغه چاودنه نن مازدیګر مهال ۴:۴۵ دقیقې د خوست دوهمې حوزې اړوند د مجاهد څلور لارې ته څېرمه وشوه.

منګل وایي، یو کس غوښتل یې یو ماین ولېږدوي، چې خپل ماین پرې چاودلی او نوموړی یې ځای پر ځای وژلی.

په پېښه کې ۶ ملکیان هم ټپیان شوي چې د درملنې په هدف روغتون ته لېږدول شوي.

د دې چاودنې مسئولیت تر اوسه چا نه دی منلی

دا په داسې حال کې ده چې دوه ورځې وړاندې هم د خوست ښار په منځ چوک کې یوې چاودنې د ښوونځی یو زده کوونکی وواژه او څلور کسان یې ټپیان کړل.

ناټو په افغانستان کې د تاوتریخوالو دوام ته غبرګون وښود

کابل کې کاسټر موټر چې د ماین چاودنې پېښه کې ویجاړ شوی؛ ارشیف

د افغانستان لپاره د ناټو ملکي استازی وایي، هره میاشت د دې هېواد ډېری خلکو ته د امنیتي پېښو له امله مرګ ژوبله اوړي.

سټیفانو پونته کوروو نن پر ټویټر ولیکل چې ناټو د ملګرو ملتونو د سازمان ترڅنګ په امنیتي پېښو کې په لاس د جوړو شویو چاودېدونکو توکو کارول په سختو ټکو غندي.

د هغه په وینا ټول افغانان اړتیا لري چې د سولې ګټې احساس کړي او په لیدلوري یې باور ولري.

په قطر کې د افغانستان د دولت او طالبانو د استازو ترمنځ د مذاکراتو په دوام لا هم په افغانستان کې د تاوتریخوالي کچه نه ده کمه شوې.

تر دې وړاندې په کابل کې د ملګرو ملتونو د سازمان دفتر یا یوناما په افغانستان کې د ماینونو ایښودل غندلي او هغه یې غیرقانوني کار بللی و.

د ملګرو ملتونو د سازمان د شمېرو له مخې یوازې په اګسټ میاشت کې څه باندې ۱۰۰ ملکي وګړو ته په افغانستان کې د ماین د چاودنو له کبله مرګ ژوبله اوښتې.

یوازې پرون د دایکندي چارواکو تایید کړه چې په دې ولایت کې ۱۴ کسان د ماین په چاودنه کې ووژل شول.

عبدالله عبدالله: له پاکستانه ښه پیغام سره ځم

د عکس ښي لور ته د پاکستان صدراعظم عمران خان او چپ لور ته د افغانستان د ملي مصالحې د عالي شورا مشر عبدالله عبدالله

د افغانستان د ملي مصالحې د عالي شورا مشر وایي، له ښه پیغام سره به افغانستان ته بېرته ولاړ شي.

عبدالله عبدالله نن په اسلام آباد کې د آزادي راډیو له خبريال سره په مرکې کې ویلي چې د پاکستان سفر یې لاسته راوړنې لري.

هغه وویل: "زه ډېر هیله من یم، ښه سفر وو، خوښ یم، هغه بحثونه چې موږ له چارواکو، خلکو او بنسټونو سره درلودل، انشالله چې زمونږ پر اړیکو به ښه اغېز وکړي."

تر دې وړاندې عبدالله عبدالله د پاکستان له ولسمشر عارف علوي سره د لیدو پر مهال سوله د افغانستان د خلکو او حکومت لومړیتوب بللی وو.

ښاغلي علوي ویلي چې پاکستان د افغانستان د سولې هڅو هر اړخیز ملاتړ کوي.

ټاکل شوې ښاغلی عبدالله پاکستان ته د خپل سفر په درېیمه او وروستۍ ورځ د هغه هېواد له دینې عالمانو سره هم وګوري.

نوموړي تر دې دمخه د پاکستان له صدراعظم عمران خان، لوی درستیز قمر جاوېد باجوه او د بهرنیو چارو وزیر شاه محمود قریشي سره لیدلي دي.

د افغانستان کرکټ بورډ: بلخ کې د کرکټ لوبغالی جوړېږي

د افغانستان کرکټ بورډ

د افغانستان کرکټ بورډ په بلخ کې د کرکټ د یو لوبغالي د جوړولو خبر ورکوي.

د کرکټ بورډ ویاند فرید هوتک وايي، ټاکل شوې چې دغه لوبغالی په مزار شریف ښار کې په نړیوالو معیارونو سره جوړ شي.

د کرکټ د دغه لوبغالي په تاسیساتو کې، ادارې برخې، د تمرینونو او زده کړې لپاره خونې، او له لوبې مخکې لوبغاړو ته د اندامونو یا غړو د نرمولو د ځانګړو څانګو جوړول هم شامل دي.

دغه لوبغالی به په یو وخت کې د زرګونو نندارچیانو ظرفیت ولري.

د دې لوبغالي کار نن پیل شو او یو کال کې به بشپړ شي خو کرکت بورډ یې د لګښت په اړه معلومات ورنه کړل.

عبدالله: د افغان حکومت او خلکو لومړیتوب هېواد کې د سولې راوستل دي

عبدالله عبدالله د پاکستان له ولسمشر عارف علوي سره وکتل

د افغانستان د ملي مصالحې عالي شورا مشر د پاکستان له ولسمشر سره د لیدو پر مهال ویلي چې د افغانستان د حکومت او خلکو لومړیتوب په هېواد کې یې د سولې راوستل دي.

عبدالله عبدالله نن تر غرمې دمخه له ولسمشر عارف علوي سره ولیدل.

ښاغلي علوي ویلي چې پاکستان په هر اړخیز ډول د افغانستان د سولې هڅو ملاتړ کوي.

نوموړي زیاته کړه چې هېواد یې په افغانستان کې د جګړې ختمېدل او د ثبات ټینګښت غواړي.

د افغانستان د ملي مصالحې عالي شورا مشر ویلي، دا مهال د روانو ستونزو څخه د راوتلو یو استثنایي فرصت رامنځته شوی دی، نو هغه سولې ته د افغانستان د رسېدو لپار د سیمې او نړیوالې ټولنې د همکارۍ غوښتنه وکړه.

ټاکل شوې ښاغلی عبدالله پاکستان ته د خپل سفر په درېیمه او وروستۍ ورځ د هغه هېواد له دیني عالمانو سره هم وګوري.

نوموړي تر دې دمخه د پاکستان له صدراعظم عمران خان، لوی درستیز قمر جاوېد باجوه او د بهرنیو چارو وزیر شاه محمود قریشي سره لیدلي دي.

د بدخشان د کوهستان ولسوالۍ امنیه قوماندان د طالبانو په برید کې وژل شوی

ارشیف

د بدخشان د کوهستان ولسوالۍ امنیه قوماندان د طالبانو په یوه برید کې وژل شوی دی.

د بدخشان د والي ویاند نېک محمد نظري نن ازادي راډیو ته وویل چې طالبانو تېره شپه دا برید وکړ چې په نتیجه کې یې په خپله طالبانو ته هم درنه مرګ‌ژوبله اوښتې.

هغه زیاته کړه: "تر ۱۵ ډېر طالب وسله‌وال د امنیتي او دفاعي ځواکونو له‌خوا ووژل شول، خو له بده مرغه د کوهستان امنیه قوماندان عبدالظاهر ضیایي هم له دوو نورو سیمه‌ییزو پولیسو سره په سیمه کې ووژل شو."

وسله‌والو طالبانو تر اوسه په دې اړه تبصره نه‌ده کړې.

دواړه لوري تل په دې ډول جګړو کې یو بل ته د مرګ‌ژوبلې ادعا کوي.

لغمان کې د هاوان مرمۍ د یوې کورنۍ ۳ غړي وژلي

د لغمان ولایت نقشه

په لغمان کې د هاوان مرمۍ د یوې کورنۍ درې غړي وژلي او درې تنه نور یې ټپیان کړي دي.

د لغمان د والي ویاند اسدالله دولت‌زي ازادي راډيو ته وویل چې بېګا شااوخوا اته بجې د لغمان د الینګار ولسوالۍ په قلعټک سیمه کې پر یوه کور د هاوان مرمۍ لګېدلې.

هغه وايي وژل شوي یوه ښځه او دوه ماشومان دي.

د پېښې درې ټپیان چې ماشومان دي روغتون ته وړل شوي.

د لغمان د والي ویاند که څه هم ونه‌ویل چې دغه مرمۍ د کوم لوري له‌خوا توغول شوې، خو په سیمه کې وخت نا وخت د افغان ځواکونو او وسله‌والو طالبانو ترمنځ پر یو بل د بریدونو خبرونه ورکول کېږي.

خو وسله‌وال طالبان بیا د دغې پېښې مسؤلیت پر افغان ځواکونو وراچوي او وایي چې هاوان د افغان ځواکونو له‌خوا توغول شوی دی.

جمهوریت څلورلاري کې ماین چاودنې ۲ پوځيان ټپيان کړي

د کابل نقشه

د کابل د ۱۱مې حوزې په جمهوریت څلورلاري کې یوې ماین چاودنې دوه پوځيان ټپيان کړي.

د پولیسو ویاند فردوس فرامرز ازادي راډيو ته تأیید کړه چې د مقناطیسي ماین دا چاودنه په ۲۰ باندې اووه بجو په یوه فورډ (پوځي موټر) شوې ده.

چا د دې پېښې مسؤلیت نه‌دی منلی.

په دې وروستیو کې په کابل ښار کې د مقناطیسي ماین چاودنې زیاتې شوي.

د افغانستان په پلازمېنه کې دا چاودنه داسې وخت کېږي چې هلته په دوحه کې د افغانستان د دولت پلاوی او طالبان د سولې په خبرو بوخت دي او وايي هڅه‌یې ده چې روان تاوتریخوالی ختم کړي.

زلمی خلیلزاد دوحې ته روان شوی

زلمی خلیلزاد

زلمي خلیلزاد ویلي له روانو خبرو دا تمه ده چې د افغانستان د سیاسي راتلونکې لپاره د لارې نقشې او یو تلپاتي او هر اړخیز اوربند په لور پرمختګ وشي.

د افغانستان د سولې لپاره د امریکا خاص استازي ښاغلي خلیلزاد نن دا خبره په خپل ټویټر لیکلې.

هغه ویلي د دوحې او سولې په لور روان دی څو له شریکانو سره د افغانانو په مالکیت او مشرۍ د سولې د خبرو او سولې پسې سیمه‌ییز اتصال، سوداګرۍ او د ودې د پراختیا په اړه وغږېږي.

ښاغلی خلیلزاد داسې وخت دوحې ته روان شوی چې هلته د افغانستان د دولت او طالبانو د مرکچیانو ترمنځ خبرې روانې دي.

نن عبدالله د پاکستان د دیني عالمانو د شورا له غړو سره ګوري

د ملي مصالحې عالې شورا مشر عبدالله عبدالله

تمه ده چې د افغانستان د ملي مصالحې عالي شورا مشر عبدالله عبدالله نن د پاکستان د دیني عالمانو د شورا له غړو سره وګوري.

تر دې مخکې د مولانا فضل‌الرحمن په ګډون یو شمېر پاکستانیو دیني عالمانو په افغانستان کې د نړیوالو ځواکونو په وړاندې جهاد روا بللی و.

د ملي مصالحې عالي شورا جګپوړي سلاکار او د رسنیو د دفتر مشر مجیب‌الرحمن رحیمي تېره شپه ازادي راډیو ته وویل چې ښاغلی عبدالله به د پاکستان دیني عالمانو ته واضح پیغام ورکړي.

هغه زیاته کړه: "دیني عالمانو ته به زموږ پیغام هماغه پیغام وي چې ټولو ته مو درلوده او غوښتنه به مو له هغوی دا وي چې افغانستان یو اسلامي هېواد دی. په راتلونکي کې راشئ زموږ له عالمانو سره کېنئ او هڅه وکړئ چې هغه دیني مشروعیت چې طالبان یا ترهګر یې ادعا کوي، تر پوښتنې لاندې راولئ نه د افغانستان د دولت او د دې هېواد د خلکو مشروعیت."

تمه ده چې ښاغلی عبدالله به نن د پاکستان له ولسمشر عارف علوي سره هم وګوري.

ښاغلی عبدالله چې د یوه پلاوي په مشرۍ د دوشنبې په ورځ پاکستان ته تللی، نن به دغه سفر پای ته ورسوي.

د نوموړي د دغه درې ورځني سفر هدف د افغانستان د سولې پروسې لپاره د پاکستان د ملاتړ جلبول دي.

نور راوښيه

XS
SM
MD
LG