د لاسرسۍ وړ لېنکونه

تازه خبر
سه شنبه ۸ تله ۱۳۹۹ کابل ۰۲:۱۹

نړۍ

بیلاروس کې پولیسو یو شمېر اعتراض کوونکي نیولي

د اګست پر نهمه هم پولیسو شاوخوا زر کسان یوازې په منسک کې او په ټول هېواد کې ېې درې زره کسان نیولي وو.

پولیسو د بیلاروس په پلازمېنه منسک کې یو شمېر اعتراض کوونکي مخکې تر دې چې د ټاکنو د کمېسیون د وروستۍ پرېکړې پر ضد لاریونونو ته دوام ورکړي، نیولي دي.

لسګونه کسان د اګست پر لسمه داسې مهال ونیول شول چې د ټاکنو کمېسیون الکساندر لوکاشینکا رسماً د بیلاروس د ولسمشر په توګه اعلان کړ.

د اګست پر نهمه هم پولیسو شاوخوا زر کسان یوازې په منسک کې او په ټول هېواد کې ېې درې زره کسان نیولي وو.

دغو کسانو د هغې نظر پوښتنې له کبله اعتراض کړی وو چې ویلي یې وو څه باندې اتیا سلنه خلکو د لوکاشینکا د ولسمشرۍ لپاره مثبته رایه ورکړې ده.

اعتراض کوونکي دا ټاکنې له وړاندې پلان شوې بولي.

د یوې مخکښې مخالف کاندیدې سویتلانا څیخانوسکایا پلویانو ویلي وو چې دوی به د کمېسیون د پرېکړې پر ضد پراخ اعتراضونه وکړي.

د بیلاروس د کورنیو چارو وزارت د بشري حقونو د فعالانو هغه راپورونه ردوي چې وایې په دې اعتراضونو کې یو کس وژل شوی دی.

پخپله لوکاشینکا د اګست پر لسمه دا اعتراض کوونکي پسونه وبلل چې د ده په وینا له بهرنیو هېوادونو څخه د ټیلیفون له لاري رهبري کېږي.

نوموړي ویلي له دغو کسانو سره له پولنډ، بریتانیا او چک جمهوریت څخه ټیلیفوني اړیکې نیول شوي.

د ورځې تازه خبرونه دلته ولولئ

د ادبیاتو د نوبل جایزې ګټونکې 'سوتلانا الکسېیویچ' بیلاروس پرېښود

سوتلانا الکسېیویچ

د ادبیاتو د نوبل جایزې ګټونکې سوتلانا الکسېیویچ د ځان د خوندي کولو لپاره بیلاروس پرېښود او جرمني ته ولاړه.

دا خبره د جرمني خبري اژانس راپور کړې ده.

په بیلاروس کې له څو اوونیو د رژیم ضد مظاهرې روانې دي او حکومت هر وار سلګونه مظاهره چیان نیسي.

مظاهره چیان له واکه د الکساندر لوکاشینکا لرې کېدل غواړي.

سوتلانا الکسېیویچ چې د ۲۰۱۵ کال د نوبل جایزه ګټلې وه د لوکاشینکو سرسخته مخالفه ده.

۷۲ کلنې بیلاروسۍ لیکوالې او ژورنالیستې سوتلانا الکسېیویچ د خپل ژورنالیستیک مهارت په وسیله د هغو لویو تراژیدیو په اړه لیکنې کړي چې په شلمه پېړۍ کې په بیلاروس کې پېښې شوې دي.

شهباز شريف په ناقانونه توګه د پېسو د لېږد د قضیې په تړاو ونیول شو

د پاکستان د اپوزیسیون او د مسلم ليګ نواز ګوند مشر شهباز شريف

د پاکستان د اپوزیسیون او د مسلم ليګ نواز ګوند مشر شهباز شريف په ناقانونه توګه د پېسو د لېږد د قضیې په تړاو ونیول شو.

نوموړی وروسته له هغه د سېپټېمبر په اته ویشتمه نن دوشنبه د پاکستان د احتساب ادارې نېب له خوا د لاهور سترې محکمې مخ ته ونیول شو چې محکمې یې د ضمانت غوښتنه رد کړه.

نېب ادارې پر هغه د عایداتو په برخه کې د ستونزو په سبب او هم د پیسو د ناقانونه لېږد تورونه لګولي دي.

د نيول کېدو پر مهال د مسلم ليګ نواز ګڼ شمېر غړي موجود و او هغوی د تحريک انصاف حکومت او نېب پر ضد شعارونه ورکول.

شهباز شریف نږدې یوه اوونۍ وروسته له هغه ونیول شو چې ورور یې، د پاکستان پخواني صدراعظم نوازشریف له لندنه په یوه ویډيويي پیغام کې د پاکستان په پوځ تُند ګوزارونه وکړل.

هغه د عمران خان په مشرۍ اوسنی حکومت تورن کړ چې بې واکه دی. ​

د جرمني صدراعظمې د روسیې سیاسي مخالف 'الکسي ناوالني' سره لیدلي

د روسیې عمده سیاسي مخالف الکسي ناوالني

د روسیې عمده سیاسي مخالف الکسي ناوالني تایید کړه چې د جرمني صدراعظمه انګېلامېرکل یې لیدو ته ورغلې وه.

ناوالني وروسته یوه ورځ وروسته له هغه د انګېلامېرکل د لیدنې خبر په خپل ټوېټر ورکړ چې د جرمني دیر شپیګل مجلې راپور ورکړ انګېلامېرکل له ناوالني سره چې په روغتون کې و یوه پټه لیدنه کړې وه.

ناوالني په خپل ټویټر زیاته کړې چې د دې او د جرمني د صدراعظمې لیدنې ته باید مخفیانه ونه ویل شي ځکه د ده په خبره دا یوه خصوصي لیدنه وه او انګېلامېرکل یې له کورنۍ سره هم وغږېده.

الکسي ناوالني ۳۲ ورځې د برلین په یوه روغتون کې بستري و.

اروپايي متخصصینو ویلي چې ناوالني د نوویچوک په نوم د یوې زهري مادې په واسطه بې سده شوی و.

ناوالني وروسته له هغه د اګسټ په ۲۲ له روسیې برلین ته انتقال شو چې د روسیې په سایبریا کې تر بې سده کېدو وروسته کوما ته ولاړ.

الکسي ناوالني چې د روسیې د ولسمشر ولادیمیر پوتین یو سرسخته منتقد دی تېره اوونۍ له روغتون ووت او لا هم په جرمني کې دی.

افغانستان د اذربایجان او ارمنستان د روانې شخړې په اړه اندېښنه ښودلې

د افغانستان د بهرنیو چارو وزارت

د افغانستان د بهرنیو چارو وزارت د اذربایجان او ارمنستان ترمنځ روانې وسله‌والې شخړې باندې اندېښنه ښودلې او د خلکو په وژنه‌یې خواشینې څرګنده کړې.

د جنوبي قفقاز دغو دواړو هېوادونو پرون یو ځل بیا د نګورنو قره‌باغ لانجمنې سیمې پر سر خونړۍ شخړه وکړه او دواړو لورو ته تر ۲۳ پورې عسکر او ملکیان ووژل شول.

نګورنو قره‌باغ سیمه د اذربایجان د خاورې په توګه نړیوالو په رسمیت پېژندلې، خو له کلونو راهیسې د ارمنستان په کنټرول کې ده.

د افغانستان بهرنیو چارو وزارت نن په یوه خبرپاڼه کې ویلي چې دوی دغې سیمه کې د بیا اوربند او د لانجې د سیاسي حل غوښتونکي دي.

اذربایجان او ارمنستان د نګورنو قره‌باغ پر سر نن هم جګړې ته تیاری نیولی

نګورنو قره‌باغ کې ځواکونه

اذربایجان او ارمنستان د لانجمنې سیمې نګورنو قره‌باغ پر سر نن د دوهمې ورځې لپاره هم جګړې ته تیاری نیولی دی.

د جنوبي قفقاز د دغو هېوادونو ترمنځ وسله‌واله شخړه پرون پيل شوه چې د تېرو څلورو کلونو ورته جګړو په پرتله خونړۍ وه.

په پرونۍ نښته کې ۲۳ عسکر او ملکیان ووژل شول او دواړو لورو دغې سیمې ته نږدې هليکوپټرې، بې‌پیلوټه الوتکې او ټانګونه لېږلي دي.

پر دې شخړې د سیمې هېوادونو له هغې ډلې روسیې او ترکیې غبرګون ښودلی او د ژر تر ژره درېدو غوښتنه‌یې کړې ده.

دا مهال دواړو هېوادونو بېړنی پوځي حالت اعلان کړی دی.

د کرونا له امله په نړۍ کې د مړو شویو خلکو شمېر له یو میلیون واوښت

ارشیف، د کرونا ویروس له امله د مړه شویو کسانو لپاره قبرونه

د کرونا له لاسه په ټوله نړۍ کې د مړو شویو خلکو شمېر له یو میلیونو واوښت.

دا شمېر د ورلډومېټرس انفو وېب‌پاڼې خپور کړی چې له اول سره د کرونا ویروس په اړه تازه ارقام خپروي. د امریکا جانز هاپکنز پوهنتون هم دې ته نږدې شمېر اعلان کړی دی.

تر اوسه پورې نږدې ۳۰ میلیونه کسان په دې ویروس اخته شوي دي.

د کرونا ویروس په خاطر لګېدلو محدودیتونو دا څو وروستۍ میاشتې د ژوند عادي بڼه بدله کړې ده.

نه‌یوازې دا چې دا دی د دې ویروس له لاسه د قربانیانو شمېر له یو میلیون انسانانو واوښت، بلکې د نړۍ ګڼو هېوادونو ته‌یې سخت اقتصادي تاوان هم ورساوه.

امریکا، برازیل او هند د نړۍ هغه درې هېوادونه دي چې په‌کې د کرونا له لاسه د مړو خلکو شمېر په ترتیب تر نورو هېوادونو زیات دی.

امریکا چې د قربانیانو له پلوه په سر کې ده، تر اوسه‌یې نږدې ۲۰۵ زره کسان له لاسه ورکړي او د کرونا ویروس د ټولو اخته خلکو شمېر په‌کې له اووه میلیونو او درې لکو انسانانو اوښتی دی.

راجستان رایلز د کېنګز اېلېون پنجاب لوبډلې په ماتولو ریکارډ جوړ کړ

ارشیف

د هند د کرکټ په غوره لیګ کې بېګا راجستان رایلز د کېنګز پنجاب لوبډلې په ماتولو ریکارډ جوړ کړ.

په دې لوبه کې چې د شارجه په نړیوال سټډیوم کې وشوه لومړی د کېنګز اېلېون پنجاب ټیم د دوو لوبغاړو په سوځېدو په ۲۰ اورونو کې د ۲۲۳ لوړو منډو هدف وټاکه چې په‌کې ماینک اګروال سلیزه هم ووهله.

په ځواب کې د راجستان رایلز ټیم د شپږو لوبغاړو په سوځېدو ۲۲۶ منډې وکړې او د څلورو وېکټو په توپیر یې دغه ستر هدف ته ورسېد.

په بېګانۍ لوبه کې د راجستان درېیو لوبغاړو پنځوسیزې ووهلې او تر ټولو جالبه اوور هغه و چې راهول ټېواټیا په‌کې پنځه شپږیزې ووهلې.

د هند د کرکټ غوره لیګ دا وار د متحده عربي اماراتو په کوربه‌توب پيل شوی.

راجستان او ډهلي دوه هغه ټیمونه دي چې د هند د کرکټ سږني غوره لیګ په سر کې ځای لري او لوبې یې نه‌دي بایللي.

بلاروس کې پولیسو پر مظاهره‌چیانو اوښکې بهوونکی ګاز کارولی

بلاروس کې مظاهره‌چیان او پولیس

په بلاروس کې پرون ګڼ خلک د مظاهرو پر مهال نیول شوي او پولیسو د مظاهره چیانو د خورولو لپاره له اوښکې بهوونکي ګازه کار اخیستی.

خلک د الکساندر لوکاشینکا پر ضد پاڅېدلي او غواړي چې دی له واکه لیرې شي.

امنیتي ځواکونو چې د بلوا ضد یونیفورم‌یې په تن و په ګومیل ښار کې په خلکو اوښکې بهوونکي ګاز کاراوه او هوايي ډزې یې کولې.

په مېنسک کې د مظاهره‌چیانو شمېر یو لک تنه اټکل شوی. د کورنیو چارو وزارت ویلي چې په ټول هېواد کې یې یکشنبه ۲۰۰ کسان نیولي دي.

په بلاروس کې خلک وروسته له هغه پاڅېدل چې د انتخاباتو کمېسیون الکساندر لوکاشینکا د اګسټ نهمې ولسمشرۍ ټاکنو بریالی اعلان کړ.

لوکاشینکا له ۲۶ کلونو په بلاروس واک چلوي او وايي چې استعفا نه‌ورکوي.

اولادزیمېر: لویدیځ هېوادونه د بیلاروس په کورنیو چارو کې لاسوهنه کوي

اولادزیمېر مکي

د بیلاروس د بهرنیو چارو وزیر لویدیځ هېوادونه تورن کړل چې د دوی په کورنیو چارو کې لاسوهنه کوي.

اولادزیمېر مکي ویلي، دغه هېوادونه غواړي بیلاروس کې له ټاکنو وروسته رامنځ ته شوي اړودوړ او اعتراضونو ته لمن ووهي.

نوموړي پرون د ملګرو ملتونو عمومي اسامبلې ته د ویډیویي پیغام پر مهال وویل: "مونږ داسې هڅې ګورو چې په هېواد کې وضعیت کړکیچنوي."

ټاکل شوې متحده ایالات، اروپایي ټولنه، بریتانیا او کاناډا ژر پر بیلاروس د وروستیو مظاهرو د ځپلو په خاطر بندیزونه ولګوي.

دا مظاهرې د اګسټ د نهمې له انتخاباتو وروسته پيل شوي، هغه ټاکنې چې الکساندر لوکاشینکا یې د شپږم ځل لپاره ولسمشر اعلان کړ.

رومانیا کې د محلي ټاکنو د رایې ورکونې مرکزونه پرانیستل شول

په دغه اروپایي هېواد کې دا ټاکنې تېرې جون میاشتې ته پلان شوې وې، خو د کرونا وبا له کبله ځنډېدلې وې. 

په رومانیا کې د محلي ټاکنو د رایې ورکونې مرکزونه پرانیستل شوي دي.

شاوخوا ۱۹ میلیونه د رایې ورکونې وړ کسان دغلته د محلي چارواکو، د شورا د مشرانو او ښاروالانو څه باندې ۴۳ زره بستونو ته کسان ټاکي.

په دغه اروپایي هېواد کې دا ټاکنې تېرې جون میاشتې ته پلان شوې وې، خو د کرونا وبا له کبله ځنډېدلې وې.

داسې وېره شته چې د کرونا ویروس له ویرې به ټاکنو کې د خلکو ګډون هم کم وي، ځکه رومانیا کې د دغه ویروس څه باندې ۱۲۱۰۰۰ پېښې ثبت شوي او ۴۷۰۰ تنه ېې مړه کړي دي.

پاکستان کې د موټر چپه کېدو او اور اخیستو په پېښه کې ۱۵ تنه مړه شوي

ارشیف

په پاکستان کې د یوه مسافر وړونکي موټر د چپه کېدو او اور اخیستو په پېښه کې د ماشومانو په ګډون ۱۵ تنه مړه شوي دي.

دغه پېښه پرون کراچۍ ښار ته نژدې شوې ده او موټر کې د پولیسو په وینا ټول ۲۵ تنه سپاره وو.

لس تنه سپرلۍ له پېښې روغ ژغورل شوي دي.

پاکستان کې په ځانګړې توګه غرنیو سیمو کې یې ترافیکي پېښې عادي دي چې لامل یې بې احتیاطي او د سړکونو خرابوالی ښودل شوی.

تېر کال پاکستان کې ۹ زره ترافیکي پېښې شوي چې ۴ زره کسانو په کې ژوند له لاسه ورکړی دی.

د کرکټ ای پي ایل سیالیو کې نن د راجستان او پنجاب لوبډلې سیالي لري

ای پي ال سیالیو کې د راهول یو انځور

ټاکل شوې چې د هندوستان د کرکټ د غوره لیګ ای پي ایل سیالیو په نهمه لوبه کې راجستان رایلز او کینګز ایلیون پنجاب لوبډلې د یو بل پر وړاندې د سیالۍ ډګر ته ښکته شي.

دا لوبه نن ماښام د شارجه کرکټ په لوبغالي کې په ځای وخت شپږ نیمې بجې پیلېږي.

د دې سیالیو د تېرې شپې په لوبه کې بیا حیدر اباد لوبډلې خپله دوهمه لوبه هم وبایلله.

د کلکته کنګ رایډرز سره په لوبه کې سنرایز لومړی توپ وهنه وکړه او په ټاکلو شلو اورونو کې يې د پنځه لوبغاړو په سوځېدو ۱۴۳ منډې هدف وټاکه چې یاد هدف د کلکتې لوبډلې د دریو لوبغاړو په سوځېدو د سیالۍ په اتلسم اور کې پوره کړ.

دوه افغان لوبغاړي محمد نبي او راشد خان چې د حیدر اباد په لوبډله کې لوبېږي دواړو ته د تېرې شپې په لوبه کې چانس ورکړل شوی وو خو دواړو د پام وړ لاس ته راوړنه نه درلوده.

نبي یولس منډې کړې او راشد خان یوه ویکټه ترلاسه کړه.

ټرمپ لانجمنه قاضي کاني برېټ د سترې محکمې د غړې په توګه ونوموله

ډونالد ټرمپ او کاني برېټ

د امریکا ولسمشر ډونالد ټرمپ لانجمنه قاضي کاني برېټ د سترې محکمې د غړې په توګه ونوموله.

کاني برېټ د امریکا د ولسمشرۍ تر انتخاباتو ۳۸ ورځې مخکې او د سترې محکمې د لبرال قاضي روت بیدر ګینزبرګ له مړینې ۸ ورځې وروسته ونومول شوه.

ولسمشر ټرمپ په سپینه ماڼۍ کې وویل، دا درېیم قاضي دی چې ده د ولسمشرۍ په څلور کلنه دوره کې د سترې محکمې غړیتوب ته وړاندیز کړی دی.

ده اټکل وکړ چې د امریکا سنا جرګه به بې‌جنجاله او ژر کاني برېټ تأیید کړي.

د امریکا د سنا جرګې په ۱۰۰ چوکیو کې ۵۳ د جمهوري‌پالو په لاس کې دي او تر اوسه د هغو ډېرو ویلي چې د کاني برېټ ملاتړ کوي.

فرانسه کې پر دوو تنو حمله کوونکي پاکستاني پر خپل جرم اعتراف وکړ

د فرانسې سرتېری

په فرانسه کې د قصابۍ په ساتول د دوو تنو د وهلو په تور نیول شوي پاکستاني پر خپل جرم اعتراف وکړ.

تحقیق کوونکو پرون وویل چې دغه ۱۸ کلن ځوان چې مستنطقانو یې نوم حسن اې ښودلی، د حملې انګېزه د پاریس د یوې مجلې 'شارلي ابدو' له لوري د اسلام د پیغمبر د کاریکاتور بیا خپرېدا بللې ده.

دا پېښه درې اوونۍ وروسته له دې وشوه چې په پاریس کې د ۲۰۱۵ کال په جنورۍ کې پر شارلي ابدو مجلې په حمله کې د ۱۴ مشکوکو کسانو محاکمه په دې ښار کې پیل شوه.

د ۲۰۱۵ په پېښه کې ۱۷ تنه وژل شوي وو.

خوزستان کې وسله‌والو ۲ ایراني پوله‌ساتي وژلي

یو ایرانی سرتېری

ایران وايي، په خوزستان ولایت کې یې وسله‌والو مخالفانو دوه پوله‌ساتي وژلي دي.

د خوزستان ولایت د سرحدي ځواکونو قوماندان لطف علي پاکباز وویل، د ایران د سمندري پولې دوه سرتېري پرون مازدیګر هغه مهال ووژل شول چې د دغه ولایت په هورالمظیم سیمه کې یې ګزمه کوله.

ده حمله کوونکي وسله‌وال اشرار بللي دي، خو نور جزئیات‌یې نه‌دي ورکړي.

نور راوښيه

XS
SM
MD
LG