د لاسرسۍ وړ لېنکونه

تازه خبر
دوشنبه ۷ تله ۱۳۹۹ کابل ۰۱:۵۳

افغانستان

کندهار کې چاودنو ۱۰ ملکي کسان وژلي

د کندرهار ولایت نقشه

د کندهار په ارغستان ولسوالۍ کې په دو جلا جلا ماین چاودنو کې ۱۰ ملکي کسان وژل شوي.

د کندهار د امنیه قوماندانۍ ویاند جمال ناصر بارکزي ازادي رادیو ته وویل چې دواړه چاودنې یکشنبه ماسپښین شوې دي.

هغه د پېښې جزئیات داسې بیان کړل: "یو ماین د ارغستان ولسوالۍ د شنه نري په سیمه کې د ملکي خلکو په موټر چاودېدلی چې اته کسان په‌کې شهیدان شوي دي. دویم ماین د برج کلي په سیمه کې په دوو پليو کسانو چاودېدلی چې دا دوه کسان هم شهیدان شوي. دا دواړه ماینونه وسله‌والو مخالفینو کېنولي و."

د دې پېښو مسؤلیت تر اوسه چا نه‌دی منلی.

ارغستان د کندهار یوه لیرې پرته او سرحدي ولسوالۍ ده چې امنیتي وضعه‌یې ډېره ښه نه‌بلل کېږي.

د ورځې تازه خبرونه دلته ولولئ

د بامیان چارواکي: طالبانو په یوه برید کې ۹ افغان سرتېري وژلي

ارشیف

د بامیان ولایت امنیتي چارواکي وايي چې د طالبانو په یوه برید کې ۹ افغان سرتېري وژل شوي دي.

د بامیان د امنیه قومندانۍ ویاند محمد رضا یوسفي ازادي راډيو ته وویل چې طالبانو د شېبر ولسوالۍ په باغک کلي کې د افغان امنیتي ځواکونو په پوستې برید کړی دی.

یوسفي تاییدوي چې د طالبانو په دې برید کې ۹ افغان سرتېري وژل شوي، دوه تنه یې ټپيان او یو تن یې د طالبانو په لاس اسیر شوی دی.

د بامیان امنیه قومنداني وايي چې طالبان د افغان پوځیانو په ځوابي برید کې له سیمې وتلي دي.

طالبانو بیا ادعا کړې چې په شېبر ولسوالي کې یې څو پوستې هدف ګرځولي او لسګونه افغان سرتېري یې وژلي دي.

افغان چارواکي: سږ کال د پنبې حاصلاتو کې زیاتوالی راغلی

ارشیف

د افغانستان د کرنې، اوبولګولو او مالدارۍ ریاست چارواکي وایي، د نیمروز ولایت د پنبې د کروندو ارزونې ښیي، چې سږني حاصلات به یې پنځه زره ټنو ته ورسېږي.

د دغه وزارت ویاند اکبر رستمي نن ازادي راډيو ته وویل،چې تېر کال د دې ولایت د پنبې حاصلات ۵۶۰ ټنه وه خو اوس نږدې لس چنده زیاتوالی ښيي.

هغه زیاتوي: "سږکال د نیمروز ولایت په دوه زره او ۲۵۰ هکټاره ځمکه پنبه کرل شوې، چې له دغو کرونو څخه به څه باندې پنځه زره ټنه مالوچ راټول شي، دا په داسې حال کې ده، چې تېر کال د نیمروز ولایت د پنبې حاصلات ۵۶۰ ټنه و."

نوموړي یې لامل، پر بزګرانو د پنبې اصلاح شوي تخونه، کیمیاوي سرې، د اړتیا وړ درملو او نورو اړین وتوکو وېشل ګڼي او وايي، ترڅنګ یې کروندګرو ته د پنبې ننداریزې قطعې هم جوړې شوي دي.

نیمروز، پروان، کنړ، ارزګان، فاریاب، هرات، بغلان، جوزجان، کندز، لغمان، تخار، کاپیسا، ننګرهار، بلخ، سمنګان، سرپل، هلمند او کابل هغه ولایتونه دي، چې په کې پنبه کرل کېږي.

ارګ: د ګمرکونو برخه کې اساسي اقدامات تر لاس لاندې دي

د کندز ګمرک

د افغانستان جمهوري ریاست وايي، د ګمرکونو په برخه کې اساسي اقدامات تر لاس لاندې لري.

جمهوري ریاست نن په یوه بیان کې ویلي، چې جمهور رییس غني تېره شپه ناوخته په دې اړه په جوړه شوې ناسته کې ټينګار کړی چې باید په ګمرکونو او عایداتي ادارو کې مقرري د ازادې سیالۍ له لارې وشي.

د بیان پر بنسټ جمهور رییس په ګمرکونو او بندرونو کې د قوانینو د تطبیق، د افغانستان عایداتي سرچینو ته د جدې پاملرنې غوښتنه کړې ده.

دا په داسې حال کې ده چې تردې وړاندې په عایدتي منابعو کې د پراخ فساد ادعا شوې ده.

عبدالله عبدالله د پاکستان د بهرنیو چارو وزیر سره وکتل

عبدالله عبدالله د پاکستان د بهرنیو چارو وزیر شامحمود قریشي سره لیدلي.

د افغانستان د ملي مصالحې د عالي شورا رییس عبدالله عبدالله پاکستان ته په رسېدو د دغه هېواد د بهرنیو چارو له وزیر شاه محمود قریشي سره وکتل.

د دغو خبرو جزییات تر دې دمه نه دي راوتلي.

ښاغلي عبدالله مخکې په خپل ټوېټر هیله ښودلې وه چې دا سفر یې د دوو ګاونډيو هېوادونو په اړیکو په خاصه توګه په افغانستان کې یوې با عزته او دایمي سولې ته د رسېدو په برخه کې د همکاریو نوی باب پرانېزي.

اخوا د پاکستان په چارو کې د افغان ولسمشر ځانګړی استازی محمد عمر داوودزی چې په دې سفر کې د ښاغلي عبدالله ملګرتیا کوي ازادي راډیو ته وویل: "د پخوا په نسبت وضعیت بدل شوی دی، د لومړي ځل لپاره د افغانستان د جګړې دوه اړخونه چې افغانان دي، دوحه کې مخامخ خبرو ته ناست دي، پاکستان هم هر ډول لازمې اشارې او علامې څرګندوي او د سولې بهیر کې همکارۍ ته جدي دی."

په افغانستان کې د ناټو او اروپايي ټولنې لوړپوړیو استازیو پاکستان ته د عبدالله عبدالله سفر ستایلی او ویلي یې دي چې د دغو هېوادونو د اړیکو د ټینګښت ملاتړي دي او سیمه باید د افغانستان د سولې او ثبات لپاره همکاري وکړي.

عبدالله عبدالله داسې وخت پاکستان ته تللی چې په دوحه کې د افغانستان د دولت او طالبانو ټیمونه خبرې کوي خو په ځينو لانجمنو مسلو سره ایسار دي.

تمه ده ښاغلی عبدالله په دې سفر کې د پاکستان له صدراعظم عمران خان او نورو لوړپوړو چارواکو سره هم وګوري.

عبدالله عبدالله اسلام‌اباد ته ورسېد 

عبدالله عبدالله د پاکستان له صدراعظم، ولسمشر، بهرنیو چارو وزیر او یو شمېر نورو لوړپوړو چارواکو سره ګوري.

د افغانستان د ملي مصالحې عالي شورا مشر عبدالله عبدالله په درې ورځني سفر اسلام‌اباد ته ورسېد.

په دغه سفر کې د پاکستان په چارو کې د افغان ولسمشر ځانګړی استازی محمد عمر داوودزی او یو شمېر نور افغان چارواکي د ښاغلي عبدالله ملګرتیا کوي.

داوودزي له سفره مخکې د حامد کرزي هوايي ډګر کې ازادي راډیو ته وویل چې د سفر مثبتو پایلو ته هیله‌من دی.

هغه زیاته کړه: "د پخوا په نسبت وضعیت بدل شوی دی، د لومړي ځل لپاره د افغانستان د جګړې دوه اړخونه چې افغانان دي، دوحه کې مخامخ خبرو ته ناست دي، پاکستان هم هر ډول لازمې اشارې او علامې څرګندوي او د سولې بهیر کې همکارۍ ته جدي دی."

ټاکل شوې ښاغلی عبدالله دې سفر کې د پاکستان له صدراعظم، ولسمشر، بهرنیو چارو وزیر او یو شمېر نورو لوړپوړو چارواکو سره وګوري.

عبدالله عبدالله اسلام‌اباد ته ولاړ

ډاکتر عبدالله عبدالله

د افغانستان د ملي مصالحې عالي شورا مشر عبدالله عبدالله په درې ورځني سفر اسلام‌اباد ته ولاړ.

په دغه سفر کې د پاکستان په چارو کې د افغان ولسمشر ځانګړی استازی محمد عمر داوودزی او یو شمېر نور افغان چارواکي د ښاغلي عبدالله ملګرتیا کوي.

داوودزي له سفره مخکې د حامد کرزي هوايي ډګر کې ازادي راډیو ته وویل چې د سفر مثبتو پایلو ته هیله‌من دی.

هغه زیاته کړه: "د پخوا په نسبت وضعیت بدل شوی دی، د لومړي ځل لپاره د افغانستان د جګړې دوه اړخونه چې افغانان دي، دوحه کې مخامخ خبرو ته ناست دي، پاکستان هم هر ډول لازمې اشارې او علامې څرګندوي او د سولې بهیر کې همکارۍ ته جدي دی."

ټاکل شوې ښاغلی عبدالله دې سفر کې د پاکستان له صدراعظم، ولسمشر، بهرنیو چارو وزیر او یو شمېر نورو لوړپوړو چارواکو سره وګوري.

نن د سپټمبر ۲۸مه اطلاعاتو ته د لاسرسي نړیواله ورځ ده

افغان خبریالان

د سپټمبر ۲۸مه، اطلاعاتو ته د لاسرسي نړیواله ورځ ده.

د دې ورځې بنسټ ملګرو ملتونو څلور کاله وړاندې کېښود او هدف‌یې اطلاعاتو ته د لاسرسي له حقه ملاتړ او د مسؤلو ادارو هڅونه ده.

افغانستان یو له هغو هېوادونو دی چې د رسنیو د مسؤلینو او خبریالانو په خبره اطلاعاتو ته په‌کې لاسرسی ستونزمن دی.

د پژواک خبري اژانس مشر دانش کړوخېل ازادي راډیو ته وویل: "د حکومت ډېری ادارې هغه معلومات چې اغېزمن وي له رسنیو سره نه‌شریکوي، زه په جریان کې یم چې د ډېریو رسنیو تحقیقي راپورونه چې د خلکو په ژوند مثبت اغېز لري هغه د اسنادو او اطلاعاتو ته د نه‌لاسرسي له امله نیمګړي پاتې دي."

له دې ټولو انتقادونو سره سره افغان حکومت هوډ ښودلی چې اطلاعات په وخت رسوي.

افغان حکومت اطلاعاتو ته د لاسرسي قانون جوړ کړی چې د محتوا له پلوه ډېر ستایل شوی، خو په عملي برخه‌یې انتقادونه کېږي.

د دولت او طالبانو تماس ډلو پرون د کړنلارو پر اختلافي مسئلو بحث وکړ

قطر کې د سولې خبرو پیلېدل

د افغانستان دولت او طالبانو د تماس ډلو یکشنبه د ( ۱۳۹۹ د تلې ۶مه) په ماښام د کړنلارو په اختلافي مسئلو بحث کړی.

دا خبره د سولې په چارو کې د دولت وزارت ویاندې ناجیه انوري ازادي رادیو ته وکړه.

هغې زیاته کړه: "یکشنبه ماښام د افغانستان اسلامي جمهوریت او مقابل لوري تماس ډلو ګډه کاري جلسه درلوده. دغه جلسه چې څو ساعته‌یې دوام وکړ په‌کې د اختلافي موضوعاتو پر حل بحث وشو. دغه بحثونه به ادامه ولري."

د طالبانو د سیاسي دفتر ویاند محمد نعیم هم تأیید کړې چې د تماس ډلو ناسته درلوده.

د افغان دولت او طالبانو ترمنځ د سولې خبرې د سپټمبر په ۱۲مه په دوحه کې پرانیستل شوې، خو دواړه ټیمونه لا د بحثونو د کړنلارې په جوړولو موافقې ته نه‌دي رسېدلي.

طالبانو ټينګار کړی چې د ستونزو د هواري لپاره حنفي فقه او له امریکا سره د دوی تړون اساس وګرځول شي.

د راپورونو په اساس له افغانستانه ورغلی پلاوی له دې مسئلو سره مخالف دی او تر ډېره همدا دوه مسئلې د روانو خبرو لانجمن مسایل یاد شوي چې څو ورځو بحثونو لا هم نه‌دي هوار کړي.

ملي امنیت ریاست ننګرهار کې د داعش د یوې ډله‌ییزې حملې مخنیوی کړی

د داعش وسله‌والې ډلې نیول شوی شپږ کسیز ګروپ

د افغانستان ملي امنیت عمومي ریاست وایي په ننګرهار کې یې د داعش وسله‌والو د یوې ډله‌ییزې حملې مخه نیولې ده.

په دې اړه د ملي امنیت په خپره شوې اعلامیه کې راغلي چې ځانګړو افغان ځواکونو په ننګرهار د داعش وسله‌والې ډلې شپږ کسیز ګروپ چې غوښتل یې په یاد ولایت کې د ملي اردو د منسوبینو او قومي مشرانو یوه ګډه غونډه په نښه کړي، نیولې ده.

په اعلامیه کې راغلي دي چې د نبي‌الله په مشرۍ په دغه شپږ کسیز ګروپ کې د جلال‌اباد ښار لپاره د دغه ډلې د چاودنو مسؤل هم نیول شوی دی.

د اعلامیې پر بنسټ د ځانګړو افغان ځواکونو د دغه هدفي عملیاتو په پایله کې د ځان مرګو واسکټونه، یو شمېر سپکې او درنې وسلې او چاودېدونکي مواد هم نیول شوي دي.

د یو بل خبر له مخې، د لغمان ولایتي چارواکي وايي چې په دغه ولایت کې یې یو طالب انتحاري حمله کوونکی نیولی چې د مشرانو جرګې پر مشر فضل‌الهادي مسلمیار یې د حملې پلان درلود.

تر اوسه طالبانو د دغې ادعا په اړه څه نه‌دي ویلي.

عبدالله عبدالله سبا په درې ورځني سفر پاکستان ته ځي

د افغانستان د مصالحې عالي شورا مشر عبدالله عبدالله

د افغانستان د مصالحې عالي شورا مشر عبدالله عبدالله سبا په درې ورځني سفر پاکستان ته ځي.

د پاکستان د بهرنیو چارو وزارت په یوه بیان کې ویلي، د مصالحې عالي شورا لوړپوړي غړي دغه سفر کې د ښاغلي عبدالله ملګرتیا کوي.

نوموړی به دې سفر کې د پاکستان له صدر اعظم، ولسمشر، د سنا له رییس ،د ملي اسامبلې له مشر او بهرنیو چارو وزیر سره وګوري.

دا سفر داسې مهال کېږي چې د افغانستان د دولت مرکچیان په دوحه کې له طالبانو سره د سولې خبرو ته ناست دي، هغه خبرې چې په ظاهره لانجمنې شوي دي.

د حکومت مرکچي پلاوی: مونږ پر طالب مرکچي پلاوي ډېر بدګمانه نه یو

قطر کې د بین الافغاني خبرو پرانیستغونډې یو انځور

په قطر کې د دولت د مرکچي پلاوي یو غړی وایي، دواړه لوري هڅه کوي چې پر بنسټیزو بحثونو مخامخ خبرو ته ولاړ شي او دا کار وخت غواړي.

عطاالله لودین په هغو څرګندونو کې چې نن د سولې په چارو کې د دولت وزارت خپرې کړي وایي، اجنډا ته په داخلېدو به د دوی اصلي غوښتنه اوربند وي.

دی وایي، بحثونه یې پېچلي، خو دوی یې په اخلاص مخته بیایي او پر طالبانو هم بدګمانه نه دي.

هغه زیاته کړه: "مونږ چې له کوم فکر، ارادې او نظر سره راغلي یو، هغه کې ډېر صداقت دی، ډېر اخلاص دی، زمونږ هدف همدا دی هرڅومره ژر چې امکان وي، دې ملک کې جنګ ودرېږي او عادلانه سوله راشي، تر کومه چې په مقابل جانب اړه لري، مونږ پر هغوی هم ډېر بدګمانه نه یو"

ښاغلي لودین له طالبانو وغوښتل چې پر افغانانو ورحمېږي او جګړه ودروي.

بل لورته بیا د افغانستان د سولې لپاره د امریکا ځانګړي استازي زلمي خلیلزاد ویلي، طالبان به یوه سیاسي جوړجاړي ته تر رسېدو مخکې ممکن اوربند ونه کړي، خو اورکم عملي کولای شي.

ارزګان کې د ماشومانو ژوند د ګوزڼ او شري ناروغیو له خطر سره مخ دی

ماشومانو ته د پولیو واکسین ورکول

ارزګان روغتیايي چارواکي وايي د طالبانو تر واک لاندې سیمو کې د ګڼو ماشومانو ژوند د شري او ګوزڼ د ناروغیو له خطر سره مخ دی.

د ارزګان ولایت روغتیايي چارواکي وايي، په هغو سیمو کې چې طالبان واکمن دي له تېرو دوه کلنو راهیسې یو لک او شپاړس زره ماشومان د ګوزڼ د ناروغۍ پر ضد له واکسینو بې برخې دي.

دوی وايي، وسله‌وال طالبان اجازه نه ورکوي چې په دې سیمو کې ماشومانو ته واکسین ورکړي.

د ارزګان د عامې روغتیا د ریاست د واکیسنو د برخې مسؤل سیف‌الدین بارک ازادي راډیو ته وویل، د وسله‌والو طالبانو تر واک لاندې سیمو کې دا مهال لسګونه ماشومان د ګوزڼ په ناروغۍ اخته دي، او که په دې سیمو کې د پولیو واکیسنو ته اجازه ورنه کړل شي، پر دې ناروغۍ د ګڼو نورو ماشومانو د اخته کیدو وېره شته.

روغتیايي چارواکي وايي،که چیرې په یوه سیمه کې د ګوزڼ یو مثبته پېښه رامنځته شي، او نور ماشومان واکسین شوي نه‌وي، نو په یو ورځ کې په ګوزڼ ناروغۍ د نورو ۲۵۰ ماشومانو د اخته کېدو احتمال شته.

خو وسله‌وال طالبان بیا دا نه مني چې ګني دوی د واکیسنونو مخه نیولي وي.

طالب ویاند قاري یوسف احمدي ازادي راډيو ته په یو استولي پیغام کې ویلي، واکسیناتوران کولی شي، چې د دوی تر واک لاندې سیمو کې جومات پر جومات ماشومان واکسین کړي.

چارواکي: د کرنې او خوراکي خوندیتوب بېړنۍ پروژه پرانیستل شوه

ارشیف

د کرنې او خوراکي خوندیتوب بېړنۍ پروژه پرانیستل شوه.

د افغانستان د کرنې او مالدارۍ وزارت وايي، دغه پروژه د نړیوال بانک د ۱۰۰ میلیونه ډالرو په وړیا مرستو پلې کېږي.

د دغه وزارت ویاند اکبر رستمي نن ازادي راډيو ته وویل، چې دغه پروژه به په دوو کلونو کې په ۳۴ ولایتونو کې پلې شي.

هغه زیاته کړه: "د اوبولو لګولو د کانالونو بیاروغونې، د اوبو د مدیریت، د اصلاح شويو تخمونو د ویش او په ۳۴ ولایتونو کې د ښځو لپاره د کچالو، پیازو او سبزیو لپاره د سړو خونو په برخه کې عملي کېږي."

د افغانستان د کرنې او مالدارۍ وزارت وايي، د کرنې او خوراکي توکو د خوندیتوب دغه بېړنۍ پروژه به ۵ ميلیونه کاري ورځې رامنځ ته کړي او په مستقیم ډول به اووه لکه تنه له دې پروژې ګټه واخلي.

د بایسکل ځغلونې د ازاد سبک سیالۍ پیل شوي

ارشیف

د بایسکل ځغلونې د ازاد سبک سیالۍ تېره ورځ په کابل کې پیل شوي.

د افغانستان د ملي االمپيک کمېټې د مطبوعاتو کمېټې مسؤل مجیب قاري زاده نن ازادي راډيو ته وویل په یادو سیالیو کې په دوو برخو کې د کابل او هرات ولایت ۳۲ نارینه او ښځینه لوبغاړو ګډون کړی.

د ښاغلي قاري زاده لوبو نه به شپږ تنه چې څلور یې نارینه او دوه یې ښځینه وي، د بایسکل ځغلونې ملي لوبډلې ته انتخاب شي.

زابل کې د سولې جام فوټبال سیالۍ پيل شوي

ارشیف

په زابل ولایت کې د سولې جام فوټبال سیالۍ پيل شوې.

د زابل ولایت د المپیک امر محمد ویس عزیزي نن ازادي راډيو ته وویل، چې په دغو سیالیو کې د مرکز کلات لسو الف لوبډلو ګډون کړی.

ښاغلي عزیزي زیاته کړه، چې دغه لوبې تېره ورځ پیل شوې او شااوخوا شل ورځې به دوام وکړي.

د زابل د المپیک کمېټې امر وايي، چې د راتلونکې جمعې په ورځ به د نورو فدارسیونونو لوبې هم پيل شي.

نور راوښيه

XS
SM
MD
LG