د لاسرسۍ وړ لېنکونه

تازه خبر
پنجشنبه ۱۰ تله ۱۳۹۹ کابل ۱۱:۱۰

نړۍ

نن د جاپان پر ناګاساکي د اټومي بمب د غورځولو ۷۵ کلیزه ده

متحدایالاتو د ۱۹۴۵ کال د اګست په ۹مه نېټه، له غرمې مخکې یو اټومي بمب چې وزن یې څلورنیم ټنه و، پر دې ښار راوغورځاوه

نن د جاپان پر ناګاساکي ښار د اټومي بمب د غورځولو ۷۵ کلیزه ده.

متحدایالاتو د ۱۹۴۵ کال د اګست په ۹مه نېټه، له غرمې مخکې په ۱۱:۰۲ یو اټومي بمب چې وزن یې څلورنیم ټنه و، پر دې ښار راوغورځاوه، چې له اویازرو زیات کسان په کې ووژل شول.

د ناګاساکي ښار اوسېدونکو په دې مناسبت د یادغونډو په جوړولو سره دې قربانیانو ته درناوی وکړ او د نړۍ له مشرانو یې وغوښتل چې پر اټومي وسلو د محدودیتونو د لګولو په برخه کې نور اقدامات وکړي.

متحدایالاتو د ناګاساکي له بمبارۍ مخکې درې ورځې مخکې پر هیروشیما هم اټومي بم وغورځاوه چې د نړۍ لومړنۍ اټومي حمله وه.

پر هیروشیما په اټومي حمله کې ۱۴۰ زره کسان ووژل شول.

د ورځې تازه خبرونه دلته ولولئ

'د ټرمپ او بایډن مناظرې د نور نظم او اضافي تدابیرو اړتیا په ډاګه کړه'

د ډونالد ټرمپ او جوبایډن مناظره

د امریکا د ولسمشرۍ د انتخاباتو د کاندیدانو ترمنځ د مناظرې تنظیموونکي وايي سږنۍ بې‌نظمه ټلوېزیوني مناظره د هغو مسایلو په اړه په بحثونو کې چې رأی ورکوونکي باید پرې پوه شي د نور نظم او اضافي تدابیرو اړتیا په ډاګه کړه.

د ولسمشرۍ په انتخاباتو کې د ډیموکرات ګوند کاندید جوبایډن او ولسمشر ډونالد ټرمپ پرون چهارشنبه په ۹۱ دقیقې بې‌نظمه ټلوېزیوني مناظره کې سره مخامخ شول چې په ترڅ کې یې پر یو بل لفظي حملې وکړې، سپکې سپورې یې وویلې او د یو بل خبرې یې اخلال کړې.

د ولسمشرۍ د مناظرې کمېسیون پرون د سپټمبر په ۳۰مه په یوه بیان کې وویل چې په راتلونکو دوو مناظرو کې د ښه نظم د راوستو لپاره به ډېر ژر یو لړ اضافي تدابیر اعلان کړي.

داسې وړاندیزونه هم شته چې د مناظرې کوربه باید دا صلاحیت ولري چې د یوه کاندید مایکروفون بند کړي.

د اروپايي ټولنې مشران د بلاروس او ختیځې مدیترانې پر ستونزو بحث کوي

ارشیف، د اروپايي ټولنې مشران

د اروپايي ټولنې مشران په بروکسل کې راټول شوي څو د بلاروس د کړکېچ او د ختیځې مدیترانې په ګډون د ځینو کورنیو ستونزو په اړه بحث وکړي.

دې لانجو د اروپايي ټولنې په غړو هېوادونو کې د کرونا وبا پر ضد د مبارزې او په ختیځه مدیترانه کې د انرژۍ د زېرمو پر سر له ترکیې سره د اروپايي ټولنې د غړو یونان او قبرس د شخړې د حل هڅې له خنډ سره مخامخ کړې دي.

د دې دوه ورځنۍ سرمشریزې د لومړۍ شپې خبرې به د مدیترانې سمندرګي په ختیځ کې له ترکیې سره د یونان او قبرس پر لانجې متمرکزې وي.

ترکیې په جولای میاشت کې دې سیمې ته د پلټنو لپاره خپلې کښتۍ واستولې چې پوځي کښتیو بدرګه کولې. یونان هم د ځوابي اقدام په توګه د فرانسې په مرسته سیمې ته خپل سمندري ځواکونه واستول.

د اروپايي ټولنې غړي باید قبرس ته هم قناعت ورکړي چې وايي که پر ترکیې بندیزونه ونه‌لګول شي، نو په بلاروس کې د سیاسي بحران له کبله د بندیزونو طرحه به رد کړي.

د اوکراین لوهانسک ځنګلونو کې درنې اور لګېدنې ۵ کسان ووژل

د اوکراین لوهانسک ځنګلونو کې لګېدلی اور

اوکرایني چارواکي د اوکراین د ختیځې سیمې لوهانسک په ځنګلونو کې د درانه اور د لګېدو له کبله د لږترلږه ۵ کسانو د مړینې خبر ورکوي.

د اوکراین د بېړنیو خدماتو دولتي ادارې نن په یوه بیان کې همداراز وویل چې د سیمې د درېیو ولسوالیو په ځنګلونو کې د اور لګېدو په پېښه کې ۱۰ نور کسان هم ټپیان شوي او ۱۲۰ تنه نور له سیمې ایستل شوي دي.

چارواکي وايي چې د اور وژنې لپاره د اطفائیې زر تنه پرسونل سیمې ته استول شوي. د ولسمشر ولادیمیر زلنسکي د قانون د تنفیذ له ځواکونو غوښتي چې د اور لګېدو علت معلوم کړي.

د امریکا دوه ستر هوایي شرکتونه له ۳۲ زرو زیات کارکوونکي له کاره رخصتوي

د امریکا بیرغ

د امریکا دوه ستر هوایي شرکتونو امیریکن او یونایټډ په پام کې لري چې سر له ننه له ۳۲ زرو زیات کارکوونکي له کاره رخصت کړي.

له دغو دواړو شرکتونو چې له کانګرسه‌یې د میلیاردونو ډالرو مرسته ترلاسه کړې، غوښتل شوي و چې د سپټمبر د میاشتې تر پایه څوک له کاره ونه‌باسي. که له دوی سره بیا مرسته ونه‌شي ښایي ګڼ کسان له کاره وباسي.

دواړو هوایي شرکتونو ویلي چې د دې کار مخه نیول کېدای شي که د ټرمپ اداره او کانګرس د کارونو د خوندیتوب د ملاتړ لپاره د شپږو نورو میاشتو په مخه پر نورو ۲۵ میلیارده ډالرو مرستې موافقه وکړي.

که څه هم دواړه ګوندونه د هوایي شرکتونو ملاتړ کوي، خو تمه ده چې دغه مرسته به د مرستو په یوه لویه بسته کې شامله وي.

د استازو جرګې مشرې نانسي پلوسي او د خزانې وزیر سټیفن منوچین پرون له څه باندې یوه میاشت وروسته د لومړي ځل لپاره سره مخامخ ولیدل ترڅو یوه حل لاره ومومي.

د کانګرس غړي تر فشار لاندې دي چې د نومبر په درېیمه تر انتخاباتو مخکې باید د ځپل شوي اقتصاد د رغولو لپاره پر مرستې موافقه وکړي.

پوتین او مکرون د اذربایجان او ارمنستان د جګړې د بندېدو غوښتنه وکړه

د روسیې ولسمشر ولادیمیر پوتین او د فرانسې ولسمشر امانوئل مکرون

د روسیې ولسمشر ولادیمیر پوتین او د فرانسې ولسمشر امانوئل مکرون د نګورنو قره‌باغ شااوخوا د اذربایجان او ارمني ټبره ځواکونو ترمنځ د جګړې د بندېدو غوښتنه وکړه.

کرملېن نن وویل چې دواړو مشرانو د ټیلیفون له لارې د نګورنو قره‌باغ د لانجمنې سیمې پر سر د شخړو د ډیپلوماتیک هواري پر لارو چارو خبرې وکړې.

دا په څو کلونو کې تر ټولو سختې نښتې دي چې د دې سیمې پر سر له څلورو ورځو راهیسې پیل شوي دي.

دواړو مشرانو ویلي، چمتو دي چې د دغو جګړو د بندولو او د اروپا د امنیت او همکارۍ د سازمان له‌خوا د مېنسک په نوم ډلې چې مشري یې په ګډه روسیه، فرانسه او متحده ایالات کوي، له‌خوا د خبرو د بېرته پیلولو په ملاتړ اعلامیه خپره کړي.

د اذربایجان او ارمني ټبره ځواکونو ویلي چې جګړو ته به دوام ورکړي چې دا د یوې احتمالي بشپړې جګړې د پېښېدو او سیمې د کړکېچ د پراخېدو په اړه اندېښنې زیاتوي.

دواړو لورو له راز راز وسلو څخه پر یو بل بریدونه کوي.

عراق کې پر امریکایي پوځیانو توغندي ویشتل شوي

ارشیف

په عراق کې هغه وسله‌وال چې ایران‌یې ملاتړ کوي د کردستان په اربیل ښار کې پر امریکایي پوځیانو توغندي ویشتي دي.

دا خبره د عراق د کردستان په نیمه خپلواکه سیمه کې د ترورېزم ضد ادارې وکړه.

دې ادارې په خپله خبرپاڼه کې چې پرون‌یې خپره کړه ویلي دي چې په نینوا ولایت کې د شېخ امیر د کلي له لوري شپږ توغندي د اربیل پر هوایي ډګر توغول شوي دي.

په دې ځای کې امریکایي ځواکونه دېره دي.

د دغو توغندیو څلور د هوایي ډګر په غولي کې چاودېدلي دي او دوه‌یې نه‌دي منفجر شوي.

شېخ نواف ال احمد الصباح د کوېټ د نوي امیر په توګه لوړه وکړه

د کوېټ نوي امیر شېخ نواف ال احمد الصباح

شېخ نواف ال احمد الصباح د کوېټ د نوي امیر په توګه لوړه وکړه.

دی د کوېټ د متوفی امیر میرنی ورور دی چې څو کاله‌یې د کوېټ د امنیتي چارو په برخه کې کار کړی دی.

د کوېټ مخکېنی امیر صباح احمد الصباح درې ورځې مخکې د ۹۱ کلونو په عمر وفات شو.

داسې اټکل نه‌کېږي چې د کوېټ نوی ۸۳ کلن امیر به د خپل ورور ډیپلوماتیک مسیر په بله روان کړي.

نوی ولیعهد لا نه‌دی ټاکل شوی.

چک د کرونا ویروس د خپرېدو مخنیوي لپاره بېړنی حالت اعلان کړ

چک جمهوریت کې د کرونا د مخنیوي لپاره خلکو ماسکونه تړلي

چک جمهوریت سر له راتلونکې دوشنبې د کرونا ویروس د خپرېدو د مخنیوي لپاره یو ځل بیا بېړنی حالت اعلان کړ.

د چک روغتیا وزیر رومان بریمولا د چهارشنبې په ورځ د حکومتي چارواکو تر فوق‌العاده غونډې وروسته وویل: "ګڼو لاملونو دې ته اړ کړم چې د بېړني حالت وړاندیز وکړم. اوسنی وضعیت ښه نه‌دی. چک جمهوریت په وروستیو کې یو له هغو هېوادونو نه دی چې ډېر کسان په‌کې په کرونا ویروس اخته شوي. موږ باید د بریتانیا، فرانسې یا اسرائیل په څېر یو لړ اقدامات د دې لپاره وکړ چې د زیاتېدو مخه ونیسو."

د بندیز د لومړیو دوو اوونیو په مخه به تر ۲۰ تنو ډېر په بهر کې او تر ۱۰ ډېر په داخل کې نه‌شي سره یوځای کېدلی، لوبو ته به نندارچیان نه‌کېني، منځني ښوونځي به بندېږي او په روغتونونو کې به د مرستې لپاره د طب له محصلینو مرسته غوښتل کېږي.

په چک جمهوریت کې په وروستۍ یوې میاشت کې تر ۴۰ زره ډېر کسان په کرونا اخته شوي چې د نفوس په تناسب په اروپا کې دوهم هېواد دی چې ډېر کسان په‌کې 'کووېډ-۱۹' ناروغۍ نیولي دي.

چک جمهوریت د مارچ په میاشت کې لومړی ځل د کرونا د خپرېدو د مخنیوي لپاره اضطراري حالت اعلان کړی و چې دوه میاشتې یې دوام وکړ.

د 'ای پي ایل' سیالیو دوام؛ راشد خان په لومړي ځل جایزه واخیسته

راشد خان

د هندوستان د کرکټ غوره لیګ سیالیو 'ای پي ایل' په روانو سیالیو کې افغان لوبغاړي راشد خان د لومړي ځل لپاره د غوره لوبغاړي جایزه واخیسته.

راشد خان د تېرې شپې په لوبه کې د ډېلي کپیټلز لوبډلې درې مهم لوبغاړي له میدانه بهر کړل او د سنرایزرس حیدراباد لوبډلې ته‌يې بریا خپله کړه.

راشد خان په څلورو اورونو کې تر ټولو کمې ۱۲ منډې ورکړې او درې مهمې وېکټې يې واخیستې.

په دې لوبه کې چې تېره شپه د ابوظبي په لوبغالي کې ترسره شوه، سنرایزرس حیدراباد لوبډلې په ټاکلو ۲۰ اورونو کې د څلورو لوبغاړو په سوځېدو ۱۶۳ منډې هدف وټاکه، خو ډېلي لوبډلې یاد هدف پوره نه‌شو کړای او د اووه لوبغاړو په سوځېدو يې ایله ۱۴۷ منډې وکړې او دا لوبه‌يې د ۱۵ منډو په توپیر سیالې لوبډلې ته وبایلله.

دا په روانو لوبو کې د حیدراباد لومړۍ بریا ده او د ډېلي کپيټلز لومړۍ ماتې ده.

د دې سیالیو د نن ماښام په لوبه کې چې د دوبۍ په نړیوال کرکټ لوبغالي کې به ترسره شي راجستان رایلز او کلکته نایټ رایډرز لوبډلې د یو بل په وړاندې د سیالۍ ډګر ته ځي.

هند کې پر یوه جومات د حملې تورنو طراحانو ۳۰ کاله وروسته برائت واخیست

د هند ستره محکمه

یوې هندي محکمې ټولو هغو ۳۲ کسانو ته چې نږدې ۳۰ کاله دمخه پر یوه جومات په برید کې په لاس لرلو تورن وو، برائت ورکړ.

هغه برید د هندوانو او مسلمانانو ترمنځ تاوتریخوالی راوپاراوه او شاوخوا دوه زره کسان په‌کې ووژل شول.

د هند د ملت‌پالي بهاراتیا جاناتا ګوند یو شمېر لوړپوړي مشران په تورنو کسانو کې شامل وو چې نن د سپټمبر ۳۰مه برائت ورکړل شو.

دغو کسانو هغه تورونه رد کړي چې ګواکې په ۱۹۹۲ کال کې یې په اتراپرادېش ایالت کې د بابري په نوم د ۱۶مې پېړۍ پر جومات د برید سپارښتنه کړې وي.

هندوان په دې باور دي چې دا جومات د رام په نوم د دوی د یوه خدای په زېږن ځای کې جوړ شوی او ادعا کوي چې جومات د یوه زیارت پر سر جوړ شوی وو.

په ۱۹۹۳ کال کې ۴۹ کسان په دې برید کې په لاس لرلو تورن شول، خو له هغه وخته له دې ډلې ۱۷ کسان مړه شوي دي.

پاتې ۳۲ تنو نن د یوې ځانګړې محکمې څخه برائت واخیست.

محکمې حکم وکړ چې دا جومات د ټولنې ضد عناصرو له‌خوا وران شوی وو او داسې اسناد نه‌شته چې دا کار له مخکې پلان شوی ثابت کړي.

تېر ۲۴ ساعته اوکراین کې له ۴۰۰۰ ډېر کسان په کرونا ویروس اخته شوي

تر اوسه په اوکرایین کې ۹۵۹۲۰۲ تنه په کرونا ویروس اخته شوي .

په اوکراین کې په تېرو ۲۴ ساعتونو کې څه باندې ۴۰۰۰ کسان په کرونا ویروس اخته شوي دي.

دا د روان کال د مې میاشتې راهیسې چې دا وبا په اوکراین کې خوره شوه، په دې هېواد کې په یوه ورځ د کویډ ۱۹ ناروغانو تر ټولو لوړه شمېره ده چې ثبت شوه.

د اوکراین د عامې روغتیا وزیر ماکسیم ستیپانوف نن په کیف کې خبریالانو ته وویل، په ۴۰۲۷ نویو ناروغانو کې ۲۷۶ تنه یې ماشومان او ۱۷۱ تنه روغتیایې کارکوونکي دي.

د ستیپانوف په خبره له دې شمېرې څخه ۷۳۳ تنه په روغتون کې بستر شوي دي.

تر اوسه په اوکرایین کې ۹۵۹۲۰۲ تنه په کرونا ویروس اخته شوي چې ۴۱۲۹ ترې مړه شوي دي.

'ترکیې د ارمنستان یوه جنګي الوتکه نسکوره کړې'

د ترکیې جنګي الوتکې لوېدل

ارمنستان وایي، د ترکیې 'اف-۱۶' جنګي جټ الوتکې یې یوه جنګي الوتکه رانسکوره کړې ده.

انقرې سمدستي د ایریوان دغه ادعا نادرسته وبلله.

د ارمنستان د دفاع وزارت یوه ویاند شوشان استی پنیان په خپله فېس‌بوک پاڼه کې لیکلي چې د سوخوی سو ۲۵ الوتکه‌یې د دې هېواد په هوایي قلمرو کې د مأموریت په جریان کې رانسکوره شوې ده.

د هغه په وینا د الوتکې پیلوټ د یوه اتل په څېر خپل ژوند له لاسه ورکړ.

د ارمنستان د تېرې ورځې دغه ادعا داسې مهال کېږي چې له اذربایجان سره د لانجمنې سیمې نګورنو قره‌باغ پر سر د دې هېواد جګړه پرون پرله‌پسې درېیمه ورځ روانه وه.

نړیوالې ټولنې له دواړو لورو غوښتي چې شخړې سمدستي پای ته ورسوي.

د ملګرو ملتونو امنیت شورا د نګورنو قره‌باغ د جګړې د درېدو غوښتنه وکړه

د ملګرو ملتونه امنیت شورا

د ملګرو ملتونو امنیت شورا د نګورنو قره‌باغ د جګړې د سمدستي درېدو غوښتنه وکړه.

امنیت شورا بېګا د ارمنستان او اذربایجان ترمنځ د نګورنو قره‌باغ په لانجمنه سیمه باندې د تازه جګړې په اړه غونډه درلوده.

د دې شورا غړو د جګړې د سمدستي درېدو غږ وکړ او هم‌یې د ملګرو ملتونو د سرمنشي له هغه دریځه ملاتړ وکړ چې ښکېلې خواوې باید له تاوتریخوالي لاس په سر شي او مؤثرو خبرو ته وګرځي.

ارمنستان د نګورنو قره‌باغ په جګړه کې ترکیه هم د اذربایجان په ملاتړ تورنه کړې او پرون‌یې ادعا کړې چې د ترکیې یوه جټ الوتکه‌یې نسکوره کړې ده.

ترکیې دا ادعا رد کړه.

دواړو خواو ته تر پرونه چې د جګړې درېیمه ورځ وه د ډېرو تلفاتو د اوښتو خبره شوې ده.

ټرمپ او جوبایډن ترمنځ مناظره کې دواړو یو بل وننګول

د امریکا ولسمشر ډونالد ټرمپ او ډیموکرات کاندید جوبایډن ترمنځ لومړنۍ ټلوېزیوني مناظره

د امریکا متحده ایالاتو د ولسمشرۍ ټاکنو د کاندیدانو ډونالد ټرمپ او جوبایډن ترمنځ لومړنۍ ټلوېزیوني مناظره وشوه.

دا مناظره د اوهایو ایالت په کلویلند کې د فاکس نیوز د نطاق کریس والاس په کوربه‌توب وشوه چې له اول سره کاندیدانو په یو بل لفظي ګوزارونه کول.

جوبایډن ټرمپ یو مسخره او د پوتین لاسپوڅی وباله او په یوه برخه کې یې هغه ته وویل چې غلی کېږې (خوله بندوې) که نه؟

ټرمپ هم په ځواب کې بایډن ته کیڼ اړخی افراطي ووایه او څو واره‌یې هغه له افراطیانو سره تړلی وباله.

په دې مناظره کې د امریکا متحده ایالاتو په اکثرو کورنیو مسئلو د کرونا له مدیریت، اقتصادي کمزوریو، توکم‌پالنې او د قانون د حاکمیت په مسئلو بحث وشو.

د کرونا ویروس د مدیریت په برخه کې د ټرمپ په ادارې باندې د جوبایډن له‌خوا د کم‌کارۍ نیوکې وشوې او ویې‌ویل چې دوه لکه کسان مړه شول، خو ټرمپ وویل چې که دا د جوبایډن اداره وی ښايي دوه میلیونه امریکایان به مړه شوي و.

د توکم‌پالنې په لانجمنه موضوع هم دواړو کاندیدانو په یو بل نیوکې وکړې.

د قانون د حاکمیت په برخه کې چې جوبایډن د ډیموکراتانو مخکينۍ اداره بریالۍ بلله د ټرمپ له نیوکو سره مخ شو او ويې‌ویل په اکثرو هغو ښارونو کې پېښې شوي چې والیان او ښاروالان‌یې ډیموکراتان دي.

د کوېټ امیر شېخ صباح احمد جابرالصباح مړ شو

د کوېټ امیر شېخ صباح احمد جابرالصباح

د کوېټ امیر شېخ صباح احمد جابرالصباح د ۹۱ کلنۍ په عمر مړ شو.

د کوېټ د شاهي چارو وزیر شېخ علي جراح الصباح پرون ناوخته د ټلوېزیون له لارې د هغه د مړینې خبر ورکړ.

د کوېټ د امیر د روغتیایي وضعیت په اړه له څو میاشتو راهیسې ګونګوسی روانې وې.

شېخ صباح له تېر کال راهیسې څو ځلې روغتون ته لېږدول شوی و.

نوموړي په ۲۰۰۶ کال د تېلو د دغه تولیدوونکي او د متحده ایالاتو د متحد هېواد د چارو واګې په لاس کې اخیستې وې.

د هغه ورور ولیعهد شېخ نواف احمد الصباح د هغه د ځای ناستي په توګه معرفي شوی دی.

نور راوښيه

XS
SM
MD
LG