د لاسرسۍ وړ لېنکونه

تازه خبر
پنجشنبه ۳ تله ۱۳۹۹ کابل ۰۳:۱۴

افغانستان

ولسمشر غني د سولې مشورتي جرګې په اړه د امریکا د ملاتړ هرکلی وکړ

ولسمشر غني

د افغانستان ولسمشر محمد اشرف غني د سولې مشورتي لویې جرګې له دایرېدو د امریکا د ملاتړ هرکلی وکړ.

ښاغلي غني نن د جرګې په پرانیستونکې وینا کې وویل مهمه ده امریکا هغه څه چې دوی ته ویلي و نن یې افغان ولس ته هم په ښکاره اعلان وکړ.

هغه زیاته کړه: "زه د امریکا متحده ایالتونو د لویې جرګې په هکله د نن ورځې له اعلامیه څخه هرکلی کوم چې په هغه کې د افغانستان د راتلونکي لپاره د مطلوب هدف د سولې د تامین، اقتصادي پرمختیا او زموږ د اوسني ټولنې د ارزښتونو څخه ملاتړ اعلان شوی دی."

د امریکا د بهرنیو چارو وزارت په یوه خبرپاڼه کې د جرګې رابلل ستایلي او ویلي یې دي، دوی پوهېږي چې ګډونوال به یې د پاته طالب زندانیانو پر خوشې کېدو مصلحت وکړي.

د افغانستان د سولې لپاره د امریکا ځانګړی استازی زلمی خلیلزاد هم ویلي مشورتي لویه جرګه یو تاریخي فرصت دی چې د سولې د مخامخ خبرو په وړاندې وروستی خنډ لرې کړي.

زلمي خلیلزاد نن سهار پر خپله ټویټرپاڼه ولیکل چې له جرګې نه یوه مثبته نتیجه ترلاسه کول د تاوتریخوالي د کمښت او د بین الافغاني خبرو د ژر تر ژره پیل په معنا ده.

د ورځې تازه خبرونه دلته ولولئ

'ارزګان کې د افغان ځواکونو ځوابي حمله کې ۱۲ طالبان وژل شوي'

ارشیف

د ارزګان ولایت د دهراوود ولسوالۍ پولیس د افغان ځواکونو په ځوابي حملو کې د ۱۲ طالبانو د وژل کېدو خبر ورکوي.

د دهراوود ولسوالۍ مرستیال امنیه قوماندان روزي خان همکار ازادي راډيو ته وویل دا وسله‌وال هغه مهال ووژل شول چې د لنډياني سیمې پر امنیتي پوستو یې برید وکړ.

نوموړی زیاتوي چې په دې برید کې پنځه نور طالبان او دوه افغان سرتېري هم ټپیان شوي دي.

روزي خان وايي چې اوس هم په سیمه کې جګړه روانه ده.

د راپورونو له مخې د دې جګړې له کبله سلګونه کورنۍ د خپلو مېنو پرېښودو ته اړې شوې دي.

چارواکي: بدحشان کې طالبانو د یوې کورنۍ ۵ غړي وژلي

د بدخشان ولایت نقشه

د بدخشان چارواکي ادعا کوي چې طالبانو د دې ولایت په درایم ولسوالۍ کې د یوې کورنۍ پنځه غړي وژلي او یو بل‌یې ټپي کړی دی.

د بدخشان د امنیه قوماندانۍ ویاند ثناالله روحاني ازادي راډیو ته وویل چې د درایم ولسوالۍ د پیتاوک کلي اوسېدونکی شاه محمد، د هغه دوه زامن، ورور او اوښی نن سهار وختي په داسې حال کې چې د دیني مدرسې خوا ته روان وو، د طالبانو په ډزو ووژل شول.

هغه زیاته کړه: : "نن د سهار په څلورو بجو د پیتاوک کلي یو اوسېدونکي په داسې حال کې چې خپل زامن‌یې مدرسې ته بیول د پیتاوک او باغ صوفي سیمو ترمنځ د طالبانو له‌خوا په نښه کېږي. د دې کورنۍ پنځه غړي شهیدان کېږي."

ښاغلی روحاني وايي، د نوموړي یو بل زوی هم ټيي شوی چې اوس په روغتون کې دی.

د دې برید علت تر اوسه نه‌دی څرګند شوی او طالبانو هم تر اوسه په دې اړه څه نه‌دي ویلي.

شمسیه د افغانستان د کانکور ازموینې عمومي اول نمره شوه

شمسیه

د افغانستان پوهنتونونو او د لوړو زده‌کړو مؤسسو ته د شمولیت لپاره د کانکور ازموینې تر ټولو لوړه نمره سږکال د کابل اوسېدونکې شمسیې وګټله.

د لوړو زده‌کړو وزارت د ۱۳۹۹ کال د کانکور ازموینې پایلې نن اعلان کړې.

د دې وزارت د کانکور کمېټې د کابل د اصف مایل لېسې فارغه شمسیه د ۳۵۳،۱۸ نمرو په ترلاسه کولو د کانکور عمومي اول نمره اعلان کړه. نوموړې د کابل معالجوي طب پوهنځي ته بریالۍ شوې ده.

له کابله نعمت‌الله د ۳۵۳،۱۳ او د کابل بل اوسېدونکي محمد مجتبی د ۳۵۰ نمرو په اخیستو دوهم او درېیم مقامونه ګټلي چې دوی هم د کابل د معالجوي طب پوهنځي ته بریالي شوي دي.

اشرف غني له نړیوالو د سولې په راوستو کې مرسته وغوښته

ولسمشر اشرف غني

افغان ولسمشر اشرف غني پر نړیوالو غږ وکړ چې له هېواد سره‌یې د سولې په راوستو کې مرسته وکړي.

ښاغلي غني دغه غوښتنه په هغې وېډیویي وینا کې وکړه چې له مخکې ثبت شوې وه او پرون د ملګرو ملتونو د عمومي اسامبلۍ په تالار کې خپره شوه.

غني له ملګرو ملتونو وغوښتل چې له افغانستان سره د یوه خپلواکه، متحد او ډیموکراتیک هېواد په توګه هدف ته په رسېدو کې مرسته وکړي. ولسمشر غني وویل، افغان دولت له طالبانو سره د مخامخ خبرو لپاره سختې پرېکړې کړي او په دې برخه کې یې ژمنه، ترحم او مېړانه ښکاره کړې ده، خو دا به کافي نه‌وي.

غني زیاته کړه د دې لپاره چې یوه تلپاتې سوله ترلاسه شي هېواد ته‌یې په‌کار ده چې د ترهګرۍ جرړې وباسي چې سیمه‌یې ورانه کړې ده.

افغان ولسمشر دغه‌راز وویل، سوله د افغانستان لپاره یو عاجل او مهم لومړیتوب دی او پر هغو خبرو کې چې د روانې میلادي میاشتې په ۱۲مه د قطر په پلازمېنه دوحه کې پیل شوي، د افغانانو عاجل لومړیتوب، یوه اوربند ته رسېدل دي.

افغانستان کې د لمر او باد انرژۍ ۴ پروژو تړونونه لاسلیک شول

د دې پروژو تړونونه د چهارشنبې په ورځ په ارګ کې لاسلیک شول.

په افغانستان کې له لمر او باد څخه د انرژۍ د ترلاسه کولو د څلورو پروژو تړونونه لاسلیک شول.

پر دې ۱۶۰ میلیونه ډالر پانګونه کېږي چې د امریکا پرمختیایي اداره (یو اېس اېډ) یې تمویلوي.

د دې پروژو تړونونه د چهارشنبې په ورځ په ارګ کې لاسلیک شول.

دوه‌یې لمریزې دي چې یوه په کابل او بله په بلخ کې ده او دوه بادي پروژې په هرات کې پلې کېږي.

ټاکل شوې ده چې له یوه نیم تر څه باندې دوو کلونو پورې به د دې پروژو کارونه بشپړ شي او نږدې ۱۱۰ مېګا واټه برېښنا به تولید کړي.

ازبکستان له ملګرو ملتونو د افغان سولې لپاره د کمېټې جوړولو غوښتنه وکړه

د ازبکستان ولسمشر شوکت میرضیایف

ازبکستان له ملګرو ملتونو وغوښتل چې د افغان سولې لپاره یوه کمېټه جوړه کړي.

د ازبکستان ولسمشر شوکت میرضیایف د ملګرو ملتونو عمومي غونډې ته د چهارشنبې په ورځ وویل، دا کمېټه به د افغانستان د سولې چارې همغږه کوي او په دغه هېواد کې به د سیاسي روغې جوړې لپاره اسانتیاوې برابروي.

ازبکستان یو له هغو هېوادونو څخه دی چې ښایي د افغان حکومت او طالبانو د سولې د روانو خبرو د یو دور مذاکراتو کوربه شي.

تاشکند د ۲۰۱۸ کال په مارچ میاشت کې هم د افغانستان د سولې لپاره د یوې نړیوالې غونډې کوربه و.

سکاټ مېلر: په افغانستان کې باید شخړې کمې شي

په افغانستان کې د غوڅ ملاتړ مأموریت عمومي قوماندان سکاټ مېلر

په افغانستان کې د غوڅ ملاتړ مأموریت عمومي قوماندان ټینګار وکړ چې شخړې باید کمې شي.

جنرال سکاټ مېلر کندهار ته د سفر پر مهال د چهارشنبې په ورځ وویل چې طالبانو بریدونه زیات کړي دي، دې ته د نړیوالې ټولنې پام دی او باید تاوتریخوالی راکم شي.

کندهار ته په دې سفر کې له جنرال مېلر سره د افغانستان د کورنیو چارو سرپرست وزیر مسعود اندرابي او لوی درستیز محمد یاسین ضیا هم ملګرتیا وکړه.

د افغانستان د فوټبال غوره لیګ نن په کابل کې پیلېږي

تمه ده چې یوه اوونۍ وروسته د ښځینه لوبغاړو غوره لیګ په کابل کې پیل شي.

د افغانستان فوټبال غوره لیګ نن د اتو لوبډلو په ګډون په کابل کې پیلېږي.

د افغانستان د فوټبال فدراسیون مشر یوسف کارګر ازادي راډیو ته وویل چې لومړۍ لوبه به نن مازدیګر پنځه بجې پيل شي.

هغه زیاته کړه: "له خیره سره نن پنځه بجې د توفان هریرود او اباسین څپې لوبډلو ترمنځ لوبه پيلېږي."

د غوره لیګ د نهم دور دا لوبې سږ کال له ځان سره افغان حکومت او طالبانو ته د سولې پيغام لېږدوي.

تمه ده چې یوه اوونۍ وروسته د ښځینه لوبغاړو غوره لیګ هم په کابل کې پیل شي.

د احصائیې ملي اداره: الکترونیکي تذکره کې د مور نوم لیکل اختیاري دی

الکترونیکي تذکړه

د احصائیې او معلوماتو ملي اداره وايي، د الکترونیکي تذکرې په پاڼه کې د مور نوم لیکل اجباري نه‌دي او که څوک‌یې ونه‌غواړي، دا کار نه‌کېږي.

د دې ادارې رئیس احمد جاوېد رسولي نن په کابل کې یوې خبري غونډې ته وویل، له دې وړاندې هم په ډیټابېس یا د معلوماتو په ذخیره کې د مور نوم لیکل کېده، خو اوس د نوي قانون پر بنسټ، د هر شخص د خوښې پر بنسټ، د مور نوم د الکترونیکي تذکرې په لومړۍ صفحه لیکل کېږي.

ښاغلي رسولي زیاته کړه، دوی تر اوسه نږدې یو میلیون الکترونیکي تذکرې وېشلي او دا ټولې با اعتباره یا د باور وړ دي، خو یو شمېر هغه کسان چې له وړاندې یې تذکرې اخیستي، مګر غواړي د مور نوم په‌کې ولیکل شي، ژر به هغوی ته د نویو تذکرو د ورکړې بهیر هم پیل شي.

د افغانستان حکومت په وروستیو کې د وګړو د احوال او ثبت په قانون کې د تعدیل پر بنسټ، په الکترونیکي تذکرو کې د مور نوم لیکل تصویب کړل.

افغانستان کې د کبانو د تولید کچه ۱۱ زره مټریک ټنو ته ورسېده

یک فارم ماهی ولایت کندز

په افغانستان کې د کبانو د تولید کچه په کلني ډول ۱۱ زره مټریک ټنو ته رسېږي.

د کرنې او مالدارۍ وزارت ویاند اکبر رستمي نن ازادي راډيو ته وویل چې دا مهال ډېره برخه کبان په کندهار، هرات، ننګرهار، بلخ او کونړ کې تولیدېږي.

نوموړي وویل، تر دې وړاندې د افغانستان د اړتیا وړ ډېره برخه کبان له پاکستان څخه راوړل کېدل.

د افغانستان د کرنې او مالدارۍ وزارت وايي، دا مهال په افغانستان کې د کبانو د روزنې او تولید ۲،۰۰۰ فارمونه شته او هڅې روانې دي چې شمېر یې لا زیات شي.

د افغانستان او ایران ناسته کې د اقتصادي همکاریو پر پراختیا خبرې وشوې

د مالیې سرپرست وزیر عبدالهادي ارغندیوال او د برښنا په چارو کې د ایران د انرژۍ وزیر مرستیال همایون حائري په کابل کې سره ولیدل.

د افغانستان او ایران ترمنځ د دوه اړخیز اقتصادي او سوداګریز ګډ کمېسیون پنځمې ناستې د چمتووالي او د اقتصادي همکاریو د پراختیا په اړه خبرې وشوې.

د مالیې وزارت ویاند شمروز مسجدي ازادي راډيو ته وویل چې په دې اړه د مالیې سرپرست وزیر عبدالهادي ارغندیوال او د برېښنا په چارو کې د ایران د انرژۍ وزیر مرستیال همایون حائري نن په کابل کې سره ولیدل.

نوموړي وویل، په دې لیدنه کې د انرژۍ په برخه کې په دوه اړخیزه همکاریو او یو شمېر نورو اړوندو مسایلو هم خبرې وشوې.

د ښاغلي مسجدي په خبره، په دې ناسته کې ښاغلي حائري هم د دوه اړخیز اقتصادي او سوداګریز ګډ کمېسیون پنځمې ناستې ترسره کېدو لپاره د هغه هېواد د چمتووالي خبره وکړه او د دوه اړخیزو اړیکو په پراخېدو یې ټینګار وکړ.

د یادونې وړ ده چې د ایران او افغانستان ترمنځ بین‌الحکومتي ګډ کمېسیون دغه ناسته به د روان کال د لړم میاشتې په لومړیو کې په کابل کې جوړه شي.

د افغانستان او ایران ترمنځ په کلني ډول د یو نیم میلیارده ډالرو په ارزښت سوداګریزه راکړه ورکړه موجوده ده.

ملي امنیت: جلال‌اباد کې د داعش ډلې ۴ مهم غړي ووژل شول

د داعش ډلې بیرغ

د افغانستان ملي امنیت په جلال‌اباد کې د داعش ډلې ۴ مهمو غړو د وژنې خبر ورکوي.

د ننګرهار د ملي امنیت ریاست رسنیو ته په یوې لېږلې خبرپاڼه کې ویلي چې تېره شپه د دوی ځواکونو د جلال‌اباد ښار د ۴مې ناحیې په اکمالاتي بېز سیمه کې عملیات وکړل چې په ترڅ کې یې په ختیځ کې د داعش ډلې د هدفي وژنو، د ځانمرګو بریدونو، د چاودېدونکو توکو او نغدو پیسو انتقالوونکي ۴ مهم غړي یې وژل شوي دي.

د خبرپاڼې په حواله، یاد عملیات د ملي امنیت صفر دوه قطعې ترسره کړي چې د دواړو لورو ترمنځ تر څو ساعته نښتې وروسته پای ته ورسېدل او بل چا ته په‌کې زیان نه‌دی اوښتی.

خبرپاڼه وایي، په ترسره شویو عملیاتو کې یو شمېر چسپکي او ریموټ کنټرول ماینونه، چاودېدونکي توکي، مرمۍ، ریموټونه، یوه اندازه نغدې پیسې، یوه هندي رکشا او یو کرولا موټر هم ترلاسه شوي دي.

تېره ورځ هم دغه ریاست په تېره یوه اوونۍ کې د ۷ وسله‌والو طالبانو، ۲ انسان تښتوونکو، د جعلي پیسو د یو لېږدوونکي او د داعش په نوم له خلکو یو تن باج اخیستونکي د نیولو خبر ورکړی و.

'لوګر کې ۲۵ ‌وسله‌وال طالبان وژل شوي'

افغان ځواکونه

د لوګر سیمه‌ییز چارواکي ادعا کوي چې د افغان پوځیانو له‌خوا ۲۵ وسله‌وال طالبان وژل شوي او ۱۸ نور یې ټپيان دي.

دا خبره د لوګر د پولیسو ویاند شاه‌پور احمدزي ازادي راډیو ته وکړه.

هغه وویل طالبانو ته دا مرګ‌ژوبله په تېر یوه شپه او ورځ کې د برکي برک او شکر کلا په سیمو کې د افغان پوځیانو په ځوابي بریدونو کې اوښتې ده.

که څه هم شاه‌پور احمدزي افغان ځواکونو ته د اوښتې مرګ‌ژوبلې په اړه څه ونه‌ویل، خو یوې بلې باوري امنیتي سرچینې د نوم نه‌ښودلو په شرط ازادي راډیو ته وویل چې له طالبانو سره په نښتو کې ۳ افغان سرتېري وژل شوي او ۲ نور ټپیان دي.

وسله‌والو طالبانو تر اوسه په دې اړه رسنیو ته څه نه‌دي ویلي.

کونړ کې چاودنې او جګړې ولسي وګړو او افغان سرتېرو ته مرګ‌ژوبله واړوله

د کونړ نقشه

د کونړ سیمه‌ییز چارواکي تأییدوي چې په غازي‌اباد ولسوالۍ کې جګړې او ماين چاودنې ولسي وګړو او افغان سرتېرو ته مرګ‌ژوبله اړولې ده.

د کونړ والي وياند عبدالغني مصمم د چهار شنبې په ورځ ازادي راديو ته وويل: "تېر ماښام وسله‌والو مخالفينو د غازي‌اباد ولسوالۍ جلا سیمه کې د ملي اردو په مرکز بريد کړى چې په‌کې د ملي اردو يو سرتېرى وژل شوى او دوه سرتېري ټپيان دي."

د مصمم په خبره په يوه کور د هاوان ګولۍ هم لګېدلې چې په‌کې نهه ملکي وګړي ټپيان شوي.

د اسعد اباد روغتون مسؤلين وايي دوی ته د اردو د يو سرتېري جسد او ۱۰ ټپيان وروړل شوي چې اته‌يې ملکيان، اکثر ښځې او ماشومان او دوه حکومتي عسکر دي.

تر اوسه کومې وسله‌والې ډلې د دغو بریدونو مسؤلیت نه‌دی منلی.

دایکنډي کې د ښځو په مشرۍ د بادام یوه کارخانه پرانیستل شوه

ارشیف

نړیوالې مرستندویه ټولنې اکسفام د ډایکندي په شهرستان ولسوالۍ کې د ښځو په مشرۍ د بادام د پروسس یوه کارخانه پرانیستله.

دغې ټولنې پرون په خپله ټویټرپاڼه کې لیکلي چې په دغه کارخانه کې به په یوه ساعت کې د ۲۵۰ نه تر ۳۰۰ کیلوګرامه بادام پروسس او بسته‌بندي کېږي.

دې ټولنې دا هم ویلي چې د بادامو د پروسس د دغې کارخانې په پرانیستلو سره به د سیمې خلک وکولای شي چې بادام پاک او په ښه بیه‌یې وپلوري.

نور راوښيه

XS
SM
MD
LG