د لاسرسۍ وړ لېنکونه

تازه خبر
شنبه ۲۹ وږی ۱۳۹۹ کابل ۰۱:۱۶

نړۍ

د پاکستان نوې نقشه؛ د هند کنټرول لاندې کشمیر د پاکستان خاوره یاده شوې

ارشیف

د پاکستان حکومت د دغه هېواد یوه نوې سیاسي نقشه ترتیب کړې چې په‌کې د هند تر کنټرول لاندې کشمیر د پاکستان خاوره یاده شوې ده.

د پاکستان صدراعظم عمران خان سې شنبه د بهرنیو چارو له وزیر شاه محمود قریشي سره په لیدنه کې خلکو ته ویلي چې نوې ملي نقشه د کابینې له‌خوا تصویب شوې او له دې وروسته به د یاد هېواد نوې رسمي نقشه وګرځي.

دا کار د جمو کشمیر د نیمه کورواکۍ د ورختمولو په اړه د هند د حکومت د پرېکړې د یو کلن کېدو په مناسبت شوی.

هند د ۲۰۱۹ کال د اګسټ په پنځمه د جمو کشمیر سیمې او لداخ سره جلا کړې او واک‌یې نوې ډهلي ته وسپاره.

دا کار په کور دننه د کشمیر د خلکو او د هند د مخالفو ګوندونو له غبرګون او په بهر کې هم د پاکستان، بنګله‌دېش او یو شمېر نورو هېوادونو له کلک مخالفت سره مخ شو.

هندوستان د پاکستان له‌خوا د یوې نوې سیاسي نقشې ترتیب یو بې‌ځایه کار بللی دی.

هندي چارواکو ویلي د پاکستان دا کار نه قانوني اعتبار لري او نه نړیوالو ته د منلو وړ دی.

د ورځې تازه خبرونه دلته ولولئ

د رومانیا پولیسو د ګالیله او نیوټن غلا شوي کتابونه وموندل

انګریز فیزیک پوه اسحق نیوټن

د رومانیا پولیسو ویلي د ګالیله او نیوټن د دوو کتابونو په شمول یې سلګونه غلا شوي کتابونه بیا موندلي دي.

دا خبره د رومانیا د پولیسو یوه جګپوړي مسوول ایمیل تودور جمعه رسنیو ته اعلان کړه.

تودور وویل: "موږ ۲۳۷ کتابونه کشف کړل چې د بريټانیا د ارزونو په اساس به یې په اړه څېړنې وشي، دا کتابونه د رومانیا په شمال کې په یوه ځمکتل کې پټ شوي و."

بریټانیايي چارواکو ویلي چې دا کتابونه په ۲۰۱۷ کال کې له لندنه په یوه ډېر پېچلي شکل پټ شوي و.

د ایټالیايي مخترع او فیلسوف ګالیلو ګالیله او د انګریز فیزیک پوه اسحق نیوټن د دوو کتابونو د اصلي نسخو په شمول د دغو ۲۳۷ کتابونو ارزښت انګریز چارواکو دوه نیم میلیون پونډه (درې میلیونه او دوه لکه امریکایي ډالره) بللی دی.

ټرمپ: د ۲۰۲۱ تر اپرېله به ټولو امریکایانو ته د کویډ۱۹ واکسین ورسېږي

د امریکا متحده ایالتونو ولسمشر ډونالډ ترمپ

د امریکا متحده ایالتونو ولسمشر ډونالډ ترمپ ژمنه کړې چې هېواد به یې د روان کال تر پایه د کویډ۱۹ سل میلیونه ډوز واکسینونه تولید کړي.

ټرمپ د جمعې په ورځ په سپينه ماڼۍ کې یوې خبري ناستې ته وویل چې د راتلونکي کال تر اپرېل پورې به ټولو امریکایانو ته واکسین ورسېږي.

له دې مخکې ډونالډ ټرمپ ویلي و چې تمه کېږي د کرونا ویروس واکسین تر همدې اکټوبر پورې په خلکو وویشل شي خو کارپوهانو ویلي چې دا وړاندوینه عملي نه ښکاري.

د جانز هاپکنز پوهنتون د راپور له مخې تر اوسه پورې په ټوله نړۍ کې تر دېرشو میلیونو زیات کسان په کرونا اخته شوي دي.

له دې ډلې نږدې نهه نیم لکه کسان مړه شوي او شاوخوا ۲۱ میلیونه نور کسان بېرته رغېدلي.

د 'ترهګریزو شبکو' د بريدونو په اړه کابل کې د امريکا سفارت خبرداری

د امریکا سفارت

په کابل کې د امریکا سفارت خبرداری ورکړی چې د دوی په وینا " ترهګریزې شبکې" پر مختلفو اهدافو په ځانګړې توګه ښځو خپلو بریدونو ته دوام ورکوي.

سفارت نه‌دي ویلي چې دغه ترهګریزې شبکې څوک دي.

دوی پر خپله ویب‌پاڼه لیکلي چې دغه ګواښ دولتي کارکوونکو په ځانګړې توګه ښځو، ښوونکو او د بشري حقونو فعالانو ته متوجه دی.

سفارت په افغانستان کې له خپلو اتباعو غوښتي چې د ځان خوندیتوب ته پام وکړي او امنیتي سپارښتنې عملي کړي.

د کورنیو چارو وزارت ویاند په دې اړه له څه ویلو ډډه وکړه.

اپل شرکت په هند کې لومړنی انلاين پلورنځای فعالوي

ارشیف

د اپل شرکت نن اعلان وکړ چې راتلونکې اوونۍ په هند کې لومړنی انلاین پلورنځای فعالوي.

د ټکنالوژۍ دغه شرکت هڅه کوي په هند کې چې د ځیرکو ټيليفونونو له لویو بازارونو دی، د خپلو تولیداتو پلور زیات کړي.

دا مهال اپل له نورو شرکتونو سره په همکارۍ په هند کې په انلاین ډول خپل توکي پلوري.

د اپل اجرایي مدیر تیم کوک پر خپله ټویټرپاڼه لیکلي، شرکت‌یې بې‌صبرانه منتظر دی چې هند کې خپلو پېرېدونکو سره مستقیمه اړیکه کې اوسي او د هغوی ډېر ملاتړ ترلاسه کړي.

ازبکستان پر نړيوالو الوتنو لګول شوی بندیز ليرې کوي

ازبکستان هوايي میدان

د ازبکستان حکومت وایي، دغلته پر نړیوالو الوتنو لګول شوی بندیز د راتلونکې اکټوبر میاشتې له پيله ليرې کوي.

چارواکو پرون وویل، د ازبکستان لارې به یو ځل بیا نړیوالو ګرځندویانو ته پرانيستل شي، خو په دې شرط چې سیلانیان د کرونا ویروس د مخنیوي سپارښتنې عملي کړي.

ازبکستان د روان لمریز کال په مارچ میاشت کې هغه مهال خپلې پولې وتړلې چې کرونا ویروس خپور شو.

په دې موده کې یوازې چارتر الوتکو او هغو ځانګړو رېل ګاډو د تګ اجازه درلوده چې له نورو هېوادونو یې د ازبکستان وګړي خپلو کورونو ته لېږدول.

تر اوسه د منځنۍ اسیا په دغه هېواد کې د کرونا څه باندې ۴۹ زره پېښې ثبت شوي او له دې ډلې ۴۱۵ تنه مړه شوي دي.

روسیه کې د شمالي کوریا يو تبعه په ۱۷ کاله زندان محکوم شو

د روسیه بیرغ

د روسیې په ختیځ ښار نخودکا کې یوې محکمې د شمالي کوریا یو تبعه په ۱۷ کاله زندان محکوم کړ.

د دغه کس جرم دا ښودل شوی چې د روسیې پر سرحدي ګارد یې برید کړی دی.

د جولای میاشتې په لومړیو کې د شمالي کوریا یو بل تبعه هم روسیه کې په څلور کاله بند محکوم شوی و.

د شمالي کوریا ۱۶۰ وګړي د ۲۰۱۹ کال په سپټمبر کې هغه مهال ونیول شول چې په وړو بېړیو کې د روسیې اوبو ته دننه شوي وو.

هغه مهال د یوې بېړۍ سپرلۍ د روسیې پر سرحدي ګارد برید وکړ چې څلور کسان‌یې ټپیان کړل، وروسته بیا یوه کس له ټپونو ساه ورکړه.

په دې پیښه کې د شمالي کوریا یو وګړی هم وژل شوی و.

بلاروس کې د بشري حقونو د سرغړونو په اړه تحقیقات پیل شول

بلاروس کې د مظاهره کوونکو پر وړاندې تاوتریخوالی

د اروپا د امنیت او همکارۍ سازمان د بلاروس د ولسمشرۍ په انتخاباتو کې د درغلیو او د بشري حقونو د سرغړونو په اړه تحقیقات پیل کړل.

ټاکل شوې د دې سازمان د کارپوهانو کمېسیون چې پرون د سپټمبر په ۱۷ مه غوره شو د خپلو څېړنو نتایج د شپږو او اتو اوونیو په ترڅ کې بشپړ کړي.

دا کمېسیون به د اګست په نهمه د بلاروس د ولسمشرۍ له انتخاباتو مخکې او وروسته د بشري حقونو د سرغړونو ګڼ راپورونه وڅېړي.

د دې انتخاباتو په پایله کې ولسمشر الکساندر لوکاشینکا د شپږمې پرله پسې دورې لپاره د دې هېواد د ولسمشر په توګه غوره شو.

د دې انتخاباتو د نتایجو له اعلان وروسته د بلاروس په بېلابېلو سیمو کې د لوکاشینکا پر ضد پراخ اعتراضونه وشول.

'روسیه لاهم د امریکا ولسمشرۍ انتخاباتو کې د لاسوهنو هڅو ته دوام ورکوي'

د امریکا د تحقیقاتو د فدرال ادارې «FBI» مشر کریستوفر ورې

د امریکا د تحقیقاتو د فدرال ادارې «FBI» مشر وايي چې روسیه لاهم د امریکا د ولسمشرۍ په انتخاباتو کې د لاسوهنو هڅو ته دوام ورکوي.

د «FBI» مشر کریستوفر ورې پرون د سپټمبر په ۱۷مه، د استازو جرګې د امنیتي کمېټې له غړو سره په خبرو کې وویل د روسیې هدف دا دی چې په انتخاباتو کې د ډیموکرات ګوند کاندید جوبایډن بدنامه کړي.

ښاغلي ورې زیاته کړه روسیه له بهر څخه د نفوذ لپاره په هغو ورانکارو فعالیتونو کې لاس لري چې هدف‌یې د ټولنیزو شبکو، نیابتي ډلو، دولتي رسنیو او انلاین خپرونو له لارې بایډن ته زیان اړول دي.

د «FBI» مشر زیاته کړه، د ده اصلي اندېښنه دا ده چې د پرله‌پسې ناسمو معلوماتو د خپرولو منظمه لړۍ ښايي د نومبر په درېیمه نېټه د ولسمشرۍ د انتخاباتو پر نتایجو خلک بې‌باوره کړي.

دا څرګندونې داسې مهال کېږي چې سپینې ماڼۍ هغه راپورونه بې‌اهمیته بللي دي چې وايي، روسیه له ولسمشر ډونالد ټرمپ سره د مرستې هڅه کوي څو په انتخاباتو کې بریالی شي.

د امریکا خلیج ساحلونو کې سېل او توپان ډېر زیانونه اړولي

ارشیف

وروسته له دې چې د هریکن سالي په نوم توپان د امریکا د خلیج ساحلونه وځپل سېل د سمندر د غاړې د ښارګیو او مېنو سړکونه، واټونه او پلونه زیانمن کړي او د برېښنا ستنې یې چپه کړې دي.

دا توپان چې سرعت‌یې په ساعت کې ۱۶۵ کیلومتره و، پرون (چهارشنبه) له باران سره د فلوریدا او الاباما ایالتونو په ساحلي سیمو کې پیل شو.

د توپان له کبله ونې راپرېوتې او ګڼ کورونه، سوداګريزې ودانۍ او د بېړۍ چلولو پلټ فارمونه ویجاړ شوي دي.

امریکا کې د یوه توقیف شوي پاکستاني ډاکتر رواني وضعیت معاینه کېږي

د امریکا بیرغ

د هغه پاکستاني ډاکتر د رواني وضعیت د معاینې امر ورکړل شوی چې د امریکا په مینیسوتا ایالت کې د ترورېزم په تور د مارچ له میاشتې راهیسې په توقیف کې دی.

محمد مسعود په یوه مورد کې یوې بهرنۍ ترورېستي ډلې ته د مادي ملاتړ پر هڅې تورن شوی دی.

نوموړي چې د مایو په نوم یوه څېړنیز کلینیک کې کار کاوه د «اف.بي.ای» یوه خوفیه پولیس ته ویلي و چې د اسلامي دولت ډلې ته‌یې بیعت کړی او غواړي چې په یوازې سر په متحده ایالاتو کې حملې ترسره کړي.

هغه همداراز لېوالتیا ښکاره کړې چې غواړي سوریې ته ولاړ شي چې د دې ډلې لپاره جګړه کې برخه واخلي.

مسعود له رواني پلوه د دې لپاره معاینه کېږي چې معلومه شي ایا کولای شي په محکمه کې ودرېږي او له خپل ځانه دفاع وکړي.

د هغه مدافع وکیل ویلي چې مؤکل‌یې د محکمې پر بهیر نه‌پوهېږي. څارنوالانو ویلي چې هغه د «اف.بي.ای» خفیه پولیس ته چې پر هغه‌یې د اسلامي دولت ډلې د غړي ګومان کړی و، څو ځلې ويلي و چې ده د اسلامي دولت ډلې او مشر ته‌یې بیعت کړی دی.

کرونا واکسین په اړه د امریکا طرحه؛ ټولو امریکایانو ته وړیا ورکول کېږي

ارشیف

د امریکا متحده ایالاتو حکومت پرون د کرونا ویروس ضد واکسین په اړه یوه طرح وړاندې کړه چې له مخې یې هر څومره ژر چې یو واکسین په خوندي او اغېزمن ډول جوړ شي، هغه په وړیا ډول ټولو امریکایانو ته ورکول کېږي.

د ناروغیو د کنټرول او مخنیوي د مرکز مشر رابرټ ریډفیلډ او د فدرالي ادارې نورو چارواکو د واکسین دغه کمپاین په یوه راپور کې کانګرس ته وړاندې کړ.

ریډفیلډ وایي، د واکسین دغه کمپاین به ښایي د روان کال په وروستیو یا د نوي کال په جنورۍ کې پیل شي.

د امریکا ولسمشر ډونالد ټرمپ ویلي و چې ښایي د کرونا ویروس ضد واکسین د نومبر له درېیمې مخکې چې په امریکا کې د ولسمشرۍ انتخابات ترسره کېږي، امریکایانو ته ورکړل شي، خو ریډفیلډ کانګرس ته وویل، تر هغو چې یو واکسین د تنظیموونکو له‌خوا تأیید او په ملي کچه وېشلو ته اماده شي، دغه بهیر به له شپږو نه تر نهو میاشتو پورې وخت ونیسي.

لوکاشینکا: لوېدیځ هڅه کوي چې بلاروس له‌منځه یوسي

د بلاروس ولسمشر الکساندر لوکاشینکا

د بلاروس ولسمشر تور پورې کړی چې لوېدیځ د بلاروس د تېرې میاشتې پر انتخاباتو سترګې پټوي او په دې ډول هڅه کوي چې دا هېواد له‌منځه یوسي.

الکساندر لوکاشینکا وویل، لوېدیځ د دې پر ځای چې د ټاکنو نتیجې ومني د یوه انقلاب له لارې هڅه کوي چې دی له واکه لیرې کړي.

لوکاشینکا په خپله پرونۍ وینا کې د بلاروس جګپوړو چارواکو او دولتي رسنیو ته وویل، دا روانې مظاهرې چې په انتخاباتو کې د ده بریالیتوب تر سؤال لاندې راولي د امریکا او د امریکایي پلوه هېوادونو، پولنډ، لتوانیا، چک او متأسفانه اوکراین له لوري تنظیم شوې دي.

لوکاشینکا زیاته کړه چې موږ به اجازه ورنه‌کړو چې د دې هېوادونو پلان پلی شي.

د اګسټ د نهمې نېټې د انتخاباتو د نتیجو تر اعلان وروسته لوکاشینکا د ۸۰ فیصده رایو په ترلاسه کولو بریالی اعلان شو.

تر دې وروسته مظاهرې پيل شوې، په زرګونه اعتراض کوونکي پولیسو ووهل او نږدې ټول سیاسي مخالفان یا ونیول شول یا مجبوره شول چې له بلاروسه بهر ته ولاړ شي.

اعتراض کوونکي لوکاشینکا تورنوي چې په انتخاباتو کې یې درغلۍ کړې دي، خو دی دا تورونه ردوي.

ناروې کې د ۷۷ کسانو وژونکي اندرس بریویک مشروطه ازادي غوښتې

اندرس بریویک

د اندرس بریویک مدافع وکیل په مشروط ډول د خپل مؤکل د خوشې کېدو غوښتنه کړې ده.

بریویک هغه بنسټ‌پاله دی چې په ۲۰۱۱ کال کې یې ۷۷ کسان ووژل او د دې وژل شویو کسانو اکثریت زلمیان وو.

بریویک چې د زندان په خونه کې یوازې دی، غواړي د ناروې پر حکومت د خپل زندان د شرایطو په خاطر عریضه وکړي.

دی په ۲۱ کاله بند چې د تمدید وړ دی، محکوم شوی دی.

د ده مدافع وکیل اوستین ستورویک یوې نارویژۍ ورځپانې ته ویلي دي، د قانون له مخې یو زنداني تر ۱۰ کاله وروسته حق لري چې د خپلې سزا د بدلېدو وړاندیز وکړي.

ستورویک زیاته کړه چې د همدې لپاره ده قضایي مراجعو ته په مشروط ډول د بریویک د خوشې کېدو درخواست استولی دی.

روسیه کې ۷ تنه د حزب‌التحریر د غړیتوب په تور په بند محکوم شول

روسیه کې نیول شوي کسان

په روسیه کې یوې محکمې د کریمیا اووه تنه تاتار د منع شوې اسلامي ډلې، حزب‌التحریر د غړیتوب په تور، په اوږدمهاله بند محکوم کړل.

د روستوف ان دون د ښار محکمې مارلین حسنوف، محمد بیلیالوف، تیمور ابراهیموف، سیرین صالحییف، سرور مصطفاییف، سیور زکریاییف او ادم اسماعیلوف د ۱۳ او ۱۹ کلونو ترمنځ په بند محکوم کړي دي.

په کریمیا کې د روسیې فدرالي امنیتي ادارې مخکې ویلي و چې مصطفاییف په کریمیا کې د بشري حقونو د ډلې همغږه کوونکی او اسماعیلوف د ۲۰۱۸ کال په مې میاشت کې نیول شوي وو او دا نور د ۲۰۱۷ کال په اکټوبر کې په کریمیا کې نیول شوي وو.

د بشري حقونو ډلو او د لوېدیځ حکومتونو پر دې نیونو انتقاد کړی دی او ویلي يې دي چې دا په کریمیا کې د تاتارانو او نورو هغو کسانو د ځپلو هڅې دي چې د روسیې له لوري د کریمیا له نیولو سره مخالفت کوي.

روسیې کریمیا ټاپو وزمه د ۲۰۱۴ کال په مارچ کې له اوکراین څخه ونیوله.

موریا کمپ کې د اورلګېدو په تړاو ۶ افغانان نیول شوي

د موریا په کمپ کې تېره اوونۍ اور ولګېد.

د یونان په لیسبوس ټاپو کې د کډوالو د کمپ د سوځېدو د پېښې په تړاو شپږ افغانان نیول شوي دي.

له دې ډلې څلور تنه د چهارشنبې په ورځ محکمې ته حاضر شول.

د موریا په کمپ کې تېره اوونۍ اور ولګېد.

په دې کمپ کې نږدې ۱۲ زره کډوالو ژوند کاوه چې اکثر یې د افغانستان، افریقايي هېوادونو او سوریې دي.

اوس دوی بې‌سرپناه دي. د اور لګېدو په پېښه کې څوک نه‌دي وژل شوي.

د یونان حکومت وایي چې یو موقتي کمپ‌یې جوړ کړی دی چې د پنځه زره کسانو د اوسېدو لپاره دی او تر اوسه یوازې ۱،۲۰۰ کسان هلته انتقال شوي دي.

ملګرو ملتونو د چهارشنبې په ورځ د یونان له حکومته وغوښتل چې ژر تر ژره د موریا کمپ د پاتې بې‌سرپناه کډوالو غم وخوري.

نور راوښيه

XS
SM
MD
LG