د لاسرسۍ وړ لېنکونه

تازه خبر
چهارشنبه ۲۲ زمری ۱۳۹۹ کابل ۰۵:۰۰

افغانستان

د کونړ چارواکي: پاکستانیو پوځیانو پر شلټن لسګونه مرمۍ ورولي

ارشیف، پاکستاني پوځیان

د کونړ چارواکي وايي، پاکستانیو پوځیانو یوځل بیا د دې ولایت په خاوره د توپونو ډزې کړې دي.

د دوي په خبره چې د شلټن په ولسوالۍ يې د توپونو ۲۹ مرمۍ ورولي دي.

د کونړ والي ویاند عبدالغني مصمم د دوشنبې په ورځ د چنګاښ په ۳۰ مه ازادۍ راډیو ته وویل، په تېرو ۲۴ ساعتونو کې د پاکستان پوځ د شلټن ولسوالۍ په چوګام او نورو سېمو د توپونو ۲۹ مرمۍ ویشتلې.

د مصمم په خبره چې ټولې ویشتل شوې مرمۍ په شاړو ځایونو لګېدلې او چاته يې زیان نه دی رسولی.

هغه زیاتوي: "په تېرو ۲۴ ساعتونو کې یو ځل بیا پاکستانیو پوځیانو د کونړ شلټن ولسوالۍ په چوګام سېمه د توپچي ۲۹ بریدونه کړي دي، په دغو بریدونو کې چاته ځاني زیان ندی رسېدلی خو مالي زیانونه ولس ته اوښتي دي."

حکومتي مسئولین وایې د تېرې چهار شنبې په ورځ هم پاکستانیو ځواکونو د کونړ په سرکاڼو، مرکز اسعداباد او مرورې ولسوالۍ په لسګونو د توپونو او هاوانونو ډزې کړې وې چې په کې ۸ تنه ولسي وګړي وژل شوي و او ۱۱ ټپیان شوي و.

د تېرې شنبې په ورځ ولس او په ولسي جرګه کې د کونړ داستازو له شکایتونو وروسته د افغانستان د بهرنیو چارو وزارت اعلان وکړ چې د راکټي او توپچي بریدونو له امله د پاکستان يې خلاف یې ملګرو ملتونو ته خپل شکایت لېږلی.

د یاد وزارت چارواکو هغه ورځ ادعا وکړه چې له دې وروسته به پاکستاني ځواکونه د کونړ پرخاوره بریدونه نه کوي.

تر اوسه د پاکستاني حکومتي چارواکو د تېرې اوونۍ او د پرونیو بریدونو په اړه څه نه دي ویلي.

د ورځې تازه خبرونه دلته ولولئ

بخښنې سازمان: د طالب بندیانو خوشې کول د اندېښنې وړ اقدام دی

ارشیف، د افغان حکومت له لوري یو شمېر خوشې شوي طالب بندیان

د بخښنې نړیوال سازمان وايي، د طالبانو د بندیانو خوشې کول د اندېښنې وړ اقدام دی.

دغه سازمان نن په خپل ټویټر کې لیکلي چې د افغانستان د سولې پروسه باید شفافه وي او د جګړې د قربانیانو موضوع باید له پامه ونه‌غورځول شي.

د بخښنې نړیوال سازمان وايي د سولې پروسه باید د سولې استازیتوب وکړي او د جنګي جنایتونو حساب کتاب هم په‌کې شامل وي.

د افغانستان ولسمشر محمد اشرف غني پرون دوشنبه د پاتې ۴۰۰ طالب بندیانو د خوشې کولو فرمان لاسلیک کړ.

دا وروسته تر هغې چې مشورتي لویې جرګې د دغو بندیانو پر خوشې کولو موافقه وکړه.

له دې سره به د خوشې شویو طالب بندیانو شمېر ۵،۰۰۰ ته ورسېږي او حکومت تمه لري چې د بین‌الافغاني مذاکرو پیل ته به زمینه برابره شي.

ننګرهار کې ۸ افغان ځواکونه وژل شوي

ارشیف، ننګرهار کې د افغان ځواکونو عملیات

په ننګرهار ولایت کې ۸ تنه پوځیان په دوو جلا پېښو کې وژل شوي دي.

لومړۍ پېښه په پچیراګام ولسوالۍ کې د سیمه‌ییزو پولیسو پر پوستو د وسله‌والو طالبانو حمله وه.

د والي ویاند عطاالله خوګیاڼي یې د مرګ‌ژوبلې په اړه وویل: "د پچیراګام ولسوالۍ ګریخېلو سیمه کې تېره شپه د وسله‌والو طالبانو له لوري د سیمه‌ییزو پولیسو پر پوستو د برید له امله ۶ سیمه‌ییز پولیس شهیدان شوي او ۵ نور ټپیان شوي دي. د امنیتي ځواکونو په ځوابیه برید کې ۳ وسله‌وال طالبان وژل شوي او ۲ نور ټپیان دي."

د والي ویاند وايي په بله پېښه کې په نازیانو ولسوالۍ کې د لشکر اسلام وسله‌والې ډلې وسله‌والو د امنیتي ځواکونو پر پوستو بریدونه کړي چې په نتیجه کې یې د سیمه‌ییزې اردو دوه سرتېري وژل شوي دي.

د دواړو پېښو په اړه د دولت کومې مخالفې ډلې تبصره نه‌ده کړې.

پکتیا کې د دېوال نړېدو ۴ ماشومان مړه کړي

د افغانستان په نقشه کې پکتیا ولایت

د پکتیا ولایت په سیدکرم ولسوالۍ کې د دېوال د نړېدو په پېښه کې ۴ ماشومان مړه شوي دي.

د پکتیا د طبیعي پېښو په وړاندې د مبارزې رئیس شادیم خان هلال ازادي راډیو ته وویل، د یوه کور دغه دېوال نن ماسپښین د سختو اورښتونو له کبله نړېدلی دی.

ښاغلی هلال وايي په دې ولسوالۍ کې یو سپین ږیری د سېلاب په نتیجه کې مړ شوی دی.

د پکتیا چارواکي وايي په تېرو څلورو ورځو کې د اورښتونو او سېلابونو له کبله ۱۴ کورونه کاملاً تخریب شوي دي.

مصالحې شورا: بین‌الافغاني مذاکرو لپاره اجنډا ټاکل شوې

ارشیف

د ملي مصالحې عالي شورا وايي، د بین‌الافغاني مذاکرو لپاره اجنډا ټاکل شوې او ډېر ژر دغه مذاکرې پیل شي.

د افغانستان حکومت ویلي چې د دغو مذاکرو لومړی پړاو به په قطر هېواد کې وشي چې طالبان په‌کې سیاسي دفتر لري.

د ملي مصالحې عالي شورا ویاند فریدون خوځون نن ازادي راډیو ته وویل، په لومړنیو بحثونو کې به په افغانستان کې د دایمي اوربند پر ټینګښت خبرې وشي.

هغه زیاته کړه: "لومړنۍ اجنډا به په افغانستان کې د دایمي او سراسري اوربند اعلان وي چې په دې اړه به خبره کوو. زموږ تمه دا ده چې په دې برخه کې یوه توافق ته سره ورسېږو، ځکه اوربند د افغانستان د خلکو غوښتنه ده."

د افغانستان حکومت ویلي، د بین‌الافغاني مذاکرو د پیل لپاره د حکومت ټاکل شوی هیئت پوره چتووالی لري.

ولسمشر محمد اشرف غني پرون دوشنبه د پاتې ۴۰۰ طالب بندیانو د خوشې کېدو فرمان لاسلیک کړ چې ورسره به د خوشې شویو طالب بندیانو شمېر ۵،۰۰۰ ته ورسېږي.

د دې بندیانو د خوشې کولو غوښتنه د یکشنبې په ورځ د سولې مشورتي لویې جرګې په خپل پرېکړه‌لیک کې وکړه.

د افغانستان جمهوري ریاست وايي، ټاکل شوې چې دا بندیان په نږدې ورځو کې خوشې شي.

'لوګر او کندز کې ۱۲ طالبان د خپلو ۲ ماینونو په چاودنو کې وژل شوي'

ارشیف

په لوګر او کندز ولایتونو کې ۱۲ وسله‌وال طالبان د خپلو دوو ماینونو په چاودنو کې وژل شوي دي.

دوه وسله‌وال طالبان پرون د لوګر ولایت په مرکز پل‌علم کې وژل شوي چې غوښتلیې څو ماینونه بلې سیمې ته انتقال کړي.

د لوګر د امنیه قوماندانۍ ویاند شاهپور احمدزي نن ازادي ته وویل: "دوه تنه طالب ترهګر چې ماینونه‌یې له یوې سیمې بلې سیمې ته انتقالول د خپل ماین ښکار شول او دواړه وژل شوي دي."

بل‌خوا د کندز پولیس وايي د طالبانو یو سرګروپ سیف‌الرحمن له خپلو ۹ ملګرو سره د خپل ماین په چاودنه کې وژل شوي دي.

د کندز د امنیه قوماندانۍ ویاند هجرت‌الله اکبري ازادي راډیو ته وویل، وسله‌والو غوښتل دغه بشکه‌يي ماین پرون د کندز علي‌اباد ولسوالۍ ترمنځ پر غځېدلې لار ځای پر ځای کړي.

د دغو دوو پېښو په اړه وسله‌والو طالبانو څه نه‌دي ویلي.

دفاع وزارت: زابل کې ۱۶ طالبان وژل شوي او ۳ نور ټپیان دي

ارشیف

د افغانستان دفاع وزارت وايي چې په زابل ولایت کې د طالبانو د حملو د شنډولو په عملیاتو کې ۱۹ تنه طالبان مړه او ټپیان شوي دي.

دفاع وزارت په یوه بیان کې چې نن سهار خپور شو ویلي چې طالبانو غوښتل تېره شپه د میزانې ولسوالۍ پر ځینو سیمو حملې وکړي، خو افغان ځواکونو یې مخه ونیوله چې په ځوابي حملو کې ۱۶ طالبان وژل شوي او درې نور ټپیان دي.

طالبانو د دفاع وزارت د دې ادعا په اړه تر اوسه څه نه‌دي ویلي.

خیرخانه کې چاودنې یو تن وژلی او ۲ کسان ټپي دي 

د افغانستان نقشه

د کابل امنیه قومانداني د کابل ښار په ۱۱مه حوزه کې په یوه چاودنه کې د یوه تن د مړینې او دوو کسانو د ټپي کېدو خبر ورکوي.

د امنیه قوماندانۍ ویاند فردوس فرامرز په یوه بیان کې وايي پېښه نن سهار وختي د خیرخانه مېنې د نوې پروژې پر سړک هغه مهال وشوه چې پر یوه پېک اپ موټر مقناطیسي بم وچاودېد.

ښاغلی فرامرز وايي چې د پېښې په اړه څېړنې پیل شوي.

کورنیو چارو وزارت: یوه اوونۍ کې ۱۷۵ ملکي وګړو ته مرګ‌ژوبله اوښتې

د افغانستان د کورنیو چارو وزارت

د افغانستان د کورنیو چارو وزارت وایي په وروستۍ یوه اوونۍ کې په بېلابېلو بریدونو کې ۱۷۵ ملکي وګړو ته مرګ‌ژوبله اوښتې ده.

د کورنیو چارو وزارت ویاند طارق ارین تېر ماښام د اګسټ ۱۰مه ازادي راډیو ته وویل چې دا تلفات د طالبانو په بریدونو کې اوښتي او له دې ډلې یې وغوښتل چې د تاوتریخوالي د کمېدو په اړه خپلې ژمنې پوره کړي.

هغه زیاته کړه: "له اوربند وروسته او د تېرې یوې اوونۍ په لړ کې د طالبانو د بریدونو په ترڅ کې زموږ ۱۷۵ ملکي هېوادوالو ته مرګ‌ژوبله اوښتې. ۸۰ تنه شهیدان شوي او ۹۵ نور ټپيان دي. د تاوتریخوالي کموالی د خلکو له اساسي غوښتنو دی او طالبان باید دې غوښتنې ته په عمل کې ځواب ووايي."

د تاوتریخوالي کموالی د امریکا او طالبانو ترمنځ د فبرورۍ د ۲۹مې د موافقې له عمده برخو څخه وو، خو افغان حکومت او طالبان دواړه یو بل په پاروونکو اقداماتو تورنوي.

وسله‌والو طالبانو تر اوسه د کورنیو چارو وزارت د تازه شمېرو په اړه تبصره نه‌ده کړې.

د بین‌الافغاني خبرو پیل په اړه له غني او عبدالله سره د سټولټنبرګ خبرې

ارشیف، ولسمشر غني، عبدالله عبدالله او ینس سټولټنبرګ

د ناټو سرمنشي وایي د افغانستان له ولسمشر او د مصالحې عالي شورا مشر سره‌یې د بین‌الافغاني خبرو د پیل په اړه خبرې کړې دي.

ینس سټولټنبرګ د دوشنبې په ماښام پر خپل ټویټر ولیکل چې محمد اشرف غني او عبدالله عبدالله سره په خبرو کې یې د سولې مذاکراتو هرکلی کړی.

د نوموړي په خبره ټول اړخونه باید له رامنځته شوي تاریخي فرصت څخه استفاده وکړي.

سټولټنبرګ دغه‌راز ټینګار کړی چې د ناټو د ترورېزم پر وړاندې مبارزه کې د افغانستان ترڅنګ درېږي او خپل حضور به د افغانستان د سولې بهیر څخه د ملاتړ لپاره تنظیم کړي.

مشورتي لویې جرګې د یکشنبې په ورځ د پاتې ۴۰۰ طالب بندیانو له خوشې کېدو سره موافقه وکړه. تر دې وروسته ولسمشر اشرف غني پرون د دغو زندانیانو د خوشې کېدو فرمان لاسلیک کړ.

د سولې په چارو کې د دولت وزارت وایي د اګسټ له ۱۸ تر ۲۰مې نېټې پورې راتلونکې اوونۍ به بین‌الافغاني خبرې په قطر کې پیل شي.

طالبانو هم ویلي چې هر وخت د دوی بندیان خوشې شي په څو ورځو کې به له حکومت سره خبرو ته کېني.

ملي امنیت شورا: د پاته ۴۰۰ طالب زندانیانو راخوشې کول نه‌دی پیل شوی

د افغانستان ولسمشر محمد اشرف غني

د افغانستان د ملي امنیت شورا چارواکي وايي، تر اوسه د پاته ۴۰۰ طالب زندانیانو د راخوشې کولو بهیر نه‌دی پیل شوی، خو وروسته له هغه چې ولسمشر په دې اړه فرمان لاسلیک کړي، د بندیانو د خلاصون بهیر به پیل شي.

دا خبره په ملي امنیت شورا کې د ملکیانو د خوندیتوب او د پخلاینې د چارو مشر انتظار خادم ازادي راډيو ته وکړه.

ښاغلی خادم زیاتوي: "ولسمشر فرمان لاسلیک کوي او د لارښوونې پر اساس به‌یې بندیان راخوشې کړو. تر اوسه خلاصون نه‌دی پیل شوی. خو موږ ژمن یو او پلان هم ورته لرو."

د افغانستان ولسمشر اشرف غني پرون د لویې مشورتي جرګې په پای کې د جرګې د ګډونوالو سلا ومنله چې ۴۰۰ طالب بندیان خوشې کړي.

هلمند کې ۳۰۰ مېرمنو ته د کار زمینه برابره شوه

ارشیف

د افغانستان د کرنې او مالدارۍ وزارت په هلمند کې ۳۰۰ مېرمنو ته د کار زمینه برابره کړې ده.

د دغه وزارت ویاند اکبر رستمي نن ازادي راډیو ته وویل چې دغه مېرمنې د دې ولایت په مرکز او ناوې ولسوالۍ کې په کروندو کې په کار بوختې دي.

دغه کاري فرصتونه مېرمنو ته د بېلابېلو مېوو او سبو د کرکېلې لپاره د کورنیو باغچو په جوړولو سره برابرې شوې دي.

کومې مېرمنې چې اوس په دې ولایت کې د سبو او مېوو د کرکېلې په برخه کې فعالیت لري، تر دې وړاندې په کورونو کې اوزګاره وې.

د کرنې وزارت د بشري مرستو برابرولو خیریه مؤسسې په همکارۍ دغو مېرمنو ته د کورنیو باغچو په جوړولو سره پر دوی د سبو ۱۰ ډوله تخمونه او کیمیاوي سرې هم وېشلې دي.

د دې پروژې د پلي کولو موخه په دې ولایت کې د کورنیو باغچو وده او پراختیا او د بې‌وزلو کورنیو اقتصادي ملاتړ دی.

کندهار کې چاودنو ۱۰ ملکي کسان وژلي

د کندرهار ولایت نقشه

د کندهار په ارغستان ولسوالۍ کې په دو جلا جلا ماین چاودنو کې ۱۰ ملکي کسان وژل شوي.

د کندهار د امنیه قوماندانۍ ویاند جمال ناصر بارکزي ازادي رادیو ته وویل چې دواړه چاودنې یکشنبه ماسپښین شوې دي.

هغه د پېښې جزئیات داسې بیان کړل: "یو ماین د ارغستان ولسوالۍ د شنه نري په سیمه کې د ملکي خلکو په موټر چاودېدلی چې اته کسان په‌کې شهیدان شوي دي. دویم ماین د برج کلي په سیمه کې په دوو پليو کسانو چاودېدلی چې دا دوه کسان هم شهیدان شوي. دا دواړه ماینونه وسله‌والو مخالفینو کېنولي و."

د دې پېښو مسؤلیت تر اوسه چا نه‌دی منلی.

ارغستان د کندهار یوه لیرې پرته او سرحدي ولسوالۍ ده چې امنیتي وضعه‌یې ډېره ښه نه‌بلل کېږي.

چارواکي: پکتیکا کې ۱۵ تنه طالبان وژل شوي

ارشیف

د پکتیکا امنیتي چارواکي وایي پرون‌یې وسله‌والو مخالفینو ته درنه مرګ‌ژوبله اړولې ده.

د دغه ولایت امنیه قوماندان سمونوال نثار احمد عبدالرحیم‌زي رسنیو ته په یوه پيغام کې وویل چې یکشنبه ماسپښين افغان پولیسو په سروبي ولسوالۍ کې ۱۵ وسله‌وال بریدګر ووژل او ۶ نور یې ټپیان کړل.

هغه وویل: "د سروبي په ولسوالۍ کې د موږ پولیس چې هلته په ګزمه وتلي و له مخالفینو سره مخ شول. په نتیجه کي يې د مخالفینو ۱۵ تنه مړه او شپږ نور یې ټپیان دي. په جسدونو کې یو تن احمدشاه نومېږي چې د سروبي ولسوالۍ نظامي مسؤل و. ده په تېرو وختونو کې په خلکو ډېر ظلمونه کړي و."

نوموړي رسنیو ته دا هم ویلي په تېر یوه شپه او ورځ کې یې د کشفي معلوماتو پر اساس پولیسو په مرکز ښرنه، جاني‌خېلو او یحیی‌خېلو ولسوالیو کې ۶ وسله‌وال هم نیولي دي.

وسله‌والو طالبانو په پکتیکا کې د دې پېښې او یا دا چې دوی ته مرګ‌ژوبله اوښتې که څنګه څه تبصره نه‌ده کړې.

د سلیمان لایق جنازه له جرمني کابل ته راورسېده

سلیمان لایق

نن دوشنبه د اکاډمیسین سلیمان لایق جنازه له جرمني څخه کابل ته راورسېده.

سلیمان لایق د اختر په لومړۍ ورځ د جرمني هېواد په یو روغتون کې د ژوند پور پرې کړ.

دی تېر ۲۰۱۹ کال په یوه ځانمرګي برید کې ټپي شوی و.

د افغانستان د علومو اکاډمۍ سرپرست څېړنوال عبدالظاهر شکېب ازادي راډيو ته وویل تمه وه یکشنبه د ارواښاد لایق جنازه کابل ته ورسېږي، خو په پروازونو کې د ستونزو له امله دا کار په یوه ورځ ځنډ کېږي.

د اروښاد لایق زوی غرزي لایق هم ازادي راډیو ته تأیید کړه چې جنازه به سهار مهال د کابل هوايي ډګر ته ورسېږي او په کابل کې به خاورو ته سپارل کېږي.

وار له مخه د اکاډمیسین سلیمان لایق د اعزاز او تدفین کمېسیون او علومو اکاډمۍ په کابل ښار کې د ښاغلي لایق تصویرونه او ملي اشعار د کابل په واټونو کې نصب کړي دي.

اکاډمیسین غلام مجدد سلیمان لایق د افغانستان یو مطرح شاعر، لیکوال او څېړونکی و چې په پښتو او دري ژبو یې ګڼ اثار چاپ شوي.

کابل کې چاودنې ۲ تنه وژلي او ۵ نور ټپیان دي

د افغانستان په عمومي نقشه کې کابل ولایت

د کابل امنیه قوماندانۍ وايي، په کمپنۍ سیمه کې یوې بمي چاودنې دوه ملکي وګړي چې یوه مېرمن هم په‌کې وه، وژلي او پنځه امنیتي سرتېري یې ټپیان کړي دي.

د کابل د امنیه قوماندانۍ ویاند فردوس فرامرز نن یکشنبه په یوه خبرپاڼه کې وویل، ماین د کمپنۍ په بازار کې په یوه کراچۍ کې ایښودل شوی و او امنیتي ځواکونو کشف کړی و، خو هغه مهال چې د ساحې د کلابندولو او د دې ماین د شنډولو هڅه‌یې کوله وچاودېده.

د دې حملې مسؤلیت تر اوسه کومې ډلې نه‌دی منلی.

نور راوښيه

XS
SM
MD
LG