- واشنګټن اګزمېنر
د واشنګټن اګزمېنر ورځپاڼې د افغانستان د سولې پر بهير او امنيت يوه ليکنه خپره کړې ده.
په دې ليکنه کې د ناټو تازه خبرداري ته په پام راغلي، د طالبانو بريدونه ښايي د سولې بهير کمزوری کړي.
ليکوال د سمنګان په ايبک ښار کې د طالبانو وروستي بريد ته اشاره کړې چې د ملي امنيت ۱۱ سيمهیيز کارکوونکي يې ووژل او تر ۶۰ زيات نور يې ټپيان کړل.
وړاندې د ناټو د هغه خبرداري يادونه شوې چې وايي، طالبانو ونهشوه کولای د فبرورۍ په مياشت کې د لاسلیک کړي تړون پر ژمنو ودرېږي.
د دې تړون پر بنسټ د ترهګرۍ سره د مبارزې په چاره کې د طالبانو لهخوا د ضمانتونو د ورکولو په بدل کې به د امريکا متحده ايالاتو سرتېري له افغانستان څخه ووځي.
ناټو ويلي افغانستان کې يې موجوديت په وضعيت پورې تړلی دی.
- ایرو اېشیا ټایمز
د ایرو اېشیا ټایمز ورځپاڼې بیا د امریکايي ځواکونو لهخوا په افغانستان کې د پنځو نظامي اډو په خالي کولو لیکنه کړې او په یوه برخه کې یې ویلي، په افغانستان کې د امریکايي ځواکونو د شمېر د کمېدو سربېره په وروستیو میاشتو کې د طالبانو او افغان حکومتي ځواکونو ترمنځ تاوتریخوالی زیات شوی دی.
دې ورځپاڼې د افغانستان څخه د امریکايي سرتېرو د ایستلو په اړه د ولسمشر ټرمپ یو پخواني ټویټ ته اشاره کړې چې ویلي یې و "موږ په افغانستان کې د پولیس ځواک په توګه دنده ترسره کوو، نه د یو جګړهییز ځواک په توګه."
ولسمشر ټرمپ په خپل دې ټویټ کې وړاندې ویلي وو چې له افغانستان څخه، کور ته د امریکايي سرتېرو د ستنولو وخت رارسېدلی دی.
- ټلګراف
ټلګراف بیا په یو کاملاً جلا خو له افغانستان سره په تړلې مسئله لیکنه کړې او وايي، د افغانستان د فوټبال فدراسیون پخوانی رئیس کرامالدین کریم، د تل لپاره له فوټبالي فعالیتونو منعه کړای شو.
افغانستان د فوټبال فدراسیون دا پخوانی رئیس د ښځینه فوټبالرانو سره په جنسي بد چلندۍ تورن دی.
د فوټبال نړیوال فدراسیون په دې برخه کې د سپورټي سرغړونو د محکمې د وروستۍ پرېکړې هرکلی کړی.
دې محکمې د سې شنبې په ورځ د کرامالدین کریم د استېناف غوښتنه رد کړه.
نوموړی تر دې مخکې د فوټبال د نړیوال فدراسیون د اخلاقو کمېټې د تل لپاره له فوټبال سره له تړلو فعالیتونو محروم او یو میلیون سویسي فرانک جریمه شوی و.
خپله کریم پر ځان لګېدلي تورونه رد کړي دي.