نړۍ
پولیس: کراچۍ کې د ونډو پر بازار برید پای ته رسېدلی دی
پاکستاني پولیس وايي، په کراچۍ کې د اسهامو پر بازار د وسله والو برید پای ته رسېدلی دی او په دې برید کې ښکېل ۴ واړه وسله وال وژل شوي دي.
پاکستاني پولیس وايي، څلورو وسله والو نن سهار د کراچۍ د اسهامو د بازار پر ودانۍ برید وکړ چې د څلور واړو بریدګرو په وژل کېدو دا برید پای ته رسېدلی دی.
د کراچۍ د پولیسو چارواکو په دې پېښه کې پر بریدګرو سربېره یوازې د دوه نورو کسانو د وژل کېدو خبره کړې او ویلي یې دي چې د ونډو د بازار کارکونکو ته زیان نه دی رسېدلی.
خو په ټولنیزو رسنیو کې د برید له ځایه خپرې شوې ویډیوګانې ښيي چې یو شمېر کسان امبولانسونو ته لېږدول کېږي.
د اسهامو د تبادلې دا ودانۍ د کراچۍ ښار په یوه داسې سیمه کې ده چې په کلکو امنیتي تدابیرو کې ساتل کېږي، او د ګڼو خصوصي بانکونه مرکزي دفترونه په کې دي.
د کراچۍ د پولیسو مشر غلام نبي میومن د رویټرز خبري اژانس ته ویلي بریدګر پر ودانۍ د لاسي بمونو او ټوپکو سره ورغلي دي.
د هغه په وینا څلور واړه بریدګر په یوې سیلور رنګې کرولا موټر کې دې ځای ته رسېدلي.
د کراچۍ د پولیسو مشر زیاته کړې، په دې برید کې وسلوالو کسانو لومړی د اسهامو د تبادلې د ودانۍ مخکې پر امنیتي پوستې یو لاسي بم غورځولی او وروسته یې ډزې پیل کړي دي.
د امنیتي چارواکو په وینا څلور واړه برید ګر د امنیتي ځواکونو په ځوابي ډزو کې وژل شوي دي.
اخوا د پاکستان د اسهامو د تبادلې ادارې پر خپل ټویټر لیکلي چې وضعیت لا هم بدلېږي او امنیتي ځواکونه د امنیت د تنظیم او وضیعت په کنټرولو کې مرسته کوي.
دمګړۍ چا په کراچۍ ښار کې د دې وسله وال برید مسولیت پرغاړه نه دی اخیستی.
تر دې مخکې په پاکستان د بیلا بیلو سخت دریځو اسلامپالو ډلو د ورته بریدونو شاهد و، خو په وروستیو کلونو کې دا بریدونه کم شوي دي.
د پاکستان کراچۍ ښار د سخت دریځو اسلام پالو ډلو د فعالیتونو سربېره د فرقه یي شخړو او جنايي جرمونو له کبله هم د پاکستان یو له نا امنو ښارونو ګڼل کېږي.
همدارنګه دغلته د یو شمیر سیاسي ډلو او سیاستوالو سره تړلي وسله وال هم فعال دي.
خو په دې ښار کې د وسلوالو ډلو پر ضد د امنیتي ادارو له پراخو عملیاتو وروسته په وروستیو کلونو کې دغلته د ناامنیو پېښې کمې شوې دي.
د ورځې تازه خبرونه دلته ولولئ
په پاکستان کې سختو ورښتونو او سېلابونو تر ۴۰ زیات کسان مړه کړي
د پاکستان په بېلابېلو سیمو کې سختو ورښتونو او د سېلابونو راوتلو تر ۴۰ زیات کسان مړه کړي دي.
ناورینونو پر وړاندې د مبارزې ادارې (پي ډي اېم اې) د اپرېل پر ۱۸مه پر ايکس پاڼه ویلي چې په بارانونو او سېلابونو کې د ۱۵ ماشومانو په ګډون ۳۳ تنه وژل شوي او ۴۶ ژوبل دي.
پي ډي اېم اې وايي چې په وروستیو ورښتونو او سېلابونو کې ۳۲۶ کورونه او ودانۍ بشپړې ړنګې شوي.
د بلوچستان حکومتي چارواکو هم ویلي دي چې په هغه صوبه کې د ورښتونو پر مهال په بېلابېلو پېښو او سېلابونو کې د وژل شویو شمېر اتو ته رسېدلی او نهه تنه ژوبل دي.
اخوا د پاکستان صدراعظم شهبازشریف په ورښتونو کې د پېښو او سېلابونو پر مهال د وژل شویو کورنیو ته ۲۰، ۲۰ لکه او ژوبلو کسانو ته د پنځه لکه روپیو ورکولو اعلان کړی دی.
ګوټېرېش: د غزې کړکېچ او پر اسراییل د ایران حمله ممکن د سیمې په یوه بشپړه جګړه بدله شي
د ملګرو ملتونو سرمنشي انټونیو ګوټېرېش پرون د منځني ختیځ په اړه اندېښنه وښوده او خبرداری یې ورکړ چې د غزې د جګړې پر سر کړکېچ او پر اسراییل د ایران حمله ممکن د سیمې په یوه بشپړه جګړه بدله شي.
ګوټېرېش د امنیت شورا په هغه غونډه کې چې د اردن او ایران په ګډون د ځینو هېوادونو د بهرنیو چارو وزیرانو په کې برخه درلوده وویل: "منځنی ختیځ د بحران پر پاڼ ولاړ دی او په وروستیو ورځو کې، هم په خبرو او هم عمل کې د خطرناکو کړکېچونو شاهدان یوو."
د ملګرو ملتونو سرمنشي یو وار بیا له ټولو ښکېلو لوریو غوښتنه وکړه چې له زغم کار واخلي.
انټونيو ګوټېرېش په دمشق کې د ایران پر قونسلګرۍ حمله او پر اسراییل د ایران د توغندیو او بې پیلوټه الوتکو حملې وغندلې.
هغه د بې پیلوټه الوتکو حمله د کړکېچونو نوی زیاتېدل وبلل او ویې ویل د دې وخت راغلی چې د غچ اخیستنې دا لړۍ بنده شي.
بورېل: د اروپايي ټولنې غړي هېوادونه دې اوکراین ته د هوايي مدافع نورې دستګاوې ورکړي
د اروپايي ټولنې د بهرني سیاست مشر جوزیپ بورېل د اروپايي ټولنې پر غړو هېوادونو غږ وکړ چې اوکراین ته د هوايي مدافع نورې دستګاوې ورکړي.
دا په داسې حال کې ده چې جګړه ځپلی اوکراین پر خپلو بنسټونو د روسیې له زیاتېدونکو هوايي حملو سره مخامخ دی او د وسلو زېرمې یې هم کمې شوې دي.
اوکراین ته د امریکا د متحدو ایالتونو د مرستو پروګرام هم په کانګرس کې له خنډ سره مخامخ دی.
د اروپايي ټولنې د بهرني سیاست مشر جوزیپ بورېل ویلي: "موږ د پیټرویت په نوم د هوايي مدافع امریکايي دستګاوې او د میزاییلو ضد دستګاوې لرو باید اوکراین ته یې ولېږو چې جګړه په کې سخته شوې ده."
تر دې مخکې د اوکراین ولسمشر ولودمیر زیلینسکي هم له غربي هېوادونو د وسلو او مهماتو د مرستې غوښتنه کړې وه.
د اوکراین هوایي ځواک: د روسیې ۱۳ بې پيلوټه الوتکې مو غورځولي
د اوکراین د هوایي مدافعې ځواکونه وایي، نن پنجشنبې یې د روسیې ټولې هغې دیارلس بې پيلوټه الوتکې را غورځولې چې پراوکراین د حملو لپاره کارول شوې وې.
اکثره دغو الوتکو د اوکراین پرلویدیځې ایوانا- فرانکیوسک Ivano-Frankivsk کې بنسټیز تاسیسات په نښه کړي وو.
د روسیې ریا نووستي خبري اژانس ادعاکړې چې ډرون الوتکو په سیمه کې د اوکراین پوځي تاسیسات ویشتي دي، خو د دې سیمې د مرکز ښاروال روسلان مارټینکیوف ازادي راډیو ته ویلي چې په دغو بریدونو کې یوازې ملکي تاسیسات په نښه شوي دي.
د هغه په خبره، د بې پلوټه الوتکو ټوټې د راپرېوتو په مهال د اور د لګېدو سبب شوې چې وروسته هغه مړ شو.
د فلسطینیانو لپاره د ملګرو ملتونو یوه اداره: مه پرېږدئ چې د اسراییل په غوښتنه منحل شوو
د ملګرو ملتونو د هغې ادارې چې له لسیزو راهیسې یې په غزه او لویدیځه غاړه کې میلیونونو فلسطینیانو ته مرستې رسولې، مشر پرون چهارشنبې د ملګرو ملتونو له امنیت شورا څخه وغوښتل چې د دې ادارې بقا تضمین کړي ځکه اسراییل یو ځل بیا د هغې د منحل کیدو غوښتنه کړې او هغه یې د حماس د ترهګرۍ د جګړې د ماشین برخه بللې ده.
د هغې ډلې چې امریکا او اروپایي ټولنه یې ترهګره ډله ګڼي.
فیلیپ لازاریني دې شورا ته وویل چې د UNRWA په نوم د دغې ادارې له منځه وړل به د غزې بشري بحران لا پراخ او د قحطۍ پیل به ګړندی کړي.
اسراییل دغه اداره تورنه کړې چې یو شمېر کارکونکو یې له حماس سره پراسراییل د تېرکال د اوکتوبرد اوومې په برید کې همکاري کړې ده، هغه ادعا چې ملګرو ملتونو رد کړې ده.
ایکس یا پخوانۍ ټویټر شبکه: د پاکستان حکومت سره غږیږو چې زموږ د فعالیت په اړه یې په اړه اندېښنو پوه شوو
ټولنیزې شبکې ایکس چې پخوا ټویټر نومیده ژمنه کړې چې د پاکستان له حکومت سره به کار وکړي چې پراندېښنو یې پوه شي.
دا وروسته له هغې چې پاکستاني چارواکو وویل، له دوو میاشتو راهیسې یې د دغې ټولنیزې شبکې فعالیت خپل ملي امنیت ته د ګواښ پراساس بند کړی دی.
د ایکس شبکې د نړیوالو چارو ډلې پرون چهارشنبې ناوخته په یوه پوست کې ولیکل چې دوی د پاکستان له دولت سره د هغوی د اندېښنو د درک کولو لپاره همکارۍ ته دوام ورکوي.
دا د فبرورۍ میاشتې له اولسمې وروسته چې د پاکستان پخواني صدراعظم عمران خان په دې هېواد کې د ترسره شویو عمومي انتخاباتو وروسته چې په هغو کې یې درغلۍ ادعاوې کړې، په ټول هېواد کې د عمومي مظاهرو غوښتنه وکړه او د دې ټولنیزې شبکې فعالیت مختل شو، د دې نړیوالې شبکې لومړنۍ رسمي څرګندونې دي.
اوکراین: د روسیې د پروني هوایي برید تلفات ۱۷ تنو ته لوړ شوي
د اوکراین پر چیرنیهیف ښار د روسیې د پروني هوایي برید د وژل شویو کسانو شمېر ۱۷ ته پورته شوی دی.
د ازادۍ راډیو د خبر مرکزي څانګې لیکلي چې دغه برید پرون سهار شاوخوا نهه بجې پر ملکي ودانیو شوی دی.
پرون په لومړیو کې د وژل شویو کسانو شمېر ۱۰ تنه ښودل شوی و.
د چیرنیهیف والي ویاچیسلاف چاوس ویلي، لږ تر لږه درې توغندي د ښار پر مرکز لګیدلي چې ورسره د هستوګنې ۱۶ اپارتمانونه، یو ښونځی او یو روغتون تخریب شوي دي.
برید کې لږ تر لږه ۱۶ ملکیان ټپیان شوي هم دي.
د اوکراین ولسمشر ویلي، د روسیې دغه برید ځکه نه دی شنډ شوی چې د متحدانو د ملاتړ د کمښت له کبله له دوی سره د هوایي مدافع تجهیزات کم شوي دي.
د ایران یو شمېر سیاسي بندیانو د اعدام د لوړې کچې پر ضد اعتصاب پيل کړی
په ایران کې د سیاسي زندانیانو یوې ډلې په دغه هېواد کې د اعدامونو د لوړې کچې په اعتراض کې د خوړو اعتصاب پیل کړی دی.
د ازادي راډیو ایراني څانګې راډیو فردا، د بشري حقونو د فعالانو په حواله دغه خبر خپور کړی او ویلې یې دي چې د ایوین او قزل حصار ډارونکو زندانونو بندیان هم په دغه کمپاین کې شامل دي.
دغه اعتصاب د لومړي ځل لپاره د قزل حصار زندانیانو د فبرورۍ په ۲۹مه پیل کړی و چې بیا نورو زندانونو ته هم وغځېد.
د دغو زندانونو سرچینو ویلي، د ایران حکومت په دې وروستیو کې د غیر سیاسي زندانیانو اعدام ډېر کړی دی.
د بښنې نړیوال سازمان وایي، ۲۰۲۳ کال کې ټولټال ۸۵۳ کسان اعدام شوي چې د وړم ۲۰۲۲ کال پرتله نژدې ۵۰ فیصده زیاتوالي ښيي.
ملګرو ملتونو د فلسطینیانو لپاره د ۲،۸ میلیارد ډالره مرستې غوښتنه وکړه
ملګرو ملتونو د شاوخوا درې میلیونه فلسطینیانو د لاسنیوي لپاره د ۲،۸ میلیارد ډالرو بسپنې غوښتنه کړې ده.
د ملګرو ملتونو چارواکو پرون چهارشنبې په غزه او لویدیځه غاړه کې خبریالانو ته وویل چې د خدمتونو د رغولو او خوراکي او روغتیایي مرستو لپاره ډېرو پراخو عملیاتو ته اړتیا ده.
دوی همدارنګه خبرداری ورکړ چې د جګړې او د پوځي عملیاتو په جریان کې دوی نه شي کولای چې په غزه کې د خلکو لپاره لازم خدمات برابر کړي.
د ملګرو ملتونو په وینا، په غزه کې ډېر روغتونونه، د اوبو رسولو شبکې، کورونه، سړکونه او ښوونځي ویجاړشوي او په اوس وخت کې یو پوهنتون هم هلته فعال نه دی.
د ایران ولسمشر: د اسراییل کوچني برید ته به هم په بېړه ځواب ووایو
د ایران ولسمشر ابرهیم رییسي پرون چهارشنبې یوځل بیا اسراییل ته خبرداری ورکړ چې یوه ډېر کوچني برید ته به یې هم په بېړه او سخت ځواب ووایي.
ښاغلي رییسي د پوځ د ملي ورځې په مناسبت د رسم ګذشت ځانګړو مراسمو ته په وینا کې د اپریل په ۱۴ سهار وختي پر اسراییل د توغندیو او ډرون الوتکو برید یو محدود اقدام وباله او ویې ویل چې د ایران پر خاوره د اسراییل برید به له پراخ او سخت ځواب سره مخ شي.
په عین حال کې د اسراییل صدراعظم بینامین نتنیاهو یوځل بیا ژمنه وکړه چې دا یواځې اسراییل دی چې پر ایران د برید د څرنګوالي په اړه به پرېکړه کوي.
ښاغلي نتنیاهو پرون چهارشنبې د کابیني غونډې ته وویل چې د اسراییل دولت به هرهغه څه ترسره کړي چې د ځان د دفاع لپاره ورته اړتیا ده.
ایران د تېرې شنبې په شپه پر اسراییل د ۳۰۰ توغندیو او بې پیلوټه الوتکو برید وکړ.
اسراییل وویل چې د توغندیو او ډرونونو ۹۹ سلنه یې په هوا کې له منځه وړي دي، خو ایران وایي چې په دغو بریدونو سره یې خپل هدفونه ترلاسه کړي دي.