د لاسرسۍ وړ لېنکونه

تازه خبر
دوشنبه ۱۶ چنګاښ ۱۳۹۹ کابل ۰۵:۵۹

افغانستان

افغان سوداګر: د هرات-اسلام قلعه پر لاره ناامنیو اندېښمن کړي یو

د اسلام قلعه بندر یوه څنډه

افغان سوداګر او موټر چلوونکي د هرات-اسلام قلعه په لویه لار د نا امنیو له زیاتېدو اندېښمن دي.

د دغه ولایت د سوداګرۍ خونې مشر یونس قاضي‌زاده وایي، نا امنۍ دوی ته ګڼې ستونزې پیدا کړې دي.

نوموړي وویل، په دغه لویه لار کې د کمېشنکارانو شمېر هم زیات شوی.

دوی وایي، سوداګر اړ دي چې د خپلو مالونو د بررسۍ لپاره په دې لارې راشي، خو په وینا یې يادو ستونزو د دوی کارونه ټکني کړي دي.

تر دې وړاندې هم موټر چلوونکو له ګمرک کوونکو شکایت کړی و چې له دوی ډېرې پیسې اخلي.

دوی وايي، يادې ستونزې لامل شوي چې د مالونو انتقال هم په ځنډ سره ترسره شي.

د هرات د سوداګرۍ خونه وایي، دا ستونزه‌یې له اړوندو چارواکو سره هم شریکه کړې، خو رسېدنه ورته نه‌ده شوې.

د ویلو ده چې په ورځني ډول له دې لارې ٢ تر ٣٠٠ پورې سوداګریز موټر له ایران څخه د اسلام قلعه بندر له لارې هرات ته داخلېږي.

د ورځې تازه خبرونه دلته ولولئ

ارګ: په هر ولایت کې یوه ښځه د والي د مرستیالې په توګه ټاکل کېږي

ارګ

افغان کابینې پرېکړه وکړه چې هر ولایت ته به یوه ښځه د والي د مرستیالې په توګه ټاکي.

دغه ګام په دولتي ادارو کې د ښځو د ونډې د ډېروالي په هدف پورته شوی.

د ولسمشر ویاند صدیق صدیقي نن په یوه خبري غونډه کې دغه پرېکړه اعلان کړه.

هغه زیاته کړه: "د ښځو چارو وزارت له وړاندیز سره سم حکومت پرېکړه کړې چې په ټولو ۳۴ ولایتونو کې یوه-یوه ښځه د والي د مرستیالې په توګه وټاکي، کابینې د سیمه ییزو ارګانونو خپلواکې ادارې ته لارښونه وکړه چې د دغو پوستونو د رامنځ ته کېدو لپاره ګام پورته کړي."

د اداري اصلاحاتو او ملکي خدمتونو کمېسیون دوه کاله وړاندې ویلي و چې په دولتي ادارو کې د ښځو ونډه ۲۲ سلنه ده، خو دوی ژمنه کړې وه چې تر څو کلونو به دغه کچه دېرش سلنې ته لوړوي.

ناامنۍ او په افغانې ټولنه کې دودیزې ستونزې په دولتي ادارو کې د ښځو د ونډې د کمۍ سبب شوې دي.

عامې روغتیا وزارت: افغانستان کې د کرونا ویروس پېښې کمې شوي

ارشیف، په کرونا ویروس اخته کس د درملنې پر مهال

د افغانستان عامې روغتیا وزارت وایي، د کرونا ویروس پېښې کمې شوي، خو لا هم عادي ژوند ته د ګرځېدو لپاره باید خلک څو میاشتې زغم وکړي.

د دغه وزارت ویاند اکمل سمسور دغه څرګندونې نن هغه مهال وکړې چې د تېرو ۲۴ ساعتونو شمېرې یې له خلکو سره شریکولې.

هغه زیاته کړه: "په تېرو ۲۴ ساعتونو کې ۶۶۸ معاینات شوي دي، ۲۳۹ مثبتې واقعې لرو، دې موده کې ۳۴ افغانان د 'کووېډ-۱۹' له امله مړه شوي دي او ۷۳۷ تنه بېرته رغېدلي دي."

وزارت په لومړي ځل په جنسیتي او سني توګه په کرونا ویروس د اخته شویو افغانانو شمېرې خپرې کړې.

دغه وزارت ویلي، افغانستان کې په کرونا ویروس د ټولو څه باندې ۳۳ زرو اخته شویو کسانو له ډلې ۷۲ په سلو کې نارینه او ۲۸ سلنه‌یې ښځې دي.

د مړینې له اړخه هم نارینه‌وو ته دا ویروس ګران پرېوتی.

افغانستان کې نږدې ۹۰۰ کسان 'کووېډ-۱۹' ناروغۍ مړه کړي چې ۷۸ سلنه‌یې نارینه او ۲۲یې ښځې دي.

د عمر په حساب تر ټولو زیاته مړینه هغه کسان لري چې عمرونه‌یې له ۶۰ لوړ دي، خو په دغه ویروس بیا تر ډېره یعنې ۳۱ په سلو کې هغه ځوانان اخته شوي چې د ۲۰ او ۳۰ کلونو ترمنځ عمر لري.

بادغیس کې سږ کال د پستې حاصلات دوه برابره شوي

ارشیف

د بادغیس د کرنې او مالدارۍ ریاست چارواکي سږ کال د پستې د حاصلاتو له دوه برابره کېدو خبر ورکوي.

د دغه ولایت د کرنې او مالدارۍ رئیس عبدالتواب تایب نن ازادي راډیو ته وویل چې د ارزونو له مخې د تېر کال په پرتله به سږ کال په دغه ولایت کې نږدې ۳۶ زره او ۴۵۶ متریک تُنه زیاته پسته راټوله شي.

نوموړي وویل چې تېر کال په دغه ولایت کې د پستې ۱۵ زره او ۴۰۰ مټریک ټنه حاصلات راټول شوي و.

د ښاغلي تایب په خبره، بادغیس کې د پستې ٣٠ زره هکټاره طبیعي ځنګلونه موجود دي او په دې وروستیو کې د همکارو مؤسسو او کرنې وزارت په همکارۍ د باغونو شمېر زیات شوی.

نوموړی وايي، د دوی په هڅو سره په بادغیس کې نږدې ۴،۰۰۰ د پستې باغونه جوړ شوي دي.

د بادغیس د کرنې ریاست دغه‌شان سږ کال د پستې د ۱۲۰ هکټاره طبیعي ځنګلونو د بیا جوړونې خبر ورکوي.

په بادغیس کې د پستې ځنګلونه چې نړیوال شهرت لري د بزګرو د عایداتو مهمه سرچینه جوړوي.

د لوګر ولایتي شورا غړې نفیسه هجران یوه وسله‌وال برید کې ټپي شوه

نفیسه هجران

د لوګر د ولایتي شورا غړې نفیسه هجران په یوه وسله‌وال برید کې ټپي شوه.

د لوګر د امنیه قوماندانۍ ویاند شاه‌پور احمدزي رسنیو ته ویلي، نوموړي نن سهار د بیرغ چوک سیمه کې دفتر ته په لاره وه چې د تومانچې ډزې پرې شوې دي.

ښاغلي احمدزي ویلي، پولیسو د پېښې په تړاو یو مشکوک کس نیولی دی.

که څه هم د هجران روغتیایي وضعیت د ډاډ وړ ښودل شوی، خو د لوګر عامې روغتیا ریاست ویلي، نوموړې د ښې درملنې لپاره پلازمېنې کابل ته لېږدول شوې.

نفیسه هجران په تېرو دوو دورو کې د لوګر د ولایتي شورا غړې پاته شوې او دغه ولایت کې له مطرحو او زړورو فعالو ښځو له ډلې وه.

تر اوسه کومې ډلې پر نوموړې د برید مسؤلیت نه‌دی اخیستی.

پاکستان عبدالله عبدالله ته د ورتګ رسمي بلنه ورکړه

د افغانستان د ملي مصالحې عالي شورا مشر عبدالله عبدالله

پاکستان د افغانستان د ملي مصالحې عالي شورا مشر عبدالله عبدالله ته هغه هېواد ته د ورتګ رسمي بلنه ورکړې ده.

دا خبره د ملي مصالحې عالي شورا په خپله فېس‌بوک پاڼه کې کړې او ویلي یې دي چې دغه بلنلیک پرون په کابل کې د پاکستان سفیر زاهد نصرالله خان ښاغلي عبدالله ته وړاندې کړ.

د خبر له مخې ښاغلي عبدالله پرون په سپېدار ماڼۍ کې په خپل دفتر کې له نصرالله خان سره وکتل او د سولې پر روان بهیر یې خبرې وکړې.

د خبرپاڼې له مخې د پاکستان سفیر وویل چې هېواد یې د افغانستان د سولې د بهیر بشپړ ملاتړ کوي او تل‌پاتې سولې ته د رسېدو لپاره به خپلې مرستې جاري وساتي.

ښاغلي عبدالله ویلي چې په یوه مناسب وخت کې به هغه هېواد ته سفر وکړي.

پاکستان ته د افغانستان د سولې په پروسه کې د یوه مهم لوبغاړي په توګه کتل کېږي.

د ملي شورا غړو ته له بایومټریک وروسته د موټرو نمبر پلېټونه وېشل کېږي

ارشیف

په پارلماني چارو کې د دولت وزارت وایي، د ملي شورا غړو ته به له دې وروسته د موټرو نمبر پلېټونه د بایومټریک بهیر له بشپړېدو وروسته وېشل کېږي.

په پارلماني چارو کې د دولت وزیر ضیاالحق امرخېل پر خپله ټویټرپاڼه لیکلي چې په دې هدف پرون د کورنیو چارو وزارت او ملي شورا ترمنځ هوکړه لاسلیک شوه.

ده لیکلي، له دې وروسته به د (م-ج) او (و-ج) پلېټونه یوازې د ملي شورا غړي کاروي او د ناوړه ګټې اخیستنې مخه به‌یې نیول کېږي.

د دغه کار لارښوونه افغان ولسمشر محمد اشرف غني کړې ده.

له دې وړاندې د دغو پلېټونو په ورکړه کې ستونزې وې او پر وکیل سربېره به د هغه نږدې کسانو هم دا نمبر پلېټونه کارول او کله نا کله‌یې ښاري نظم هم ګډوډاوه.

افغانستان کې د تاوتریخوالي پر کمېدو د اسلامي همکاریو سازمان ټینګار

ارشیف، په ننګرهار کې یو ټپي شوی ماشوم

د اسلامي همکاریو سازمان افغانستان کې د جګړې په ښکېلو خواوو غږ کړی چې زیاتېدونکی تاوتریخوالی کم او سولې ته د رسېدو په لارو چارو تمرکز وکړي.

د دغه سازمان عمومي منشي یوسف ال عثیمین پرون په یوه خبرپاڼه کې د تاوتریخوالي کړنې د خواشینۍ وړ بللي او غوښتنه‌یې کړې چې ټول لوري باید زیاته هڅه دې ته وکړي چې تل‌پاتې سولې ته ورسېږي.

نوموړي ویلي، د سولې په خبرو کې پرمختګ شوی، خو ټینګار یې کړی چې دې هدف ته د رسېدو لپاره باید هڅې څو برابره شي.

د افغانستان بهرنیو چارو وزارت د دغې اعلامیې هرکلی او د اسلامي همکاریو له دوامداره ملاتړه‌یې مننه کړې.

پغمان کې یو ماین خښوونکی او ۳ ملګري یې ونیول شول

ارشیف

کابل کې چارواکي وایي چې په پغمان ولسوالۍ کې یې یو ماین خښوونکی او د هغه درې ملګري نیولي دي.

دفاع وزارت تېر ماښام په یوه خبرپاڼه کې وویل چې دغه کسان د (برجک سه راهي) په سیمه کې په ماین خښولو لګیا وو چې د ۱۱۱ فرقې ځواکونو لاس په لاس ګیر کړل.

خبرپاڼه کې نه‌دي ویل شوي چې نیول شوي کسان څوک او له کومې وسله‌والې ډلې سره تړاو لري.

وروستیو څو اوونیو کې د کابل ښار بېلابېلو سیمو کې د خښ شویو او مقناطیسي ماینونو چاودنې وشوې.

تېره اوونۍ یوې چاودنې د احمد شاه بابا مېنې په سیمه کې د بشري حقونو کمېسیون دوه کارکوونکي ووژل چې د ملګرو ملتونو او د بشر حقونو د ملاتړو پراخ غبرګونونه‌یې وپارول.

هلمند کې په تېرو ۶ مياشتو کې ۲۰ ماشومان وژل شوي او ۵۴۶ نور ټپیان دي

هلمند

په هلمند کې په تېرو ۶ مياشتو کې ۵۴۶ ماشومان ټپيان او ۲۰ نور وژل شوي دي.

په هلمند کې د بشر حقونو د ساحوي دفتر د اړيکو او معلوماتو مسؤل مقيم عليزی وايي دغه شمېر ماشومان د هلمند ولايت په بېلابېلو سيمو کې مړه او ژوبل شوي دي.

مقيم چې ازادي راډيو سره خبرې کولې وويل د جګړې دواړه غاړې لا هم د ملکي کسانو ژوند ته پاملرنه نه‌کوي.

په هلمند کې د ملکي تلفاتو تر ټولو بوږنوونکې پېښه په سنګين ولسوالۍ کي وه چې د ملکي خلکو په يوه مېله بازار کې تر غبرګو چاودنو وروسته ۳۰ نفره ووژل شول او ۲۵ ټپيان شول.

حکومت د سنګين د پېښې پړه پر طالبانو او طالبانو پر حکومت ورواړوله.

یوناما او بشر حقونو بنسټونو په دې وروستيو کې د ملکي تلفاتو پر زياتوالي اندېښنه څرګنده کړې ده.

د ایران بهرنیو چارو وزارت: د افغانستان د سولې په غونډه کې ګډون کوو

د ایران بیرغ

د ایران د بهرنیو چارو وزارت وايي، د دوشنبې په ورځ به په کابل کې د افغانستان د سولې په غونډه کې ګډون وکړي.

د افغانستان د بهرنیو چارو وزارت ویلي چې افغانستان د سولې په اړه د دوشنبې له ورځې درې غونډې جوړوي.

د دغه وزارت ویاند ګران هېواد پرون د دغو غونډو په اړه وویل: "د ایران د باندنیو چارو وزارت به په دې غونډو کې ګډون وکړي."

ناټو د افغان ځواکونو لپاره تر ټولو لویه طبي مرسته چمتو کړې

د ناټو بیرغ

په افغانستان کې د ناټو ملکي برخه وايي، د افغان امنیتي او دفاعي ځواکونو لپاره‌یې د کرونا ویروس په وړاندې تر ټولو لویه طبي مرسته چمتو کړې ده.

په افغانستان کې د غوڅ ملاتړ مأموریت د ملکي څانګې له لوري دا اعلان څو ورځې وروسته له دې وشو چې په ځینو راپورونو کې وویل شول چې د افغان امنیتي ځواکونو په منځ کې هم کرونا ویروس خپور شوی دی.

غوڅ ملاتړ مأموریت په یوه ټویټ کې ویلي، افغان امنیتي ځواکونو ته په دې طبي مرسته کې تر یو نیم میلیون ډېر ماسکونه، ۵ لکه دستکشونه، ۴ لکه ۶۰ زره چپنې او د جراحۍ وسایل شامل دي چې د افغانستان د ملي اردو او ملي پولیسو لپاره تیار شوي او ورلېږل شوي دي.

ناټو ټینګار کړی چې په افغانستان کې د سولې او ثبات د خوندیتوب لپاره د افغان امنیتي ځواکونو ملاتړ ته دوام ورکوي.

مالیې وزارت: امنیتي ادارې دې د اسلام قلعه ګمرک امنیت خوندي کړي

د مالیې وزارت

د افغانستان مالیې وزارت وایي، له امنیتي ادارو یې غوښتي چې د اسلام قلعه ګمرک امنیت خوندي کړي.

د دغه وزارت ویاند شمعروز مسجدي نن ازادي راډیو ته وویل چې دغه ګمرک یو کلیدي او ډېر عاید لرونکی ګمرک دی او باید ورته پام وشي.

نوموړي هیله وښوده چې د هرات-اسلام قلعې لویې لارې امنیتي ستونزې ژر تر ژره هوارې شي او د ګمرک کارکوونکي بېرته خپلو کارونو ته وګرځي.

د هرات د ګمرک کارکوونکو د هرات-اسلام قلعه لویې لارې په اوږدو کې د ناامنیو له امله کاري اعتصاب کړی.

اعتراض کوونکي وایي، وروسته له هغه چې تېر کال د ګمرک ساختمان د ښار له مرکز څخه د ایران سرحد اسلام قلعې بندر ته انتقال شو له ګڼو ستونزو په ځانګړي ډول امنیتي ستونزو سره مخ دي.

د هرات د اسلام قلعې ګمرک مسؤلین هم وایي، دغه ګمرک د دولت یو له مهمو عایداتي سرچینو نه دی چې هر کال نږدې ۲۰ میلیارده افغانۍ د دولت حساب ته وراضافه کوي او باید د کارکوونکو ستونزو ته‌یې رسېدنه وشي.

لغمان کې بې‌ځایه شوې کورنۍ: تر اوسه هېځ ډول مرستې راسره نه‌دي شوي

د لغمان ولایت نقشه

د لغمان بې‌ځایه شوې کورنۍ وایي، تر اوسه ورسره هېځ ډول مرستې نه‌دي شوي.

د لغمان مرکز مهترلام ته د جنګ جګړو له کبله د دغه ولایت له لیرې پرتو سیمو او ولسوالیو راکډه شوې کورنۍ وایي، نه‌پوهېږي چې د کډوالو په نوم شوې مرستې چېرته تللي.

دغه بې‌ځایه شوي خلک وایي، کلونه وشول چې د جنګ جګړو او ناارامیو له امله له خپلو مېنو راکډه شوي او اوس په مرکز مهترلام کې دېره دي، خو په خبره‌یې چې تر اوسه ورته د کډوالۍ هېڅ حق نه‌دی ورکړل شوی.

د دوی په خبره، اوس‌مهال د ژوند له ستونزو او سختیو سره لاس او ګرېوان دي.

په لغمان کې د سلګونو بې‌ځایه شویو کورنیو غړي له ځایي چارواکو غواړي چې د دوی د حقونو په ورکړې سره‌یې ژوند له کړاوونو وژغوري.

د لغمان د کډوالو چارو ریاست د مسؤلینو په خبره، په وروستیو درې کلونو کې هر کال په اوسط ډول (۱،۰۰۰) کورنۍ په دغه ولایت کې د جنګ جګړو او ناخوالو له کبله له یوه ځایه بل ځای ته کډوال کېږي.

د مسؤلینو د معلوماتو له مخې، اوس‌مهال په لغمان کې شااوخوا ۲۵ زره کورنۍ دي چې له تېرو اتو کالو راهیسې د جکړو له امله بې‌ځایه شوي او دوی ته‌یې مراجعه کړې ده.

د لغمان د والي ویاند اسدالله دولت‌زي په دې اړه ازادي راډيو ته وویل چې د لغمان ځایي اداره د کډوالۍ ستونزې درک کوي، خو په خبره‌یې هېڅ وخت د کډوالو حقه حقوق نه‌دي تلف شوي.

د یادونې ده چې د دغه ولایت بې‌ځایه شوي کډوال وایي، د کار روزګار، د استوګنې د ځای، د څښاک د اوبو او د ژوند د نورو اسانتیاوو او امکاناتو نشتوالي د ژوند کړۍ ورتنګه کړې او له سخت وضعیته کړېږي.

د امریکا یو سرتېری په افغانستان کې ووژل شو

ارشیف، په افغانستان کې په ۲۰۱۹ کال کې یو وژل شوی امریکايي سرتېری

د امریکا متحده ایالاتو دفاع وزارت په افغانستان کې د خپل یوه سرتېري د وژل کېدو خبر ورکړی دی.

دغه وزارت پرون شنبه په یوه اعلامیه کې وویل، ۲۱ کلن وینسینټ سبسټیان ایباریا چې په اصل کې د امریکا د تګزاس ایالت و، تېره جمعه په فراه ولایت کې د موټر د نسکورېدو په پېښه کې مړ شوی دی.

د امریکا دفاع وزارت یا پنټاګون ویلي چې د دې پېښې په اړه څېړنې روانې دي.

د ارمي ټایمز خپرونې په حواله، دا په روان ۲۰۲۰م کال کې په افغانستان کې د امریکا نهم سرتېری دی چې وژل کېږي.

د بهرنیو چارو وزارت او افغان پست د قونسلۍ برخه کې تفاهم لاسلیک کړ

افغان پست

د افغانستان بهرنیو چارو وزارت او د افغان پست دولتي شرکت ترمنځ د قونسلي خدماتو د وړاندې کولو په برخه کې د اسانتیا د رامنځته کېدو لپاره یو تفاهم لاسلیک شو.

د یاد وزارت د قونسلۍ څانګې مشر عبدالملک قریشي د شنبې په ورځ د دې تفاهم د لاسلیک پر مهال وویل: "تر دې وروسته د بهرنیو چارو وزارت له‌خوا ټول تصدیق او ارزول شوي اسناد افغان پست ته سپارل کېږي. په لومړني پړاو یعنې لومړیو شپږو میاشتو کې دا اسناد د کابل او اتو ولایتونو ۱۵ پوسته‌خانو ته چې د بهرنیو چارو وزارت نمایندګۍ په‌کې شته، رسول کېږي."

د ښاغلي قریشي په خبره تر شپږو میاشتو وروسته د بهرنیو چارو وزارت اړوند اسناد د پروسس او تصدیق لپاره له ولایتونو څخه مرکز ته هم د افغان پست له لارې لېږل کېږي.

نور راوښيه

XS
SM
MD
LG