د لاسرسۍ وړ لېنکونه

تازه خبر
چهارشنبه ۲۵ چنګاښ ۱۳۹۹ کابل ۰۹:۵۸

افغانستان

د خوست محبس کې د بندیانو اعتصاب پای ته ورسېد

د خوست د محبس بندیان

نن د یکشنبې ورځې ناوخته ماسپښین د خوست محبس لسګونو بندیانو چې له شنبې ورځې يې خولې د اعتراض په ډول ګنډلې وې، خپل اعتصاب پای ته ورساوه.

دوی د بندیانو دوسیو ته پر وخت نه رسېدل، د بندیانو ناسم غذايي رژیم، خپلو کورنیو سره هغوی د ملاقاتونو اجازې نه ورکول، په دې محبس کې له اصلي ظرفیته د زیاتو کسانو استوګه او په محبس کې د نه‌شه يي توکو د پېر، پلور او کارونې ډېروالی د اعتصاب لاملونه وبلل.

د بندیانو ستونزو او غوښتنو د اورېدو لپاره د خوست مرستیال والي په مشری یو پلاوی هم محبس ته ورغلی وو، چې د بندیانو له استازو سره تر خبرو او موافقې وروسته هغوی خپل اعتصاب ختم کړ.

د هاشم دراز مسید په نوم یو بندي چې د اعتصاب کوونکو بندیانو په استازیتوب يې خبرې کولې مشال راډیو ته وویل، بندیانو ځکه خولې ګنډلی، چې څوک يې غږ او فریاد نه اوري.

د سردار محمد ګربز په نوم یو بل بندي وايي، چې بندیان په ټولو برخو کې ستونزې لري، د محبس پولیس ورځې، بسترې یو بل ځای غورځوي، له یوې کوټې يې بلې کوټې ته بیايي او دوی سره هېڅ مشوره نه کوي.

یو تن پخوانی حکومتی ولسوال چې اوس په محبس کې بندي دی وايي، د قانون خلاف په دې محبس کې داسې بندیان شته، چې تر دوه کلونو پورې بې سرنوشته دي او درې ګونو محکمو پرې حکم نه‌دی کړی.

د خوست د ولایتي شورا مرستیال جانمیر ځاځي د بندیانو نیوکو او غوښتنو ته په کتو د ولایت مقام او نورو اړوندو ادارو وغوښتل، چې د بندیانو د ټولو ستونزو د څېړنې لپاره یو پلاوی وګماري.

ده وویل، محبس کې د شته ظرفیت دوه برابره ډېر بندیان اوسېږي، نو حکومت باید د دې لپاره یوه چاره جوړه کړي، یا دې په دې محبس کې نوې ابادۍ وکړي.

د خوست محبس د مسؤلینو په وینا، چې د ولسمشر د وروستیو فرمانونو په اساس ۲۲۷ تنه له دې محبسه خوشې شوي دي.

د دوی په خبره یاد محبس د ۲۴۰کسانو په ظرفیت جوړ شوی، خو دا مهال په کې د ځای د نشتون له کبله ۵۷۹ بندیان د قید موده تېروي.

د ورځې تازه خبرونه دلته ولولئ

وسله‌والو پروان کې یو دیني مخور وژلی

پروان ښار

ناپېژانده وسله‌والو په پروان ولایت کې یو دیني مخور وژلی دی.

د پروان د سیدخېل ولسوال احمد لمر عثمانیار ازادي راډیو ته وویل چې دا پېښه نن سهار وختي د پروان ولایت د سیدخېل ولسوالۍ په مربوطاتو کې شوې ده.

نوموړي وویل مولوي عبدالحق چې د یوه جومات ملا امام وو، له خپل ورور سره یوځای ووژل شو.

د ښاغلي عثمانیار په خبره د دې پېښې په تړاو دوه مشکوک کسان نیول شوي او څېړنې ترې روانې دي.

تر اوسه د دې پېښې مسؤلیت چا نه‌دی منلی.

پر مولوي عبدالحق تر دې وړاندې هم یو ځل وسله‌وال برید شوی وو.

د کونړ چارواکي: د افغان ځواکونو او پاکستاني پوځیانو ترمنځ جګړه نښتې

ارشیف، کونړ کې افغان ځواکونه

د کونړ چارواکي وایي پاکستاني پوځیانو نن ماسپښین دوه بجې د دې ولایت په مرکز اسعد اباد او څو نورو ولسوالیو کې پر افغان پوستو بریدونه وکړل او د دواړو لورو ترمنځ جګړه روانه ده.

د کونړ امنیه قوماندان محمد یوسف مظلوم‌یار نن ازادي راډیو ته وویل چې پاکستاني ځواکونو لومړی په مرورې ولسوالۍ کې پر افغان پوستو د سپکو او درنو وسلو بریدونه پیل کړي دي.

د نوموړي په خبره د کونړ په مرکز اسعد اباد او سرکاڼو ولسوالیو کې هم پاکستاني پوځیان د هستوګنې سیمې ولي چې تر اوسه د ده په خبره ۱۲ ملکي وګړو ته مرګ‌ژوبله اوښتې.

د کونړ د عامي روغتیا ریاست هم ویلي چې تر اوسه د مرکز اسعد اباد روغتون ته د درې ملکیانو مړي او ۹ ټپیان وروړل شوي دي.

طالبانو ته د ناټو غړو هېوادونو ګواښ

افغانستان کې یو شمېر وسله‌وال طالبان

د ناټو غړو هېوادونو طالبانو ته ګواښ کړی چې که د سولې د خبرو پر لور وړاندې لاړ نه‌شي دوی به په دې هېواد کې پاتې شي.

د جرمني 'ډي پي اې' خبري اژانس د راپور له مخې د ناټو شورا پرون سې شنبه په یوه خپره کړې خبرپاڼه کې ویلي چې دا تړون به په دې اړه مشورې ته دوام ورکړي او د شرایطو اړتیا ته په پام به په دې هېواد کې د سولې د پروسې د ملاتړ لپاره خپل پوځي حضور تنظیم کړي.

ناټو شورا د افغانستان له حکومت او طالبانو دواړو غوښتي چې په بین‌الافغاني خبرو کې د داخلېدو او د دې مسئلې یقیني کول چې ترهګر به بیا هېڅکله هم د افغانستان له خاورې د خوندي ځالې په توګه کار نه‌اخلي، په شمول خپلې کړې ژمنې پر ځای کړي.

د ناټو شورا چې د دې تړون سیاسي پرېکړې همدا شورا کوي، په خپاره کړي بیان کې ویلي چې په اوسنۍ کچه شخړې چې تر ډېره پر افغان امنیتي او دفاعي ځواکونو د طالبانو له حملو سره زیاتې شوې، د نه‌منلو وړ دي او هغه د دې ترڅنګ چې بې‌ثباتي زیاتوي، د سولې د پروسې په اړه باور هم زیانمنوي.

د راپور له مخې په اوس وخت کې په افغانستان کې د ناټو د غوڅ ملاتړ مأموریت په چوکاټ کې چې هدف‌یې د افغان امنیتي ځواکونو روزنه، هغوی ته سلا او مشوره ورکول او ملاتړ دی، شاوخوا ۱۲ زره سرتېري ونډه لري.

د دغو ځواکونو ۵،۲۰۰ یې امریکایي سرتېري دي.

پر دغو امریکایي سرتېرو سربېره له درې زرو زیات نور امریکایي سرتېري هم په دې هېواد کې حضور لري چې هڅې یې د ترهګرۍ په وړاندې پر جګړې متمرکزې دي.

پکتیا او پکتیکا کې ۴ طالبان وژل شوي او ۴ نور ټپیان دي

ارشیف

په پکتیا او پکتیکا کې ۴ وسله‌وال طالبان وژل شوي او ۴ نور یې ټپیان شوي دي.

د ۲۰۳ تندر قول اردو ویاند ایمل مومند وایي، د پکتیکا د زیړوک ولسوالۍ په سره میدان کې پرون ۲ وسله‌وال طالبان د ماین په چاودنه کې ووژل شول او یو بل‌یې ټپي شو.

مومند وايي طالبانو غوښتل چې په لویه لار کې ماین کېنوي، خو ماین په خپله په همدوی وچاودېد.

اخوا په پکتیا کې د څمکنیو ولسوالۍ اړوند د سلیمان‌خېلو په سیمه کې تېر مازدیګر وسله‌والو طالبانو د سیمه‌ییزو پولیسو د یوه سرتېري په جنازه برید وکړ چې په پایله کې یې ۲ وسله‌وال طالبان ووژل شول او ۳ نور ټپیان شول.

د ۲۰۳ تندر قول اردو ویاند ایمل مومند دا ونه‌ویل چې ایا افغان پوځیانو ته هم تلفات اوښتي که څنګه.

وسله‌والو طالبانو تر اوسه د دې دواړو پېښو په اړه رسنیو ته څه نه‌دي ویلي.

ناټو: افغانستان کې د تاوتریخوالي اوسنۍ لوړه کچه د منلو نه‌ده

سمنګان کې د طالبانو د برید پر مهال ټپي شوی افغان سرتېری

ناټو وايي، په افغانستان کې د تاوتریخوالي اوسنۍ لوړه کچه چې په ځانګړې توګه د افغان امنیتي او دفاعي ځواکونو پر وړاندې د طالبانو د حملو په نتيجه کې ده، د منلو وړ نه‌ده.

ناټو ائتلاف پرون ماخوستن په یوه خبرپاڼه کې ویلي چې تاوتریخوالی د بې‌ثباتۍ لامل کېږي او د سولې پروسه تر پوښتنې لاندې راولي.

په اعلامیه کې له ټولو خواوو غوښتل شوي چې ژر تر ژره هغه مسایل حل کړي چې د سولې د بین‌الافغاني خبرو پر وړاندې خنډ ګڼل کېږي.

ناټو ته د امریکا سفیرې کې بیلي هاچیسن پرون پر خپله ټويټرپاڼه د ناټو ائتلاف د دې دريځ د ملاتړ ترڅنګ ویلي، وخت رارسېدلی چې طالبان نور تاوتریخوالي ته د پای ټکی کېږدي.

دا وايي، امریکا، ناټو او زموږ متحدان له ټولو لورو غواړي چې د بین‌الافغاني خبرو پر وړاندې پاته خنډونه لیرې کړي چې د سولې پروسه پر مخ لاړه شي.

د افغانستان جمهوري ریاست وايي، له طالبانو سره سولې ته‌یې لومړیتوب ورکړی.

خو د ولسمشر د ویاند صدیق صدیقي په وینا، طالبانو له امریکا سره په موافقه کې کړې ژمنې په بشپړه توګه نه‌دي عملي کړي.

ذبیح‌الله مجاهد بیا چې ځان د وسله‌والو طالبانو ویاند معرفي کوي، د سې شنبې په ورځ په یوه اعلامیه کې ویلي، د افغان ځواکونو د عملیاتو په غبرګون کې جګړه زیاته شوې ده.

ده همداراز ادعا کړې چې د فبرورۍ په ۲۹مه د سولې د موافقې تر لاسلیک وروسته امریکايي ځواکونو د افغان ځواکونو له الوتکو په استفاده د دوی پر کسانو او ملکیانو هوايي بمبارۍ کړې دي.

امریکايي ځواکونو دا ادعا نه‌ده تأیید کړې. په وروستي مورد کې د سمنګان ولایت پر ایبک ښار د دوشنبې په ورځ د خونړۍ حملې مسؤلیت وسله‌والو طالبانو واخیست.

په دې حمله کې د افغان چارواکو په وینا د ملي امنیت د ۱۱ کارکوونکو په ګډون ۱۳ کسان ووژل شول او شااوخوا ۷۰ نور ټپيان شول.

کرام‌الدین کریم په فوټبال کې له حضوره دایمي محروم شو

د افغانستان د فوټبال فدراسیون پخوانی رئیس کرام‌الدین کریم

د ورزش د حکمیت محکمې په فوټبال کې له حضوره د افغانستان د فوټبال فدراسیون د پخواني رئیس کرام‌الدین کریم دایمي محرومیت تأیید کړ.

دې محکمې پرون وویل، کریم د ښځينه ورزشکارانو پر وړاندې وحشتناکه اقدامات کړي دي.

د فوټبال نړیوال فدراسیون اخلاقي کمېټې، فیفا، د تېر کال په جون میاشت کې پر کریم تور پورې کړ چې په فرانسه کې يې د نړیوال جام سیالیو پر مهال د فوټبال ښځینه لوبغاړې په جنسي توګه ځورولي او دی یې یو میلیون ډالره جریمه کړ.

ګارډين ورځپاڼې د افغانستان د فوټبال ملي ټیم د سرچینو له قوله راپور ورکړی وو چې کریم د فوټبال پر یوې ښځینه لوبغاړې تر جنسي تېري وروسته، هغه او کورنۍ يې د چپ نه‌پاتې کېدو په صورت کې په مرګ تهدید کړي ول.

کریم دا تورونه بې‌بنسټه بللي دي.

د افغانستان د فوټبال فدراسیون هم دا تورونه رد کړي او ویلي يې دي چې د فوټبال ځیني ښځينه لوبغاړو د ناخوښۍ پر اساس تورونه پورې کړي دي.

سره میاشت: افغانستان د کرونا ویروس له لاسه ناورین سره مخ دی

د کابل افغان-جاپان روغتون کې په کرونا ویروس اخته ناروغ د درملنې پر مهال

د افغاني سرې میاشتې ټولنه وايي، دا هېواد د کرونا ویروس له لاسه له ناورین سره مخامخ دی.

دې ادارې پرون د سې شنبې په ورځ په یوه خبرپاڼه کې وویل، د کرونا ویروس مخ پر زیاتېدونکې پېښې په روغتونونو او کلینیکونو کې د ناروغانو د منل کېدو ظرفیت محدودوي.

په اعلامیه کې راغلي، افغانستان د کرونا ویروس له لاسه له روغتیايي، ټولنيز او اقتصادي ناورین سره مخامخ دی.

د رسمي شمېرو له مخې، په افغانستان کې تر ۳۴ زره او ۷۰۰ زیات کسان په دې ویروس اخته شوي او تر اوسه تر زرو زیات کسان مړه شوي دي.

خو د افغاني سرې میاشتې ټولنه وايي، په کرونا ویروس د اخته کسانو شمېر ښايي تر رسمي شمېر زیات وي. د دې ادارې په وینا، لامل‌یې د کرونا ویروس محدود معاینات او ضعیف روغتیايي سیستم دی.

خلیل‌زاد: واشنګټن له طالبانو سره د تړون ژمنې پر ځای کړي

(ښی) قطر کې د طالبانو د سیاسي دفتر مشر ملا برادر (کین) د افغان سولې لپاره د امریکا ځانګړی استازی زلمی خلیل‌زاد.

د افغانستان سولې لپاره د امریکا ځانګړي استازي زلمي خلیل‌زاد نن تأیید کړه چې واشنګټن له طالبانو سره د فبرورۍ د ۲۹مې د سولې تړون هغه ژمنې پر ځای کړي چې په ۱۳۵ ورځو کې یې باید عملي کړې وی.

خلیل‌زاد پر خپل ټویټر دا خبره کړې او ویلي یې دي چې په افغانستان کې د دوشنبې په ورځ د امریکایي ځواکونو شمېر ۸،۶۰۰ ته رسېدلی هغه څه چې په دې تړون کې یې ژمنه شوې وه.

د دغه تړون مطابق امریکایي ځواکونه له پنځو اډو وتلي دي.

طالبانو هم د دغه اقدام هرکلی کړی دی.

د طالبانو ویاند ذبیح‌الله مجاهد رسنیو ته په استولې خبرپاڼه کې د څو مواردو د یادونې په ترڅ کې ویلي چې د دغه تړون له مخې د امریکا متحده ایالاتو او بهرنیو متحدینو له‌خوا يې د ځواکونو کمښت او له پنځو اډو څخه وتل یو ښه او مثبت ګام دی، خو د بندیانو د خلاصون شرط ته‌یې هم اشاره کړې او وایي، دا چې دغه پروسه تر اوسه ځنډول شوې د تأسف وړ خبره ده.

د افغانستان حکومت او طالبانو له لوري د بندیانو په خلاصون کې ځنډ د بین‌الافغاني خبرو پیلېدل هم له خنډ سره مخامخ کړي دي.

سروبي کې چاودنې ۴ ملکيان ووژل

د افغانستان په عمومي نقشه کې پلازمېنه کابل

د کابل په سروبي کې د سړک غاړې بم چاودنه کې څلور ملکي وګړي وژل شوي او څلور نور ژوبل شوي دي.

د کابل د امنیه قوماندانۍ ویاند فردوس فرامرز د دې پېښې په اړه وویل چې دا پېښه نن هغه مهال وشوه چې په سیمه کې د دوی د سپرلۍ پر موټر د سړک په غاړه ایښودل شوی ماین وچاودېد.

د سروبي ولسوال ګوهر خان بابري په دې پېښه کې د یوه ۱۳ کلن هلک په ګډون د پنځو تنو د وژل کېدو او ۱۱ نورو د ټپي کېدو خبره کړې ده.

تر اوسه د دې پېښې مسؤلیت چا یا کومې ډلې نه‌دی اخیستی، خو سروبي ولسوالۍ په دې وروستیو ورځو کې د نا امنیو د پېښو د زیاتوالي شاهده ده.

له بلې خوا د غزني چارواکي هم د ملکي وګړو د سپرلۍ پر موټر په یوه بم چاودنه کې د یوه ملکي وګړي د وژل کېدو او دوو نورو د ټپي کېدو خبر ورکوري.

د غزني د والي ویاند واحدالله جمعه‌زاده نن ازادي راډیو ته وویل، دا پېښه نن د کابل-کندهار پر لویه لاره د غزني ښار اړوند د شهباز په سیمه کې شوې ده.

د ملګرو ملتونو او نورو بشري حقونو مدافع ډلو په خپلو راپورونو کې ملکي وګړي په افغانستان کې د روانې جګړې ستر قربانیان یاد کړي دي.

چارواکي: بلخ کې یو شمېر وسله‌وال طالبان وژل شوي

ارشیف، بلخ کې د افغان ځواکونو عملیات.

د بلخ امنیتي چارواکي په دې ولایت کې د یو شمېر وسله‌والو طالبانو د وژلو خبره کوي.

د ۲۰۹ شاهین قول اردو په یوه خپره کړې خبرپاڼه کې ویلي چې د طالبانو پر یوې پوستې د چهاربولک ولسوالۍ په تیمورک او د جوزجان بلخ په لویه لاره د دې ډلې د پیسو اخیستو پر یوه پاټک نن له غرمې مخکې افغان ځواکونو هوایي او ځمکنۍ حملې وکړې.

دغه قول اردو د اتو وسله‌والو طالبانو د وژل کېدو او د یو شمېر وسلو او مهماتو ترڅنګ د طالبانو د څو موټرسایکلونو د نیول کېدو خبره کوي.

طالبانو تر اوسه په دې اړه څه نه‌دي ویلي.

چارواکي: شمال کې شااوخوا ۷۰ طالب وسله‌والو ته مرګ‌ژوبله اوښتې

ارشیف

په شمال کې د ملي اردو دېره قول اردو په تېرو ۲۴ ساعتونو کې د شااوخوا ۷۰ طالب وسله‌والو د مرګ‌ژوبلې خبر ورکوي.

د ۲۰۹ شاهین قول اردو ویاند حنیف رضايي په یو پیغام کې چې نن سهار یې رسنیو ته استولی دی ویلي چې دې وسله‌والو ته پر افغان امنیتي دفاعي ځواکونو د حملو پر مهال مرګ‌ژوبله اوښتې ده.

هغه زیاته کړه: "د تېرو ۲۴ ساعتونو په ترڅ کې زموږ د مسؤلیت په ساحو کې د ترورېستو طالبانو په حملو کې ۳۲ طالب وسله‌وال وژل شوي او ۳۶ نور ټپیان دي. په ټوله کې په تېره یوه ورځ کې د دښمن نږدې ۷۰ وسله‌وال مړه او ټپیان شوي دي."

ښاغلی رضايي وايي دا نښتې د بلخ، فاریاب او سمنګان په اړوندو سیمو کې شوي.

د شاهین قول اردو د دې ادعا په اړه طالبانو تر اوسه څه نه‌دي ویلي.

زلمي خلیل‌زاد په ایبک ښار کې د طالبانو موټر بم حمله وغندله

د افغانستان د سولې لپاره د امریکا ځانګړی استازی زلمی خلیل‌زاد

د افغانستان سولې لپاره د امریکا ځانګړي استازي زلمي خلیل‌زاد په ایبک ښار کې د طالبانو وروستۍ موټر بم حمله غندلې او ویلي یې دي، دا حمله هغه کسان پیاوړي کوي چې د سولې مخالفت کوي او د سولې د دښمنانو په خوښه لوبېږي.

خلیل‌زاد نن سهار پر ټویټر په یوه بیان کې یو ځل بیا په افغانستان کې د تشدد د پای ته رسولو غوښتنه کړې.

د سمنګان په مرکز کې پرونۍ حمله وروسته له هغه وشوه چې د بندیانو د خوشې کولو په پروسه کې ستونزې راولاړې شوې او طالبانو خبرداری ورکړ چې دوی ته له جګړې پرته بل انتخاب نه‌دی پاتې.

ښاغلی خلیل‌زاد ټینګار کوي چې امریکا به له طالبانو سره د سولې د موافقې له مخې خپل اقدامات په مشروط ډول ترسره کړي او د بندیانو د تبادلې د بهیر د بشپړولو، د تشدد د کمولو او د بین‌الافغاني خبرو د پیل لپاره به هڅو ته دوام ورکړي.

'واشنګټن کې د افغانستان سفارت موضوع به لویې څارنوالۍ ته واستول شي'

په واشنګټن کې د افغانستان سفارت

د افغانستان د بهرنیو چارو وزارت په واشنګټن کې د افغانستان سفارت کې د یوه دېوال د جوړېدو په پروژه کې د فساد په اړه راپورونو ته غبرګون وښود.

د دغه وزارت په یوې اعلامیه کې چې تېر ماښام خپره شوه راغلي چې دوی که څه هم دا ادعا ردوي، خو وایي دا موضوع به د پلټنې عالي ادارې او لویې څارنوالۍ ته واستول شي.

په همدې حال کې د افغانستان د روڼتیا سازمان اجرائیوي مشر اکرام افضلي ازادي راډیو ته وویل چې ځيني پوښتنې شته چې ښیي په یاد سفارت کې د دېوال جوړېدو په پروژه کې فساد شوی دی.

ده زیاته کړه: "د دې قضیې د څېړلو لپاره ډېره تمه نه‌لرو، خو بیا هم حکومت باید یو داسې پلاوی وټاکي چې په رڼه توګه دا موضوع وڅېړي او هغه کسان چې په دې موضوع کې تورن شي، باید تر جدي تعقیب لاندې ونیول شي."

د پژواک خبري اژانس په لومړي ځل د جولای پر ۱۱مه راپور خپور کړ چې په واشنګټن کې د افغانستان سفارت د ۷۰ متره دېوال د جوړېدو لپاره د یوه شرکت د ۸۸ زره ډالرو غوښتنه رد کړه او دا چاره‌یې د یوه بل شرکت په وسیله د یو میلیون او ۸۲۵ زره او ۸۳۹ امریکایي ډالرو په لګښت بشپړه کړه.

افغانستان، ترکمنستان او اذربایجان د همکاریو پراخېدو پر طرحو سلا شول

د افغانستان ترکمنستان او اذربایجان بیرغونه

د افغانستان، ترکمنستان او اذربایجان د بهرنیو چارو وزیرانو د دوشنبې په ورځ د درې اړخیزو همکاریو د پراخېدو پر طرحو موافقه وکړه.

د ټرانسپورت، سوداګرۍ، انرژۍ او پانګونې په برخو کې د همکاریو طرحې د جولای پر دوهمه نېټه د درېیو هېوادونو د مشرانو په غونډه کې مطرح شوې وه.

د افغانستان د بهرنیو چارو وزارت ویاند ګران هېواد د دوشنبه ورځې د درې اړخیزې غونډې په اړه تېر ماښام ازادي راډیو ته وویل: "درېیو وزیرانو د دغو طرحو د تطبیقي مېکانیزمونو د رامنځته کولو او د عملي کولو په اړه مفصلې خبرې وکړې او پرېکړه‌یې وکړه چې د ټرانسپورت مېکانیزم د تطبیق په هدف د زمري میاشتې پر شپږمه نېټه د درېیو هېوادونو د سکټوري مسؤلینو ترمنځ غونډه وشي."

د افغانستان د بهرنیو چارو سرپرست محمد حنیف اتمر، د اذربایجان او ترکمنستان د بهرنیو چارو له وزیرانو المار محمد یاروف او رشید مرادوف سره پرون په وېډیویې غونډه کې دغه‌راز د درېیو هېوادونو ترمنځ د سوداګرۍ او ټرانسپورت د پراختیا لپاره د لاجورد لارې له تړون څخه د ښې ګټې اخیستنې په اړه هم موافقه وکړه.

درېیو هېوادونو د دې ډول غونډو پر دوام ټینګار وکړ.

فاریاب کې نامعلومو وسله‌والو جومات کې پر لمونځ کوونکو ډزې کړي

فاریاب

د فاریاب ولایت په مرکز میمنې ښار کې نامعلومو وسله‌والو په یوه جومات کې پر لمونځ کوونکو ډزې کړي، خلکو ته‌یې مرګ‌ژوبله اړولې ده.

د فاریاب د والي ویاند احمد جاوېد بیدار تېر ماښام ازادي راډیو ته وویل چې دا پېښه د میمنې ښار په څنډو کې په یوه جومات کې داسې مهال شوې چې د سیمې خلک د ماښام لمانځه لپاره راټول شوي ول.

نوموړي زیاته کړه: "دا پېښه د بي بي ایینې په نوم یوه جومات کې شوې ده. مرګ‌ژوبله هم لري. د پلټنې ډلې سیمې ته استول شوې دي. د تحقیقاتو جزئیات به وروسته شریک شي."

تر اوسه د دې پېښې مسؤلیت چا نه‌دی منلی.

نور راوښيه

XS
SM
MD
LG