د لاسرسۍ وړ لېنکونه

تازه خبر
جمعه ۲۰ چنګاښ ۱۳۹۹ کابل ۰۱:۱۱

نړۍ

اردغان: ترکیه د نړۍ ۱۰ سترو اقتصادي هېوادونو غړیتوب ته نږدې شوې

د ترکیې ولسمشر رجب طیب اردغان

د ترکیې ولسمشر رجب طیب اردغان ویلي چې هېواد یې هېڅ کله د نړۍ په لسو سترو اقتصادي قدرتونو په ډله کې غړیتوب ته نه‌و نږدې شوی.

رجب طیب اردغان پرون، د جون په ۲۰مه، په ټلوېزیوني وینا کې وویل چې د کرونا ویروس له وبا څخه باید د ځان د لرې کولو هڅې زیاتي کړي.

اردغان وویل: "موږ هېڅ کله دې ته چې د نړۍ په لسو سترو اقتصادي قدرتونو کې وګڼل شو نه‌وو نږدې شوي، موږ یوازې هغه وخت په خپلو هڅو کې بریالي کېدلای شو چې له دې وبا ځان لرې کړو، له دې کبله د داسې هېواد په توګه چې ۸۳ میلیونه وګړي لري له احتیاط او کلک عزم سره پر مخ حرکت کوو."

د ورلډ میټرز په نوم ویب‌پاڼې چې په نړۍ کې کرونا ویروس په اړه معلومات خپروي، د جون په ۲۰مه، وویل چې په ترکیه ۱۸۵ زره او ۲۵۰ تنه په کرونا ویروس اخته شوي او ۴۹۰۵ تنه په 'کوویډ-۱۹' ناروغۍ مړه شوي دي.

د ورځې تازه خبرونه دلته ولولئ

پاکستان کې اېډز ناروغي زیاته شوې

ارشیف

په پاکستان کې د اېډز ناروغي زیاته شوې ده.

په پاکستان کې د اېډز ناروغۍ مخنیوي اداره وايي، په دې هېواد کې د 'اېچ.ای.وي' او اېډز ناروغانو په شمېر کې د تېر کال په نسبت زیاتوالی راغلی دی.

د دې ادارې مشر ډاکټر بصیر پرون ازادي راډیو ته وویل چې په پاکستان کې د 'اېچ.ای.وي/ اېډز' ناروغانو شمېر له تېرو ۱۰ کلونو راهیسې ورځ تر بلې زیاتېږي.

نوموړی وايي، دا مهال په پاکستان کې د ۱۸۰ زرو په شااوخوا کې خلک په 'اېچ.ای.وي /اېډز' اخته دي.

د اېکسپرس ټرېبیون ورځپاڼې له مخې، تېر کال د 'اېچ.ای.وي/ اېډز' ناروغانو شمېره په دې هېواد کې ۱۶۵ زره وه.

د ملګرو ملتونو د اېډز مخنیوي ادارې هم د جولای پر شپږمه په خپل یو راپور کې ویلي چې په پاکستان کې د 'اېچ.ايي.وي' د ناروغانو او د اېډز له وجې په مرګونو کې زیاتوالی راغلی دی.

دې ادارې په خپل یو تازه راپور کې ویلي چې د اېډز ناروغۍ د مخنیوي لپاره د سیاسي ژمنو، د قوانینو او پالېسیانو کمی او په ټولنه کې اېډز یوه بدنامي ګڼلو په خبره کې زیاتوالي هغه عوامل دي چې له وجې یې دا ناروغي ډېره شوې ده.

د پنټاګون جګپوړي مشران د کانګرس استماعیه غونډه کې ګډون کوي

مارک اسپر او مارک میلي

د پنټاګون جګپوړي مشران نن د کانګرس په یوه استماعیه غونډه کې ګډون کوي او تمه ده چې یو شمېر لانجمنو پوښتنو ته چې یوه هم په‌کې د سپینې ماڼۍ په مخ کې د مظاهرو په وړاندې غبرګون ښودل دي، ځوابونه ووايي.

د سپینې ماڼۍ په مخ کې مظاهرې تېره میاشت د پولیسو له‌خوا د جورج فلوید په نوم د یوه تور پوستي امریکایي د وژلو پر سر راپارېدلې وې.

د امریکا دفاع وزیر مارک اسپر او د وسله‌والو ځواکونو لوی درستیز مارک میلي به د استازو جرګې د پوځي خدماتو کمېټې په غونډه کې ګډون وکړي.

پر ولسمشر ډونالد ټرمپ په واشنګټن کې د قهرجنو مظاهره کوونکو د خورولو لپاره له ملي ګارډ څخه د استفادې په ګډون د اعتراضونو په وړاندې د شدید غبرګون د ښودلو په خاطر انتقاد شوی دی.

نړۍ کې پر کرونا ویروس د اخته شویو کسانو شمېر له ۱۲ میلیونو واوښت

ارشیف

په نړۍ کې پر کرونا ویروس د اخته شویو کسانو شمېر له ۱۲ میلیونو واوښت.

د ټولو کرونا نیولو شااوخوا یوه درېیمه برخه‌یې د امریکا په متحده ایالاتو کې دي. په هغه هېواد کې چې د دغه ویروس نوې پېښې په‌کې په تېره بیا په جنوبي او لوېدیځو ایالتونو له فلوریدا نه تر تګزاس او له ارېزونا نه تر کالیفورنیا پورې، مخ په زیاتېدو دي.

د جانز هاپکنز پوهنتون د چهارشنبې د ورځې د شمېرو له مخې په متحده ایالاتو کې له درې میلیون زیات کسان پر کرونا اخته شوي او لږترلږه ۱۳۲ زره او ۲۵۶ کسان ترې مړه شوي دي.

له متحده ایالاتو وروسته په برازیل او هند کې د کرونا نوې پېښې په زیاتېدو دی. د تأیید شویو شمېرو له مخې په برازیل کې یو میلیون ۷۰۰ زره کسان او په هند کې ۷۴۲ زره کسان پر کرونا اخته شوي دي.

مکسیکو هم په یوه ورځ کې د کرونا ویروس د ۶،۹۹۵ نویو پېښو په ثبتولو سره نوی ریکارډ ټینګ کړ. په دې سره دا هېواد له اسپانیا چې له ۲۷۵ زره زیاتې پېښې یې ثبت کړې، مخکې شو.

د استرالیا په دوهم ستر ښار ملبورن کې چې پنځه میلیون وګړي اوسي، چارواکو سر له ننه بېرته سخت بندیزونه لګولي دي.

امنیت شورا د سوریې شمال لوېدیځې برخې په اړه د روسیې غوښتنه رد کړه

د ملګرو ملتونو امنیت شورا

د ملګرو ملتونو امنیت شورا پرون د روسیې له‌خوا وړاندې شوی هغه پرېکړه‌لیک رد کړ چې د سوریې شمال لوېدیځې برخې ته چې د سوریې د یاغیانو په کنټرول کې ده، له ترکیې څخه د بشري مرستو رسول پر یوې لارې پورې محدودوي.

پر روسیې سربېره د ۱۵ کسیزې امنیت شورا درې نورو غړو، چین، ویتنام او جنوبي افریقا د دغه پرېکړه‌لیک ملاتړ وکړ.

روسیې چې د سوریې نږدې متحده ده، د دغه پرېکړه‌لیک مسوده وروسته له هغې د امنیت شورا پر غړو ووېشله چې وړمه ورځ‌یې له چین سره یوځای د هغه پرېکړه‌لیک مسوده ویتو کړه چې له مخې یې له ترکیې څخه د یوه کال په مخه دغې سیمې ته د بشري مرستو رسولو دوه لارې پرانیستل کېدې.

په پام کې ده چې د یوه بل پرېکړه‌لیک مسوده چې له ترکیې د شپږو میاشتو په مخه د دوو لارو د پرانیستلو غوښتنه کوي، د امنیت شورا پر غړو ووېشل شي.

دا نه‌ده څرګنده چې دغه پرېکړه‌لیک ته به مخکې تر دې چې د اوسني مأموریت اعتبار سبا پای ته رسېږي، رایې ورکړل شي.

د ملګرو ملتونو د بشري مرستو د چارو مشر مارک لوکاک ویلي چې د دوو پولو پرانیستل د هغو میلیونونو ملکي وګړو لپاره چې ملګري ملتونه نه‌شي کولای له نورو لارو ورته ورسېږي، ډېر حیاتي دي.

په جدي جرمونو تورن د کوسوو ولسمشر هاګ ته ځي

د کوسوو ولسمشر هاشم تاچي

د کوسوو ولسمشر هاشم تاچي پرون وویل چې دی به راتلونکې اوونۍ هاګ ته ولاړ شي او هلته به له ځانګړي څارنوال سره مرکه وکړي.

د دې ځانګړي څارنوال دفتر هغه جنګي جرمونه څېړي چې د کوسوو د خپلواکۍ د جګړې پر مهال او تر هغه وروسته د ۹۰مې لسیزې په وروستیو کې شوې دي.

هاشم تاچي پخوا په خپله قوماندان و، دی به د جولای په ۱۳مه هاګ ته ورشي.

د کوسوو د ځانګړو څارنوالانو ډله د جون په ۲۴مه، جوړه شوه، دې ډلې هاشم تاچي او یو شمېر نور پخوانۍ پېژندل شوې څېرې تورنې کړې دي چې د نږدې ۱۰۰ کسانو د وژلو په شمول په یو شمېر جدي جرمونو کې لاس لري.

کوسوو په ۲۰۰۸ کال کې له صربیا خپلواکي واخیسته. د متحده ایالاتو په ګډون‌یې د نړۍ تر ۱۱۰ ډېر هېوادونه په رسمیت پېژني.

امریکا پر ایران د وسلو د پلورلو بندیز د تمدید غوښتنه وکړه

د امریکا بیرغ

د امریکا متحده ایالاتو پر ایران د وسلو د پلورلو د بندیز د تمدید غوښتنه وکړه. دا بندیز د اکټوبر په نیمایي کې پای ته رسېږي.

د امریکا د بهرنیو چارو وزیر مایک پومپیو پرون په واشنګټن کې خبریالانو ته وویل: "د ملګرو ملتونو امنیت شورا باید پر ایران د وسلو لګولی بندیز وغځوي چې په سیمه کې د نورو شخړو مخه ونیول شي. هېڅ جدي کس به ښایي باور ونه‌کړي، کومه وسله چې ایران ترلاسه کوي هغه به د سوله‌ییز هدف لپاره کاروي."

ښاغلي پومپیو زیاته کړه چې د جون په ۲۸مه امریکا او متحده ځواکونو یې یوه بېړۍ ونیوله چې ایراني وسلې یې په یمن کې حوثي یاغیانو ته لېږدولې.

روسیه او چین نه‌غواړي چې پر ایران د وسلو د خرڅلاو لګېدلی بندیز وغځېږي.

د ایران او د نړیوالو ترمنځ د ۲۰۱۵ کال د اټمي تړون له مخې پر ایران د وسلو د خرڅلاو بندیز له ننه نږدې څلور میاشتې وروسته پای ته رسېږي.

امریکا په ۲۰۱۸ کې له ایران سره له شوي اټمي تړونه بهر شوه.

طالبانو ته د روسیې له لوري د انعامونو په ورکړه د امریکايي جنرال شک

افغانستان کې امریکايي سرتېري

د امریکا د مرکزي قومندې مشر وايي، ډاډه نه دی چې له طالبانو سره اړوندو سخت دريځو ته د روسیې د انعامونو په نتیجه کې دې په افغانستان کې امریکايي سرتېري وژل شوي وي.

جنرال فرانک مکنزي پرون د جولای په اوومه خبريالانو ته وویل، که روسانو طالبانو ته پیسې ورکړي وي یا نه، طالبانو په تېرو څو کلونو کې د امریکا پر ضد د عملیاتو هڅې کړي دي.

د مکنزي په وینا، دا په دې مانا ده چې د امریکايي ځواکونو ایمني وضعیت دومره تغير نه دی کړی.

رسنیو د امریکايي چارواکو له قوله ویلي چې امریکا داسې معلومات تر لاسه کړي چې ښيي امکان شته روسیې له طالبانو سره اړوندو سخت دريځو ته پیسې ورکړي وي چې په افغانستان کې د امریکا په مشرۍ د ائتلاف ځواکونه ووژني.

د امریکا دفاع وزارت ویلي، د دغو ادعاوو د تايید لپاره هېڅ ثبوت په لاس کې نه لري.

نیویارک ټایمز ورځپاڼې لومړی ځل د جون په ۲۶ په دې اړه راپور ورکړ.

خو د امریکا ولسمشر ډونالډ ټرمپ، روسیې او طالبانو دا راپور رد کړ.

سایبریا کې د تودوخې درجه زیاته شوې

ساینسپوهان وايي، دا د اقلیمي بدلون پر لور یو جدي خبرداری دی.

په جون میاشت کې ګرمې هوا په سایبریا کې د تودوخې درجه تر بل هر وخت زیاته کړې ده.

ساینسپوهان وايي، دا د اقلیمي بدلون پر لور یو جدي خبرداری دی.

د کاپرنیکَس اقلیمي بدلون خدماتو ادارې پرون د سې شنبې په ورځ په یوه اعلامیه کې وویل چې تېره جون میاشت د روسیې په سایبریا سیمه کې تر ټولو توده وه چېرته چې د تودوخې درجه په اوسط ډول پنځه درجې سلسیس زیاته وه او د ۲۰۱۸ میلادي او ۲۰۱۹ میلادي کال د جون میاشتو په پرتله یوه درجه زیاته وه چې په دغو دوو کلونو کې هم په جون میاشت کې هوا ډېره توده وه.

د کرونا په خاطر د اوښتي اقتصادي زیان جبران لپاره د بریتانیا تازه ګام

ارشیف

د بریتانیا حکومت د کرونا ویروس په خاطر د اوښتي اقتصادي زیان د جبران لپاره بنسټیز لګښتونه په پام کې نیولي.

بریتانیايي چارواکي به نن چهارشنبه د کرونا وبا له امله د اوښتو اقتصادي زیانونو او د رامنځته شوي حالت د بدلون په هدف د بنسټیزو لګښتونو لپاره یوه وړه ځانګړې بودجه وړاندې کړي.

په دې بودجه کې ښوونځی، استوګنځایونه، د سړکونو ترمیم او عامه ټرانسپورت برخې شاملې دي.

په بریتانیا کې تر دې دمه څه باندې دوه لکه او ۸۷ زره کسان په کرونا اخته شوي چې له ډلې یې له ۴۴ زرو زیات انسانان مړه شوي.

دا په اروپا کې د کرونا له لاسه د مړینو تر ټولو لوړ شمېر دی.

اخوا بیا د امریکا متحده ایالاتو تېر یوه شپه او ورځ د کرونا وبا د مثبتو پېښو د زیاتېدو شاهد و.

هلته څه باندې ۶۰ زره کسان په ۲۴ ساعتونو کې په 'کووېډ-۱۹' ناروغۍ اخته شوي او د هغو چې بیا ساه ورکړې شمېر ۱،۱۱۴ ښودل شوی.

د امریکا د جانز هاپکنز پوهنتون شمېرې ښيي چې په امریکا متحده ایالتو کې درې میلیونه خلک په کرونا اخته شوي او د ټولو مړو شمېر یو لک او ۳۱ نیم زرو ته رسېدلی.

د نړۍ په ځینو نورو هېوادونو له هغې ډلې برازیل او هند کې هم کرونا بد حال جوړ کړی.

ورځ تر بلې په‌کې د مثبتو پېښو شمېر مخ په زیاتېدو دی.

په نړۍ کې ټول‌ټال نږدې ۱۱ میلیونه او اته لکه انسانان په کرونا اخته شوي چې له ډلې یې څه باندې پنځه لکه او ۴۳ زره مړه شوي او نږدې اووه میلیونه بېرته ښه شوي هم دي.

د صربیا ولسمشر د جولای له ۱۰مې ګرځ‌بندیز اعلان کړ

صربیا

وروسته له هغه چې په صربیا کې د 'کووېډ-۱۹' د ناروغانو مړینې زیاتې شوې، د دې هېواد ولسمشر الکساندر ووچیچ اعلان وکړ چې د جولای له ۱۰مې به په ټول هېواد کې ګرځ‌بندیز عملي شي.

ګرځ‌بندیز به د درې ورځو لپاره وي. ووچیچ د سې شنبې په ورځ (د جولای په اوومه) وویل چې په پلازمېنه بلګراد کې وضعیت بحراني دی او په ۱.۳ میلیونه نفوس لرونکي دې ښار کې شااوخوا ټول روغتونونه له ناروغانو ډک شوي دي.

د جون په ۲۱مه نېټه په دې هېواد کې ولسمشريز انتخابات وشول چې ووچیچ په اکثریت سره په‌کې رايې وګټلې.

چارواکي وایي د مارچ له شپږمې راهیسې په صربیا کې د 'کووېډ-۱۹' په نتیجه کې ۳۳۰ کسان مړه شوي او ۱۶،۷۱۹ کسان په دې ناروغۍ اخته شوي دي.

روسیې لږترلږه ۸ خبریالان توقیف کړي

روسیه

روسیې لږترلږه اته خبریالان توقیف کړي چې د ملي خیانت په تور يې د خپل همکار د نیول کېدو پر وړاندې لاریون کاوه.

دا کسان په مسکو کې نیول شوي چې د ایوان سفرونوف د توقيف پر ضد یې اعتراض کړی وو. ایوان سفرونوف د روسیې د دولتي فضايي ادارې د رئیس د سلاکار په توګه دنده درلوده.

د دې ادارې په اعلامیه کې راغلي چې سفرونوف د سې شنبې په ورځ (د جولای په اوومه) بندي شو، خو پر ده تورونه د ده له دندې سره تړاو نه‌لري.

د راپور له مخې دی د دوو میاشتو لپاره نیول شوی او ورباندې د ناټو غړو هېوادونو حکومتونو ته د نظامي محرمو معلوماتو ورکولو تور دی.

محکمې دی د سپټمبر تر شپږمې په زندان محکوم کړی دی. څارنوالان به دی په رسمي توګه د جولای په ۱۳مه نېټه مجرم وپېژني. د ده مدافع وکیل ویلي چې د استېناف محکمې ته به مراجعه وکړي.

که پر ده لګېدلي تورونه ثابت شي، دی په ۲۰ کاله بند محکومېدای شي.

د روسي تاریخ‌پوه دمیتري په بند محکومېدو په اړه د څارنوالانو غوښتنه

د روسیه بیرغ

په روسیه کې څارنوالانو له محکمې غوښتي چې روسی تاریخ‌پوه او د بشري حقونو مدافع یوري دمیتري په ۱۵ کاله بند محکوم کړي.

پر ده تور دی چې خپله لور یې په جنسي توګه ځورولې. دی او ملاتړي يې دا تورونه ردوي.

څارنوالانو په مسکو کې د کاریلیا څانګې د بشري حقونو د یاد ۶۴ کلن مدافع د محاکمې په وروستي پړاو کې د سې شنبې په ورځ (د جولای په اوومه) ګډون وکړ.

د دمیتري ملاتړي وايي چې پر ده دا تورونه ځکه لګول شوي چې ده د تاریخ داسې اړخ څېړلی چې د شوروي اتحاد هغه ستروالی چې کرملېن‌یې ښيي، تر سیوري لاندې راولي.

دمیتري لسیزې څېړنه کړې چې د شوروي اتحاد د دیکتاتور جوزف سټالین جرمونه بربنډ کړي، خو د ولادیمیر پوتین حکومت د دمیتري دا عمل تېری ګڼي.

په مې میاشت کې لسګونه روسي عالمانو، تاریخ‌پوهانو، لیکوالانو، شاعرانو او سیاسي مخالفانو د کاریلیا عالي محکمې ته یو لیک ولېږه او په‌کې يې د دمیتري د راخوشې کولو غوښتنه وکړه.

اروپايي ټولنې له روسي چارواکو غوښتي چې دمیتري راخوشې کړي.

دی په خپل کمپیوټر کې د خپلې لور د ناوړه عکسونو ساتلو په تور په ۲۰۱۶م کال کې ونیول شو. ده ورباندې لګېدلي تورونه رد کړي دي او ویلي يې دي چې دا عکسونه ناوړه نه‌دي، بلکې د کوچنیانو د ښېګړې ادارې د دې کوچنۍ د روغتیايي ودې معلومولو په هدف ورڅخه غوښتي وو.

ایران د زاهدان-چابهار د رېل پټلۍ جوړولو کار پیل کړ

ارشیف

ایران د زاهدان او چابهار ترمنځ د رېل پټلۍ جوړولو کار پرون د سې شنبې په ورځ پیل کړ چې چابهار د ایران د رېل له شبکې سره وصل شي او په نتيجه کې يې افغانستان او منځنۍ اسیا هېوادونه له ازادو اقیانوسي اوبو سره وصل شي.

دا خبره د ایران دولتي رسنۍ ایرنا راپور کړې ده.

ایرنا خبري اژانس د دې هېواد د ښار جوړونې د وزیر محمد اسلامي له قوله ویلي چې دا پروژه د افغانستان، ایران او هندوستان ترمنځ درې اړخیزه موافقه پياوړې کوي.

راپور وايي چې د رېل دا پټلۍ به په ایران کې دننه د رېل په شبکه کې یو تحول رامنځته کړي او له افغانستان سره به د توکو او خدماتو د مبادلې په برخه کې مهم رول ولوبوي.

افغانستان چې مخکې یې له نړۍ سره د سوداګرۍ په برخه کې يې د راکړې ورکړې ډېره تکیه د پاکستان پر کراچۍ بندر کوله، په وروستیو کې د ایران د چابهار او منځنۍ اسیا د هېوادونو له لارې د نویو ټرانزیتي لارو موندلو او پرانیستلو لټه کړې او توانېدلی چې تر ډېره د پاکستان پر کراچۍ بندر خپله تکیه کمه کړي.

بخښنې نړیوال سازمان: پاکستان دې اسلام اباد کې د مندر جوړولو زمینه برابره کړي

په اسلام اباد کې د هندوانو لپاره د لومړني مندر د جوړولو پلانونه د پخواني صدراعظم نواز شریف د حکومت له خوا په ۲۰۱۷ میلادي کال کې منظور شوي وو.

د بخښنې نړیوال سازمان له پاکستانه غوښتنه وکړه، چې په پلازمېنه اسلام اباد کې د هندوانو د یوه عبادتځای یا مندر جوړولو ته زمینه برابره کړي.

دا په داسې حال کې ده، چې د اپوزیسون، مذهبي او سیاسي کړیو کې د دې پروژې په اړه مخالفتونه شته.

د بخښنې نړیوال سازمان نن په یوه ټویټ کې ویلي: "هرڅوک د مذهب او عقیدې ازادي لري، هغه حق چې د پاکستان اساسي قانون یې تضمین ورکړی دی."

دغه سازمان ویلي، د هندوانو د مندر د رغونې مخنیوی یو ناوړه عمل دی، چې باید ژر تر ژر ترې ډډه وشي.

په اسلام اباد کې د هندوانو لپاره د لومړني مندر د جوړولو پلانونه د پخواني صدراعظم نواز شریف د حکومت له خوا په ۲۰۱۷ میلادي کال کې منظور شوي وو.

د اوسني صدراعظم عمران خان حکومت د شري کرشنا مادیر په نوم د دغه مندر د جوړولو لپاره د نږدې ۶ لکه ډالرو په ارزښت مالي مرسته منظور کړه، خو مسلمانو مذهبي مشرانو، سیاستوالو او د عمران خان د متحد ګوند، مسلم لیګ (ق) رهبر د دغه پلان سخت مخالفت کړی دی.

وسله والو عراق کې یو سیاسي شنونکی وژلی

هشام الهاشمي

د عراق یو مخکښ سیاسي شنونکی پرون په پلازمېنه بغداد کې له خپل کور دباندې وژل شوی دی.

نوموړي ته تر دې مخکې د هغو ملېشه وو له خوا اخطارونه ورکړل شوي وو، چې ایران یې ملاتړ کوي.

پر موټرسایکل سپرو وسله والو پر ۴۷ کلن حشام الهاشمي تر ډزو وروسته له ساحې تښتېدلي دي.

حشام الهاشمي په عراق کې پر داعش یا اسلامي دولت ډلې، القاعده او نورو افراطي ډلو له پېژندل شویو منتقدانو ګڼل کېده.

دی وخت ناوخت پر ټلویزیونونو راڅرګندېده او دولتي چارواکو، خبریالانو او تحقیق کوونکو به وروسته د ده له تخصص څخه ګټه اخیستله.

دغه شنونکي په وروستیو کې د هغو ملېشه وو چې ایران یې ملاتړ کوي د ځواک پرضد او د عراق په سیاسي مشرتابه کې د اداري فساد پرضد هم خبرې کړې دي.

تر اوسه د دې وژنې مسوولیت چا نه دی منلی.

نور راوښيه

XS
SM
MD
LG