د ایران یو پخوانی قاضي چې د اداري فساد د تورونو له کبله د تهران تر تعقیب لاندې و، د رومانیا په پلازمېنه بخارست کې مړ موندل شوی دی.

په بخارست کې پولیس وايي، دغه ۵۲ کلن ایرانی پرون جمعه ظاهراً د هوټل له کړکۍ لاندې لوېدلی او مړ شوی دی.

دوی یوازې دومره ویلي چې دغه کس، د یوه بل هېواد په خاوره کې د جرمونو د ادعاوو له کبله، د هغه هېواد تر قضايي تعقیب لاندې و.

رسمي سرچینو ازادۍ راډیو ته تایید کړې چې طبي راپور ښيي دغه کس غلام رضا منصوري نومېږي، چې تېر کال د ۵۶۰زره ډالرو معادل د رشوت تر اخیستو وروسته له ایرانه تښتېدلی و.

منصوري په هغه ویډیو کې چې تېره اوونۍ یې انلاین خپره کړې وه دغه تورونه رد کړي وو او ویلی یې وو، له ایرانه د درملنې په نیت وتلی دی.

ده ویلي وو، د کرونا ویروس له کبله لګول شویو محدودیتونو ایران ته د ده د تګ مخه نیولې ده.

خو د خپل ځایځایګي په اړه یې په اړه یې معلومات نه وو ورکړي.

د یمن حوثي یاغیانو له سعودي عربستان سره د سولې د هوکړې په بدل کې د ۵۱ میلیارده ډالرو تاوان او د رسمیت پیژندنې غوښتنه کړې ده.

وال سټریټ ژورنال د سرچېنو په حواله لیکلي چې حوثیانو دا تاوان د سعودي د بمباریو او د یمن د ځینو سیمو د محاصرې د جبران لپاره غوښتی دی.

سعودي عربستان په دې وروستیو کې هڅه کوله چې له حوثیانو سره د مذاکراتو له لارې د سولې یوې هوکړې ته ورسیږي.

وال سټریټ ژورنال لیکلي چې د سعودي عربستان ولیعهد محمد بن سلمان ښايي د حوثیانو دا وړاندیزونه ونه مني.

حوثیانو په وروستیو میاشتو کې د سعودي پر نړیوالو هوايي ډګرونو او د تیلو پر تاسیساتو بریدونو ته زور ورکړی دی.

د جنوبي کوریا د دفاع وزارت اعلان کړی چې شمالي کوریا د دغه هېواد ختیځو اوبو ته څو توغندي توغولي دي.

دا اقدام په داسې حال کې شوی چې شمالي کوریا امریکا سره د خبرو اترو له بیا پیل سره مخالفت کړی او خپل توغندیز فعالیتونه‌یې زیات کړي دي.

د روېټرز خبري اژانس د راپور له مخې، د جنوبي کوریا دفاع وزارت د چهارشنبې په ورځ «د لړم/ عقرب ۱۳مه» اعلان وکړ چې پوځ‌یې څو توغندي کشف کړي چې د شمالي کوریا د ختیځ ساحل سوندوک سیمې څخه توغول شوي دي.

دا په تېره یوه میاشت کې د شمالي کوریا دا ډول څلورم پوځي تطبیقات ګڼل کېږي.

د جنوبي کوریا چارواکو ویلي چې د دغه هېواد او امریکا ځواکونه د دغو توغندیو د توغولو جزئیات ارزوي او د پیونګ‌یانګ د احتمالي اقداماتو پر وړاندې د غبرګون لپاره چمتووالی لري.

شمالي کوریا د روان میلادي کال په اوږدو کې هم د توغندیو څو ازموینې ترسره کړې دي.

د نویو توغندیو توغول د شمالي کوریا د مشر کېم جونګ اون د خور کېم یو جونګ له څرګندونو څو ساعته وروسته ترسره شوي دي.

هغې ویلي چې تر هغه وخته به پیونګ‌یانګ له واشنګټن سره خبرې ونه‌کړي، څو چې امریکا د هغې په وینا خپله دښمنانه پالېسي بدله نه‌کړي.

دا په داسې حال کې ده چې د امریکا ولسمشر ډونالد ټرمپ تر دې وړاندې د روان کال تر پایه د شمالي کوریا له مشر سره بیا لیدنې ته لېوالتیا ښودلې.

ټاکل شوې چې قطر د ۲۰۲۷ کال د اګسټ له ۲۷مې څخه د سپټمبر تر ۱۲مې پورې د بسکټبال د نړیوال جام سیالیو کوربه وي.

په دې سره به قطر لومړنی عربي هېواد وي چې د بسکټبال د نړیوال جام سیالۍ کوربه‌توب کوي.

د بسکټبال د نړیوال فدراسیون (اېف‌ای‌بي‌اې) د معلوماتو له مخې، په دغو سیالیو کې به د ۳۲ هېوادونو ملي لوبډلې ګډون وکړي او په ټولیز ډول به ۹۲ لوبې ترسره شي.

د نارینه‌وو د بسکټبال نړیوال جام تر دې وړاندې د نړۍ په بېلابېلو هېوادونو کې ترسره شوی دی.

دغه سیالۍ په ۱۹۵۰ کال کې پیل شوې او لومړی پړاو یې د ارجنټاین په هېواد کې ترسره شوی و.

د امریکا په منځمهاله ټاکنو کې د ډموکراتانو له بریا وروسته د نړۍ په مالي بازارونو کې بدلون راغلی دی.

د رویترز خبري اژانس د راپور له مخې، نن چهارشنبې د اروپا په بازارونو کې د ونډو ارزښت لوړ شوی او د نرۍ په بازارونو کې د ډالرو بیه ښکته شوې ده.

پانګوال اندېښمن دي چې ښايي ډموکراتان د مصنوعي ځیرکتیا تکنالوژۍ پر شرکتونو سخت قوانین وضعه کړي.

له ټاکنو وروسته د تیلو بیې هم ښکته تللي دي.

نن په بازارونو کې د تیلو د یوې بوشکې بیه ۱۰۳ ډالرو ته راښکته شوه، په داسې حال کې چې په وروستیو کې یې بیه تر ۱۱۷ ډالرو پورته تللې وه.

په امریکا کې د منځمهاله ټاکنو پایلې ښیي چې ډموکراتانو د کانګرس په دواړو جرګو کې اکثریت ګټلی دی.

په پرونیو ټاکنو کې ډموکراتان واتونیدل چې د ولسمشر ډونالډ ټرمپ په مشرۍ له جمهوري غوښتونکو د کانګرس د دواړو جرګو( استازو او سنا) واک ترلاسه کړي.

د دې ټاکنو پایلې به ډموکراتانو ته د فدرالي لګښتونو، اداري څارنې او د راتلونکي ولسمشر په ټاکنه کې واک ورکړي.

د نیویارک ټایمز د راپور له مخې، ولسمشر ټرمپ ویلي چمتو دی چې د ټاکنو پایلې ومني او له ډموکراتانو سره ګډ کار وکړي.

د ډموکراتانو د بریا سربیره ولسمشر ټرمپ به په ډیپلوماټیکو اړیکو او د پوځي عملیاتو په برخه کې پراخ صلاحیتونه ولري.

په پرونیو ټاکنو کې د استازو جرګې ټولو ۴۳۵ څوکیو او په سنا کې له ۱۰۰ څوکیو څخه ۳۵ هغو ته سیالۍ ترسره شوې.

سربیره پردې، په یو شمیر ایالتونو کې د والیانو او بیلابیلو سیمه ایزو چارواکو لپاره هم ټاکنې وشوې.

د امریکا ولسمشر ډونالډ ټرمپ وايي، واشنګټن پر ایران د برید هیڅ پلان نه لري.

ټرمپ فایننشال ټایمز ورځپانې سره په هغه مرکه کې چې نن خپره شوې پر ایران د هر ډول بریدونو احتمال رد کړی دی.

هغه وړاندې ویلي چې له ایران سره د اټومي پروګرام د غني کولو په اړه خبرې اترې روانې دي.

قطر په وروستیو کې د امریکا او ایران ترمنځ د خبرو اترو منځګړیتوب کوي.

د امریکا په منځمهاله ټاکنو کې د ډیموکرات ګوند بریا

په پرونیو ټاکنو کې په ټوله امریکا کې د رای ورکولو په مرکزونو کې ډير شمیر خلکو ډیموکراتانو ته رای ورکړې او دې ګوند د ولسمشر ډونالډ ټرمپ په مشرۍ له جمهوري غوښتونکو د دواړو جرګو( استازو او سنا) واک ترلاسه کړي دی.

د دې ټاکنو پایلې به ډیموکراتانو ته د فدرالي لګښتونو، اداري څارنې او د راتلونکي ولسمشر په ټاکنه کې واک ورکړي.

د ازادي راډیو د خبري مرکزي څانګې د نیویارک ټایمز په حواله لیکلي چې ولسمشر ټرمپ ویلي چمتو دی چې د ټاکنو پایلې ومني او له ډیموکراتانو سره ګډ کار وکړي.

په پرونیو ټاکنو کې د استازو جرګې ټولې ۴۳۵ څوکۍ او په سنا کې له ۱۰۰ څوکیو څخه ۳۵ څوکۍ د سیالۍ لپاره وړاندې شوي وې.

سربیره پردې، په یو شمیر ایالتونو کې د والیانو او بیلابیلو سیمه ایزو چارواکو لپاره هم ټاکنې ترسره شوې.

ټاکل شوې د امریکا په منځګړیتوب د روسیې او اوکراین استازي د نومبر په ۱۰مه او ۱۱مه د متحده عربي اماراتو په پلازمېنه ابوظبي کې د سولې د خبرو نوی پړاو پیل کړي.

د امریکا ځانګړي استازي سټیو ویټکاف ویلي، په دغو درې اړخیزو خبرو کې به چې دی او جرډ کوشنر د امریکا استازیتوب کوي، له جګړې وروسته پر امنیتي ترتیباتو، د تاوتریخوالي پر کمولو، بشري مرستو او سولې ته د رسېدو پر راتلونکو ګامونو بحث وشي.

د راپور له مخې، د روسیې ولسمشر ولادیمیر پوتین هم له ویټکاف سره تر لیدنې وروسته د دغو درې اړخیزو خبرو له ترسره کېدو سره موافقه کړې ده.

دا هڅې وروسته له هغې کېږي چې تېره اوونۍ د امریکا په منځګړیتوب لنډمهاله اوربند د روسیې له‌خوا اشغال شوي د اوکراین په اولیشکي ښار کې د بشري مرستو او د ملکي وګړو د ایستلو زمینه برابره کړه، خو کرملېن ویلي، دغه اوربند په دې معنی نه‌دی چې مسکو پراخ اوربند ته چمتو دی.

د افغانستان او زېمبابوې د کرکټ ملي لوبډلې به د پنجشنبې په ورځ «د لړم په ۱۴مه» د متحده عربي اماراتو په شارجه کې خپله لومړۍ ټېسټ لوبه پیل کړي.

د کرېک‌اېنفو د معلوماتو له مخې، دا پنځه ورځنۍ لوبه به د لړم تر ۱۹مې دوام وکړي.

د دواړو هېوادونو دوهمه ټېسټ لوبه به د لړم په ۲۲مه پیل شي.

افغانستان په دې وروستیو کې له زېمبابوې سره د شل اوریزو سیالیو درې واړه لوبې ګټلې دي.

افغان لوبډلې په لومړۍ لوبه کې زېمبابوې ته د ۳۷ منډو، په دوهمه کې د ۱۹ منډو او په درېیمه کې د اوو وېکټو په توپیر ماتې ورکړه او د سیالیو لړۍ یې درې پر صفر وګټله.

د اسیا د فوټبال کنفدراسیون اعلان کړی چې په سعودي عربستان کې د ۲۰۲۷ کال د اسیا جام سیالۍ د سیمه‌‌ییزو امنیتي اندېښنو له امله نږدې یو کال ځنډول شوې دي.

ټاکل شوې وه چې دا سیالۍ د راتلونکي کال د جنورۍ له اوومې د فبرورۍ تر پنځمې ترسره شي، خو د نوي مهالوېش له مخې به د ۲۰۲۷ کال د ډسمبر پر ۲۳مه پیل او د ۲۰۲۸ کال د جنورۍ پر ۲۱مه پای ته ورسېږي.

د اسیا د فوټبال کنفدراسیون نن سې ‌شنبه «د لړم په ۱۲مه» وویل چې د سیمې استثنايي وضعیت، د سفرونو ګډوډۍ او لوژستیکي ستونزو ته په پام‌یې دا پرېکړه کړې ده.

دا پرېکړه وروسته له هغه شوې چې د یمن حوثي یاغیانو په وروستیو اوونیو کې پر سعودي عربستان بریدونه کړي دي.

د اسیا جام سیالیو کې به ۲۴ ملي لوبډلې برخه واخلي او لوبې به په ریاض، جدې او الخبر ښارونو کې ترسره شي.

نوی مهالوېش لا د فوټبال د نړیوال فدراسیون (فیفا) تصویب ته اړتیا لري.