د لاسرسۍ وړ لېنکونه

تازه خبر
شنبه ۹ زمری ۱۴۰۰ کابل ۰۸:۱۴

نړۍ

اروپايي ټولنې پر روسیې لګول شوي اقتصادي بندیزونه تمدید کړل

د عکس ښي لور ته د فرانسې ولسمشر ایمانول مکرون او چپ طرف ته د جرمني صدراعظمه انګېلامېرکل

د اروپایي ټولنې مشرانو نن د اوکراین په شخړه کې د ښکېلوالي له کبله پر روسیې د لګول شویو اقتصادي بندیزونو د شپږ میاشتني تمدید ملاتړ وکړ.

د فرانسې ولسمشر ایمانول مکرون او د جرمني صدر اعظمې انګېلا مېرکل نن د اروپایي ټولنې په سرمشریزه کې وویل، د منسک په تړون کې هېڅ پرمختګ نه دی شوی.

پر روسیې دغه بندیزونه د لومړي ځل لپاره په ۲۰۱۴ کال کې هغه مهال ولګېدل چې دغه هېواد د اوکراین کریمیا ټاپووزمه له خپلې خاورې سره یوځاې کړې.

د دغو بندیزونو موده د جولای په ۳۱مه پای ته رسېږي.

پر روسیې تور دی چې د اوکراین په ختیځ کې روسي پلوه بیلتون غوښتونکو سره پوځي مرسته کوي، د اوکراین د ختیځ په شخړو کې تراوسه څه باندې ۱۳ زره کسان وژل شوي دي.

د ورځې تازه خبرونه دلته ولولئ

د عراق پوځ: د جنازې پر مراسمو برید کې ځینې کسان وژل شوي

ارشیف

د عراق پوځ په یوه اعلامیه کې وویل، د دغه هېواد په شمال کې د جنازې پر مراسمو په برید کې ځینې کسان وژل شوي دي.

د عراق یوه امنیتي مسوول ویلي، د پولیسو او ملکیانو په ګډون اته کسان هغه وخت ووژل شول چې افراطي وسله والو د خلکو پر یوه ډله ډزې وکړې.

دغه چارواکي د نوم نه ښوولو په شرط ویلي چې دا برید داعش ډلې کړی دی.

دوې اوونۍ مخکې د عراق په پلازمېنه بغداد کې پر یوه بازار په ځانمرګي برید کې لږ تر لږه ۳۰ کسان وژل شوي او تر ۵۰ زیات نور ټپیان شوي وو.

بله حمله په جنورۍ میاشت کې شوې وه چې ۳۲ تنه یې وژلي او ۱۱۰ تنه نور ټپیان کړي وو.

د هغو دوو حملو مسوولیت داعش ډلې منلی و.

د عراق چارواکو د ۲۰۱۷میلادي کال په ډسمبر میاشت کې له داعش ډلې د زیاتو سیمو تر نیولو وروسته د دې افراطي ډلې په وړاندې د بریا اعلان کړی و.

له هغې راهیسې داعش ډله په عراق کې خال- خال حملې کوي.

د عمان سمندرګي کې پر ټانکر برید؛ امریکا: ښايي بې پیلوټه الوتکې کړی وي

ارشیف، عکس تزئیني بڼه لري

د امریکا د متحدو ایالاتونو سمندري ځواکونو نن شنبه (د زمري ۹مه) وویل، د دوی د متخصصانو په باور د عمان د خلیج په سواحلو کې د تېلو پر یوه ټانکر ښايي د بې پېلوټه الوتکې له خوا حمله شوي وي.

تر دې مخکې اسراییل د تېلو پر یوه ټانکر په برید کې ایران دخیل بللی و، خو ایران تر اوسه په رسمي ډول په دې باب څه نه دي ویلي.

په دې حمله کې دوه تنه وژل شوي چې ویل کېږي یو یې د رومانیا او بل د بریتانیا دی. د دې ټانکر چارې د اسراییل په لاس کې وې.

زودیاک شرکت چې مرکز یې په لندن کې دی، ویلي دي چې پر دې ټانکر د لایبریا بیرغ رپېده او د پنجشنبې په ورځ حمله پرې وشوه.

د اسراییل د بهرنیو چارو وزیر یاییر لاپید ایران په دې پیښه کې دخیل ګڼلی دی، ده خپل بریتانیایي سیال ته وویل چې په کار ده دې پیښې ته ځواب ورکړل شي.

ایران تر اوسه په رسمي ډول په دې باب څه نه دي ویلي.

العالم ټلوېزیون چې په عربي ژبه خپرونې کوي او د ایران د حکومت دی، د یوې نامعلومې سرچینې په وینا خبر ورکړی چې دا حمله په سوریه کې پر یوه هوایي ډګر د اسراییل د مشکوک برید په ځواب کې شوې ده.

قریشي: د پاکستان دښمنان د چینایي شرکتونو کار کوونکي په نښه کوي

د پاکستان د بهرنیو چارو وزیر شاه محمود قریشي

د پاکستان د بهرنیو چارو وزیر تور لګولی چې د ده د هېواد دښمنان، د چینایي شرکتونو کار کوونکي په نښه کوي.

شاه محمود قریشي پرته له دې چې د کوم ځانګړي هېواد نوم یاد کړي وویل، په کراچۍ ښار کې د چهارشنبې ورځې برید چې دوه چینايي کارګران یې ټپیان کړل او پر یوه بس د دوو اونیو مخکې چاودنه چې نهه چینايي وګړي یې ووژل د پاکستان روحیه نه شي کمزورې کولای.

د چهارشنبې ورځې د وسله وال برید په اړه د پاکستاني پولیسو په لومړني راپور کې ویل شوي و چې په دې پېښه کې یو تن ټپي شوي چینايی وګړی د کراچۍ د اټمي برښنا د بټۍ انجینر و، خو په دې پسې پولیسو په یوه بل راپور کې د اټمي بټۍ خبره واېستله او یوازې دومره یې وویل چې په برید کې دواړه وژل شوي چینایان د فابریکو کارګران وو.

چین په وروستیو څو کلونو کې په پاکستان کې د میلیاردونو ډالرو په ارزښت پانګونه کړې خو دې پانګونو د هغو بېلتونپالو ډلو مخالفتونه پارولي چې وايي، د دوی ولسونو ته د دې پروژو هېڅ ګټه نه رسېږي.

ترکیه کې له اویا په زیاتو سیمو کې اورونه لګېدلي

مدیترانې سمندرګي ته نژدې کې اورونه

د ترکیې په جنوب کې له تېرو دوو ورځو راهیسې د اور لګېدو دوام په سیمه کې د لسګونه کلیو او څو هوټلونه د وتلو باعث شو.

ترکي چارواکي وايي چې مدیترانې سمندرګي ته نژدې کې له اویا په زیاتو سیمو کې اورونه لګېدلي دي.

د ترکیې ولسمشر رجب طیب اردوغان پرون جمعه (د زمري ۸مه) وویل چې له دې ډلې په ۱۴ ځایونو کې اورونه لا هم بل دي.

انتالیا، مرمریز او موګله هغه ښارونه دي چې د راپورونو له مخې تر ټولو زیاته اورلګیدنه په کې شوې ده.

د ترکیې د ځنګلونو د ساتنې وزیر ویلي چې په لږ تر لږه ۷ ولایتونو کې د اور لګېدو پېښې شوي دي. د دې پېښو علت ظاهرا د هوا تودوخه بلل شوې ده.

د خلیج همکارۍ شورا: ایران دې د سیمې هېوادونو کورنیو چارو کې لاسوهنه ودروي

د خلیج د همکارۍ شورا یوه غونډه

د خلیج د همکارۍ شورا له ایران څخه وغوښتل چې د سیمې هېوادونو په کورنیو چارو کې لاسوهنه ودروي.

د خلیج د همکارۍ شورا سرمنشي نایف الحجرف پر ایران غږ وکړ چې د سیمې د هېوادونو په چارو کې د لاسوهنې د بس کولو ترڅنګ د «ترورېزم» ملاتړ ودروي.

ده د امریکا متحده ایالاتو او د خلیج د همکارۍ شورا ترمنځ همکارۍ د سیمې د امنیت او ثبات د پیاوړتیا لپاره اړینې وبللې.

سعودي عربستان او امریکا په ځلونو ایران تورن کړی چې حوثي یاغیانو ته وسلې ورکوي.

امریکا کې د بایډن تازه سپارښتنه: هر څوک چې کرونا واکسین کوي ۱۰۰ ډالره ورکړئ

د امریکا ولسمشر جو بایډن

د امریکا ولسمشر جو بایډن د خپل هېواد د ایالتونو والیانو ته سپارښتنه کړې چې د کرونا واکسین ته د خلکو د هڅولو لپاره هر چا ته چې واکسین کوي، ۱۰۰ ډالره ورکړي.

ده همداراز امر کړی، هغه دولتي کارکوونکي چې واکسین نه‌کوي باید پرله‌پسې ټستونه ورڅخه واخیستل شي او ماسک دې جبري شي.

د نویو مقرراتو پر اساس، که د فدرالي حکومت مأمورین د واکسین کارت ونه‌لري، باید تل ماسک ولري او مجبوره به وي چې پرله‌پسې ټسټ وکړي.

په متحده ایالاتو کې ۳۴۳ ملیون ډوزه واکسین تزریق شوی دی.

ترکیه کې اور لګېدو لږترلږه ۳ کسان مړه کړي او له ۱۰۰ زیات ټپیان دي

د ترکیې په جنوبي ساحل کې لګېدلی اور

د ترکیې په جنوبي ساحل کې د اور لګېدو په نتیجه کې لږترلږه ۳ کسان مړه شوي او تر ۱۰۰ زیات نور ټپیان شوي دي.

د مدیترانې سمندرګي په اوږدو کې د انتالیا په ختیځ کې دا تر ټولو پراخه اور لګېدنه بلل شوې ده.

په دې ځای کې خورا زیات هوټلونه او تفرېحي ځایونه شته.

دغه اور پرون پنجشنبه بل شو چې د مړه کولو لپاره‌یې په سلګونو اور وژونکي او څرخي الوتکې لاس په کار شوې دي.

بلېنکن: د اټمي موافقې پر سر ایران سره خبرې په نامحدود ډول دوام نه‌شي کولای

د امریکا د بهرنیو چارو وزیر انتوني بلېنکن پرون/ پنجشنبه په کوېټ کې یوې خبري غونډې ته د وینا پر مهال

د امریکا د بهرنیو چارو وزیر انتوني بلېنکن وايي، د اټمي موافقې پر سر له ایران سره د خبرو بهیر په نامحدود ډول دوام نه‌شي کولای او اوس هغه وخت دی چې ایران باید پرېکړه وکړي.

ده پرون/ پنجشنبه په کوېټ کې یوې خبري غونډې ته وویل، د امریکا متحده ایالاتو اټمي موافقې ته د بېرته ګرځېدو لپاره خپل ښه نیت او لېوالتیا ښوولې او اوس «توپ د ایران په میدان» کې دی.

ښاغلی بلېنکن زیاتوي: "حقیقت دا دی چې ایران باید پرېکړه وکړي، په دې اړه اساسي پرېکړه چې ایا غواړي خپلو ژمنو ته راوګرځي که نه، هېڅ انحراف دا اساسي واقعیت نه‌شي بدلولی. توپ د ایران په میدان کې دی، وبه ګورو چې دوی موافقې ته د بېرته راګرځېدو پرېکړې ته لازم چمتووالی لري که نه، موږ خبرو اترو ته ژمن یوو، خو دا بهیر په نامحدود ډول دوام نه‌شي کولای."

ایران او امریکا په موافقه کې د نورو شاملو غړو په منځکړیتوب د اتریش په پلازمېنه ویانا کې ۶ پړاوه غیر مستقیم خبرې کړي څو ایران په اټمي موافقه کې د خپلو ژمنو عملي کولو او د امریکا د بندیزونو نرمولو ته چمتو شي.

سویډني چارواکو یو شمېر توقیف شوي افغان پناه غوښتونکي خوشې کړل

ارشیف، د سویډن پولیس

سویډني چارواکو یو شمېر افغان پناه غوښتونکي چې د پناه غوښتنلیکونه‌یې رد شوي وو او په توقیف کې ول، خوشې کړل.

د سویډن د راډیو له راپور سره سم، ټاکل شوه چې دا کسان د روانې جولای میاشتې په لومړیو کې افغانستان ته واستول شي، خو سویډن د افغانستان حالاتو ته په کتو د پناه غوښتونکو د بېرته لېږلو پرېکړه واخیسته او نیول شوي کسان‌یې خوشې کړل.

تر دې وړاندې د افغانستان حکومت له اروپايي هېوادونو غوښتي وو چې د افغان پناه غوښتونکو د بېرته ستنولو بهیر د درې میاشتو لپاره وځنډوي ځکه چې د طالبانو بریدونه زیات شوي دي.

نړۍ کې تر اوسه د کرونا تر ۴ میلیارد ډوزه زیات واکسین شوی

د کرونا ویروس ضد واکسین د تطبیق لړۍ

د راپورونو له مخې، تر اوسه پورې په نړۍ کې د کرونا تر ۴ میلیارد ډوزه زیات واکسین شوی دی.

د فرانس پرس خبري اژانس د راپور له مخې، د رسمي شمېرو پر اساس، د اروپا په وخت د پنجشنبې تر ماسپښینه د جولای ۲۹مې پورې په درسته نړۍ کې د کرونا ویروس پر ضد ۴ میلیارده او ۳۰۲ زره ډوزه واکسین خلکو ته ورکړل شوی دی.

په چین کې چې د نړۍ تر ټولو ګڼ نفوسه هېواد دی، یو میلیارد او ۶۰۰ ډوزه،، په هند کې چې د نفوس له پلوه د نړۍ دوهم ستر هېواد دی، ۴۵۱ ملیون ډوزه او په متحده ایالاتو کې ۳۴۳ ملیون ډوزه واکسین تزریق شوی دی.

په راپور کې ویل شوي چې لا هم د نړۍ بې‌وزله هېوادونه د واکسین له کموالي سره مخامخ دي.

۸،۲ رښتر درجې زلزلې د الاسکا ټاپو وزمه ولړزوله

ارشیف، د الاسکا ټاپو وزمې یوه څنډه

د رښتر په کچه ۸،۲ درجې زلزلې نن د الاسکا ټاپو وزمه لړزولې ده او په پاسیفیک سیمه کې د څونامي د خبرداري سبب شوې.

د امریکا د جیولوژیکي سروې ادارې نن وویل، د ۳۵ کلیو مترو په ژورتیا دا زلزله د الاسکا د تر ټولو لوی ښار پیري ویل په ۹۱ کیلومترۍ کې جنوب لوري ته شوې ده.

د دې ادارې په وینا په سیمه کې دوه ځلې تر زلزلې وروسته ټکانونه هم احساس شوي دي.

تر اوسه پورې د مرګ‌ژوبلې یا زیانونو په اړه څه نه‌دي ویل شوي.

د الاسکا په جنوبي برخو، د الاسکا په ټاپو وزمه او د پاسیفیک په ساحلي سیمو کې د څونامي خبرداري ورکړل شوي دي.

اوکراین کې د الوتکې د لوېدو پېښې یو پیلوټ او ۳ امریکایان ووژل

اوکراین کې لویدلې الوتکه

د اوکراین په لویدېځ کې د یوې وړې الوتکې د لوېدو په پېښه کې یو ځایي پیلوټ او درې امریکایان وژل شوي دي.

پولیسو ویلي چې دا الوتکه په ځایي وخت غرمه مهال په ایوانو فرنکیوسک سیمه کې له یوه کور سره ولګېده.

وژل شوي امریکایي مسافر د امریکا هسدیک یهودان بلل شوي دي، دا خبره د اوکراین د یهودانو متحدې ټولنې کړې ده.

د پولیسو په وینا له هغه کوره چې دا الوتکه پرې لګېدلې، یوه مېرمن او دوه ماشومان روغ وتلي دي.

جو بایډن د بلاروس د اپوزسیون له مشرې سره وکتل

د امریکا د متحد ایالاتونو ولسمشر جو بایډن او د بلاروس د اپوزسیون مشره سویتلانا څخانوسکایا

د امریکا د متحد ایالاتونو ولسمشر د بلاروس د اپوزسیون له مشرې سره چې په جلاوطني کې ژوند کوي، په سپینه ماڼۍ کې وکتل.

جوبایډن تر دې غونډې وروسته وویل، امریکا د بلاروس له ولس سره ولاړه ده.

ترغونډې وروسته سویتلانا څخانوسکایا وویل چې خپل پيغام یې د امریکا تر ولسمشره ورساوه: "د دې لپاره چې د ولسمشر کاري پروګرام ډېر بوخت دی. موږ ډېر وخت نه درلود، شااوخوا پنځلس دقیقې مو خبرې وکړې، خو دا ډېر تود هرکلی و. ما داسې څوک ولیدل چې بې تفاوته نه دی، هغه څه چې په بلاروس کې پېښیږي هغه ته بې تفاوته نه دی."

څخانوسکایا زیاته کړه چې ولسمشربایډن ورته ویلي دي چې په بلاروس کې مبارزه د سیاسي جغرافیې لپاره نه ده، هلته د شخړو او بې قانوني پرضد مبارزه ده.

په بلاروس کې وروسته تردې کړکېچ رامنځته شو چې الکساندرلوکاشینکا پروسږکال د اګست د میاشتې په انتخاباتو کې د شپږم ځل لپاره د ولسمشر په توګه اعلان شو.

د ده مخالفان وایي چې دې انتخاباتو کې درغلۍ شوي دي او څخانوسکایا په کې بریالۍ شوې وه.

مېرمن څخانوسکایا غواړي چې بیا انتخابات وشي.

امریکا او هند ژمنه وکړه چې خپل امنیتي مشارکت به پراخوي

انتوني بلېنکن او اېس جی شنکر پرون په نوي ډیلي کې سره وکتل

د امریکا د متحد ایالاتونو او هند د بهرنیو چارو وزیرانو ژمنه وکړه چې خپل امنیتي مشارکت به پراخوي.

انتوني بلېنکن او اېس جی شنکر پرون په نوي ډیلي کې سره وکتل. ښاغلي بلېنکن وویل، د افغانستان په ثبات کې د هند ونډه مهمه ده.

د بلېنکن او شنکر ترمنځ دا غونډه په داسې حال کې وشوه چې له افغانستانه د نړیوالو ځواکونو له وتلو سره چین په سیمه کې د خپل نفوذ د پراختیا هڅو ته مخه کړې ده.

د امریکا د بهرنیو چارو وزیرخبریالانو ته وویل، د امریکا او هند اړیکي د اهمیت له پلوه په نړۍ کې بې ساري دي.

ده زیاته کړه چې امریکا او هند به د افغانانو د لاسته راوړنو د خوندیتوب او په سیمه کې د ثبات لپاره خپلو هڅو ته له افغانستانه د نړیوالو ځواکونو تر وتلو وروسته هم ادامه ورکوي.

د هند د بهرنیو چارو وزیر اېس جی شنکر بیا وویل چې نړیواله ټولنه یو خپلواک، ډموکراتیک او باثباته افغانستان غواړي چې له ګاونډیانو سره په سوله کې وي.

د شمالي او جنوبي کوریاوو ترمنځ بیا تماسونه پیل شول

د شمالي کوریا مشر

د شمالي او جنوبي کوریاوو ترمنځ له ۱۴ میاشتې وروسته تماسونه بیا پیل شول.

د شمالي کوریا مشرانو تېرکال په یوه غونډه کې چې د دغه هېواد د مشر خور هم په کې ګډون درلود، له جنوبي کوریا سره د اړیکو لیکه او له سیول سره تماسونه پرې کړل.

خو اوس شمالي کوریا بیا پرېکړه کړې چې له جنوبي کوریا سره تماسونه پیل کړي.

د جنوبي کوریا خبري اژانس یونهاپ پرون راپور ورکړ چې د دوو هېوادونو ترمنځ د تماسونو د بیا پیلېدو پرېکړه د دوو هېوادونو د مشرانو له موافقې وروسته شوې ده.

د شمالي کوریا رسمي خبري اژانس هم د دوو هېوادونو ترمنځ د تماسونو بیا پیلېدا تایید کړې ده.

نور راوښيه

XS
SM
MD
LG