د لاسرسۍ وړ لېنکونه

تازه خبر
دوشنبه ۲۳ چنګاښ ۱۳۹۹ کابل ۰۹:۵۴

افغانستان

مکنزي: افغانستان کې د امریکايي سرتېرو شمېر راکم شوی

آرشیف

د امریکا متحده ایالتونو د طالبانو سره په تېر فبرورۍ کې د لاسلیک کړي تړون د یوې برخې په توګه افغانستان کې د خپلو سرتېرو شمېر ۸۶۰۰ تنو ته راکم کړی.

دا خبره امریکايي جنرال فرانک مکنزي چې په سیمه کې د امریکايي سرتېرو څارنه کوي، د پنجشبې په ورځ کړې ده.

د اسوشیتد پریس خبري اژانس وايي، جنرال مکنزي دا څرګنده نه کړه چې کله او په کومه برخه کې به نور امریکايي سرتېري راکم شي.

هغه یادونه وکړه چې د طالبانو سره د لاسلیک شوې تړون له مخې باید امریکا د راتلونکې کال تر مې میاشتې له افغانستان څخه خپل ټول سرتېري وباسي، خو ویې وویل دا داسې تعهد دی چې پوره کول به یې د طالبانو له خو په یو لړ اقداماتو پورې تړلي وي.

دې امریکايي جنرال پرته له دې چې په مستقیمه توګه د ۸۶۰۰ سرتېرو د شمېر یادونه وکړي وویل: "موږ د فبرورۍ د میاشتې د هوکړې سره سم شمير کې یوو."

د طالبانو او امریکا ترمنځ فبرورۍ میاشت کې لاسلیک شوې تړون له مخې باید په افغانستان کې په ۱۳۵ ورځو کې د جولای نیمايي کې پوره کېږي، د امریکايي سرتېرو شمېر ۸۶۰۰ سرتېرو ته راکم شي.

د هوکړې د لاسلیک پر مهال افغانستان کې د امریکايي سرتېرو شمېر دولس زره وو، او کمېدل یې له همدې شمېر حسابېږي.

د اسوشیتید پریس خبري اژانس وايي، جنرال مکنزي د اسپین د ستراتیژۍ د ډلې په غونډه کې وویل: "موږ ( له طالبانو سره ) دهوکړې خپله برخه پوره کړې ده."

مکنزي ویلي، که شرایط سم وي، ټول امریکايي سرتېري به له افغانستان څخه ووځي.

د نوموړې په وینا هغه شرایط چې دوی به قانع کړي دا دي چې له افغانستان څخه به په امریکا بریدونه نه کېږي.

جنرال مکنزي زیاته کړه دا طالبان نه دي بلکې معلومه خبره ده چې دا القاعده او داعش دي.

دې امریکايي وویل: "موږ طالبان څارو."

د هغه په وینا هغوی تر اوسه قضیه بشپړه کړې نه ده او لا هم ورته فرصت شته چې بشپړه یې کړي خو خبرداری یې ورکړ چې وخت په کمېدو دی.

طالبانو د فبروۍ د تړون له مخې ژمنه کړې چې د افغانستان پر خاوره به هغه سخت دریځي نه پرېږدي چې په امریکا او متحدانو یې بریدونه کوي.

د ورځې تازه خبرونه دلته ولولئ

غزني کې دوه قومي مشران ووژل شول

غزني ښار

په غزني کې وسله‌والو دوه تنه قومي مشران وژلي دي.

دا پېښه نن سهار شاوخوا ۱۰ بجې د غزني د مرکز اړوند په ده خدایداد کلي کې شوې ده.

د غزني د والي ویاند واحدالله جعمه‌زاده د دې پېښې په اړه ازادي راډیو ته وویل: "پخوانی جهادي قوماندان او قومي مشر ایوب خان نیازی او یو بل قومي مشر په خپل کلي کې یوځای وژل شوي دي."

د جمعه‌زاده په وینا وسله‌وال د پېښې له ځایه تېښتېدلي او په دې اړه پلټنه پیل شوې ده.

په غزني کې ډېری وخت په وسله‌والو بریدونو کې قومي مشران، دیني عالمان، مدني فعالان، ځوانان او ولسي خلک وژل کېږي چې د اکثرو دا ډول پېښو مسؤلیت څوک یا کومه وسله‌واله ډله نه‌اخلي.

پاکستان د افغان محصولاتو د صادراتو لپاره واګه بندر خلاصوي

واګه

پاکستان اجازه ورکوي چې د افغانستان محصولات د واګه بندر له لارې هند ته صادر شي.

دا خبره د افغانستان لپاره د هغه هېواد د صدراعظم ځانګړي استازي محمد صادق نن په خپله تویټرپاڼه کې کړې او ویلي یې دي چې دغه پرېکړه د دې لپاره شوې چې د افغانستان د سوداګرۍ د ټرانزیت په برخه کې اسانتیا رامنځته شي.

هغه ویلي چې د 'کووېډ-۱۹' ناروغۍ ته په پام د مقرراتو له عملي کېدو وروسته دغه بندر به بل سبا د جولای له ۱۵مې د افغان صادراتو پر مخ پرانیستی وي.

د ښاغلي صادق په وینا هېواد یې له افغانستان سره دوه اړخیزه سوداګري او د ټرانزیت ټول سرحدي بندرونه بېرته پرانیستي دي.

شاوخوا درې اوونۍ مخکې هندوستان ټایمز ورځپاڼې د هندي چارواکو له قوله خبر ورکړی و چې ویلي و، د واګه بندر له لارې به له افغانستان سره د هند سوداګري ډېر ژر بېرته پیل شي.

'کندز کې د طالبانو بریدونو کې دولتي ځواکونه او ملکي وګړي وژل شوي'

ارشیف، کندز کې د طالبانو ضد عملیات

د کندز چارواکي په دې ولایت کې د وسله‌والو طالبانو په نویو بریدونو کې د یو شمېر دولتي ځواکونو او ملکي وګړو د وژل کېدو خبره کوي.

د کندز ولایت د ولایتي شورا رئیس محمد یوسف ایوبي نن ازادي راډيو ته وویل چې تېره شپه ۹ بجې وسله‌والو طالبانو د امام صاحب ولسوالۍ ښار روضې ته نږدې د دولتي ځواکونو پر پوستو برdدونه وکړل چې په نتیجه کې یې دوi تنه ملکي وګړي او ۱۵ تنه دولتي ځواکونه وژل شوي دي.

د هغه په وینا په وژل شویو کې د ملي اردو، د ملي پولیسو، د سیمه‌ییزو پولیسو او د ولسي پاڅون کوونکو سرتېري شامل دي.

د کندز د والي ویاند عصمت‌الله مرادي هم دا پېښه تأییدوي، خو دولتي ځواکونو ته اوښتې مرګ‌ژوبله کمه بولي.

نوموړی وایي چې په چهاردره ولسوالۍ کې د ملي اردو درې سرتېري او د محلي پولیسو درې سرتېري وژل شوي او په امام صاحب ولسوالۍ کې هم د ملي اردو ۴ سرتېري او ۴ تنه ملي پولیس وژل شوي دي.

د ښاغلي مرادي په وینا، په دغو نښتو کې ۳ تنه طالبان وژل شوي او ۴ تنه‌یې هم ټپیان شوي دي.

تر اوسه پورې په دې اړه وسله‌والو طالبانو څه نه‌دي ویلي.

'کندهار او زابل کې د طالبانو یو قوماندان او ۱۲ وسله‌والو وژل شوي'

ارشیف

امنیتي چارواکي د کندهار په ښورابک او د زابل په ارغنداب ولسوالیو کې د طالبانو د یوه قوماندان په ګډون د ۱۲ وسله‌والو د وژل کېدو او د ۹ نورو د ټپي کېدو خبر ورکوي.

د کندهار د امنیه قوماندانۍ ویاند جمال ناصر بارکزي ازادي رادیو ته وویل چې تېره شپه ۱۰ بجې وسله‌والو طالبانو د کندهار د ښورابک ولسوالۍ پر امنیتي پوستو حمله وکړه چې د پولیسو په ځوابي برید کې ۱۱ وسله‌وال وژل شوي او پنځه نور ټپیان شوي دي.

بل‌خوا د افغانستان دفاع وزارت د زابل په ارغنداب ولسوالۍ کې د کاظم په نوم د وسله‌والو طالبانو د یوه قوماندان د وژل کېدو او څلورو نورو د ټپي کېدو خبر ورکوي.

وسله‌والو طالبانو تر اوسه په دې اړه څه نه‌دي ویلي.

پنجشېر کې سېلاب د دغه ولایت لویه لاره د ټرافیکو پر مخ تړلې

په پنجشیر کې سیلاب

په پنجشېر ولایت کې د سېلاب له امله د دې ولایت لویه لاره د ټرافیکو پر مخ تړل شوې ده.

د ازادي راډیو د سیمه‌ییزخبریال د راپور له مخې په سیمه کې تېره نیمه شپه سخت باران پیل شوی و چې تر نن غرمې پورې اورېده او له امله‌یې د دې ولایت ډېرو کلیو کې خلکو ته زیانونه اوښتي دي.

د پنجشېر مرستیال والي محمد امین صدیقي ازادي راډیو ته وویل چې تر اوسه ورته د ځاني زیانونو راپور نه‌دی ورکړل شوی، خو مالي زیانونه خلکو ته رسېدلي او هم د لویې لارې په بندېدو سره د دې ولایت اوسېدونکي له ستونزو سره مخامخ شوي دي.

د هغه په وینا په لومړي ګام کې هڅه کوي چې لویه لاره بېرته د ټرافیکو پر مخ پرانیزي.

بدخشان کې ۷ پولیس طالبانو سره په جګړه کې وژل شوي

ارشیف، بدخشان

د بدخشان په ارغنجخوا ولسوالۍ کې ۷ افغان پولیس د طالبانو په جګړه کې وژل شوي دي.

د والي ویاند نېک محمد نظري ازادي راډیو ته وویل، دغه محلي او ملي پولیس بېګا هغه مهال ووژل شول چې طالبانو له څو خواوو د دوی پر پوستو بریدونه وکړل.

نظري وایي، ځوابي ډزو کې پنځه طالبان هم وژل شوي دي.

په غور کې هم د امنیتي ځواکونو پر پوستې د طالبانو برید یو سرتېری وژلی او دوه نور یې ټپیان کړي دي.

دا خبره د غور امنیه قوماندان محمد امین احمدي نن سهار ازادي راډیو ته وکړه.

طالبانو د دواړو پېښو په اړه څه نه‌دي ویلي.

د خوړو سازمان له افغانستان سره د اروپایي ټولنې د مرستو هرکلی وکړ

ارشیف

'ډبلیو اف پي' یا د خوړو نړیوال سازمان د افغانستان له خلکو سره د اروپایي ټولني د نویو مرستو د اعلان هرکلی وکړ.

دغه سازمان د یکشنبي په ورځ په یوې اعلامیه کې وویل چې اروپایي ټولنه له 'ډبلیو اف پي' سره درې میلیونه او ۶۰۰ زره یورو مرسته کوي څو په افغانستان کې د طبیعي پېښو زیانمنو شویو او جګړه‌ځپلو سره مرسته وشي.

اعلامیه په افغانستان کې د خوړو نړیوال پروګرام د مرستیال او سرپرست مشر رابرت کساکا له قوله لیکلي چې وایي، په دې مرستې سره به 'ډبلیو اف پي' په افغانستان کې ۴۷۰ زره د جګړو او طبیعي افاتو زیانمنو کسانو سره او ۱۵۰ زرو هغو ماشومانو او میندو ته چې په خوارځواکۍ اخته شوي دي، خوراکي او بشري مرستې ورسوي.

په افغانستان کې د اروپایي ټولنې د بشري پروګرامونو مشر لویجي پندولفي ویلي چې د افغانستان ډېری هغه وګړي چې په لیرې پرتو سیمو کې ژوند کوي له روغتیایي امکاناتو څخه لیرې دي او بشري مرستو ته‌یې اړتیا ډېره ده.

اروپایي ټولنې په تېرو پنځو کلونو کې د یوه مخکښ بشري تمویلوونکي په توګه د افغانستان سره د مرستې په هدف شپږ میلیونه یورو مرسته کړې ده.

د بغلان دوشي لپاره د طالبان پوځي مسؤل ووژل شو

د بغلان ولایت نقشه

د بغلان دوشي لپاره د طالبان پوځي مسؤل ملا ذاکر ګجر ووژل شو.

د ۲۱۷ پامیر قول اردو په یوې اعلامیه کې چې د یکشنبې په ورځ خپره شوه راغلي چې ملا ذاکر ګجر له نورو پنځو وسله‌والو طالبانو سره یوځای پرون تر غرمې وروسته له افغان ځواکونو سره په نښتو کې ووژل شو.

اعلامیه زیاتوي نښتې هغه وخت وشوې چې طالبانو د بغلان ولایت د دوشي ولسوالۍ په زور ابي سیمه کې پر افغان امنیتي ځواکونو برید وکړ چې د افغان ځواکونو له مقاومت سره مخامخ شول.

د ۲۱۷ پامیر قول اردو په اعلامیه کې په دې نښته کې د افغان ځواکونو د مرګ‌ژوبلې په اړه څه نه‌دي ویل شوي.

وسله‌والو طالبانو تر اوسه په دې اړه څه نه‌دي ویلي.

کندهار کې طالبانو ۱۰ تنه افغان ځواکونه خوشې کړي

کندهار

طالبان په کندهار ولایت کې له بنده د ۱۰ تنو افغان ځواکونو د خوشې کېدو خبره کوي.

په قطر کې د طالبانو د سیاسي دفتر ویاند سهیل شاهین د یکشنبې په ماښام پر خپل ټویټر ولیکل چې ۱۰ تنه افغان ځواکونه‌یې په کندهار ولایت کې له بنده خوشې او خپلو کورونو ته‌یې واستول.

دا اقدام له حکومت سره د طالبانو د مخامخ خبرو د پیلېدو لپاره د دواړو لورو د بندیانو د تبادلې لړۍ له مخې کېږي چې د فبرورۍ پر ۲۹مه د امریکا او طالبانو ترمنځ د هوکړه‌لیک پر مهال موافقه ورباندې شوې وه.

که څه هم حکومت تر اوسه د پرونیو ۱۰ تنو د خوشې کېدو په اړه څه نه‌دي ویلي، خو ارګ ټینګار کوي چې د زرګونه طالب بندیانو په خوشې کېدو سره حکومت د سولې خبرو د پیل لپاره جدي ګامونه اخیستي دي او اوس له طالبانو غواړي چې پر خپلو ژمنو ودرېږي.

د فبرورۍ د ۲۹مې په هوکړه‌لیک کې راغلي چې افغان حکومت به تر بین‌الافغاني مذاکراتو مخکې د طالبانو ۵،۰۰۰ او طالبان به د حکومت ۱،۰۰۰ بندیان خوشې کړي.

تر اوسه افغان حکومت ۴،۰۱۵ او د نویو خوشې شویو کسانو سره د طالبانو له‌خوا د خوشې شویو افغان ځواکونو شمېر ۹۷۷ ته رسېږي.

افغان کرکټ بورډ له ۱۷ کلنو د کم عمره ځوانانو کمپ پیلوي

ارشیف

په نږدې راتلونکي کې له ۱۷ کلنو د کم عمره ځوانانو کمپ پیلېږي.

افغانستان کرکټ بورډ به ډېر ژر د ۲۰۲۱م کال د ۱۹ کلنو کم عمره ځوانانو د اسیا جام لپاره د چمتووالي په موخه د ۳۰ هغو لوبغاړو چې عمرونه‌یې ۱۶ یا ۱۷ کلونه وي، د څلور ورځني روزنیز کمپ سربېره، څلور یو ورځنۍ سیالۍ پیل کړي.

د افغانستان د کرکټ بورډ ویاند فرید هوتک په دې اړه ازادي راډیو ته وویل: "ټاکل شوې ډېر ژر به د افغانستان د کرکټ بورډ له لوري ځوانو لوبغاړو لپاره تمریناتي کمپ پیل شي. په پام کې ده دا کمپ د ننګرهار په غازي امان‌الله خان کرکټ لوبغالي کې پیل شي. دا کمپ به په مختلفو برخو کې وي او لوبغاړي به د راروانو نړیوالو لوبو لپاره په بېلابېلو برخو کې وروزل شي."

ښاغلی هوتک وایي یاد کمپ او سیالۍ به د روغتیا وزارت سپارښتنو ته په پام سره د داخلي روزونکو تر څارنې لاندې ترسره شي چې په‌کې به د افغان تنکيو لوبغاړو په توپوهنه، توپ اچونه، ډګر ساتنه او تکړه‌والي هر اړخيز کار وشي.

د یادونې وړ ده چې په یادو ۳۰ لوبغاړو کې ټول هغه لوبغاړي شامل دي چې تېر کال‌یې د ۱۶ کلنو لوبغاړو په لوبو او کمپ کې ګډون درلود او په یادو لوبو کې ډېر ښه ځلېدلي وو.

د جلال‌اباد اوسېدونکي: له یوې نسبي کرارۍ وروسته ناامنۍ زیاتې شوي

د ننګرهار ولایت جلال‌اباد ښار

د ننګرهار ولایت د مرکز جلال‌اباد ښار اوسېدونکي وايي، له یوې نسبي کرارۍ وروسته بیا په دغه ښار کې ناامنۍ زیاتې شوې دي.

له ننګرهار څخه د ازادي راډیو د خبریال له راپور سره سم، د روان سرطان په تېرو ۲۲ ورځو کې په جلال‌اباد ښار کې ۶ چاودنې شوي چې له کبله‌یې نږدې ۴۰ تنو ته مرګ‌ژوبله اوښتې ده.

اکثره پېښې د مقناطیسي ماینونو او بمي چاودنو په نتیجه کې شوي.

د ننګرهار اوسېدونکي له امنیتي چارواکو غواړي چې د دولت د وسله‌والو مخالفانو د فعالیتونو د مخنیوي لپاره تدابیر زیات کړي.

د جلال‌اباد ښار اوسېدونکي دا اندېښنې په داسې حال کې څرګندوي چې د دغه ښار او پلازمېنې کابل ترمنځ د پرتې سروبي ولسوالۍ اوسېدونکي هم وايي چې د پخوا په پرتله‌یې په ولسوالۍ کې ناامني زیاته شوې ده.

د هرات له محبس ۱۲ طالب بندیان خوشې شول

ارشیف، ازاد شوي طالب بندیان

د هرات چارواکي وايي، د دغه ولایت له محبس څخه ۱۲ طالب بندیان خوشې شوي دي.

د هرات د والي ویاند جېلاني فرهاد ازادي رادیو ته وویل، خوشې شویو طالب بندیانو ژمنه کړې چې بیا به د جنګ میدان ته نه‌ځي او د سولې لپاره به کار کوي.

د هرات د والي ویاند په وینا تر اوسه پورې د هرات له محبسه ۷۵ طالب بندیان خوشې شوي دي.

تېره اوونۍ افغان چارواکو ویلي و چې ټولټال ۴،۰۱۹ طالب بندیان‌یې خوشې کړي دي.

اتل قول اردو: ترینکوټ او کندهار کې لږترلږه ۱۶ وسله‌وال طالبان وژل شوي

ارشیف

د ۲۰۵ اتل قول اردو قومانداني وايي، په دوو جلا هوايي بریدونو کې په ترینکوټ او کندهار کې لږترلږه ۱۶ وسله‌وال طالبان وژل شوي او ۷ نور ژوبل دي.

د دې قوماندانۍ د مطبوعاتي دفتر مرستیال صادق عیسي ازادي راډیو ته وویل چې ۹ وسله‌وال طالبان پرون ناوخته د ارزګان ولایت په مرکز ترینکوټ کې وروسته له دې په هوايي برید کې ووژل شول چې په سیمه کې یې د امنیتي ځواکونو پر پوستو بریدونه وکړل.

د ښاغلي عیسي په وینا ۷ تنه نور طالبان د کندهار په ارغستان ولسوالۍ کې وژل شوي او څلور نور ژوبل شوي دي.

سمنګان کې د بادامو حاصلات زیات شوي

ارشیف

په سمنګان کې د بادامو په حاصلاتو کې زياتوالی راغلی دی.

د سمنګان ولايت د کرنې او اوبو لګولو رئيس محمد رحمان ارغنديوال نن ازادي راډیو ته وویل، اټکل دا دی چې کروندګر او بڼوال سږ کال پنځه زره متريک ټنه بادام راټول کړي.

د نوموړي په خبره تېر کال د سمنګان د بادامو حاصلات څه د پاسه درې زره متريک ټنو ته رسېدل.

د سمنګان ولايت د کرنې او اوبو لګولو رئيس وایي چې په دغه ولايت کې د بادامو د حاصلاتو زياتوالی به د کروندګرو او بڼوالو له اقتصاد سره هم مرسته وکړي.

د سپین بولدک-چمن ترمنځ لویه لار تړل شوې

د سپین بولدک-چمن لار

د کندهار د سپین بولدک-چمن ترمنځ لویه لار له تېرو ۱۱ ورځو راهیسې تړل شوې ده.

د افغانستان د متشبثینو عالي بورډ مشر رحم‌الدین حاجي اغا نن یکشنبه ازادي راډیو ته وویل چې له دې امله سوداګرو ته په لکونو افغانۍ زیان رسېدلی.

نوموړي وویل، د دغې لارې د تړل کېدو له امله سلګونه باروړونکي موټر درول شوي او مېوې د خرابېدو په حال کې دي.

د کندهار د سپین بولدک-چمن ترمنځ لار د پاکستان له لوري تړل شوې ده.

سوداګر وایي، یاده ستونزه‌یې له افغان حکومت سره شریکه کړې، خو تر اوسه حل شوې نه‌ده.

نور راوښيه

XS
SM
MD
LG