د لاسرسۍ وړ لېنکونه

تازه خبر
چهارشنبه ۱۸ چنګاښ ۱۳۹۹ کابل ۰۲:۴۳

افغانستان

'کاپیسا کې د طالبانو تر ځمکې لاندې یو پناهځای له‌منځه وېوړل شو'

د کاپیسا نقشه

په کاپیسا کې امنیتي چارواکي وایي چې تر ځمکې لاندې یې د طالبانو یو پناهځای له‌منځه وړی دی.

د کاپیسا د امنیه قوماندانۍ ویاند شایق شورش ازادي راډیو ته وویل چې دا پټنځای په نجراب ولسوالۍ کې پرون ونړول شو، د عملیاتو پر مهال درې طالبان ووژل شول او درې تنه‌یې ټپيان شول.

طالبانو تر اوسه په دې اړه څه نه‌دې ویلي.

د ورځې تازه خبرونه دلته ولولئ

ولایتي شورا: پکتیکا کې ۵ ولسوالۍ د وسله‌والو طالبانو لاس کې دي

پکتیکا

د پکتیکا د ولایتي شورا یو شمېر غړي او اوسېدونکي وایي چې د دې ولایت پنځه ولسوالۍ په بشپړ ډول د وسله‌والو طالبانو په لاس کې دي او په یو څو نورو ولسوالیو کې بیا نیم دولت او نیم وسله‌وال طالبان فعالیت لري.

د پکتیکا د ولایتي شورا غړی افسر خان سلیمان‌خېل وایي چې د دې ولایت پنځه ولسوالۍ په بشپړه توګه له وسله‌والو طالبانو سره دي.

نوموړی وایي، د امنیتي ځواکونو ترمنځ نا همغږي او فساد د دې لامل شوی چې یادې ولسوالۍ تر اوسه د حکومت تر کنټرول لاندې رانه‌شي.

د ولایتي شورا دغه غړی وایي چې د یادو ولسوالیو ولسوالان له ګاونډیو ولسوالیو او یا هم له مرکز ښرنې خپلې چارې مخکې بیایي، هغه څه چې د یو شمېر دغو ولسوالیو د نقل مکان خبره د پکتیکا ولایتي اداره هم تأییدوي.

د پکتیکا ولایت ۱۸ رسمي او څلور غیر رسمي ولسوالۍ لري.

د پکتیکا والي مجیب‌الرحمن څمکنی وایي، د ګوشتې په سیمه کې لویه لاره چې په مسیر یې د دې ولایت درې ولسوالۍ پرتې دي، له تېرو ۱۸ کالونو راهیسې د وسله‌والو طالبانو له‌خوا بنده شوې ده او دې ولسوالیو ته د هوا له لارې اکمالات ترسره کېږي.

د پکتیکا یو شمېر ولسوالیو د امنیت په اړه د ولایتي شورا او خلکو اندېښنې په داسې مهال راپورته کېږي چې دې ولایت ته غځېدلې لویې لارې له تېرو شااوخوا ۱۰ کالونو راهیسې ناامنه دي او د عمومي لارو په یو شمېر برخو کې وسله‌وال طالبان چک پاینټونه اچوي او تلاشۍ کوي.

ارزګان کې پر ۸۰۰ مالدارو کورنیو د لبنیاتو پروسس دستګاوې وېشل شوي

ارشیف

د ارزګان د کرنې، اوبو لګولو او مالدارۍ ریاست وایي چې د مالدارۍ د پراختیا او له مالدارانو سره د اقتصادي مرستې په هدف د دې ولایت پر ۸۰۰ مالدارو کورنیو د لبنیاتو د پروسس لمریزې دستګاوې وېشل شوې دي.

د ارزګان د کرنې، اوبو لګولو او مالدارۍ رئیس انجنیر احمد شاه خیري ازادي راډیو ته وویل چې د دې ولایت پر ۸۰۰ مالدارو کورنیو د لبنیاتو د پروسس د لمریزو دستګاو د وېش ټولیز لګښت ۱۰ میلیونه او ۳۲۰ زره افغانۍ دی چې د هندوستان هېواد د "HICPD" مؤسسې په مالي همکارۍ پر مالدارو کورنیو وېشل شوي دي.

د ارزګان د کرنې رئیس زیاته کړه چې تر دې وروسته به له یادو مرستو څخه برخه‌من شوي مالداران د خپل مالدارۍ محصولات په پاک او صفا ډول پروسس کوي او بازار ته به‌یې په ښه کیفیت وړاندې کړي.

هغه دغه‌راز وویل چې د دې ولایت په مرکز او ولسوالیو کې د لبنیاتو ټولنې هم جوړې شوې دي چې د لبنیاتو د پروسس او بازار موندنې په برخه کې ډېر اغېزناک تمام شوي دي.

دوي وایي، د لبنیاتو پروسس او د مالدارو کورنیو اقتصادي ودې ته د کرنې وزارت پاملرنه تر پخوا زیاته شوې ده.

دغه وزارت د لبنیاتو د پراختیا د پروژو په لاره اچولو سره زرګونه کلیوالي کورنۍ د دغو پروژو تر چتر لاندې راوستي دي.

د دغو پروژو اصلي موخه د شېدې د تولیداتو زیاتوالی د لبني موادو پروسس او دغو موادو ته د کوپراټیفونو او ټولنو له لارې مارکېټ پیدا کول دي.

په کور دننه د لبني موادو د پراختیا په پار د کرنې وزارت له‌خوا ګڼې پروژې پلي شوي او په دې برخه کې ډېرې هلې ځلې شوې دي.

په اقینې او تورغنډۍ بندرونو کې ضد عفوني دستګاوې جوړېږي

ارشیف

د افغانستان د اوسپنې پټلۍ اداره وايي، د کرونا ویروس د خپرېدو د مخنیوي لپاره د افغانستان په سوداګریزو مالونو لګول شوي بندیزونه به ډېر ژر حل شي.

د دغې ادارې رئیس عبدالباري صدیقي نن ازادي راډیو ته وویل چې دوی به ډېر ژر دوه هغه دستګاوې ګټې اخیستنې ته وسپاري کوم چې وارداتي او صادراتي توکي ضد عفوني کوي.

نوموړي وویل، دغه دستګاوې په اقینې او تورغنډۍ بندرونو کې جوړېږي او دغه‌راز ټولې هغه لارۍ او کاروانونه چې له دې بندرونو څخه تېرېږي درمل پرې شیندي.

د سوداګرۍ او پانګونې خونې مرستیال یونس مومند هم له دې اقدام څخه هرکلی کوي.

نوموړي له ازادي راډیو سره په خبرو کې وویل چې دغه دستکاوې به د سوداګرو ستونزې هوارې کړي.

دا په داسې حال کې ده چې په افغانستان کې د کرونا ویروس له خپرېدو او کمو امکاناتو له امله افغاني محصولات بهر ته نه‌لېږدول کېدل.

کندهار کې یوې موټر بم چاودنې ۳ پولیس وژلي او ۱۴ تنه نور ټپيان کړي

د کندهار ولایت نقشه

د کندهار په شاه ولیکوټ ولسوالۍ کې نن سهار په موټر بم چاودنه کې درې پولیس وژل شوي او ۱۴ ملکي او نظامي کسان ټپيان شوي دي.

د کندهار د والي ویاند احمد بهیر احمدي وايي: "له چاودېدونکو موادو بار موټر سهار وختي د شاه ولیکوټ امنیه قوماندانۍ مخې ته چاودنه کړې."

احمد بهیر احمدي وویل چې د ملي اردو د انټرنشنل په نوم لوی اکمالاتي موټر کې چاودېدونکي مواد ځای پر ځای شوي و.

د دې حملې مسؤلیت طالبانو اخیستی دی. قاري محمد یوسف احمدي چې ځان د وسله‌والو طالبانو ویاند معرفي کوي، ادعا کړې چې په دې پېښه کې تر ۲۰ زیاتو پولیسو ته مرګ‌ژوبله اوښتې ده.

افغانستان سبا د سیمه‌ییزې او نړیوالې اجماع د پياوړتیا کنفرانس کوربه دی

ارشیف، د سیمه‌ییزې او نړیوالې اجماع د پياوړتیا د دوشنبې غونډه

ټاکل شوې ده افغانستان سبا (د پنجشنبې په ورځ د جولای په نهمه نېټه) د سولې په اړه د سیمه‌ییزې او نړیوالې اجماع د پياوړتیا په نوم د وېډیو کنفرانس کوربه وي.

په دې کنفرانس کې به د ولسمشر محمد اشرف غني ترڅنګ د ناټو، ملګرو ملتونو، اروپايي ټولنې او امریکا چارواکي ګډون وکړي.

د افغانستان د بهرنیو چارو ویاند ګران هېواد په دې اړه رسنیو ته داسې وویل: "افغانستان روانه اوونۍ د سولې او اقتصادي پراختیا اړوند درې مهم کنفرانسونه لري چې له دې ډلې یو یې د دوشنبې په ورځ د جولای په شپږمه نېټه د 'افغانستان د سولې لپاره د سمیه‌ییزې اجماع د پیاوړتیا کنفرانس' تر عنوان لاندې پای ته ورسېد."

د افغانستان د بهرنیو چارو وزارت وايي، په دې کنفرانس کې د ګاونډیو او سیمې ۲۰ هېوادونو او دوو سازمانونو ګډون کړی وو.

د دې ترڅنګ افغانستان له چین او پاکستان سره د ستراتېژیک دیالوګ تر نوم لاندې درې کنفرانسونه کړي. د افغانستان د بهرنیو چارو وزارت وايي، په دغو غونډو کې پر امنیتي، سیاسي او اقتصادي همکاریو هر اړخیز بحث وشو.

ننګرهار چارواکي: یو تن د تښتوونکو له منګلو ازاد شو

د تښتوونکو له منګولو ازاد شوی عبدالرحمن

په ننګرهار کې یو تن د تښتوونکو له منګولو ازاد او خپلې کورنۍ ته وسپارل شو.

د ننګرهار چارواکي وایي، د ملي امنیت ځواکونو نن سې شنبه یو تن چې عبدالرحمن نومېږي او د ننګرهار د نازیان ولسوالۍ د ولسوال زوی او نېږدې ۲۱ ورځې وړاندې د جلال اباد ښار د شپږمې ناحې په مربوطاتو کې تښتول شوی و، د تښتوونکو له منګولو ازاد او نن خپلې کورنۍ ته وسپارل شو.

د ننګرهار والي شاه محمود میاخېل نن په دې اړه په یوه کنفرانس کې وویل، عبدالرحمن ۲۱ ورځې د تښتوونکو په قضه کې و او د شېخ مصري په سیمه ساتل کېده، د کورنۍ نه یې د خوشې کېدو په بدل کې دوه نیم سوه زره امریکایي ډالر غوښتل چې د ملي امنیت ځواکونو له خوا روغ رمټ ازاد او په تور یې ۵ تنه ونیول شول.

نیول شوي کسان د ملي امنیت په قبضه کې تر څېړنو لاندې دي.

د تښتول شوي عبدالرحمن کورنۍ وایي، تښتوونکو ورته ګواښ کړی و چې که دوه نیم سوه زره امریکایي ډالر ورنه کړل شي، نو عبدالرحمن او د کورنۍ نور غړي به یې ووژني.

ملي امنیت: د داعش ډلې ۲ ځانمرګي بریدګر نیول شوي

ارشیف

د ملي امنیت عمومي ریاست وايي، د اسلامي دولت ډلې یا داعش د خراسان څانګې ۲ ځانمرګي بریدګر نیول شوي دي.

دغه ریاست نن رسنیو ته په یوه لېږلې اعلامیه کې ویلي، چې دغه کسان چې غوښتل یې په کابل کې پر روغتیایي مرکزونو او رسنیو حملې وکړي، د پېچلو عملیاتو په لړ کې نیول شوي دي.

د دغو مشکوکو کسانو نومونه لطف اله او احمدالله ښوول شوي، چې وايي د کابل د شکردرې ولسوالۍ اوسېدونکي دي.

چارواکي: پکتیا کې ماین چاودنې د ملي اردو ۲ سرتېري وژلي

ارشیف

د پکتیا په احمدخېلو ولسوالۍ کې نن د ماینونو دوو چاودنو د ملي اردو ۲ سرتېري وژلي او درې نور ټپیان کړي دي.

په پکتیا کې د ۲۰۳ تندر قول اردو ویاند ایمل مومند ازادۍ راډیو ته د دغو دوو پېښو په اړه وویل: "په یوه چاودنه کې چې د احمد خېلو ولسوالۍ د ترکاڼي په سیمه کې د ملي اردو پر رېنجر شوې، یو کس پکې ټپي شوی، خو د دې ولسوالۍ د کلکین خولې په سیمه کې بیا د ملي اردو پر ګزمې د ماین چاودنې له امله دوه سرتېري شهیدان شوي او دوه نور ټپیان شوي دي."

په سیمه کې یوې امنیتي سرچینې بیا د نوم او غږ نه خپرولو په شرط ازادي راډیو ته ویلي، چې په دغو دواړو پېښو کې د ملي اردو ۵ تنه سرتېري وژل شوي او یو ټپي شوی دی.

که څه هم د پکتیا امنیتي چارواکي وايي، دغه ماینونه وسله والو طالبانو ځای پر ځای کړی و، خو وسله والو طالبانو تر اوسه په دې اړه رسنیو ته څه نه دي ویلي.

فضل احمد معنوي: په نږدې راتلونکي کې د کاندید وزیرانو لېست ارګ ته سپارو

فضل احمد معنوي

د مصالحې عالي شورا رئیس عبدالله عبدالله ته یوه نږدې سرچینه وايي، د دوی له اړخه د پېشنهادي کاندید وزیرانو لېست بشپړ شوی او ممکن تر سبا پورې حکومت ته تسلیم کړای شي.

فضل احمد معنوي نن ازادۍ راډیو ته وویل، دوی د کرونا وبا او نورو بوختیاوو له کبله ونه توانېدل د خپلو پېشنهادي کاندید وزیرانو لېست پر وخت برابر کړي.

هغه زیاتوي: "لېست بشپړ شوی دی، په پام کې وه یوه یا دوې ورځې مخکې شریک کړای شي، خو د ښکېلوو خواوو د بوختیاوو له کبله داسې ونه شول، احتمالاً نن سې شنبه یا سبا چهارشنبه به فهرست تسلیم کړای شي."

تر دې مخکې ولسمشر محمد اشرف غني ویلي وو، چې د ارګ له خوا د پېشنهادي کاندید وزیرانو په معرفۍ کې کومه ستونږه نه شته، خو هغه ویلي وو چې د عبدالله عبدالله له ډلې کاندید وزیران معرفي شوي نه دي.

د ولسمشرۍ د تېرو ټاکنو د نهايي نتیجو تر اعلان شا و خوا شپږ میاشتې تېرېږي خو تر اوسه کابینه بشپړه شوې نه ده.

د سولې ولسي حرکت: افغانستان کې د ناامنیو خلاف غونډې او لاریونونه کوو

د سولې ولسي حرکت غړي

د سولې ولسي حرکت وايي، غواړي د پلازمېنې کابل په ګډون په ۲۰ ولایتونو کې د روانو ناامنیو پرخلاف ولسي غونډې او لاریونونه وکړي.

د دغه حرکت غړي وايي، که څه هم په قطر کې د امریکا او طالبانو ترمنځ موافقه لاسلیک شوې، چې له مخې یې طالبانو په افغانستان کې د تاوتریخوالي کمولو ژمنه کړې ده، خو په افغانستان کې د ناامنیو لړۍ لا هم روانه ده.

د حرکت ویاند بسم اله وطندوست نن ازادۍ راډیو ته وویل، دوی دا غونډې او لاریونونه (نور جنګ د څه لپاره؟) په نوم پیلوي.

هغه زیاته کړه: "بیا هم بریدونه روان دي، تاوتریخوالی دی، بیا هم په جنګ کې موږ وژل کېږو، بیا هم په جنګ کې افغان ټوکر- ټوکر کېږي، زموږ مسجدونه، روغتونونه او زموږ جنازې په نښه کېږي، لا هم د جګړې په منځ کې عسکر او طالبان وژل کېږي، لا هم په ځمکنیو ماینونو ملکیان وژل کېږي."

ښاغلی وطندوست وايي، دوی به د کرونا وبا د خپرېدو د مخنیوي لپاره روغتیايي سپارښتنې په پام کې ساتي.

د ملګرو ملتونو مرستندوی ماموریت یا یوناما په خپل شپږ میاشتني راپور کې چې تېره پنج شنبه خپور شو ویلي، لومړني ارقام ښيي چې د ۲۰۲۰م کال په لومړیو شپږو میاشتو کې پر ملکیانو په قصدي حملو کې تر ۸۰۰ زیات ملکیانو ته مرګ ژوبله اوښتې ده.

د ننګرهار په کوز کونړ ولسوالۍ کې ځانمرګي برید ۴ تنه ووژل

ننګرهار

د ننګرهار په کوز کونړ ولسوالۍ کې چاودنې ۴ تنه ووژل.

د ننګرهار د والي ویاند عطاالله خوګیاڼي ازادي راډيو ته وویل چې یوه ځانمرګي بریدګر نن غرمه مهال د کوز کونړ د بازار په مرکزي چوک کې ځان ته چاودنه ورکړه چې له امله‌یې ۴ تنه ووژل شول او ۱۱ نور ټپیان شول.

د خوګیاڼي په خبره، برید په سیمه کې د سیمه‌ییزو پولیسو د ټیم لیډر میر زمان په موټر شوی چې خپله د میر زمان په ګډون ۴ تنه په‌کې وژل شوي دي.

د خوګیاڼي په خبره، په ټپیانو کې دوه تنه سیمه‌ییز پولیس او پاتې یې ملکي وګړي دي.

د دې برید مسؤلیت چا نه‌دی منلی.

د یادونې وړ ده چې شااوخوا دوه میاشتې وړاندې د کوز کونړ په ولسوالۍ کې د سیمه‌ییزو پولیسو د یوه قوماندان شېخ اکرم د جنازې په مراسمو کې ځانمرګي برید لسګونه کسان وژلي او ټپیان کړي وو.

د بادغیس د غنمو حاصلات څه باندې ۱۲ سلنه زیات شوي

ارشیف

د بادغیس د غنمو د کروندو حاصل څه باندې ۱۲ سلنه زیاته شوی دی.

د دغه ولایت د کرنې وزارت ارزونې ښیي چې سږکال له دې ولایت څخه ۱۶۱ زره او ۸۸۹ مټریک ټنه غنم راټول شوي چې د تېر کال په پرتله څه باندې ۱۲ سلنه زیاتوالی ښیي.

د بادغیس د کرنې، اوبو لګولو او مالدارۍ رئیس عبدالتواب تایب ازادي راډیو ته وویل چې سږ کال د بادغیس ولایت د اوبیزو غنمو حاصل په یوه هکټار کې ۳.۴۷ مټریک ټنه او د دې ولایت د للمي غنمو حاصل په یوه هکټار کې ۲.۱۴ مټریک ټنه ده.

په روان کال کې د بادغیس ولایت په ۵۶ زره او ۳۴۶ هکټاره ځمکه للمي غنم او په ۱۱ زره او ۶۱۸ هکټاره ځمکه کې اوبیز غنم کرل شوي دي.

نوموړي وویل، سږ کال په بادغیس ولایت کې ۱۶۱ زره او ۸۸۹ مټریک ټنه غنم تولید شوي دي چې د تېر کال د غنمو د حاصلاتو په پرتله ۱۲.۲۷ سلنه زیاتوالی ښیي.

د بادغیس د کرنې رئیس عبدالتواب تایب په خبره، په دې ولایت کې د غنمو د حاصلاتو زیاتوالی د تېر کال په پرتله د غنمو د کروندو ډېروالی، د غنمو د ودې په موسم کې پر وخت او په کافي انداز ورښتونه، د کرنې ریاست او همکارو مؤسسو له‌خوا پر ۱۶ زره او ۳۴۰ بزګرانو د غنمو ۸۱۷ مټریک ټنه اصلاح شوي تخمونو وېشل دي.

دا په داسې حال کې ده چې تېر کال د دې ولایت د اوبیزو غنمو د هر هکټار تولید ۳.۱۴ مټریک ټنه او د للمي غنمو د هر هکټار تولید ۲.۱ مټریک ټنه محاسبه شوی و.

پوروړو شرکتونو ته د کانونو او پټرولیم وزارت سرپرست خبرداری

د کانونو سرپرست وزیر محمد هارون چخانسوري

د افغانستان د کانونو او پټرولیم وزارت پوروړي شرکتونو ته خبرداری ورکوي، که په راتلونکو ۳۰ ورځو کې خپل ټول پورونه پرې نه‌کړي، نو د وزارت له‌خوا به څارنوالۍ ته معرفي شي.

د دغه وزارت ویاند عبدالقدیر مطفي نن ازادي راډیو ته وویل چې د کانونو سرپرست وزیر محمد هارون چخانسوري د دولت د پورونو راټولولو کمېسیون غړو سره په ناسته کې وویل چې افغان حکومت د کرونا وبا له امله په سختو شرایطو کې قرار لري او ضرورت دی چې له بشپړ شفافیت سره مشروع عواید راټول شي.

وزارت وایي، د کانونو او پټرولیم وزارت به د پورونو راټولولو کمېسیون ته د مقروضينو په اړه د واضح وړاندیزونو سره تفصیلي راپور ورکوي او که پوروړي په راتلونکو ۳۰ ورځو کې خپل ټول پورونه تادیه نه‌کړي، دوی به د وزارت له‌خوا د لويې څارنوالۍ دفتر کې د دولت د پورونو راټولولو کمېسیون ته راجع کوي ترڅو د دوی په اړه کمېسيون پرېکړه وکړي.

د کانونو وزارت د چارواکو په خبره، وزارت ته د لیکلې ژمنې سربېره، پوروړو شرکتونو د پورونو ادا کولو لپاره هېڅ اقدام نه‌دی کړی.

په عین حال کې، دغه وزارت تر دې وړاندې مقروضو شرکتونو ته څو وارې توصيې او اخطارونه هم لېږلي دي.

په ټوله د کې د پوروړو مجموعي اندازه پور ٥٥٩،٣٧٣،٠٤١ افغانۍ دی.

چارواکي: بغلان کې ۱۵ طالبانو ته مرګ‌ژوبله اوښتې

ارشیف

د بغلان امنیتي چارواکي وايي چې د افغان ځواکونو په عملیاتو کې ۱۵ طالب وسله‌والو ته مرګ‌ژوبله اوښتې ده.

د بغلان د امنیه قوماندانۍ ویاند احمد جاوېد بشارت په یوه وېډیويي پیغام کې چې نن سهار یې رسنیو ته استولی ویلي چې دې وسله‌والو غوښتل د پلخمري-سمنګان لویه لاره بنده کړي، خو د ګډو ځواکونو له غبرګون سره مخامخ شول.

ښاغلي بشارت زیاته کړه: "د دولت وسله‌والو مخالفینو پرون غوښتل چې د پلخمري-سمنګان لویه لار بنده کړي او د سوداګرو مالونه وسوځوي، خو ملي دفاعي ځواکونو یې پرضد عملیات پیل کړل چې په نتیجه کې یې نهه وسله‌وال مخالفین مړه او پنځه نور ټپیان شول."

د ښاغلي بشارت په وینا په مړو او ټپیانو کې د قاري جمعه ګل په ګډون چې په متقي مشهور و، د طالبانو مهم قوماندانان هم شامل دي. نوموړی زیاتوي چې د پلخمري-سمنګان لویه لاره هم بېرته خلاصه شوې ده.

طالبانو تر اوسه د دې جګړې په اړه څه نه‌دي ویلي.

غني: د طالبانو تشدد د سولې بهیر له خطر سره مخامخ کولای شي

افغان ولسمشر محمد اشرف غني

ولسمشر اشرف غني خبرداری ورکړی چې د طالبانو له لوري تشدد په افغانستان کې د سولې بهیر له خطر سره مخامخ کولای شي.

ښاغلي غني پرون د افغانستان د سولې په اړه په کابل کې جوړ نړیوال کنفرانس ته د انلاین وینا پر مهال وویل چې که طالبان جګړو ته دوام ورکړي، نو د سولې بهیر به له جدي ستونزو سره مخامخ شي.

ولسمشر غني زیاته کړه چې له بده مرغه د تشدد اوسنۍ کچه د تېر کال پرتله لوړه شوې ده.

په کابل کې د شااوخوا ۲۰ هېوادونو او نړیوالو مؤسسو د استازو په ګډون لومړۍ غونډه پرون پای ته ورسېده، خو په روانه اوونۍ کې دوه نورې غونډې هم په پام کې دي چې په هغو کې به هم د سولې د بهیر پر بېلابېلو اړخونو خبرې وشي.

نور راوښيه

XS
SM
MD
LG