د لاسرسۍ وړ لېنکونه

تازه خبر
پنجشنبه ۱۲ چنګاښ ۱۳۹۹ کابل ۰۸:۰۶

نړۍ

د سویډن یو څېړنیز انسټېټوټ: اټومي قدرتونو د وسلو عصري کولو ته دوام ورکړی

امریکا کې په آریزونا کې د اټومي بم یو انځور

په سویډن کې میشت د اټومي وسلو د مخنیوي څېړنیز انسټېټوټ وایي، سره له دې چې د اټومو سروکو زېرمې کمې شوي خو اټومي قدرتونو د دغو وسلو عصري کولو ته دوام ورکړی دی.

د سټاکهولم د سولې نړیوال څېړنیز انسټېټوټ په هغه راپور کې چې نن یې خپور کړی ویلي چې څېړنې یې ښیي چې د روان ۲۰۲۰ کال په پیل کې نهو اټومي قدرتونو، د امریکا متحدوایالتونو، روسیې، بریتانیا، فرانسې، چین، هند، پاکستان، اسراییل او شمالي کوریا په خپلو زېرمتونونو کې ټول ټال شاوخوا ۱۳ زره او ۴۰۰ اټومي وسلې درلودې.

د تېر کال په نسبت د اټومي وسلو شمېر ۴۶۵ کم شوی او علت یې دا ښودل شوی چې متحدو ایالتونو او روسیې چې په نړۍ کې د ټولو اټومي وسلو څه باندې نوي له دوی سره دي، خپلې زړې اټومي وسلې له منځه وړي دي.

امریکا ۳۸۵ او روسیې ۱۲۵ اټومي سروکې له منځه وړي دي.

که دغو دواړو هېوادونو تر ډېره دغه وسلې له منځه وړي خو په مقابل کې بیا چین، بریتانیا، هند او شمالي کوریا خپلې اټومي وړتیاوې یوڅه زیاتې کړي دي.

د ورځې تازه خبرونه دلته ولولئ

د امریکا استخبارات د روسیې په اړه قانون جوړوونکو ته وضاحت ورکوي

د امریکا بیرغ

ټاکل شوې د امریکا لوړپوړي استخباراتي چارواکي نن پنجشنبه د نیویارک ټایمز د هغه راپور په اړه قانون جوړوونکو ته وضاحت ورکړي چې په‌کې راغلي، روسي استخباراتو طالبانو ته د امریکایي ځواکونو د وژنې لپاره انعامونه ورکړي دي.

په دغه راپور کې چې تېره جمعه خپور شو راغلي، د روسيې د پوځي استخباراتو یوې پټې څانګې طالبانو ته دغه انعامونه ورکړي دي.

په نننۍ غونډه کې د 'سي‌ای‌اې' مشره جینا هاسپل او د امریکا د ملي استخباراتو ادارې مشر جان راتکلف برخه اخلي.

د امریکا ولسمشر ډونالد ټرمپ پرون وویل، ده ته د هغه څه په اړه معلومات نه‌دي ورکړل شوي چې ویل کېږي روسیې طالبانو ته د امریکایي ځواکونو د وژنې لپاره پیسې ورکړي.

د امریکا د قانون جوړوونکو او استخباراتي چارواکو نننۍ غونډه داسې مهال جوړېږي چې امریکا کې قانون جوړوونکو پر روسیې د بندیزونو د ډېرېدو غوښتنه کړې ده.

روسیه اوس‌مهال د دې لپاره د امریکا له یو شمېر بندیزونو سره مخ ده چې د اوکراین په ختیځ کې د روسي پلوه بېلتون غوښتونکو ملاتړ کوي.

سپینه ماڼۍ: که پر روسیې تورونه تأیید شي امریکا به سخت ځواب ورکړي

ارشیف، سپینه ماڼۍ

د سپینې ماڼۍ ویاند رابرټ اوبراین وایي، که چېرته دا راپورونه تأیید شي چې روسیې طالبانو ته د دې لپاره انعامونه ورکړي چې په افغانستان کې امریکایي ځواکونه او د هغوی متحدان ووژني، متحده ایالات به سخت ځواب ورکړي.

ښاغلي اوبراین دا خبره پرون په واشنګتن کې خبریالانو ته وکړه، خو په دې اړه‌یې نور تفصیل ورنه‌کړ.

تر دې مخکې پرون په واشنګټن کې د متحده ایالاتو د بهرنیو چارو وزیر مایک پومپیو د همدې موضوع په اړه د یوه خبریال د پوښتنې په ځواب کې وویل: "کله چې موږ داسې کره معلومات ترلاسه کړو چې روسان د امریکایانو ژوند په خطر کې اچوي، نو موږ به په جدي توګه ځواب ورکړو. لکه تاسو چې وویل، موږ به خبرداری ورکوو؟ موږ به خبرې ورسره کوو؟ زه فکر کوم چې ځواب به خامخا وي او ورکوو به‌یې."

نیویارک ټایمز ورځپاڼې تېره جمعه راپور ورکړ چې د روسې پوځي استخباراتو د امریکایانو د وژلو لپاره طالبانو ته انعامونه ورکړي او دا راپور د فبرورۍ په میاشت کې له ولسمشر ټرمپ سره شریک شوی دی، تر دې راوروسته ښاغلی ټرمپ تر فشار لاندې راغلی دی.

د سپینې ماڼۍ ویاند، اوبراین وویل چې د امریکا د مرکزي استخباراتو یوې غړې ولسمشر ټرمپ ته په دې اړه شفاهي خبره کړې وه او په لیکلې بڼه‌یې څه نه‌و وړاندې کړي.

د امریکا په متحده ایالاتو کې د روسیې سفارت دا راپورونه رد کړي او طالبانو هم ویلي دي چې دوی له روسیې انعامونه نه‌دي ترلاسه کړي.

ایران دوه سویډنیان د مخدره موادو د قاچاق په تور نیولي

ارشیف، د ایران امنیتي ځواکونه

دوه سویډنیان د مخدره موادو د قاچاق په تور په ایران کې نیول شوي دي. دا خبر پرون تسنیم اژانس ورکړ چې د ایران د سپاه پاسداران انقلاب مربوط ده.

دغه اژانس وایي چې چارواکو ډېره اندازه مخدره مواد او مصنوعي خطرناکه نشه‌یي مواد ترلاسه کړي دي.

په راپور کې دا نه‌دي ویل شوي چې دا مواد او دا کسان چېرته نیول شوي دي.

له افغانستانه د ایران له لارې مخدره مواد اروپا ته قاچاقېږي، خو تهران په دې تورن شوی دی چې لوېدیځوال د دې لپاره نیسي چې له هغوی څخه د مذاکراتو پر مهال د یوه امتیاز په توګه استفاده وکړي.

'امام علي رحمان دې هغه مسوده نه‌تصویبوي چې د بیان ازادۍ مخه نیسي'

د تاجکستان ولسمشر امام علي رحمان

د بشري حقونو فعالانو او د رسنیو څارونکو د تاجکستان له ولسمشر امام علي رحمان څخه وغوښتل چې هغه مسوده تصویب نه‌کړي چې د بیان د ازادۍ مخه نیسي.

د تاجکستان پارلمان تېره میاشت موافقه وکړه، که څوک د کرونا په اړه درواغ معلومات د رسنیو، انټرنټ یا ټولنیزو رسنیو له لارې خپروي هغوی به جریمه کېږي او تر ۱۵ ورځو به په توقیف کې وي.

اوس دا مسوده ولسمشر ته د تصویب لپاره استول شوې ده.

په نیویارک کې مېشتې د خبریالانو د خوندیتوب کمېټې د سې شنبې په ورځ په یوه بیان کې وویل چې په دې مسوده کې دا روښانه نه‌ده چې د 'کووېډ-۱۹' ناروغۍ په اړه درواغ معلومات به څرنګه معلومېږي او د دې قانون په مټ چارواکي دا واک ترلاسه کوي چې د دې ناروغۍ په پلمه سانسور وکړي.

د خبریالانو د خوندیتوب د ټولنې د اروپا او مرکزي اسیا همغږه کوونکې ګلنازې وویل چې ولسمشر رحمان باید د دې مسودې له تصویبه ډډه وکړي.

په پاریس کې مېشتې د بې‌پولې خبریالانو ټولنې هم ورته اندېښنه ښکاره کړې ده.

په تاجکستان کې د رسنیو د ملي خپلواکې ټولنې مشر نورالدین قرشیبایوف وویل چې دا قانون به چارواکو ته د ولسمشرۍ تر انتخاباتو مخکې د رسنیو د ځپلو لپاره ډېر واک ورکړي.

ټاکل شوې ده د روان کال په وروستیو کې په تاجکستان کې د ولسمشرۍ ټاکنې ترسره شي.

اروپايي ټولنې د پاکستان 'پي ای اې' او 'پي وي ټي' شرکتونو جواز ځنډولی

د پاکستان د نړیوال هوايي شرکت یا 'پي ای اې' الوتکه

د اروپايي ټولنې د هوايي خوندیتوب ادارې د پاکستان د نړیوال هوايي شرکت یا 'پي ای اې' او وېژن ايیر انټرنشنل یا 'پي وي ټي' جوازونه ځنډولي دي.

دا شرکتونه به راتلونکې شپږ میاشتې د دې ټولنې په هوايي قلمرو کې پروازونه نه‌شي کولای.

دا اقدام وروسته له هغه شوی چې د پاکستان د هوايي چلند وزیر غلام سرور خان وویل چې د ۲۶۲ پیلوټانو پر جواز شک لري او د دغو کسانو دندې يې وځنډولې.

د 'پي ای اې' ویاند عبدالله حفیظ نن ازادي راډيو ته وویل چې له اروپايي ټولنې سره په دې اړه په تماس کې دي.

ښاغلی حفیظ زیاتوي: "که خدای دې نه‌کوي کومه پېښه شوې وی او د پلټنو لپاره‌یې بهرنيان راغلي وی، خبره به تر دې هم خرابه شوې وی، نو ښه شو چې اوس دا اقدامات وشول."

ټول هغه مسافر به چې پروازونه‌یې اروپايي ټولنې هېوادونو ته وو، یو انتخاب ولري چې خپل پرواز بلې وروستۍ نېټې ته وغځوي او یا بېرته خپلې پیسې واخلي.

'پي ای اې' وايي چې په موقتي توګه به اوس‌مهال خپل ټول پروازونه ودروي، خو وروسته‌یې وویل چې د دوو ورځو وقفه‌یې موندلې چې د جولای له لومړۍ تر درېيمې يې په اروپا او بریتانیا کې د الوتکو د کېناستو اجازه ترلاسه کړې ده.

تېره اوونۍ د پاکستان د هوايي چلند وزیر غلام سرور خان وویل چې د ۲۶۲ پیلوټانو جوازونه یا له وخته تېر شوي او یا ځيني تقاعد شوي دي چې په دغو کې ۱۴۱ د 'پي ای اې'، نهه د اییر بلو، ۱۰ د سیرین ايیر، او ۱۷ د شاهین ایرلاین دي.

د پاکستان د پیلوټانو ټولنې ویلي چې په دې اړه باید پلټنې وشي ځکه یو شمېر پیلوټان ډېر لوستي او تجربه لرونکي کسان دي.

عمران خان کراچۍ کې د ونډو پر بازار د حملې تور پر هندوستان پورې کړ

کراچۍ کې د ونډو پر بازار د حملې سیمه

د پاکستان صدراعظم عمران خان په کراچۍ ښار کې د ونډو پر بازار د حملې تور پر هندوستان پورې کړی دی.

عمران خان دا خبرې پرون د سې شنبې په ورځ د خپل هېواد پارلمان ته په خبرو کې وکړې.

ده زیاته کړه: "موږ هېڅ شک نه‌لرو چې د دې حملې تر شا هندوستان دی. د تېرو دوو اوونیو پر مهال زما کابینه خبره وه چې دا ډول یوه حمله به کېږي. وزیرانو هم ماته ویلي وو. زموږ ټولې ادارې تیارسئ وې. موږ د خپلو استخباراتي ادارو په مرسته په بریالیتوب سره لږ تر لږه څلور حملې پر شا تمبولې دي. دوه حملې په اسلام‌اباد کې وې."

تر دې مخکې د پاکستان د بهرنیو چارو وزیر شاه محمود قریشي هم ورته تورونه پورې کړي وو. هندوستان په ځواب کې د پاکستان دا تورونه رد کړي او د دې هېواد د بهرنیو چارو وزارت د سې شنبې په ورځ په یوه اعلامیه کې دا تور د خندا وړ بللی دی.

د دوشنبې په ورځ (د چنګاښ په ۹مه، د جون په ۲۹مه نېټه) وسله‌والو د کراچۍ د ونډو پر بازار حمله وکړه چې د امنیتي ځواکونو سره په نښته کې ټول څلور حمله کوونکي ووژل شول.

د ونډو دا بازار د کراچۍ په داسې اقتصادي ساحه کې پروت دی چې د پاکستان دولتي بانک، دغه‌راز نور ملي او نړیوال مالي دفترونه هم ورنږدې دي.

اروپايي اتحاديې ته د ۱۵ هېوادونو وګړو ته د سفر اجازه ورکړل شوه

د اروپايي اتحاديي بیرغ

له نن (د جولاۍ لومړۍ) څخه د نړۍ د ۱۵ هېوادونو وګړي اروپايي اتحادیې ته د سفر اجازه لري.

اروپايي اتحادیې پرون وویل چې کاناډا، مراکش، نوی زیلاند، رواندا، صربیا، جنوبي کوریا، ګرجستان، استرالیا، الجیریا، تایلند، تونس او اروګوای په خوندي یا مصون زون کې شامل هېوادونه دي او وګړو ته‌یې د ورتګ اجازه ورکوي.

خو د امریکا متحده ایالات‌یې له دې اعلانه مستثنی کړی دی ځکه هلته د کرونا ویروس د مثبتو پېښو شمېر د زیاتېدو په حال کې دی.

د اتحادیې ۲۷ استازو پرون وویل چې په امریکا، روسیه، برازیل، هند او ترکیه کې د کرونا ویروس مثبتې پېښې زیاتې دي او وګړي یې اروپايي ټولنې ته د سفر اجازه نه‌لري.

اروپايي اتحادیې ویلي چې له چینه به د وګړو ورتګ ته هغه وخت اجازه ورکړي چې د چین حکومت له اروپا د مسافرو پر ورتګ بندیز لیرې کړي.

اروپايي اتحادیې د سفر د اجازې راپور هره میاشت دوه واره نوی کېږي. هغه هېوادونه چې اروپايي اتحادیې په مصون زون کې شامل کړي او د وګړو لپاره‌یې د سفر ازادي اعلان کړې، باید د اروپايي اتحادیې خلکو ته د ورتګ اجازه ورکړي.

د امریکا استخباراتو ټرمپ ته پر روسیې د تورونو په اړه معلومات ورکړل

د امریکا ولسمشر ډونالد ټرمپ

سپینې ماڼۍ ویلي چې د امریکا استخباراتو ولسمشر ډونالد ټرمپ ته پر روسیه د تازه لګېدلو تورونو په اړه معلومات ورکړي دي.

نیویارک ټايمز ورځپاڼې د جون په ۲۶مه، په یوه راپور کې وویل چې روسیې په افغانستان کې د امریکايي ځواکونو د وژلو لپاره طالبانو ته جایزې ورکړې دي.

تر دې راپور دوه ورځې وروسته واشنګټن پوسټ وویل چې داسې شواهد شته چې د روسیې د انعام لپاره پر امریکايي ځواکونو حمله شوې او ځيني کسان وژل شوي دي.

د سپینې ماڼۍ ویاندې، کایلي مک ایناني پرون (د جون په ۳۰مه) وویل چې استخباراتو ولسمشر ډونالد ټرمپ ته د دې مسئلې په اړه وضاحت ورکړی دی.

د امریکا د استخباراتو د ملي ادارې مشر، د سپینې ماڼۍ د چارو د ادارې مشر او د ملي امنیت مشر پرون په دې اړه د کانګرس جمهوري غوښتونکو غړو ته هم معلومات ورکړل.

خو په کانګرس کې د دواړو ګوندونو استازو د امریکا له استخباراتي ادارو غوښتنه کړې چې ټولو ته دې په عمومي غونډه کې معلومات ورکړي او باید دا پرېکړه وشي چې د روسیې لپاره به د دې کار عواقب څه وي.

د روسیې حکومت او طالبانو د واشنګټن پوسټ او نیویارک ټایمز معلومات رد کړي دي.

ایران کې یو ژورنالېست په اعدام محکوم شو

روح‌الله زم خبرنگار ایرانی

هغه ایرانی ژورنالېست په اعدام محکوم شوی چې انلاین کار یې په ۲۰۱۷م کال کې په ایران کې د پراخو اعتراضونو له راپورته کېدو سره مرسته وکړه.

د ایران د قضا ویاند غلام حسین اسماعیلي د جون په ۳۰مه د روح‌الله زم په اړه د محکمې حکم اعلان کړ.

د امد نیوز په نوم د زم وېب‌پاڼې او د پیغام استولو په مشهورو اپ ټلګرام کې د نوموړي کانال خلکو د اعتراضونو د وخت په اړه معلومات ورکول او د ایراني چارواکو په اړه‌یې رسوا کوونکي معلومات خپرول.

د ۲۰۱۷م کال اعتراضونو د ایراني چارواکو په وړاندې د ۲۰۰۹م کال تر انتخاباتو وروسته ناکراریو راهیسې تر ټولو لویه ننګونه وه او په نومبر کې یې د ورته اعتراضونو لپاره هم لاره برابره کړه.

زم مخکې له دې چې تېر ویستل شي او ایران ته ستون شي، په پاریس کې په تبعید کې کار او ژوند کاوه، خو ایران ته تر ستنېدو وروسته د ۲۰۱۹ م کال په اکټوبر کې ونیول شو او اوس له ناڅرګند برخلیک سره مخ دی.

فرانسوي چارواکو د محکمې وروستۍ پرېکړه په سختو ټکو غندلې ده.

د امریکا په ۴ ایالتونو کې د کاروبارونو بیا پیلېدل ځنډېدلي

د جانز هاپکنز پوهنتون د شمېرنو له مخې په متحدایالاتو کې پرون د ۲۴ ساعتونو په ترڅ کې د کوویډ۱۹ ناروغۍ لږترلږه ۴۲ زره تازه پېښې ثبت شوې دي.

په امریکا کې د کوویډ۱۹ ناروغۍ د نویو پېښو له زیاتېدو سره څو نور ایالتونه هم د بارونو، رستورانتونو او نور کاروبارونو د بیا پرانیستو له پرېکړې په شا شول.

په اریزونا، فلوریډا، ټکزاس، نیوجرسي او د شمال او لویدیځ په ډېرو ایالتونو کې چارواکو د رستورانتونو، بارونو، سینماګانو او د ګڼې ګوڼې ځینې نور ځایونه بند کړي او ډېری ایالتونو د ماسک اغوستل او ټولنیزه فاصله جبري کړي دي.

په عین حال کې چارواکي شکایت کوي چې اکثره خلک د ماسک د اغوستو او ټولنیزې فاصلې د رعایتولو لارښوونې له پامه غورځوي.

د جانز هاپکنز پوهنتون د شمېرنو له مخې په متحدایالاتو کې پرون د ۲۴ ساعتونو په ترڅ کې د کوویډ۱۹ ناروغۍ لږترلږه ۴۲ زره تازه پېښې ثبت شوې دي.

د امریکا د ساري ناروغیو جګپوړي کارپوه ډاکتر انتوني فاوسي چې د کرونا ویروس د مخنیوي د ځانګړې کاري ډلې غړی هم دی، پرون د دې ناروغۍ د شمېرو د زیاتېدو په اړه خبرداری ورکړ او ویې ویل، نوې شمېرې په هغو ایالتونو کې ثبت شوې چې د دې ناروغۍ د مخنیوي مقررات یې بې وخته نرم کړل.

فاوسي ویلي چې دوی باید دوه اوونۍ نور هم صبر کړی وای او بیا یې محدودیتونه لیرې کړي وای.

د چین پارلمان د هانګ کانګ لپاره د ملي امنیت قانون تصویب کړ

د چین پارلمان

د چینايي رسنیو د راپورونو له مخې د چین پارلمان د هانګ کانګ لپاره د ملي امنیت قانون نن د جون په ۳۰مه په یوه خوله تصویب کړ.

دا همغه قانون دی چې د چین د حکومت د منتقدینو په باور د هانګ کانګ په نیمه کورواکې سیمه کې بشري حقونو ته ګواښ کوي.

پېکېنګ د دې قانون طرح، د ډیموکراسۍ په پلوۍ له پروسږنو اعتراضونو وروسته جوړه کړه او ویې ویل چې له دې سره به په هانګ کانګ کې ثبات ټینګ شي.

لویدیځو هېوادونو پر دې قانون سخت انتقادونه وکړل.

په هانګ کانګ کې هم د دې قانون پرضد پراخ اعتراضونه وشول ځکه دا وېره شته چې د هغه تطبیق به د سیاسي مخالفینو ځپلو ته لاره پرانېزي.

روغتیا نړیوال سازمان: کرونا ویروس ژر له منځه نه ځي

ټیدروس اډهانوم ګیبریسوس

د روغتیا نړیوال سازمان خبرداری ورکړی چې د کرونا وبا به ژر له منځه ولاړه نشي.

د دغه سازمان مشر ټیدروس اډهانوم ګیبریسوس داسې مهال دا خبرداری ورکړی چې په نړۍ کې په کرونا ویروس د اخته کسانو شمېر تر لسو میلیونو واوښت او له همدې ناروغۍ څخه د مړه شویو شمېره پنځه سوه زرو ته ورسېد.

ټیدروس د جون پر ۲۹ په دې اړه وینا کې وویل ، که څه هم د نړۍ په سطح ځینو هېوادونو د کرونا ویروس په مخنیوي کې پرمختګ کړی دی، خو زیاته یې کړه چې لا هم دا وبا په چټکۍ پر مخ روانه ده.

نوموړي زیاته کړه نړۍ به په راتلونکو میاشتو کې هم لا ډېر زغم، حوصلې، تواضع او سخاوت ته اړتیا ولري.

دا څرګندونې یوه ورځ وروسته له هغه کېږي چې د روغتیا نړیوال سازمان د ۲۴ ساعتونو په موده کې په ټوله نړۍ کې د کرونا ویروس د څه باندې ۱۸۹ زره مثبتو پېښو د ثبتولو اعلان وکړ.

ایران د ډونالد ټرمپ او نورو ۳۵ کسانو د نیولو حکم کړی

د امریکا ولسمشر ډونالد ټرمپ او یو شمېر نور امریکايي چارواکي

ایران د دې هېواد د قدس ځواکونو د پخواني قوماندان قاسم سلیماني د وژلو په تور د امریکا د ولسمشر ډونالد ټرمپ او د نورو ۳۵ کسانو د نیولو حکم ورکړی دی.

د تهران څارنوال علي القاسي مهر د دوشنبې په ورځ وویل چې ولسمشر ټرمپ او د امریکا نور پوځي او سیاسي چارواکي د هغه څه په اړه چې ده قتل او ترورېستي اقدامات وبلل، تورن شوي دي.

دغه ایراني چارواکي ویلي چې له انټرپول څخه غوښتنه شوې چې د سلیماني په وژنه کې د ښکېلو کسانو د نیولو حکم په سره خط ورکړي.

د امریکا متحده ایالاتو دا اعلان د ایران یوه تبلیغاتي وسیله بللې ده.

د ایران لپاره د امریکا متحده ایالاتو ځانګړي استازي براین هوک ویلي چې هېڅوک د ایران دا ډول تبلیغات جدي نه‌ګڼي.

د ایران د قدس ځواکونو پخوانی قوماندان قاسم سلیماني په جنورۍ میاشت کې د امریکایي بې‌پیلوټې الوتکې په برید کې د عراق پلازمېنې بغداد هوایي ډګر ته نږدې ووژل شو.

تر هغه وروسته د واشنګټن او ایران ترمنځ لفظي شخړې ډېرې شوې دي.

تاچي: که هاګ کې زما پر وړاندې قضیه ثبت شوه، سمدستي دنده پرېږدم

د کوسوو ولسمشر هاشم تاچي

د کوسوو ولسمشر وایي، که د هاګ جنایې محکمې قاضي د ده پر وړاندې قضیه ثبت کړي، سمدستي به خپلې دنده پرېږدي.

هاشم تاچي د دوشنبې په ماښام په یوې وینا کې وویل چې پر ده لګېدلي تورونه بې اساسه دي.

پر هاشم تاچي او د کوسوو پر څو نورو چارواکو د جنګي جرمونو تور د ۱۹۹۸ او ۱۹۹۹ میلادي کلونو پرمهال د دې هېواد د سختو جګړو وختونو پورې تړلي دي.

په هاګ محکمې کې څارنوالانو د جون پر ۲۴ هاشم تاچي او د کوسوو څو نور سیاستوال په څو جنګي جرمونو تورن کړل.

هغوی دا چارواکي د کوسوو د جګړو پر مهال د شاوخوا سلو کسانو د وژني مسئول وبلل.

هاشم تاچي، د کوسوو پخپل سر اعلان شوي پوځ په ګډون ځینې وسله والې ډلي د نویمې لسیزې د ویني توییدنې مسئول بولي.

د بلوڅانو یوې بېلتون‌پالې ډلې کراچۍ ښار کې د حملې مسؤلیت واخیست

پاکستان کې د ونډو مارکېټ

د بلوڅانو یوې بېلتون‌پالې ډلې د پاکستان په کراچۍ ښار کې د ونډو پر یوه مارکېټ د نن ورځې د وسله‌والې حملې مسؤلیت واخیست.

پولیس وايي په دې پېښه کې څلور واړه افراطي وسله‌وال وژل شوي دي.

د پولیسو په حواله په راپورونو کې ویل شوي چې په حمله کې دوه ګارډان او یو پولیس هم وژل شوي دي.

راپورونه وايي په وسلو سمبالو حمله کوونکو نن سهار اول لاسي بم کارولی، بیا یې د دغې ودانۍ پر دخولي دروازه حمله او بې‌تفکیکه پر خلکو ډزې کړې دي.

د کراچۍ د پولیسو مشر غلام نبي میمون وویل، څلور واړه حمله کوونکي وژل شوي دي.

د پاکستان د ونډو بازار د رهبرۍ هیئت غړي احمد چینوی وویل: "نن سهار شااوخوا ۱۰:۱۰ دقیقې، څلورو ترورېستانو هڅه وکړه چې ودانۍ ته داخل شي. تاسو ته مخامخ له دې ورودي دروازې یې د درولو هڅه وشوه. ظاهراً درې واړه په یوه ټویوټا موټر کې وو. دوی د ماشینګڼو او نورو وسلو په څېر عصري وسلې درلودې."

د بلوڅانو د ازادۍ غوښتونکي پوځ په نوم یوې بېلتون‌پالې ډلې د دې حملې مسؤلیت منلی دی.

د ونډو دغه مارکېټ د کراچۍ په داسې اقتصادي ساحه کې پروت دی چې د پاکستان دولتي بانک، دغه‌راز نور ملي او نړیوال مالي دفترونه هم ورنږدې دي.

نور راوښيه

XS
SM
MD
LG