د لاسرسۍ وړ لېنکونه

تازه خبر
جمعه ۳۰ غویی ۱۴۰۱ کابل ۰۷:۵۱

افغانستان

چارواکي: خوست کې د یوې کورنۍ ۵ غړي وژل شوي

د خوست نقشه

په خوست کې د یوې کورنۍ ۵ غړي وژل شوي او ۳ ژوبل دي.

چارواکي وايي، تېر ماسخوتن د خوست د اسماعیل خېلو او مندوزیو ولسوالۍ اړوند د چراګاه سیمې د دیګانو په کلي کې نا مالومو وسله‌والو په یو کور برید کړی دی.

نن د دوشنبې په ورځ د خوست د والي ویاند طالب منګل مشال راډيو ته وویل، چې په دې برید کې د یوې کورنۍ ۵ غړي وژل شوي او ۳ تنه ټپیان شوي دي.

ده وویل، په وژل شویو کې درې ماشومان، یوه ښځه او یو تن نارینه دی.

د خوست د والي ویاند زیاته کړه، د پېښې ځای ته پر وخت کشفي ادارې رسېدلي او پېښه تر څېړنې لاندې ده.

د پېښې دوه تنه اوسېدونکو د نوم نه ښودلو په شرط مشال راډیو ته وویل، چې دا کورنۍ په لویه کې منګلو قوم پورې اړه لري او ممکن پېښه هم د کورنیو ستونزو له کبله رامنځته شوې وي.

د ورځې تازه خبرونه دلته ولولئ

طالبانو بهر ته د غنمو پر انتقال بنديز لګولی

د افغانستان ډېری غنم نورو هېوادونو ته لېږدول کېږي چې ورسره پر کور دننه د غنمو او اوړو بيې هم پورته کېږي.

د طالبانو حکومت ويلي دي، له افغانستان څخه بهر نورو هېوادونو ته يې د غنمو پر لېږد بنديز لګولی دی.

د طالبانو ویاند ذبیح الله مجاهد د مالیې وزارت په حواله پرون ماښام پر خپله ټویټر پاڼه لیکلي، دې برخه کې ټولو ګمرکونو ته لارښوونه لېږل شوې ده.

نوموړي د دې ګام لامل په هېواد کې دننه د غنمو د کمښت مخنیوی بللی دی.

ازادي راډیو ته د فراه، هلمند او یو شمېر نورو ولایتونو اوسیدونکو شکایت کړی و چې سږ کال د غنم لو په وخت کې هم د غنمو بیې د نورو کلونو پرتله لوړې دي او لامل یې همدا ښودلی چې پاکستان ته انتقالیږي.

افغانستان کرکټ ملي لوبډلې زېمبابوې سره د کرکټ سيالۍ لري

د افغانستان د کرکټ ملي لوبډله

ټاکل شوې د افغانستان او کوربه هېواد زېمبابوې ترمنځ د روان کال په جون میاشت کې درې یو ورځنۍ او درې شل اوریزه سیالۍ ترسره شي.

د ورزشي اژانسونو د راپورونو له مخې، دغه سیالۍ چې باید په ۲۰۲۰ م کال کې ترسره شوي وای، خو د بېلابېلو ستونزو له امله تر ۲۰۲۲ م کال وځنډېدې.

د زېمبابوې لخوا د اعلان شوي مهالوېش له مخې د دواړو هېوادونو ترمنځ ۵ شل اوریزه او درې یو ورځنۍ سیالۍ اعلان شوي وې.

خو افغان کرکټ بورډ په خپله وروستۍ خبر پاڼه کې د دواړو هېوادونو ترمنځ د دریو یو ورځنیو او دریو شل اوریزه سیالیو یادونه کړې ده.

کندهار کې د کورش سيالۍ پيلېږي

آرشیف

ټاکل شوې راتلونکې اونۍ د کندهار په سپین بولدک کې د ۹ ولایتونو ترمنځ د کورش سیالۍ پیل شي.

د افغانستان د بدني روزنې او ورزش ریاست په خپل فیسبوک پاڼه لیکلي چې دا سیالۍ د زابل، کندهار، هلمند، ارزګان، نيمروز، فراه، هرات، غور او بادغيس ولايتونو ترمنځ دي.

د دې ریاست په وینا، دغه سیالۍ به د جوزا په درېیمه پیل او د او همدې میاشتې تر ۶ مې دوام وکړي.

د یادو سیالیو هدف ورزش ته د ځوانانو هڅول ښودل شوي.

د افغانستان د ١٦ کلنو فوټبال لوبډلې خپله وروستۍ لوبه ايران ته وبايلله

د افغانستان د ۱٦ کلنو فوټبال ملي لوبډله

د افغانستان د ١٦ کلنو فوټبال ملي لوبډلې د مرکزي اسیا د اتلولۍ په لړ کې خپله څلورمه او وروستۍ لوبه له ایران سره تېره ورځ وکړه چې ۱ پر صفر یې وبایلله.

د افغانستان فوټبال فدراسیون په خپل فیسبوک پاڼه لیکلي، چې دا سیالۍ د تاجیکستان په کوربتوب د دغه هېواد په پلازمېنه دوشنبه ښار کې وشوه.

د فدراسیون په وینا، د دغې لوبې سره افغانستان د مرکزي اسیا په اتلولۍ کې د دوو لوبو په مساوي کولو او دوو لوبو په ماتې خوړولو سره خپل سفر پای ته ورساوه.

د مرکزي اسیا د اتلولۍ سیالۍ د تاجکستان په دوشنبې ښار کې روانې دي، چې د افغانستان ترڅنګ د قرغزستان، تاجکستان، ازبکستان او ایران لوبډلو په کې ګډون کړی دی.

د پکتیکا سوداګر د انګور هډې بندر کې د ستونزو حل غواړي

د انګور هډې د بندر یوه څنډه

د پکتیکا یو شمېر سوداګر د انګور هډې په بندر کې د خپلو ستونزو د حل غوښتنه کوي.

د افغانستان د سوداګرې او پانګونې خونې د یوې اعلامیې په خپرولو سره ویلي، چې دغو سوداګرو تېره ورځ د خونې له چارواکو سره په کابل کې لیدلي.

د خونې د اعلامیې په پر بنسټ، د پکتیکا سوداګرو په انګور هډه کې د ګمرکي ستونزو، لوړو تعرفو، او د ټرانزیټ په وړاندې د خنډونو د لرې کېدو غوښتنه کړې.

په اعلامیه کې وړاندې راغلي، چې د خونې چارواکو راغلو سوداګرو ته د ستونزو د هوارۍ په برخه کې د همکارۍ ډاډ ورکړی.

دا په داسې حال کې ده، چې له دې وړاندې هم په انګور هډه کې د افغان سوداګرو په وړاندې د ګن شمېر ستونزو راپورنه ورکړل شوي وو.

طالبان په اماراتو کې سوداګرو ته: په افغانستان کې پانګونه وکړئ

آرشیف: هرات کې د يوې فابریکې انځور

د طالبانو د صنعت او سوداګرۍ وزارت وايي، عربي متحده اماراتو ته تللي افغان پلاوي هلته له مېشتو افغان سوداګرو سره تر ليدنې وروسته له هغوی غوښتي، چې په خپل هېواد کې پانګونه وکړي.

دغه وزارت تېره ورځ په خپل ټويټر پاڼه لیکلي، چې مسوولينو افغان سوداګرو ته په دننه افغانستان کې د هر ډول همکارۍ ډاډ ورکړی.

وزارت وړاندې لیکلي، چې تللي پلاوي افغان سوداګرو ته په خطاب کې ویلي، اوسمهال په افغانستان کې فساد ختم شوی او د هر ډول پانګونې لپاره زمینه برابره ده.

دا د طالبانو له واکمنېدو وروسته په عربي متحده اماراتو کې د طالب چارواکو او افغان سوداګرو لومړنۍ ناسته ده چې کېږي.

دا لیدنه داسې مهال ترسره شوه، چې د طالبانو له واکمنېدو سره ډېرى افغان سوداګرو خپلې پانګې له افغانستانه بهر ته وویستلې.

سرچینې: ترکیه کې د افغانستان د ژغورنې لپاره د مقاومت عالي شورا جوړه شوه

د عکس ښي لور ته د پخواني ولسمشر محمد اشرف غني لومړی مرستیال مارشال عبدالرشید دوستم او چپ لور ته د بلخ پخوانی والي عطا محمد نور

د طالبانو یو شمېر مخالف مشران چې د ترکیې په پلازمېنه انقره کې راغونډ شوي وو، د افغانستان د ژغورنې لپاره د مقاومت عالي شورا جوړه کړه.

یو شمېر سرچینو چې په دې غونډه کې یې ګډون کړی وو، وایي دا غونډه په انقره کې د مارشال عبدالرشید دوستم په کوربه توب د هغه په کور کې جوړه شوې وه.

د دغې غونډې په اړه د ګډې اعلامیې ترڅنګ د ګډونووالو هغه فهرست چې دغو سرچینو ازادي راډیو ته رااستولی، د شاوخوا څلویښتو سیاسي شخصیتونو له ډلې د شلو کسانو نومونه ذکر شوي دي.

په دغو شخصیتونو کې جهادي مشرعبدرب الرسول سیاف، د جمعیت اسلامي د ګوند د بیلې شوې ډلې مشر عطامحمد نور، د حزب وحدت اسلامي افغانستان مشر حاجي محمد محقق، د ولسي جرګې پخوانی مشر میر رحمان رحماني او د یو شمېر نورو سیاسي څېرو نومونه لیدل کېږي.

د غونډې اکثره ګډونوالو چې د طالبانو د پخوانۍ واکمنۍ د وخت د شمالي ټلوالې ډلې غړي دي، په تېر جمهوري نظام کې لوړې دندې درلودې او ډېر ځلې یې هم د هغه نظام مخالف دریځ غوره کړی و.

د ولسي جرګې پخوانی غړی رحمان اوغلو چې اوس په ترکیه کې اوسي او د دې غونډې یو ګډونوال و، پرون د ورځې ناوخته د دې غونډې په اړه ازادي راډیو ته وویل، دا مشران د افغانستان د ژغورنې لپاره د مقاومت د عالي شورا پر جوړولو خبرې کوي او زیاته یې کړه، دوی هڅه کوي چې لس کمېټې جوړې کړي چې یوه یې هم نظامي کمېټه ده چې پرې توافق شوی دی.

دغو سرچینو دغه راز ویلي، چې د طالبانو ضد د ملي مقاومت د جبهې مشر احمد مسعود هم د دې شورا غړیتوب لري.

د طالبانو حکومت چې ترکیه ورسره ښې اړیکې پالي، تراوسه پورې د دې غونډې په وړاندې غبرګون نه دی ښودلی.

د زابل په شاجوۍ کې لسګونه کسان په یوې ناپېژندل شوې ناروغۍ اخته شوي

د افغانستان په عمومي نقشه کې د زابل ولایت موقعیت

د زابل روغتیايي چارواکي وايي، د دغه ولایت په شاجوۍ ولسوالي کې لسګونه کسان په یوې ناپېژندل شوې ناروغۍ اخته شوي دي.

د زابل د عامې روغتیا رييس عبدالحکیم حکیمي پرون رسنیو ته وویل، چې د شاجوۍ په شیخان کلي کې لسګونه ماشومان او لویان په دې ناروغۍ اخته شوي دي.

د ده په وینا تراوسه پورې د شاوخوا سل تنو درملنه شوې خو د ۲۰ تنو نورو حال نازک دی.

ایراني او تاجکستاني چارواکو د افغانستان په اړه خبرې کړي

د تاجکستان ولسمشر امام علي رحمان

د ایران د وسله وال ځواک لوی درستیز محمد باقري د تاجکستان له ولسمشر امام علي رحمان سره د افغانستان په اړه خبرې وکړې.

د ایر اني رسنیو د راپور له مخې، باقري د تاجکستان له ولسمشر سره په خبرو کې وویل، چې د ایران او تاجکستان وسله وال ځواکونه له افغانستان سره په سوله او ثبات کې مرسته کولی شي.

جاپان د افغان ښوونکو د دوو میاشتو معاش ورکوي

ارشیف: بادغیس کې د نجونو د یو ښوونځي ټولګی

جاپان ژمنه وکړه چې د افغان ښوونکو د دوو میاشتو معاش ورکوي.

دا ژمنه د افغانستان لپاره د جاپان سفیر تکاشي اوکادا پرون چهارشنبې د طالبانو د حکومت د پوهنې له مرستیال وزیر مولوي فیض الله جلال سره په کتنه کې وکړه.

د باختر دولتي خبري اژانس د راپور له مخې، ښاغلي اوکادا همداراز وویل، چې په افغانستان کې به د جاپان له لوري نیمګړې پروژې بشپړې کړي.

ده همداراز ویلي، چې په کابل کې به د جاپان سفارت ژر بېرته پرانېستل شي.

هند افغانستان ته د بشري مرستو په دوام ۲ زره ټنه نور غنم ولېږل

په واګه کې د ګمرک کمېشنر راهول ننګارا وویل، دا غنم د هغې ژمنې برخه ده چې پر اساس یې دا هېواد افغانستان ته ۵۰ زره ټنه غنم استوي.

هند له افغانستان سره د بشري مرستو په دوام کې پرون چهارشنبې د پاکستان په پوله کې د واګې له بندره د افغانستان په لور ۲ زره ټنه نور غنم ولېږل.

په واګه کې د ګمرک کمېشنر راهول ننګارا وویل، دا غنم د هغې ژمنې برخه ده چې پر اساس یې دا هېواد افغانستان ته ۵۰ زره ټنه غنم استوي.

تراوسه پورې د هند له لوري افغانستان ته ۱۰ زره ټنه غنم رسېدلي دي.

هند په داسې حال کې افغانستان ته ۵۰ زره ټنه غنم مرسته کوي، چې په نړۍ کې د اوکراین د جګړې له کبله د غنمو بیه لوړه شوې او هند په نړیوالو بازارونو کې د غنمو د تقاضا د ډېرېدو له کبله د غنمو صادرات درولي دي.

د پاکستان پوځ او ټي ټي پي ترمنځ کابل کې پر اوربند توافق شوی

د پاکستاني طالبانو تحريک جنګيالي

د طالبانو د حکومت وياند ذبیح الله مجاهد په خپله ټویټر پاڼه لیکلي، کابل کې د پاکستاني طالبانو او پوځ ترمنځ د مذاکراتو کوربه‌توب يې کړی.

‏نوموړي ويلي، د مذاکراتو په جریان کې په اړوندو موضوعاتو کې د پام وړ پرمختګ ترڅنګ په لنډمهاله اوربند هم توافق وشو.

دغه راز مجاهد وايي، د افغانستان اسلامي امارت د خیر غوښتنې په نیت کوښښ کوي چې د مذاکراتو سلسله په بریالي شکل پرمخ ولاړه شي او له دواړو طرفونو څخه دیوبل د زغملو او انعطاف هیله کوي.

هرات: زرګونه مېرمنې د ورېښمو د توليد په کارو بار بوختې دي

آرشیف

د هرات د سوداګرۍ او پانګونې خونه وايي، په دې ولایت کې ۳۰۰۰ مېرمنې د ورېښمو د تولید په کاروبار کې مصروفې دي.

د دې خونې مرستیال توریالي غوثي نن ازادي راډيو ته ویل، دا مېرمنې د هرات په انجیل، کرخ، ګوذرې او زنده جان ولسوالیو کې د ورېښمو په کاروبار کې مصروفې دي.

ښاغلی غوثي وايي، دا مېرمنې له ورېښمو خولۍ، نېکټايي، بوټ، رومال، لباس او چپن جوړوي چې په مناسبه بیه یې بازار ته وړاندې کوي.

که څه هم ښاغلي غوثي د ورېښمو د ارقامو په اړه جزئیات ور نه کړل خو وې ویل چې سږ کال د ورېښمو تولید ډېر شوی دی.

ښاغلي غوثي دا هم وویل چې د ورېښمو ډېر تولیدات بهرنیو هېوادونو ته صادرېږي.

د افغانستان بانک نن چهارشنبه ۱۳ میلیونه ډالره لیلاموي

د افغانستان بانک د ډالرو په وړاندې د افغانیو د ارزښت لوړولو په خاطر دا کار کوي.

د افغانستان بانک په وېبپاڼه کې راغلي دي چې د ډالرو په وړاندې د افغانیو د ارزښت لوړولو په خاطر دا کار کوي.

د افغانستان بانک له ټولو بانکونو او صرافیو غوښتنه کړې چې په دې داوطلبۍ کې ګډون وکړي او د لیلام ګټونکي اړ دي چې خپل حساب نن تصفیه کړي.

د افغانستان د صرافانو ټولنې مرستیال حاجي داد ګل نن ازادي راډيو ته وویل، که څه هم په وروستۍ اوونۍ کې د افغانیو په وړاندې د ډالرو ارزښت لوړ شوی دی خو د ۱۳ میلیونه ډالر به د افغانیو د ارزښت په لوړولو مثبت تاثیر وکړي.

تېره اوونۍ هم د افغانستان بانک د ډالرو په وړاندې د افغانیو د ارزښت لوړولو په خاطر ۱۲ میلیونه ډالره لیلام کړي وو.

د افغانستان بانک داسې مهال د افغانیو د ارزښت لوړولو په خاطر د ډالرو د لیلام خبره کوي چې نن یو ډالر په ۹۰ افغانۍ او ۵۰ پوله د کابل په بازارونو کې تبادله کېږي.

فراه: د يوې سرګلولې د چاودنې له امله درې ماشومانو ته مرګ ژوبله اوښتې

د افغانستان په عمومي نقشه کې د فراه ولايت موقعيت

د طالبانو ځايي امنيتي مسؤلين وايي، په فراه ولایت کې د راکټ د یوې مرمۍ چاودنې یو ماشوم وژلی او دوه نور یې ټپیان کړي دي.

د فراه ولایت د امنیه قوماندانۍ ویاند عارف عدیل آزادۍ راډیو ته وویل چې پېښه پرون- د ثور په ۲۷مه، مازیګر مهال د بالابلوک ولسوالۍ په آب خرما سیمه کې هغه مهال وشوه چې دې ماشومانو د راکټ له سرګلولې سره لوبې کولې.

په افغانستان کې د تېرو څلورو لسیزو له جګړو د پاتې مرمیو په وروستیو چاودنو کې ډېر کله ماشومانو ته مرګ ژوبله اوړي.

نور راوښيه

XS
SM
MD
LG