د لاسرسۍ وړ لېنکونه

تازه خبر
جمعه ۱۳ چنګاښ ۱۳۹۹ کابل ۰۲:۵۲

نړۍ

د بالیووډ لوبغاړي سوشانت سېنګهـ راجپوت مړی د هغه کور کې وموندل شو

سوشانت سېنګهـ راجپوت

هندي سینما، بالیووډ نن یو بل تکړه لوبغاړی هم له لاسه ورکړ.

ګڼو هندي رسنیو راپور ورکړی چې د سوشانت سېنګهـ راجپوت مړی نن په ممبی کې د بندرا په سیمه کې د هغه په کور کې پيدا شوی.

ویل کېږي چې دی له څو میاشتو خپګان نیولی و او مړی یې په داسې حالت کې موندل شوی چې ځان‌یې زندۍ کړی و.

پولیسو ویلي چې د دې پېښې په اړه پلټنې کوي.

سوشانت د پي کې په نوم په یوه فلم کې له وتلي لوبغاړي عامر خان او تر هغه وروسته د هند د کرکټ د ملي ټیم د پخواني کپټان ام اس ډوني په ژوند باندې په جوړ شوي فلم کې لوبېدلی.

نور ګڼ فلمونه او ټلوېزیوني ډرامې یې لوبولي او وروستی فلم‌یې چینچورې نومېده.

د دغه فلم موضوع د ځان وژنې د مخنیوي په لارو چارو څرخېده او خلکو ته په‌کې دا پيغام ورکول کېده چې ځان وژنه وروستۍ حل لار نه‌ده.

ګڼو پېژندل شویو فلمي لوبغاړو د سوشانت سېنګهـ راجپوت په مړینې خواشیني ښودلې.

اکشي کمار په خپل ټویټر لیکلي چې د سوشانت وروستي فلم چینجورې وښوده چې هغه څومره یو تکړه لوبغاړی و. سنجې دت لیکلي چې د سوشانت په مرګ خبرې ترې هېرې دي او ډېر حیرانه شوی دی.

د ورځې تازه خبرونه دلته ولولئ

ترکیه کې د بندیزونو نرمېدل، د ودونو سالونونه بېرته پرانیستل شول

ارشیف

په ترکیه کې، چې د کرونا ویروس د خپرېدو له کبله له ډېرې مودې راهیسې د ودونو سالونونه تړل شوي وو، بېرته پرانیستل شول.

سیردال امان دېرش کلن دی چې د چارشنبې په ورځ یې په دیاربکر کې واده وو.

هغه وویل: "موږ په دې بدبختۍ کې د نېکمرغۍ احساس کوو چې په لومړۍ ورځ مو د واده سالون ونیولای شوای."

د واده د سالونونو پرانیستنه روانه اوونۍ د ترکيې له هغو اقداماتو یو دی چې د کرونا ویروس په خاطر يې د لګېدلو بندیزونو د لیرې کولو په برخه کې کړي دي.

د جون میاشتې په پیل کې ترکیې رستورانونه او کافۍ پرانیستې او پر سفر بندیز يې روانه اوونۍ پای ته ورساوه.

په ترکیه کې د کوویډ۹ دوه لکه مثبتې پيښې ثبت شوي او پنځه زره یو سل او پنځوس کسان له دې ویروسه مړه شوي دي.

د امریکا کانګرس پر چین بندیزونه تصویب کړل

د امریکا د کانګرس یوه څنډه

د امریکا کانګرس پر چین د هانګ کانګ په تړاو بندیزونه تصویب کړي دي.

امریکايي کانګرس د هانګ په تړاو نوي بندیزونه وروسته له هغې تاییدوي چې بیجینګ، د ملي امنیت یو قانون نافذ کړ.

دا نوی قانون په نړۍ کې د یو شمېر هېوادونو له خوا غندل شوی دی.

د امریکا سنا د پنجشنبې په ورځ په اکثریت د هانګ کانګ د کورواکۍ د طرحې ملاتړ وکړ.

تر دې یوه ورځ مخکې د امریکا استازو جرګې هم ورته پرېکړه کړې وه.

دا مصوبه اوس ولسمشر ټرمپ ته استول شوې چې توشیح یې کړي.

مصوبه کې هغه بانکونه جریمه کېږي چې له هغو چینایي چارواکو سره راکړه ورکړه کوي څوک چې دا نوی قانون عملي کوي.

د امریکا د کانګرس دا مصوبه د چین د کمونیست ګوند هغه چارواکي هم په نښه کوي چې د نوې قانون د نفاذ مسئولیت لري او هغه پولیس چې د هانګ کانګ اعتراضونه یې ځپلي دي.

مخکې له دې چې د امریکا سنا دا نوي بندیزونه نافذ کړي بیجینک پر واشنګټن ټینګار کړی و چې د هانګ کانګ په چارو کې د لاسوهنه بنده کړي او د دوام په صورت کې یې د ځوابي اقداماتو خبرداری ورکړی و.

بریتانیا په ۱۹۹۷ میلادي کال کې هانګ کانګ د لږ تر لږه پنځوسو کلونو لپاره د ځینو ازاديو په تضمین چین ته وسپاره.

منتقدان وايي، د چین نوی قانون چې په کې د عمري بند تر سزا پورې شامل دي، د دې ازادیو د پای ته رسېدو په معنی دی.

اروپايي ټولنه: روسیه دې د ټولپوښتنې پرمهال د بې نظمیو په اړه څېړنې وکړي

بروکسل کې د اروپايي ټولنې دفتر

اروپايي ټولنې له روسیې غوښتي، څو د هغو راپورونو په اړه څېړنې وکړي چې په دې هېواد کې د ملي ټولپوښتنې پرمهال د بې نظمیو په اړه ورکړل شوي دي.

په دې ټولپوښتنه کې، د روسیې په اساسي قانون کې د بدلون طرحه تایید شوه.

په وړاندیز شویو بدلونونو کې د نورو مسئلو ترڅنګ، تر ۲۰۳۶ میلادي کال پورې په واک کې د ولادیمیر پوتین احتمالي پاتې کیدو ته هم لاره هوارېږي.

کرملین د پنجشنبې په ورځ دا ټولپوښتنه وستایله، او هغه یې پر ولادیمیر پوتین د باور په برخه کې یوه بریالۍ ټولپوښتنه وبلله.

تقریباً په سلو کې ۷۸ کسانو په اساسي قانون کې تر ۲۰۰ د زیاتو مواردو د بدلون په پلوۍ رای ورکړي دي.

پوتین په ټلویزوني وینا کې د ټولپوښتنې د پایلو په غبرګون کې وویل: "ما د روسیې په اساسي قانون کې د بدلونونو د اړتیا په اړه ډېرې خبرې وکړې، دا زموږ د سیاسي سیستم د ټینګښت لپاره دي او همدارنګه زموږ ټولنیزو تضمینونو او مځکنۍ بشپړتیا د ټنګښت لپاره مهم دي، همدارنګه زموږ د معنوي او تاریخي او اخلاقي ارزښتونو په اړه دي چې نسلونه سره راټولوي، زه په عین حال کې هغه کسان چې د دې پر ضد یې رایې ورکړې هم درک کوم."

د رای ورکولو په ځینو مرکزونو کې د بې نظمیو راپورنه او یو شمېر هغو خبریالانو او فعالانو ته چې د رایې ورکولو د څارنې هڅه یې کوله ګواښونه، د دې سبب شول چې د اروپايي ټولنې ۲۷ غړي هېوادونه په دې اړه سمدستي د څېړنو غوښتنه وکړي.

د اروپايي ټولنې ویاند پیټرسټانو وویل، تمه لري چې ددې راپورونو په اړه به جدي څېړنه وشي ځکه د نوموړې په وینا دا جدي تورونه دي.

د امریکا له لوري وینزویلا ته د تلونکو بېړیو ضبطولو هڅه

ارشیف

امریکا هڅه کوي چې د ایران د تېلو بیړۍ چې وینزویلا ته روانې دي، ضبط کړي.

امریکايي څارنوالانو یوې محکمه کې غوښتنه کړې چې د ایران د تېلو بار څلور ټانکرونه چې وینزویلا ته روان دي ونیسي.

دا د امریکا د بندیزونو سره مخ او د امریکا ضد پر دې دوو متحدانو د واشنګټن له خوا د فشار راوړلو تازه هڅه ده.

د دې بېړیو د ضبطولو غوښتنه او په اړه یې شکایت د چارشنبې په ورځ د ډي سي ایالت په یوه فډرالي محکمه کې ثبت شوی، او په کې ادعا شوې چې د تېلو دا خرڅلاو د یو داسې ایراني سوداګر له خوا کېږي چې د ایران د سپاه پاسداران انقلاب ځواک سره تړاو لري.

د ایران سپاه پاسداران ځواک امریکا د بهرنیو ترهګرو سازمانونو په لیست کې شامل کړی.

په محکمه د ثبت شوې ادعا له مخې د امریکا د قدس ځواک د ۲۰۱۸ میلادي کال د سېپټېمبر میاشتې راهېسې د انتقال د یوې شبکې له لارې چې بندیزونه پرې لګېدلي او لسګونه د انتقال تنظیمونکي، بېړۍ او اسانتیا برابرونکي په کې ښکېل دي، تېل لېږدولي دي.

په شکایت کې دا څلور تېل لېږدونکي ټانکرونه د بیلا، بیرینګ، پانډي او لونا په نومونو یاد شوي چې د امریکايي څارنوالانو په وینا یو اعشاریه یو میلیونه بیرله تېل په کې بار دي.

د ویشتل شوې اوکراینۍ الوتکې قربانیانو کورنیو ته د تاوان ورکولو غوښتنه وشوه

په دې الوتکه کې ۱۷۶ کسان سپاره وو، چې له تهران څخه د اوکراین پلازمېنې کییف ته روانه وو.

د افغانستان په شمول د هغو هېوادونو چارواکو چې وګړي یې د روان کال جنوري میاشت کې په ایران کې د نسکورې شوې اوکراینۍ الوتکې پېښه کې وژل شوي، یو ځل بیا د دې پېښې په اړه د څېړنو او د قربانیانو کورنیو ته د تاوان ورکولو غوښتنه کړې.

د افغانستان د بهرنیو چارو وزارت د پنجشنبې په ورځ په یو بیان کې وویل، د افغانستان، کاناډا، بریتانیا، سویډن او اوکراین د بهرنیو چارو وزیرانو د ویډیو کنفرانس له لارې خبرې وکړې او د همکارۍ یوه هوکړه یې لاسلیک کړه.

د یادو هېوادونو د بهرنیو چارو وزیران په ایران کې د نسکورې شوې اوکراینۍ الوتکې د قربانیانو د کورنیو د ملاتړ او ورته د ځواب ویلو د همغږۍ د نړیوالې ډلې غړي دي.

د خبرپاڼې په وینا، دا هوکړه لیک د ایران سره د خبرو اترو لپاره لاسلیک شوی، څو د دې هوايي پېښې بشپړې څېړنې وشي، او د قربانیانو کورنیو ته تاوان ورکړل شي.

ایران لومړی ویلي وو، دا اوکراین د هوايي شرکت دا مسافر وړونکې الوتکه د فني ستونزې له کبله نسکوره شوې، خو وروسته یې ومنله چې په تېروتنه د سپاه پاسداران ځواک په توغندي لګېدلې ده.

په دې الوتکه کې ۱۷۶ کسان سپاره وو، چې له تهران څخه د اوکراین پلازمېنې کییف ته روانه وو.

د الوتکې ټولې سپرلۍ چې ۱۳ افغانان هم په کې وو، په پېښه کې ووژل شول.

د امریکا استخبارات د روسیې په اړه قانون جوړوونکو ته وضاحت ورکوي

د امریکا بیرغ

ټاکل شوې د امریکا لوړپوړي استخباراتي چارواکي نن پنجشنبه د نیویارک ټایمز د هغه راپور په اړه قانون جوړوونکو ته وضاحت ورکړي چې په‌کې راغلي، روسي استخباراتو طالبانو ته د امریکایي ځواکونو د وژنې لپاره انعامونه ورکړي دي.

په دغه راپور کې چې تېره جمعه خپور شو راغلي، د روسيې د پوځي استخباراتو یوې پټې څانګې طالبانو ته دغه انعامونه ورکړي دي.

په نننۍ غونډه کې د 'سي‌ای‌اې' مشره جینا هاسپل او د امریکا د ملي استخباراتو ادارې مشر جان راتکلف برخه اخلي.

د امریکا ولسمشر ډونالد ټرمپ پرون وویل، ده ته د هغه څه په اړه معلومات نه‌دي ورکړل شوي چې ویل کېږي روسیې طالبانو ته د امریکایي ځواکونو د وژنې لپاره پیسې ورکړي.

د امریکا د قانون جوړوونکو او استخباراتي چارواکو نننۍ غونډه داسې مهال جوړېږي چې امریکا کې قانون جوړوونکو پر روسیې د بندیزونو د ډېرېدو غوښتنه کړې ده.

روسیه اوس‌مهال د دې لپاره د امریکا له یو شمېر بندیزونو سره مخ ده چې د اوکراین په ختیځ کې د روسي پلوه بېلتون غوښتونکو ملاتړ کوي.

سپینه ماڼۍ: که پر روسیې تورونه تأیید شي امریکا به سخت ځواب ورکړي

ارشیف، سپینه ماڼۍ

د سپینې ماڼۍ ویاند رابرټ اوبراین وایي، که چېرته دا راپورونه تأیید شي چې روسیې طالبانو ته د دې لپاره انعامونه ورکړي چې په افغانستان کې امریکایي ځواکونه او د هغوی متحدان ووژني، متحده ایالات به سخت ځواب ورکړي.

ښاغلي اوبراین دا خبره پرون په واشنګتن کې خبریالانو ته وکړه، خو په دې اړه‌یې نور تفصیل ورنه‌کړ.

تر دې مخکې پرون په واشنګټن کې د متحده ایالاتو د بهرنیو چارو وزیر مایک پومپیو د همدې موضوع په اړه د یوه خبریال د پوښتنې په ځواب کې وویل: "کله چې موږ داسې کره معلومات ترلاسه کړو چې روسان د امریکایانو ژوند په خطر کې اچوي، نو موږ به په جدي توګه ځواب ورکړو. لکه تاسو چې وویل، موږ به خبرداری ورکوو؟ موږ به خبرې ورسره کوو؟ زه فکر کوم چې ځواب به خامخا وي او ورکوو به‌یې."

نیویارک ټایمز ورځپاڼې تېره جمعه راپور ورکړ چې د روسې پوځي استخباراتو د امریکایانو د وژلو لپاره طالبانو ته انعامونه ورکړي او دا راپور د فبرورۍ په میاشت کې له ولسمشر ټرمپ سره شریک شوی دی، تر دې راوروسته ښاغلی ټرمپ تر فشار لاندې راغلی دی.

د سپینې ماڼۍ ویاند، اوبراین وویل چې د امریکا د مرکزي استخباراتو یوې غړې ولسمشر ټرمپ ته په دې اړه شفاهي خبره کړې وه او په لیکلې بڼه‌یې څه نه‌و وړاندې کړي.

د امریکا په متحده ایالاتو کې د روسیې سفارت دا راپورونه رد کړي او طالبانو هم ویلي دي چې دوی له روسیې انعامونه نه‌دي ترلاسه کړي.

ایران دوه سویډنیان د مخدره موادو د قاچاق په تور نیولي

ارشیف، د ایران امنیتي ځواکونه

دوه سویډنیان د مخدره موادو د قاچاق په تور په ایران کې نیول شوي دي. دا خبر پرون تسنیم اژانس ورکړ چې د ایران د سپاه پاسداران انقلاب مربوط ده.

دغه اژانس وایي چې چارواکو ډېره اندازه مخدره مواد او مصنوعي خطرناکه نشه‌یي مواد ترلاسه کړي دي.

په راپور کې دا نه‌دي ویل شوي چې دا مواد او دا کسان چېرته نیول شوي دي.

له افغانستانه د ایران له لارې مخدره مواد اروپا ته قاچاقېږي، خو تهران په دې تورن شوی دی چې لوېدیځوال د دې لپاره نیسي چې له هغوی څخه د مذاکراتو پر مهال د یوه امتیاز په توګه استفاده وکړي.

'امام علي رحمان دې هغه مسوده نه‌تصویبوي چې د بیان ازادۍ مخه نیسي'

د تاجکستان ولسمشر امام علي رحمان

د بشري حقونو فعالانو او د رسنیو څارونکو د تاجکستان له ولسمشر امام علي رحمان څخه وغوښتل چې هغه مسوده تصویب نه‌کړي چې د بیان د ازادۍ مخه نیسي.

د تاجکستان پارلمان تېره میاشت موافقه وکړه، که څوک د کرونا په اړه درواغ معلومات د رسنیو، انټرنټ یا ټولنیزو رسنیو له لارې خپروي هغوی به جریمه کېږي او تر ۱۵ ورځو به په توقیف کې وي.

اوس دا مسوده ولسمشر ته د تصویب لپاره استول شوې ده.

په نیویارک کې مېشتې د خبریالانو د خوندیتوب کمېټې د سې شنبې په ورځ په یوه بیان کې وویل چې په دې مسوده کې دا روښانه نه‌ده چې د 'کووېډ-۱۹' ناروغۍ په اړه درواغ معلومات به څرنګه معلومېږي او د دې قانون په مټ چارواکي دا واک ترلاسه کوي چې د دې ناروغۍ په پلمه سانسور وکړي.

د خبریالانو د خوندیتوب د ټولنې د اروپا او مرکزي اسیا همغږه کوونکې ګلنازې وویل چې ولسمشر رحمان باید د دې مسودې له تصویبه ډډه وکړي.

په پاریس کې مېشتې د بې‌پولې خبریالانو ټولنې هم ورته اندېښنه ښکاره کړې ده.

په تاجکستان کې د رسنیو د ملي خپلواکې ټولنې مشر نورالدین قرشیبایوف وویل چې دا قانون به چارواکو ته د ولسمشرۍ تر انتخاباتو مخکې د رسنیو د ځپلو لپاره ډېر واک ورکړي.

ټاکل شوې ده د روان کال په وروستیو کې په تاجکستان کې د ولسمشرۍ ټاکنې ترسره شي.

اروپايي ټولنې د پاکستان 'پي ای اې' او 'پي وي ټي' شرکتونو جواز ځنډولی

د پاکستان د نړیوال هوايي شرکت یا 'پي ای اې' الوتکه

د اروپايي ټولنې د هوايي خوندیتوب ادارې د پاکستان د نړیوال هوايي شرکت یا 'پي ای اې' او وېژن ايیر انټرنشنل یا 'پي وي ټي' جوازونه ځنډولي دي.

دا شرکتونه به راتلونکې شپږ میاشتې د دې ټولنې په هوايي قلمرو کې پروازونه نه‌شي کولای.

دا اقدام وروسته له هغه شوی چې د پاکستان د هوايي چلند وزیر غلام سرور خان وویل چې د ۲۶۲ پیلوټانو پر جواز شک لري او د دغو کسانو دندې يې وځنډولې.

د 'پي ای اې' ویاند عبدالله حفیظ نن ازادي راډيو ته وویل چې له اروپايي ټولنې سره په دې اړه په تماس کې دي.

ښاغلی حفیظ زیاتوي: "که خدای دې نه‌کوي کومه پېښه شوې وی او د پلټنو لپاره‌یې بهرنيان راغلي وی، خبره به تر دې هم خرابه شوې وی، نو ښه شو چې اوس دا اقدامات وشول."

ټول هغه مسافر به چې پروازونه‌یې اروپايي ټولنې هېوادونو ته وو، یو انتخاب ولري چې خپل پرواز بلې وروستۍ نېټې ته وغځوي او یا بېرته خپلې پیسې واخلي.

'پي ای اې' وايي چې په موقتي توګه به اوس‌مهال خپل ټول پروازونه ودروي، خو وروسته‌یې وویل چې د دوو ورځو وقفه‌یې موندلې چې د جولای له لومړۍ تر درېيمې يې په اروپا او بریتانیا کې د الوتکو د کېناستو اجازه ترلاسه کړې ده.

تېره اوونۍ د پاکستان د هوايي چلند وزیر غلام سرور خان وویل چې د ۲۶۲ پیلوټانو جوازونه یا له وخته تېر شوي او یا ځيني تقاعد شوي دي چې په دغو کې ۱۴۱ د 'پي ای اې'، نهه د اییر بلو، ۱۰ د سیرین ايیر، او ۱۷ د شاهین ایرلاین دي.

د پاکستان د پیلوټانو ټولنې ویلي چې په دې اړه باید پلټنې وشي ځکه یو شمېر پیلوټان ډېر لوستي او تجربه لرونکي کسان دي.

عمران خان کراچۍ کې د ونډو پر بازار د حملې تور پر هندوستان پورې کړ

کراچۍ کې د ونډو پر بازار د حملې سیمه

د پاکستان صدراعظم عمران خان په کراچۍ ښار کې د ونډو پر بازار د حملې تور پر هندوستان پورې کړی دی.

عمران خان دا خبرې پرون د سې شنبې په ورځ د خپل هېواد پارلمان ته په خبرو کې وکړې.

ده زیاته کړه: "موږ هېڅ شک نه‌لرو چې د دې حملې تر شا هندوستان دی. د تېرو دوو اوونیو پر مهال زما کابینه خبره وه چې دا ډول یوه حمله به کېږي. وزیرانو هم ماته ویلي وو. زموږ ټولې ادارې تیارسئ وې. موږ د خپلو استخباراتي ادارو په مرسته په بریالیتوب سره لږ تر لږه څلور حملې پر شا تمبولې دي. دوه حملې په اسلام‌اباد کې وې."

تر دې مخکې د پاکستان د بهرنیو چارو وزیر شاه محمود قریشي هم ورته تورونه پورې کړي وو. هندوستان په ځواب کې د پاکستان دا تورونه رد کړي او د دې هېواد د بهرنیو چارو وزارت د سې شنبې په ورځ په یوه اعلامیه کې دا تور د خندا وړ بللی دی.

د دوشنبې په ورځ (د چنګاښ په ۹مه، د جون په ۲۹مه نېټه) وسله‌والو د کراچۍ د ونډو پر بازار حمله وکړه چې د امنیتي ځواکونو سره په نښته کې ټول څلور حمله کوونکي ووژل شول.

د ونډو دا بازار د کراچۍ په داسې اقتصادي ساحه کې پروت دی چې د پاکستان دولتي بانک، دغه‌راز نور ملي او نړیوال مالي دفترونه هم ورنږدې دي.

اروپايي اتحاديې ته د ۱۵ هېوادونو وګړو ته د سفر اجازه ورکړل شوه

د اروپايي اتحاديي بیرغ

له نن (د جولاۍ لومړۍ) څخه د نړۍ د ۱۵ هېوادونو وګړي اروپايي اتحادیې ته د سفر اجازه لري.

اروپايي اتحادیې پرون وویل چې کاناډا، مراکش، نوی زیلاند، رواندا، صربیا، جنوبي کوریا، ګرجستان، استرالیا، الجیریا، تایلند، تونس او اروګوای په خوندي یا مصون زون کې شامل هېوادونه دي او وګړو ته‌یې د ورتګ اجازه ورکوي.

خو د امریکا متحده ایالات‌یې له دې اعلانه مستثنی کړی دی ځکه هلته د کرونا ویروس د مثبتو پېښو شمېر د زیاتېدو په حال کې دی.

د اتحادیې ۲۷ استازو پرون وویل چې په امریکا، روسیه، برازیل، هند او ترکیه کې د کرونا ویروس مثبتې پېښې زیاتې دي او وګړي یې اروپايي ټولنې ته د سفر اجازه نه‌لري.

اروپايي اتحادیې ویلي چې له چینه به د وګړو ورتګ ته هغه وخت اجازه ورکړي چې د چین حکومت له اروپا د مسافرو پر ورتګ بندیز لیرې کړي.

اروپايي اتحادیې د سفر د اجازې راپور هره میاشت دوه واره نوی کېږي. هغه هېوادونه چې اروپايي اتحادیې په مصون زون کې شامل کړي او د وګړو لپاره‌یې د سفر ازادي اعلان کړې، باید د اروپايي اتحادیې خلکو ته د ورتګ اجازه ورکړي.

د امریکا استخباراتو ټرمپ ته پر روسیې د تورونو په اړه معلومات ورکړل

د امریکا ولسمشر ډونالد ټرمپ

سپینې ماڼۍ ویلي چې د امریکا استخباراتو ولسمشر ډونالد ټرمپ ته پر روسیه د تازه لګېدلو تورونو په اړه معلومات ورکړي دي.

نیویارک ټايمز ورځپاڼې د جون په ۲۶مه، په یوه راپور کې وویل چې روسیې په افغانستان کې د امریکايي ځواکونو د وژلو لپاره طالبانو ته جایزې ورکړې دي.

تر دې راپور دوه ورځې وروسته واشنګټن پوسټ وویل چې داسې شواهد شته چې د روسیې د انعام لپاره پر امریکايي ځواکونو حمله شوې او ځيني کسان وژل شوي دي.

د سپینې ماڼۍ ویاندې، کایلي مک ایناني پرون (د جون په ۳۰مه) وویل چې استخباراتو ولسمشر ډونالد ټرمپ ته د دې مسئلې په اړه وضاحت ورکړی دی.

د امریکا د استخباراتو د ملي ادارې مشر، د سپینې ماڼۍ د چارو د ادارې مشر او د ملي امنیت مشر پرون په دې اړه د کانګرس جمهوري غوښتونکو غړو ته هم معلومات ورکړل.

خو په کانګرس کې د دواړو ګوندونو استازو د امریکا له استخباراتي ادارو غوښتنه کړې چې ټولو ته دې په عمومي غونډه کې معلومات ورکړي او باید دا پرېکړه وشي چې د روسیې لپاره به د دې کار عواقب څه وي.

د روسیې حکومت او طالبانو د واشنګټن پوسټ او نیویارک ټایمز معلومات رد کړي دي.

ایران کې یو ژورنالېست په اعدام محکوم شو

روح‌الله زم خبرنگار ایرانی

هغه ایرانی ژورنالېست په اعدام محکوم شوی چې انلاین کار یې په ۲۰۱۷م کال کې په ایران کې د پراخو اعتراضونو له راپورته کېدو سره مرسته وکړه.

د ایران د قضا ویاند غلام حسین اسماعیلي د جون په ۳۰مه د روح‌الله زم په اړه د محکمې حکم اعلان کړ.

د امد نیوز په نوم د زم وېب‌پاڼې او د پیغام استولو په مشهورو اپ ټلګرام کې د نوموړي کانال خلکو د اعتراضونو د وخت په اړه معلومات ورکول او د ایراني چارواکو په اړه‌یې رسوا کوونکي معلومات خپرول.

د ۲۰۱۷م کال اعتراضونو د ایراني چارواکو په وړاندې د ۲۰۰۹م کال تر انتخاباتو وروسته ناکراریو راهیسې تر ټولو لویه ننګونه وه او په نومبر کې یې د ورته اعتراضونو لپاره هم لاره برابره کړه.

زم مخکې له دې چې تېر ویستل شي او ایران ته ستون شي، په پاریس کې په تبعید کې کار او ژوند کاوه، خو ایران ته تر ستنېدو وروسته د ۲۰۱۹ م کال په اکټوبر کې ونیول شو او اوس له ناڅرګند برخلیک سره مخ دی.

فرانسوي چارواکو د محکمې وروستۍ پرېکړه په سختو ټکو غندلې ده.

د امریکا په ۴ ایالتونو کې د کاروبارونو بیا پیلېدل ځنډېدلي

د جانز هاپکنز پوهنتون د شمېرنو له مخې په متحدایالاتو کې پرون د ۲۴ ساعتونو په ترڅ کې د کوویډ۱۹ ناروغۍ لږترلږه ۴۲ زره تازه پېښې ثبت شوې دي.

په امریکا کې د کوویډ۱۹ ناروغۍ د نویو پېښو له زیاتېدو سره څو نور ایالتونه هم د بارونو، رستورانتونو او نور کاروبارونو د بیا پرانیستو له پرېکړې په شا شول.

په اریزونا، فلوریډا، ټکزاس، نیوجرسي او د شمال او لویدیځ په ډېرو ایالتونو کې چارواکو د رستورانتونو، بارونو، سینماګانو او د ګڼې ګوڼې ځینې نور ځایونه بند کړي او ډېری ایالتونو د ماسک اغوستل او ټولنیزه فاصله جبري کړي دي.

په عین حال کې چارواکي شکایت کوي چې اکثره خلک د ماسک د اغوستو او ټولنیزې فاصلې د رعایتولو لارښوونې له پامه غورځوي.

د جانز هاپکنز پوهنتون د شمېرنو له مخې په متحدایالاتو کې پرون د ۲۴ ساعتونو په ترڅ کې د کوویډ۱۹ ناروغۍ لږترلږه ۴۲ زره تازه پېښې ثبت شوې دي.

د امریکا د ساري ناروغیو جګپوړي کارپوه ډاکتر انتوني فاوسي چې د کرونا ویروس د مخنیوي د ځانګړې کاري ډلې غړی هم دی، پرون د دې ناروغۍ د شمېرو د زیاتېدو په اړه خبرداری ورکړ او ویې ویل، نوې شمېرې په هغو ایالتونو کې ثبت شوې چې د دې ناروغۍ د مخنیوي مقررات یې بې وخته نرم کړل.

فاوسي ویلي چې دوی باید دوه اوونۍ نور هم صبر کړی وای او بیا یې محدودیتونه لیرې کړي وای.

نور راوښيه

XS
SM
MD
LG