د لاسرسۍ وړ لېنکونه

تازه خبر
چهارشنبه ۸ کب ۱۴۰۳ کابل ۰۲:۰۶

نړۍ

د جرمونو نړیوالې محکمې د خپلو کارکوونکو په اړه د ټرمپ پرېکړه رد کړ

د جرمونو نړیواله محکمه
د جرمونو نړیواله محکمه

د جرمونو نړیوالې محکمې (ای سي سي) د امریکا متحده ایالاتو د ولسمشر دا پرېکړه رد کړه چې د (ای سي سي) پر هغو څارنوالانو چې په افغانستان کې جنګي جرمونه څېړي، بندیزونه لګوي.

د جرمونو نړیوالې محکمې په یوه بیان کې چې پرون خپور شو، د ډونالد ټرمپ پر پرېکړه ژوره خواشیني څرګنده کړه. په بیان کې دې محکمې ویلي چې د ټرمپ اقدام د منلو نه‌دی او دا د (ای سي سي) په قضایي چارو کې د مداخلې معنی لري.

د اروپایي ټولنې د بهرنۍ تګلارې رئیس جوزف بورېل هم د ټرمپ د پرېکړې په اړه اندېښنه ښکاره کړې ده.

ولسمشر ټرمپ د پنجشنبې په ورځ یو فرمان صادر کړ چې له مخې یې د جرمونو د نړیوالې محکمې پر کارکوونکو اقتصادي بندیزونه او د سفر محدودیتونه لګېږي.

په دې بندیزونو کې هغه کسان شامل دي چې په افغانستان کې په جنګي جرمونو کې د امریکا د پوځي او استخباراتي چارواکو د تورونو تحقیقات کوي.

د جرمونو نړیواله محکمه په ۲۰۰۲ کال کې جوړه شوه او امریکا له هغو هېوادونو څخه دی چې غړیتوب‌یې نه‌لري.

د ورځې تازه خبرونه دلته ولولئ

د روسیې د بهرنیوچارو وزیر تهران ته ورسېد

د روسیې د بهرنیوچارو وزیر سیرګي لاوروف
د روسیې د بهرنیوچارو وزیر سیرګي لاوروف

د ایراني رسنیو د راپورونو له مخې د روسیې د بهرنیوچارو وزیر سیرګي لاوروف له ایراني چارواکو سره د خبرو لپاره نن (د کب ۷مه) تهران ته ورسېد.

د ایران د دولتي ټلویزیون د راپور له مخې لاوروف له خپل ایراني سیال عباس عراقچي سره ګوري. د ایران د بهرنیوچارو وزارت ویلي دي چې د لاوروف سفر یوورځنی دی.

د روسیې د بهرنیو چارو وزارت په یوه بیان کې ویلي دي چې لاوروف د عراقچي په بلنه تهران ته تللی دی. دې وزارت همداراز څرګنده کړې ده چې د روسیې جګپوړی ډیپلومات به د تهران او مسکو د اړیکو او د ځینو نړیوالو مسایلو په اړه خبرې وکړي.

د اسټرالیا او جنوبي افریقا د کرکټ لوبه ونه شوه

د فبروري ۲۵مه، د راولپنډۍ لوبغالی
د فبروري ۲۵مه، د راولپنډۍ لوبغالی

د اتلانو د جام یا چمپینز ټرافي د سیالیو په لړۍ کې د جنوبي افریقا او اسټرالیا د کرکټ د لوبډلو ترمنځ لوبه د باران له کبله ونه شوه.

دا لوبه نن د ماسپښین په یوه نیمه بجه پلان شوې وه خو د راولپنډۍ د کرکټ د لوبغالي پېچ د پرله پسې باران د ورېدو له کبله پوښلی و، نو د لوبې امپایرانو په سیمه ایز وخت د مازیګر په پنځو بجو اعلان وکړ چې لوبه نه کېږي.

اسټرالیا او جنوبي افریقا چې له افغانستان او انګلینډ سره په بي ګروپ کې دي دواړو خپلې دوه مخکینۍ لوبې ګټلې دي. ټاکل شوې چې د اسټرالیا بله لوبه به د جمعې په ورځ په لاهور کې له افغانستان سره وي او جنوبي افریقا به د شنبې په ورځ د کراچۍ په لوبغالي کې له انګلینډ سره مخامخ شي.

امریکا د م. م په عمومي اسمبله کې د اروپايي متحدانو د پرېکړه لیک له اصطلاحاتو سره مخالفت وکړ

د ملګروملتونو عمومي اسمبله، د فبروري ۲۴مه
د ملګروملتونو عمومي اسمبله، د فبروري ۲۴مه

متحدوایالتونو پرون په ملګروملتونو کې د خپلو اروپايي متحدانو له خوا په وړاندې شوي پرېکړه لیک کې د هغو کلمو مخالفت وکړ چې روسیه پر اوکراین د برید په خاطر پړه ګڼي.

متحدوایالات د اوکراین د جګړې په اړه د ناڅاپي لوی بدلون په ترڅ کې د ملګروملتونو په عمومي اسمبله کې د روسیې او بیلاروس ترڅنګ ودرېد او د اروپا له خوا په وړاندې شوي پرېکړه لیک کې یې له هغه څه سره مخالفت وکړ چې د اوکراین جګړه د روسیې یرغل بلل شوی دی. دا پرېکړه لیک په ۹۳ مثبتو، ۱۸ مخالفو او ۶۵ ممتنع رایو تصویب شو.

په عین حال کې متحدوایالاتو د واشنګټن له خوا یوه بل چمتو شوي پرېکړه لیک ته وروسته له هغه له رایې ورکولو ډډه وکړه چې دا جمله ورزیاته شوه چې روسیې د ملګروملتو د منشور پرخلاف پر خپل کوچني ګاونډي هېواد برید وکړ.

دې پرېکړه لیک ته د ملګروملتونو ۱۹۳ غړو ۹۳ مثبتې، ۸ مخالفې او ۷۳ نورو ممتنع رایې ورکړې. اوکراین دې پرېکړه لیک ته مثبته او روسیې مخالفه رایه ورکړه.

د عمومي اسمبلې له خوا تصویب شوي پرېکړه لیکونه حتما اجرایي صلاحیت نه لري خو د نړیوالو د نظر سنجۍ په توګه په پام کې نیول کېږي.

په ۳ کلونو کې ۹۵ زره روسي او ۷۰ زره اوکرایني پوځیان ټپیان شوي

د ازادې اروپا/ ازادی راډیو په یوه څېړنیز راپور کې څرګنده شوې چې د روسیې د پراخ پوځي یرغل په درې کلنه موده کې، روسي ځواکونو د اوکراین شاوخوا ۱۱ سلنه خاوره لاندې کړې ده. دا اندازه تقریباً د روسیې د تاتارستان د کورواک جمهوریت له مساحت سره مساوي ده. په دې موده کې سلګونه زره کسان وژل شوي او ټپیان شوي دي.

نه د روسیې او نه هم د اوکراین حکومت په دې اړه رسمي ارقام خپاره کړي دي. سربېره پر دې، په روسیه کې له درېیو کلونو راهیسې ډېری هغه ویب‌پاڼې بندې شوي چې رسمي معلومات خپروي.

خو تحقیقي خبریالانو د عامه سرچینو او ټولنیزو رسنیو پر بنسټ د هغو کسانو نومونه خپاره کړي چې په دې جګړه کې ټپیان شوي دي. د هغوی په منځ کې د روسیې پوځ تر ۹۵ زرو څخه سرتېري او د اوکراین د پوځ شاوخوا ۷۰ زره سرتېري شامل دي.

همداراز، د ازادې اروپا / ازادي راډیو روسي څانګې د روسیې د دفاع وزارت د عمومي طبي ادارې معلوماتو ته لاس رسېدلی، چې ښيي د اوکراین پر ضد د روسیې یرغل له دوهمې نړیوالې جګړې راهیسې په اروپا کې تر ټولو خونړۍ جګړه ده.

اروپایي اتحادیې پر روسیه نوي بندیزونه ولګول

اروپايي ټولنې پر اوکراین د روسیې د بشپړ یرغل د دریمې کلیزې پر مهال پر روسیه نوي بندیزونه ولګول.


د رویټرز خبري اژانس د راپور له مخې، د اروپايي اتحادیې د بهرنیو چارو وزیرانو د دوشنبې په ورځ، د فبروري په ۲۴مه، د روسیې پر وړاندې ۱۶م پړاو اقتصادي بندیزونه تصویب کړل.
ډیپلوماتانو تیره اونۍ ویلي وه چې بندیزونه به د روسیې د المونیم واردات او نور سکتورونه په نښه کړي چې په دې کې د روسیې ۷۳ غیر قانوني بیړۍ هم شاملې دي.
ویل کیږي چې د دې بندیزونو هدف د روسیې د عایدد سرچینو محدودول او د دې هیواد د جنګي وړتیاو ضعیفه کول دي.
پر اوکراین د روسیې یرغل له نن څخه درې کاله وړاندې، د ۲۰۲۲ کال د فبرورۍ په ۲۴مه پیل شو.

زیلنسکي وایي که د ده په استعفی اوکرایین کې سوله راځي دا کار به وکړي

د زیلنسکي کنفرانس
د زیلنسکي کنفرانس

د اوکراین ولسمشر وايي، که چېرې د هغه استعفا په اوکراین کې د سولې معنی ولري، نو چمتو دی چې د ولسمشرۍ له څوکۍ لاس په سر شي.

ولودومیر زیلینسکي د یکشنبې په ورځ، د فبروري ۲۳مه، په کیف کې په یوه خبري کنفرانس کې وویل: "که په اوکراین کې سوله وي، که تاسو واقعا زما استعفا ته اړتیا لرئ، زه چمتو یم چې دا کار وکړم."

هغه بیا زیاته کړه چې دا کار ناټو سره د اوکراین د یوځای کیدو په بدل کې کولی شي.

د اوکراین ولسمشر د روسیې د پوځي یرغل د دریمې کلیزې په درشل کې، دا خبرې کړي دي.
د ۲۰۲۲ کال د فبروري په ۲۴مه روسیې پر خپل ګاونډي هېواد اوکرایین باندې غیر موجه یرغل پیل کړ چې تر نن پورې روان دی.

ّد کرکټ په اتلانو جام کې هندوستان خپل سیال پاکستان مات کړ

د هندوستان د کرکټ نامتو لوبغاړي ویراټ کوهلي د پاکستان په وړاندې تر بریا وروسته
د هندوستان د کرکټ نامتو لوبغاړي ویراټ کوهلي د پاکستان په وړاندې تر بریا وروسته

د کرکټ په اتلانو جام کې هندوستان وتوانېد پاکستان ته ماته ورکړي. په دې لوبه کې چې د دوبۍ په میدان کې وشوه پاکستان په لومړي بټنګ/توپوهنې سره د ۲۴۲ منډو هدف وټاکه.

په ځواب کې هندوستان وتوانېد په ۴۳م اوور کې ځان هدف ته ورسوي په داسې حال کې چې لا یې هم شپږ وېکټې په لاس کې وې.

دا په روان اتلانو جام کې د پاکستان دویمه ماته وه او تر ډېره سیمي فاینل ته د رسېدو چانس یې کم شوی.

د هندوستان لپاره په دې لوبه کې ویرات کوهلي سلیزه هم ووهله.

دا په یو ورځنیو لوبو کې د ویرات کوهلي ۵۱مه سلیزه وه. هغه همداراز په دې لوبې سره ۱۴زره منډې پوره کړې.

په یو ورځنیو لوبو کې د ویرات کوهلي ټول ټال منډې ۱۴زره او ۸۵ ته ورسېد او دمګړۍ د نړۍ یواځینۍ فعال لوبغاړی دی چې تر ټولو ډېرې منډې لري.

تمه ده د کرکټ په اتلانو جام کې د دوشنبې په ورځ د بنګله دیش او نیوزیلند ټیمونه لوبه وکړي.

ډ فرانسې ولسمشر په خپل هیواد کې د چاقو برید تروریستي عمل وباله

د فرانسې ولسمشر
د فرانسې ولسمشر

د فرانسې ولسمشر وايي چې د دغه هیواد په ختیځ کې د چاقو برید، چې یو کس پکې وژل شوی او درې نور ټپیان شوي، «ترهګرۍ» عمل دی.

امانویل مکرون د شنبې (۴ کب) په ورځ وویل چې په مولوز ښار کې د یو کس له خوا پر پولیسو د چاقو برید بې شکه یو ترهګریز عمل دی.

د فرانسې د کورنیو چارو وزیر د موضوع د څېړلو لپاره مولوز ته تللی او هلته به وینا وکړي.

د فرانسې څارنوالي وایي، شکمن کس د برید پر مهال "الله اکبر" شعار ورکړی و.

د ځايي رسنیو د راپورونو له مخې، دا پېښه په ځايي وخت د شنبې مازیګر ۴ بجې د جرمني پولې ته نژدې په مولوز ښار کې شوې.

د مولوز څارنوالي وایي، د برید عامل ۳۷ کلن الجزایری سړی دی چې نیول شوی، او وژل شوی کس یو ملکي وګړی و چې هڅه یې کوله مداخله وکړي.

د مولوز ښاروال میشل لوتز هم په فېسبوک کې لیکلي: "وحشت زموږ ښار نیولی دی."

ویل کېږي چې بریدګر د پولیسو مرکز ته ورغلی و، چې باید د خپل توقیف په اړه یو سند لاسلیک کړي، خو له دې کار یې انکار وکړ، یوه دوکان ته وتښتېد او هلته یې له پولیسو سره شخړه وکړه.

د فرانسوي رسنیو د راپورونو له مخې، په دې شخړه کې یو پولیس افسر په غاړه کې، بل په سینه کې ټپي شوی، درې نور افسران برسېرن ژوبل شوي، او یو ملکي کس چې د مداخلې هڅه یې کوله، د چاقو په برید وژل شوی دی.

راپورونه وايي چې بریدګر له اوږدې مودې راهیسې تر نظر لاندې و او د ترهګرۍ د خطر له امله د څارل کېدونکو کسانو په لېست کې شامل و.

اسراییل د سلګونو فلسطینیانو خوشي کېدل ځنډولي

د اسراییل د صدراعظم بنیامین نتنیاهو دفتر اعلان وکړ چې د هغو سلګونو فلسطیني بندیانو خوشې کیدل تر هغو پورې ځنډیډلي چې حماس په غزه کې د کاواکه اوربند د موافقې ټول شرطونه پوره کړې.

په هغه اعلامیه کې چې دې دفترنن یکشنبې خپره کړې، ویل شوي چې اسراییل د ۶۲۰ بندیانو خوشې کیدل ترهغو پورې ځنډوي چې له سپکاوي پرته د نورو اسراییلي یرغملو خلاصون ډاډمن شي.

ټاکل شوې وه چې د اسراییل او حماس ترمنځ د شوې موافقې د لومړي پړاو په وروستۍ تبادله کې اسراییل د حماس له لوري د ۶ یرغملو د آزادیدو په بدل کې دغه فلسطیني بندیان پرون د ورځې په وروستیو کې آزاد کړي. حماس چې امریکا او اروپایي ټولنه یې د یوې ترهګرې ډلې په توګه پیژني، د اوربند په اړه د موافقې په لومړي پړاو کې ۳۳ یرغمل خوشې کړي دي.

که څه هم دواړو لورو د شوې موافقې د دوهم پړاو پرسر خبرو ته چمتووالی ښودلی خو پیلیدل یې تراوسه ځنډیدلي دي.

په جرمني کې پارلماني انتخابات روان دي

نن یکشنبې په جرمني کې پارلماني انتخابات ترسره کیږي

په جرمني کې له ټاکلې نیټې مخکې انتخاباتو ته وروسته له هغې زمینه برابره شوه چې د تیر۲۰۲۴ کال په وروستیو کې د جرمني د موقت صدراعظم اولاف شولڅ په مشرۍ ایتلافي حکومت ړنګ شو او د جرمني ولسمشر فرانک والټر شټاینمایر د ډسمبر په ۲۷مه د دغه هېواد پارلمان منحل او د فبرورۍ په میاشت کې یې وارمخکې انتخابات تایید کړل.

جرمني چې د اروپا ستر اقتصادي قدرت دی، کابینه یې د اقتصادي رغونې په اړه له داخلي اختلافاتو سره مخ ده، خو په دې هیواد کې د وروستیو بریدونو په تړاو چې ډیری یې په دې هیواد کې د میشتو کډوالو له خوا ترسره شوي، د امنیت او کډوالۍ پر سر اختلافات هم زیات شوی دی.

د کډوالۍ مسله د کاندیدانو د کمپاینونو پریوې مهمې مسلې بدله شوې ده. په جرمني کې وروستیو پیښو ته په پام په ښي اړخو ګوندونو پورې تړلو کاندیدانو ویلي که چېرته دوی ټاکنې وګټي نو جرمني ته به د ناقانونه کډوالو مخه ونیسي.

نور راوښيه

XS
SM
MD
LG