د لاسرسۍ وړ لېنکونه

تازه خبر
شنبه ۲۱ چنګاښ ۱۳۹۹ کابل ۰۶:۰۴

نړۍ

اسپر امریکا کې د مظاهرو پر مهال د ملي ګارد اقداماتو د څېړنې امر وکړ

د امریکا دفاع وزیر مارک اسپر

د امریکا متحده ایالاتو دفاع وزیر د وروستیو مظاهرو پر مهال د ملي ګارد د اقداماتو په اړه د څېړنو امر کړی دی.

په امریکا کې دغه مظاهرې د یوه تور پوستي جورج فلوید تر وژنې وروسته پیل شوې دي.

د امریکا دفاع وزارت د اعلامیې په حواله، مارک اسپر پرون وویل، د مدني ناکراریو په وړاندې د پوځیانو د ملاتړ لپاره د ملي ګارد اقدامات به وڅېړي، په ځانګړي ډول په وروستیو دوو اوونیو کې.

په وروستیو کې د نژادي تبعیض پر خلاف د مظاهرو پر مهال د ملي ګارد د رول په اړه پوښتنې ولاړې شوې دي.

دغه مظاهرې وروسته له هغې پیل شوې چې د مې میاشتې پر ۲۵مه، تور پوستي جورج فلوید د یوه سپین پوستي پولیس په توقیف کې ساه ورکړه.

دغه پولیس څه باندې اته دقیقې د هغه پر غاړه خپل زنګونه ایښی و او بالاخره فلوید ساه ورکړه.

د جون پر لومړۍ نېټه سپینې ماڼۍ ته نږدې د یوه میدان د تصفیې پر مهال د قانون د نافذوونکو د ملاتړ لپاره د ملي ګارډ د پوځیانو کارونې انتقادونه پارولي دي.

د مظاهره‌چیانو د تیت و پرک کولو لپاره دغه ګارد د مرچو سپرې، فلش وهونکي لاسي بمونه او رابړي مرمۍ کارولې دي.

دا هغه شېبه وه چې ولسمشر ډ‌ونالد ټرمپ له دې ساحې یوې تاریخي کلیسا ته روان و.

د ورځې تازه خبرونه دلته ولولئ

نن د بوسنیا هرزګوینا د سربرنیتڅا خونړۍ پېښې ۲۵ مه کلیزه ده

هر کال زرګونه کسان د دغې ورځې د لمانځنې مراسمو کې برخه اخلي، خو سږ کال د کرونا ویروس د خپرېدو وېرې د کسانو ګډون محدود کړی دی.

نن شنبه د جولای یولسمه د بوسنیا هرزګوینا د سربرنیتڅا خونړۍ پیښې پنځه ویشتمه کلیزه ده.

د کرونا ویروس له ګواښ سره سره د دغې ورځې لمانځنه کېږي.

پنځه ویشت کاله مخکې په همدې ورځ د بوسنیایي مسلمانانو اته زره نرینه او هلکان د سرب ځواکونو له خوا راټول او په ختیځه سیمه سربرنیتڅا کې ووژل شول.

له دویمې نړیوالې جګړې وروسته دا په اروپا کې تر ټولو لویه ډله ییزه وژنه بلل کېږي.

نړیوالو محکمو دا پېښه نسل وژنه یاده کړې، خو سربیایي او بوسنیایي چارواکو د دې کلمې له منلو ډډه کړې ده.

دا وژنه د بوسنیا د جګړې په وروستي کال شوې.

دې جګړه کې چې د ۱۹۹۲ او ۱۹۹۵ کال ترمنځ وشوه، شاوخوا لس زره کسان ووژل شول.

هر کال زرګونه کسان د دغې ورځې د لمانځنې مراسمو کې برخه اخلي، خو سږ کال د کرونا ویروس د خپرېدو وېرې د کسانو ګډون محدود کړی دی.

امریکا یو روسی وګړی د سایبري غلا او هک کولو په جرم محکوم کړ

یوګینی نیکولین

د امریکا د سن فرانسیسکو یوې محکمې روسي تبعه یوګینی نیکولین د سایبري غلا او د ټولنیزو رسنیو د هک کولو په جرم محکوم کړ.

نوموړي دغه جرم اته کاله وړاندې ترسره کړی چې هغه مهال یې د امریکا لویې ټولنیزې رسنۍ لینکډن او ډراپ باکس هدف ګرځولې وې.

د مجرم پېژندل شوي کس مدافع وکیل ویلي، د استېناف غوښتنه کوي او دا پرېکړه " لویه بې عدالتي" بولي.

مدافع وکیل ویلي، د هغو معایناتو په پایله کې چې د قاضیانو په سپارښتنه شوي، معلومه شوې چې موکل یې رواني ستونزه لري.

محکمې پرون وویل، د نیکولین محکومیت به په رسمي ډول د سېپټېمبر په ۲۹مه نېټه اعلان کړي.

نیکولین د هر غلا شوي یوزر نېم او پاسورد په بدل کې په لس کاله حبس او د هر کمپیوټر د هکېدو په بدل کې په پنځه کاله بند محکومېدای شي.

روسیه کې د یوه والي د نیولو په غبرګون د لسګونه زره کسانو لاریونونه

د روسیې په یو شمېر نورو ښارونو کې هم ورته مظاهرې شوې دي.

د روسیې په ختیځ ښار خباروفسک کې لسګونه زره کسان د دوی د سیمه ییز والي د نیولو په غبرګون کې سړکونو ته راوتلي.

والي سرګي فورګل تورن دی چې ۲۰۰۴ او ۲۰۰۵ کلونو کې یې د څو سوداګرو د وژنې امر ورکړی د ځینو نورو د وژنې هڅه یې کړې ده.

د فورګل ملاتړي نن د لینن په مرکزي څلور لاره کې راټول شوي او دا شعارونه لېږدوي چې "زه سرګي فورګل یم" " فورګل خوشې کړئ" او " شرم پر مسکو".

د روسیې په یو شمېر نورو ښارونو کې هم ورته مظاهرې شوې دي.

پنځوس کلن فورګل وړمه ورځ د څېړنیزې کمېټې له خوا ونیول شو او د مسکو یوې محکمې یې د دوه میاشتني توقیف پرېکړه وکړه.

نوموړي ویلي، دی بې ګناه دی او د سوداګرو په وژنه کې لاس نه لري.

د روسیې په پارلمان کې د لیبرال ډیموکراټ ډلې مشر ولادیمیر ژیرینوفسکي ویلي، دوی د خپل دې غړي د نیولو په غبرګون کې استعفا ته چمتو دي.

امریکايي چارواکی: د اړتیا په صورت کې د روسیې پر وړاندې هر راز اقدام کېږي

افغانستان کې امریکايي سرتېري

د امریکا د مرکزي استخباراتو (سي.ای.اې) پخوانی مشر وایي، که طالبانو ته د روسیې له خوا د انعام ورکولو ادعا ثابته شي، امریکا به د روسیې په وړاندې جدي اقداماتو ته اړتیا پیدا کړي.

لیون پنیتا ویلي، دغو اقداماتو کې پر روسیې شدید بندیزونه شاملېدلی شي.

پنیتا چې د پخواني ولسمشر بارک اوباما د دفاع وزیر هم پاته شوی، پرون د کانګرس استماعیه غونډې ته وویل، که روسیې د امریکایي ځواکونو د وژنې لپاره طالبانو ته پیسې ورکړې وي، له سرې کرښې تېرېدل دي.

پنیتا ویلي، له همدې کبله اړتیا ده چې روسیې ته ځواب ورکول شي چې دې ګام کې ممکن ډيپلوماتیکه انزوا، بندیزونه او د اړتیا په صورت کې له پوځي ځواکه کار اخیستل شامل وي.

نیویارک ټایمز ورځپاڼې تېره میاشت وویل، طالبانو له روسیې څخه د امریکایي ځواکونو د وژنې په بدل کې پیسې ترلاسه کړي دي.

روسیې او طالبانو دغه راپورونه په کلکه رد کړل.

روغتیا نړیوال سازمان ټوله نړۍ کې د کوویډ۱۹ ناروغۍ نوي موارد ثبت کړي

د روغتیا د نړیوال سازمان د شمېرنو له مخې په تېرو شپږو اوونیو کې په نړۍ کې د کوویډ۱۹ د ناروغانو شمېر دوه چنده شوی دی.

د روغتیا نړیوال سازمان پرون د جولای په لسمه یو ځل بیا په ټوله نړۍ کې په بېساري شمېر د کوویډ۱۹ ناروغۍ د نویو مواردو راپور ورکړ.

دغه سازمان وايي، تر ټولو زیاتې پېښې د امریکا په وچه، هندوستان او جنوبي افریقا کې ثبت شوي.

د دې سازمان مشر ټیدروس اډهانوم ګیبرییسوس پرون جمعه وویل چې هېوادونه په قاطع اقداماتو د دې وبا مخه نیولی شي.

هغه زیاتوي: "موږ ښو مشرانو، د ټولنې ګډون او یووالي ته اړتیا لرو، یوازې قاطع اقدام چې ملي یووالی او نړیواله خواخوږي ورسره وي، د دې وبا مخنیوی کولای شي."

ښاغلي ګیبرییسوس ایټالیا، اسپانیا او جنوبي کوریا د مثال په توګه یاد کړل او ویې ویل چې دې هېوادونو د قاطع اقداماتو په وسیله د کرونا د وبا مخه ونیوله.

د روغتیا د نړیوال سازمان د شمېرنو له مخې په تېرو شپږو اوونیو کې په نړۍ کې د کوویډ۱۹ د ناروغانو شمېر دوه چنده شوی دی.

یاد سازمان پرون په ۲۴ ساعتونو کې له ۲۲۸ زرو د زیاتو نويو مواردو راپور ورکړ چې له دې سره په دې ناروغۍ د اخته کسانو ټول شمېر له دولس میلیون او درې لکو واوښت.

اردوغان "هایا صوفیه موزیم" په جومات بدل کړ

د معاصرې ترکیې د بنسټ ایښودونکي مصطفی کمال اتاترک په واکمنۍ کې په ۱۹۳۴ کال کې هایا صوفیه چې هغه مهال جومات و، په موزیم بدل شو.

د استانبول هایا صوفیه موزیم چې د نړۍ د نامتو تاریخي ودانیو له ډلې دی، په جومات بدل شو.

ولسمشر رجب طیب اردوغان پرون جمعه د جولای په لسمه نېټه دا اعلان وروسته له هغه وکړ چې د ترکیې سترې محکمې له هایا صوفیې څخه د موزیم حیثیت واخیست.

ښاغلي اردوغان ملت ته په وینا کې وویل چې په دې جومات کې د جمعې لومړی لمونځ به دوه اوونۍ وروسته د جولای په ۲۴ مه نېټه وشي.

د فعالانو یوې ټولنې چې ډېره مشهوره نه ده دا قضیه محکمې ته وړاندې کړه.

دا ټولنه وايي وروسته له دې چې عثماني امپراتور دوهم سلطان محمد په ۱۴۵۳ میلادي کال کې قسطنطنیه د بیزانس له کلیسا څخه ونیوله هایا صوفیه یې په جومات بدله کړه او د هغه ملکیت و.

د معاصرې ترکیې د بنسټ ایښودونکي مصطفی کمال اتاترک په واکمنۍ کې په ۱۹۳۴ کال کې هایا صوفیه چې هغه مهال جومات و، په موزیم بدل شو.

دا اقدام چې خورا زیات سیمولیک اهمیت لري، د امریکا، یونان او د ارتودوکس کلیسا د مشرانو له پرله پسې او پراخو انتقادونو سره سره کېږي.

چارواکي: تهران کې چاودنه نه د شوې

د ایران بیرغ

د تهران لویدیځ ته نن د یوې چاودنې غږ اورېدل شوی خو چارواکو ویلي چې کومه چاودنه نه‌ده شوې.

لومړی د چاودنې په اړه راپورونه د ایریب دولتي ټلویزیون او مهر خبري اژانس خپاره کړي و.

ایریب راپور ورکړی و چې تهران ته نږدې په قدس ښارګوټی کې د برښنا پر چاوي راغلې وه او احتمالاً یوه چاودنه شوې.

په راپور کې د چاودنې په اړه هېڅ جزئیات نه‌و ورکړل شوي.

د قدس ولسوالې لیلا واثقي ویلي امنیتي چارواکو د چاودنې غږ نه‌دی تأیید کړی.

تر دې څه باندې لس ورځې مخکې د تهران په سینا اطهر روغتون کې چاودنې شااوخوا شل تنه ووژل ورپسې د نطنز په اټومي تاسیساتو کې هم چاودنه شوې وه.

د بوسنیا د سرب پوځیانو په لاس د مسلمانانو له ډله‌ییزې وژنې ۲۵ کاله پوره شول

ارشیف

د بوسنیا د سرب پوځیانو په لاس د څه باندې اته زره مسلمانانو له ډله‌ییزې وژنې پنځه ویشت کاله پوره شول.

د جولای له ۱۱ تر ۲۲ پورې سرب پوځیانو په سربرنیڅه کې له اتو زرو زیات مسلمانان ووژل.

دا له دویمې نړیوالې جګړې را وروسته تر ټولو بده ډله‌ییزه وژنه ده چې د سربرنیڅې ډلوژنه یادیږي.

دا ډلوژونه هغه وخت وشوه چې د بوسنیا سرب ځواکونو د جنرال راتکو ملادیچ په مشرۍ د ملګرو ملتونو له خوا خوندي شوې ساحه سربرنیڅه چې لکونه کسانو پناه ور وړې وه ونیوله.

د دې ډلوژنې لوی عامل جنرال ملادیچ د جرمونو نړیوالې محکمې له‌خوا د بشر ضد او جنګي جرمونو په تړاو تورن او په عمري بند محکوم شو.

د امریکا ټرانسپورت وزارت د پاکستان نړیوال هوايي شرکت د الوتکو مستقیم پروازونه لغوه کړه

د امریکا ټرانسپورت سټیشن

د امریکا متحده ایالتونو ټرانسپورت وزارت دغه هېواد ته د پاکستان د نړیوال هوايي شرکت پي.ای.اې د الوتکو مستقیم پروازونه لغوه کړه.

دا کار ځکه شوی چې ویل کېږي د پاکستاني پیلوټانو د اسنادو په اړه اندېښنې موجودې دي.

د ډان پاکستاني ورځپاڼې د راپور په اساس دا موضوع پي.ای.اې ته په یوه مکتوب کې ابلاغ شوې چې یوه کاپی یې دې ورځاڼې ته هم رسیدلې.

د ډان د راپور په اساس د پي.ای.اې ویاند عبدالله خان دا موضوع تأیید کړې او ویلی یې دي چې د امریکا د دې پرېکړې په اړه یې یو ایمیل ترلاسه کړي.

د امریکا د دې پرېکړې علت د یاد هوایي شرکت د خوندیتوب او د پیلوټانو د اسنادو په اړه شته اندېښنې یادې شوي.

پاکستان وروسته له هغه چې تېره میاشت د ځینو پیلوټانو د اسنادو د جعل په اړه معلومات ترلاسه کړل یو په درېیمه برخه پیلوټان یې له پروازه منع کړل.

د پاکستان د هوايي چلند وزیر غلام سرور خان ویلي چې د پي.ای.اې د هوايي شرکت د ۲۶۲ پیلوټانو د الوتنو د جواز په برخه کې شکونه موجود دي.

ایټالیا کې د ورځې په ازاده فضا کې سرلوڅې سینما پرانیستل شوي

د ایټالیا بیرغ

په ایټالیا کې د ورځې په ازاده فضا کې سرلوڅې سینما پرانیستل شوي.

هلته چې د کرونا ویروس په خاطر سینماګانې تړلي دي او په ټولنیز واټن جدي ټینګار دی خلک په خپلو موټرو کې یوه سرخلاصي ځای ته ورځي او هلته فلمونه په لوی لګیدلي سکرین باندې ګوري.

الیسیو ټومي چې د فلم نندارې ته ورغلی وايي پخوا یې کله هم په ازاده فضا کې په دومره لوی سکرین فلم نه‌و کتلی.

هغه زیاته کړه: "دا واقعا يوه نوې تجربه ده. موږ ځوانو خلکو کله هم داسې په موټر کې ناست په لوی سکرین فلم نه‌و کتلی. زه د سینما سخت شوقي وم او هره اوونۍ ورتلم."

روم ته نږدې په اوستیا ښارګوټي کې د سرلوڅې سینما مالک ګیسیپ چیاتولي وايي د دوی سرخلاصې سینما په ټوله اروپا کې ساری نه لري.

ایټالیا او هسپانیه کې دا وروستۍ څو میاشتې د کرونا ویروس په خاطر په کورونو کې ایسارو خلکو یو نیم وخت له کړکیو او برنډو سازونه غږولي او ګډاوې یې کړي څو خپګان ور ونه لویږي.

په ایټالیا کې څه باندې ۲۴۲ زره کسان په کرونا ویروس اخته دي چې له ډلې یې نږدې پنځه دېرش زره کسان مړه شوي.

ساري ناروغیو مشر: امریکا کې د کرونا ویروس د تلفاتو ورځنۍ شمېره تر ۱۰۰۰ اوړي

ارشیف

امریکا په متحده ایالتونو کې د ساري ناروغیو او حساسیت د ملي انستیتیوټ مشر وایي، متحده ایالتونه له کرونا ویروس سره د مبارزې په یوه سخت پړاو کې دي چې اوس د دې ناروغۍ د تلفاتو ورځنۍ شمېره تر زرو اوړي.

انتوني فوچي پرون وویل، تلفات وروسته تر دې زیات شوې دي چې په ډېرو ایالتونو کې بازارونه بېرته پرانیستل شول او په کورونو کې د پاتېدو بندیزونه سست شول.

فوچي هغه کنفرانس ته چې د هېل خبرې څانګې چمتو کړی و څرګنده کړه چې امریکایان اوس له ډېر سخت حالت سره چې له ګواښه ډک دی، مخامخ دي.

د امریکا له پنځوسو ایالتونو څخه په څلویښتو کې د کرونا مثبتې پیښې په زیاتېدو دي.

د جانز هاپکینز پوهنتون د شمېرو له مخې د پنجشنبې په ورځ په متحده ایالتونو کې د کرونا ویروس څه باندې پنځه شپیته زره نوې مثبت پیښې ثبت شوې. تر اوس په څلرویشت ساعتونو کې کله هم دومره ډېر کسان په کرونا ویروس نه و اخته شوي.

په متحده ایالتونو کې اوسه درې میلیونه او څه باندې دوه لکه کسان په کرونا اخته دي او د تلفاتو شمېر تر یولک او پنځه دیرش زرو اوښتی دی.

د روسیې د پارلمان یو شمېر استازو د یو لایحې د تمدید وړاندیز وکړ

ارشیف

د روسیې د پارلمان یو شمېر استازو د هغې لایحې د تمدید وړاندیز وکړ چې هدف یې د مخالفو فعالانو او سیاستوالو غلي کول او دغه راز د هغو کسانو پټه خوله کول دي چې د روسیې له خاورې سره د کریمیا ټاپوزمې د غیرقانوني یوځای کولو موضوع راپورته کوي.

د دې لایحې یوه لیکونکي، د روسیې په دولتي دوما کې د دولت جوړونې او قوانینو د کمېټې رئیس پاویل کراشینینیکوف وویل، دا لایحه به د سختدریځۍ پر ضد د اقداماتو قانون تعدیل کړي.

د دې قانون پر اساس د روسیې د فدراسیون پر مځکنۍ بشپړتیا تېری سختدریځي ګڼل کېږي.

په نورو تعدیلاتو کې یو دا دی چې ولسمشر ولادیمیر پوتین ته اجازه ورکول کېږي چې له اوسنۍ دوهمې دورې وروسته دوه ځلې بیا هم ولسمشرۍ ته ځان کاندید کړي.

د پوتین اوسنۍ دوره په ۲۰۲۴ م کال پای ته رسېږي.

پومپیو د روغتیا له سازمان څخه د امریکا د وتلو په باب د ټرمپ د پرېکړې دفاع وکړه

د امریکا د بهرنیو چارو وزیر مایک پومپیو

د امریکا د بهرنیو چارو وزیر مایک پومپیو د روغتیا له نړیوال سازمان څخه د امریکا د وتلو په باب د ټرمپ د حکومت د پرېکړې دفاع وکړه.

ده وویل، د ملګرو ملتونو دا اداره د خپل اصلي ماموریت په ترسره کولو کې پاتې راغلې ده.

پامپیو پرون پنجشنبه خبریالانو ته وویل، د روغتیا نړیوال سازمان وخت په وخت بیا بیا ښودلې چې له هغو نیمګړتیاوو زیانمن شوی چې د خپل ماموریت بشپړولو ته‌یې نه پرېږدي او دا د نړۍ لپاره یو خبرداری دی دی.

د امریکا حکومت د دوشنبې په ورځ د جولای ۶ د ملګرو ملتونو سرمنشي انتونیو ګوتریش ته خبر ورکړ چې د امریکا متحده ایالتونه د روغتیا له نړیوال سازمانه په یوه کال کې په دې خاطر وخي چې د کرونا وبا په وړاندې د دې سازمان پر اقداماتو غوسه ده.

د امریکا متحده ایالتونه د روغتیا د نړیوال سازمان تر ټولو لوی مالي ملاتړ کوونکی هېواد دی.

د دې ادارې د بودجې نږدې په سلو کې ۱۵ امریکا ورکوي.

روغتيا سازمان: زموږ ځواب په اړه دې يو متخصص پلاوی بيا کتنه وکړي

د روغتیا نړیوال سازمان

د روغتیا نړیوال سازمان وايي، موافقه یې کړې چې د کرونا ویروس په وړاندې د دې ادارې د ځواب ویلو په اړه دې یو متخصص پلاوی بیا کتنه وکړي.

د دې ادارې رئیس تیدروس ادهانوم ګیبریسوس په دې اړه پرون پنجشنبه په یوه ویدیو کنفرانس کې وویل: "د روغتیا د نړیوال سازمان غړیو هېوادونو هم موافقه کړې چې دا اداره باید د 'کوویډ-۱۹' په وړاندې له خپل ځوابه د زده کړیو درسونو هر اړخیزه او خپلواکه ارزونه پیل کړي. دا د ځان په اړه د فکر کولو وخت دی څو نړۍ ته، چې په هغه کې ژوند کوو، وګورو او د انسانانو د ژوند ژغورلو او د دې اخیستونې ناروغۍ د کنټرولو لپاره په ګډه لارې–چارې ومومو او خپله همکاري زیاته کړو."

د امریکا متحده ایالتونه د روغتیا د نړیوال سازمان د بودجې لویه برخه ورکوي.

ترکیه کې د کرونا ویروس له کبله د کوچیانو مسابقې وځنډول شوې

د کرونا ټسټ ټیوب

د ترکیې چارواکو د کرونا ویروس د خپرېدو له کبله د نړۍ د کوچیانو مسابقې یو کال وځنډولې.

ټاکل شوې وه چې دا سیالۍ د سږ کال په مني کې د ترکیې په بورسا ښار کې وشي.

په ترکیه کې د کوچیانیو لوبو د نړیوال فدراسیون رئیس بلال اردوغان پرون (پنجشنبه) وویل، دا پرېکړه د ترکیې د بهرنیو چارو، ځوانانو او سپورټ او همداراز د روغتیا وزارت په مشوره د دې لپاره وشوه چې د کرونا ویروس د پېښو مخه ونیول شي.

د نړۍ د کوچیانو مسابقې لومړی پلا په ۲۰۱۴ م کال په قرغزستان کې پیل شوې.

په کوچیانۍ مسابقو کې اس ځغاسته، څانګه، غشي ویشتل، خوا نیول او یو شمېر نورې لوبې شاملې دي.

په دې سیالیو کې د منځنۍ اسیا د هېوادونو ترڅنګ افغانستان، منګولیا، فيلیپین، ترکیه، روسیه او حتی د امریکا لوبډلې او لوبغاړي ګډون کوي.

نور راوښيه

XS
SM
MD
LG