د لاسرسۍ وړ لېنکونه

تازه خبر
سه شنبه ۱۹ کب ۱۳۹۹ کابل ۰۹:۲۶

نړۍ

امریکا او روسیې په خپلو اټمي وسلو د مذاکراتو لپاره توافق کړی

د امریکا او روسیې بیرغونه

امریکا او روسیې د خپلو اټمي وسلو د مذاکراتو د ځای او وخت په اړه په همدې میاشتې توافق کړی دی.

د وسلو د کنټرول په برخه کې د امریکا د ولسمشر د ادارې لوړپوړی مذاکره کوونکی مارشال بیلینګزلي د دوشنبې په ورځ پر خپله ټویټر پاڼه ولیکل چې چین هم دغو مذاکراتو ته بلل شوی دی.

د دې امریکايي چارواکي په وینا، ده او د روسیې د بهرنیو چارو مرستیال وزیر سرګي ریابکوف د وسلو د کنټرول په اړه په جون میاشت کې پر خبرو توافق کړی دی.

د نېټې او ځای په اړه دقیق جزئیات په دې ټویټ کې نه‌دي ورکړل شوي، خو تر دې مخکې امریکايي خپرونې بلومبرګ د دې هېواد د یوه چارواکي له قوله راپور ورکړی وو چې د امریکا او روسیې ترمنځ اټمي مذاکرات د جون میاشتې په ۲۲مه نېټه په ویانا کې کېږي.

دغه چارواکي د نوم نه‌خپرولو په شرط خپرونې ته ویلي چې تر اوسه څرګنده نه‌ده چې ایا دواړه هېوادونه به د نیوسټارټ موافقې د تمديد په اړه توافق وکړي که نه. دا موافقه د دواړو لویو اټمي قدرتونو د اټمي سروکو د کارولو واک محدودوي.

د ورځې تازه خبرونه دلته ولولئ

د اروپايي بانکدارۍ د مایکروسافټ اکسچېنج د ایمیلونو پر سرور د حملې هڅه

ارشیف، عکس تئزیني بڼه لري

د اروپايي بانکدارۍ اداره وايي، په مایکروسافټ اکسچینج (Microsoft Exchange) کې یې د ایمیلونو پر سرور د انټرنیټي حملې هڅه شوې ده.

د امریکا د ټکنالوژۍ لوی شرکت مایکروسافټ په دې هڅه کړې د چین یوه کمپنۍ ښکېله بللې ده.

د اروپایي بانکدارۍ ادارې یا (EBA) چې په اروپايي ټولنه کې د مالي چارو د تنظیم کلیدي ارګان دی پرون وویل، دوی د خوندیتوب اضافي اقدامات کړي او د ایمیلونو د سرورونو د بېرته برحاله کېدو جریان په دقت څاري.

دغې ادارې ویلي چې د ایمیلونو زېربنا یې خوندي شوې او ارزونه یې ښيي چې د دوی معلومات غلا شوي نه دي.

د اروپايي بانکدارۍ اداره وايي، دغه انټرنټي حمله د یکشنبې په ورځ شوې ده.

مایکروسافټ اکسچینج سرورونه تر ډېره د لویو کار و بارونو او حکومتونو له خوا د ایمیلونو لپاره کارول کېږي.

ایټالیا د 'اسټرا-زینیکا' کرونا ضد واکسین ته رسماً اجازه ورکړه

د اسټرا-زینیکا په نوم د کرونا-ویروس-ضد واکسین

ایټالیا پرون دوشنبه(د کب ۱۸مه) تر ۶۵ کلونو پوخ عمره کسانو ته د اسټرا-زینیکا په نوم د کرونا-ویروس-ضد واکسین لګولو ته رسماً اجازه ورکړه.

د دغه هېواد روغتیا وزارت په یوه اعلامیه کې وویل چې دغه واکسین د ۶۵کلنو او تردې پوخ عمره کسانو ته خوندي دی.

دا په داسې حال کې ده چې ګڼو اروپايي هېوادونو هغو کسانو ته چې عمرونه یې تر ۶۵ کلونو زیات دي، اسټرا-زینیکا واکسین لګولو ته اجازه نه ده ورکړې.

دوی ویلي، د دغه واکسین د خوندیتوب لپاره کافي شواهد نه لري، خو په وروستیو کې د دغه واکسین په اړه ځیني مثبتې څېړنې د دې لامل شوې چې ځینې هېوادونه خپله پرېکړه بېرته واخلي.

په ایټالیا کې پرون په کرونا ویروس د مړو شمېر تر یو لکو واوښت.

د یوې تروریستي شبکې ۷ مشکوک غړي په پاریس کې محاکمه شول

ارشیف، عکس تئزیني بڼه لري

د یوې تروریستي شبکې اووه مشکوک غړي چې په فرانسه کې د حملې په پلان تورن دي، په پاریس کې محاکمه شول.

دغه مشکوک کسان د ۲۰۱۶میلادي کال په مارچ میاشت کې وروسته له هغې ونیول شول چې پولیسو یې له اپارتمانه وسلې او چاودېدونکي مهمات ترلاسه کړل.

دغه اپارتمان د ریدا کریکت نوم د یوه بل افراطي کس له خوا کرایه شوی و چې دی هم محکوم شوی دی.

پولیسو د ۲۰۱۶میلادي کال د اروپا د ملتونو جام سیالیو په درشل کې پر اپارتمان چاپه ووهله.

دغه مسابقې د هغه کال په جون او جولای میاشتو کې د فرانسې په څو ښارونو کې وشوې.

د حملې دې توطیه کې ځینې نور کسان هم ښکېل بلل شوي او لا هم له تحقیقاتو وروسته معلومه شوې نه ده چې دا مشکوکه حمله پر کوم ځای پلان شوې وه.

برما کې پر معترضانو باندې وژونکې حملې؛ ۲ تنه وژل شوي او ۳ نور ټپيان دي

برما کې د معترضانو ضد د پوځیانو ځپونکي اقدامات

په میانمار یا پخوانۍ برما کې امنیتي ځواکونو بیا د کودتا پر ضد معترضانو باندې وژونکې ګولۍ کارولي او لږترلږه دوه تنه‌یې وژلي او درې نور یې سخت ټپیان کړي دي.

د دې هېواد د پوځي واکمنانو په وړاندې د خلکو د پاڅون په ترڅ کې په دوهم لوی ښار یانګون کې دکانونه، فابریکې او بانکونه تړل شوي دي.

په فېس‌بوکونو کې په خپرو شویو وېډیوګانو کې ښکاري چې د دوو تنو مړي په شمالي ښار مایاتکیانا کې پر سړک پراته دي. عیني شاهدانو ویلي چې دوی په هغو اعتراضونو کې ګډون کړی چې پولیسو یې د تیت او پرک کولو لپاره د بې‌سده کولو له لاسي بمونو او اوښکې بهوونکي ګاز څخه کار واخیست، وروسته‌یې له نږدې ودانیو پر معترضانو ډزې وکړې چې یو شمېر یې ولګېدل.

له کله چې د تېرې فبرورۍ میاشتې په لومړۍ نېټه په میانمار یا پخوانۍ برما کې پوځ کودتا وکړه او د دې هېواد د ملکي حکومت مشره انګ سان سوچي او یو شمېر نور مشران‌یې په کور کې نظربند کړي یا نیولي په دې هېواد کې د پوځیانو پر ضد نږدې هره ورځ مظاهرې کېږي.

ویل کېږي د دغو مظاهرو په ترڅ کې له ۵۰ زیات معترضان وژل شوي او په سلګونه نور نیول شوي دي.

د نړۍ د کاتولیک عیسویانو مشر عراق ته خپل سفر پای ته ورساوه

د نړۍ د کاتولیک عیسویانو مشر پاپ فرانسېس عراق کې له خلکو سره د لیدو پر مهال

د نړۍ د کاتولیک عیسویانو مشر پاپ فرانسېس عراق ته خپل تاریخي سفر پای ته ورساوه.

۸۴ کلن پاپ د عراق یو شمېر ښارونو ته لاړ، د مسلمانانو او د عیسویانو له مشرانو سره‌یې وکتل او خلک‌یې سولې او ګډ ژوند ته راوبلل.

د بغداد په هوایي ډګر کې د پاپ د مخه ښۍ په مراسمو کې د عراق ولسمشر برهام صالح ګډون کړی و.

پاپ په دې سفر کې د عراق د موصل چې د اسلامي دولت سخت دریځې ډلې مرکز و په ګډون له څلورو ښارونو څخه کتنه وکړه او عراقیانو ته‌یې وویل چې سوله پر جګړې ډېره قوي ده. هغه زیاته کړه عراق به‌یې تل په زړه کې وي.

د نړۍ د کاتولیک عیسویانو مشر دغه‌راز د عراق د شیعه مسلمانانو له ستر مشر ایات‌الله علي سیستاني سره هم وکتل.

یونېسف: د کرونا له امله ستونزې ښايي د ۱۰ ملیونه نورو ماشومانو د ودونو لامل شي

ارشیف، له یوه ۴۰ کلن سړي سره یوه ۱۱ کلنې واده شوې نجلۍ، د یونېسف د ۲۰۰۷ کال انځور

د ملګرو ملتونو د ماشومانو د ساتنې اداره، یونېسف وایي د کرونا له امله رامنځته شوې ستونزې ښایي د دې سبب شي چې په راتلونکې یوه لسیزه کې ۱۰ ملیونه نور ماشومان ودونه وکړي.

دغې ادارې د مارچ د اتمې په مناسبت نن په خپره کړې څېړنه کې ویلي چې د ښوونځیو بندېدو، اقتصادي فشارونو، په خدمتونو کې خنډونو، امیندواري او د کرونا وبا له امله د میندو او پلرونو مړینې، ډېرې هغه نجونې چې زیانمنونکې دي، په کوچنیوالي د واده له خطر سره مخامخ کوي.

په دغه څېړنیز راپور کې چې د «'کووېډ-۱۹'؛ د ماشومانو د ودونو په وړاندې پرمختګونو ته ګواښ»، تر سرلیک لاندې د ښځو د نړیوالې ورځې په مناسبت خپور شوی دغه‌راز ویل شوي چې که دغه وضعیت دوام وکړي دا به هغه پرمختګونه ډېر شاته وغورځوي چې په وروستیو کلونو کې د ماشومانو د ودونو په وړاندې کمپاین په ترڅ کې ترلاسه شوي دي.

استرالیا له برما سره دفاعي همکاري ودروله

میانمار کې د پوځ ضد مظاهرې

استرالیا وایي، له برما سره‌یې دفاعي همکاري درولې او د هغو مظاهره کوونکو چې د پوځ له لوري د تېرې میاشتې د کودتا په وړاندې اعتراضونه کوي، د بې‌رحمانه ځپنې له امله د خپلې بشري مرستې لوری بلې خوا ته اړوي.

د استرالیا د بهرنیو چارو وزیر مارایس پایان نن وویل چې هېواد به‌یې سمدستي دغه عاجلې بشري مرستې د برما له اقلیت روهینګیا مسلمانانو او د دې هېواد له نورو اقلیتونو سره وکړې.

استرالیا دغه‌راز وویل چې له برما سره‌یې د راتلونکو پنځو کلونو په مخه د شاوخوا یو ملیون ۲۰۰ زره امریکایي ډالرو په لګښت د پوځي زده‌کړې پروګرام ځنډولی دی.

له کله چې د تېرې فبرورۍ میاشتې په لومړۍ نېټه په میانمار یا پخوانۍ برما کې پوځ کودتا وکړه او د دې هېواد د ملکي حکومت مشره انګ سان سوچي او یو شمېر نور مشران‌یې په کور کې نظربند کړي یا نیولي په دې هېواد کې د پوځیانو پر ضد نږدې هره ورځ مظاهرې کېږي.

د دغو مظاهرو په ترڅ کې په لسګونه کسان وژل شوي او سلګونه نور نیول شوي دي.

د امریکا دفاع وزیر: د خپلو ګټو د دفاع لپاره هر لازم اقدام به وکړو

د امریکا دفاع وزیر لوید استین

د امریکا متحده ایالاتو دفاع وزیر وايي هېواد به‌یې د خپلو ګټو د دفاع لپاره هر لازم اقدام وکړي.

لوید استین (Lloyd Austin) دا خبره پرون یکشنبه وروسته تر دې وکړه چې د عراق عین‌الاسد پوځي اډې ته څېرمه یو راکټ ولګېد.

په دغه پوځي اډه کې د عراقي ځواکونو ترڅنګ د ائتلاف او امریکا پوځیان هم دېره دي.

د امریکا دفاع وزیر استین له «ABC» ټلوېزیون سره په مرکه کې چې پرون خپره شوه وویل، امریکا له عراقه غواړي چې دغه پېښه په جدیت وڅېړي او معلومه کړي چې څوک مسؤل دي.

وروسته له هغې چې د امریکا په یوه هوايي حمله کې د ۲۰۲۰م کال د جنورۍ میاشتې پر درېیمه د عراق پلازمېنې بغداد ته څېرمه د ایران د سپاه پاسداران د قدس ځواک قوماندان قاسم سلیماني ووژل شو، ایران د دې وژنې د غچ اخیستو خبرداری ورکړی و.

د دوبۍ نړیوال هوايي ډګر کې به نور د مسافرو سترګې د پاسپورټ رول لوبوي

د دوبۍ هوايي ډګر

تر دې وروسته به د دوبۍ په نړیوال هوايي ډګر کې د مسافرو سترګې د هغوی د پاسپورټ په څېر رول ولوبوي.

په دې معنی چې پرمختللې وسیلې به لومړی د مسافرو د سترګو عکسونه اخلي او بیا به مسافر د دوبۍ له میدانه د الوتنو لپاره په اوږدو کتارونو کې انتظار نه‌پاتې کېږي.

که څه هم دا تازه تدابیر تېره میاشت معرفي شوي، خو پرون یکشنبه اجرا شول چې هدف‌یې د مسافرو د وخت د ضایع کېدو مخنیوی دی.

د دوبۍ په هوايي ډګر کې د سترګو سکن کول یو څو ثانیې وخت نیسي او مسافرو ته اسانتیا ایجادوي.

د نړیوالو الوتنو له اړخه د دوبۍ هوايي ډګر د نړۍ له لویو هوايي ډګرونو ګڼل کېږي.

یوازې په ۲۰۱۹م کال کې نږدې ۲۴ ملیونه وګړو د دې میدان له طریقه تګ راتګ کړی دی، خو تېر میلادي کال د کرونا وبا له کبله د مسافرو شمېر ۷۰ سلنه کم شو.

پاپ فرانسېس د موصل الطاهره کلیسا کې د عراق د جګړې قربانیانو ته دعا وکړه

د کاتولیکو عیسویانو مشر پاپ فرانسېس د عراق د شمالي ښار موصل په یوې لرغونې کلیسا کې د عراق د جګړې قربانیانو ته د دعا پر مهال

د کاتولیکو عیسویانو مشر پاپ فرانسېس د عراق د شمالي ښار موصل په یوې لرغونې کلیسا کې د عراق د جګړې قربانیانو ته دعا وکړه.

خلک نن سهار د الطاهرې کلیسا په انګړ کې راټول او د پاپ خبرو ته‌یې غوږ کېښود، د نصرانیانو دا یو لرغونی مرکز د داعش ډلې له‌خوا نړېدلی دی.

الطاهره د نړۍ یوه له لرغونو کلیساوو څخه وه چې ۱۴ پېړۍ تاریخ لري.

پاپ په خپلو خبرو کې د عراق له مسیحیانو وغوښتل چې د هستوګنې سیمې پرې نه‌ږدي.

له ۲۰۱۴ نر تر ۲۰۱۷ کال پورې پر موصل ښار د داعش د ولکې له کبله سلګونه زره مسیحیان د عراق د شمالي سیمو پرېښودو ته اړ شول.

پاپ په قره‌قوش سیمه کې د عراق یوې بلې لویې کلیسا ته هم ولاړ چې یوه برخه‌یې داعش نړولې ده.

دغلته د داعش له ماتې وروسته بېرته مسیحیان خپلو مېنو ته ستانه شوي دي.

۸۴ کلن پاپ د نن ورځې په پای کې د اربیل په ستډیوم کې خلکو ته وینا کوي او اټکل دا دی چې لسګونه زره کسان به دې راټولېدنه کې ګډون وکړي.

پاکستان کې له کرښې د رېل ګاډي وتو پېښه؛ یو کس وژل شوی ۴۰ نور ټپيان دي

د پاکستان په جنوبي سند ایالت کې له کرښې وتلی مسافر وړونکی رېل ګاډی

د پاکستان په جنوبي سند ایالت کې یو مسافر وړونکی رېل ګاډی له کرښې وتلی چې له امله‌یې یو تن وژل شوی او ۴۰ نور ټپيان دي.

د پاکستان د اوسپنې پټلۍ یو کارکوونکی کامران لشاري وایي، دغه رېل ګاډی نن سهار له کراچۍ د لاهور خوا ته روان و چې له کرښې ووت او ۸ کابینونه‌یې چپه شول.

د لشاري په خبره، د ۴۰ ټپیانو او یوې وژل شوې ښځې جسد سیمه کې یوه نږدې روغتون ته لېږدول شوي دي.

د پاکستان د رېل پټلۍ وزیر اعظم سواتي ویلي، د پېښې د لامل په اړه به څېړنه وکړي.

سویس کې نن د ښځو د بورقې په اړه ټول پوښتنه کېږي

ارشیف، جرمني کې بورقه لرونکې مېرمنې

په سویس کې نن په دې ټول‌پوښتنه کېږي چې د ښځو بورقه منع کړل شي او که نه‌شي.

دا ټول‌پوښتنه له دې سره سره کېږي چې په دغه هېواد کې د هغو ښځو چې د مخ په شمول سر تر پایه ځان پټوي، شمېر له لسګونو تنو نه‌اوړي.

مخکې تر مخکې نظرپوښتنې ښيي چې د موافقو او مخالفو شمېر ډېر سره نږدې دی.

که په ټول‌پوښتنه کې د خلکو اکثریت د بورقې پر ضد رایه ورکړه، نوی قانون به سړي هم له دې راګرځوي چې خپلې ښځې د مخ پټولو ته مجبوره نه‌کړي.

روغتیا نړیوال سازمان: اروپا کې یو وار بیا د کرونا ویروس په زیاتېدو دی

د بلغاریا په یوه روغتون کې په کرونا ویروس د اخته ناروغانو څانګه

د روغتیا نړیوال سازمان وايي، په اروپا کې یو وار بیا د کرونا ویروس مثبتې پېښې په زیاتېدو دي.

د دې ادارې په وینا په تېرو ۶ اوونیو کې په اروپا کې د کرونا ویروس پېښې مخ په کمېدو وې، خو په وروستۍ یوه اوونۍ کې یو ملیون نوې پېښې ثبت شوې چې تر ورتېرې اوونۍ په سلو کې ۹ ډېرې دي.

د روغتیا نړیوال سازمان وايي چې اکثره نوې پېښې د کرونا د انګلیسي بڼې دي.

د کرونا دا ډول ویروس په ۱۰ هېوادونو لکه بریتانیا، ایټالیا، ایرلنډ، جرمني، فرانسه، هالنډ، اسرائیل، اسپانیا او پورتګال کې زیات دی.

تېرو ۲۴ ساعتونو کې د یمن مارب ولایت نښتو کې لږترلږه ۹۰ تنه ووژل شول

ارشیف، یمن کې د نښتو یوه سیمه

د یمن حکومتي سرچینو پرون (شنبه) وویل، په تېرو ۲۴ ساعتونو کې د دغه هېواد د مارب ولایت په نښتو کې لږترلږه ۹۰ تنه وژل شوي دي.

د ایران له ملاتړه برخه‌منو حوثي یاغیانو له تېرې میاشتې راهیسې د دې ستراتېژيکې سیمې د نیولو لپاره بریدونه پیل کړي دي.

دا تېل لرونکې سیمه د یمن په شمال کې د دولتي ځواکونو وروستی مرکز ګڼل کېږي.

د یمن حکومتي سرچینو ویلي چې په وروستیو نښتو کې ۳۲ دولتي ځواکونه یا د حکومت پلوي قبایل وژل شوي دي.

دوی د حوثي یاغیانو د وژل شویو کسانو شمېر ۵۸ تنه ښودلی دی.

امریکا کې تر ۸۷ ملیونه او ۹۱۲ لکه دوزه ډېر کرونا واکسین خلکو ته ورکړل شوی

نیویارک کې په کرونا ویروس اخته یوه ناروغ ته د کرونا ویروس ضد واکسین تطبیق

په امریکا کې د ناروغیو د وقایې او مخنیوي مرکز وايي، تر پرون شنبې پورې په دغه هېواد کې تر ۸۷ ملیونه او ۹۱۲ لکه دوزه ډېر د کرونا واکسین خلکو ته ورکړل شوی دی.

د دې مرکز په وینا تر اوسه پورې په امریکا کې څه باندې ۱۱۶ ملیونه او ۲۵۵ زره دوزه کرونا ضد واکسین وېشل شوی دی.

د امریکا د ناروغیو د وقایې او مخنیوي مرکز زیاتوي چې تر پرون پورې څه باندې ۵۷ ملیونه او ۳۵۸ لکه امریکایانو ته یو دوز او نږدې ۳۰ ملیونو ته دوه دوزه واکسین ورکړل شوی دی.

د امریکا ولسمشر جو بایډن ویلي چې د مې میاشتې تر پایه به ټولو امریکایانو ته د کرونا ویروس په وړاندې واکسین برابر شي.

نور راوښيه

XS
SM
MD
LG