د لاسرسۍ وړ لېنکونه

تازه خبر
دوشنبه ۲۳ چنګاښ ۱۳۹۹ کابل ۰۱:۲۵

افغانستان

اشرف غني: ډېر ژر به وزارتونو کې سرپرستۍ ته د پای ټکی کېږدم

د افغانستان ولسمشر محمد اشرف غني په کابل کې د ولسي جرګې له اداري پلاوي سره وکتل.

ولسمشر محمد اشرف غني ژمنه کړې چې ډېر ژر به په وزارتونو کې سرپرستۍ ته د پای ټکی کېږدي.

د ارګ د خبرپاڼې له مخې ښاغلي غني د دوشنبې په ورځ (د غبرګولي په ۱۹مه) نېټه د ولسي جرګې د اداري پلاوي له رئیس سره په غونډه کې همداراز وویل چې ډېر ژر به نوماند وزیران د رأی اخیستلو لپاره ولسي جرګې ته معرفي شي.

تر اوسه ولسمشر د بهرنیو چارو، ماليې، عامې روغتیا، اطلاعاتو او فرهنګ، ښځو چارو او ښار جوړونې وزارتونو لپاره نوماند وزیران معرفي کړي دي.

یو شمېر نور وزارتونه لکه دفاع او کورنیو چارو وزارتونه داسې چارواکي اداره کوي چې د مخکېني حکومت راهیسې پر دې دندو پاته دي.

د ورځې تازه خبرونه دلته ولولئ

'کندز کې د طالبانو بریدونو کې دولتي ځواکونه او ملکي وګړي وژل شوي'

ارشیف، کندز کې د طالبانو ضد عملیات

د کندز چارواکي په دې ولایت کې د وسله‌والو طالبانو په نویو بریدونو کې د یو شمېر دولتي ځواکونو او ملکي وګړو د وژل کېدو خبره کوي.

د کندز ولایت د ولایتي شورا رئیس محمد یوسف ایوبي نن ازادي راډيو ته وویل چې تېره شپه ۹ بجې وسله‌والو طالبانو د امام صاحب ولسوالۍ ښار روضې ته نږدې د دولتي ځواکونو پر پوستو برdدونه وکړل چې په نتیجه کې یې دوi تنه ملکي وګړي او ۱۵ تنه دولتي ځواکونه وژل شوي دي.

د هغه په وینا په وژل شویو کې د ملي اردو، د ملي پولیسو، د سیمه‌ییزو پولیسو او د ولسي پاڅون کوونکو سرتېري شامل دي.

د کندز د والي ویاند عصمت‌الله مرادي هم دا پېښه تأییدوي، خو دولتي ځواکونو ته اوښتې مرګ‌ژوبله کمه بولي.

نوموړی وایي چې په چهاردره ولسوالۍ کې د ملي اردو درې سرتېري او د محلي پولیسو درې سرتېري وژل شوي او په امام صاحب ولسوالۍ کې هم د ملي اردو ۴ سرتېري او ۴ تنه ملي پولیس وژل شوي دي.

د ښاغلي مرادي په وینا، په دغو نښتو کې ۳ تنه طالبان وژل شوي او ۴ تنه‌یې هم ټپیان شوي دي.

تر اوسه پورې په دې اړه وسله‌والو طالبانو څه نه‌دي ویلي.

'کندهار او زابل کې د طالبانو یو قوماندان او ۱۲ وسله‌والو وژل شوي'

ارشیف

امنیتي چارواکي د کندهار په ښورابک او د زابل په ارغنداب ولسوالیو کې د طالبانو د یوه قوماندان په ګډون د ۱۲ وسله‌والو د وژل کېدو او د ۹ نورو د ټپي کېدو خبر ورکوي.

د کندهار د امنیه قوماندانۍ ویاند جمال ناصر بارکزي ازادي رادیو ته وویل چې تېره شپه ۱۰ بجې وسله‌والو طالبانو د کندهار د ښورابک ولسوالۍ پر امنیتي پوستو حمله وکړه چې د پولیسو په ځوابي برید کې ۱۱ وسله‌وال وژل شوي او پنځه نور ټپیان شوي دي.

بل‌خوا د افغانستان دفاع وزارت د زابل په ارغنداب ولسوالۍ کې د کاظم په نوم د وسله‌والو طالبانو د یوه قوماندان د وژل کېدو او څلورو نورو د ټپي کېدو خبر ورکوي.

وسله‌والو طالبانو تر اوسه په دې اړه څه نه‌دي ویلي.

پنجشېر کې سېلاب د دغه ولایت لویه لاره د ټرافیکو پر مخ تړلې

په پنجشیر کې سیلاب

په پنجشېر ولایت کې د سېلاب له امله د دې ولایت لویه لاره د ټرافیکو پر مخ تړل شوې ده.

د ازادي راډیو د سیمه‌ییزخبریال د راپور له مخې په سیمه کې تېره نیمه شپه سخت باران پیل شوی و چې تر نن غرمې پورې اورېده او له امله‌یې د دې ولایت ډېرو کلیو کې خلکو ته زیانونه اوښتي دي.

د پنجشېر مرستیال والي محمد امین صدیقي ازادي راډیو ته وویل چې تر اوسه ورته د ځاني زیانونو راپور نه‌دی ورکړل شوی، خو مالي زیانونه خلکو ته رسېدلي او هم د لویې لارې په بندېدو سره د دې ولایت اوسېدونکي له ستونزو سره مخامخ شوي دي.

د هغه په وینا په لومړي ګام کې هڅه کوي چې لویه لاره بېرته د ټرافیکو پر مخ پرانیزي.

بدخشان کې ۷ پولیس طالبانو سره په جګړه کې وژل شوي

ارشیف، بدخشان

د بدخشان په ارغنجخوا ولسوالۍ کې ۷ افغان پولیس د طالبانو په جګړه کې وژل شوي دي.

د والي ویاند نېک محمد نظري ازادي راډیو ته وویل، دغه محلي او ملي پولیس بېګا هغه مهال ووژل شول چې طالبانو له څو خواوو د دوی پر پوستو بریدونه وکړل.

نظري وایي، ځوابي ډزو کې پنځه طالبان هم وژل شوي دي.

په غور کې هم د امنیتي ځواکونو پر پوستې د طالبانو برید یو سرتېری وژلی او دوه نور یې ټپیان کړي دي.

دا خبره د غور امنیه قوماندان محمد امین احمدي نن سهار ازادي راډیو ته وکړه.

طالبانو د دواړو پېښو په اړه څه نه‌دي ویلي.

د خوړو سازمان له افغانستان سره د اروپایي ټولنې د مرستو هرکلی وکړ

ارشیف

'ډبلیو اف پي' یا د خوړو نړیوال سازمان د افغانستان له خلکو سره د اروپایي ټولني د نویو مرستو د اعلان هرکلی وکړ.

دغه سازمان د یکشنبي په ورځ په یوې اعلامیه کې وویل چې اروپایي ټولنه له 'ډبلیو اف پي' سره درې میلیونه او ۶۰۰ زره یورو مرسته کوي څو په افغانستان کې د طبیعي پېښو زیانمنو شویو او جګړه‌ځپلو سره مرسته وشي.

اعلامیه په افغانستان کې د خوړو نړیوال پروګرام د مرستیال او سرپرست مشر رابرت کساکا له قوله لیکلي چې وایي، په دې مرستې سره به 'ډبلیو اف پي' په افغانستان کې ۴۷۰ زره د جګړو او طبیعي افاتو زیانمنو کسانو سره او ۱۵۰ زرو هغو ماشومانو او میندو ته چې په خوارځواکۍ اخته شوي دي، خوراکي او بشري مرستې ورسوي.

په افغانستان کې د اروپایي ټولنې د بشري پروګرامونو مشر لویجي پندولفي ویلي چې د افغانستان ډېری هغه وګړي چې په لیرې پرتو سیمو کې ژوند کوي له روغتیایي امکاناتو څخه لیرې دي او بشري مرستو ته‌یې اړتیا ډېره ده.

اروپایي ټولنې په تېرو پنځو کلونو کې د یوه مخکښ بشري تمویلوونکي په توګه د افغانستان سره د مرستې په هدف شپږ میلیونه یورو مرسته کړې ده.

د بغلان دوشي لپاره د طالبان پوځي مسؤل ووژل شو

د بغلان ولایت نقشه

د بغلان دوشي لپاره د طالبان پوځي مسؤل ملا ذاکر ګجر ووژل شو.

د ۲۱۷ پامیر قول اردو په یوې اعلامیه کې چې د یکشنبې په ورځ خپره شوه راغلي چې ملا ذاکر ګجر له نورو پنځو وسله‌والو طالبانو سره یوځای پرون تر غرمې وروسته له افغان ځواکونو سره په نښتو کې ووژل شو.

اعلامیه زیاتوي نښتې هغه وخت وشوې چې طالبانو د بغلان ولایت د دوشي ولسوالۍ په زور ابي سیمه کې پر افغان امنیتي ځواکونو برید وکړ چې د افغان ځواکونو له مقاومت سره مخامخ شول.

د ۲۱۷ پامیر قول اردو په اعلامیه کې په دې نښته کې د افغان ځواکونو د مرګ‌ژوبلې په اړه څه نه‌دي ویل شوي.

وسله‌والو طالبانو تر اوسه په دې اړه څه نه‌دي ویلي.

کندهار کې طالبانو ۱۰ تنه افغان ځواکونه خوشې کړي

کندهار

طالبان په کندهار ولایت کې له بنده د ۱۰ تنو افغان ځواکونو د خوشې کېدو خبره کوي.

په قطر کې د طالبانو د سیاسي دفتر ویاند سهیل شاهین د یکشنبې په ماښام پر خپل ټویټر ولیکل چې ۱۰ تنه افغان ځواکونه‌یې په کندهار ولایت کې له بنده خوشې او خپلو کورونو ته‌یې واستول.

دا اقدام له حکومت سره د طالبانو د مخامخ خبرو د پیلېدو لپاره د دواړو لورو د بندیانو د تبادلې لړۍ له مخې کېږي چې د فبرورۍ پر ۲۹مه د امریکا او طالبانو ترمنځ د هوکړه‌لیک پر مهال موافقه ورباندې شوې وه.

که څه هم حکومت تر اوسه د پرونیو ۱۰ تنو د خوشې کېدو په اړه څه نه‌دي ویلي، خو ارګ ټینګار کوي چې د زرګونه طالب بندیانو په خوشې کېدو سره حکومت د سولې خبرو د پیل لپاره جدي ګامونه اخیستي دي او اوس له طالبانو غواړي چې پر خپلو ژمنو ودرېږي.

د فبرورۍ د ۲۹مې په هوکړه‌لیک کې راغلي چې افغان حکومت به تر بین‌الافغاني مذاکراتو مخکې د طالبانو ۵،۰۰۰ او طالبان به د حکومت ۱،۰۰۰ بندیان خوشې کړي.

تر اوسه افغان حکومت ۴،۰۱۵ او د نویو خوشې شویو کسانو سره د طالبانو له‌خوا د خوشې شویو افغان ځواکونو شمېر ۹۷۷ ته رسېږي.

افغان کرکټ بورډ له ۱۷ کلنو د کم عمره ځوانانو کمپ پیلوي

ارشیف

په نږدې راتلونکي کې له ۱۷ کلنو د کم عمره ځوانانو کمپ پیلېږي.

افغانستان کرکټ بورډ به ډېر ژر د ۲۰۲۱م کال د ۱۹ کلنو کم عمره ځوانانو د اسیا جام لپاره د چمتووالي په موخه د ۳۰ هغو لوبغاړو چې عمرونه‌یې ۱۶ یا ۱۷ کلونه وي، د څلور ورځني روزنیز کمپ سربېره، څلور یو ورځنۍ سیالۍ پیل کړي.

د افغانستان د کرکټ بورډ ویاند فرید هوتک په دې اړه ازادي راډیو ته وویل: "ټاکل شوې ډېر ژر به د افغانستان د کرکټ بورډ له لوري ځوانو لوبغاړو لپاره تمریناتي کمپ پیل شي. په پام کې ده دا کمپ د ننګرهار په غازي امان‌الله خان کرکټ لوبغالي کې پیل شي. دا کمپ به په مختلفو برخو کې وي او لوبغاړي به د راروانو نړیوالو لوبو لپاره په بېلابېلو برخو کې وروزل شي."

ښاغلی هوتک وایي یاد کمپ او سیالۍ به د روغتیا وزارت سپارښتنو ته په پام سره د داخلي روزونکو تر څارنې لاندې ترسره شي چې په‌کې به د افغان تنکيو لوبغاړو په توپوهنه، توپ اچونه، ډګر ساتنه او تکړه‌والي هر اړخيز کار وشي.

د یادونې وړ ده چې په یادو ۳۰ لوبغاړو کې ټول هغه لوبغاړي شامل دي چې تېر کال‌یې د ۱۶ کلنو لوبغاړو په لوبو او کمپ کې ګډون درلود او په یادو لوبو کې ډېر ښه ځلېدلي وو.

د جلال‌اباد اوسېدونکي: له یوې نسبي کرارۍ وروسته ناامنۍ زیاتې شوي

د ننګرهار ولایت جلال‌اباد ښار

د ننګرهار ولایت د مرکز جلال‌اباد ښار اوسېدونکي وايي، له یوې نسبي کرارۍ وروسته بیا په دغه ښار کې ناامنۍ زیاتې شوې دي.

له ننګرهار څخه د ازادي راډیو د خبریال له راپور سره سم، د روان سرطان په تېرو ۲۲ ورځو کې په جلال‌اباد ښار کې ۶ چاودنې شوي چې له کبله‌یې نږدې ۴۰ تنو ته مرګ‌ژوبله اوښتې ده.

اکثره پېښې د مقناطیسي ماینونو او بمي چاودنو په نتیجه کې شوي.

د ننګرهار اوسېدونکي له امنیتي چارواکو غواړي چې د دولت د وسله‌والو مخالفانو د فعالیتونو د مخنیوي لپاره تدابیر زیات کړي.

د جلال‌اباد ښار اوسېدونکي دا اندېښنې په داسې حال کې څرګندوي چې د دغه ښار او پلازمېنې کابل ترمنځ د پرتې سروبي ولسوالۍ اوسېدونکي هم وايي چې د پخوا په پرتله‌یې په ولسوالۍ کې ناامني زیاته شوې ده.

د هرات له محبس ۱۲ طالب بندیان خوشې شول

ارشیف، ازاد شوي طالب بندیان

د هرات چارواکي وايي، د دغه ولایت له محبس څخه ۱۲ طالب بندیان خوشې شوي دي.

د هرات د والي ویاند جېلاني فرهاد ازادي رادیو ته وویل، خوشې شویو طالب بندیانو ژمنه کړې چې بیا به د جنګ میدان ته نه‌ځي او د سولې لپاره به کار کوي.

د هرات د والي ویاند په وینا تر اوسه پورې د هرات له محبسه ۷۵ طالب بندیان خوشې شوي دي.

تېره اوونۍ افغان چارواکو ویلي و چې ټولټال ۴،۰۱۹ طالب بندیان‌یې خوشې کړي دي.

اتل قول اردو: ترینکوټ او کندهار کې لږترلږه ۱۶ وسله‌وال طالبان وژل شوي

ارشیف

د ۲۰۵ اتل قول اردو قومانداني وايي، په دوو جلا هوايي بریدونو کې په ترینکوټ او کندهار کې لږترلږه ۱۶ وسله‌وال طالبان وژل شوي او ۷ نور ژوبل دي.

د دې قوماندانۍ د مطبوعاتي دفتر مرستیال صادق عیسي ازادي راډیو ته وویل چې ۹ وسله‌وال طالبان پرون ناوخته د ارزګان ولایت په مرکز ترینکوټ کې وروسته له دې په هوايي برید کې ووژل شول چې په سیمه کې یې د امنیتي ځواکونو پر پوستو بریدونه وکړل.

د ښاغلي عیسي په وینا ۷ تنه نور طالبان د کندهار په ارغستان ولسوالۍ کې وژل شوي او څلور نور ژوبل شوي دي.

سمنګان کې د بادامو حاصلات زیات شوي

ارشیف

په سمنګان کې د بادامو په حاصلاتو کې زياتوالی راغلی دی.

د سمنګان ولايت د کرنې او اوبو لګولو رئيس محمد رحمان ارغنديوال نن ازادي راډیو ته وویل، اټکل دا دی چې کروندګر او بڼوال سږ کال پنځه زره متريک ټنه بادام راټول کړي.

د نوموړي په خبره تېر کال د سمنګان د بادامو حاصلات څه د پاسه درې زره متريک ټنو ته رسېدل.

د سمنګان ولايت د کرنې او اوبو لګولو رئيس وایي چې په دغه ولايت کې د بادامو د حاصلاتو زياتوالی به د کروندګرو او بڼوالو له اقتصاد سره هم مرسته وکړي.

د سپین بولدک-چمن ترمنځ لویه لار تړل شوې

د سپین بولدک-چمن لار

د کندهار د سپین بولدک-چمن ترمنځ لویه لار له تېرو ۱۱ ورځو راهیسې تړل شوې ده.

د افغانستان د متشبثینو عالي بورډ مشر رحم‌الدین حاجي اغا نن یکشنبه ازادي راډیو ته وویل چې له دې امله سوداګرو ته په لکونو افغانۍ زیان رسېدلی.

نوموړي وویل، د دغې لارې د تړل کېدو له امله سلګونه باروړونکي موټر درول شوي او مېوې د خرابېدو په حال کې دي.

د کندهار د سپین بولدک-چمن ترمنځ لار د پاکستان له لوري تړل شوې ده.

سوداګر وایي، یاده ستونزه‌یې له افغان حکومت سره شریکه کړې، خو تر اوسه حل شوې نه‌ده.

غور کې طالبانو ۱۶ دولتي سرتېري او یو ملکي وګړی خوشې کړل

ارشیف، د طالبانو له لوري په لغمان کې یو شمېر خوشې شوي زندانیان

طالبانو ۱۶ دولتي سرتېري او یو ملکي وګړی په غور کې خوشې کړل.

د غور سیمه‌ییز چارواکي وايي چې دا کسان له څه باندې دوو میاشتو راهیسې اسیران وو او طالبانو پرون ماسپښین ازاد کړل او کورنیو ته‌یې وسپارل.

د غور مرستیال والي حبیب‌الله رادمنش وايي، هیله‌من دی چې د بندیانو تبادله او د حکومت او طالبانو له‌خوا پر خپلو ژمنو عمل به په افغانستان کې د سولې له ټینګښت سره مرسته وکړي.

په غور کې دوه ورځې مخکې هم طالبانو نهه تنه دولتي سرتېري او دوه ملکي وګړي خوشې کړل.

په هغه موافقه کې چې امریکا او طالبانو په فبروري میاشت کې لاسلیک کړه ویل شوي دي چې افغان حکومت به پنځه زره طالبان او طالبان به زر تنه حکومتي سرتېري خوشې کوي.

په دې ترڅ کې افغان حکومت تر دې دمه شااوخوا څلور زره او طالبانو له ۷۵۰ زیات بندیان خوشې کړي دي.

فراه کې ځینو دولتي کارکوونکو ته صحي بستې وېشل کېږي

د فراه والي شعیب ثابت او ځیني نور چارواکي

د فراه د دولتي ادارو اجیرو کارکوونکو ته د 'کووېډ-۱۹' ناروغۍ د مخنیوي اته زره صحي بستې او د زده‌کوونکو لپاره د ښوونځي اووه زره بکسونه او نور وسایل وېشل کېږي.

د فراه والي محمد شعیب ثابت پرون شنبه (د چنګاښ په ۲۱مه) د دې مرستو د وېش پر مهال وویل: "د دې موادو وېش د جمهوري ریاست له امر سره سم او د یونېسف له مرستو څخه د دولتي ادارو اجیرو کارکوونکو او بې‌وزلو کورنیو ته پیل شوی دی."

د مرستې په دې بستو کې صابون، دستمال او د ښوونځي وسایل شامل دي چې د ملګرو ملتونو د ماشومانو د ملاتړ ادارې یونېسف چمتو کړي دي.

په فراه کې تر دې دمه د 'کووېډ-۱۹' ۳۰۰ پېښې ثبت شوې دي، خو ویل کېږي چې اصلي شمېرې ښايي تر دې ډېرې لوړې وي.

نور راوښيه

XS
SM
MD
LG