تازه خبر
دوشنبه ۲ لیندۍ ۱۴۰۵ کابل ۰۲:۵۴

افغانستان

عبدالله: افغان حکومت د سولې مذاکراتو ته چمتو دی

د مصالحې عالي شورا رئیس عبدالله عبدالله
د مصالحې عالي شورا رئیس عبدالله عبدالله

د مصالحې عالي شورا رئیس وايي، افغان حکومت د سولې مذاکراتو ته چمتو دی.

عبدالله عبدالله د دوشنبې په ورځ له افغانستان سره د سولې په برخه کې د نړیوالې ټولنې د مرستو په اړه په خبرو کې وویل چې افغان حکومت د سولې له هېڅ ډول هڅو ځان نه‌سپموي.

ښاغلي عبدالله پر خپله فېس‌بوک پاڼه لیکلي چې تمه لري طالبان له رامنځته شوي فرصته په استفاده د خلکو له غوښتنو سره سمې هڅې وکړي.

د افغان حکومت او نړیوالو ادارو پر هڅو سربېره طالبان تر اوسه له افغانانو سره مخامخ خپلمنځي خبرو ته نه‌دي چمتو شوي او د خپلو بندیانو پر راخوشې کېدو ټينګار کوي.

خو د مصالحې عالي شورا رئیس ویلي چې تر اوسه له حکومتي زندانونو د طالبانو شااوخوا درې زره بندیان خوشې شوي دي. ده هیله څرګنده کړې چې د مذاکراتو د پیل تر ورځې پورې به د بندیانو د راخوشې کېدو بهیر بشپړ شي یا به دومره بندیان راخوشې شي چې دواړو لورو ته د منلو وړ وي.

پرونۍ غونډه د اسیا زړه ټولنې له‌خوا د جرمني د کنراد بنسټ او نیویارک د نړیوال پوهنتون په همکارۍ جوړه شوې وه چې د افغانستان د چارو پوهانو په‌کې ګډون کړی وو.

د ورځې تازه خبرونه دلته ولولئ

د جرمني بدیل ګوند (AfD) شریک مشر تینو کروپالا د افغانانو په شمول د ۲.۶ میلیونه کډوالو د ایستلو غوښتنه کړې

د جرمني د بدیل ګوند شریک مشر تینو کروپالا
د جرمني د بدیل ګوند شریک مشر تینو کروپالا

د جرمني لپاره بدیل ګوند (AfD) شریک مشر تینو کروپالا د افغانانو په شمول د ۲.۶ میلیونه کډوالو د بېرته ستنولو غوښتنه کړې ده.

هغه د بیلډ رسنۍ له یوه پاډکسټ سره مرکه کې ویلي چې د مجرمو کډوالو سربېره چې باید وایستل شي د افغانستان، سوریې او اوکراین شاوخوا ۲ اعشاریه شپږ میلیونه کډوال هم د ده د وړاندیز په اساس باید له جرمني ووځي.

هغه دلیل راوړی چې د اوکرایین د جګړې په ختمېدو او په سوریې او افغانستان کې د امنیتي شرایطو په ښه کېدو سره به نور د خوندیتوب او پناه اړتیا نه وي او باید دا خلک بېرته ستانه شي.

جرمني په تېرو شاوخوا دوو کلونو کې څه باندې ۲۶۰ افغان کډوال ډیپورټ کړي او ویلي یې دي چې دوی جرمي دوسیې درلودې یا مکرر جرمونه یې کړي و.

افغانستان ته چې اوسمهال د طالبانو تر واک لاندې دی د افغان کډوالو بېرته استول، تل د هغو سازمانونو او فعالانو له نیوکو سره مخ شوي چې د کډوالو د حقونو لپاره کار کوي.

د ایران د بشري حقونو یوه سازمان ویلي چې ایراني پوځیانو دری افغان کډوال په ډزو وژلي

سراوان کې ایراني پوله ساتي
سراوان کې ایراني پوله ساتي

د ایران د بشري حقونو یوه سازمان حال وش راپور ورکړی چې دری افغان کډوال د ایراني پوځیانو په ډزو سره وژل شوي.

دغه سازمان د شنبې په ورځ خبر ورکړی چې دا پېښه د سیستان بلوچستان ولایت سراوان ښار ته نږدې شوې او د دوی د موندنو په اساس دا افغان کډوال چې یو ماشوم، یوه ښځه او یو سړی دي په سر په ډزو لګېدلي.

د دغو کسانو مړي تر ډبرو لاندې پټ شوي و او لا یې نور جزییات نه دي روښانه.

ازادي راډیو په خپلواکه توګه د دغه خبر کره والی نه شي تاییدولی خو تر دې مخکې سیستان بلوچستان ته نږدې سیمو کې ګڼ افغان کډوال په بیلابیلو پېښو کې مړه شوي.

د دغه خبر تر لیکلو پورې د ایران اسلامي جمهوریت پوځي یا قضايي چارواکو د دې پېښې او یا د دغو دریو کډوالو د وژل کېدو د څرنګوالي په اړه کوم غبرګون نه دی ښودلی.

م.م: تېرو دریو کلونو کې څه باندې شپږ نیم میلیونه افغانان له ایران او پاکستان څخه راستانه شوي

له ایرانه راستانېدونکي کډوال
له ایرانه راستانېدونکي کډوال

د ملګرو ملتونو سازمان ویلي چې په تېرو دریو کلونو کې څه باندې شپږ نیم میلیونه افغانان له ایران او پاکستان څخه راستانه شوي.

دغه سازمان یکشنبه ناوخته په خپله ویبپاڼه د کډوالو عالي کمیشنرۍ یو ان اچ سي ار په حواله راپور ورکړی چې له دې ډلې لږ تر لږه درې میلیونه افغانان یواځې په ۲۰۲۵ کال کې راستانه شوي.

د ملګرو ملتونو په خبره د راستنو شویو دغه لوی شمېر د افغانستان په نفوس کې لس فیصده زیاتوالی راوستی چې ورسره د هستوګنې کورونو، کارونو او عامه خدماتو په برخو کې سخت فشار رامنځته کړی.

د کډوالو عالي کمیشنرۍ په خپل راپور کې له ګڼو هغو افغانانو سره خبرې کړي چې په ایران یا پاکستان کې یې کارونه درلودل او د ښه ژوند څښتنان وو خو خپل اصلي وطن ته په راستنېدو له ستونزو سره مخ دي.

د اسلامي همکاریو سازمان د طالبانو له حکومت سره د تعامل پر لارې نقشې خبرې کړې دي

د اسلامي همکاریو سازمان د افغانستان په اړه د وزیرانو د اړیکو ډلې نن په یوه مقدماتي غونډه کې د طالبانو له حکومت سره د تعامل لپاره د لارې نقشې پر جوړولو خبرې کړې دي.

دغه سازمان وايي، د غونډې ګډونوالو د افغانستان سیاسي او بشري وضعیت ارزولی او د دغه هېواد د خلکو د ملاتړ، ثبات او پرمختګ لپاره یې له طالبانو سره د تعامل د یوه پړاویز چوکاټ پر جوړولو نظرونه تبادله کړي دي.

دا غونډه په داسې حال کې جوړېږي چې د ۲۰۲۱ کال په اګست کې واک ته د طالبانو له بېرته رسېدو راوروسته، تر اوسه هېڅ هېواد د دې ډلې حکومت په رسمي توګه په رسمیت نه دی پېژندلی؛ خو د افغانستان یو شمېر ګاونډیو او د سیمې هېوادونو له دغه حکومت سره ډیپلوماتیکې او سوداګریزې اړیکې لري.

ملګري ملتونه: د افغانستان په ختیځ کې د زلزلې له امله ۶۴۹ زره ټنه کنډوالې پاتې دي

د ملګرو ملتونو پراختیايي پروګرام وايي، د اګست په ۳۱مه د افغانستان په ختیځ کې د زورورې زلزلې له امله څه باندې ۶۴۹ زره ټنه خاورې او کنډوالې پاتې دي، چې د پاکولو لپاره یې شاوخوا ۴۰ زره او ۵۰۰ لاریو ته اړتیا ده.

دې سازمان د سپوږمکۍ د تصویرونو له مخې، ویلي چې د زلزلې له امله ښايي د ۲۳ زرو او ۳۱ زرو ترمنځ کسان بې‌ځایه شوي وي. شاوخوا ۱.۴ میلیونه کسان د زلزلې له سختو ټکانونو سره مخ شوي او په کونړ، ننګرهار او لغمان ولایتونو کې تر ټولو ډېر زیانونه اوښتي دي.

د ملګرو ملتونو پراختیايي پروګرام خبرداری ورکړی چې د ژمي په رانژدې کېدو سره زلزله‌ځپلې کورنۍ خوندي سرپناه، خوراکي توکو، پاکو اوبو او روغتیايي خدمتونو ته بېړنۍ اړتیا لري.

دغه سازمان د نړیوالې ټولنې د لا ډېرو مرستو غوښتنه کړې او ټینګار یې کړی چې د کنډوالو پاکول او د ویجاړو شویو سیمو بیارغونه باید په خوندي او اغېزمن ډول ترسره شي.

د اسیا د الف لوبډلو سیالۍ: افغانستان له هانګ مانګ سره مخامخ کېږي

ارشیف
ارشیف

د افغانستان د کرکټ الف لوبډلې د اسیا د الف لوبډلو په جام کې له دوو پر له بسې ماتو وروسته سبا له هانګ کانګ سره د سیالۍ میدان ته وځي.

پرون (شنبه) د بنګله دېش الف لوبډلې د افغانستان الف لوبډلې ته په یو ویکټ ماتې ورکړه. تر دې وړاندې لومړۍ مسابقه د سریلانکا لوبډلې له افغانستان څخه ګټلې وه.

نن په بي ګروپ کې هند او پاکستان مخامخ کېږي.

افغانستان ته د ایران غیرنفتي صادرات ۳۲ سلنه زیات شوي

ایران وايي، د روان لمریز کال په لومړیو اوو میاشتو کې افغانستان ته د ایران د غیرنفتي توکو صادرات د تېر کال د همدې مودې پرتله د وزن له مخې ۳۲ سلنه زیات شوي دي.

د ایران د تایباد ښار د دوغارون ګمرک عمومي رئیس د شنبې په ورځ وویل، چې ایران په دې موده کې د دوغارون د ګمرک له لارې افغانستان ته ۷۴۵ زره او ۷۰۰ ټنه غیرنفتي توکي صادر کړي دي.

د هغه په وینا، د دغو صادراتو ارزښت ۲۴۷ میلیونه او ۵۹۰ زره ډالرو ته رسېږي، چې د تېر کال د همدې مودې پرتله یې ارزښت هم ۱۰ سلنه زیات شوی دی.

نوموړي زیاته کړې چې په دې اوو میاشتو کې د دوغارون له لارې افغانستان ته یو میلیون او ۲۱۶ زره ټنه توکي رسېدلې، چې ارزښت یې دوه میلیارده او ۳۹۸ میلیون ډالره دی.

نوموړي ویلي، چې په دې موده کې له افغانستان څخه د همدې ګمرک له لارې ایران ته ۱۱ زره او ۸۸۴ ټنه توکي وارد شوي، چې ارزښت یې ۲۲ میلیونه او ۳۵۰ زره ډالره دی.

افغان سندرغاړی وحید صابري ومړ

افغان سندرغاړی وحید صابري
افغان سندرغاړی وحید صابري

افغان سندرغاړی وحید صابري د ورپېښې ناروغۍ له امله ومړ.

په تاشکند کې د افغانانو د ټولنې مشر نعمت‌الله رحماني امریکا غږ ته د صابري د مړینې خبر تأیید کړی دی.

رحماني ویلي، کله چې هغوی د شنبې په سهار د هغه کور ته ورغلل، د وحید صابري جسد یې وموند.

رحماني زیاته کړې چې مرحوم صابري له "پخوا څخه د زړه ناروغي درلوده او د ډاکترانو په لارښوونه تر څارنې لاندې و".

وحید صابري په افغانستان کې د ۶۰مې هجري شمسي لسیزې یو له مشهورو سندرغاړو څخه و.

هغه د «باران» په نوم د موسیقۍ د ډلې غړی هم و چې مشري یې بل افغان سندرغاړي، فرهاد دریا کوله.

فرهاد دریا ازادي راډیو سره په خبرو کې وویل چې وحید صابري د هغه د ځوانۍ او هنري فعالیتونو ډېر خوږ ملګری و او په مړینه‌یې خپله ژوره خواشیني څرګنده کړه.

یو شمېر نورو افغان سندرغاړو او د هغه د غږ مینه‌والو هم د وحید صابري پر مړینه خواشیني ښودلې ده.

سرپل د افغانستان دوهم له ماینونو پاک ولایت اعلان شو

د طالبانو د پېښو پر وړاندې د مبارزې ادارې سرپل د افغانستان دوهم ولایت اعلان کړی چې په وینا یې، له ماینونو پاک شوی دی.

د دې ادارې ویاند محمدیوسف حماد د شنبې په ورځ، د نومبر په ۲۱مه، په یوه خپره کړې ویډیو کې ویلي چې د څېړنو له مخې، د سرپل په هېڅ ولسوالۍ کې د پخوانیو جګړو او د پخواني شوروي اتحاد د جګړې له وختونو څخه پاتې ماینونه نشته.

هغه زیاته کړې چې د سیمې د ارزونې، له اوسېدونکو سره د سلا مشورو او د سیمه‌ییزو چارواکو د تایید له مخې، دغه ولایت له ماینونو پاک شوی دی.

طالبانو تر دې مخکې بامیان هم له ماینونو او ناچاودو توکو پاک ولایت اعلان کړی و.

دا په داسې حال کې ده چې ملګرو ملتونو تر دې مخکې ویلي و، په افغانستان کې شاوخوا ۳.۳ میلیونه کسان له ماینونو او ناچاودو توکو ککړو سیمو په یوه کیلومترۍ کې ژوند کوي.

د ملګرو ملتونو د معلوماتو له مخې، په ۱۹۸۹ کال کې له افغانستانه د شوروي ځواکونو له وتلو راهیسې تر اوسه له ۴۵ زرو ډېر افغانان د جګړو له پاتې ماینونو او ناچاودو مهماتو څخه وژل شوي یا ټپیان شوي دي.

روسیې په افغانستان کې د داعش خراسان ډلې د فعالیتونو په اړه اندېښنه څرګنده کړه

د روسیې د بهرنیو چارو وزارت په افغانستان کې د ترهګرو ډلو، په ځانګړې توګه د اسلامي دولت یا داعش خراسان څانګې د فعالیتونو د دوام په اړه اندېښنه څرګنده کړې او د امنیتي ګواښونو پر وړاندې یې د مبارزې لپاره د سیمه‌ییزو همکاریو د پیاوړتیا غوښتنه کړې ده.

د دغه وزارت ویاندې ماریا زاخارووا د جمعې په ورځ، د نومبر په ۲۰مه، په مسکو کې یوې خبري غونډې ته وویل چې د ترهګرۍ پر وړاندې مبارزه او په افغانستان کې د ثبات ټینګښت د سیمې د امنیت لپاره اړین دي.

دا اندېښنې په داسې حال کې څرګندېږي چې د افغانستان لپاره د اروپايي ټولنې ځانګړي استازي توماس فریلسن له ازادي راډیو سره په خبرو کې ویلي چې دغه ټولنه په افغانستان کې د ترهګرو ډلو فعالیتونه څاري.

خو د طالبانو ویاند ذبیح‌الله مجاهد د پنجشنبې په ورځ یو ځل بیا ادعا وکړه چې داعش خراسان ډله په افغانستان کې ځپل شوې ده.

تر دې مخکې، د ترهګرۍ پر وړاندې د مبارزې په چارو کې د ملګرو ملتونو د سرمنشي مرستیال الکساندر زویف د ازبکستان په سمرقند ښار کې د شانګهای پلس امنیتي غونډې ته ویلي و چې د ملګرو ملتونو د غړو هېوادونو د معلوماتو له مخې، داعش خراسان څانګه د خپلو فعالیتونو د پرمخ وړلو لپاره له بې‌پیلوټه الوتکو او مصنوعي ځیرکتیا څخه کار اخلي.

نور راوښيه

XS
SM
MD
LG