د لاسرسۍ وړ لېنکونه

تازه خبر
شنبه ۲۱ چنګاښ ۱۳۹۹ کابل ۱۱:۴۹

افغانستان

پاکستان افغان صادراتو ته د تورخم او سپین بولدک بندرونه نه‌دي خلاص کړي

تورخم لار

د افغانستان د صنعت او سوداګرۍ وزارت وایي، پاکستان له ژمنې سره سره تر اوسه د تورخم او سپین بولدک بندرونه د دوی د صادراتو په مخ نه‌دي خلاص کړي.

د دغه وزارت د عامه اړیکو مشر جواد دبیر وایي، دغه دروازې داسې مهال بندې دي چې افغانستان کې تازه مېوې او نور کرنیز توکي د حاصلاتو په حال کې دي.

ښاغلي دبیر ازادي راډیو ته وویل، پرون دوی د تازه مېوې له سوداګرو سره ګډه غونډه کې پرېکړه وکړه چې د بندرونو خلاصون ته له ډيپلوماتیکو لارو هڅه وشي.

ده زیاته کړه: "په تأسف سره چې د افغانستان د کرنیزو حاصلاتو په ځانګړې توګه تازه مېوې له رارسېدو سره د پاکستان بندرونه د صادراتو لپاره خلاص نه‌دي، پرېکړه دا وشوه چې ډیپلوماتیک مراجع او خصوصي سکټور باید دا موضوع تعقیب کړي چې تورخم او سپین بولدک لارې صادراتو ته خلاصې شي."

پاکستان د کرونا ویروس له خپرېدو سره هم‌مهاله افغانستان سره د تګ راتګ لارې بندې کړې، خو سوداګرۍ وزارت وایي، چارواکو یې ژمنه کړې وه چې له واړه اختر وروسته به د افغانستان صادراتو ته لاره پرانیزي.

د ورځې تازه خبرونه دلته ولولئ

چارواکي: زابل او ارزګان کې چاودنو ۷ تنو ماشومانو ته مرګ ژوبله اړولې

ارشیف

په زابل او ارزګان کې په یوه ورځ د توغندي او هاوان د چاودنو په دوو جلا پېښو کې اوه تنه ماشومان مړه او ټپیان شول.

لومړۍ پېښه پرون جمعه د زابل د مرکز کلات ښار په ځوځګرې سیمه کې وشوه چې درې ماشومان پکې مړه شول.

د زابل د والي ویاند ګل اسلام سیال په دې اړه آزادۍ راډیو ته وویل:"دښمن د مرکز کلات په ځوځګرې، سیمه کې د راکټ یوه مرمۍ چارج کړې وه څو امنیتي ځواکونو ته مرګ ژوبله واوړي، خو مرمۍ ماشومانو ته په لاس ورغلې او پرې چاودېدلې ده، په پېښه کې درې ماشومان په شهادت رسېدلي او دوه نور ټپیان دي."

ښاغلي سیال زیاته کړه چې افغان ځواکونو ټپي شوي ماشومان، د علاج لپاره د کلات حوزوي روغتون ته رسولي دي.

له بلې خوا د ارزګان په دهراود ولسوالۍ کې هم د هاوان یوه مرمۍ چاودېدلې چې ماشومانو ته یې مرګ ژوبله اړولې.

د ارزګان د والي ویاند زړګي عبادي آزادۍ راډیو ته وویل، له طالبانو پاتې د هاوان یوه مرمۍ پرون مازیګر هغه مهال وچاودېده چې ماشومانو په سیمه کې لوبې کولې.

وسله والو طالبانو د دواړو پېښو په اړه تردې دمه څه نه دي ویلي.

غوڅ ملاتړ ماموریت: د افغان هوايي ځواک یوه الوتکه نسکوره شوې

آرشیف

د ناټو په مشرۍ د غوڅ ملاتړ ماموریت تاییدوي چې د افغان هوايي ځواک یوه الوتکه په افغانستان کې نسکوره شوې ده خو چا ته په کې زیان نه دی اوښتی.

په افغانستان کې د امریکایي ځواکونو قوماندانۍ پرون جمعه په یو بیان کې چې د ایمیل په وسیله یې آزادۍ راډیو ته واستاوه ویلي چې د افغان هوايي ځواک یوه اې ۲۹ سوپرتوکانو الوتکه چې امریکايی پیلوټ چلوله، د تمریناتي الوتنې پرمهال نسکوره شوه خو پیلوټ ځان ایستلی او روغ ځمکې ته راکوز شوی دی.

د امریکا پوځ وايي، لومړنۍ څېړنې یې ښيي چې د الوتکې د نسکورېدو علت تخنیکي ستونزه وه خو زیاتوي چې د پېښې د علت او څرنګوالي په اړه څېړنې روانې دي.

د غوڅ ملاتړ په بیان کې د پېښې د ځای په اړه څه نه دي ویل شوي.

افغانستان کې د خپلو فعالانو خوندیتوب په اړه د بشر حقونو کمېسیون اندېښنه

کابل کې د بشر حقونو دفتر

د افغانستان د بشری حقونو خپلواک کمېسیون وايي چې په هېواد کې د بشري حقونو د فعالانو د خوندیتوب له کبله اندېښنه لري.

له دې مخکې د بخښنې نړیوال سازمان هم ویلي و، چې په افغانستان کې د بشري حقونو ټولنه د چارواکو او وسله والو ډلو له فشار سره مخامخ ده.

د بشري حقونو د خپلواک کمېسیون مرستیال ویاند ذبیح الله فرهنګ پرون د چنګاښ په شلمه آزادۍ راډیو ته وویل، دا کمېسیون په افغانستان کې د بشري حقونو د مدافع ډلو د خوندیتوب لپاره د هرې هڅې ملاتړ کوي.

هغه زیاته کړه: "موږ د بشري حقونو د فعالانو د ساتنې لپاره د هڅو او غوښتنو ملاتړ کوو او په عین حال کې د بشري حقونو پر مدافعانو د هدفي حملو د زیاتېدو له کبله اندېښمن یو."

د بخښنې نړیوال سازمان چې مرکز یې په لندن کې دی پرون- جمعه په یوه بیان کې وویل چې په افغانستان کې د بشري حقونو مدافع ډلې او فعالان له وېرولو، ځورولو، خبرداریو او تشدد سره مخامخ دي.

د بخښنې نړیوال سازمان د افغانستان پر حکومت غږ کړی چې د بشري حقونو د فعالانو د خوندیتوب لپاره یو عملي او اغېزمن مېکانېزم جوړ کړي.

ننګرهار کې نن د ملکي هوايي ډګر د رغولو چارې پیل شوې

ننګرهار

په ننګرهار ولایت کې نن د ملکي هوايي ډګر د رغولو چارې پیل شوې.

د افغانستان د هوايي چلند ادارې د ادارې لوی رئیس قاسم وافي زاده نن د دغه هوايي ډګر د کار د پرانیستلو په مراسمو کې وویل چې دا هوايي ډګر په دوو کلونو کې د څلوېښتو میلیونو ډالرو په لګښت رغول کېږي.

دغه ملکي هوايي چلند ته د ننګرهار د کوز کونړ ولسوالۍ په ګمبیري ډاګ کې دري نیم زره جریبه ځمکه بېله شوې ده.

د ښاغلي وافي‌زاده په خبره په لومړي پړاو کې د ډګر احاطه او په دویم پړاو کې به‌یې رنوې او نور تاسیسات جوړ شي.

د ننګرهار اوسیدونکو له کلونو راهیسې په دې ټینګار درلود چې هلته یو ملکي هوايي ډګر جوړ شي.

افغان ولسمشر اشرف غني وروستی وار ننګرهار ته په سفر کې ژمنه کړې وه چې دا ځل به ننګرهار ته هوايي ډګر جوړوي.

افغانستان کې په کرونا ویروس د اخته خلکو شمېر له ۳۴ زرو واوښت

ارشیف

په افغانستان کې تېر څلورویشت ساعته ۲۸۶ کسان په کرونا ویروس اخته شوي چې له دې سره په دې ویروس د ټولو اخته خلکو شمېر له څلور دېرشو زرو اوښتی دی.

دا معلومات د عامې روغتیا وزارت له‌خوا خپاره شوي.

په دې ډله کې یواځې ۱۴ کسان په تېر یوه شپه او ورځ کې مړه شوي هم دي چې ورسره د مړو شویو خلکو شمېر ۹۷۱ ته رسیدلی.

د هغو خلکو شمېر چې ښه شوي نږدې یوویشت زرو ته پورته شوی.

سولې ولسي حرکت: ښکېلو خواوې دې د سولې واک درېيمګړو ته وسپاري

د سولې ولسي حرکت

د سولې ولسي حرکت وايي، حکومت او طالبان دې درېيمګړو ته اجازه ورکړي چې یوه ګډه کمېټه جوړه او د سولې لپاره کار وکړي.

دې حرکت د افغانستان په ۲۰ ولایتونو کې د سولې په ننګه د هم‌مهالو غونډو له جوړولو وروسته د پنجشنبې په ورځ په یوه اعلامیه کې وویل، له ټولو ښکېلو خواوو غواړي چې جګړه ودروي.

د دې حرکت یوه مخکښ غړي اقبال خیبر ازادي راډیو ته وویل چې له ښکېلو خواوو غواړي چې د سولې واک درېيمګړو ته وسپاري.

ښاغلی خيبر زياتوي: "تراوسه په نړۍ کې نه‌دي لیدل شوي چې دوه خواوې چې ۲۰ کاله‌یې له یو بل سره جګړه کړې وي، په خپل منځ کې خبرو ته کېني نو ښه دا ده چې دواړه خواوې افغان ولس او ملګرو ملتونو ته موقع ورکړي چې د سولې د راوستلو لپاره یوه کمېټه جوړه کړي څو د ښکېلو خواوو ترمنځ سوله‌ییزه فضا رامنځته او د سولې پروسه چټکه کړي."

ښاغلی خیبر وايي، د سولې ولسي حرکت باور لري چې د جګړې د درېدو په صورت کې که د سولې خبرې هر څومره اوږدې شي، ستونزه نه‌شته ځکه چې ولس به له مرګ ژوبلو او مصیبتونو خلاص وي.

د تورغنډۍ ګمرک امنيتي مسؤل ووژل شو

ارشیف

نامعلومو وسله‌والو پرون د تورغنډۍ ګمرک امنیتي مسؤل وواژه.

په هرات ولایت کې یوې امنیتي سرچینې ازادي راډیو ته وویل، نامعلومو وسله‌والو پرون ناوخته د هرات-تورغنډۍ پر لویه لار د تورغنډۍ ګمرک د امنیتي ټولي پر مسؤل میرویس حمله وکړه، هغه‌یې وواژه او د نوموړي درې ساتونکي یې وتښتول.

د راپورونو له مخې، په وروستیو کې د هرات د لویو لارو په اوږدو کې ناامنۍ ډېرې شوې دي.

له دې جلا پرون د بغلان ولایت د دوشي-خنجان په لویه لار کې د دې ولایت د انتخاباتو د کمېسیون پر رئيس نورالله پیغام برید وشو چې په نتیجه کې یې نوموړی ټپي شو.

طالبانو د نږدې ۶۰۰ بندیانو یو بدیل لېست افغان حکومت ته سپارلی

طالبان

طالبانو د نږدې ۶۰۰ هغو بندیانو یو بدیل لېست افغان حکومت ته سپارلی چې په خوشې کولو باندې یې لانجې روانې وې.

یوې معتبره حکومتي سرچینې دغه خبره نن ازادي راډیو ته وکړه.

حکومت څه باندې څلور زره طالب بندیان تر اوسه خوشې کړي، خو د راپورونو په اساس د طالبانو له‌خوا په مخکېني سپارل شوي لېست کې نږدې ۶۰۰ داسې کسان شامل و چې حکومت‌یې له خوشې کولو سره نه‌و جوړ.

د طالبانو او امریکا د فبرورۍ ۲۹مې د موافقې له مخې افغان دولت تر پنځه زره طالب بندیان او طالبان‌یې په بدل کې زر حکومتي بندیان خوشې کوي.

د طالبانو د سیاسي دفتر ویاند سهیل شاهین نن ازادي راډیو ته په یوه لنډکي پیغام کې وویل چې تر اوسه د طالبانو د بندیانو کمېسیون افغان حکومت ته د نوي لېست د سپارلو مسئله نه‌ه تأیید کړې، نو بناً د ده په خبره دا موضوع حقیقت نه‌لري.

عبدالله عبدالله د ځینو نوماند وزیرانو لېست ولسمشر غني ته وسپاره

ولسمشر غني او عبدالله عبدالله

د افغانستان د ملي مصالحې عالي شورا مشر عبدالله عبدالله ته یوې نږدې سرچینې ازادي راډیو ته تأیید کړه چې ښاغلي عبدالله د خپلې برخې د نوماند وزیرانو لېست بشپړ او تېره ورځ ولسمشر غني ته سپارلی دی.

دغه سرچینه وايي چې د ښاغلي عبدالله په لېست کې؛

۱- مسعود اندرابي - کورنیو چارو وزارت
۲- فضل احمد معنوي - عدلیې وزارت
۳- انوارالحق احدي - کرنې وزارت
۴- نور رحمان اخلاقي - کډوالو وزارت
۵- محب‌الله صمیم - د قومونو او قبایلو وزارت
۶- مصطفی مستور - سولې وزارت
۷- معصومه خاوري - مخابراتو وزارت
۸- نثار احمد غوریاني- سوداګرۍ وزارت
۹- سعادت منصور نادري - اقتصاد وزارت
۱۰- بشیر احمد ته‌ینج - کار او ټولنیزو چارو وزارت
۱۱- کنشکا ترکستاني - لوړو زده‌کړو وزارت
۱۲- عباس بصیر - ټرانسپورت وزارت
۱۳- نجیب آقا فهیم - د شهیدانو او معلولینوړ په چارو کې د دولت وزارت
۱۳- عزیزالله آرینفر - اداري اصلاحاتو ریاست

شامل دي.

ښاغلی عبدالله له ولسمشر غني سره د سیاسي هوکړې پر بنسټ توافق کړی و چې د کابینې ځیني نوماند وزیران او ځیني نور چارواکي به دی ګماري.

د افغانستان ولسي جرګې تل په کابینه کې پر سرپرستۍ او د باور رایې اخیستو لپاره دغې جرګې ته د نوماند وزیرانو پر نه‌معرفي کېدو انتقاد کړی دی.

تخار کې د 'کووېډ-۱۹' ناروغانو لپاره سل بستریز روغتون جوړ شو

ارشیف، انځور تزئیني بڼه لري.

په تخار کې د 'کووېډ-۱۹' ناروغۍ سل بستره روغتون د ناروغانو لپاره چمتو شو.

پر دې روغتون چې پرون په مرکز تالقان کې پرانیستل شو، تر ۱۴ میلیونه ډېرې افغانۍ لګېدلې دي.

د افغانستان عامې روغتیا وزارت پرون وویل چې په تېرو ۲۴ ساعتونو کې ۲۱۰ تنه په کرونا ویروس اخته شوي چې له دې سره پر دې ناروغۍ د ټولو اخته کسانو شمېره نږدې ۳۳ زره ۶۰۰ ته ورسېده.

امریکا په افغانستان کې له بې‌وزلو سره ۴۹ میلیونه ډالره مرسته وکړه

ارشیف، د مرستې په تمه یو شمېر بې‌وزله خلک

د امریکا نړیوالې پراختیایي ادارې (یو.اېس.اېډ) په افغانستان کې له بې‌وزلو سره د خوراکي موادو لپاره د ۴۹ میلیونه ډالرو مرسته اعلان کړه.

دا مرسته به د ملګرو ملتونو د خوړو نړیوال پروګرام (ډبلیو.اېف.پي) تر اړمنو کسانو ورسوي.

د افغانستان لپاره د (ډبلیو.اېف.پي) مرستیال مشر رابرټ کاسکا وایي، دا مرستې یې په داسې وخت کې ترلاسه کړې دي چې له اټکل سره سم نږدې څلور میلیونه افغانان د خوراکي موادو له سخت کمبود سره مخامخ دي.

د خوراکي موادو دا مرسته به له نږدې یو میلیون هغو بې‌وزلو سره وشي چې جګړو ځپلي دي یا یې د طبیعي افتونو له امله اقتصاد خراب شوی دی.

اتل قول اردو: کندهار کې ۷ تنه طالبان وژل شوي

ارشیف

د کندهار امنیتي چارواکي په معروف ولسوالۍ کې د اووه طالبانو د وژلو ادعا کوي.

په کندهار کې د ۲۰۵ اتل قول اردو قوماندانۍ مرستیال ویاند صادق عیسي ازادي راډیو ته پرون وویل چې طالبانو تر غرمې مخکې غوښتل چې د معروف ولسوالۍ پر امنیتي پوستو بریدونه وکړي، خو مخکې تر دې چې برید وکړي هوایي ځواکونو حمله پرې وکړه.

نوموړي زیاته کړه: "اووه تنه ترهګر ووژل شول او درې تنه‌یې ټپيان شول. په وژل شویو کې د فرید په نوم د ترهګرو یو قوماندان هم شامل دی."

ښاغلي عیسی زیاته کړه چې د طالبانو یو شمېر وسلې او مهمات هم د دې هوایي برید له امله له‌منځه تللي دي.

طالبانو د دې پېښې په تړاو څه نه‌دي ویلي.

افغان حکومت: سلګونه خطرناک طالب بندیان نه خوشې کوو

د خوشې شویو طالبانو انځور

افغان چارواکي وايي چې دوی به سلګونو هغه طالبان چې ډېر خطرناک ګڼل کېږي، نه راخوشې کوي.

دا خبره د افغانستان د ملي امنیت شورا ویاند جاوېد فیصل فرانسې خبري اژانس ته کړې ده.

ده ویلي چې طالبانو غوښتنه کړې چې شپږ سوه طالب زندانیان راخوشې شي خو پر دغو کسانو د جنايي جرمونو جدي قضيې دي.

یوه بل چارواکي د نوم نه ښودلو په شرط ویلي چې په دغو کې قاتلان، غله او سلګونو بهرني جګړه ماران شامل دي.

خو طالبانو پر حکومت تور پوري کړی چې د دغو بندیانو پر وړاندې يې جعلي قضیې جوړې کړي دي.

تر دې مخکې د عدلي او قضايي ارګانونو یوې باخبره سرچینې ازادي راډیو ته د سلو طالب زندانیانو یو فهرست سپارلی وو چې په وینا یې په دې نوملړ کې ۸۱ داسې کسان دي چې د طالبانو د ډلې غړیتوب نه لري او په جنايي جرمونو محکوم شوي دي.

د امریکا او طالبانو تر منځ د فبرورۍ میاشتې د موافقې له مخې د بین الافغاني خبرو تر پیل مخکې به افغان حکومت ۵ زره طالب زندانیان او طالبان به د افغان حکومت زر بندیان راخوشې کوي.

افغان حکومت وايي تر اوسه یې له خپلو زندانونو د طالبانو ۳۹۹۵ بندیان راخوشې کړي دي او د طالبانو په وینا دوی تر اوسه له خپلو زندانونو ۶۵۱ بندیان راخوشې کړي دي.

غني د کاپیسا ولایت د وضعیت ارزولو په هدف محمودراقي ته رسېدلی

محمداشرف غني

افغان ولسمشر د کاپیسا ولایت د وضعیت ارزولو په خاطر د دې ولایت مرکز محمودراقي ښار ته تللی دی.

د جمهوري ریاست ارګ د اعلامیې له مخې، محمد اشرف غني له ملکي او نظامي مسئولینو سره د خلکو په یوه پراخه غونډه کې خبرې کوي چې پکې قومي مشرانو، متنفزین، عالمان، ښځې او ځوانان ګډون کوي.

ولسمشر به همداراز د هغوی وړانديزونه واوري.

کاپیسا ولایت ته د ولسمشر غني سفر په داسې حال کې دی چې د دې ولایت په ولسوالیو کې د ناامنیو زیاتېدو راپورونه ورکړل شوي دي.

ولایتي شورا: پکتیکا کې ۵ ولسوالۍ د وسله‌والو طالبانو لاس کې دي

پکتیکا

د پکتیکا د ولایتي شورا یو شمېر غړي او اوسېدونکي وایي چې د دې ولایت پنځه ولسوالۍ په بشپړ ډول د وسله‌والو طالبانو په لاس کې دي او په یو څو نورو ولسوالیو کې بیا نیم دولت او نیم وسله‌وال طالبان فعالیت لري.

د پکتیکا د ولایتي شورا غړی افسر خان سلیمان‌خېل وایي چې د دې ولایت پنځه ولسوالۍ په بشپړه توګه له وسله‌والو طالبانو سره دي.

نوموړی وایي، د امنیتي ځواکونو ترمنځ نا همغږي او فساد د دې لامل شوی چې یادې ولسوالۍ تر اوسه د حکومت تر کنټرول لاندې رانه‌شي.

د ولایتي شورا دغه غړی وایي چې د یادو ولسوالیو ولسوالان له ګاونډیو ولسوالیو او یا هم له مرکز ښرنې خپلې چارې مخکې بیایي، هغه څه چې د یو شمېر دغو ولسوالیو د نقل مکان خبره د پکتیکا ولایتي اداره هم تأییدوي.

د پکتیکا ولایت ۱۸ رسمي او څلور غیر رسمي ولسوالۍ لري.

د پکتیکا والي مجیب‌الرحمن څمکنی وایي، د ګوشتې په سیمه کې لویه لاره چې په مسیر یې د دې ولایت درې ولسوالۍ پرتې دي، له تېرو ۱۸ کالونو راهیسې د وسله‌والو طالبانو له‌خوا بنده شوې ده او دې ولسوالیو ته د هوا له لارې اکمالات ترسره کېږي.

د پکتیکا یو شمېر ولسوالیو د امنیت په اړه د ولایتي شورا او خلکو اندېښنې په داسې مهال راپورته کېږي چې دې ولایت ته غځېدلې لویې لارې له تېرو شااوخوا ۱۰ کالونو راهیسې ناامنه دي او د عمومي لارو په یو شمېر برخو کې وسله‌وال طالبان چک پاینټونه اچوي او تلاشۍ کوي.

نور راوښيه

XS
SM
MD
LG