د لاسرسۍ وړ لېنکونه

تازه خبر
جمعه ۸ زمری ۱۴۰۰ کابل ۰۷:۱۵

افغانستان

پروان چارواکي: سږ کال د زردالو د محصولاتو کچه زرګونه مټریک ټنه ده

دا مهال په دغه ولایت کې د زردالو دوه زره او ۲۹۸ هکټار بڼونه موجود دي.

د پروان ولایت د کرنې، اوبو لګولو او مالدارۍ ریاست وایي، سږ کال د پروان د زردالو د محصولاتو کچه به نږدې ۲۳ زره او ۸۰۰ مټریک ټنه وي.

د پروان ولایت د کرنې رییس عبدالوهاب خیرزاد نن ازادي راډیو ته وویل، دا وړاندوینه د پروان لایت د کرنې او مالدارۍ ریاست د کلنيو معلوماتو پر بنسټ تر سره کېږي.

د نوموړي په خبره، دا مهال په دغه ولایت کې د زردالو دوه زره او ۲۹۸ هکټار بڼونه موجود دي.

د پروان ولایت د کرنې ریاست وایي، چې په وروستیو کلونو کې په دې ولایت کې د زردالو څلور زره او ۵۰۰ نوي بڼونه جوړ شوي دي، پنځه زره او ۸۱۰ بڼوال د بڼوالۍ په بېلابېلو برخو کې روزل شوي دي او پر څه باندې دوه زره بڼوالو د بڼوالۍ اړونده توکي هم وېشل شوي دي.

د پروان ولایت د کرنې ریاست د معلوماتو له مخې دمګړۍ په دې ولایت کې پنځه زره او ۷۴۵ بزګران د زردالو په پالنه بوخت دي.

د پروان ولایت د زردالو نږدې ۱۰ سلنه محصولات د دې ولایت کورني اړتیا پوره کوي او نږدې ۳۰ سلنه یې د کشتې په ډول او نږدې ۶۰ سلنه نور یې کورنیو او بهرنیو بازارونو ته صادرېږي.

د ورځې تازه خبرونه دلته ولولئ

نی: طالبانو د ارزګان 'دهراوود غږ' راډیو وسایل لوټ کړي او ودانۍ یې ورنړولې

ارشیف

د ازادو رسنیو د ملاتړ اداره، نی وايي، وسله‌والو طالبانو د ارزګان د دهراوود له نیولو وروسته په دې ولسوالۍ کې د دهراوود غږ راډیو وسایل لوټ کړي او ودانۍ یې ورنړولې ده.

د ارزګان د والي ویاند احمد شاه ساحل هم تأیید کړې چې طالبانو د دهراوود غږ راډیو ودانۍ نړولې او د راډیو وسایل‌یې لوټ کړي دي.

د رسنیو د ملاتړ ادارې، نی پر ښکېلو خواوو غږ کړی چې رسنیو او خبریالانو ته زیان وانه‌ړوي.

نی وايي، سره له دې چې طالبانو ویلي و چې له خبریالانو او رسنیو سره کار نه‌لري، خو اوس لیدل کېږي چې دوی د خپلو ژمنو خلاف عمل کوي او غړي یې د رسنیو لوټ او ویجاړولو ته دوام ورکوي.

د نی د راپور پر اساس، تر دې وړاندې طالبانو د هرات په شینډنډ ولسوالۍ کې د وطن راډیو وسایل لوټ کړي وو او د دې راډو غږ یې د تل لپاره غلی کړ.

وسله‌والو طالبانو تر اوسه د نی د دغې ادعا په اړه غبرګون نه‌دی ښودلی.

د المپيک لوبې؛ افغان لوبغاړې کیمیا یوسفي نوی ریکاډ ثبت کړ

افغان لوبغاړې کیمیا یوسفي

افغان لوبغاړې کیمیا یوسفي د توکیو په المپیک لوبو کې نوی ریکاډ ثبت کړ.

کیمیا یوسفي په المپیک لوبو کې د ۱۰۰ مترو واټن په ۱۳،۲۹ ثانیو کې وواهه او د خپل ۹ کسیز ګروپ اووم مقام‌یې وګاټه.

تر دې وړاندې کیمیا یوسفي همدومره واټن په ۱۳،۳۳ ثانیو کې کچ کړی و او په دې توګه‌یې په المپیک لوبو کې د ځان په نوم نوی ریکاډ ټینګ کړ.

سیګار: د امریکا او طالبانو موافقه د طالبانو د بریدونو د زیاتېدا سبب شوې

د ۲۰۲۰ کال د فبروري په ۲۹مه په قطر کې د امریکا او طالبانو موافقه

د افغانستان بیارغونې لپاره د امریکا متحده ایالاتو د ځانګړي سرمفتش دفتر یا سیګار په خپل تازه راپور کې ویلي چې د امریکا او طالبانو موافقه د دې پر ځای چې د افغانستان د حکومت او طالبانو ترمنځ په خبرو کې د پرمختګ سبب شي، د طالبانو د بریدونو د زیاتېدا سبب شوې ده.

په دې راپور کې راغلي چې له موافقې وروسته د طالبانو حملې دوه برابره ډېرې شوي او ورسره د ملکي وګړو مرګ‌ژوبلې ډېرې شوې دي.

پرون د افغانستان د سولې وزارت په یوه راپور کې وویل چې د سږ کال له پیله تر اوسه طالبانو هره میاشت کابو ۳۵ سلنه حملې ډېرې کړې دي.

د افغان ترجمانانو او سلاکارانو لومړۍ ډله له خپلو کورنیو سره امریکا ته ورسېده

ارشیف، د امریکا د واشنګټن هوايي ډګر

د هغو افغانانو چې د امریکا له پوځ سره‌یې د ترجمانانو او سلاکارانو په توګه کار کړی وو، لومړۍ ډله د خپلو کورنیو له غړو سره د امریکا خاورې ته ورسېده.

دا ډله به چې شمېر یې ۲،۵۰۰ تنه دی، تر هغو پورې چې د مهاجرت د ویزې پروسه‌یې بشپړېږي، د ویرجینیا ایالت په فورټ لي پوځي اډه کې په موقت ډول دېره شي.

له دې سره هم‌مهاله د امریکا متحده ایالاتو کانګرس د رایو په لوی اکثریت هغه اضطراري لایحه تصویب کړه چې له مخې یې په افغانستان کې هغو کسانو ته د ویزو شمېر زیاتېږي چې له امریکايانو سره‌یې کار کړی دی.

د دوو میلیارد او ۱۰۰ ملیونو ډالرو په ارزښت دغه لایحه په قانون د بدلېدو لپاره د ولسمشر جو بایډن توشېح ته اړتیا لري.

د امریکا مشرانو جرګې دغه لایحه د پنجشنبې په ورځ تصویب کړه چې وروسته د استازو جرګې هم سم د لاسه تصویب کړه.

د دې لایحې له مخې هغو افغانانو ته چې په افغانستان کې یې له امریکایانو سره کار کړی، ۸،۰۰۰ نورې ویزې برابرېږي او د دوی د لېږد، استوګنځیو او نورو ضروري خدماتو لپاره ۵۰۰ ملیونه ډالره په پام کې نیول شوي دي.

زابل کې پر یوه کور د هاوان مرمۍ د لګېدلو له امله درې ملکیان ووژل شول

د زابل ولایت مرکز کلات ښار چوک

د زابل ولایت مرکز کلات اړوند په کلا کلي کې پر یوه کور د هاوان د مرمۍ د لګېدلو له امله درې ملکیان وژل شوي او اته نور ټپیان شوي دي.

د زابل د ولایتي روغتون سرطبیب ډاکتر نظیر حریفال نن ازادي راډیو ته د تېرې شپې له پېښې د لېږدول شویو مړو او ټپیانو په اړه وویل: "ولایتي روغتون ته ۱۱ کسان راوړل شوي چې له دې ډلې درې تنه شهیدان او اته تنه ټپیان وو. دوی اوس په ولایتي روغتون کې بستر دي."

د زابل امنیه قوماندان جنرال ویس صمیمي رسنیو ته ویلي هاوان مرمۍ د وسله‌والو طالبانو له‌خوا توغول شوې ده، خو طالبانو تر اوسه په دې اړه څه نه‌دي ویلي.

کانګرس له امریکا سره کارکوونکو افغانانو ته د ویزو د زیاتولو لایحه تصویب کړه

ارشیف، د امریکا کانګرس

د امریکا متحده ایالاتو کانګرس د رایو په لوی اکثریت هغه اضطراري لایحه تصویب کړه چې له مخې یې په افغانستان کې هغو کسانو ته د ویزو شمېر زیاتېږي چې له امریکايانو سره‌یې کار کړی دی.

د دوو میلیارد او ۱۰۰ ملیونو ډالرو په ارزښت دغه لایحه په قانون د بدلېدو لپاره د ولسمشر جو بایډن توشېح ته اړتیا لري.

د امریکا مشرانو جرګې دغه لایحه د پنجشنبې په ورځ تصویب کړه چې وروسته د استازو جرګې هم سم د لاسه تصویب کړه.

د دې لایحې له مخې هغو افغانانو ته چې په افغانستان کې یې له امریکایانو سره کار کړی، ۸،۰۰۰ نورې ویزې برابرېږي او د دوی د لېږد، استوګنځیو او نورو ضروري خدماتو لپاره ۵۰۰ ملیونه ډالره په پام کې نیول شوي دي.

د تخار چارواکي: پر تالقان ښار د طالبانو ډله‌ییزه حمله په شا وتمبول شوه

ارشیف، تخار کې د افغان ځواکونو عملیات

د تخار ولایت چارواکي وايي چې پر تالقان ښار یې د وسله‌والو طالبانو ډله‌ییزه حمله په شا تمبولې ده.

د تخار د امنیه قوماندانۍ ویاند خلیل اسیر نن ازادي راډیو ته وویل چې وسله‌والو طالبانو تېره شپه له څو لورو پر دغه ښار حملې پلان کړې وې چې د امنیتي ځواکونو له مقاومت سره مخامخ شول.

د اسیر په وینا، په وسله‌واله نښته کې ۱۳ وسله‌وال طالبان وژل شوي او ۱۶ تنه نور ټپیان شوي دي.

د تخار ولایت چارواکو د درېیو سرتېرو د ټپي کېدو خبر هم تأیید کړی دی.

وسله‌والو طالبانو د دې موضوع په اړه تبصره نه‌ده کړې.

طالبانو د کندهار-ترینکوټ عمومي لار پر خلکو 'بنده' کړې

ارشیف، د ارزګان د ترینکوټ ښار یوه څنډه

وسله‌والو طالبانو د کندهار او ارزګان د ترینکوټ ترمنځ عمومي لار پر خلکو بنده کړې ده.

د سیمې اوسېدونکو ازادي راډیو ته وویل چې وسله‌والو طالبانو له درې ورځو راهیسې دا لار بنده کړې او له کبله‌یې دوی له سختو کړاوونو سره مخامخ شوي دي.

ډېر موټر چلوونکي او مسافر په ترینکوټ کې بند پاتې دي او د خوراکي موادو بیې لوړې شوې دي.

وسله‌والو طالبانو تر اوسه په دې اړه څه نه‌دي ویلي.

عمران خان: د پاکستان حکومت د طالبانو ویاند نه‌دی

د پاکستان صدراعظم عمران خان

د پاکستان صدراعظم عمران خان وايي، د پاکستان حکومت د طالبانو ویاند نه‌دی او اسلام‌اباد له افغانستانه د امریکايي او ناټو ځواکونو له وتلو وروسته د افغانستان د حالاتو مسؤلیت په غاړه نه‌لري.

عمران خان پرون/ پنجشنبه په اسلام‌اباد کې د افغانستان د رسنیو له استازو سره په کتنه کې همداراز وویل، پاکستان به له هر هغه چا سره ښې اړیکې ولري چې افغانان‌یې غوره کوي.

ده زیاته کړه: "څه چې طالبان کوي یا یې نه‌کوي، زموږ سره ارتباط نه‌لري. موږ یې مسؤله نه‌یوو او نه د طالبانو ویندویان یوو."

د افغانستان حکومت تور لګوي چې د طالبانو مشران په پاکستان کې دي او پاکستان د دې ډلې مالي او تسلیحاتي ملاتړ کوي، خو پاکستان د طالبانو د ملاتړ تور ردوي.

د افغانستان بهرنیو چارو وزارت: اسناد ښيي چې سلسله علي‌خېل تښتول شوې

په اسلام‌اباد کې د افغانستان د سفیر لور سلسله علي‌خېل

د افغانستان بهرنیو چارو وزارت وايي، ټول ترلاسه شوي اسناد ښيي چې په اسلام‌اباد کې د افغانستان د سفیر لور د سرطان په پنځمه تښتول شوې او شکنجه شوې ده.

د افغانستان د بهرنیو چارو وزارت دا خبره پرون/ پنجشنبه وروسته له دې په یوه اعلامیه کې وکړه چې د پاکستان صدراعظم عمران خان وویل، د افغانستان د سفیر لور سلسله علي‌خېل له پاکستانه وتلې، خو په ترلاسه شویو تصویرونو کې نه‌ثابتېږي چې هغه دې تښتول شوې یا ځورول شوې وي.

خو د افغانستان د بهرنیو چارو وزارت وايي، هېڅ دلیل هغه جنایت توجیه کولای نه‌شي چې د طبي راپورونو او نورو اسنادو پر اساس ثابت شوی وي.

دغه وزارت همداراز وايي، د پاکستان حکومت له نړیوالو ژمنو او تړونونو سره سم د ډیپلوماتیکو استازولیو، افغان ډیپلوماتانو او د هغوی د کورنیو د غړو د امنیت ساتنې مسؤلیت لري.

دغه وزارت له پاکستانه غوښتي چې د پېښې د څېړنې په اړه خپلې هڅې چټکې کړي، د هغې عاملان سمدستي ونیسي او سزا ورکړي.

افغانستان د دې پېښې په اعتراض کې خپل سفیر او ډیپلوماتان له اسلام‌اباد څخه وروبلل.

ننګرهار کې تر ۹۰ کیلوګرامو ډ‌ېر چرس او نشه‌يي ګولۍ ونيول شوې

ارشیف، د افغانستان کندز ولایت کې نیول شوي نشه‌یي مواد

په ننګرهار ولايت کې تر ۹۰ کیلوګرامو ډ‌ېر چرس او نشه‌يي ګولۍ نیول شوي دي.

له نشه‌يي موادو سره د مبارزې ځانګړو پولیسو د ننګرهار په پچيراګام ولسوالۍ کې پر يوه کور عمليات وکړل چې په نتيجه کې يې ۸۸ کيلوګرامه چرس ونيول شول.

له نشه‌يي موادو سره د مبارزې معينيت د رسنيو دفتر ازادي راډيو ته وويل چې پولیسو د جلال‌اباد ښار د نهمې ناحيې پر يوه بل کور هم عملیات وکړل چې په نتيجه کې يې د ټابلېټ کا په نوم ۱،۲۳۰ نشه‌يي ګولۍ ونيول شوې.

د دې دوو قضیو په تړاو دوه تنه هم نيول شوي دي.

نيمروز کې درې ټنه نشه‌يي مواد وسوځول شول

ارشیف، د افغانستان هرات ولایت کې د نشه‌یي موادو سوځول

په نيمروز ولايت کې درې ټنه نشه‌يي مواد سوځول شوي دي.

په دې نشه‌يي موادو کې ۱۶۴ کيلوګرامه هيروئين، ۷۰۴ کيلو ګرامه ترياک، ۵۳ کيلو ګرامه چرس او ۱۳۰ کيلو ګرامه وچ کیمياوي مواد شامل دي.

دا نشه‌يي مواد د تېر شمسي کال د وروستيو میاشتو څخه نيولې بيا د روان کال د اسد تر مياشتې پورې نيول شوي وو.

د نيمروز ولايت امنيه قوماندان وحيدالله نظامي ازادي راډيو ته وويل چې د دې قضيو په تړاو ۲۳ نفره نيول شوي او د عدلي او قضايي ادارو له‌خوا په مجازاتو محکوم شوي دي.

افغانستان کې د نشه‌يي موادو ۷۶ قاچاق کوونکي په مجازاتو محکوم شول

ارشیف

له نشه‌يي موادو سره د مبارزې عدلي او قضايي مرکز د نشه‌يي موادو ۷۶ قاچاق کوونکي په مجازاتو محکوم کړل.

د دې مرکز وياند خالد مؤحد ازادي راډيو ته وويل چې دوی د روان کال د سرطان په مياشت کې د نشه‌يي موادو ۵۱ قضيې څېړلي او د نشه‌يي موادو قاچاق کوونکي يې له يوه څخه نيولې بیا تر ۳۰ کالو پورې په بند باندې محکوم کړي دي.

د روان کال د سرطان په مياشت کې کابل د ۱۷ او ننګرهار د ۱۰ قضیو په درلودلو سره د هغو ولايتونو د لېست په سر کې راځي چې د نشه‌يي موادو ډېرې پېښې په‌کې ثبت شوې دي.

د المپیک لوبې؛ سبا درې افغان لوبغاړي سیالۍ کوي

د توکیو دوبني المپیک لوبو کې افغان لوبغاړي

د دوبني المپیک به لوبو کې ټاکل شوې چې سبا درې افغان لوبغاړي سیالۍ وکړي.

د افغانستان د المپیک د ملي کمېټې ویاند عارف پیمان ازادي راډیو ته وویل: "د پنځو افغان لوبغاړو څخه چې د توکیو د المپیک په لوبو کې برخه لري، فرزاد منصوري او مهدي یاوري په تکواندو او نښه ویشتلو کې متأسفانه د لوبو له دوام حذف شول، کومه بریا یې نه‌درلوده. یوازې درې لوبغاړي پاتې دي چې لوبې یې سبا پیلېږي، د منډې په برخه کې کیمیا یوسفي او شاه محمود نبرد دي او د لامبو په برخه کې فهیم انوري دی."

د توکیو د المپیک په روانو دوبنیو سیالیو کې څلور نارینه او یوه نجلۍ ورزشکاران د افغانستان په استازیتوب لوبېږي.

د افغانستان بهرنیو چارو وزارت له طالبانو د چین د وروستۍ غوښتنې هرکلی وکړ

پیکېنګ کې د چین بهرنیو چارو وزیر وانګ یي (ښی) او د طالبانو د قطر سیاسي دفتر مشر ملا برادر لیدنه

د افغانستان د بهرنیو چارو وزارت له طالبانو څخه د چین د هغې غوښتنې هرکلی کړی چې ورته‌یې ویلي د ختیځ ترکستان د اسلامي غورځنګ په شمول دې د ترهګرو ډلو سره اړیکې پرې کړي.

د افغانستان د بهرنیو چارو وزارت نن په یوې خبرپاڼه کې ویلي، چینايي چارواکو دا مسئله د هغه طالب هیئت سره یاده کړې چې چین ته په سفر تللی و.

تر دې مخکې د چین د بهرنیو چارو وزارت ویاند هم ویلي و چې هیله‌مند دي طالبان به د ختیځ ترکستان د اسلامي غورځنګ په شمول له ترهګرو ډلو سره د بېلتون یو روښانه کرښه رامنځته کړي او همدارنګه‌یې له طالبانو غوښتي چې تر خپل واک لاندې سیمو کې دې د ختیځ ترکستان د اسلامي غورځنګ ډله وځپي.

دا غورځنګ چې چین ترې وېره لري له اویغور ټبرو مسلمانانو جوړ دی چې د چین له سیاستونو سره مخالف دي.

لوېدیځ هېوادونه وايي چین په شینجن ایالت کې شااوخوا یو ملیون اویغوریان او نور اقلیت مسلمانان په ځانګړو کمپونو کې ساتلي.

چینايي چارواکي وايي دا کمپونه روزنیزه بڼه لري او د ترهګرۍ د مخنیوي لپاره‌یې رامنځته کړي دي.

د افغانستان د بهرنیو چارو وزارت په خبرپاڼه کې ویل شوي چې د سیمه‌ییزو او نړیوالو ترهګرو ډلو سره د طالبانو نږدې اړیکې نه‌یوازې په افغانستان کې د جګړې د دوام او وینې تویېدو سبب کیږي، بلکې د سیمې ثبات ته جدي ګواښ پېښوي.

طالبانو په ټینګار رد کړې چې ګوندې دا ډله دې د سیمې یا نړۍ له ترهګرو ډلو سره اړیکې ولري.

نور راوښيه

XS
SM
MD
LG